| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൩. ബീജങ്ഗപഞ്ഹോ
3. Bījaṅgapañho
൩. ‘‘ഭന്തേ നാഗസേന, ‘ബീജസ്സ ദ്വേ അങ്ഗാനി ഗഹേതബ്ബാനീ’തി യം വദേസി, കതമാനി താനി ദ്വേ അങ്ഗാനി ഗഹേതബ്ബാനീ’’തി? ‘‘യഥാ, മഹാരാജ, ബീജം അപ്പകമ്പി സമാനം ഭദ്ദകേ ഖേത്തേ വുത്തം ദേവേ സമ്മാ ധാരം പവേച്ഛന്തേ സുബഹൂനി ഫലാനി അനുദസ്സതി, ഏവമേവ ഖോ, മഹാരാജ, യോഗിനാ യോഗാവചരേന യഥാ പടിപാദിതം സീലം കേവലം സാമഞ്ഞഫലമനുദസ്സതി. ഏവം സമ്മാ പടിപജ്ജിതബ്ബം. ഇദം, മഹാരാജ, ബീജസ്സ പഠമം അങ്ഗം ഗഹേതബ്ബം.
3. ‘‘Bhante nāgasena, ‘bījassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bījaṃ appakampi samānaṃ bhaddake khette vuttaṃ deve sammā dhāraṃ pavecchante subahūni phalāni anudassati, evameva kho, mahārāja, yoginā yogāvacarena yathā paṭipāditaṃ sīlaṃ kevalaṃ sāmaññaphalamanudassati. Evaṃ sammā paṭipajjitabbaṃ. Idaṃ, mahārāja, bījassa paṭhamaṃ aṅgaṃ gahetabbaṃ.
‘‘പുന ചപരം, മഹാരാജ, ബീജം സുപരിസോധിതേ ഖേത്തേ രോപിതം ഖിപ്പമേവ സംവിരൂഹതി, ഏവമേവ ഖോ, മഹാരാജ, യോഗിനാ യോഗാവചരേന മാനസം സുപരിഗ്ഗഹിതം സുഞ്ഞാഗാരേ പരിസോധിതം സതിപട്ഠാനഖേത്തവരേ ഖിത്തം ഖിപ്പമേവ വിരൂഹതി. ഇദം, മഹാരാജ, ബീജസ്സ ദുതിയം അങ്ഗം ഗഹേതബ്ബം . ഭാസിതമ്പേതം, മഹാരാജ, ഥേരേന അനുരുദ്ധേന –
‘‘Puna caparaṃ, mahārāja, bījaṃ suparisodhite khette ropitaṃ khippameva saṃvirūhati, evameva kho, mahārāja, yoginā yogāvacarena mānasaṃ supariggahitaṃ suññāgāre parisodhitaṃ satipaṭṭhānakhettavare khittaṃ khippameva virūhati. Idaṃ, mahārāja, bījassa dutiyaṃ aṅgaṃ gahetabbaṃ . Bhāsitampetaṃ, mahārāja, therena anuruddhena –
‘‘‘യഥാപി ഖേത്തേ 1 പരിസുദ്ധേ, ബീജഞ്ചസ്സ പതിട്ഠിതം;
‘‘‘Yathāpi khette 2 parisuddhe, bījañcassa patiṭṭhitaṃ;
വിപുലം തസ്സ ഫലം ഹോതി, അപി തോസേതി കസ്സകം.
Vipulaṃ tassa phalaṃ hoti, api toseti kassakaṃ.
‘‘‘തഥേവ യോഗിനോ ചിത്തം, സുഞ്ഞാഗാരേ വിസോധിതം;
‘‘‘Tatheva yogino cittaṃ, suññāgāre visodhitaṃ;
സതിപട്ഠാനഖേത്തമ്ഹി, ഖിപ്പമേവ വിരൂഹതീ’’’തി.
Satipaṭṭhānakhettamhi, khippameva virūhatī’’’ti.
ബീജങ്ഗപഞ്ഹോ തതിയോ.
Bījaṅgapañho tatiyo.
Footnotes:
