| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൬. ബ്രഹ്മലോകസുത്തവണ്ണനാ
6. Brahmalokasuttavaṇṇanā
൧൭൭. പച്ചേകം ദ്വാരബാഹന്തി പച്ചേകം ദ്വാരബാഹം. പച്ചേക-സദ്ദോ ചേത്ഥ ആവുത്തിവസേന വേദിതബ്ബോ; ‘‘പച്ചേകം പച്ചേക’’ന്തി ആഹ ‘‘ഏകേകോ ഏകേക’’ന്തി. തേസു ഹി ഏകോ പച്ചേകബ്രഹ്മാ ഗന്ധകുടിയാ ഏകദ്വാരബാഹം നിസ്സായ ഠിതോ, അപരോ അഞ്ഞം. പച്ചേകബ്രഹ്മാതി ച ഏകചാരീ ബ്രഹ്മാ, ന പരിസചാരീ ബ്രഹ്മാതി അത്ഥോ. സമിദ്ധി നാമ സഗ്ഗേ സുഖുപകരണേഹി, ബ്രഹ്മാനഞ്ച ഝാനം സുഖുപകരണന്തി ഝാനസുഖേന സമിദ്ധോതി. സമ്പത്തിയാ വേപുല്ലപ്പത്തതാ ബ്രഹ്മാനഞ്ച അഭിഞ്ഞാഗുണേഹി വേപുല്ലപ്പത്തീതി ആഹ ‘‘ഫീതോതി അഭിഞ്ഞാപുപ്ഫേഹി സുപുപ്ഫിതോ’’തി. അസഹന്തോതി നസഹന്തോ നരോചേന്തോ.
177.Paccekaṃdvārabāhanti paccekaṃ dvārabāhaṃ. Pacceka-saddo cettha āvuttivasena veditabbo; ‘‘paccekaṃ pacceka’’nti āha ‘‘ekeko ekeka’’nti. Tesu hi eko paccekabrahmā gandhakuṭiyā ekadvārabāhaṃ nissāya ṭhito, aparo aññaṃ. Paccekabrahmāti ca ekacārī brahmā, na parisacārī brahmāti attho. Samiddhi nāma sagge sukhupakaraṇehi, brahmānañca jhānaṃ sukhupakaraṇanti jhānasukhena samiddhoti. Sampattiyā vepullappattatā brahmānañca abhiññāguṇehi vepullappattīti āha ‘‘phītoti abhiññāpupphehi supupphito’’ti. Asahantoti nasahanto narocento.
സതപദന്തി സതസദ്ദോ. രൂപവസേനാതി രൂപസദ്ദവസേന, രൂപസദ്ദേന സദ്ധിന്തി അത്ഥോ. തഥാ പന്തിവസേനാതി ഏത്ഥാപി. ഏകച്ചേതി ഏകേ മിഗാരീ, തേസം ബ്യഗ്ഘീനിസാരൂപകാനം പഞ്ചസതാനീതി അത്ഥോ. ‘‘കസ്സ അഞ്ഞസ്സ ഉപട്ഠാനം ഗമിസ്സാമീ’’തി വിമാനസമ്പത്തിയം വിമ്ഹയക്ഖികോ അഹങ്കാരവസേന വദതി. രണന്തി നിന്ദന്തി ഏതേഹീതി രണാ, ദോസാ. വിരോധിപച്ചയസന്നിപാതേ വികാരുപ്പത്തി രുപ്പനം രൂപസ്സ പവേധനന്തി ആഹ ‘‘സീതാദീഹി ച നിച്ചം പവേധിത’’ന്തി. സുമേധോ സുന്ദരപഞ്ഞോ സോ സത്ഥാ രൂപേ ന രമതി, കിം പന മന്ദപഞ്ഞോ രൂപേ സരണഞ്ച പവേധിതഞ്ച അപസ്സന്തോ രമസീതി അധിപ്പായോ.
Satapadanti satasaddo. Rūpavasenāti rūpasaddavasena, rūpasaddena saddhinti attho. Tathā pantivasenāti etthāpi. Ekacceti eke migārī, tesaṃ byagghīnisārūpakānaṃ pañcasatānīti attho. ‘‘Kassa aññassa upaṭṭhānaṃ gamissāmī’’ti vimānasampattiyaṃ vimhayakkhiko ahaṅkāravasena vadati. Raṇanti nindanti etehīti raṇā, dosā. Virodhipaccayasannipāte vikāruppatti ruppanaṃ rūpassa pavedhananti āha ‘‘sītādīhi ca niccaṃ pavedhita’’nti. Sumedho sundarapañño so satthā rūpe na ramati, kiṃ pana mandapañño rūpe saraṇañca pavedhitañca apassanto ramasīti adhippāyo.
ബ്രഹ്മലോകസുത്തവണ്ണനാ നിട്ഠിതാ.
Brahmalokasuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൬. ബ്രഹ്മലോകസുത്തം • 6. Brahmalokasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൬. ബ്രഹ്മലോകസുത്തവണ്ണനാ • 6. Brahmalokasuttavaṇṇanā
