| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౩. బీజఙ్గపఞ్హో
3. Bījaṅgapañho
౩. ‘‘భన్తే నాగసేన, ‘బీజస్స ద్వే అఙ్గాని గహేతబ్బానీ’తి యం వదేసి, కతమాని తాని ద్వే అఙ్గాని గహేతబ్బానీ’’తి? ‘‘యథా, మహారాజ, బీజం అప్పకమ్పి సమానం భద్దకే ఖేత్తే వుత్తం దేవే సమ్మా ధారం పవేచ్ఛన్తే సుబహూని ఫలాని అనుదస్సతి, ఏవమేవ ఖో, మహారాజ, యోగినా యోగావచరేన యథా పటిపాదితం సీలం కేవలం సామఞ్ఞఫలమనుదస్సతి. ఏవం సమ్మా పటిపజ్జితబ్బం. ఇదం, మహారాజ, బీజస్స పఠమం అఙ్గం గహేతబ్బం.
3. ‘‘Bhante nāgasena, ‘bījassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bījaṃ appakampi samānaṃ bhaddake khette vuttaṃ deve sammā dhāraṃ pavecchante subahūni phalāni anudassati, evameva kho, mahārāja, yoginā yogāvacarena yathā paṭipāditaṃ sīlaṃ kevalaṃ sāmaññaphalamanudassati. Evaṃ sammā paṭipajjitabbaṃ. Idaṃ, mahārāja, bījassa paṭhamaṃ aṅgaṃ gahetabbaṃ.
‘‘పున చపరం, మహారాజ, బీజం సుపరిసోధితే ఖేత్తే రోపితం ఖిప్పమేవ సంవిరూహతి, ఏవమేవ ఖో, మహారాజ, యోగినా యోగావచరేన మానసం సుపరిగ్గహితం సుఞ్ఞాగారే పరిసోధితం సతిపట్ఠానఖేత్తవరే ఖిత్తం ఖిప్పమేవ విరూహతి. ఇదం, మహారాజ, బీజస్స దుతియం అఙ్గం గహేతబ్బం . భాసితమ్పేతం, మహారాజ, థేరేన అనురుద్ధేన –
‘‘Puna caparaṃ, mahārāja, bījaṃ suparisodhite khette ropitaṃ khippameva saṃvirūhati, evameva kho, mahārāja, yoginā yogāvacarena mānasaṃ supariggahitaṃ suññāgāre parisodhitaṃ satipaṭṭhānakhettavare khittaṃ khippameva virūhati. Idaṃ, mahārāja, bījassa dutiyaṃ aṅgaṃ gahetabbaṃ . Bhāsitampetaṃ, mahārāja, therena anuruddhena –
‘‘‘యథాపి ఖేత్తే 1 పరిసుద్ధే, బీజఞ్చస్స పతిట్ఠితం;
‘‘‘Yathāpi khette 2 parisuddhe, bījañcassa patiṭṭhitaṃ;
విపులం తస్స ఫలం హోతి, అపి తోసేతి కస్సకం.
Vipulaṃ tassa phalaṃ hoti, api toseti kassakaṃ.
‘‘‘తథేవ యోగినో చిత్తం, సుఞ్ఞాగారే విసోధితం;
‘‘‘Tatheva yogino cittaṃ, suññāgāre visodhitaṃ;
సతిపట్ఠానఖేత్తమ్హి, ఖిప్పమేవ విరూహతీ’’’తి.
Satipaṭṭhānakhettamhi, khippameva virūhatī’’’ti.
బీజఙ్గపఞ్హో తతియో.
Bījaṅgapañho tatiyo.
Footnotes:
