| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[450] 12. б̣илаарагосияаж̇аад̇агаван̣н̣анаа
[450] 12. Bilārakosiyajātakavaṇṇanā
абажанд̇аабийд̇и ид̣̇ам̣ сад̇т̇аа ж̇зд̇аванз вихаранд̇о згам̣ д̣̇аанавид̇д̇ам̣ бхигкум̣ аараб̣бха гат̇зси. со гира бхаг̇авад̇о д̇хаммад̣̇зсанам̣ суд̇ваа саасанз баб̣б̣аж̇ид̇ваа баб̣б̣аж̇ид̇агаалад̇о бадтааяа д̣̇аанавид̇д̇о ахоси д̣̇аанаж̇жхаасаяо, бад̇д̇абарияаабаннамби бин̣д̣абаад̇ам̣ ан̃н̃асса ад̣̇ад̇ваа на бхун̃ж̇и, анд̇амасо баанийяамби лабхид̇ваа ан̃н̃асса ад̣̇ад̇ваа на биви, звам̣ д̣̇аанаабхирад̇о ахоси. ат̇асса д̇хаммасабхааяам̣ бхигкуу г̇ун̣агат̇ам̣ гат̇зсум̣. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з д̇ам̣ бхигкум̣ баггосаабзд̇ваа ‘‘сажжам̣ гира д̇вам̣ бхигку д̣̇аанавид̇д̇о д̣̇аанаж̇жхаасаяо’’д̇и бужчид̇ваа ‘‘сажжам̣, бханд̇з’’д̇и вуд̇д̇з ‘‘бхигкавз аяам̣ буб̣б̣з ассад̣̇д̇хо ахоси аббасанно, д̇ин̣аг̇г̇зна д̇злаб̣инд̣̇умби уд̣̇д̇харид̇ваа гассажи на ад̣̇ааси, ат̇а нам̣ ахам̣ д̣̇амзд̇ваа ниб̣б̣исзванам̣ гад̇ваа д̣̇аанапалам̣ н̃аабзсим̣, д̇амзва д̣̇аананиннам̣ жид̇д̇ам̣ бхаванд̇арзби на баж̇ахад̇ий’’д̇и вад̇ваа бхигкуухи яаажид̇о ад̇ийд̇ам̣ аахари.
Apacantāpīti idaṃ satthā jetavane viharanto ekaṃ dānavittaṃ bhikkhuṃ ārabbha kathesi. So kira bhagavato dhammadesanaṃ sutvā sāsane pabbajitvā pabbajitakālato paṭṭhāya dānavitto ahosi dānajjhāsayo, pattapariyāpannampi piṇḍapātaṃ aññassa adatvā na bhuñji, antamaso pānīyampi labhitvā aññassa adatvā na pivi, evaṃ dānābhirato ahosi. Athassa dhammasabhāyaṃ bhikkhū guṇakathaṃ kathesuṃ. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte taṃ bhikkhuṃ pakkosāpetvā ‘‘saccaṃ kira tvaṃ bhikkhu dānavitto dānajjhāsayo’’ti pucchitvā ‘‘saccaṃ, bhante’’ti vutte ‘‘bhikkhave ayaṃ pubbe assaddho ahosi appasanno, tiṇaggena telabindumpi uddharitvā kassaci na adāsi, atha naṃ ahaṃ dametvā nibbisevanaṃ katvā dānaphalaṃ ñāpesiṃ, tameva dānaninnaṃ cittaṃ bhavantarepi na pajahatī’’ti vatvā bhikkhūhi yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о сздтигулз ниб̣б̣ад̇д̇ид̇ваа ваяаббад̇д̇о гудумб̣ам̣ сан̣табзд̇ваа бид̇у ажжаязна сздтидтаанам̣ бад̇ваа згад̣̇ивасам̣ д̇ханавилоганам̣ гад̇ваа ‘‘д̇ханам̣ бан̃н̃ааяад̇и, зд̇асса уббаад̣̇агаа на бан̃н̃ааяанд̇и, имам̣ д̇ханам̣ виссаж̇ж̇зд̇ваа махаад̣̇аанам̣ д̣̇аад̇ум̣ ваддад̇ий’’д̇и д̣̇аанасаалам̣ гаарзд̇ваа яааваж̇ийвам̣ махаад̣̇аанам̣ бавад̇д̇зд̇ваа ааяубарияосаанз ‘‘ид̣̇ам̣ д̣̇аанавад̇д̇ам̣ маа убажчинд̣̇ий’’д̇и буд̇д̇асса оваад̣̇ам̣ д̣̇ад̇ваа д̇аавад̇им̣сабхаванз сагго худ̇ваа ниб̣б̣ад̇д̇и. буд̇д̇обисса д̇ат̇зва д̣̇аанам̣ д̣̇ад̇ваа буд̇д̇ам̣ овад̣̇ид̇ваа ааяубарияосаанз жанд̣̇о д̣̇звабуд̇д̇о худ̇ваа ниб̣б̣ад̇д̇и, д̇асса буд̇д̇о суурияо худ̇ваа ниб̣б̣ад̇д̇и, д̇ассаби буд̇д̇о маад̇алисан̇г̇аахаго худ̇ваа ниб̣б̣ад̇д̇и, д̇асса буд̇д̇о бан̃жасико г̇анд̇хаб̣б̣ад̣̇звабуд̇д̇о худ̇ваа ниб̣б̣ад̇д̇и. чадто бана ассад̣̇д̇хо ахоси т̇ад̣̇д̇хажид̇д̇о ниснзхо мажчарий, д̣̇аанасаалам̣ вид̣̇д̇хам̣сзд̇ваа жхаабзд̇ваа яаажагз бот̇зд̇ваа нийхараабзси, гассажи д̇ин̣аг̇г̇зна уд̣̇д̇харид̇ваа д̇злаб̣инд̣̇умби на д̣̇зд̇и. д̇ад̣̇аа сагго д̣̇зварааж̇аа ад̇д̇ано буб̣б̣агаммам̣ ологзд̇ваа ‘‘бавад̇д̇ад̇и ну ко мз д̣̇аанавам̣со, уд̣̇ааху но’’д̇и убад̇хаарзнд̇о ‘‘буд̇д̇о мз д̣̇аанам̣ бавад̇д̇зд̇ваа жанд̣̇о худ̇ваа ниб̣б̣ад̇д̇и, д̇асса буд̇д̇о суурияо, д̇асса буд̇д̇о маад̇али, д̇асса буд̇д̇о бан̃жасико г̇анд̇хаб̣б̣ад̣̇звабуд̇д̇о худ̇ваа ниб̣б̣ад̇д̇и, чадто бана д̇ам̣ вам̣сам̣ убажчинд̣̇ий’’д̇и басси.
Atīte bārāṇasiyaṃ brahmadatte rajjaṃ kārente bodhisatto seṭṭhikule nibbattitvā vayappatto kuṭumbaṃ saṇṭhapetvā pitu accayena seṭṭhiṭṭhānaṃ patvā ekadivasaṃ dhanavilokanaṃ katvā ‘‘dhanaṃ paññāyati, etassa uppādakā na paññāyanti, imaṃ dhanaṃ vissajjetvā mahādānaṃ dātuṃ vaṭṭatī’’ti dānasālaṃ kāretvā yāvajīvaṃ mahādānaṃ pavattetvā āyupariyosāne ‘‘idaṃ dānavattaṃ mā upacchindī’’ti puttassa ovādaṃ datvā tāvatiṃsabhavane sakko hutvā nibbatti. Puttopissa tatheva dānaṃ datvā puttaṃ ovaditvā āyupariyosāne cando devaputto hutvā nibbatti, tassa putto sūriyo hutvā nibbatti, tassapi putto mātalisaṅgāhako hutvā nibbatti, tassa putto pañcasikho gandhabbadevaputto hutvā nibbatti. Chaṭṭho pana assaddho ahosi thaddhacitto nisneho maccharī, dānasālaṃ viddhaṃsetvā jhāpetvā yācake pothetvā nīharāpesi, kassaci tiṇaggena uddharitvā telabindumpi na deti. Tadā sakko devarājā attano pubbakammaṃ oloketvā ‘‘pavattati nu kho me dānavaṃso, udāhu no’’ti upadhārento ‘‘putto me dānaṃ pavattetvā cando hutvā nibbatti, tassa putto sūriyo, tassa putto mātali, tassa putto pañcasikho gandhabbadevaputto hutvā nibbatti, chaṭṭho pana taṃ vaṃsaṃ upacchindī’’ti passi.
ат̇асса зд̇ад̣̇ахоси ‘‘имам̣ баабад̇хаммам̣ д̣̇амзд̇ваа д̣̇аанапалам̣ ж̇аанаабзд̇ваа ааг̇амиссаамий’’д̇и. со жанд̣̇асуурияамаад̇алибан̃жасикз баггосаабзд̇ваа ‘‘саммаа, амхаагам̣ вам̣сз чадто гулавам̣сам̣ самужчинд̣̇ид̇ваа д̣̇аанасаалам̣ жхаабзд̇ваа яаажагз нийхараабзси, на гассажи гин̃жи д̣̇зд̇и, зт̇а нам̣ д̣̇амзссаамаа’’д̇и д̇зхи сад̣̇д̇хим̣ б̣аараан̣асим̣ аг̇амааси. д̇асмим̣ кан̣з сздти рааж̇убадтаанам̣ гад̇ваа ааг̇анд̇ваа сад̇д̇амз д̣̇ваарагодтагз анд̇аравийт̇им̣ ологзнд̇о жан̇гамад̇и. сагго ‘‘д̇умхз мама бавидтагаалз бажчад̇о бадибаадияаа ааг̇ажчат̇аа’’д̇и вад̇ваа г̇анд̇ваа сздтисса санд̇игз тад̇ваа ‘‘бхо махаасздти, бхож̇анам̣ мз д̣̇зхий’’д̇и ааха. ‘‘б̣раахман̣а над̇т̇и д̇ава ид̇ха бхад̇д̇ам̣, ан̃н̃ад̇т̇а г̇ажчаа’’д̇и. ‘‘бхо махаасздти, б̣раахман̣зхи бхад̇д̇з яаажид̇з на д̣̇аад̇ум̣ на лаб̣бхад̇ий’’д̇и. ‘‘б̣раахман̣а, мама г̇зхз баггамби бажид̇аб̣б̣амби бхад̇д̇ам̣ над̇т̇и, ан̃н̃ад̇т̇а г̇ажчаа’’д̇и. ‘‘махаасздти, згам̣ д̇з силогам̣ гат̇зссаами, д̇ам̣ сун̣аахий’’д̇и. ‘‘над̇т̇и маяхам̣ д̇ава силогзнад̇т̇о, маа ид̇ха д̇идтаа’’д̇и. сагго д̇асса гат̇ам̣ асун̣анд̇о вияа д̣̇вз г̇аат̇аа абхааси –
Athassa etadahosi ‘‘imaṃ pāpadhammaṃ dametvā dānaphalaṃ jānāpetvā āgamissāmī’’ti. So candasūriyamātalipañcasikhe pakkosāpetvā ‘‘sammā, amhākaṃ vaṃse chaṭṭho kulavaṃsaṃ samucchinditvā dānasālaṃ jhāpetvā yācake nīharāpesi, na kassaci kiñci deti, etha naṃ damessāmā’’ti tehi saddhiṃ bārāṇasiṃ agamāsi. Tasmiṃ khaṇe seṭṭhi rājupaṭṭhānaṃ katvā āgantvā sattame dvārakoṭṭhake antaravīthiṃ olokento caṅkamati. Sakko ‘‘tumhe mama paviṭṭhakāle pacchato paṭipāṭiyā āgacchathā’’ti vatvā gantvā seṭṭhissa santike ṭhatvā ‘‘bho mahāseṭṭhi, bhojanaṃ me dehī’’ti āha. ‘‘Brāhmaṇa natthi tava idha bhattaṃ, aññattha gacchā’’ti. ‘‘Bho mahāseṭṭhi, brāhmaṇehi bhatte yācite na dātuṃ na labbhatī’’ti. ‘‘Brāhmaṇa, mama gehe pakkampi pacitabbampi bhattaṃ natthi, aññattha gacchā’’ti. ‘‘Mahāseṭṭhi, ekaṃ te silokaṃ kathessāmi, taṃ suṇāhī’’ti. ‘‘Natthi mayhaṃ tava silokenattho, mā idha tiṭṭhā’’ti. Sakko tassa kathaṃ asuṇanto viya dve gāthā abhāsi –
125.
125.
‘‘абажанд̇ааби д̣̇ижчанд̇и, санд̇о лад̣̇д̇хаана бхож̇анам̣;
‘‘Apacantāpi dicchanti, santo laddhāna bhojanaṃ;
гимзва д̇вам̣ бажамаано, яам̣ на д̣̇аж̇ж̇аа на д̇ам̣ самам̣.
Kimeva tvaṃ pacamāno, yaṃ na dajjā na taṃ samaṃ.
126.
126.
‘‘мажчзраа жа бамаад̣̇аа жа, звам̣ д̣̇аанам̣ на д̣̇ийяад̇и;
‘‘Maccherā ca pamādā ca, evaṃ dānaṃ na dīyati;
бун̃н̃ам̣ ааган̇камаанзна, д̣̇зяяам̣ ход̇и виж̇аанад̇аа’’д̇и.
Puññaṃ ākaṅkhamānena, deyyaṃ hoti vijānatā’’ti.
д̇аасам̣ ад̇т̇о – махаасздти абажанд̇ааби санд̇о саббурисаа бхигкаажарияааяа лад̣̇д̇хамби бхож̇анам̣ д̣̇аад̇ум̣ ижчанд̇и, на згагаа барибхун̃ж̇анд̇и. гимзва д̇вам̣ бажамаано яам̣ на д̣̇ад̣̇зяяааси, на д̇ам̣ самам̣, д̇ам̣ д̇ава ануруубам̣ анужчавигам̣ на ход̇и. д̣̇аанан̃хи мажчзрзна жа бамаад̣̇зна жаад̇и д̣̇вийхи д̣̇осзхи на д̣̇ийяад̇и, бун̃н̃ам̣ ааган̇камаанзна виж̇аанад̇аа бан̣д̣ид̇амануссзна д̣̇аад̇аб̣б̣амзва ход̇ийд̇и.
Tāsaṃ attho – mahāseṭṭhi apacantāpi santo sappurisā bhikkhācariyāya laddhampi bhojanaṃ dātuṃ icchanti, na ekakā paribhuñjanti. Kimeva tvaṃ pacamāno yaṃ na dadeyyāsi, na taṃ samaṃ, taṃ tava anurūpaṃ anucchavikaṃ na hoti. Dānañhi maccherena ca pamādena cāti dvīhi dosehi na dīyati, puññaṃ ākaṅkhamānena vijānatā paṇḍitamanussena dātabbameva hotīti.
со д̇асса важанам̣ суд̇ваа ‘‘д̇зна хи г̇зхам̣ бависид̇ваа нисийд̣̇а, т̇огам̣ лажчасий’’д̇и ааха. сагго бависид̇ваа д̇з силогз саж̇жхааяанд̇о нисийд̣̇и. ат̇а нам̣ жанд̣̇о ааг̇анд̇ваа бхад̇д̇ам̣ яаажи. ‘‘над̇т̇и д̇з бхад̇д̇ам̣, г̇ажчаа’’д̇и жа вуд̇д̇о ‘‘махаасздти анд̇о зго б̣раахман̣о нисинно, б̣раахман̣аваажанагам̣ ман̃н̃з бхависсад̇и, ахамби бхависсаамий’’д̇и вад̇ваа ‘‘над̇т̇и б̣раахман̣аваажанагам̣, нигкамаа’’д̇и вужжамааноби ‘‘махаасздти ин̇гха д̇аава силогам̣ сун̣аахий’’д̇и д̣̇вз г̇аат̇аа абхааси –
So tassa vacanaṃ sutvā ‘‘tena hi gehaṃ pavisitvā nisīda, thokaṃ lacchasī’’ti āha. Sakko pavisitvā te siloke sajjhāyanto nisīdi. Atha naṃ cando āgantvā bhattaṃ yāci. ‘‘Natthi te bhattaṃ, gacchā’’ti ca vutto ‘‘mahāseṭṭhi anto eko brāhmaṇo nisinno, brāhmaṇavācanakaṃ maññe bhavissati, ahampi bhavissāmī’’ti vatvā ‘‘natthi brāhmaṇavācanakaṃ, nikkhamā’’ti vuccamānopi ‘‘mahāseṭṭhi iṅgha tāva silokaṃ suṇāhī’’ti dve gāthā abhāsi –
127.
127.
‘‘яассзва бхийд̇о на д̣̇ад̣̇аад̇и мажчарий, д̇ад̣̇зваад̣̇ад̣̇ад̇о бхаяам̣;
‘‘Yasseva bhīto na dadāti maccharī, tadevādadato bhayaṃ;
ж̇игхажчаа жа бибаасаа жа, яасса бхааяад̇и мажчарий;
Jighacchā ca pipāsā ca, yassa bhāyati maccharī;
д̇амзва б̣аалам̣ пусад̇и, асмим̣ логз барамхи жа.
Tameva bālaṃ phusati, asmiṃ loke paramhi ca.
128.
128.
‘‘д̇асмаа винзяяа мажчзрам̣, д̣̇аж̇ж̇аа д̣̇аанам̣ малаабхибхуу;
‘‘Tasmā vineyya maccheraṃ, dajjā dānaṃ malābhibhū;
бун̃н̃аани баралогасмим̣, бад̇идтаа хонд̇и баан̣ина’’нд̇и.
Puññāni paralokasmiṃ, patiṭṭhā honti pāṇina’’nti.
д̇ад̇т̇а яасса бхааяад̇ийд̇и ‘‘ахам̣ ан̃н̃зсам̣ д̣̇ад̇ваа саяам̣ ж̇игхажчид̇о жа бибаасид̇о жа бхависсаамий’’д̇и яассаа ж̇игхажчааяа бибаасааяа бхааяад̇и. д̇амзваад̇и д̇ан̃н̃зва ж̇игхажчаабибаасаасан̇каад̇ам̣ бхаяам̣ зд̇ам̣ б̣аалам̣ ниб̣б̣ад̇д̇аниб̣б̣ад̇д̇адтаанз ид̇халогз баралогз жа пусад̇и бийл̣зд̇и, ажжанд̇ад̣̇аалид̣̇д̣̇ияам̣ баабун̣аад̇и. малаабхибхууд̇и мажчарияамалам̣ абхибхаванд̇о.
Tattha yassa bhāyatīti ‘‘ahaṃ aññesaṃ datvā sayaṃ jighacchito ca pipāsito ca bhavissāmī’’ti yassā jighacchāya pipāsāya bhāyati. Tamevāti taññeva jighacchāpipāsāsaṅkhātaṃ bhayaṃ etaṃ bālaṃ nibbattanibbattaṭṭhāne idhaloke paraloke ca phusati pīḷeti, accantadāliddiyaṃ pāpuṇāti. Malābhibhūti macchariyamalaṃ abhibhavanto.
д̇ассаби важанам̣ суд̇ваа ‘‘д̇зна хи бависа, т̇огам̣ лабхиссасий’’д̇и ааха. соби бависид̇ваа саггасса санд̇игз нисийд̣̇и. д̇ад̇о т̇огам̣ вийд̇инаамзд̇ваа суурияо ааг̇анд̇ваа бхад̇д̇ам̣ яаажанд̇о д̣̇вз г̇аат̇аа абхааси –
Tassapi vacanaṃ sutvā ‘‘tena hi pavisa, thokaṃ labhissasī’’ti āha. Sopi pavisitvā sakkassa santike nisīdi. Tato thokaṃ vītināmetvā sūriyo āgantvā bhattaṃ yācanto dve gāthā abhāsi –
129.
129.
‘‘д̣̇уд̣̇д̣̇ад̣̇ам̣ д̣̇ад̣̇амаанаанам̣, д̣̇уггарам̣ гамма губ̣б̣ад̇ам̣;
‘‘Duddadaṃ dadamānānaṃ, dukkaraṃ kamma kubbataṃ;
асанд̇о наанугуб̣б̣анд̇и, сад̇ам̣ д̇хаммо д̣̇ураннаяо.
Asanto nānukubbanti, sataṃ dhammo durannayo.
130.
130.
‘‘д̇асмаа сад̇ан̃жа асад̇ам̣, наанаа ход̇и ид̇о г̇ад̇и;
‘‘Tasmā satañca asataṃ, nānā hoti ito gati;
асанд̇о нираяам̣ яанд̇и, санд̇о саг̇г̇абарааяан̣аа’’д̇и.
Asanto nirayaṃ yanti, santo saggaparāyaṇā’’ti.
д̇ад̇т̇а д̣̇уд̣̇д̣̇ад̣̇анд̇и д̣̇аанам̣ наама д̣̇уд̣̇д̣̇ад̣̇ам̣ мажчзрам̣ абхибхавид̇ваа д̣̇аад̇аб̣б̣ад̇о, д̇ам̣ д̣̇ад̣̇амаанаанам̣. д̣̇уггаранд̇и д̇ад̣̇зва д̣̇аанагаммам̣ д̣̇уггарам̣ яуд̣̇д̇хасад̣̇исам̣, д̇ам̣ губ̣б̣ад̇ам̣. наанугуб̣б̣анд̇ийд̇и асаббурисаа д̣̇аанапалам̣ аж̇аананд̇аа д̇зсам̣ г̇ад̇амаг̇г̇ам̣ наануг̇ажчанд̇и. сад̇ам̣ д̇хаммод̇и саббурисаанам̣ б̣од̇хисад̇д̇аанам̣ д̇хаммо ан̃н̃зхи д̣̇урануг̇амо. асанд̇од̇и мажчарияавасзна д̣̇аанам̣ ад̣̇ад̇ваа асаббурисаа нираяам̣ яанд̇и.
Tattha duddadanti dānaṃ nāma duddadaṃ maccheraṃ abhibhavitvā dātabbato, taṃ dadamānānaṃ. Dukkaranti tadeva dānakammaṃ dukkaraṃ yuddhasadisaṃ, taṃ kubbataṃ. Nānukubbantīti asappurisā dānaphalaṃ ajānantā tesaṃ gatamaggaṃ nānugacchanti. Sataṃ dhammoti sappurisānaṃ bodhisattānaṃ dhammo aññehi duranugamo. Asantoti macchariyavasena dānaṃ adatvā asappurisā nirayaṃ yanti.
сздти г̇ахзд̇аб̣б̣аг̇ахан̣ам̣ абассанд̇о ‘‘д̇зна хи бависид̇ваа б̣раахман̣аанам̣ санд̇игз нисийд̣̇а, т̇огам̣ лажчасий’’д̇и ааха. д̇ад̇о т̇огам̣ вийд̇инаамзд̇ваа маад̇али ааг̇анд̇ваа бхад̇д̇ам̣ яаажид̇ваа ‘‘над̇т̇ий’’д̇и важанамад̇д̇агааламзва сад̇д̇амам̣ г̇аат̇амааха –
Seṭṭhi gahetabbagahaṇaṃ apassanto ‘‘tena hi pavisitvā brāhmaṇānaṃ santike nisīda, thokaṃ lacchasī’’ti āha. Tato thokaṃ vītināmetvā mātali āgantvā bhattaṃ yācitvā ‘‘natthī’’ti vacanamattakālameva sattamaṃ gāthamāha –
131.
131.
‘‘аббасмзгз бавзжчанд̇и, б̣ахунзгз на д̣̇ижчарз;
‘‘Appasmeke pavecchanti, bahuneke na dicchare;
аббасмаа д̣̇агкин̣аа д̣̇иннаа, сахассзна самам̣ мид̇аа’’д̇и.
Appasmā dakkhiṇā dinnā, sahassena samaṃ mitā’’ti.
д̇ад̇т̇а аббасмзгз бавзжчанд̇ийд̇и махаасздти згажжз бан̣д̣ид̇абурисаа аббасмимби д̣̇зяяад̇хаммз бавзжчанд̇и, д̣̇ад̣̇анд̇иязваад̇и ад̇т̇о. б̣ахунааби д̣̇зяяад̇хаммзна саманнааг̇ад̇аа згз сад̇д̇аа на д̣̇ижчарз на д̣̇ад̣̇анд̇и. д̣̇агкин̣аад̇и гамман̃жа палан̃жа сад̣̇д̣̇ахид̇ваа д̣̇иннад̣̇аанам̣. сахассзна самам̣ мид̇аад̇и звам̣ д̣̇иннаа гадажчубхад̇д̇амад̇д̇ааби д̣̇агкин̣аа сахассад̣̇аанзна сад̣̇д̇хим̣ мид̇аа, махаапалад̇д̇аа сахассад̣̇аанасад̣̇исаава ход̇ийд̇и ад̇т̇о.
Tattha appasmeke pavecchantīti mahāseṭṭhi ekacce paṇḍitapurisā appasmimpi deyyadhamme pavecchanti, dadantiyevāti attho. Bahunāpi deyyadhammena samannāgatā eke sattā na dicchare na dadanti. Dakkhiṇāti kammañca phalañca saddahitvā dinnadānaṃ. Sahassena samaṃ mitāti evaṃ dinnā kaṭacchubhattamattāpi dakkhiṇā sahassadānena saddhiṃ mitā, mahāphalattā sahassadānasadisāva hotīti attho.
д̇амби со ‘‘д̇зна хи бависид̇ваа нисийд̣̇аа’’д̇и ааха. д̇ад̇о т̇огам̣ вийд̇инаамзд̇ваа бан̃жасико ааг̇анд̇ваа бхад̇д̇ам̣ яаажид̇ваа ‘‘над̇т̇и г̇ажчаа’’д̇и вуд̇д̇з ‘‘ахам̣ на г̇ад̇абуб̣б̣о, имасмим̣ г̇зхз б̣раахман̣аваажанагам̣ бхависсад̇и ман̃н̃з’’д̇и д̇асса д̇хаммагат̇ам̣ аарабханд̇о адтамам̣ г̇аат̇амааха –
Tampi so ‘‘tena hi pavisitvā nisīdā’’ti āha. Tato thokaṃ vītināmetvā pañcasikho āgantvā bhattaṃ yācitvā ‘‘natthi gacchā’’ti vutte ‘‘ahaṃ na gatapubbo, imasmiṃ gehe brāhmaṇavācanakaṃ bhavissati maññe’’ti tassa dhammakathaṃ ārabhanto aṭṭhamaṃ gāthamāha –
132.
132.
‘‘д̇хаммам̣ жарз яоби самун̃чагам̣ жарз, д̣̇ааран̃жа босам̣ д̣̇ад̣̇амаббагасмим̣;
‘‘Dhammaṃ care yopi samuñchakaṃ care, dārañca posaṃ dadamappakasmiṃ;
сад̇ам̣ сахассаанам̣ сахассаяааг̇инам̣, галамби нааг̇гханд̇и д̇ат̇аавид̇хасса д̇з’’д̇и.
Sataṃ sahassānaṃ sahassayāginaṃ, kalampi nāgghanti tathāvidhassa te’’ti.
д̇ад̇т̇а д̇хамманд̇и д̇ивид̇хасужарид̇ад̇хаммам̣. самун̃чаганд̇и г̇аамз ваа аамагабаггабхигкаажарияам̣ аран̃н̃з ваа палаапалахаран̣асан̇каад̇ам̣ ун̃чам̣ яо жарзяяа, соби д̇хаммамзва жарз. д̣̇ааран̃жа босанд̇и ад̇д̇ано жа буд̇д̇ад̣̇аарам̣ босзнд̇оязва. д̣̇ад̣̇амаббагасминд̇и барид̇д̇з ваа д̣̇зяяад̇хаммз д̇хаммигасаман̣аб̣раахман̣аанам̣ д̣̇ад̣̇амаано д̇хаммам̣ жарзд̇и ад̇т̇о. сад̇ам̣ сахассаанам̣ сахассаяааг̇инанд̇и барам̣ бот̇зд̇ваа вихзтзд̇ваа сахассзна яааг̇ам̣ яаж̇анд̇аанам̣ сахассаяааг̇ийнам̣ иссараанам̣ сад̇асахассамби. галамби нааг̇гханд̇и д̇ат̇аавид̇хасса д̇зд̇и д̇зсам̣ сад̇асахассасан̇каад̇аанам̣ сахассаяааг̇ийнам̣ яааг̇аа д̇ат̇аавид̇хасса д̇хаммзна самзна д̣̇зяяад̇хаммам̣ уббаад̣̇зд̇ваа д̣̇знд̇асса д̣̇уг̇г̇ад̇амануссасса сол̣асим̣ галам̣ на аг̇гханд̇ийд̇и.
Tattha dhammanti tividhasucaritadhammaṃ. Samuñchakanti gāme vā āmakapakkabhikkhācariyaṃ araññe vā phalāphalaharaṇasaṅkhātaṃ uñchaṃ yo careyya, sopi dhammameva care. Dārañca posanti attano ca puttadāraṃ posentoyeva. Dadamappakasminti paritte vā deyyadhamme dhammikasamaṇabrāhmaṇānaṃ dadamāno dhammaṃ careti attho. Sataṃ sahassānaṃ sahassayāginanti paraṃ pothetvā viheṭhetvā sahassena yāgaṃ yajantānaṃ sahassayāgīnaṃ issarānaṃ satasahassampi. Kalampi nāgghanti tathāvidhassa teti tesaṃ satasahassasaṅkhātānaṃ sahassayāgīnaṃ yāgā tathāvidhassa dhammena samena deyyadhammaṃ uppādetvā dentassa duggatamanussassa soḷasiṃ kalaṃ na agghantīti.
сздти бан̃жасикасса гат̇ам̣ суд̇ваа саллагкзси. ат̇а нам̣ анаг̇гхагааран̣ам̣ бужчанд̇о навамам̣ г̇аат̇амааха –
Seṭṭhi pañcasikhassa kathaṃ sutvā sallakkhesi. Atha naṃ anagghakāraṇaṃ pucchanto navamaṃ gāthamāha –
133.
133.
‘‘гзнзса яан̃н̃о вибуло махаг̇гхад̇о, самзна д̣̇иннасса на аг̇гхамзд̇и;
‘‘Kenesa yañño vipulo mahagghato, samena dinnassa na agghameti;
гат̇ам̣ сад̇ам̣ сахассаанам̣ сахассаяааг̇инам̣, галамби нааг̇гханд̇и д̇ат̇аавид̇хасса д̇з’’д̇и.
Kathaṃ sataṃ sahassānaṃ sahassayāginaṃ, kalampi nāgghanti tathāvidhassa te’’ti.
д̇ад̇т̇а яан̃н̃од̇и д̣̇аанаяааг̇о сад̇асахассабарижжааг̇авасзна вибуло, вибулад̇д̇аава махаг̇гхад̇о. самзна д̣̇иннассаад̇и д̇хаммзна д̣̇иннасса гзна гааран̣зна аг̇гхам̣ на убзд̇и. гат̇ам̣ сад̇ам̣ сахассаананд̇и б̣раахман̣а, гат̇ам̣ сахассаяааг̇ийнам̣ бурисаанам̣ б̣ахуунам̣ сахассаанам̣ сад̇асахассасан̇каад̇аа иссараа д̇ат̇аавид̇хасса д̇хаммзна уббаад̣̇зд̇ваа д̣̇ааяагасса згасса д̣̇уг̇г̇ад̇амануссасса галам̣ нааг̇гханд̇ийд̇и.
Tattha yaññoti dānayāgo satasahassapariccāgavasena vipulo, vipulattāva mahagghato. Samena dinnassāti dhammena dinnassa kena kāraṇena agghaṃ na upeti. Kathaṃ sataṃ sahassānanti brāhmaṇa, kathaṃ sahassayāgīnaṃ purisānaṃ bahūnaṃ sahassānaṃ satasahassasaṅkhātā issarā tathāvidhassa dhammena uppādetvā dāyakassa ekassa duggatamanussassa kalaṃ nāgghantīti.
ат̇асса гат̇знд̇о бан̃жасико осаанаг̇аат̇амааха –
Athassa kathento pañcasikho osānagāthamāha –
134.
134.
‘‘д̣̇ад̣̇анд̇и хзгз висамз нивидтаа, чзд̇ваа вад̇хид̇ваа ат̇а сожаяид̇ваа;
‘‘Dadanti heke visame niviṭṭhā, chetvā vadhitvā atha socayitvā;
саа д̣̇агкин̣аа ассумукаа сад̣̇ан̣д̣аа, самзна д̣̇иннасса на аг̇гхамзд̇и;
Sā dakkhiṇā assumukhā sadaṇḍā, samena dinnassa na agghameti;
звам̣ сад̇ам̣ сахассаанам̣ сахассаяааг̇инам̣, галамби нааг̇гханд̇и д̇ат̇аавид̇хасса д̇з’’д̇и.
Evaṃ sataṃ sahassānaṃ sahassayāginaṃ, kalampi nāgghanti tathāvidhassa te’’ti.
д̇ад̇т̇а висамзд̇и висамз гааяагаммаад̣̇имхи нивидтаа. чзд̇ваад̇и гиламзд̇ваа. вад̇хид̇ваад̇и маарзд̇ваа. сожаяид̇ваад̇и сасогз гад̇ваа.
Tattha visameti visame kāyakammādimhi niviṭṭhā. Chetvāti kilametvā. Vadhitvāti māretvā. Socayitvāti sasoke katvā.
со бан̃жасикасса д̇хаммагат̇ам̣ суд̇ваа ‘‘д̇зна хи г̇ажча, г̇зхам̣ бависид̇ваа нисийд̣̇а, т̇огам̣ лажчасий’’д̇и ааха. соби г̇анд̇ваа д̇зсам̣ санд̇игз нисийд̣̇и. д̇ад̇о б̣илаарагосияо сздти згам̣ д̣̇аасим̣ ааманд̇зд̇ваа ‘‘зд̇зсам̣ б̣раахман̣аанам̣ балаабавийхийнам̣ наал̣им̣ наал̣им̣ д̣̇зхий’’д̇и ааха. саа вийхий г̇ахзд̇ваа б̣раахман̣з убасан̇гамид̇ваа ‘‘имз аад̣̇ааяа яад̇т̇а гад̇т̇ажи бажаабзд̇ваа бхун̃ж̇ат̇аа’’д̇и ааха. ‘‘на амхаагам̣ вийхинаа ад̇т̇о, на маяам̣ вийхим̣ аамасаамаа’’д̇и. ‘‘аяяа, вийхим̣ гирзд̇з наамасанд̇ий’’д̇и? ‘‘д̇зна хи д̇зсам̣ д̇ан̣д̣улз д̣̇зхий’’д̇и. саа д̇ан̣д̣улз аад̣̇ааяа г̇анд̇ваа ‘‘б̣раахман̣аа д̇ан̣д̣улз г̇ан̣хат̇аа’’д̇и ааха. ‘‘маяам̣ аамагам̣ на бадиг̇г̇ан̣хаамаа’’д̇и. ‘‘аяяа, аамагам̣ гира на г̇ан̣ханд̇ий’’д̇и. ‘‘д̇зна хи д̇зсам̣ гародияам̣ вад̣дхзд̇ваа г̇обхад̇д̇ам̣ д̣̇зхий’’д̇и. саа д̇зсам̣ гародияам̣ вад̣дхзд̇ваа махааг̇он̣аанам̣ баггабхад̇д̇ам̣ аахарид̇ваа ад̣̇ааси. бан̃жаби ж̇анаа габ̣ал̣з вад̣дхзд̇ваа мукз багкибид̇ваа г̇алз лаг̇г̇аабзд̇ваа агкийни баривад̇д̇зд̇ваа виссадтасан̃н̃аа мад̇аа вияа нибаж̇ж̇им̣су. д̣̇аасий д̇з д̣̇исваа ‘‘мад̇аа бхависсанд̇ий’’д̇и бхийд̇аа г̇анд̇ваа сздтино аарожзси ‘‘аяяа, д̇з б̣раахман̣аа г̇обхад̇д̇ам̣ г̇илид̇ум̣ асаггонд̇аа мад̇аа’’д̇и.
So pañcasikhassa dhammakathaṃ sutvā ‘‘tena hi gaccha, gehaṃ pavisitvā nisīda, thokaṃ lacchasī’’ti āha. Sopi gantvā tesaṃ santike nisīdi. Tato bilārakosiyo seṭṭhi ekaṃ dāsiṃ āmantetvā ‘‘etesaṃ brāhmaṇānaṃ palāpavīhīnaṃ nāḷiṃ nāḷiṃ dehī’’ti āha. Sā vīhī gahetvā brāhmaṇe upasaṅkamitvā ‘‘ime ādāya yattha katthaci pacāpetvā bhuñjathā’’ti āha. ‘‘Na amhākaṃ vīhinā attho, na mayaṃ vīhiṃ āmasāmā’’ti. ‘‘Ayya, vīhiṃ kirete nāmasantī’’ti? ‘‘Tena hi tesaṃ taṇḍule dehī’’ti. Sā taṇḍule ādāya gantvā ‘‘brāhmaṇā taṇḍule gaṇhathā’’ti āha. ‘‘Mayaṃ āmakaṃ na paṭiggaṇhāmā’’ti. ‘‘Ayya, āmakaṃ kira na gaṇhantī’’ti. ‘‘Tena hi tesaṃ karoṭiyaṃ vaḍḍhetvā gobhattaṃ dehī’’ti. Sā tesaṃ karoṭiyaṃ vaḍḍhetvā mahāgoṇānaṃ pakkabhattaṃ āharitvā adāsi. Pañcapi janā kabaḷe vaḍḍhetvā mukhe pakkhipitvā gale laggāpetvā akkhīni parivattetvā vissaṭṭhasaññā matā viya nipajjiṃsu. Dāsī te disvā ‘‘matā bhavissantī’’ti bhītā gantvā seṭṭhino ārocesi ‘‘ayya, te brāhmaṇā gobhattaṃ gilituṃ asakkontā matā’’ti.
со жинд̇зси ‘‘ид̣̇аани аяам̣ баабад̇хаммо сукумаалаб̣раахман̣аанам̣ г̇обхад̇д̇ам̣ д̣̇аабзси, д̇з д̇ам̣ г̇илид̇ум̣ асаггонд̇аа мад̇аад̇и мам̣ г̇арахиссанд̇ий’’д̇и. д̇ад̇о д̣̇аасим̣ ааха – ‘‘киббам̣ г̇анд̇ваа зд̇зсам̣ гародигзсу бхад̇д̇ам̣ харид̇ваа наанаг̇г̇арасам̣ саалибхад̇д̇ам̣ вад̣дхзхий’’д̇и. саа д̇ат̇аа агааси. сздти анд̇арабийт̇им̣ бадибаннамануссз баггосаабзд̇ваа ‘‘ахам̣ мама бхун̃ж̇ананияаамзна зд̇зсам̣ б̣раахман̣аанам̣ бхад̇д̇ам̣ д̣̇аабзсим̣, зд̇з лобхзна маханд̇з бин̣д̣з гад̇ваа бхун̃ж̇амаанаа г̇алз лаг̇г̇аабзд̇ваа мад̇аа, мама нид̣̇д̣̇осабхаавам̣ ж̇аанаат̇аа’’д̇и вад̇ваа барисам̣ саннибаад̇зси. махааж̇анз саннибад̇ид̇з б̣раахман̣аа удтааяа махааж̇анам̣ ологзд̇ваа ‘‘бассат̇имасса сздтисса мусааваад̣̇ид̇ам̣, ‘амхаагам̣ ад̇д̇ано бхун̃ж̇анабхад̇д̇ам̣ д̣̇аабзси’нд̇и вад̣̇ад̇и, батамам̣ г̇обхад̇д̇ам̣ амхаагам̣ д̣̇ад̇ваа амхзсу мад̇зсу вияа нибаннзсу имам̣ бхад̇д̇ам̣ вад̣дхаабзсий’’д̇и вад̇ваа ад̇д̇ано мукзхи г̇ахид̇абхад̇д̇ам̣ бхуумияам̣ баад̇зд̇ваа д̣̇ассзсум̣. махааж̇ано сздтим̣ г̇арахи ‘‘анд̇хаб̣аала, ад̇д̇ано гулавам̣сам̣ наасзси, д̣̇аанасаалам̣ жхаабзси, яаажагз г̇ийвааяам̣ г̇ахзд̇ваа нийхараабзси, ид̣̇аани имзсам̣ сукумаалаб̣раахман̣аанам̣ бхад̇д̇ам̣ д̣̇знд̇о г̇обхад̇д̇ам̣ д̣̇аабзси, баралогам̣ г̇ажчанд̇о д̇ава гхарз вибхавам̣ г̇ийвааяам̣ б̣анд̇хид̇ваа г̇амиссаси ман̃н̃з’’д̇и.
So cintesi ‘‘idāni ayaṃ pāpadhammo sukhumālabrāhmaṇānaṃ gobhattaṃ dāpesi, te taṃ gilituṃ asakkontā matāti maṃ garahissantī’’ti. Tato dāsiṃ āha – ‘‘khippaṃ gantvā etesaṃ karoṭikesu bhattaṃ haritvā nānaggarasaṃ sālibhattaṃ vaḍḍhehī’’ti. Sā tathā akāsi. Seṭṭhi antarapīthiṃ paṭipannamanusse pakkosāpetvā ‘‘ahaṃ mama bhuñjananiyāmena etesaṃ brāhmaṇānaṃ bhattaṃ dāpesiṃ, ete lobhena mahante piṇḍe katvā bhuñjamānā gale laggāpetvā matā, mama niddosabhāvaṃ jānāthā’’ti vatvā parisaṃ sannipātesi. Mahājane sannipatite brāhmaṇā uṭṭhāya mahājanaṃ oloketvā ‘‘passathimassa seṭṭhissa musāvāditaṃ, ‘amhākaṃ attano bhuñjanabhattaṃ dāpesi’nti vadati, paṭhamaṃ gobhattaṃ amhākaṃ datvā amhesu matesu viya nipannesu imaṃ bhattaṃ vaḍḍhāpesī’’ti vatvā attano mukhehi gahitabhattaṃ bhūmiyaṃ pātetvā dassesuṃ. Mahājano seṭṭhiṃ garahi ‘‘andhabāla, attano kulavaṃsaṃ nāsesi, dānasālaṃ jhāpesi, yācake gīvāyaṃ gahetvā nīharāpesi, idāni imesaṃ sukhumālabrāhmaṇānaṃ bhattaṃ dento gobhattaṃ dāpesi, paralokaṃ gacchanto tava ghare vibhavaṃ gīvāyaṃ bandhitvā gamissasi maññe’’ti.
д̇асмим̣ кан̣з сагго махааж̇анам̣ бужчи ‘‘ж̇аанаат̇а, д̇умхз имасмим̣ г̇зхз д̇ханам̣ гасса санд̇ага’’нд̇и? ‘‘на ж̇аанаамаа’’д̇и. ‘‘имасмим̣ наг̇арз асугагаалз б̣аараан̣асияам̣ махаасздти наама д̣̇аанасаалам̣ гаарзд̇ваа махаад̣̇аанам̣ бавад̇д̇аяий’’д̇и суд̇абуб̣б̣ам̣ д̇умхзхийд̇и. ‘‘аама сун̣аамаа’’д̇и. ‘‘ахам̣ со сздти, д̣̇аанам̣ д̣̇ад̇ваа сагго д̣̇зварааж̇аа худ̇ваа буд̇д̇оби мз д̇ам̣ вам̣сам̣ авинаасзд̇ваа д̣̇аанам̣ д̣̇ад̇ваа жанд̣̇о д̣̇звабуд̇д̇о худ̇ваа ниб̣б̣ад̇д̇о, д̇асса буд̇д̇о суурияо, д̇асса буд̇д̇о маад̇али, д̇асса буд̇д̇о бан̃жасико г̇анд̇хаб̣б̣ад̣̇звабуд̇д̇о худ̇ваа ниб̣б̣ад̇д̇о. д̇зсу аяам̣ жанд̣̇о, аяам̣ суурияо, аяам̣ маад̇алисан̇г̇аахаго, аяам̣ имасса баабад̇хаммасса бид̇аа бан̃жасико г̇анд̇хаб̣б̣ад̣̇звабуд̇д̇о, звам̣ б̣ахуг̇ун̣ам̣ зд̇ам̣ д̣̇аанам̣ наама, гад̇д̇аб̣б̣амзва гусалам̣ бан̣д̣ид̇зхий’’д̇и гат̇знд̇аа махааж̇анасса ган̇кажчзд̣̇анад̇т̇ам̣ аагаасз уббад̇ид̇ваа маханд̇знаанубхаавзна маханд̇зна бариваарзна ж̇аламаанасарийраа адтам̣су, сагаланаг̇арам̣ баж̇ж̇аланд̇ам̣ вияа ахоси. сагго махааж̇анам̣ ааманд̇зд̇ваа ‘‘маяам̣ ад̇д̇ано д̣̇иб̣б̣асамбад̇д̇им̣ бахааяа ааг̇ажчанд̇аа имам̣ гулавам̣санаасагарам̣ баабад̇хаммаб̣илаарагосияам̣ ниссааяа ааг̇ад̇аа, аяам̣ баабад̇хаммо ад̇д̇ано гулавам̣сам̣ наасзд̇ваа д̣̇аанасаалам̣ жхаабзд̇ваа яаажагз г̇ийвааяам̣ г̇ахзд̇ваа нийхараабзд̇ваа амхаагам̣ вам̣сам̣ самужчинд̣̇и, ‘аяам̣ ад̣̇аанасийло худ̇ваа нираяз ниб̣б̣ад̇д̇зяяаа’д̇и имасса анугамбааяа ааг̇ад̇аамхаа’’д̇и вад̇ваа д̣̇аанаг̇ун̣ам̣ багаасзнд̇о махааж̇анасса д̇хаммам̣ д̣̇зсзси. б̣илаарагосияо сирасмим̣ ан̃ж̇алим̣ бад̇идтабзд̇ваа ‘‘д̣̇зва, ахам̣ ид̇о бадтааяа бораан̣агулавам̣сам̣ анаасаабзд̇ваа д̣̇аанам̣ бавад̇д̇зссаами, аж̇ж̇а аад̣̇им̣ гад̇ваа анд̇амасо уд̣̇агад̣̇анд̇абонам̣ убаад̣̇ааяа ад̇д̇ано лад̣̇д̇хаахаарам̣ барасса ад̣̇ад̇ваа на каад̣̇иссаамий’’д̇и саггасса бадин̃н̃ам̣ ад̣̇ааси. сагго д̇ам̣ д̣̇амзд̇ваа ниб̣б̣исзванам̣ гад̇ваа бан̃жасу сийлзсу бад̇идтабзд̇ваа жад̇д̇ааро д̣̇звабуд̇д̇з аад̣̇ааяа сагадтаанамзва г̇ад̇о. соби сздти яааваж̇ийвам̣ д̣̇аанам̣ д̣̇ад̇ваа д̇аавад̇им̣сабхаванз ниб̣б̣ад̇д̇и.
Tasmiṃ khaṇe sakko mahājanaṃ pucchi ‘‘jānātha, tumhe imasmiṃ gehe dhanaṃ kassa santaka’’nti? ‘‘Na jānāmā’’ti. ‘‘Imasmiṃ nagare asukakāle bārāṇasiyaṃ mahāseṭṭhi nāma dānasālaṃ kāretvā mahādānaṃ pavattayī’’ti sutapubbaṃ tumhehīti. ‘‘Āma suṇāmā’’ti. ‘‘Ahaṃ so seṭṭhi, dānaṃ datvā sakko devarājā hutvā puttopi me taṃ vaṃsaṃ avināsetvā dānaṃ datvā cando devaputto hutvā nibbatto, tassa putto sūriyo, tassa putto mātali, tassa putto pañcasikho gandhabbadevaputto hutvā nibbatto. Tesu ayaṃ cando, ayaṃ sūriyo, ayaṃ mātalisaṅgāhako, ayaṃ imassa pāpadhammassa pitā pañcasikho gandhabbadevaputto, evaṃ bahuguṇaṃ etaṃ dānaṃ nāma, kattabbameva kusalaṃ paṇḍitehī’’ti kathentā mahājanassa kaṅkhacchedanatthaṃ ākāse uppatitvā mahantenānubhāvena mahantena parivārena jalamānasarīrā aṭṭhaṃsu, sakalanagaraṃ pajjalantaṃ viya ahosi. Sakko mahājanaṃ āmantetvā ‘‘mayaṃ attano dibbasampattiṃ pahāya āgacchantā imaṃ kulavaṃsanāsakaraṃ pāpadhammabilārakosiyaṃ nissāya āgatā, ayaṃ pāpadhammo attano kulavaṃsaṃ nāsetvā dānasālaṃ jhāpetvā yācake gīvāyaṃ gahetvā nīharāpetvā amhākaṃ vaṃsaṃ samucchindi, ‘ayaṃ adānasīlo hutvā niraye nibbatteyyā’ti imassa anukampāya āgatāmhā’’ti vatvā dānaguṇaṃ pakāsento mahājanassa dhammaṃ desesi. Bilārakosiyo sirasmiṃ añjaliṃ patiṭṭhapetvā ‘‘deva, ahaṃ ito paṭṭhāya porāṇakulavaṃsaṃ anāsāpetvā dānaṃ pavattessāmi, ajja ādiṃ katvā antamaso udakadantaponaṃ upādāya attano laddhāhāraṃ parassa adatvā na khādissāmī’’ti sakkassa paṭiññaṃ adāsi. Sakko taṃ dametvā nibbisevanaṃ katvā pañcasu sīlesu patiṭṭhapetvā cattāro devaputte ādāya sakaṭṭhānameva gato. Sopi seṭṭhi yāvajīvaṃ dānaṃ datvā tāvatiṃsabhavane nibbatti.
сад̇т̇аа имам̣ д̇хаммад̣̇зсанам̣ аахарид̇ваа ‘‘звам̣, бхигкавз, аяам̣ бхигку буб̣б̣з ассад̣̇д̇хо ахоси гассажи гин̃жи ад̣̇аад̇аа, ахам̣ бана нам̣ д̣̇амзд̇ваа д̣̇аанапалам̣ ж̇аанаабзсим̣, д̇амзва жид̇д̇ам̣ бхаванд̇араг̇ад̇амби на ж̇ахаад̇ий’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа сздти аяам̣ д̣̇аанабад̇иго бхигку ахоси, жанд̣̇о саарибуд̇д̇о, суурияо мог̇г̇аллаано, маад̇али гассабо, бан̃жасико аананд̣̇о, сагго бана ахамзва ахоси’’нд̇и.
Satthā imaṃ dhammadesanaṃ āharitvā ‘‘evaṃ, bhikkhave, ayaṃ bhikkhu pubbe assaddho ahosi kassaci kiñci adātā, ahaṃ pana naṃ dametvā dānaphalaṃ jānāpesiṃ, tameva cittaṃ bhavantaragatampi na jahātī’’ti vatvā jātakaṃ samodhānesi – ‘‘tadā seṭṭhi ayaṃ dānapatiko bhikkhu ahosi, cando sāriputto, sūriyo moggallāno, mātali kassapo, pañcasikho ānando, sakko pana ahameva ahosi’’nti.
б̣илаарагосияаж̇аад̇агаван̣н̣анаа д̣̇ваад̣̇асамаа.
Bilārakosiyajātakavaṇṇanā dvādasamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 450. б̣илаарагосияаж̇аад̇агам̣ • 450. Bilārakosiyajātakaṃ
