| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૨. બુદ્ધગુણસતિપટિલાભપઞ્હો
2. Buddhaguṇasatipaṭilābhapañho
૨. રાજા આહ ‘‘ભન્તે નાગસેન, તુમ્હે એતં ભણથ ‘યો વસ્સસતં અકુસલં કરેય્ય, મરણકાલે ચ એકં બુદ્ધગુણં સતિં પટિલભેય્ય, સો દેવેસુ ઉપ્પજ્જેય્યા’તિ એતં ન સદ્દહામિ, એવઞ્ચ પન વદેથ ‘એતેન પાણાતિપાતેન નિરયે ઉપ્પજ્જેય્યા’તિ એતમ્પિ ન સદ્દહામી’’તિ.
2. Rājā āha ‘‘bhante nāgasena, tumhe etaṃ bhaṇatha ‘yo vassasataṃ akusalaṃ kareyya, maraṇakāle ca ekaṃ buddhaguṇaṃ satiṃ paṭilabheyya, so devesu uppajjeyyā’ti etaṃ na saddahāmi, evañca pana vadetha ‘etena pāṇātipātena niraye uppajjeyyā’ti etampi na saddahāmī’’ti.
‘‘તં કિં મઞ્ઞસિ, મહારાજ, ખુદ્દકોપિ પાસાણો વિના નાવાય ઉદકે ઉપ્પિલવેય્યા’’તિ . ‘‘ન હિ, ભન્તે’’તિ. ‘‘કિં નુ ખો, મહારાજ, વાહસતમ્પિ પાસાણાનં નાવાય આરોપિતં ઉદકે ઉપ્પિલવેય્યા’’તિ? ‘‘આમ, ભન્તે’’તિ. ‘‘યથા, મહારાજ, નાવા, એવં કુસલાનિ કમ્માનિ દટ્ઠબ્બાની’’તિ.
‘‘Taṃ kiṃ maññasi, mahārāja, khuddakopi pāsāṇo vinā nāvāya udake uppilaveyyā’’ti . ‘‘Na hi, bhante’’ti. ‘‘Kiṃ nu kho, mahārāja, vāhasatampi pāsāṇānaṃ nāvāya āropitaṃ udake uppilaveyyā’’ti? ‘‘Āma, bhante’’ti. ‘‘Yathā, mahārāja, nāvā, evaṃ kusalāni kammāni daṭṭhabbānī’’ti.
‘‘કલ્લોસિ, ભન્તે નાગસેના’’તિ.
‘‘Kallosi, bhante nāgasenā’’ti.
બુદ્ધગુણસતિપટિલાભપઞ્હો દુતિયો.
Buddhaguṇasatipaṭilābhapañho dutiyo.
