| Library / Tipiṭaka / तिपिटक • Tipiṭaka / जातकपाळि • Jātakapāḷi |
४५०. बिलारकोसियजातकं (१२)
450. Bilārakosiyajātakaṃ (12)
१२५.
125.
अपचन्तापि दिच्छन्ति, सन्तो लद्धान भोजनं।
Apacantāpi dicchanti, santo laddhāna bhojanaṃ;
किमेव त्वं पचमानो, यं न दज्जा न तं समं॥
Kimeva tvaṃ pacamāno, yaṃ na dajjā na taṃ samaṃ.
१२६.
126.
मच्छेरा च पमादा च, एवं दानं न दिय्यति।
Maccherā ca pamādā ca, evaṃ dānaṃ na diyyati;
पुञ्ञं आकङ्खमानेन, देय्यं होति विजानता॥
Puññaṃ ākaṅkhamānena, deyyaṃ hoti vijānatā.
१२७.
127.
यस्सेव भीतो न ददाति मच्छरी, तदेवाददतो भयं।
Yasseva bhīto na dadāti maccharī, tadevādadato bhayaṃ;
जिघच्छा च पिपासा च, यस्स भायति मच्छरी।
Jighacchā ca pipāsā ca, yassa bhāyati maccharī;
तमेव बालं फुसति, अस्मिं लोके परम्हि च॥
Tameva bālaṃ phusati, asmiṃ loke paramhi ca.
१२८.
128.
तस्मा विनेय्य मच्छेरं, दज्जा दानं मलाभिभू।
Tasmā vineyya maccheraṃ, dajjā dānaṃ malābhibhū;
पुञ्ञानि परलोकस्मिं, पतिट्ठा होन्ति पाणिनं॥
Puññāni paralokasmiṃ, patiṭṭhā honti pāṇinaṃ.
१२९.
129.
दुद्ददं ददमानानं, दुक्करं कम्म कुब्बतं।
Duddadaṃ dadamānānaṃ, dukkaraṃ kamma kubbataṃ;
असन्तो नानुकुब्बन्ति, सतं धम्मो दुरन्नयो॥
Asanto nānukubbanti, sataṃ dhammo durannayo.
१३०.
130.
असन्तो निरयं यन्ति, सन्तो सग्गपरायना॥
Asanto nirayaṃ yanti, santo saggaparāyanā.
१३१.
131.
अप्पस्मा दक्खिणा दिन्ना, सहस्सेन समं मिता॥
Appasmā dakkhiṇā dinnā, sahassena samaṃ mitā.
१३२.
132.
धम्मं चरे योपि समुञ्छकं चरे, दारञ्च पोसं ददमप्पकस्मिं 5।
Dhammaṃ care yopi samuñchakaṃ care, dārañca posaṃ dadamappakasmiṃ 6;
सतं सहस्सानं सहस्सयागिनं, कलम्पि नाग्घन्ति तथाविधस्स ते॥
Sataṃ sahassānaṃ sahassayāginaṃ, kalampi nāgghanti tathāvidhassa te.
१३३.
133.
केनेस यञ्ञो विपुलो महग्घतो 7, समेन दिन्नस्स न अग्घमेति।
Kenesa yañño vipulo mahagghato 8, samena dinnassa na agghameti;
कथं सतं सहस्सानं 9 सहस्सयागिनं, कलम्पि नाग्घन्ति तथाविधस्स ते॥
Kathaṃ sataṃ sahassānaṃ 10 sahassayāginaṃ, kalampi nāgghanti tathāvidhassa te.
१३४.
134.
ददन्ति हेके विसमे निविट्ठा, छेत्वा 11 वधित्वा अथ सोचयित्वा।
Dadanti heke visame niviṭṭhā, chetvā 12 vadhitvā atha socayitvā;
सा दक्खिणा अस्सुमुखा सदण्डा, समेन दिन्नस्स न अग्घमेति।
Sā dakkhiṇā assumukhā sadaṇḍā, samena dinnassa na agghameti;
एवं सतं सहस्सानं 13 सहस्सयागिनं, कलम्पि नाग्घन्ति तथाविधस्स तेति॥
Evaṃ sataṃ sahassānaṃ 14 sahassayāginaṃ, kalampi nāgghanti tathāvidhassa teti.
बिलारकोसियजातकं द्वादसमं।
Bilārakosiyajātakaṃ dvādasamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४५०] १२. बिलारकोसियजातकवण्णना • [450] 12. Bilārakosiyajātakavaṇṇanā
