| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೨. ಬ್ರಾಹ್ಮಣಸುತ್ತಂ
2. Brāhmaṇasuttaṃ
೧೦೦೮. ಸಾವತ್ಥಿನಿದಾನಂ । ‘‘ಬ್ರಾಹ್ಮಣಾ, ಭಿಕ್ಖವೇ, ಉದಯಗಾಮಿನಿಂ ನಾಮ ಪಟಿಪದಂ ಪಞ್ಞಪೇನ್ತಿ। ತೇ ಸಾವಕಂ ಏವಂ ಸಮಾದಪೇನ್ತಿ – ‘ಏಹಿ ತ್ವಂ, ಅಮ್ಭೋ ಪುರಿಸ, ಕಾಲಸ್ಸೇವ ಉಟ್ಠಾಯ ಪಾಚೀನಮುಖೋ ಯಾಹಿ। ಸೋ ತ್ವಂ ಮಾ ಸೋಬ್ಭಂ ಪರಿವಜ್ಜೇಹಿ, ಮಾ ಪಪಾತಂ, ಮಾ ಖಾಣುಂ, ಮಾ ಕಣ್ಡಕಠಾನಂ 1, ಮಾ ಚನ್ದನಿಯಂ, ಮಾ ಓಳಿಗಲ್ಲಂ। ಯತ್ಥ 2 ಪಪತೇಯ್ಯಾಸಿ ತತ್ಥೇವ ಮರಣಂ ಆಗಮೇಯ್ಯಾಸಿ। ಏವಂ ತ್ವಂ, ಅಮ್ಭೋ ಪುರಿಸ, ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜಿಸ್ಸಸೀ’’’ತಿ।
1008. Sāvatthinidānaṃ . ‘‘Brāhmaṇā, bhikkhave, udayagāminiṃ nāma paṭipadaṃ paññapenti. Te sāvakaṃ evaṃ samādapenti – ‘ehi tvaṃ, ambho purisa, kālasseva uṭṭhāya pācīnamukho yāhi. So tvaṃ mā sobbhaṃ parivajjehi, mā papātaṃ, mā khāṇuṃ, mā kaṇḍakaṭhānaṃ 3, mā candaniyaṃ, mā oḷigallaṃ. Yattha 4 papateyyāsi tattheva maraṇaṃ āgameyyāsi. Evaṃ tvaṃ, ambho purisa, kāyassa bhedā paraṃ maraṇā sugatiṃ saggaṃ lokaṃ upapajjissasī’’’ti.
‘‘ತಂ ಖೋ ಪನೇತಂ, ಭಿಕ್ಖವೇ, ಬ್ರಾಹ್ಮಣಾನಂ ಬಾಲಗಮನಮೇತಂ 5 ಮೂಳ್ಹಗಮನಮೇತಂ ನ ನಿಬ್ಬಿದಾಯ ನ ವಿರಾಗಾಯ ನ ನಿರೋಧಾಯ ನ ಉಪಸಮಾಯ ನ ಅಭಿಞ್ಞಾಯ ನ ಸಮ್ಬೋಧಾಯ ನ ನಿಬ್ಬಾನಾಯ ಸಂವತ್ತತಿ। ಅಹಞ್ಚ ಖೋ, ಭಿಕ್ಖವೇ, ಅರಿಯಸ್ಸ ವಿನಯೇ ಉದಯಗಾಮಿನಿಂ ಪಟಿಪದಂ ಪಞ್ಞಪೇಮಿ; ಯಾ ಏಕನ್ತನಿಬ್ಬಿದಾಯ ವಿರಾಗಾಯ ನಿರೋಧಾಯ ಉಪಸಮಾಯ ಅಭಿಞ್ಞಾಯ ಸಮ್ಬೋಧಾಯ ನಿಬ್ಬಾನಾಯ ಸಂವತ್ತತಿ।
‘‘Taṃ kho panetaṃ, bhikkhave, brāhmaṇānaṃ bālagamanametaṃ 6 mūḷhagamanametaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Ahañca kho, bhikkhave, ariyassa vinaye udayagāminiṃ paṭipadaṃ paññapemi; yā ekantanibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘ಕತಮಾ ಚ ಸಾ, ಭಿಕ್ಖವೇ, ಉದಯಗಾಮಿನೀ ಪಟಿಪದಾ; ಯಾ ಏಕನ್ತನಿಬ್ಬಿದಾಯ…ಪೇ॰… ನಿಬ್ಬಾನಾಯ ಸಂವತ್ತತಿ? ಇಧ , ಭಿಕ್ಖವೇ, ಅರಿಯಸಾವಕೋ ಬುದ್ಧೇ ಅವೇಚ್ಚಪ್ಪಸಾದೇನ ಸಮನ್ನಾಗತೋ ಹೋತಿ – ಇತಿಪಿ ಸೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ…ಪೇ॰… ಸತ್ಥಾ ದೇವಮನುಸ್ಸಾನಂ ಬುದ್ಧೋ ಭಗವಾತಿ; ಧಮ್ಮೇ…ಪೇ॰… ಸಙ್ಘೇ…ಪೇ॰… ಅರಿಯಕನ್ತೇಹಿ ಸೀಲೇಹಿ ಸಮನ್ನಾಗತೋ ಹೋತಿ ಅಖಣ್ಡೇಹಿ…ಪೇ॰… ಸಮಾಧಿಸಂವತ್ತನಿಕೇಹಿ। ಅಯಂ ಖೋ ಸಾ, ಭಿಕ್ಖವೇ, ಉದಯಗಾಮಿನೀ ಪಟಿಪದಾ ಏಕನ್ತನಿಬ್ಬಿದಾಯ…ಪೇ॰… ನಿಬ್ಬಾನಾಯ ಸಂವತ್ತತೀ’’ತಿ। ದುತಿಯಂ।
‘‘Katamā ca sā, bhikkhave, udayagāminī paṭipadā; yā ekantanibbidāya…pe… nibbānāya saṃvattati? Idha , bhikkhave, ariyasāvako buddhe aveccappasādena samannāgato hoti – itipi so bhagavā arahaṃ sammāsambuddho…pe… satthā devamanussānaṃ buddho bhagavāti; dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Ayaṃ kho sā, bhikkhave, udayagāminī paṭipadā ekantanibbidāya…pe… nibbānāya saṃvattatī’’ti. Dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨-೩. ಬ್ರಾಹ್ಮಣಸುತ್ತಾದಿವಣ್ಣನಾ • 2-3. Brāhmaṇasuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨-೩. ಬ್ರಾಹ್ಮಣಸುತ್ತಾದಿವಣ್ಣನಾ • 2-3. Brāhmaṇasuttādivaṇṇanā
