| Library / Tipiṭaka / திபிடக • Tipiṭaka / விப⁴ங்க³பாளி • Vibhaṅgapāḷi |
10. பொ³ஜ்ஜ²ங்க³விப⁴ங்கோ³
10. Bojjhaṅgavibhaṅgo
1. ஸுத்தந்தபா⁴ஜனீயங்
1. Suttantabhājanīyaṃ
466. ஸத்த பொ³ஜ்ஜ²ங்கா³ – ஸதிஸம்பொ³ஜ்ஜ²ங்கோ³, த⁴ம்மவிசயஸம்பொ³ஜ்ஜ²ங்கோ³, வீரியஸம்பொ³ஜ்ஜ²ங்கோ³, பீதிஸம்பொ³ஜ்ஜ²ங்கோ³, பஸ்ஸத்³தி⁴ஸம்பொ³ஜ்ஜ²ங்கோ³, ஸமாதி⁴ஸம்பொ³ஜ்ஜ²ங்கோ³, உபெக்கா²ஸம்பொ³ஜ்ஜ²ங்கோ³.
466. Satta bojjhaṅgā – satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo.
467. தத்த² கதமோ ஸதிஸம்பொ³ஜ்ஜ²ங்கோ³? இத⁴ பி⁴க்கு² ஸதிமா ஹோதி பரமேன ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா ஹோதி அனுஸ்ஸரிதா – அயங் வுச்சதி ‘‘ஸதிஸம்பொ³ஜ்ஜ²ங்கோ³’’.
467. Tattha katamo satisambojjhaṅgo? Idha bhikkhu satimā hoti paramena satinepakkena samannāgato, cirakatampi cirabhāsitampi saritā hoti anussaritā – ayaṃ vuccati ‘‘satisambojjhaṅgo’’.
ஸோ ததா² ஸதோ விஹரந்தோ தங் த⁴ம்மங் பஞ்ஞாய பவிசினதி பவிசரதி பரிவீமங்ஸமாபஜ்ஜதி – அயங் வுச்சதி ‘‘த⁴ம்மவிசயஸம்பொ³ஜ்ஜ²ங்கோ³’’.
So tathā sato viharanto taṃ dhammaṃ paññāya pavicinati pavicarati parivīmaṃsamāpajjati – ayaṃ vuccati ‘‘dhammavicayasambojjhaṅgo’’.
தஸ்ஸ தங் த⁴ம்மங் பஞ்ஞாய பவிசினதோ பவிசரதோ பரிவீமங்ஸமாபஜ்ஜதோ ஆரத்³த⁴ங் ஹோதி வீரியங் அஸல்லீனங் – அயங் வுச்சதி ‘‘வீரியஸம்பொ³ஜ்ஜ²ங்கோ³’’.
Tassa taṃ dhammaṃ paññāya pavicinato pavicarato parivīmaṃsamāpajjato āraddhaṃ hoti vīriyaṃ asallīnaṃ – ayaṃ vuccati ‘‘vīriyasambojjhaṅgo’’.
ஆரத்³த⁴வீரியஸ்ஸ உப்பஜ்ஜதி பீதி நிராமிஸா – அயங் வுச்சதி ‘‘பீதிஸம்பொ³ஜ்ஜ²ங்கோ³’’.
Āraddhavīriyassa uppajjati pīti nirāmisā – ayaṃ vuccati ‘‘pītisambojjhaṅgo’’.
பீதிமனஸ்ஸ காயோபி பஸ்ஸம்ப⁴தி, சித்தம்பி பஸ்ஸம்ப⁴தி – அயங் வுச்சதி ‘‘பஸ்ஸத்³தி⁴ஸம்பொ³ஜ்ஜ²ங்கோ³’’.
Pītimanassa kāyopi passambhati, cittampi passambhati – ayaṃ vuccati ‘‘passaddhisambojjhaṅgo’’.
பஸ்ஸத்³த⁴காயஸ்ஸ ஸுகி²னோ சித்தங் ஸமாதி⁴யதி – அயங் வுச்சதி ‘‘ஸமாதி⁴ஸம்பொ³ஜ்ஜ²ங்கோ³’’ .
Passaddhakāyassa sukhino cittaṃ samādhiyati – ayaṃ vuccati ‘‘samādhisambojjhaṅgo’’ .
ஸோ ததா² ஸமாஹிதங் சித்தங் ஸாது⁴கங் அஜ்ஜு²பெக்கி²தா ஹோதி – அயங் வுச்சதி ‘‘உபெக்கா²ஸம்பொ³ஜ்ஜ²ங்கோ³’’.
So tathā samāhitaṃ cittaṃ sādhukaṃ ajjhupekkhitā hoti – ayaṃ vuccati ‘‘upekkhāsambojjhaṅgo’’.
468. ஸத்த பொ³ஜ்ஜ²ங்கா³ – ஸதிஸம்பொ³ஜ்ஜ²ங்கோ³, த⁴ம்மவிசயஸம்பொ³ஜ்ஜ²ங்கோ³, வீரியஸம்பொ³ஜ்ஜ²ங்கோ³, பீதிஸம்பொ³ஜ்ஜ²ங்கோ³, பஸ்ஸத்³தி⁴ஸம்பொ³ஜ்ஜ²ங்கோ³, ஸமாதி⁴ஸம்பொ³ஜ்ஜ²ங்கோ³, உபெக்கா²ஸம்பொ³ஜ்ஜ²ங்கோ³.
468. Satta bojjhaṅgā – satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo.
469. தத்த² கதமோ ஸதிஸம்பொ³ஜ்ஜ²ங்கோ³? அத்தி² அஜ்ஜ²த்தங் த⁴ம்மேஸு ஸதி, அத்தி² ப³ஹித்³தா⁴ த⁴ம்மேஸு ஸதி. யத³பி அஜ்ஜ²த்தங் த⁴ம்மேஸு ஸதி தத³பி ஸதிஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. யத³பி ப³ஹித்³தா⁴ த⁴ம்மேஸு ஸதி தத³பி ஸதிஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
469. Tattha katamo satisambojjhaṅgo? Atthi ajjhattaṃ dhammesu sati, atthi bahiddhā dhammesu sati. Yadapi ajjhattaṃ dhammesu sati tadapi satisambojjhaṅgo abhiññāya sambodhāya nibbānāya saṃvattati. Yadapi bahiddhā dhammesu sati tadapi satisambojjhaṅgo abhiññāya sambodhāya nibbānāya saṃvattati.
தத்த² கதமோ த⁴ம்மவிசயஸம்பொ³ஜ்ஜ²ங்கோ³? அத்தி² அஜ்ஜ²த்தங் த⁴ம்மேஸு பவிசயோ, அத்தி² ப³ஹித்³தா⁴ த⁴ம்மேஸு பவிசயோ. யத³பி அஜ்ஜ²த்தங் த⁴ம்மேஸு பவிசயோ தத³பி த⁴ம்மவிசயஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. யத³பி ப³ஹித்³தா⁴ த⁴ம்மேஸு பவிசயோ தத³பி த⁴ம்மவிசயஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
Tattha katamo dhammavicayasambojjhaṅgo? Atthi ajjhattaṃ dhammesu pavicayo, atthi bahiddhā dhammesu pavicayo. Yadapi ajjhattaṃ dhammesu pavicayo tadapi dhammavicayasambojjhaṅgo abhiññāya sambodhāya nibbānāya saṃvattati. Yadapi bahiddhā dhammesu pavicayo tadapi dhammavicayasambojjhaṅgo abhiññāya sambodhāya nibbānāya saṃvattati.
தத்த² கதமோ வீரியஸம்பொ³ஜ்ஜ²ங்கோ³? அத்தி² காயிகங் வீரியங், அத்தி² சேதஸிகங் வீரியங். யத³பி காயிகங் வீரியங் தத³பி வீரியஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. யத³பி சேதஸிகங் வீரியங் தத³பி வீரியஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி .
Tattha katamo vīriyasambojjhaṅgo? Atthi kāyikaṃ vīriyaṃ, atthi cetasikaṃ vīriyaṃ. Yadapi kāyikaṃ vīriyaṃ tadapi vīriyasambojjhaṅgo abhiññāya sambodhāya nibbānāya saṃvattati. Yadapi cetasikaṃ vīriyaṃ tadapi vīriyasambojjhaṅgo abhiññāya sambodhāya nibbānāya saṃvattati .
தத்த² கதமோ பீதிஸம்பொ³ஜ்ஜ²ங்கோ³? அத்தி² ஸவிதக்கஸவிசாரா பீதி, அத்தி² அவிதக்கஅவிசாரா பீதி. யத³பி ஸவிதக்கஸவிசாரா பீதி தத³பி பீதிஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. யத³பி அவிதக்கஅவிசாரா பீதி தத³பி பீதிஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
Tattha katamo pītisambojjhaṅgo? Atthi savitakkasavicārā pīti, atthi avitakkaavicārā pīti. Yadapi savitakkasavicārā pīti tadapi pītisambojjhaṅgo abhiññāya sambodhāya nibbānāya saṃvattati. Yadapi avitakkaavicārā pīti tadapi pītisambojjhaṅgo abhiññāya sambodhāya nibbānāya saṃvattati.
தத்த² கதமோ ஸமாதி⁴ஸம்பொ³ஜ்ஜ²ங்கோ³? அத்தி² ஸவிதக்கோ ஸவிசாரோ ஸமாதி⁴, அத்தி² அவிதக்கோ அவிசாரோ ஸமாதி⁴. யத³பி ஸவிதக்கோ ஸவிசாரோ ஸமாதி⁴ தத³பி ஸமாதி⁴ஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. யத³பி அவிதக்கோ அவிசாரோ ஸமாதி⁴ தத³பி ஸமாதி⁴ஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
Tattha katamo samādhisambojjhaṅgo? Atthi savitakko savicāro samādhi, atthi avitakko avicāro samādhi. Yadapi savitakko savicāro samādhi tadapi samādhisambojjhaṅgo abhiññāya sambodhāya nibbānāya saṃvattati. Yadapi avitakko avicāro samādhi tadapi samādhisambojjhaṅgo abhiññāya sambodhāya nibbānāya saṃvattati.
தத்த² கதமோ உபெக்கா²ஸம்பொ³ஜ்ஜ²ங்கோ³? அத்தி² அஜ்ஜ²த்தங் த⁴ம்மேஸு உபெக்கா², அத்தி² ப³ஹித்³தா⁴ த⁴ம்மேஸு உபெக்கா². யத³பி அஜ்ஜ²த்தங் த⁴ம்மேஸு உபெக்கா² தத³பி உபெக்கா²ஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. யத³பி ப³ஹித்³தா⁴ த⁴ம்மேஸு உபெக்கா² தத³பி உபெக்கா²ஸம்பொ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
Tattha katamo upekkhāsambojjhaṅgo? Atthi ajjhattaṃ dhammesu upekkhā, atthi bahiddhā dhammesu upekkhā. Yadapi ajjhattaṃ dhammesu upekkhā tadapi upekkhāsambojjhaṅgo abhiññāya sambodhāya nibbānāya saṃvattati. Yadapi bahiddhā dhammesu upekkhā tadapi upekkhāsambojjhaṅgo abhiññāya sambodhāya nibbānāya saṃvattati.
470. ஸத்த பொ³ஜ்ஜ²ங்கா³ – ஸதிஸம்பொ³ஜ்ஜ²ங்கோ³, த⁴ம்மவிசயஸம்பொ³ஜ்ஜ²ங்கோ³, வீரியஸம்பொ³ஜ்ஜ²ங்கோ³, பீதிஸம்பொ³ஜ்ஜ²ங்கோ³, பஸ்ஸத்³தி⁴ஸம்பொ³ஜ்ஜ²ங்கோ³, ஸமாதி⁴ஸம்பொ³ஜ்ஜ²ங்கோ³, உபெக்கா²ஸம்பொ³ஜ்ஜ²ங்கோ³.
470. Satta bojjhaṅgā – satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo.
471. தத்த² கதமோ ஸதிஸம்பொ³ஜ்ஜ²ங்கோ³? இத⁴ பி⁴க்கு² ஸதிஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங், த⁴ம்மவிசயஸம்பொ³ஜ்ஜ²ங்க³ங் பா⁴வேதி…பே॰… வீரியஸம்பொ³ஜ்ஜ²ங்க³ங் பா⁴வேதி… பீதிஸம்பொ³ஜ்ஜ²ங்க³ங் பா⁴வேதி… பஸ்ஸத்³தி⁴ஸம்பொ³ஜ்ஜ²ங்க³ங் பா⁴வேதி… ஸமாதி⁴ஸம்பொ³ஜ்ஜ²ங்க³ங் பா⁴வேதி… உபெக்கா²ஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங்.
471. Tattha katamo satisambojjhaṅgo? Idha bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ, dhammavicayasambojjhaṅgaṃ bhāveti…pe… vīriyasambojjhaṅgaṃ bhāveti… pītisambojjhaṅgaṃ bhāveti… passaddhisambojjhaṅgaṃ bhāveti… samādhisambojjhaṅgaṃ bhāveti… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ.
ஸுத்தந்தபா⁴ஜனீயங்.
Suttantabhājanīyaṃ.
2. அபி⁴த⁴ம்மபா⁴ஜனீயங்
2. Abhidhammabhājanīyaṃ
472. ஸத்த பொ³ஜ்ஜ²ங்கா³ – ஸதிஸம்பொ³ஜ்ஜ²ங்கோ³, த⁴ம்மவிசயஸம்பொ³ஜ்ஜ²ங்கோ³, வீரியஸம்பொ³ஜ்ஜ²ங்கோ³, பீதிஸம்பொ³ஜ்ஜ²ங்கோ³, பஸ்ஸத்³தி⁴ஸம்பொ³ஜ்ஜ²ங்கோ³, ஸமாதி⁴ஸம்பொ³ஜ்ஜ²ங்கோ³, உபெக்கா²ஸம்பொ³ஜ்ஜ²ங்கோ³.
472. Satta bojjhaṅgā – satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo.
473. தத்த² கதமே ஸத்த பொ³ஜ்ஜ²ங்கா³? இத⁴ பி⁴க்கு² யஸ்மிங் ஸமயே லோகுத்தரங் ஜா²னங் பா⁴வேதி நிய்யானிகங் அபசயகா³மிங் தி³ட்டி²க³தானங் பஹானாய பட²மாய பூ⁴மியா பத்தியா விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங், தஸ்மிங் ஸமயே ஸத்த பொ³ஜ்ஜ²ங்கா³ ஹொந்தி – ஸதிஸம்பொ³ஜ்ஜ²ங்கோ³…பே॰… உபெக்கா²ஸம்பொ³ஜ்ஜ²ங்கோ³.
473. Tattha katame satta bojjhaṅgā? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye satta bojjhaṅgā honti – satisambojjhaṅgo…pe… upekkhāsambojjhaṅgo.
474. தத்த² கதமோ ஸதிஸம்பொ³ஜ்ஜ²ங்கோ³? யா ஸதி அனுஸ்ஸதி…பே॰… ஸம்மாஸதி ஸதிஸம்பொ³ஜ்ஜ²ங்கோ³ மக்³க³ங்க³ங் மக்³க³பரியாபன்னங் – அயங் வுச்சதி ‘‘ஸதிஸம்பொ³ஜ்ஜ²ங்கோ³’’.
474. Tattha katamo satisambojjhaṅgo? Yā sati anussati…pe… sammāsati satisambojjhaṅgo maggaṅgaṃ maggapariyāpannaṃ – ayaṃ vuccati ‘‘satisambojjhaṅgo’’.
தத்த² கதமோ த⁴ம்மவிசயஸம்பொ³ஜ்ஜ²ங்கோ³? யா பஞ்ஞா பஜானநா…பே॰… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்பொ³ஜ்ஜ²ங்கோ³ மக்³க³ங்க³ங் மக்³க³பரியாபன்னங் – அயங் வுச்சதி ‘‘த⁴ம்மவிசயஸம்பொ³ஜ்ஜ²ங்கோ³’’.
Tattha katamo dhammavicayasambojjhaṅgo? Yā paññā pajānanā…pe… amoho dhammavicayo sammādiṭṭhi dhammavicayasambojjhaṅgo maggaṅgaṃ maggapariyāpannaṃ – ayaṃ vuccati ‘‘dhammavicayasambojjhaṅgo’’.
தத்த² கதமோ வீரியஸம்பொ³ஜ்ஜ²ங்கோ³? யோ சேதஸிகோ வீரியாரம்போ⁴…பே॰… ஸம்மாவாயாமோ வீரியஸம்பொ³ஜ்ஜ²ங்கோ³ மக்³க³ங்க³ங் மக்³க³பரியாபன்னங் – அயங் வுச்சதி ‘‘வீரியஸம்பொ³ஜ்ஜ²ங்கோ³’’.
Tattha katamo vīriyasambojjhaṅgo? Yo cetasiko vīriyārambho…pe… sammāvāyāmo vīriyasambojjhaṅgo maggaṅgaṃ maggapariyāpannaṃ – ayaṃ vuccati ‘‘vīriyasambojjhaṅgo’’.
தத்த² கதமோ பீதிஸம்பொ³ஜ்ஜ²ங்கோ³? யா பீதி பாமோஜ்ஜங் ஆமோத³னா பமோத³னா ஹாஸோ பஹாஸோ வித்தி ஓத³க்³யங் 5 அத்தமனதா சித்தஸ்ஸ பீதிஸம்பொ³ஜ்ஜ²ங்கோ³ – அயங் வுச்சதி ‘‘பீதிஸம்பொ³ஜ்ஜ²ங்கோ³’’.
Tattha katamo pītisambojjhaṅgo? Yā pīti pāmojjaṃ āmodanā pamodanā hāso pahāso vitti odagyaṃ 6 attamanatā cittassa pītisambojjhaṅgo – ayaṃ vuccati ‘‘pītisambojjhaṅgo’’.
தத்த² கதமோ பஸ்ஸத்³தி⁴ஸம்பொ³ஜ்ஜ²ங்கோ³? யா வேத³னாக்க²ந்த⁴ஸ்ஸ ஸஞ்ஞாக்க²ந்த⁴ஸ்ஸ ஸங்கா²ரக்க²ந்த⁴ஸ்ஸ விஞ்ஞாணக்க²ந்த⁴ஸ்ஸ பஸ்ஸத்³தி⁴ படிப்பஸ்ஸத்³தி⁴ பஸ்ஸம்ப⁴னா படிப்பஸ்ஸம்ப⁴னா படிப்பஸ்ஸம்பி⁴தத்தங் பஸ்ஸத்³தி⁴ஸம்பொ³ஜ்ஜ²ங்கோ³ – அயங் வுச்சதி ‘‘பஸ்ஸத்³தி⁴ஸம்பொ³ஜ்ஜ²ங்கோ³’’.
Tattha katamo passaddhisambojjhaṅgo? Yā vedanākkhandhassa saññākkhandhassa saṅkhārakkhandhassa viññāṇakkhandhassa passaddhi paṭippassaddhi passambhanā paṭippassambhanā paṭippassambhitattaṃ passaddhisambojjhaṅgo – ayaṃ vuccati ‘‘passaddhisambojjhaṅgo’’.
தத்த² கதமோ ஸமாதி⁴ஸம்பொ³ஜ்ஜ²ங்கோ³? யா சித்தஸ்ஸ டி²தி…பே॰… ஸம்மாஸமாதி⁴ ஸமாதி⁴ஸம்பொ³ஜ்ஜ²ங்கோ³ மக்³க³ங்க³ங் மக்³க³பரியாபன்னங் – அயங் வுச்சதி ‘‘ஸமாதி⁴ஸம்பொ³ஜ்ஜ²ங்கோ³’’.
Tattha katamo samādhisambojjhaṅgo? Yā cittassa ṭhiti…pe… sammāsamādhi samādhisambojjhaṅgo maggaṅgaṃ maggapariyāpannaṃ – ayaṃ vuccati ‘‘samādhisambojjhaṅgo’’.
தத்த² கதமோ உபெக்கா²ஸம்பொ³ஜ்ஜ²ங்கோ³? யா உபெக்கா² உபெக்க²னா அஜ்ஜு²பெக்க²னா மஜ்ஜ²த்ததா சித்தஸ்ஸ உபெக்கா²ஸம்பொ³ஜ்ஜ²ங்கோ³ – அயங் வுச்சதி ‘‘உபெக்கா²ஸம்பொ³ஜ்ஜ²ங்கோ³’’. இமே வுச்சந்தி ஸத்த பொ³ஜ்ஜ²ங்கா³. அவஸேஸா த⁴ம்மா ஸத்தஹி பொ³ஜ்ஜ²ங்கே³ஹி ஸம்பயுத்தா.
Tattha katamo upekkhāsambojjhaṅgo? Yā upekkhā upekkhanā ajjhupekkhanā majjhattatā cittassa upekkhāsambojjhaṅgo – ayaṃ vuccati ‘‘upekkhāsambojjhaṅgo’’. Ime vuccanti satta bojjhaṅgā. Avasesā dhammā sattahi bojjhaṅgehi sampayuttā.
475. ஸத்த பொ³ஜ்ஜ²ங்கா³ – ஸதிஸம்பொ³ஜ்ஜ²ங்கோ³…பே॰… உபெக்கா²ஸம்பொ³ஜ்ஜ²ங்கோ³.
475. Satta bojjhaṅgā – satisambojjhaṅgo…pe… upekkhāsambojjhaṅgo.
476. தத்த² கதமோ ஸதிஸம்பொ³ஜ்ஜ²ங்கோ³? இத⁴ பி⁴க்கு² யஸ்மிங் ஸமயே லோகுத்தரங் ஜா²னங் பா⁴வேதி நிய்யானிகங் அபசயகா³மிங் தி³ட்டி²க³தானங் பஹானாய பட²மாய பூ⁴மியா பத்தியா விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங், யா தஸ்மிங் ஸமயே ஸதி அனுஸ்ஸதி ஸம்மாஸதி ஸதிஸம்பொ³ஜ்ஜ²ங்கோ³ மக்³க³ங்க³ங் மக்³க³பரியாபன்னங் – அயங் வுச்சதி ‘‘ஸதிஸம்பொ³ஜ்ஜ²ங்கோ³’’. அவஸேஸா த⁴ம்மா ஸதிஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா த⁴ம்மவிசயஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா வீரியஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா பீதிஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா பஸ்ஸத்³தி⁴ஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா ஸமாதி⁴ஸம்பொ³ஜ்ஜ²ங்க³ஸம்பயுத்தா.
476. Tattha katamo satisambojjhaṅgo? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, yā tasmiṃ samaye sati anussati sammāsati satisambojjhaṅgo maggaṅgaṃ maggapariyāpannaṃ – ayaṃ vuccati ‘‘satisambojjhaṅgo’’. Avasesā dhammā satisambojjhaṅgasampayuttā…pe… avasesā dhammā dhammavicayasambojjhaṅgasampayuttā…pe… avasesā dhammā vīriyasambojjhaṅgasampayuttā…pe… avasesā dhammā pītisambojjhaṅgasampayuttā…pe… avasesā dhammā passaddhisambojjhaṅgasampayuttā…pe… avasesā dhammā samādhisambojjhaṅgasampayuttā.
தத்த² கதமோ உபெக்கா²ஸம்பொ³ஜ்ஜ²ங்கோ³? இத⁴ பி⁴க்கு² யஸ்மிங் ஸமயே லோகுத்தரங் ஜா²னங் பா⁴வேதி நிய்யானிகங் அபசயகா³மிங் தி³ட்டி²க³தானங் பஹானாய பட²மாய பூ⁴மியா பத்தியா விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங், யா தஸ்மிங் ஸமயே உபெக்கா² உபெக்க²னா அஜ்ஜு²பெக்க²னா மஜ்ஜ²த்ததா சித்தஸ்ஸ உபெக்கா²ஸம்பொ³ஜ்ஜ²ங்கோ³ – அயங் வுச்சதி ‘‘உபெக்கா²ஸம்பொ³ஜ்ஜ²ங்கோ³’’. அவஸேஸா த⁴ம்மா உபெக்கா²ஸம்பொ³ஜ்ஜ²ங்க³ஸம்பயுத்தா.
Tattha katamo upekkhāsambojjhaṅgo? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, yā tasmiṃ samaye upekkhā upekkhanā ajjhupekkhanā majjhattatā cittassa upekkhāsambojjhaṅgo – ayaṃ vuccati ‘‘upekkhāsambojjhaṅgo’’. Avasesā dhammā upekkhāsambojjhaṅgasampayuttā.
477. ஸத்த பொ³ஜ்ஜ²ங்கா³ – ஸதிஸம்பொ³ஜ்ஜ²ங்கோ³…பே॰… உபெக்கா²ஸம்பொ³ஜ்ஜ²ங்கோ³.
477. Satta bojjhaṅgā – satisambojjhaṅgo…pe… upekkhāsambojjhaṅgo.
478. தத்த² கதமே ஸத்த பொ³ஜ்ஜ²ங்கா³? இத⁴ பி⁴க்கு² யஸ்மிங் ஸமயே லோகுத்தரங் ஜா²னங் பா⁴வேதி நிய்யானிகங் அபசயகா³மிங் தி³ட்டி²க³தானங் பஹானாய பட²மாய பூ⁴மியா பத்தியா விவிச்சேவ காமேஹி …பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங், யோ தஸ்மிங் ஸமயே ப²ஸ்ஸோ ஹோதி…பே॰… அவிக்கே²போ ஹோதி – இமே த⁴ம்மா குஸலா. தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகங் விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங் ஸுஞ்ஞதங், தஸ்மிங் ஸமயே ஸத்த பொ³ஜ்ஜ²ங்கா³ ஹொந்தி – ஸதிஸம்பொ³ஜ்ஜ²ங்கோ³…பே॰… உபெக்கா²ஸம்பொ³ஜ்ஜ²ங்கோ³.
478. Tattha katame satta bojjhaṅgā? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi …pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, yo tasmiṃ samaye phasso hoti…pe… avikkhepo hoti – ime dhammā kusalā. Tasseva lokuttarassa kusalassa jhānassa katattā bhāvitattā vipākaṃ vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ suññataṃ, tasmiṃ samaye satta bojjhaṅgā honti – satisambojjhaṅgo…pe… upekkhāsambojjhaṅgo.
479. தத்த² கதமோ ஸதிஸம்பொ³ஜ்ஜ²ங்கோ³? யா ஸதி அனுஸ்ஸதி…பே॰… ஸம்மாஸதி ஸதிஸம்பொ³ஜ்ஜ²ங்கோ³ மக்³க³ங்க³ங் மக்³க³பரியாபன்னங் – அயங் வுச்சதி ‘‘ஸதிஸம்பொ³ஜ்ஜ²ங்கோ³’’…பே॰….
479. Tattha katamo satisambojjhaṅgo? Yā sati anussati…pe… sammāsati satisambojjhaṅgo maggaṅgaṃ maggapariyāpannaṃ – ayaṃ vuccati ‘‘satisambojjhaṅgo’’…pe….
தத்த² கதமோ உபெக்கா²ஸம்பொ³ஜ்ஜ²ங்கோ³? யா உபெக்கா² உபெக்க²னா அஜ்ஜு²பெக்க²னா மஜ்ஜ²த்ததா சித்தஸ்ஸ உபெக்கா²ஸம்பொ³ஜ்ஜ²ங்கோ³ – அயங் வுச்சதி ‘‘உபெக்கா²ஸம்பொ³ஜ்ஜ²ங்கோ³’’. இமே வுச்சந்தி ‘‘ஸத்த பொ³ஜ்ஜ²ங்கா³’’. அவஸேஸா த⁴ம்மா ஸத்தஹி பொ³ஜ்ஜ²ங்கே³ஹி ஸம்பயுத்தா.
Tattha katamo upekkhāsambojjhaṅgo? Yā upekkhā upekkhanā ajjhupekkhanā majjhattatā cittassa upekkhāsambojjhaṅgo – ayaṃ vuccati ‘‘upekkhāsambojjhaṅgo’’. Ime vuccanti ‘‘satta bojjhaṅgā’’. Avasesā dhammā sattahi bojjhaṅgehi sampayuttā.
480. ஸத்த பொ³ஜ்ஜ²ங்கா³ – ஸதிஸம்பொ³ஜ்ஜ²ங்கோ³…பே॰… உபெக்கா²ஸம்பொ³ஜ்ஜ²ங்கோ³.
480. Satta bojjhaṅgā – satisambojjhaṅgo…pe… upekkhāsambojjhaṅgo.
481. தத்த² கதமோ ஸதிஸம்பொ³ஜ்ஜ²ங்கோ³? இத⁴ பி⁴க்கு² யஸ்மிங் ஸமயே லோகுத்தரங் ஜா²னங் பா⁴வேதி நிய்யானிகங் அபசயகா³மிங் தி³ட்டி²க³தானங் பஹானாய பட²மாய பூ⁴மியா பத்தியா விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங், தஸ்மிங் ஸமயே ப²ஸ்ஸோ ஹோதி…பே॰… அவிக்கே²போ ஹோதி. இமே த⁴ம்மா குஸலா. தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகங் விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங், யா தஸ்மிங் ஸமயே ஸதி அனுஸ்ஸதி ஸம்மாஸதி ஸதிஸம்பொ³ஜ்ஜ²ங்கோ³ மக்³க³ங்க³ங் மக்³க³பரியாபன்னங் – அயங் வுச்சதி ‘‘ஸதிஸம்பொ³ஜ்ஜ²ங்கோ³’’. அவஸேஸா த⁴ம்மா ஸதிஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா த⁴ம்மவிசயஸம்பொ³ஜ்ஜ²ங்க³ஸம்பயுத்தா …பே॰… அவஸேஸா த⁴ம்மா வீரியஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா பீதிஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா பஸ்ஸத்³தி⁴ஸம்பொ³ஜ்ஜ²ங்க³ஸம்பயுத்தா…பே॰… அவஸேஸா த⁴ம்மா ஸமாதி⁴ஸம்பொ³ஜ்ஜ²ங்க³ஸம்பயுத்தா.
481. Tattha katamo satisambojjhaṅgo? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā kusalā. Tasseva lokuttarassa kusalassa jhānassa katattā bhāvitattā vipākaṃ vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, yā tasmiṃ samaye sati anussati sammāsati satisambojjhaṅgo maggaṅgaṃ maggapariyāpannaṃ – ayaṃ vuccati ‘‘satisambojjhaṅgo’’. Avasesā dhammā satisambojjhaṅgasampayuttā…pe… avasesā dhammā dhammavicayasambojjhaṅgasampayuttā …pe… avasesā dhammā vīriyasambojjhaṅgasampayuttā…pe… avasesā dhammā pītisambojjhaṅgasampayuttā…pe… avasesā dhammā passaddhisambojjhaṅgasampayuttā…pe… avasesā dhammā samādhisambojjhaṅgasampayuttā.
தத்த² கதமோ உபெக்கா²ஸம்பொ³ஜ்ஜ²ங்கோ³? இத⁴ பி⁴க்கு² யஸ்மிங் ஸமயே லோகுத்தரங் ஜா²னங் பா⁴வேதி நிய்யானிகங் அபசயகா³மிங் தி³ட்டி²க³தானங் பஹானாய பட²மாய பூ⁴மியா பத்தியா விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங், தஸ்மிங் ஸமயே ப²ஸ்ஸோ ஹோதி…பே॰… அவிக்கே²போ ஹோதி. இமே த⁴ம்மா குஸலா. தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகங் விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்க²படிபத³ங் த³ந்தா⁴பி⁴ஞ்ஞங் ஸுஞ்ஞதங், யா தஸ்மிங் ஸமயே உபெக்கா² உபெக்க²னா அஜ்ஜு²பெக்க²னா மஜ்ஜ²த்ததா சித்தஸ்ஸ உபெக்கா²ஸம்பொ³ஜ்ஜ²ங்கோ³ – அயங் வுச்சதி ‘‘உபெக்கா²ஸம்பொ³ஜ்ஜ²ங்கோ³’’ . அவஸேஸா த⁴ம்மா உபெக்கா²ஸம்பொ³ஜ்ஜ²ங்க³ஸம்பயுத்தா.
Tattha katamo upekkhāsambojjhaṅgo? Idha bhikkhu yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ, tasmiṃ samaye phasso hoti…pe… avikkhepo hoti. Ime dhammā kusalā. Tasseva lokuttarassa kusalassa jhānassa katattā bhāvitattā vipākaṃ vivicceva kāmehi…pe… paṭhamaṃ jhānaṃ upasampajja viharati dukkhapaṭipadaṃ dandhābhiññaṃ suññataṃ, yā tasmiṃ samaye upekkhā upekkhanā ajjhupekkhanā majjhattatā cittassa upekkhāsambojjhaṅgo – ayaṃ vuccati ‘‘upekkhāsambojjhaṅgo’’ . Avasesā dhammā upekkhāsambojjhaṅgasampayuttā.
அபி⁴த⁴ம்மபா⁴ஜனீயங்.
Abhidhammabhājanīyaṃ.
3. பஞ்ஹாபுச்ச²கங்
3. Pañhāpucchakaṃ
482. ஸத்த பொ³ஜ்ஜ²ங்கா³ – ஸதிஸம்பொ³ஜ்ஜ²ங்கோ³, த⁴ம்மவிசயஸம்பொ³ஜ்ஜ²ங்கோ³, வீரியஸம்பொ³ஜ்ஜ²ங்கோ³, பீதிஸம்பொ³ஜ்ஜ²ங்கோ³, பஸ்ஸத்³தி⁴ஸம்பொ³ஜ்ஜ²ங்கோ³, ஸமாதி⁴ஸம்பொ³ஜ்ஜ²ங்கோ³, உபெக்கா²ஸம்பொ³ஜ்ஜ²ங்கோ³.
482. Satta bojjhaṅgā – satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo.
483. ஸத்தன்னங் பொ³ஜ்ஜ²ங்கா³னங் கதி குஸலா, கதி அகுஸலா, கதி அப்³யாகதா…பே॰… கதி ஸரணா, கதி அரணா?
483. Sattannaṃ bojjhaṅgānaṃ kati kusalā, kati akusalā, kati abyākatā…pe… kati saraṇā, kati araṇā?
1. திகங்
1. Tikaṃ
484. ஸியா குஸலா, ஸியா அப்³யாகதா. பீதிஸம்பொ³ஜ்ஜ²ங்கோ³ ஸுகா²ய வேத³னாய ஸம்பயுத்தோ; ச² பொ³ஜ்ஜ²ங்கா³ ஸியா ஸுகா²ய வேத³னாய ஸம்பயுத்தா, ஸியா அது³க்க²மஸுகா²ய வேத³னாய ஸம்பயுத்தா. ஸியா விபாகா, ஸியா விபாகத⁴ம்மத⁴ம்மா. அனுபாதி³ன்னஅனுபாதா³னியா. அஸங்கிலிட்ட²அஸங்கிலேஸிகா. ஸியா ஸவிதக்கஸவிசாரா, ஸியா அவிதக்கவிசாரமத்தா, ஸியா அவிதக்கஅவிசாரா. பீதிஸம்பொ³ஜ்ஜ²ங்கோ³ ந பீதிஸஹக³தோ, ஸுக²ஸஹக³தோ, ந உபெக்கா²ஸஹக³தோ; ச² பொ³ஜ்ஜ²ங்கா³ ஸியா பீதிஸஹக³தா, ஸியா ஸுக²ஸஹக³தா, ஸியா உபெக்கா²ஸஹக³தா. நேவ த³ஸ்ஸனேன ந பா⁴வனாய பஹாதப்³பா³. நேவ த³ஸ்ஸனேன ந பா⁴வனாய பஹாதப்³ப³ஹேதுகா. ஸியா அபசயகா³மினோ, ஸியா நேவாசயகா³மினாபசயகா³மினோ. ஸியா ஸெக்கா², ஸியா அஸெக்கா². அப்பமாணா. அப்பமாணாரம்மணா. பணீதா. ஸியா ஸம்மத்தனியதா , ஸியா அனியதா. ந மக்³கா³ரம்மணா, ஸியா மக்³க³ஹேதுகா, ஸியா மக்³கா³தி⁴பதினோ; ஸியா ந வத்தப்³பா³ மக்³க³ஹேதுகாதிபி, மக்³கா³தி⁴பதினோதிபி. ஸியா உப்பன்னா, ஸியா அனுப்பன்னா, ஸியா உப்பாதி³னோ. ஸியா அதீதா, ஸியா அனாக³தா, ஸியா பச்சுப்பன்னா. ந வத்தப்³பா³ அதீதாரம்மணாதிபி, அனாக³தாரம்மணாதிபி, பச்சுப்பன்னாரம்மணாதிபி. ஸியா அஜ்ஜ²த்தா, ஸியா ப³ஹித்³தா⁴, ஸியா அஜ்ஜ²த்தப³ஹித்³தா⁴. ப³ஹித்³தா⁴ரம்மணா. அனித³ஸ்ஸனஅப்படிகா⁴.
484. Siyā kusalā, siyā abyākatā. Pītisambojjhaṅgo sukhāya vedanāya sampayutto; cha bojjhaṅgā siyā sukhāya vedanāya sampayuttā, siyā adukkhamasukhāya vedanāya sampayuttā. Siyā vipākā, siyā vipākadhammadhammā. Anupādinnaanupādāniyā. Asaṃkiliṭṭhaasaṃkilesikā. Siyā savitakkasavicārā, siyā avitakkavicāramattā, siyā avitakkaavicārā. Pītisambojjhaṅgo na pītisahagato, sukhasahagato, na upekkhāsahagato; cha bojjhaṅgā siyā pītisahagatā, siyā sukhasahagatā, siyā upekkhāsahagatā. Neva dassanena na bhāvanāya pahātabbā. Neva dassanena na bhāvanāya pahātabbahetukā. Siyā apacayagāmino, siyā nevācayagāmināpacayagāmino. Siyā sekkhā, siyā asekkhā. Appamāṇā. Appamāṇārammaṇā. Paṇītā. Siyā sammattaniyatā , siyā aniyatā. Na maggārammaṇā, siyā maggahetukā, siyā maggādhipatino; siyā na vattabbā maggahetukātipi, maggādhipatinotipi. Siyā uppannā, siyā anuppannā, siyā uppādino. Siyā atītā, siyā anāgatā, siyā paccuppannā. Na vattabbā atītārammaṇātipi, anāgatārammaṇātipi, paccuppannārammaṇātipi. Siyā ajjhattā, siyā bahiddhā, siyā ajjhattabahiddhā. Bahiddhārammaṇā. Anidassanaappaṭighā.
2. து³கங்
2. Dukaṃ
485. த⁴ம்மவிசயஸம்பொ³ஜ்ஜ²ங்கோ³ ஹேது, ச² பொ³ஜ்ஜ²ங்கா³ ஹேதுஸம்பயுத்தா. த⁴ம்மவிசயஸம்பொ³ஜ்ஜ²ங்கோ³ ஹேது சேவ ஸஹேதுகோ ச, ச² பொ³ஜ்ஜ²ங்கா³ ந வத்தப்³பா³ ஹேதூ சேவ ஸஹேதுகா சாதி, ஸஹேதுகா சேவ ந ச ஹேதூ. த⁴ம்மவிசயஸம்பொ³ஜ்ஜ²ங்கோ³ ஹேது சேவ ஹேதுஸம்பயுத்தோ ச, ச² பொ³ஜ்ஜ²ங்கா³ ந வத்தப்³பா³ ஹேதூ சேவ ஹேதுஸம்பயுத்தா சாதி, ஹேதுஸம்பயுத்தா சேவ ந ச ஹேதூ. ச² பொ³ஜ்ஜ²ங்கா³ ந ஹேதூ ஸஹேதுகா, த⁴ம்மவிசயஸம்பொ³ஜ்ஜ²ங்கோ³ ந வத்தப்³போ³ ந ஹேதுஸஹேதுகோதிபி, ந ஹேதுஅஹேதுகோதிபி. ஸப்பச்சயா. ஸங்க²தா. அனித³ஸ்ஸனா. அப்படிகா⁴. அரூபா. லோகுத்தரா. கேனசி விஞ்ஞெய்யா, கேனசி ந விஞ்ஞெய்யா. நோ ஆஸவா. அனாஸவா ஆஸவவிப்பயுத்தா. ந வத்தப்³பா³ ஆஸவா சேவ ஸாஸவா சாதிபி, ஸாஸவா சேவ நோ ச ஆஸவாதிபி. ஆஸவா சேவ ஆஸவஸம்பயுத்தா சாதிபி, ஆஸவஸம்பயுத்தா சேவ நோ ச ஆஸவாதிபி. ஆஸவவிப்பயுத்தா. அனாஸவா. நோ ஸங்யோஜனா…பே॰… நோ க³ந்தா²…பே॰… நோ ஓகா⁴…பே॰… நோ யோகா³…பே॰… நோ நீவரணா…பே॰… நோ பராமாஸா…பே॰… ஸாரம்மணா. நோ சித்தா. சேதஸிகா. சித்தஸம்பயுத்தா. சித்தஸங்ஸட்டா² . சித்தஸமுட்டா²னா. சித்தஸஹபு⁴னோ. சித்தானுபரிவத்தினோ. சித்தஸங்ஸட்ட²ஸமுட்டா²னா. சித்தஸங்ஸட்ட²ஸமுட்டா²னஸஹபு⁴னோ. சித்தஸங்ஸட்ட²ஸமுட்டா²னானுபரிவத்தினோ. பா³ஹிரா. நோ உபாதா³. அனுபாதி³ன்னா. நோ உபாதா³னா…பே॰… நோ கிலேஸா…பே॰… ந த³ஸ்ஸனேன பஹாதப்³பா³. ந பா⁴வனாய பஹாதப்³பா³. ந த³ஸ்ஸனேன பஹாதப்³ப³ஹேதுகா. ந பா⁴வனாய பஹாதப்³ப³ஹேதுகா. ஸியா ஸவிதக்கா, ஸியா அவிதக்கா. ஸியா ஸவிசாரா, ஸியா அவிசாரா.
485. Dhammavicayasambojjhaṅgo hetu, cha bojjhaṅgā hetusampayuttā. Dhammavicayasambojjhaṅgo hetu ceva sahetuko ca, cha bojjhaṅgā na vattabbā hetū ceva sahetukā cāti, sahetukā ceva na ca hetū. Dhammavicayasambojjhaṅgo hetu ceva hetusampayutto ca, cha bojjhaṅgā na vattabbā hetū ceva hetusampayuttā cāti, hetusampayuttā ceva na ca hetū. Cha bojjhaṅgā na hetū sahetukā, dhammavicayasambojjhaṅgo na vattabbo na hetusahetukotipi, na hetuahetukotipi. Sappaccayā. Saṅkhatā. Anidassanā. Appaṭighā. Arūpā. Lokuttarā. Kenaci viññeyyā, kenaci na viññeyyā. No āsavā. Anāsavā āsavavippayuttā. Na vattabbā āsavā ceva sāsavā cātipi, sāsavā ceva no ca āsavātipi. Āsavā ceva āsavasampayuttā cātipi, āsavasampayuttā ceva no ca āsavātipi. Āsavavippayuttā. Anāsavā. No saṃyojanā…pe… no ganthā…pe… no oghā…pe… no yogā…pe… no nīvaraṇā…pe… no parāmāsā…pe… sārammaṇā. No cittā. Cetasikā. Cittasampayuttā. Cittasaṃsaṭṭhā . Cittasamuṭṭhānā. Cittasahabhuno. Cittānuparivattino. Cittasaṃsaṭṭhasamuṭṭhānā. Cittasaṃsaṭṭhasamuṭṭhānasahabhuno. Cittasaṃsaṭṭhasamuṭṭhānānuparivattino. Bāhirā. No upādā. Anupādinnā. No upādānā…pe… no kilesā…pe… na dassanena pahātabbā. Na bhāvanāya pahātabbā. Na dassanena pahātabbahetukā. Na bhāvanāya pahātabbahetukā. Siyā savitakkā, siyā avitakkā. Siyā savicārā, siyā avicārā.
பீதிஸம்பொ³ஜ்ஜ²ங்கோ³ அப்பீதிகோ, ச² பொ³ஜ்ஜ²ங்கா³ ஸியா ஸப்பீதிகா, ஸியா அப்பீதிகா. பீதிஸம்பொ³ஜ்ஜ²ங்கோ³ ந பீதிஸஹக³தோ, ச² பொ³ஜ்ஜ²ங்கா³ ஸியா பீதிஸஹக³தா, ஸியா ந பீதிஸஹக³தா. பீதிஸம்பொ³ஜ்ஜ²ங்கோ³ ஸுக²ஸஹக³தோ, ச² பொ³ஜ்ஜ²ங்கா³ ஸியா ஸுக²ஸஹக³தா, ஸியா ந ஸுக²ஸஹக³தா. பீதிஸம்பொ³ஜ்ஜ²ங்கோ³ ந உபெக்கா²ஸஹக³தோ, ச² பொ³ஜ்ஜ²ங்கா³ ஸியா உபெக்கா²ஸஹக³தா, ஸியா ந உபெக்கா²ஸஹக³தா. ந காமாவசரா. ந ரூபாவசரா. ந அரூபாவசரா. அபரியாபன்னா. ஸியா நிய்யானிகா, ஸியா அனிய்யானிகா. ஸியா நியதா, ஸியா அனியதா. அனுத்தரா. அரணாதி.
Pītisambojjhaṅgo appītiko, cha bojjhaṅgā siyā sappītikā, siyā appītikā. Pītisambojjhaṅgo na pītisahagato, cha bojjhaṅgā siyā pītisahagatā, siyā na pītisahagatā. Pītisambojjhaṅgo sukhasahagato, cha bojjhaṅgā siyā sukhasahagatā, siyā na sukhasahagatā. Pītisambojjhaṅgo na upekkhāsahagato, cha bojjhaṅgā siyā upekkhāsahagatā, siyā na upekkhāsahagatā. Na kāmāvacarā. Na rūpāvacarā. Na arūpāvacarā. Apariyāpannā. Siyā niyyānikā, siyā aniyyānikā. Siyā niyatā, siyā aniyatā. Anuttarā. Araṇāti.
பஞ்ஹாபுச்ச²கங்.
Pañhāpucchakaṃ.
பொ³ஜ்ஜ²ங்க³விப⁴ங்கோ³ நிட்டி²தோ.
Bojjhaṅgavibhaṅgo niṭṭhito.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / ஸம்மோஹவினோத³னீ-அட்ட²கதா² • Sammohavinodanī-aṭṭhakathā
1. ஸுத்தந்தபா⁴ஜனீயவண்ணனா • 1. Suttantabhājanīyavaṇṇanā
2. அபி⁴த⁴ம்மபா⁴ஜனீயவண்ணனா • 2. Abhidhammabhājanīyavaṇṇanā
3. பஞ்ஹாபுச்ச²கவண்ணனா • 3. Pañhāpucchakavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 10. பொ³ஜ்ஜ²ங்க³விப⁴ங்கோ³ • 10. Bojjhaṅgavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 10. பொ³ஜ்ஜ²ங்க³விப⁴ங்கோ³ • 10. Bojjhaṅgavibhaṅgo
