| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၃. ဗောဇ္ဈင္ဂဝာရော
3. Bojjhaṅgavāro
၂၅. သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – သတိံ ဥပဋ္ဌာပေတိ။ သတိသမ္ဗောဇ္ဈင္ဂပရိဘာဝိတာ ဟောတိ မေတ္တာစေတောဝိမုတ္တိ။
25. Sabbe sattā averino hontu, khemino hontu, sukhino hontūti – satiṃ upaṭṭhāpeti. Satisambojjhaṅgaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ပညာယ ပဝိစိနာတိ။ ဓမ္မဝိစယသမ္ဗောဇ္ဈင္ဂပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – paññāya pavicināti. Dhammavicayasambojjhaṅgaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ဝီရိယံ ပဂ္ဂဏ္ဟာတိ။ ဝီရိယသမ္ဗောဇ္ဈင္ဂပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – vīriyaṃ paggaṇhāti. Vīriyasambojjhaṅgaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ပရိဠာဟံ ပဋိပ္ပသ္သမ္ဘေတိ။ ပီတိသမ္ဗောဇ္ဈင္ဂပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – pariḷāhaṃ paṭippassambheti. Pītisambojjhaṅgaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ဒုဋ္ဌုလ္လံ ပဋိပ္ပသ္သမ္ဘေတိ။ ပသ္သဒ္ဓိသမ္ဗောဇ္ဈင္ဂပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – duṭṭhullaṃ paṭippassambheti. Passaddhisambojjhaṅgaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – စိတ္တံ သမာဒဟတိ။ သမာဓိသမ္ဗောဇ္ဈင္ဂပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – cittaṃ samādahati. Samādhisambojjhaṅgaparibhāvitā hoti mettācetovimutti.
သဗ္ဗေ သတ္တာ အဝေရိနော ဟောန္တု, ခေမိနော ဟောန္တု, သုခိနော ဟောန္တူတိ – ဉာဏေန ကိလေသေ ပဋိသင္ခာတိ။ ဥပေက္ခာသမ္ဗောဇ္ဈင္ဂပရိဘာဝိတာ ဟောတိ မေတ္တာစေတောဝိမုတ္တိ။
Sabbe sattā averino hontu, khemino hontu, sukhino hontūti – ñāṇena kilese paṭisaṅkhāti. Upekkhāsambojjhaṅgaparibhāvitā hoti mettācetovimutti.
ဣမေ သတ္တ ဗောဇ္ဈင္ဂာ မေတ္တာယ စေတောဝိမုတ္တိယာ အာသေဝနာ ဟောန္တိ။ ဣမေဟိ သတ္တဟိ ဗောဇ္ဈင္ဂေဟိ မေတ္တာစေတောဝိမုတ္တိ အာသေဝီယတိ။ ဣမေ သတ္တ ဗောဇ္ဈင္ဂာ မေတ္တာယ စေတောဝိမုတ္တိယာ ဘာဝနာ ဟောန္တိ။ ဣမေဟိ သတ္တဟိ ဗောဇ္ဈင္ဂေဟိ မေတ္တာစေတောဝိမုတ္တိ ဘာဝီယတိ။ ဣမေ သတ္တ ဗောဇ္ဈင္ဂာ မေတ္တာယ စေတောဝိမုတ္တိယာ ဗဟုလီကတာ ဟောန္တိ။ ဣမေဟိ သတ္တဟိ ဗောဇ္ဈင္ဂေဟိ မေတ္တာစေတောဝိမုတ္တိ ဗဟုလီကရီယတိ။ ဣမေ သတ္တ ဗောဇ္ဈင္ဂာ မေတ္တာယ စေတောဝိမုတ္တိယာ အလင္ကာရာ ဟောန္တိ။ ဣမေဟိ သတ္တဟိ ဗောဇ္ဈင္ဂေဟိ မေတ္တာစေတောဝိမုတ္တိ သ္ဝာလင္ကတာ ဟောတိ။ ဣမေ သတ္တ ဗောဇ္ဈင္ဂာ မေတ္တာယ စေတောဝိမုတ္တိယာ ပရိက္ခာရာ ဟောန္တိ။ ဣမေဟိ သတ္တဟိ ဗောဇ္ဈင္ဂေဟိ မေတ္တာစေတောဝိမုတ္တိ သုပရိက္ခတာ ဟောတိ။ ဣမေ သတ္တ ဗောဇ္ဈင္ဂာ မေတ္တာယ စေတောဝိမုတ္တိယာ ပရိဝာရာ ဟောန္တိ။ ဣမေဟိ သတ္တဟိ ဗောဇ္ဈင္ဂေဟိ မေတ္တာစေတောဝိမုတ္တိ သုပရိဝုတာ ဟောတိ။ ဣမေ သတ္တ ဗောဇ္ဈင္ဂာ မေတ္တာယ စေတောဝိမုတ္တိယာ အာသေဝနာ ဟောန္တိ, ဘာဝနာ ဟောန္တိ, ဗဟုလီကတာ ဟောန္တိ, အလင္ကာရာ ဟောန္တိ, ပရိက္ခာရာ ဟောန္တိ, ပရိဝာရာ ဟောန္တိ, ပာရိပူရီ ဟောန္တိ, သဟဂတာ ဟောန္တိ, သဟဇာတာ ဟောန္တိ, သံသဋ္ဌာ ဟောန္တိ, သမ္ပယုတ္တာ ဟောန္တိ, ပက္ခန္ဒနာ ဟောန္တိ, ပသီဒနာ ဟောန္တိ, သန္တိဋ္ဌနာ ဟောန္တိ, ဝိမုစ္စနာ ဟောန္တိ, ‘‘ဧတံ သန္တ’’န္တိ ဖသ္သနာ ဟောန္တိ, ယာနီကတာ ဟောန္တိ, ဝတ္ထုကတာ ဟောန္တိ, အနုဋ္ဌိတာ ဟောန္တိ, ပရိစိတာ ဟောန္တိ, သုသမာရဒ္ဓာ ဟောန္တိ, သုဘာဝိတာ ဟောန္တိ, သ္ဝာဓိဋ္ဌိတာ ဟောန္တိ, သုသမုဂ္ဂတာ ဟောန္တိ, သုဝိမုတ္တာ ဟောန္တိ, နိဗ္ဗတ္တေန္တိ ဇောတေန္တိ ပတာပေန္တိ။
Ime satta bojjhaṅgā mettāya cetovimuttiyā āsevanā honti. Imehi sattahi bojjhaṅgehi mettācetovimutti āsevīyati. Ime satta bojjhaṅgā mettāya cetovimuttiyā bhāvanā honti. Imehi sattahi bojjhaṅgehi mettācetovimutti bhāvīyati. Ime satta bojjhaṅgā mettāya cetovimuttiyā bahulīkatā honti. Imehi sattahi bojjhaṅgehi mettācetovimutti bahulīkarīyati. Ime satta bojjhaṅgā mettāya cetovimuttiyā alaṅkārā honti. Imehi sattahi bojjhaṅgehi mettācetovimutti svālaṅkatā hoti. Ime satta bojjhaṅgā mettāya cetovimuttiyā parikkhārā honti. Imehi sattahi bojjhaṅgehi mettācetovimutti suparikkhatā hoti. Ime satta bojjhaṅgā mettāya cetovimuttiyā parivārā honti. Imehi sattahi bojjhaṅgehi mettācetovimutti suparivutā hoti. Ime satta bojjhaṅgā mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti, nibbattenti jotenti patāpenti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၂-၄. ဗလာဒိဝာရတ္တယဝဏ္ဏနာ • 2-4. Balādivārattayavaṇṇanā
