| Library / Tipiṭaka / તિપિટક • Tipiṭaka / જાતકપાળિ • Jātakapāḷi |
૪૫૦. બિલારકોસિયજાતકં (૧૨)
450. Bilārakosiyajātakaṃ (12)
૧૨૫.
125.
અપચન્તાપિ દિચ્છન્તિ, સન્તો લદ્ધાન ભોજનં;
Apacantāpi dicchanti, santo laddhāna bhojanaṃ;
કિમેવ ત્વં પચમાનો, યં ન દજ્જા ન તં સમં.
Kimeva tvaṃ pacamāno, yaṃ na dajjā na taṃ samaṃ.
૧૨૬.
126.
મચ્છેરા ચ પમાદા ચ, એવં દાનં ન દિય્યતિ;
Maccherā ca pamādā ca, evaṃ dānaṃ na diyyati;
પુઞ્ઞં આકઙ્ખમાનેન, દેય્યં હોતિ વિજાનતા.
Puññaṃ ākaṅkhamānena, deyyaṃ hoti vijānatā.
૧૨૭.
127.
યસ્સેવ ભીતો ન દદાતિ મચ્છરી, તદેવાદદતો ભયં;
Yasseva bhīto na dadāti maccharī, tadevādadato bhayaṃ;
જિઘચ્છા ચ પિપાસા ચ, યસ્સ ભાયતિ મચ્છરી;
Jighacchā ca pipāsā ca, yassa bhāyati maccharī;
તમેવ બાલં ફુસતિ, અસ્મિં લોકે પરમ્હિ ચ.
Tameva bālaṃ phusati, asmiṃ loke paramhi ca.
૧૨૮.
128.
તસ્મા વિનેય્ય મચ્છેરં, દજ્જા દાનં મલાભિભૂ;
Tasmā vineyya maccheraṃ, dajjā dānaṃ malābhibhū;
પુઞ્ઞાનિ પરલોકસ્મિં, પતિટ્ઠા હોન્તિ પાણિનં.
Puññāni paralokasmiṃ, patiṭṭhā honti pāṇinaṃ.
૧૨૯.
129.
દુદ્દદં દદમાનાનં, દુક્કરં કમ્મ કુબ્બતં;
Duddadaṃ dadamānānaṃ, dukkaraṃ kamma kubbataṃ;
અસન્તો નાનુકુબ્બન્તિ, સતં ધમ્મો દુરન્નયો.
Asanto nānukubbanti, sataṃ dhammo durannayo.
૧૩૦.
130.
અસન્તો નિરયં યન્તિ, સન્તો સગ્ગપરાયના.
Asanto nirayaṃ yanti, santo saggaparāyanā.
૧૩૧.
131.
અપ્પસ્મા દક્ખિણા દિન્ના, સહસ્સેન સમં મિતા.
Appasmā dakkhiṇā dinnā, sahassena samaṃ mitā.
૧૩૨.
132.
ધમ્મં ચરે યોપિ સમુઞ્છકં ચરે, દારઞ્ચ પોસં દદમપ્પકસ્મિં 5;
Dhammaṃ care yopi samuñchakaṃ care, dārañca posaṃ dadamappakasmiṃ 6;
સતં સહસ્સાનં સહસ્સયાગિનં, કલમ્પિ નાગ્ઘન્તિ તથાવિધસ્સ તે.
Sataṃ sahassānaṃ sahassayāginaṃ, kalampi nāgghanti tathāvidhassa te.
૧૩૩.
133.
કેનેસ યઞ્ઞો વિપુલો મહગ્ઘતો 7, સમેન દિન્નસ્સ ન અગ્ઘમેતિ;
Kenesa yañño vipulo mahagghato 8, samena dinnassa na agghameti;
કથં સતં સહસ્સાનં 9 સહસ્સયાગિનં, કલમ્પિ નાગ્ઘન્તિ તથાવિધસ્સ તે.
Kathaṃ sataṃ sahassānaṃ 10 sahassayāginaṃ, kalampi nāgghanti tathāvidhassa te.
૧૩૪.
134.
દદન્તિ હેકે વિસમે નિવિટ્ઠા, છેત્વા 11 વધિત્વા અથ સોચયિત્વા;
Dadanti heke visame niviṭṭhā, chetvā 12 vadhitvā atha socayitvā;
સા દક્ખિણા અસ્સુમુખા સદણ્ડા, સમેન દિન્નસ્સ ન અગ્ઘમેતિ;
Sā dakkhiṇā assumukhā sadaṇḍā, samena dinnassa na agghameti;
એવં સતં સહસ્સાનં 13 સહસ્સયાગિનં, કલમ્પિ નાગ્ઘન્તિ તથાવિધસ્સ તેતિ.
Evaṃ sataṃ sahassānaṃ 14 sahassayāginaṃ, kalampi nāgghanti tathāvidhassa teti.
બિલારકોસિયજાતકં દ્વાદસમં.
Bilārakosiyajātakaṃ dvādasamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / જાતક-અટ્ઠકથા • Jātaka-aṭṭhakathā / [૪૫૦] ૧૨. બિલારકોસિયજાતકવણ્ણના • [450] 12. Bilārakosiyajātakavaṇṇanā
