| Library / Tipiṭaka / д̇ибидага • Tipiṭaka / винаяаалан̇гаара-дийгаа • Vinayālaṅkāra-ṭīkā |
15. бхууд̇аг̇аамавинижчаяагат̇аа
15. Bhūtagāmavinicchayakathā
75. звам̣ бат̇авивинижчаяам̣ гат̇зд̇ваа ид̣̇аани бхууд̇аг̇аамавинижчаяам̣ гат̇зд̇ум̣ ‘‘бхууд̇аг̇аамо’’д̇иаад̣̇имааха. д̇ад̇т̇а бхаванд̇и ахувун̃жаад̇и бхууд̇аа, ж̇ааяанд̇и вад̣дханд̇и ж̇аад̇аа вад̣дхид̇аа жаад̇и ад̇т̇о. г̇аамод̇и рааси, бхууд̇аанам̣ г̇аамод̇и бхууд̇аг̇аамо, бхууд̇аа зва ваа г̇аамо бхууд̇аг̇аамо, бад̇идтид̇ахарид̇ад̇ин̣аругкаад̣̇ийнамзд̇ам̣ ад̇хиважанам̣. д̇ад̇т̇а ‘‘бхаванд̇ий’’д̇и имасса виваран̣ам̣ ‘‘ж̇ааяанд̇и вад̣дханд̇ий’’д̇и , ‘‘ахуву’’нд̇и имасса ‘‘ж̇аад̇аа вад̣дхид̇аа’’д̇и. звам̣ бхууд̇а-сад̣̇д̣̇о бажжуббаннаад̇ийд̇ависаяо ход̇и. д̇знааха вимад̇ивинод̣̇анияам̣ (ви. ви. дий. баажид̇д̇ияа 2.90) ‘‘бхаванд̇ийд̇и вад̣дханд̇и, ахувунд̇и б̣абхувуу’’д̇и. ид̣̇аани д̇ам̣ бхууд̇аг̇аамам̣ д̣̇ассзнд̇о ‘‘бхууд̇аг̇аамод̇и бан̃жахи б̣ийж̇зхи ж̇аад̇аанам̣ ругкалад̇аад̣̇ийнамзд̇ам̣ ад̇хиважана’’нд̇и ааха. лад̇аад̣̇ийнанд̇и аад̣̇и-сад̣̇д̣̇зна осад̇хиг̇ажчаад̣̇аяо взд̣̇ид̇аб̣б̣аа.
75. Evaṃ pathavivinicchayaṃ kathetvā idāni bhūtagāmavinicchayaṃ kathetuṃ ‘‘bhūtagāmo’’tiādimāha. Tattha bhavanti ahuvuñcāti bhūtā, jāyanti vaḍḍhanti jātā vaḍḍhitā cāti attho. Gāmoti rāsi, bhūtānaṃ gāmoti bhūtagāmo, bhūtā eva vā gāmo bhūtagāmo, patiṭṭhitaharitatiṇarukkhādīnametaṃ adhivacanaṃ. Tattha ‘‘bhavantī’’ti imassa vivaraṇaṃ ‘‘jāyanti vaḍḍhantī’’ti , ‘‘ahuvu’’nti imassa ‘‘jātā vaḍḍhitā’’ti. Evaṃ bhūta-saddo paccuppannātītavisayo hoti. Tenāha vimativinodaniyaṃ (vi. vi. ṭī. pācittiya 2.90) ‘‘bhavantīti vaḍḍhanti, ahuvunti babhuvū’’ti. Idāni taṃ bhūtagāmaṃ dassento ‘‘bhūtagāmoti pañcahi bījehi jātānaṃ rukkhalatādīnametaṃ adhivacana’’nti āha. Latādīnanti ādi-saddena osadhigacchādayo veditabbā.
ид̣̇аани д̇аани б̣ийж̇аани саруубад̇о д̣̇ассзнд̇о ‘‘д̇ад̇римаани бан̃жа б̣ийж̇ааний’’д̇иаад̣̇имааха. д̇ад̇т̇а мууламзва б̣ийж̇ам̣ муулаб̣ийж̇ам̣. звам̣ сзсзсуби. ат̇а ваа муулам̣ б̣ийж̇ам̣ зд̇ассаад̇и муулаб̣ийж̇ам̣, муулаб̣ийж̇ад̇о ваа ниб̣б̣ад̇д̇ам̣ муулаб̣ийж̇ам̣. звам̣ сзсзсуби. д̇ад̇т̇а батамзна виг̇г̇ахзна б̣ийж̇аг̇аамо зва лаб̣бхад̇и, д̣̇уд̇ияад̇ад̇иязхи бхууд̇аг̇аамо. ид̣̇аани д̇з бхууд̇аг̇аамз саруубад̇о д̣̇ассзнд̇о ‘‘д̇ад̇т̇а муулаб̣ийж̇ам̣ наамаа’’д̇яаад̣̇имааха. д̇ад̇т̇а д̇зсу бан̃жасу муулаб̣ийж̇аад̣̇ийсу халид̣̇д̣̇и…бз… бхад̣̇д̣̇амуд̇д̇агам̣ муулаб̣ийж̇ам̣ наама. на гзвалам̣ имааниязва муулаб̣ийж̇аани, ат̇а ко ид̇о ан̃н̃ааниби яаани ваа бана бхууд̇аг̇аамаж̇аад̇аани ад̇т̇и санд̇и, муулз ж̇ааяанд̇и, муулз сан̃ж̇ааяанд̇и, зд̇ам̣ бхууд̇аг̇аамаж̇аад̇ам̣ муулаб̣ийж̇ам̣ наама ход̇ийд̇и яож̇анаа. сзсзсуби зсзва наяо. вуд̇д̇ан̃хи адтагат̇ааяам̣ (баажи. адта. 91) ‘‘ид̣̇аани д̇ам̣ бхууд̇аг̇аамам̣ вибхаж̇ид̇ваа д̣̇ассзнд̇о ‘бхууд̇аг̇аамо наама бан̃жа б̣ийж̇аж̇аад̇ааний’д̇иаад̣̇имаахаа’’д̇и. д̇ад̇т̇а бхууд̇аг̇аамо наамаад̇и бхууд̇аг̇аамам̣ уд̣̇д̇харид̇ваа яасмим̣ сад̇и бхууд̇аг̇аамо ход̇и, д̇ам̣ д̣̇ассзд̇ум̣ ‘‘бан̃жа б̣ийж̇аж̇аад̇аанийд̇и аахаа’’д̇и адтагат̇аасу вуд̇д̇ам̣. звам̣ санд̇зби ‘‘яаани ваа банан̃н̃ааниби ад̇т̇и, муулз ж̇ааяанд̇ий’’д̇иаад̣̇ийни на самзнд̇и. на хи муулаб̣ийж̇аад̣̇ийни муулаад̣̇ийсу ж̇ааяанд̇и. муулаад̣̇ийсу ж̇ааяамаанаани бана д̇аани б̣ийж̇аж̇аад̇аани, д̇асмаа звамад̇т̇аван̣н̣анаа взд̣̇ид̇аб̣б̣аа – бхууд̇аг̇аамо наамаад̇и вибхаж̇ид̇аб̣б̣абад̣̇ам̣. бан̃жаад̇и д̇асса вибхааг̇абарижчзд̣̇о. б̣ийж̇аж̇аад̇аанийд̇и барижчиннад̇хамманид̣̇ассанам̣, яад̇о б̣ийж̇зхи ж̇аад̇аани б̣ийж̇аж̇аад̇аани, ругкаад̣̇ийнам̣ зд̇ам̣ ад̇хиважананд̇и жа. яат̇аа ‘‘саалийнам̣ жзби од̣̇анам̣ бхун̃ж̇ад̇ий’’д̇иаад̣̇ийсу (ма. ни. 1.76) саалид̇ан̣д̣улаанам̣ од̣̇ано саалиод̣̇анод̇и вужжад̇и, звам̣ б̣ийж̇ад̇о самбхууд̇о бхууд̇аг̇аамо ‘‘б̣ийж̇а’’нд̇и вуд̇д̇од̇и взд̣̇ид̇аб̣б̣од̇и жа.
Idāni tāni bījāni sarūpato dassento ‘‘tatrimāni pañca bījānī’’tiādimāha. Tattha mūlameva bījaṃ mūlabījaṃ. Evaṃ sesesupi. Atha vā mūlaṃ bījaṃ etassāti mūlabījaṃ, mūlabījato vā nibbattaṃ mūlabījaṃ. Evaṃ sesesupi. Tattha paṭhamena viggahena bījagāmo eva labbhati, dutiyatatiyehi bhūtagāmo. Idāni te bhūtagāme sarūpato dassento ‘‘tattha mūlabījaṃ nāmā’’tyādimāha. Tattha tesu pañcasu mūlabījādīsu haliddi…pe… bhaddamuttakaṃ mūlabījaṃ nāma. Na kevalaṃ imāniyeva mūlabījāni, atha kho ito aññānipi yāni vā pana bhūtagāmajātāni atthi santi, mūle jāyanti, mūle sañjāyanti, etaṃ bhūtagāmajātaṃ mūlabījaṃ nāma hotīti yojanā. Sesesupi eseva nayo. Vuttañhi aṭṭhakathāyaṃ (pāci. aṭṭha. 91) ‘‘idāni taṃ bhūtagāmaṃ vibhajitvā dassento ‘bhūtagāmo nāma pañca bījajātānī’tiādimāhā’’ti. Tattha bhūtagāmo nāmāti bhūtagāmaṃ uddharitvā yasmiṃ sati bhūtagāmo hoti, taṃ dassetuṃ ‘‘pañca bījajātānīti āhā’’ti aṭṭhakathāsu vuttaṃ. Evaṃ santepi ‘‘yāni vā panaññānipi atthi, mūle jāyantī’’tiādīni na samenti. Na hi mūlabījādīni mūlādīsu jāyanti. Mūlādīsu jāyamānāni pana tāni bījajātāni, tasmā evamatthavaṇṇanā veditabbā – bhūtagāmo nāmāti vibhajitabbapadaṃ. Pañcāti tassa vibhāgaparicchedo. Bījajātānīti paricchinnadhammanidassanaṃ, yato bījehi jātāni bījajātāni, rukkhādīnaṃ etaṃ adhivacananti ca. Yathā ‘‘sālīnaṃ cepi odanaṃ bhuñjatī’’tiādīsu (ma. ni. 1.76) sālitaṇḍulānaṃ odano sāliodanoti vuccati, evaṃ bījato sambhūto bhūtagāmo ‘‘bīja’’nti vuttoti veditabboti ca.
пал̣уб̣ийж̇анд̇и баб̣б̣аб̣ийж̇ам̣. бажжаяанд̇арасамавааяз сад̣̇исапалуббад̇д̇ияаа висзсагааран̣абхаавад̇о вирухан̣асамад̇т̇з саарапалз нирул̣хо б̣ийж̇а-сад̣̇д̣̇о д̇ад̣̇ад̇т̇асам̣сид̣̇д̇хияаа муулаад̣̇ийсуби гзсужи бавад̇д̇ад̇ийд̇и муулаад̣̇ид̇о нивад̇д̇анад̇т̇ам̣ згзна б̣ийж̇асад̣̇д̣̇зна висзсзд̇ваа вуд̇д̇ам̣ ‘‘б̣ийж̇а’’нд̇и ‘‘руубаруубам̣, д̣̇угкад̣̇угка’’нд̇и жа яат̇аа. нид̣̇д̣̇зсз ‘‘яаани ваа банан̃н̃ааниби ад̇т̇и, муулз ж̇ааяанд̇и муулз сан̃ж̇ааяанд̇ий’’д̇и зд̇т̇а б̣ийж̇ад̇о ниб̣б̣ад̇д̇зна б̣ийж̇ам̣ д̣̇ассид̇ам̣, д̇асмаа звамзд̇т̇а ад̇т̇о д̣̇адтаб̣б̣о – яаани ваа банан̃н̃ааниби ад̇т̇и, аалувагасзругамаланийлуббалабун̣д̣арийгагувалаяагунд̣̇абаадалимуулаад̣̇ибхзд̣̇з муулз г̇ажчаваллиругкаад̣̇ийни ж̇ааяанд̇и сан̃ж̇ааяанд̇и, д̇аани, яамхи муулз ж̇ааяанд̇и жзва сан̃ж̇ааяанд̇и жа, д̇ан̃жа баал̣ияам̣ (баажи. 91) вуд̇д̇ахалид̣̇д̣̇аад̣̇и жа, саб̣б̣амби зд̇ам̣ муулаб̣ийж̇ам̣ наама, зд̇зна гаарияобажаарзна гааран̣ам̣ д̣̇ассид̇анд̇и д̣̇ассзд̇и. зса наяо канд̇хаб̣ийж̇аад̣̇ийсу. язваабанагаканд̇хаб̣ийж̇зсу банзд̇т̇а амб̣аадагаинд̣̇асааланухибаалибхад̣̇д̣̇агаган̣игаараад̣̇ийни канд̇хаб̣ийж̇аани . амб̣илааваллижад̇урассаваллиган̣авзраад̣̇ийни пал̣уб̣ийж̇аани. магажималлигаасуманаж̇аяасуманаад̣̇ийни аг̇г̇аб̣ийж̇аани. амб̣аж̇амб̣убанасадтиаад̣̇ийни б̣ийж̇аб̣ийж̇аанийд̇и д̣̇адтаб̣б̣аани. бхууд̇аг̇аамз бхууд̇аг̇аамасан̃н̃ий чинд̣̇ад̇и ваа чзд̣̇аабзд̇и ваад̇и сад̇т̇агаани г̇ахзд̇ваа саяам̣ ваа чинд̣̇ад̇и, ан̃н̃зна ваа чзд̣̇аабзд̇и. бхинд̣̇ад̇и ваа бхзд̣̇аабзд̇и ваад̇и баасаан̣аад̣̇ийни г̇ахзд̇ваа саяам̣ ваа бхинд̣̇ад̇и, ан̃н̃зна ваа бхзд̣̇аабзд̇и. бажад̇и ваа бажаабзд̇и ваад̇и аг̇г̇им̣ убасам̣харид̇ваа саяам̣ ваа бажад̇и, ан̃н̃зна ваа бажаабзд̇и, баажид̇д̇ияам̣ ход̇ийд̇и самб̣анд̇хо. д̇ад̇т̇а аабад̇д̇ибхзд̣̇ам̣ д̣̇ассзнд̇о ‘‘бхууд̇аг̇ааман̃хий’’д̇иаад̣̇имааха. д̇ад̇т̇а бхууд̇аг̇аамабариможид̇анд̇и бхууд̇аг̇аамад̇о вияож̇ид̇ам̣.
Phaḷubījanti pabbabījaṃ. Paccayantarasamavāye sadisaphaluppattiyā visesakāraṇabhāvato viruhaṇasamatthe sāraphale niruḷho bīja-saddo tadatthasaṃsiddhiyā mūlādīsupi kesuci pavattatīti mūlādito nivattanatthaṃ ekena bījasaddena visesetvā vuttaṃ ‘‘bīja’’nti ‘‘rūparūpaṃ, dukkhadukkha’’nti ca yathā. Niddese ‘‘yāni vā panaññānipi atthi, mūle jāyanti mūle sañjāyantī’’ti ettha bījato nibbattena bījaṃ dassitaṃ, tasmā evamettha attho daṭṭhabbo – yāni vā panaññānipi atthi, āluvakaserukamalanīluppalapuṇḍarīkakuvalayakundapāṭalimūlādibhede mūle gacchavallirukkhādīni jāyanti sañjāyanti, tāni, yamhi mūle jāyanti ceva sañjāyanti ca, tañca pāḷiyaṃ (pāci. 91) vuttahaliddādi ca, sabbampi etaṃ mūlabījaṃ nāma, etena kāriyopacārena kāraṇaṃ dassitanti dasseti. Esa nayo khandhabījādīsu. Yevāpanakakhandhabījesu panettha ambāṭakaindasālanuhipālibhaddakakaṇikārādīni khandhabījāni . Ambilāvallicaturassavallikaṇaverādīni phaḷubījāni. Makacimallikāsumanajayasumanādīni aggabījāni. Ambajambupanasaṭṭhiādīni bījabījānīti daṭṭhabbāni. Bhūtagāme bhūtagāmasaññī chindati vā chedāpeti vāti satthakāni gahetvā sayaṃ vā chindati, aññena vā chedāpeti. Bhindati vā bhedāpeti vāti pāsāṇādīni gahetvā sayaṃ vā bhindati, aññena vā bhedāpeti. Pacati vā pacāpeti vāti aggiṃ upasaṃharitvā sayaṃ vā pacati, aññena vā pacāpeti, pācittiyaṃ hotīti sambandho. Tattha āpattibhedaṃ dassento ‘‘bhūtagāmañhī’’tiādimāha. Tattha bhūtagāmaparimocitanti bhūtagāmato viyojitaṃ.
76. сан̃жижжа угкибид̇ум̣ на ваддад̇ийд̇и зд̇т̇а ‘‘сан̃жижжаа’’д̇и вуд̇д̇ад̇д̇аа сарийрз лаг̇г̇абхаавам̣ н̃ад̇вааби удтахад̇и, ‘‘д̇ам̣ уд̣̇д̇хариссаамий’’д̇и сан̃н̃ааяа абхаавад̇о ваддад̇и. ананд̇агаг̇г̇ахан̣зна саасабамад̇д̇игаа г̇ахид̇аа. нааман̃хзд̇ам̣ д̇ассаа сзваалаж̇аад̇ияаа. муулабан̣н̣аанам̣ абхаавзна ‘‘асамбун̣н̣абхууд̇аг̇аамо наамаа’’д̇и вуд̇д̇ам̣. абхууд̇аг̇аамамуулад̇д̇аад̇и зд̇т̇а бхууд̇аг̇аамо муулам̣ гааран̣ам̣ зд̇ассаад̇и бхууд̇аг̇аамамууло, бхууд̇аг̇аамасса ваа муулам̣ гааран̣анд̇и бхууд̇аг̇аамамуулам̣. б̣ийж̇аг̇аамо хи наама бхууд̇аг̇аамад̇о самбхавад̇и, бхууд̇аг̇аамасса жа гааран̣ам̣ ход̇и. аяам̣ бана д̇аад̣̇исо на ход̇ийд̇и ‘‘абхууд̇аг̇аамамуулад̇д̇аа’’д̇и вуд̇д̇ам̣.
76.Sañcicca ukkhipituṃ na vaṭṭatīti ettha ‘‘sañciccā’’ti vuttattā sarīre laggabhāvaṃ ñatvāpi uṭṭhahati, ‘‘taṃ uddharissāmī’’ti saññāya abhāvato vaṭṭati. Anantakaggahaṇena sāsapamattikā gahitā. Nāmañhetaṃ tassā sevālajātiyā. Mūlapaṇṇānaṃ abhāvena ‘‘asampuṇṇabhūtagāmo nāmā’’ti vuttaṃ. Abhūtagāmamūlattāti ettha bhūtagāmo mūlaṃ kāraṇaṃ etassāti bhūtagāmamūlo, bhūtagāmassa vā mūlaṃ kāraṇanti bhūtagāmamūlaṃ. Bījagāmo hi nāma bhūtagāmato sambhavati, bhūtagāmassa ca kāraṇaṃ hoti. Ayaṃ pana tādiso na hotīti ‘‘abhūtagāmamūlattā’’ti vuttaṃ.
гин̃жааби хи д̇ааланаал̣игзраад̣̇ийнам̣ каан̣у уд̣̇д̇хам̣ авад̣дханад̇о бхууд̇аг̇аамасса гааран̣ам̣ на ход̇и, д̇ат̇ааби бхууд̇аг̇аамасан̇кяуубаг̇ад̇аниб̣б̣ад̇д̇абан̣н̣амуулаб̣ийж̇ад̇о самбхууд̇ад̇д̇аа бхууд̇аг̇аамад̇о уббанно наама ход̇ийд̇и б̣ийж̇аг̇аамзна сан̇г̇ахам̣ г̇ажчад̇и. со б̣ийж̇аг̇аамзна сан̇г̇ахид̇од̇и авад̣дхамаанзби бхууд̇аг̇аамамуулад̇д̇аа вуд̇д̇ам̣.
Kiñcāpi hi tālanāḷikerādīnaṃ khāṇu uddhaṃ avaḍḍhanato bhūtagāmassa kāraṇaṃ na hoti, tathāpi bhūtagāmasaṅkhyūpagatanibbattapaṇṇamūlabījato sambhūtattā bhūtagāmato uppanno nāma hotīti bījagāmena saṅgahaṃ gacchati. So bījagāmena saṅgahitoti avaḍḍhamānepi bhūtagāmamūlattā vuttaṃ.
‘‘ан̇гурз харид̇з’’д̇и вад̇ваа д̇амзвад̇т̇ам̣ вибхаавзд̇и ‘‘нийлаван̣н̣з ж̇аад̇з’’д̇и, нийлабан̣н̣асса ван̣н̣асад̣̇исз бан̣н̣з ж̇аад̇зд̇и ад̇т̇о, ‘‘нийлаван̣н̣з ж̇аад̇з’’д̇и ваа баато г̇ахзд̇аб̣б̣о. амуулагабхууд̇аг̇аамз сан̇г̇ахам̣ г̇ажчад̇ийд̇и ид̣̇ам̣ наал̣игзрасса аавзн̣игам̣ гад̇ваа вад̣̇ад̇и. ‘‘баанийяагхадаад̣̇ийнам̣ б̣ахи сзваало уд̣̇агз адтид̇ад̇д̇аа б̣ийж̇аг̇аамаануломад̇д̇аа жа д̣̇уггадавад̇т̇уу’’д̇и вад̣̇анд̇и. ган̣н̣агамби аб̣б̣охааригамзваад̇и нийлаван̣н̣амби аб̣б̣охааригамзва.
‘‘Aṅkure harite’’ti vatvā tamevatthaṃ vibhāveti ‘‘nīlavaṇṇe jāte’’ti, nīlapaṇṇassa vaṇṇasadise paṇṇe jāteti attho, ‘‘nīlavaṇṇe jāte’’ti vā pāṭho gahetabbo. Amūlakabhūtagāme saṅgahaṃ gacchatīti idaṃ nāḷikerassa āveṇikaṃ katvā vadati. ‘‘Pānīyaghaṭādīnaṃ bahi sevālo udake aṭṭhitattā bījagāmānulomattā ca dukkaṭavatthū’’ti vadanti. Kaṇṇakampi abbohārikamevāti nīlavaṇṇampi abbohārikameva.
77. сзлзяяагам̣ наама силааяа самбхууд̇аа згаа г̇анд̇хаж̇аад̇и. бубпид̇агаалад̇о бадтааяаад̇и вигасид̇агаалад̇о бабхуд̇и. ахижчад̇д̇агам̣ г̇ан̣ханд̇од̇и вигасид̇ам̣ г̇ан̣ханд̇о. магул̣ам̣ бана ругкад̇д̇ажам̣ агобзнд̇знаби г̇ахзд̇ум̣ на ваддад̇и. ‘‘ругкад̇д̇ажам̣ вигобзд̇ийд̇и вуд̇д̇ад̇д̇аа ругкз ж̇аад̇ам̣ яам̣ гин̃жи ахижчад̇д̇агам̣ ругкад̇д̇ажам̣ авигобзд̇ваа мад̇т̇агад̇о чинд̣̇ид̇ваа г̇ахзд̇ум̣ ваддад̇ий’’д̇и вад̣̇анд̇и, д̇ад̣̇аяуд̇д̇ам̣ ‘‘ахижчад̇д̇агам̣ яаава магул̣ам̣ ход̇и, д̇аава д̣̇уггадавад̇т̇уу’’д̇и вуд̇д̇ад̇д̇аа. ругкад̇о мужжид̇ваад̇и зд̇т̇а ‘‘яад̣̇иби гин̃жимад̇д̇ам̣ ругкз аллийнаа худ̇ваа д̇идтад̇и, ругкад̇о г̇аяхамаанаа бана ругкажчавим̣ на вигобзд̇и, ваддад̇ий’’д̇и вад̣̇анд̇и. алларугкад̇о на ваддад̇ийд̇и зд̇т̇ааби ругкад̇д̇ажам̣ авигобзд̇ваа мад̇т̇агад̇о д̇ажчзд̇ваа г̇ахзд̇ум̣ ваддад̇ийд̇и взд̣̇ид̇аб̣б̣ам̣. хад̇т̇агуггужжзнаад̇и хад̇т̇ажаабаллзна. баанийяам̣ на ваасзд̇аб̣б̣анд̇и ид̣̇ам̣ ад̇д̇ано ад̇т̇ааяа наамид̇ам̣ санд̇хааяа вуд̇д̇ам̣. гзвалам̣ анубасамбаннасса ад̇т̇ааяа наамид̇з бана бажчаа д̇ад̇о лабхид̇ваа на ваасзд̇аб̣б̣анд̇и над̇т̇и. вимад̇ивинод̣̇анияам̣ (ви. ви. дий. баажид̇д̇ияа 2.92) бана ‘‘баанийяам̣ на ваасзд̇аб̣б̣анд̇и ид̣̇ам̣ ад̇д̇ано биванабаанийяам̣ санд̇хааяа вуд̇д̇ам̣, ан̃н̃зсам̣ бана ваддад̇и ануг̇г̇ахид̇ад̇д̇аа. д̇знааха ад̇д̇анаа каад̣̇ид̇угаамзнаа’’д̇и вуд̇д̇ам̣. ‘‘язсам̣ ругкаанам̣ саакаа рухад̇ийд̇и вуд̇д̇ад̇д̇аа язсам̣ саакаа на рухад̇и, д̇ад̇т̇а габбияагаран̣агижжам̣ над̇т̇ий’’д̇и вад̣̇анд̇и. вимад̇ивинод̣̇анияамби ‘‘язсам̣ ругкаанам̣ саакаа рухад̇ийд̇и муулам̣ анод̇аарзд̇ваа бан̣н̣амад̇д̇аниг̇г̇аманамад̇д̇знааби вад̣дхад̇и, д̇ад̇т̇а габбияамби агаронд̇о чиннанаал̣игзравзл̣уд̣̇ан̣д̣аад̣̇аяо гобзд̇ум̣ ваддад̇ий’’д̇и вуд̇д̇ам̣. ‘‘жан̇гамид̇адтаанам̣ д̣̇ассзссаамий’’д̇и вуд̇д̇ад̇д̇аа гзвалам̣ жан̇гаманаад̇хиббааязна ваа маг̇г̇аг̇аманаад̇хиббааязна ваа аггаманд̇асса, д̇ин̣аанам̣ убари нисийд̣̇анаад̇хиббааязна нисийд̣̇анд̇асса жа д̣̇осо над̇т̇и.
77.Seleyyakaṃ nāma silāya sambhūtā ekā gandhajāti. Pupphitakālato paṭṭhāyāti vikasitakālato pabhuti. Ahicchattakaṃ gaṇhantoti vikasitaṃ gaṇhanto. Makuḷaṃ pana rukkhattacaṃ akopentenapi gahetuṃ na vaṭṭati. ‘‘Rukkhattacaṃ vikopetīti vuttattā rukkhe jātaṃ yaṃ kiñci ahicchattakaṃ rukkhattacaṃ avikopetvā matthakato chinditvā gahetuṃ vaṭṭatī’’ti vadanti, tadayuttaṃ ‘‘ahicchattakaṃ yāva makuḷaṃ hoti, tāva dukkaṭavatthū’’ti vuttattā. Rukkhato muccitvāti ettha ‘‘yadipi kiñcimattaṃ rukkhe allīnā hutvā tiṭṭhati, rukkhato gayhamānā pana rukkhacchaviṃ na vikopeti, vaṭṭatī’’ti vadanti. Allarukkhato na vaṭṭatīti etthāpi rukkhattacaṃ avikopetvā matthakato tacchetvā gahetuṃ vaṭṭatīti veditabbaṃ. Hatthakukkuccenāti hatthacāpallena. Pānīyaṃ na vāsetabbanti idaṃ attano atthāya nāmitaṃ sandhāya vuttaṃ. Kevalaṃ anupasampannassa atthāya nāmite pana pacchā tato labhitvā na vāsetabbanti natthi. Vimativinodaniyaṃ (vi. vi. ṭī. pācittiya 2.92) pana ‘‘pānīyaṃ na vāsetabbanti idaṃ attano pivanapānīyaṃ sandhāya vuttaṃ, aññesaṃ pana vaṭṭati anuggahitattā. Tenāha attanā khāditukāmenā’’ti vuttaṃ. ‘‘Yesaṃ rukkhānaṃ sākhā ruhatīti vuttattā yesaṃ sākhā na ruhati, tattha kappiyakaraṇakiccaṃ natthī’’ti vadanti. Vimativinodaniyampi ‘‘yesaṃ rukkhānaṃ sākhāruhatīti mūlaṃ anotāretvā paṇṇamattaniggamanamattenāpi vaḍḍhati, tattha kappiyampi akaronto chinnanāḷikeraveḷudaṇḍādayo kopetuṃ vaṭṭatī’’ti vuttaṃ. ‘‘Caṅkamitaṭṭhānaṃ dassessāmī’’ti vuttattā kevalaṃ caṅkamanādhippāyena vā maggagamanādhippāyena vā akkamantassa, tiṇānaṃ upari nisīdanādhippāyena nisīdantassa ca doso natthi.
78. саман̣агаббзхийд̇и саман̣аанам̣ габбияавохаарзхи. гин̃жааби б̣ийж̇аад̣̇ийнам̣ аг̇г̇инаа пудтамад̇д̇зна, накаад̣̇ийхи виликанамад̇д̇зна жа авирул̣хид̇хаммад̇аа на ход̇и, д̇ат̇ааби звам̣ гад̇зязва саман̣аанам̣ габбад̇ийд̇и аг̇г̇ибариж̇ид̇аад̣̇аяо саман̣авохаараа наама ж̇аад̇аа, д̇асмаа д̇зхи саман̣авохаарзхи гаран̣абхууд̇зхи палам̣ барибхун̃ж̇ид̇ум̣ ануж̇аанаамийд̇и ад̇хиббааяо. аб̣ийж̇аниб̣б̣аддаб̣ийж̇ааниби саман̣аанам̣ габбанд̇ийд̇и бан̃н̃ад̇д̇абан̣н̣ад̇д̇ибхаавад̇о саман̣авохаарааижжзва сан̇кам̣ г̇ад̇аани. ат̇а ваа аг̇г̇ибариж̇ид̇аад̣̇ийнам̣ бан̃жаннам̣ габбияабхаавад̇оязва бан̃жахи саман̣агаббияабхаавасан̇каад̇зхи гааран̣зхи палам̣ барибхун̃ж̇ид̇ум̣ ануж̇аанаамийд̇и звамзд̇т̇а ад̇хиббааяо взд̣̇ид̇аб̣б̣о. аг̇г̇ибариж̇ид̇анд̇иаад̣̇ийсу ‘‘барижид̇а’’нд̇иби батанд̇и. аб̣ийж̇ам̣ наама д̇арун̣аамб̣апалаад̣̇и. ниб̣б̣аддаб̣ийж̇ам̣ наама амб̣абанасаад̣̇и, яам̣ б̣ийж̇ам̣ ниб̣б̣аддзд̇ваа висум̣ гад̇ваа барибхун̃ж̇ид̇ум̣ саггаа ход̇и. ниб̣б̣аддзд̇аб̣б̣ам̣ вияож̇зд̇аб̣б̣ам̣ б̣ийж̇ам̣ яасмим̣, д̇ам̣ банасаад̣̇и ниб̣б̣аддаб̣ийж̇ам̣ наама. ‘‘габбияа’’нд̇и вад̇ваава гаад̇аб̣б̣анд̇и яо габбияам̣ гарод̇и, д̇зна гад̇д̇аб̣б̣абагаарассзва вуд̇д̇ад̇д̇аа бхигкунаа авуд̇д̇зби гаад̇ум̣ ваддад̇ийд̇и на г̇ахзд̇аб̣б̣ам̣. буна ‘‘габбияам̣ гаарзд̇аб̣б̣а’’нд̇и гаараабанасса батамамзва гат̇ид̇ад̇д̇аа бхигкунаа ‘‘габбияам̣ гарохий’’д̇и вуд̇д̇зязва анубасамбаннзна ‘‘габбияа’’нд̇и вад̇ваа аг̇г̇ибариж̇ид̇аад̣̇и гаад̇аб̣б̣анд̇и г̇ахзд̇аб̣б̣ам̣. ‘‘габбияанд̇и важанам̣ бана яааяа гааяажи бхаасааяа вад̇д̇ум̣ ваддад̇ий’’д̇и вад̣̇анд̇и. ‘‘габбияанд̇и вад̇ваава гаад̇аб̣б̣а’’нд̇и важанад̇о батамам̣ ‘‘габбияа’’нд̇и вад̇ваа бажчаа аг̇г̇иаад̣̇инаа пусанаад̣̇и гаад̇аб̣б̣анд̇и взд̣̇ид̇аб̣б̣ам̣. ‘‘батамам̣ аг̇г̇имхи нигкибид̇ваа, накаад̣̇инаа ваа виж̇жхид̇ваа д̇ам̣ ануд̣̇д̇харид̇ваава габбияанд̇и вад̇д̇ум̣ ваддад̇ий’’д̇иби вад̣̇анд̇и.
78.Samaṇakappehīti samaṇānaṃ kappiyavohārehi. Kiñcāpi bījādīnaṃ agginā phuṭṭhamattena, nakhādīhi vilikhanamattena ca aviruḷhidhammatā na hoti, tathāpi evaṃ kateyeva samaṇānaṃ kappatīti aggiparijitādayo samaṇavohārā nāma jātā, tasmā tehi samaṇavohārehi karaṇabhūtehi phalaṃ paribhuñjituṃ anujānāmīti adhippāyo. Abījanibbaṭṭabījānipi samaṇānaṃ kappantīti paññattapaṇṇattibhāvato samaṇavohārāicceva saṅkhaṃ gatāni. Atha vā aggiparijitādīnaṃ pañcannaṃ kappiyabhāvatoyeva pañcahi samaṇakappiyabhāvasaṅkhātehi kāraṇehi phalaṃ paribhuñjituṃ anujānāmīti evamettha adhippāyo veditabbo. Aggiparijitantiādīsu ‘‘paricita’’ntipi paṭhanti. Abījaṃ nāma taruṇaambaphalādi. Nibbaṭṭabījaṃ nāma ambapanasādi, yaṃ bījaṃ nibbaṭṭetvā visuṃ katvā paribhuñjituṃ sakkā hoti. Nibbaṭṭetabbaṃ viyojetabbaṃ bījaṃ yasmiṃ, taṃ panasādi nibbaṭṭabījaṃ nāma. ‘‘Kappiya’’nti vatvāva kātabbanti yo kappiyaṃ karoti, tena kattabbapakārasseva vuttattā bhikkhunā avuttepi kātuṃ vaṭṭatīti na gahetabbaṃ. Puna ‘‘kappiyaṃ kāretabba’’nti kārāpanassa paṭhamameva kathitattā bhikkhunā ‘‘kappiyaṃ karohī’’ti vutteyeva anupasampannena ‘‘kappiya’’nti vatvā aggiparijitādi kātabbanti gahetabbaṃ. ‘‘Kappiyanti vacanaṃ pana yāya kāyaci bhāsāya vattuṃ vaṭṭatī’’ti vadanti. ‘‘Kappiyanti vatvāva kātabba’’nti vacanato paṭhamaṃ ‘‘kappiya’’nti vatvā pacchā aggiādinā phusanādi kātabbanti veditabbaṃ. ‘‘Paṭhamaṃ aggimhi nikkhipitvā, nakhādinā vā vijjhitvā taṃ anuddharitvāva kappiyanti vattuṃ vaṭṭatī’’tipi vadanti.
вимад̇ивинод̣̇анияам̣ (ви. ви. дий. баажид̇д̇ияа 2.92) бана ‘‘габбияанд̇и вад̇вааваад̇и буб̣б̣агаалагирияаавасзна вуд̇д̇зби важанагкан̣зва аг̇г̇исад̇т̇аад̣̇инаа б̣ийж̇аг̇аамз ван̣ам̣ гаад̇аб̣б̣анд̇и важанад̇о бана буб̣б̣з гаад̇ум̣ на ваддад̇и, д̇ан̃жа д̣̇вид̇хаа агад̇ваа чзд̣̇анабхзд̣̇анамзва д̣̇ассзд̇аб̣б̣ам̣. гаронд̇зна жа бхигкунаа ‘габбияам̣ гарохий’д̇и яааяа гааяажи бхаасааяа вуд̇д̇зязва гаад̇аб̣б̣ам̣. б̣ийж̇аг̇аамабариможанад̇т̇ам̣ буна габбияам̣ гаарзд̇аб̣б̣анд̇и гаараабанасса батамамзва ад̇хигад̇ад̇д̇аа’’д̇и вуд̇д̇ам̣.
Vimativinodaniyaṃ (vi. vi. ṭī. pācittiya 2.92) pana ‘‘kappiyanti vatvāvāti pubbakālakiriyāvasena vuttepi vacanakkhaṇeva aggisatthādinā bījagāme vaṇaṃ kātabbanti vacanato pana pubbe kātuṃ na vaṭṭati, tañca dvidhā akatvā chedanabhedanameva dassetabbaṃ. Karontena ca bhikkhunā ‘kappiyaṃ karohī’ti yāya kāyaci bhāsāya vutteyeva kātabbaṃ. Bījagāmaparimocanatthaṃ puna kappiyaṃ kāretabbanti kārāpanassa paṭhamameva adhikatattā’’ti vuttaṃ.
згасмим̣ б̣ийж̇з ваад̇иаад̣̇ийсу ‘‘згам̣язва гаарзмийд̇и ад̇хиббааяз сад̇иби згааб̣ад̣̇д̇хад̇д̇аа саб̣б̣ам̣ гад̇амзва ход̇ий’’д̇и вад̣̇анд̇и. д̣̇аарум̣ виж̇жхад̇ийд̇и зд̇т̇а ‘‘ж̇аанид̇вааби виж̇жхад̇и ваа виж̇жхаабзд̇и ваа, ваддад̇иязваа’’д̇и вад̣̇анд̇и. бхад̇д̇асид̇т̇з виж̇жхад̇ийд̇и зд̇т̇ааби зсзва наяо. ‘‘д̇ам̣ виж̇жхад̇и, на ваддад̇ийд̇и раж̇ж̇уаад̣̇ийнам̣ бхааж̇анаг̇ад̇игад̇д̇аа’’д̇и вад̣̇анд̇и. марийжабаггаад̣̇ийхи жа миссзд̇ваад̇и зд̇т̇а бхад̇д̇асид̇т̇асамб̣анд̇хавасзна згааб̣ад̣̇д̇хад̇аа взд̣̇ид̇аб̣б̣аа, на палаанам̣язва ан̃н̃аман̃н̃асамб̣анд̇хавасзна. ‘‘гадаахзби гаад̇ум̣ ваддад̇ий’’д̇и вуд̇д̇ад̇д̇аа гадаахад̇о нийхадааяа мин̃ж̇ааяа ваа б̣ийж̇з ваа яад̇т̇а гад̇т̇ажи виж̇жхид̇ум̣ ваддад̇и зва. бхинд̣̇аабзд̇ваа габбияам̣ гаараабзд̇аб̣б̣анд̇и б̣ийж̇ад̇о муд̇д̇асса гадаахасса бхааж̇анаг̇ад̇игад̇д̇аа вуд̇д̇ам̣.
Ekasmiṃ bīje vātiādīsu ‘‘ekaṃyeva kāremīti adhippāye satipi ekābaddhattā sabbaṃ katameva hotī’’ti vadanti. Dāruṃ vijjhatīti ettha ‘‘jānitvāpi vijjhati vā vijjhāpeti vā, vaṭṭatiyevā’’ti vadanti. Bhattasitthe vijjhatīti etthāpi eseva nayo. ‘‘Taṃ vijjhati, na vaṭṭatīti rajjuādīnaṃ bhājanagatikattā’’ti vadanti. Marīcapakkādīhi ca missetvāti ettha bhattasitthasambandhavasena ekābaddhatā veditabbā, na phalānaṃyeva aññamaññasambandhavasena. ‘‘Kaṭāhepi kātuṃ vaṭṭatī’’ti vuttattā kaṭāhato nīhaṭāya miñjāya vā bīje vā yattha katthaci vijjhituṃ vaṭṭati eva. Bhindāpetvā kappiyaṃ kārāpetabbanti bījato muttassa kaṭāhassa bhājanagatikattā vuttaṃ.
ид̇и винаяасан̇г̇ахасам̣ван̣н̣анаабхууд̇з винаяаалан̇гаарз
Iti vinayasaṅgahasaṃvaṇṇanābhūte vinayālaṅkāre
бхууд̇аг̇аамавинижчаяагат̇аалан̇гааро наама
Bhūtagāmavinicchayakathālaṅkāro nāma
баннарасамо барижчзд̣̇о.
Pannarasamo paricchedo.
