| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဗီဇသုတ္တံ
2. Bījasuttaṃ
၁၅၀. ‘‘သေယ္ယထာပိ, ဘိက္ခဝေ, ယေ ကေစိမေ ဗီဇဂာမဘူတဂာမာ ဝုဍ္ဎိံ ဝိရူဠ္ဟိံ ဝေပုလ္လံ အာပဇ္ဇန္တိ, သဗ္ဗေ တေ ပထဝိံ နိသ္သာယ ပထဝိယံ ပတိဋ္ဌာယ ဧဝမေတေ ဗီဇဂာမဘူတဂာမာ ဝုဍ္ဎိံ ဝိရူဠ္ဟိံ ဝေပုလ္လံ အာပဇ္ဇန္တိ; ဧဝမေဝ ခော, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ အရိယံ အဋ္ဌင္ဂိကံ မဂ္ဂံ ဘာဝေန္တော အရိယံ အဋ္ဌင္ဂိကံ မဂ္ဂံ ဗဟုလီကရောန္တော ဝုဍ္ဎိံ ဝိရူဠ္ဟိံ ဝေပုလ္လံ ပာပုဏာတိ ဓမ္မေသု။ ကထဉ္စ, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ အရိယံ အဋ္ဌင္ဂိကံ မဂ္ဂံ ဘာဝေန္တော အရိယံ အဋ္ဌင္ဂိကံ မဂ္ဂံ ဗဟုလီကရောန္တော ဝုဍ္ဎိံ ဝိရူဠ္ဟိံ ဝေပုလ္လံ ပာပုဏာတိ ဓမ္မေသု? ဣဓ, ဘိက္ခဝေ , ဘိက္ခု သမ္မာဒိဋ္ဌိံ ဘာဝေတိ ဝိဝေကနိသ္သိတံ။ပေ.။ သမ္မာသမာဓိံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ပေ.။ ဧဝံ ခော, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ အရိယံ အဋ္ဌင္ဂိကံ မဂ္ဂံ ဘာဝေန္တော အရိယံ အဋ္ဌင္ဂိကံ မဂ္ဂံ ဗဟုလီကရောန္တော ဝုဍ္ဎိံ ဝိရူဠ္ဟိံ ဝေပုလ္လံ ပာပုဏာတိ ဓမ္မေသူ’’တိ။ ဒုတိယံ။
150. ‘‘Seyyathāpi, bhikkhave, ye kecime bījagāmabhūtagāmā vuḍḍhiṃ virūḷhiṃ vepullaṃ āpajjanti, sabbe te pathaviṃ nissāya pathaviyaṃ patiṭṭhāya evamete bījagāmabhūtagāmā vuḍḍhiṃ virūḷhiṃ vepullaṃ āpajjanti; evameva kho, bhikkhave, bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto vuḍḍhiṃ virūḷhiṃ vepullaṃ pāpuṇāti dhammesu. Kathañca, bhikkhave, bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto vuḍḍhiṃ virūḷhiṃ vepullaṃ pāpuṇāti dhammesu? Idha, bhikkhave , bhikkhu sammādiṭṭhiṃ bhāveti vivekanissitaṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… evaṃ kho, bhikkhave, bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto vuḍḍhiṃ virūḷhiṃ vepullaṃ pāpuṇāti dhammesū’’ti. Dutiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. ဗီဇသုတ္တဝဏ္ဏနာ • 2. Bījasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ဗီဇသုတ္တဝဏ္ဏနာ • 2. Bījasuttavaṇṇanā
