| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೫. ಬ್ರಾಹ್ಮಣಸಚ್ಚಸುತ್ತಂ
5. Brāhmaṇasaccasuttaṃ
೧೮೫. ಏಕಂ ಸಮಯಂ ಭಗವಾ ರಾಜಗಹೇ ವಿಹರತಿ ಗಿಜ್ಝಕೂಟೇ ಪಬ್ಬತೇ। ತೇನ ಖೋ ಪನ ಸಮಯೇನ ಸಮ್ಬಹುಲಾ ಅಭಿಞ್ಞಾತಾ ಅಭಿಞ್ಞಾತಾ ಪರಿಬ್ಬಾಜಕಾ ಸಿಪ್ಪಿನಿಕಾತೀರೇ ಪರಿಬ್ಬಾಜಕಾರಾಮೇ ಪಟಿವಸನ್ತಿ, ಸೇಯ್ಯಥಿದಂ ಅನ್ನಭಾರೋ ವರಧರೋ ಸಕುಲುದಾಯೀ ಚ ಪರಿಬ್ಬಾಜಕೋ ಅಞ್ಞೇ ಚ ಅಭಿಞ್ಞಾತಾ ಅಭಿಞ್ಞಾತಾ ಪರಿಬ್ಬಾಜಕಾ। ಅಥ ಖೋ ಭಗವಾ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಯೇನ ಸಿಪ್ಪಿನಿಕಾತೀರೇ ಪರಿಬ್ಬಾಜಕಾರಾಮೋ ತೇನುಪಸಙ್ಕಮಿ।
185. Ekaṃ samayaṃ bhagavā rājagahe viharati gijjhakūṭe pabbate. Tena kho pana samayena sambahulā abhiññātā abhiññātā paribbājakā sippinikātīre paribbājakārāme paṭivasanti, seyyathidaṃ annabhāro varadharo sakuludāyī ca paribbājako aññe ca abhiññātā abhiññātā paribbājakā. Atha kho bhagavā sāyanhasamayaṃ paṭisallānā vuṭṭhito yena sippinikātīre paribbājakārāmo tenupasaṅkami.
ತೇನ ಖೋ ಪನ ಸಮಯೇನ ತೇಸಂ ಅಞ್ಞತಿತ್ಥಿಯಾನಂ ಪರಿಬ್ಬಾಜಕಾನಂ ಸನ್ನಿಸಿನ್ನಾನಂ ಸನ್ನಿಪತಿತಾನಂ ಅಯಮನ್ತರಾ ಕಥಾ ಉದಪಾದಿ – ‘‘ಇತಿಪಿ ಬ್ರಾಹ್ಮಣಸಚ್ಚಾನಿ, ಇತಿಪಿ ಬ್ರಾಹ್ಮಣಸಚ್ಚಾನೀ’’ತಿ। ಅಥ ಖೋ ಭಗವಾ ಯೇನ ತೇ ಪರಿಬ್ಬಾಜಕಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ। ನಿಸಜ್ಜ ಖೋ ಭಗವಾ ತೇ ಪರಿಬ್ಬಾಜಕೇ ಏತದವೋಚ –
Tena kho pana samayena tesaṃ aññatitthiyānaṃ paribbājakānaṃ sannisinnānaṃ sannipatitānaṃ ayamantarā kathā udapādi – ‘‘itipi brāhmaṇasaccāni, itipi brāhmaṇasaccānī’’ti. Atha kho bhagavā yena te paribbājakā tenupasaṅkami; upasaṅkamitvā paññatte āsane nisīdi. Nisajja kho bhagavā te paribbājake etadavoca –
‘‘ಕಾಯ ನುತ್ಥ, ಪರಿಬ್ಬಾಜಕಾ, ಏತರಹಿ ಕಥಾಯ ಸನ್ನಿಸಿನ್ನಾ, ಕಾ ಚ ಪನ ವೋ ಅನ್ತರಾಕಥಾ ವಿಪ್ಪಕತಾ’’ತಿ? ‘‘ಇಧ, ಭೋ ಗೋತಮ, ಅಮ್ಹಾಕಂ ಸನ್ನಿಸಿನ್ನಾನಂ ಸನ್ನಿಪತಿತಾನಂ ಅಯಮನ್ತರಾಕಥಾ ಉದಪಾದಿ – ‘ಇತಿಪಿ ಬ್ರಾಹ್ಮಣಸಚ್ಚಾನಿ, ಇತಿಪಿ ಬ್ರಾಹ್ಮಣಸಚ್ಚಾನೀ’’’ತಿ।
‘‘Kāya nuttha, paribbājakā, etarahi kathāya sannisinnā, kā ca pana vo antarākathā vippakatā’’ti? ‘‘Idha, bho gotama, amhākaṃ sannisinnānaṃ sannipatitānaṃ ayamantarākathā udapādi – ‘itipi brāhmaṇasaccāni, itipi brāhmaṇasaccānī’’’ti.
‘‘ಚತ್ತಾರಿಮಾನಿ, ಪರಿಬ್ಬಾಜಕಾ, ಬ್ರಾಹ್ಮಣಸಚ್ಚಾನಿ ಮಯಾ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಪವೇದಿತಾನಿ। ಕತಮಾನಿ ಚತ್ತಾರಿ? ಇಧ, ಪರಿಬ್ಬಾಜಕಾ, ಬ್ರಾಹ್ಮಣೋ ಏವಮಾಹ – ‘ಸಬ್ಬೇ ಪಾಣಾ ಅವಜ್ಝಾ’ತಿ । ಇತಿ ವದಂ ಬ್ರಾಹ್ಮಣೋ ಸಚ್ಚಂ ಆಹ, ನೋ ಮುಸಾ। ಸೋ ತೇನ ನ ಸಮಣೋತಿ ಮಞ್ಞತಿ, ನ ಬ್ರಾಹ್ಮಣೋತಿ ಮಞ್ಞತಿ, ನ ಸೇಯ್ಯೋಹಮಸ್ಮೀತಿ ಮಞ್ಞತಿ, ನ ಸದಿಸೋಹಮಸ್ಮೀತಿ ಮಞ್ಞತಿ, ನ ಹೀನೋಹಮಸ್ಮೀತಿ ಮಞ್ಞತಿ। ಅಪಿ ಚ ಯದೇವ ತತ್ಥ ಸಚ್ಚಂ ತದಭಿಞ್ಞಾಯ ಪಾಣಾನಂಯೇವ ಅನುದ್ದಯಾಯ 1 ಅನುಕಮ್ಪಾಯ ಪಟಿಪನ್ನೋ ಹೋತಿ।
‘‘Cattārimāni, paribbājakā, brāhmaṇasaccāni mayā sayaṃ abhiññā sacchikatvā paveditāni. Katamāni cattāri? Idha, paribbājakā, brāhmaṇo evamāha – ‘sabbe pāṇā avajjhā’ti . Iti vadaṃ brāhmaṇo saccaṃ āha, no musā. So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati. Api ca yadeva tattha saccaṃ tadabhiññāya pāṇānaṃyeva anuddayāya 2 anukampāya paṭipanno hoti.
‘‘ಪುನ ಚಪರಂ, ಪರಿಬ್ಬಾಜಕಾ, ಬ್ರಾಹ್ಮಣೋ ಏವಮಾಹ – ‘ಸಬ್ಬೇ ಕಾಮಾ ಅನಿಚ್ಚಾ ದುಕ್ಖಾ ವಿಪರಿಣಾಮಧಮ್ಮಾ’ತಿ। ಇತಿ ವದಂ ಬ್ರಾಹ್ಮಣೋ ಸಚ್ಚಮಾಹ, ನೋ ಮುಸಾ। ಸೋ ತೇನ ನ ಸಮಣೋತಿ ಮಞ್ಞತಿ, ನ ಬ್ರಾಹ್ಮಣೋತಿ ಮಞ್ಞತಿ, ನ ಸೇಯ್ಯೋಹಮಸ್ಮೀತಿ ಮಞ್ಞತಿ, ನ ಸದಿಸೋಹಮಸ್ಮೀತಿ ಮಞ್ಞತಿ, ನ ಹೀನೋಹಮಸ್ಮೀತಿ ಮಞ್ಞತಿ। ಅಪಿ ಚ ಯದೇವ ತತ್ಥ ಸಚ್ಚಂ ತದಭಿಞ್ಞಾಯ ಕಾಮಾನಂಯೇವ ನಿಬ್ಬಿದಾಯ ವಿರಾಗಾಯ ನಿರೋಧಾಯ ಪಟಿಪನ್ನೋ ಹೋತಿ।
‘‘Puna caparaṃ, paribbājakā, brāhmaṇo evamāha – ‘sabbe kāmā aniccā dukkhā vipariṇāmadhammā’ti. Iti vadaṃ brāhmaṇo saccamāha, no musā. So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati. Api ca yadeva tattha saccaṃ tadabhiññāya kāmānaṃyeva nibbidāya virāgāya nirodhāya paṭipanno hoti.
‘‘ಪುನ ಚಪರಂ, ಪರಿಬ್ಬಾಜಕಾ, ಬ್ರಾಹ್ಮಣೋ ಏವಮಾಹ – ‘ಸಬ್ಬೇ ಭವಾ ಅನಿಚ್ಚಾ…ಪೇ॰… ಭವಾನಂಯೇವ ನಿಬ್ಬಿದಾಯ ವಿರಾಗಾಯ ನಿರೋಧಾಯ ಪಟಿಪನ್ನೋ ಹೋತಿ।
‘‘Puna caparaṃ, paribbājakā, brāhmaṇo evamāha – ‘sabbe bhavā aniccā…pe… bhavānaṃyeva nibbidāya virāgāya nirodhāya paṭipanno hoti.
‘‘ಪುನ ಚಪರಂ, ಪರಿಬ್ಬಾಜಕಾ, ಬ್ರಾಹ್ಮಣೋ ಏವಮಾಹ – ‘ನಾಹಂ ಕ್ವಚನಿ 3 ಕಸ್ಸಚಿ ಕಿಞ್ಚನತಸ್ಮಿಂ ನ ಚ ಮಮ ಕ್ವಚನಿ ಕತ್ಥಚಿ ಕಿಞ್ಚನತತ್ಥೀ’ತಿ। ಇತಿ ವದಂ ಬ್ರಾಹ್ಮಣೋ ಸಚ್ಚಂ ಆಹ, ನೋ ಮುಸಾ। ಸೋ ತೇನ ನ ಸಮಣೋತಿ ಮಞ್ಞತಿ, ನ ಬ್ರಾಹ್ಮಣೋತಿ ಮಞ್ಞತಿ, ನ ಸೇಯ್ಯೋಹಮಸ್ಮೀತಿ ಮಞ್ಞತಿ, ನ ಸದಿಸೋಹಮಸ್ಮೀತಿ ಮಞ್ಞತಿ, ನ ಹೀನೋಹಮಸ್ಮೀತಿ ಮಞ್ಞತಿ। ಅಪಿ ಚ ಯದೇವ ತತ್ಥ ಸಚ್ಚಂ ತದಭಿಞ್ಞಾಯ ಆಕಿಞ್ಚಞ್ಞಂಯೇವ ಪಟಿಪದಂ ಪಟಿಪನ್ನೋ ಹೋತಿ। ಇಮಾನಿ ಖೋ, ಪರಿಬ್ಬಾಜಕಾ, ಚತ್ತಾರಿ ಬ್ರಾಹ್ಮಣಸಚ್ಚಾನಿ ಮಯಾ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಪವೇದಿತಾನೀ’’ತಿ। ಪಞ್ಚಮಂ।
‘‘Puna caparaṃ, paribbājakā, brāhmaṇo evamāha – ‘nāhaṃ kvacani 4 kassaci kiñcanatasmiṃ na ca mama kvacani katthaci kiñcanatatthī’ti. Iti vadaṃ brāhmaṇo saccaṃ āha, no musā. So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati. Api ca yadeva tattha saccaṃ tadabhiññāya ākiñcaññaṃyeva paṭipadaṃ paṭipanno hoti. Imāni kho, paribbājakā, cattāri brāhmaṇasaccāni mayā sayaṃ abhiññā sacchikatvā paveditānī’’ti. Pañcamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೫. ಬ್ರಾಹ್ಮಣಸಚ್ಚಸುತ್ತವಣ್ಣನಾ • 5. Brāhmaṇasaccasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೫. ಬ್ರಾಹ್ಮಣಸಚ್ಚಸುತ್ತವಣ್ಣನಾ • 5. Brāhmaṇasaccasuttavaṇṇanā
