| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[323] 3. б̣рахмад̣̇ад̇д̇аж̇аад̇агаван̣н̣анаа
[323] 3. Brahmadattajātakavaṇṇanā
д̣̇ваяам̣ яаажанагод̇и ид̣̇ам̣ сад̇т̇аа аал̣авим̣ ниссааяа аг̇г̇аал̣авз жзд̇ияз вихаранд̇о гудигаарасигкаабад̣̇ам̣ аараб̣бха гат̇зси. вад̇т̇у бана хздтаа ман̣иган̣таж̇аад̇агз (ж̇аа. 1.3.7 аад̣̇аяо) ааг̇ад̇амзва. ид̇ха бана сад̇т̇аа ‘‘сажжам̣ гира д̇умхз, бхигкавз, яаажанаб̣ахулаа вин̃н̃ад̇д̇иб̣ахулаа вихарат̇аа’’д̇и вад̇ваа ‘‘аама, бханд̇з’’д̇и вуд̇д̇з д̇з бхигкуу г̇арахид̇ваа ‘‘бхигкавз, бораан̣агабан̣д̣ид̇аа бат̇ависсарзна ран̃н̃аа баваарид̇ааби бан̣н̣ажчад̇д̇ан̃жа згабадалигам̣ убааханаяуг̇ан̃жа яаажид̇угаамаа хирод̇д̇аббабхзд̣̇анабхаязна махааж̇анамаж̇жхз агат̇зд̇ваа рахо гат̇аяим̣суу’’д̇и вад̇ваа ад̇ийд̇ам̣ аахари.
Dvayaṃ yācanakoti idaṃ satthā āḷaviṃ nissāya aggāḷave cetiye viharanto kuṭikārasikkhāpadaṃ ārabbha kathesi. Vatthu pana heṭṭhā maṇikaṇṭhajātake (jā. 1.3.7 ādayo) āgatameva. Idha pana satthā ‘‘saccaṃ kira tumhe, bhikkhave, yācanabahulā viññattibahulā viharathā’’ti vatvā ‘‘āma, bhante’’ti vutte te bhikkhū garahitvā ‘‘bhikkhave, porāṇakapaṇḍitā pathavissarena raññā pavāritāpi paṇṇacchattañca ekapaṭalikaṃ upāhanayugañca yācitukāmā hirottappabhedanabhayena mahājanamajjhe akathetvā raho kathayiṃsū’’ti vatvā atītaṃ āhari.
ад̇ийд̇з габиларадтз уд̇д̇арабан̃жааланаг̇арз уд̇д̇арабан̃жааларааж̇з раж̇ж̇ам̣ гаарзнд̇з б̣од̇хисад̇д̇о згасмим̣ ниг̇амаг̇аамз б̣раахман̣агулз ниб̣б̣ад̇д̇ид̇ваа ваяаббад̇д̇о д̇аггасилааяам̣ саб̣б̣асиббаани уг̇г̇ан̣хид̇ваа абарабхааг̇з д̇аабасабаб̣б̣аж̇ж̇ам̣ баб̣б̣аж̇ид̇ваа химаванд̇з ун̃чаажарияааяа ванамуулапалаапалзна яаабзнд̇о жирам̣ васид̇ваа лон̣амб̣иласзванад̇т̇ааяа мануссабат̇ам̣ вижаранд̇о уд̇д̇арабан̃жааланаг̇арам̣ бад̇ваа рааж̇уяяаанз васид̇ваа бунад̣̇ивасз бхигкам̣ бариязсамаано наг̇арам̣ бависид̇ваа рааж̇ад̣̇ваарам̣ самбаабун̣и. рааж̇аа д̇ассаажаарз жа вихаарз жа басийд̣̇ид̇ваа махаад̇алз нисийд̣̇аабзд̇ваа рааж̇аарахам̣ бан̣ийд̇абхож̇анам̣ бхож̇зд̇ваа бадин̃н̃ам̣ г̇ахзд̇ваа уяяаанзязва васаабзси. со ниб̣ад̣̇д̇хам̣ рааж̇агхарзязва бхун̃ж̇анд̇о вассаанасса ажжаязна химаванд̇амзва г̇анд̇угаамо худ̇ваа жинд̇зси ‘‘маяхам̣ маг̇г̇ам̣ г̇ажчанд̇асса згабадалигаа убааханаа жзва бан̣н̣ажчад̇д̇ан̃жа лад̣̇д̇хум̣ ваддад̇и, рааж̇аанам̣ яаажиссаамий’’д̇и. со згад̣̇ивасам̣ рааж̇аанам̣ уяяаанам̣ ааг̇анд̇ваа ванд̣̇ид̇ваа нисиннам̣ д̣̇исваа ‘‘убааханан̃жа чад̇д̇ан̃жа яаажиссаамий’’д̇и жинд̇зд̇ваа буна жинд̇зси ‘‘барам̣ ‘имам̣ наама д̣̇зхий’д̇и яаажанд̇о род̣̇ад̇и наама, бароби ‘над̇т̇ий’д̇и вад̣̇анд̇о бадирод̣̇ад̇и наама, ‘маа ко бана мам̣ род̣̇анд̇ам̣ махааж̇ано ад̣̇д̣̇аса, маа рааж̇аана’’нд̇и рахо бадижчаннадтаанз убхоби род̣̇ид̇ваа д̇ун̣хий бхависсаамаа’’д̇и. ат̇а нам̣ ‘‘махаарааж̇а, рахо бажжаасийсаамий’’д̇и ааха. рааж̇аа д̇ам̣ суд̇ваа рааж̇абурисз абасагги. б̣од̇хисад̇д̇о ‘‘сажз маяи яаажанд̇з рааж̇аа на д̣̇ассад̇и, мзд̇д̇и но бхиж̇ж̇иссад̇и, д̇асмаа на яаажиссаамий’’д̇и д̇ам̣ д̣̇ивасам̣ наамам̣ г̇ахзд̇ум̣ асаггонд̇о ‘‘г̇ажча, д̇аава, махаарааж̇а, бунзгад̣̇ивасам̣ ж̇ааниссаамий’’д̇и ааха.
Atīte kapilaraṭṭhe uttarapañcālanagare uttarapañcālarāje rajjaṃ kārente bodhisatto ekasmiṃ nigamagāme brāhmaṇakule nibbattitvā vayappatto takkasilāyaṃ sabbasippāni uggaṇhitvā aparabhāge tāpasapabbajjaṃ pabbajitvā himavante uñchācariyāya vanamūlaphalāphalena yāpento ciraṃ vasitvā loṇambilasevanatthāya manussapathaṃ vicaranto uttarapañcālanagaraṃ patvā rājuyyāne vasitvā punadivase bhikkhaṃ pariyesamāno nagaraṃ pavisitvā rājadvāraṃ sampāpuṇi. Rājā tassācāre ca vihāre ca pasīditvā mahātale nisīdāpetvā rājārahaṃ paṇītabhojanaṃ bhojetvā paṭiññaṃ gahetvā uyyāneyeva vasāpesi. So nibaddhaṃ rājaghareyeva bhuñjanto vassānassa accayena himavantameva gantukāmo hutvā cintesi ‘‘mayhaṃ maggaṃ gacchantassa ekapaṭalikā upāhanā ceva paṇṇacchattañca laddhuṃ vaṭṭati, rājānaṃ yācissāmī’’ti. So ekadivasaṃ rājānaṃ uyyānaṃ āgantvā vanditvā nisinnaṃ disvā ‘‘upāhanañca chattañca yācissāmī’’ti cintetvā puna cintesi ‘‘paraṃ ‘imaṃ nāma dehī’ti yācanto rodati nāma, paropi ‘natthī’ti vadanto paṭirodati nāma, ‘mā kho pana maṃ rodantaṃ mahājano addasa, mā rājāna’’nti raho paṭicchannaṭṭhāne ubhopi roditvā tuṇhī bhavissāmā’’ti. Atha naṃ ‘‘mahārāja, raho paccāsīsāmī’’ti āha. Rājā taṃ sutvā rājapurise apasakki. Bodhisatto ‘‘sace mayi yācante rājā na dassati, metti no bhijjissati, tasmā na yācissāmī’’ti taṃ divasaṃ nāmaṃ gahetuṃ asakkonto ‘‘gaccha, tāva, mahārāja, punekadivasaṃ jānissāmī’’ti āha.
бунзгад̣̇ивасам̣ ран̃н̃о уяяаанам̣ ааг̇ад̇агаалз д̇ат̇зва буна д̇ат̇зваад̇и звам̣ яаажид̇ум̣ асаггонд̇ассзва д̣̇ваад̣̇аса сам̣важчараани ад̇игганд̇аани. д̇ад̇о рааж̇аа жинд̇зси ‘‘маяхам̣ аяяо ‘махаарааж̇а, рахо бажжаасийсаамий’д̇и вад̇ваа барисааяа абаг̇ад̇ааяа гин̃жи вад̇д̇ум̣ на висахад̇и, вад̇д̇угаамассзвасса д̣̇ваад̣̇аса вассаани ад̇игганд̇аани, жирам̣ ко банасса б̣рахмажарияам̣ жаранд̇асса угган̣тид̇ваа бхог̇з бхун̃ж̇ид̇угаамо раж̇ж̇ам̣ бажжаасийсад̇и ман̃н̃з, раж̇ж̇асса бана наамам̣ г̇ахзд̇ум̣ асаггонд̇о д̇ун̣хий ход̇и, аж̇ж̇а д̣̇ааниссаахам̣ раж̇ж̇ам̣ аад̣̇им̣ гад̇ваа яам̣ ижчад̇и, д̇ам̣ д̣̇ассаамий’’д̇и. со уяяаанам̣ г̇анд̇ваа ванд̣̇ид̇ваа нисинно б̣од̇хисад̇д̇зна ‘‘рахо бажжаасийсаамий’’д̇и вуд̇д̇з барисааяа абаг̇ад̇ааяа д̇ам̣ гин̃жи вад̇д̇ум̣ асаггонд̇ам̣ ааха ‘‘д̇умхз д̣̇ваад̣̇аса вассаани ‘рахо бажжаасийсаамий’д̇и вад̇ваа рахо лад̣̇д̇хааби гин̃жи вад̇д̇ум̣ на саггот̇а, ахам̣ во раж̇ж̇ам̣ аад̣̇им̣ гад̇ваа саб̣б̣ам̣ баваарзми, ниб̣бхаяаа худ̇ваа яам̣ во ружжад̇и, д̇ам̣ яаажат̇аа’’д̇и. ‘‘махаарааж̇а, яамахам̣ яаажаами, д̇ам̣ д̣̇ассасий’’д̇и? ‘‘д̣̇ассаами, бханд̇з’’д̇и. ‘‘махаарааж̇а, маяхам̣ маг̇г̇ам̣ г̇ажчанд̇асса згабадалигаа убааханаа жа бан̣н̣ажчад̇д̇ан̃жа лад̣̇д̇хум̣ ваддад̇ий’’д̇и. ‘‘зд̇д̇агам̣, бханд̇з, д̇умхз д̣̇ваад̣̇аса сам̣важчараани яаажид̇ум̣ на саггот̇аа’’д̇и. ‘‘аама, махаарааж̇аа’’д̇и. ‘‘гим̣гааран̣аа, бханд̇з, звамагад̇т̇аа’’д̇и. ‘‘махаарааж̇а, ‘имам̣ наама мз д̣̇зхий’д̇и яаажанд̇о род̣̇ад̇и наама, ‘над̇т̇ий’д̇и вад̣̇анд̇о бадирод̣̇ад̇и наама. ‘сажз д̇вам̣ маяаа яаажид̇о на д̣̇ад̣̇зяяааси, д̇ам̣ но род̣̇ид̇абадирод̣̇ид̇ам̣ наама махааж̇ано маа бассад̇уу’д̇и зд̇ад̣̇ад̇т̇ам̣ рахо бажжаасийсаамий’’д̇и вад̇ваа аад̣̇ид̇о д̇иссо г̇аат̇аа абхааси –
Punekadivasaṃ rañño uyyānaṃ āgatakāle tatheva puna tathevāti evaṃ yācituṃ asakkontasseva dvādasa saṃvaccharāni atikkantāni. Tato rājā cintesi ‘‘mayhaṃ ayyo ‘mahārāja, raho paccāsīsāmī’ti vatvā parisāya apagatāya kiñci vattuṃ na visahati, vattukāmassevassa dvādasa vassāni atikkantāni, ciraṃ kho panassa brahmacariyaṃ carantassa ukkaṇṭhitvā bhoge bhuñjitukāmo rajjaṃ paccāsīsati maññe, rajjassa pana nāmaṃ gahetuṃ asakkonto tuṇhī hoti, ajja dānissāhaṃ rajjaṃ ādiṃ katvā yaṃ icchati, taṃ dassāmī’’ti. So uyyānaṃ gantvā vanditvā nisinno bodhisattena ‘‘raho paccāsīsāmī’’ti vutte parisāya apagatāya taṃ kiñci vattuṃ asakkontaṃ āha ‘‘tumhe dvādasa vassāni ‘raho paccāsīsāmī’ti vatvā raho laddhāpi kiñci vattuṃ na sakkotha, ahaṃ vo rajjaṃ ādiṃ katvā sabbaṃ pavāremi, nibbhayā hutvā yaṃ vo ruccati, taṃ yācathā’’ti. ‘‘Mahārāja, yamahaṃ yācāmi, taṃ dassasī’’ti? ‘‘Dassāmi, bhante’’ti. ‘‘Mahārāja, mayhaṃ maggaṃ gacchantassa ekapaṭalikā upāhanā ca paṇṇacchattañca laddhuṃ vaṭṭatī’’ti. ‘‘Ettakaṃ, bhante, tumhe dvādasa saṃvaccharāni yācituṃ na sakkothā’’ti. ‘‘Āma, mahārājā’’ti. ‘‘Kiṃkāraṇā, bhante, evamakatthā’’ti. ‘‘Mahārāja, ‘imaṃ nāma me dehī’ti yācanto rodati nāma, ‘natthī’ti vadanto paṭirodati nāma. ‘Sace tvaṃ mayā yācito na dadeyyāsi, taṃ no roditapaṭiroditaṃ nāma mahājano mā passatū’ti etadatthaṃ raho paccāsīsāmī’’ti vatvā ādito tisso gāthā abhāsi –
89.
89.
‘‘д̣̇ваяам̣ яаажанаго рааж̇а, б̣рахмад̣̇ад̇д̇а ниг̇ажчад̇и;
‘‘Dvayaṃ yācanako rāja, brahmadatta nigacchati;
алаабхам̣ д̇ханалаабхам̣ ваа, звам̣д̇хаммаа хи яаажанаа.
Alābhaṃ dhanalābhaṃ vā, evaṃdhammā hi yācanā.
90.
90.
‘‘яаажанам̣ род̣̇анам̣ ааху, бан̃жаалаанам̣ рат̇зсабха;
‘‘Yācanaṃ rodanaṃ āhu, pañcālānaṃ rathesabha;
яо яаажанам̣ бажжагкаад̇и, д̇амааху бадирод̣̇анам̣.
Yo yācanaṃ paccakkhāti, tamāhu paṭirodanaṃ.
91.
91.
‘‘маа мад̣̇д̣̇асам̣су род̣̇анд̇ам̣, бан̃жаалаа сусамааг̇ад̇аа;
‘‘Mā maddasaṃsu rodantaṃ, pañcālā susamāgatā;
д̇увам̣ ваа бадирод̣̇анд̇ам̣, д̇асмаа ижчаамахам̣ рахо’’д̇и.
Tuvaṃ vā paṭirodantaṃ, tasmā icchāmahaṃ raho’’ti.
д̇ад̇т̇а рааж̇а б̣рахмад̣̇ад̇д̇аад̇и д̣̇вийхиби рааж̇аанам̣ аалабад̇и. ниг̇ажчад̇ийд̇и лабхад̇и винд̣̇ад̇и. звам̣д̇хаммаад̇и звам̣сабхааваа. аахууд̇и бан̣д̣ид̇аа гат̇знд̇и. бан̃жаалаанам̣ рат̇зсабхаад̇и бан̃жааларадтасса иссара рат̇абавара. яо яаажанам̣ бажжагкаад̇ийд̇и яо бана яам̣ яаажанагам̣ ‘‘над̇т̇ий’’д̇и бадигкибад̇и. д̇амаахууд̇и д̇ам̣ бадигкибанам̣ ‘‘бадирод̣̇ана’’нд̇и вад̣̇анд̇и. маа мад̣̇д̣̇асам̣сууд̇и д̇ава радтаваасино бан̃жаалаа сусамааг̇ад̇аа мам̣ род̣̇анд̇ам̣ маа ад̣̇д̣̇асам̣сууд̇и.
Tattha rāja brahmadattāti dvīhipi rājānaṃ ālapati. Nigacchatīti labhati vindati. Evaṃdhammāti evaṃsabhāvā. Āhūti paṇḍitā kathenti. Pañcālānaṃ rathesabhāti pañcālaraṭṭhassa issara rathapavara. Yo yācanaṃ paccakkhātīti yo pana yaṃ yācanakaṃ ‘‘natthī’’ti paṭikkhipati. Tamāhūti taṃ paṭikkhipanaṃ ‘‘paṭirodana’’nti vadanti. Mā maddasaṃsūti tava raṭṭhavāsino pañcālā susamāgatā maṃ rodantaṃ mā addasaṃsūti.
рааж̇аа б̣од̇хисад̇д̇асса г̇ааравалагкан̣з басийд̣̇ид̇ваа варам̣ д̣̇ад̣̇амаано жад̇уд̇т̇ам̣ г̇аат̇амааха –
Rājā bodhisattassa gāravalakkhaṇe pasīditvā varaṃ dadamāno catutthaṃ gāthamāha –
92.
92.
‘‘д̣̇ад̣̇аами д̇з б̣раахман̣а рохин̣ийнам̣, г̇авам̣ сахассам̣ саха бун̇г̇авзна;
‘‘Dadāmi te brāhmaṇa rohiṇīnaṃ, gavaṃ sahassaṃ saha puṅgavena;
арияо хи арияасса гат̇ам̣ на д̣̇аж̇ж̇аа, суд̇ваана г̇аат̇аа д̇ава д̇хаммаяуд̇д̇аа’’д̇и.
Ariyo hi ariyassa kathaṃ na dajjā, sutvāna gāthā tava dhammayuttā’’ti.
д̇ад̇т̇а рохин̣ийнанд̇и рад̇д̇аван̣н̣аанам̣. арияод̇и аажаарасамбанно. арияассаад̇и аажаарасамбаннасса. гат̇ам̣ на д̣̇аж̇ж̇аад̇и гзна гааран̣зна на д̣̇ад̣̇зяяа. д̇хаммаяуд̇д̇аад̇и гааран̣аяуд̇д̇аа.
Tattha rohiṇīnanti rattavaṇṇānaṃ. Ariyoti ācārasampanno. Ariyassāti ācārasampannassa. Kathaṃ na dajjāti kena kāraṇena na dadeyya. Dhammayuttāti kāraṇayuttā.
б̣од̇хисад̇д̇о бана ‘‘наахам̣, махаарааж̇а, вад̇т̇угаамзхи ад̇т̇иго, яам̣ ахам̣ яаажаами, д̇ад̣̇зва мз д̣̇зхий’’д̇и згабадалигаа убааханаа жа бан̣н̣ажчад̇д̇ан̃жа г̇ахзд̇ваа ‘‘махаарааж̇а, аббамад̇д̇о хохи, д̣̇аанам̣ д̣̇зхи, сийлам̣ рагкаахи, убосат̇агаммам̣ гарохий’’д̇и рааж̇аанам̣ овад̣̇ид̇ваа д̇асса яаажанд̇ассзва химаванд̇амзва г̇ад̇о. д̇ад̇т̇а абхин̃н̃аа жа самаабад̇д̇ияо жа ниб̣б̣ад̇д̇зд̇ваа б̣рахмалогабарааяан̣о ахоси.
Bodhisatto pana ‘‘nāhaṃ, mahārāja, vatthukāmehi atthiko, yaṃ ahaṃ yācāmi, tadeva me dehī’’ti ekapaṭalikā upāhanā ca paṇṇacchattañca gahetvā ‘‘mahārāja, appamatto hohi, dānaṃ dehi, sīlaṃ rakkhāhi, uposathakammaṃ karohī’’ti rājānaṃ ovaditvā tassa yācantasseva himavantameva gato. Tattha abhiññā ca samāpattiyo ca nibbattetvā brahmalokaparāyaṇo ahosi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа рааж̇аа аананд̣̇о ахоси, д̇аабасо бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā rājā ānando ahosi, tāpaso pana ahameva ahosi’’nti.
б̣рахмад̣̇ад̇д̇аж̇аад̇агаван̣н̣анаа д̇ад̇ияаа.
Brahmadattajātakavaṇṇanā tatiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 323. б̣рахмад̣̇ад̇д̇аж̇аад̇агам̣ • 323. Brahmadattajātakaṃ
