| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
3. பொ³ஜ்ஜ²ங்க³வாரோ
3. Bojjhaṅgavāro
25. ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – ஸதிங் உபட்டா²பேதி. ஸதிஸம்பொ³ஜ்ஜ²ங்க³பரிபா⁴விதா ஹோதி மெத்தாசேதோவிமுத்தி.
25. Sabbe sattā averino hontu, khemino hontu, sukhino hontūti – satiṃ upaṭṭhāpeti. Satisambojjhaṅgaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – பஞ்ஞாய பவிசினாதி. த⁴ம்மவிசயஸம்பொ³ஜ்ஜ²ங்க³பரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – paññāya pavicināti. Dhammavicayasambojjhaṅgaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – வீரியங் பக்³க³ண்ஹாதி. வீரியஸம்பொ³ஜ்ஜ²ங்க³பரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – vīriyaṃ paggaṇhāti. Vīriyasambojjhaṅgaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – பரிளாஹங் படிப்பஸ்ஸம்பே⁴தி. பீதிஸம்பொ³ஜ்ஜ²ங்க³பரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – pariḷāhaṃ paṭippassambheti. Pītisambojjhaṅgaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – து³ட்டு²ல்லங் படிப்பஸ்ஸம்பே⁴தி. பஸ்ஸத்³தி⁴ஸம்பொ³ஜ்ஜ²ங்க³பரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – duṭṭhullaṃ paṭippassambheti. Passaddhisambojjhaṅgaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – சித்தங் ஸமாத³ஹதி. ஸமாதி⁴ஸம்பொ³ஜ்ஜ²ங்க³பரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – cittaṃ samādahati. Samādhisambojjhaṅgaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – ஞாணேன கிலேஸே படிஸங்கா²தி. உபெக்கா²ஸம்பொ³ஜ்ஜ²ங்க³பரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – ñāṇena kilese paṭisaṅkhāti. Upekkhāsambojjhaṅgaparibhāvitā hoti mettācetovimutti.
இமே ஸத்த பொ³ஜ்ஜ²ங்கா³ மெத்தாய சேதோவிமுத்தியா ஆஸேவனா ஹொந்தி. இமேஹி ஸத்தஹி பொ³ஜ்ஜ²ங்கே³ஹி மெத்தாசேதோவிமுத்தி ஆஸேவீயதி. இமே ஸத்த பொ³ஜ்ஜ²ங்கா³ மெத்தாய சேதோவிமுத்தியா பா⁴வனா ஹொந்தி. இமேஹி ஸத்தஹி பொ³ஜ்ஜ²ங்கே³ஹி மெத்தாசேதோவிமுத்தி பா⁴வீயதி. இமே ஸத்த பொ³ஜ்ஜ²ங்கா³ மெத்தாய சேதோவிமுத்தியா ப³ஹுலீகதா ஹொந்தி. இமேஹி ஸத்தஹி பொ³ஜ்ஜ²ங்கே³ஹி மெத்தாசேதோவிமுத்தி ப³ஹுலீகரீயதி. இமே ஸத்த பொ³ஜ்ஜ²ங்கா³ மெத்தாய சேதோவிமுத்தியா அலங்காரா ஹொந்தி. இமேஹி ஸத்தஹி பொ³ஜ்ஜ²ங்கே³ஹி மெத்தாசேதோவிமுத்தி ஸ்வாலங்கதா ஹோதி. இமே ஸத்த பொ³ஜ்ஜ²ங்கா³ மெத்தாய சேதோவிமுத்தியா பரிக்கா²ரா ஹொந்தி. இமேஹி ஸத்தஹி பொ³ஜ்ஜ²ங்கே³ஹி மெத்தாசேதோவிமுத்தி ஸுபரிக்க²தா ஹோதி. இமே ஸத்த பொ³ஜ்ஜ²ங்கா³ மெத்தாய சேதோவிமுத்தியா பரிவாரா ஹொந்தி. இமேஹி ஸத்தஹி பொ³ஜ்ஜ²ங்கே³ஹி மெத்தாசேதோவிமுத்தி ஸுபரிவுதா ஹோதி. இமே ஸத்த பொ³ஜ்ஜ²ங்கா³ மெத்தாய சேதோவிமுத்தியா ஆஸேவனா ஹொந்தி, பா⁴வனா ஹொந்தி, ப³ஹுலீகதா ஹொந்தி, அலங்காரா ஹொந்தி, பரிக்கா²ரா ஹொந்தி, பரிவாரா ஹொந்தி, பாரிபூரீ ஹொந்தி, ஸஹக³தா ஹொந்தி, ஸஹஜாதா ஹொந்தி, ஸங்ஸட்டா² ஹொந்தி, ஸம்பயுத்தா ஹொந்தி, பக்க²ந்த³னா ஹொந்தி, பஸீத³னா ஹொந்தி, ஸந்திட்ட²னா ஹொந்தி, விமுச்சனா ஹொந்தி, ‘‘ஏதங் ஸந்த’’ந்தி ப²ஸ்ஸனா ஹொந்தி, யானீகதா ஹொந்தி, வத்து²கதா ஹொந்தி, அனுட்டி²தா ஹொந்தி, பரிசிதா ஹொந்தி, ஸுஸமாரத்³தா⁴ ஹொந்தி, ஸுபா⁴விதா ஹொந்தி, ஸ்வாதி⁴ட்டி²தா ஹொந்தி, ஸுஸமுக்³க³தா ஹொந்தி, ஸுவிமுத்தா ஹொந்தி, நிப்³ப³த்தெந்தி ஜோதெந்தி பதாபெந்தி.
Ime satta bojjhaṅgā mettāya cetovimuttiyā āsevanā honti. Imehi sattahi bojjhaṅgehi mettācetovimutti āsevīyati. Ime satta bojjhaṅgā mettāya cetovimuttiyā bhāvanā honti. Imehi sattahi bojjhaṅgehi mettācetovimutti bhāvīyati. Ime satta bojjhaṅgā mettāya cetovimuttiyā bahulīkatā honti. Imehi sattahi bojjhaṅgehi mettācetovimutti bahulīkarīyati. Ime satta bojjhaṅgā mettāya cetovimuttiyā alaṅkārā honti. Imehi sattahi bojjhaṅgehi mettācetovimutti svālaṅkatā hoti. Ime satta bojjhaṅgā mettāya cetovimuttiyā parikkhārā honti. Imehi sattahi bojjhaṅgehi mettācetovimutti suparikkhatā hoti. Ime satta bojjhaṅgā mettāya cetovimuttiyā parivārā honti. Imehi sattahi bojjhaṅgehi mettācetovimutti suparivutā hoti. Ime satta bojjhaṅgā mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti, nibbattenti jotenti patāpenti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 2-4. ப³லாதி³வாரத்தயவண்ணனா • 2-4. Balādivārattayavaṇṇanā
