| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೫. ಭೀತಾಸುತ್ತವಣ್ಣನಾ
5. Bhītāsuttavaṇṇanā
೭೫. ಕಿಂ ಸೂಧ ಭೀತಾತಿ ಏತ್ಥ ಸು-ಇಧಾತಿ ನಿಪಾತಮತ್ತನ್ತಿ ಆಹ ‘‘ಕಿಂ ಭೀತಾ’’ತಿ? ಮಗ್ಗೋ ಚ ನೇಕಾಯತನಪ್ಪವುತ್ತೋತಿ ಅನೇಕಕಾರಣಂ ನಾನಾವಿಧಾಧಿಗಮೋಕಾಸಂ ಕತ್ವಾ ಪವುತ್ತೋ ಕಥಿತೋ। ತೇನಾಹ ‘‘ಅಟ್ಠತಿಂಸಾರಮ್ಮಣವಸೇನಾ’’ತಿಆದಿ। ಏವಂ ಸನ್ತೇತಿ ಏವಂ ಸಬ್ಬಸಾಧಾರಣಾನೇಕಾಯತನೇಹಿ ನಿಬ್ಬಾನಗಾಮಿಮಗ್ಗಸ್ಸ ತುಮ್ಹೇಹಿ ಪವೇದಿತತ್ತಾ ಲಬ್ಭಮಾನೇ ಖೇಮೇ ಮಗ್ಗೇ ಕಿಂ ಭೀತಾಯಂ ಜನತಾ ಉಪ್ಪಥಭೂತಾ ವಿಪರೀತದಿಟ್ಠಿತೋ ಗಣ್ಹೀತಿ ಅತ್ಥೋ? ಏವಂ ದೇವತಾ ಯಥಿಚ್ಛಾಯ ಪುರಿಮದ್ಧೇನ ಅತ್ತನಾ ಯಥಾಚಿನ್ತಿತಮತ್ಥಂ ಸತ್ಥು ಪವೇದಿತಾ, ಪಚ್ಛಿಮದ್ಧೇನ ಅತ್ತನೋ ಸಂಸಯಂ ಪುಚ್ಛತಿ। ಬಹುಪಞ್ಞಾತಿ ಪುಥುಪಞ್ಞ। ಉಸ್ಸನ್ನಪಞ್ಞಾತಿ ಅಧಿಕಪಞ್ಞಾ। ಠಪೇತ್ವಾತಿ ಸಂಯಮೇತ್ವಾ। ಸಂವಿಭಾಗೀತಿ ಆಹಾರಪರಿಭೋಗೇ ಸಮ್ಮದೇವ ವಿಭಜನಸೀಲೋ। ತೇನಾಹ ‘‘ಅಚ್ಛರಾಯಾ’’ತಿಆದಿ। ವುತ್ತತ್ಥಮೇವ ಹೇಟ್ಠಾ।
75.Kiṃ sūdha bhītāti ettha su-idhāti nipātamattanti āha ‘‘kiṃ bhītā’’ti? Maggo ca nekāyatanappavuttoti anekakāraṇaṃ nānāvidhādhigamokāsaṃ katvā pavutto kathito. Tenāha ‘‘aṭṭhatiṃsārammaṇavasenā’’tiādi. Evaṃ santeti evaṃ sabbasādhāraṇānekāyatanehi nibbānagāmimaggassa tumhehi paveditattā labbhamāne kheme magge kiṃ bhītāyaṃ janatā uppathabhūtā viparītadiṭṭhito gaṇhīti attho? Evaṃ devatā yathicchāya purimaddhena attanā yathācintitamatthaṃ satthu paveditā, pacchimaddhena attano saṃsayaṃ pucchati. Bahupaññāti puthupañña. Ussannapaññāti adhikapaññā. Ṭhapetvāti saṃyametvā. Saṃvibhāgīti āhāraparibhoge sammadeva vibhajanasīlo. Tenāha ‘‘accharāyā’’tiādi. Vuttatthameva heṭṭhā.
ಮನೇನಾತಿ ಮನೋಗಹಣೇನ। ಪುಬ್ಬಸುದ್ಧಿಅಙ್ಗನ್ತಿ ಪುಬ್ಬಭಾಗಸುದ್ಧಿಭೂತಂ ಅಙ್ಗಂ। ಚತೂಸೂತಿ ವುತ್ತಅಙ್ಗಪರಿಯಾಪನ್ನಂ। ಯಞ್ಞಉಪಕ್ಖರೋತಿ ದಾನಸ್ಸ ಸಾಧನಂ। ಏತೇಸು ಧಮ್ಮೇಸೂತಿ ಏತೇಸು ಸದ್ಧಾದಿಗುಣೇಸು। ಯಥಾ ಹಿ ಸದ್ಧೋ ಪಚ್ಚಯಂ ಪಚ್ಚುಪಟ್ಠಪೇತ್ವಾ ವತ್ಥುಪರಿಚ್ಚಾಗಸ್ಸ ವಿಸೇಸಪಚ್ಚಯೋ ಕಮ್ಮಫಲಸ್ಸ ಪರಲೋಕಸ್ಸ ಚ ಪಚ್ಚಕ್ಖತೋ ವಿಯ ಪತ್ತಿಯಾಯನತೋ, ಏವಂ ಮುದುಹದಯೋ। ಮುದುಹದಯೋ ಹಿ ಅನುದಯಂ ಪತ್ವಾ ಯಂ ಕಿಞ್ಚಿ ಅತ್ತನೋ ಸನ್ತಕಂ ಪರೇಸಂ ದೇತಿ। ಯೋ ಚ ಸಂವಿಭಾಗಸೀಲೋ, ಸೋ ಅಪ್ಪಕಸ್ಮಿಮ್ಪಿ ಅತ್ತನೋ ಸನ್ತಕೇ ಪರೇಹಿ ಸಾಧಾರಣಭೋಗೀ ಹೋತಿ। ವದಞ್ಞೂ ವದಾನಿಯತಾಯ ಯಾಗಿನೋವ ಯುತ್ತಂ ಯುತ್ತಕಾಲಂ ಞತ್ವಾ ಅತ್ಥಿಕಾನಂ ಮನೋರಥಂ ಪೂರೇತೀತಿ ವುತ್ತಂ ‘‘ಇತಿ…ಪೇ॰… ಚತೂಸೂತಿ ಆಹಾ’’ತಿ।
Manenāti manogahaṇena. Pubbasuddhiaṅganti pubbabhāgasuddhibhūtaṃ aṅgaṃ. Catūsūti vuttaaṅgapariyāpannaṃ. Yaññaupakkharoti dānassa sādhanaṃ. Etesu dhammesūti etesu saddhādiguṇesu. Yathā hi saddho paccayaṃ paccupaṭṭhapetvā vatthupariccāgassa visesapaccayo kammaphalassa paralokassa ca paccakkhato viya pattiyāyanato, evaṃ muduhadayo. Muduhadayo hi anudayaṃ patvā yaṃ kiñci attano santakaṃ paresaṃ deti. Yo ca saṃvibhāgasīlo, so appakasmimpi attano santake parehi sādhāraṇabhogī hoti. Vadaññū vadāniyatāya yāginova yuttaṃ yuttakālaṃ ñatvā atthikānaṃ manorathaṃ pūretīti vuttaṃ ‘‘iti…pe… catūsūti āhā’’ti.
ವಾಚನ್ತಿಆದೀನಿ ತೀಣಿ ಅಙ್ಗಾನಿ ತಿವಿಧಸೀಲಸಮ್ಪತ್ತಿದೀಪನತೋ। ಸಮ್ಪನ್ನಸೀಲೋ ಹಿ ಪರಲೋಕಂ ನ ಭಾಸೇಯ್ಯ। ಸದ್ಧೋ ಏಕಂ ಅಙ್ಗಂ ಪಯೋಗಾಸಯಸುದ್ಧಿದೀಪನತೋ। ಸುದ್ಧಾಸಯಸ್ಸ ಸಮ್ಮಾಪಯೋಗೇ ಠಿತಸ್ಸ ಕಥಂ ಪರಲೋಕತೋ ಭಯನ್ತಿ। ದುಕವಸೇನ ಚತುರಙ್ಗಯೋಜನಾ ದುಕನಯೋ। ಏತೇಸು ಚತೂಸು ಧಮ್ಮೇಸು ಠಿತೋತಿ ಏತೇಸು ಯಥಾವುತ್ತದುಕಸಙ್ಗಹೇಸು ಚತೂಸು ಗುಣೇಸು ಪತಿಟ್ಠಿತೋ।
Vācantiādīni tīṇi aṅgāni tividhasīlasampattidīpanato. Sampannasīlo hi paralokaṃ na bhāseyya. Saddho ekaṃ aṅgaṃ payogāsayasuddhidīpanato. Suddhāsayassa sammāpayoge ṭhitassa kathaṃ paralokato bhayanti. Dukavasena caturaṅgayojanā dukanayo. Etesu catūsu dhammesu ṭhitoti etesu yathāvuttadukasaṅgahesu catūsu guṇesu patiṭṭhito.
ಭೀತಾಸುತ್ತವಣ್ಣನಾ ನಿಟ್ಠಿತಾ।
Bhītāsuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೫. ಭೀತಾಸುತ್ತಂ • 5. Bhītāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೫. ಭೀತಾಸುತ್ತವಣ್ಣನಾ • 5. Bhītāsuttavaṇṇanā
