Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೭. ಬುದ್ಧವನ್ದನಾಸುತ್ತವಣ್ಣನಾ
7. Buddhavandanāsuttavaṇṇanā
೨೬೩. ಉಟ್ಠಹಾತಿ ಉಟ್ಠಾನಂ ಕಾಯಿಕವೀರಿಯಂ ಕರೋಹಿ। ತೇನಾಹ ‘‘ವಿಚರ, ಲೋಕೇ’’ತಿ। ಚೇತಸಿಕವೀರಿಯಂ ಪನ ಭಗವತಾ ಮತ್ಥಕಂ ಪಾಪಿತಮೇವ। ತೇನಾಹ ‘‘ವಿಜಿತಸಙ್ಗಾಮಾ’’ತಿ। ದ್ವಾದಸಯೋಜನಿಕಸ್ಸ ಉಚ್ಚಭಾವೇನ। ವಿತ್ಥಾರತೋ ಪನ ಆಯಾಮತೋ ಚ ಅನೇಕಯೋಜನಸತಸಹಸ್ಸಪರಿಮಾಣಚಕ್ಕವಾಳಂ ಅತಿಬ್ಯಾಪೇತ್ವಾ ಠಿತಸ್ಸ। ಪನ್ನಭಾರಾತಿ ಪಾತಿತಭಾರ। ನಿಕ್ಖೇಪಿತಬ್ಬತೋ ಭಾರಾತಿ ಆಹ ‘‘ಓರೋಪಿತಖನ್ಧಾ’’ತಿಆದಿ। ತೇ ಹಿ ತಂಸಮಙ್ಗಿನೋ ಪುಗ್ಗಲಸ್ಸ ಸಮ್ಪಾತನಟ್ಠೇನ ಭಾರಾ ನಾಮ। ವುತ್ತಞ್ಹೇತಂ ‘‘ಭಾರಾ ಹವೇ ಪಞ್ಚಕ್ಖನ್ಧಾ’’ತಿ (ಸಂ॰ ನಿ॰ ೩.೨೨)। ತದೇಕದೇಸಾ ಚ ಕಿಲೇಸಾಭಿಸಙ್ಖಾರಾ। ಪನ್ನರಸಾಯ ಪುಣ್ಣಮಾಯ ರತ್ತಿನ್ತಿ ಯಥಾ ಪನ್ನರಸಪುಣ್ಣಮಾಯ ರತ್ತಿಯಂ ಪರಿಪುಣ್ಣಕಾಲೇ ಉಪಕ್ಕಿಲೇಸವಿಮುತ್ತೋ ಚನ್ದೋ ಸೋಭತಿ, ಏವಂ ತವ ಚಿತ್ತಂ ಸಬ್ಬಸೋ ಉಪಕ್ಕಿಲೇಸವಿಮುತ್ತಂ ಸೋಭತೀತಿ ಅಧಿಪ್ಪಾಯೋ।
263.Uṭṭhahāti uṭṭhānaṃ kāyikavīriyaṃ karohi. Tenāha ‘‘vicara, loke’’ti. Cetasikavīriyaṃ pana bhagavatā matthakaṃ pāpitameva. Tenāha ‘‘vijitasaṅgāmā’’ti. Dvādasayojanikassa uccabhāvena. Vitthārato pana āyāmato ca anekayojanasatasahassaparimāṇacakkavāḷaṃ atibyāpetvā ṭhitassa. Pannabhārāti pātitabhāra. Nikkhepitabbato bhārāti āha ‘‘oropitakhandhā’’tiādi. Te hi taṃsamaṅgino puggalassa sampātanaṭṭhena bhārā nāma. Vuttañhetaṃ ‘‘bhārā have pañcakkhandhā’’ti (saṃ. ni. 3.22). Tadekadesā ca kilesābhisaṅkhārā. Pannarasāya puṇṇamāya rattinti yathā pannarasapuṇṇamāya rattiyaṃ paripuṇṇakāle upakkilesavimutto cando sobhati, evaṃ tava cittaṃ sabbaso upakkilesavimuttaṃ sobhatīti adhippāyo.
ಬುದ್ಧವನ್ದನಾಸುತ್ತವಣ್ಣನಾ ನಿಟ್ಠಿತಾ।
Buddhavandanāsuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೭. ಬುದ್ಧವನ್ದನಾಸುತ್ತಂ • 7. Buddhavandanāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭. ಬುದ್ಧವನ್ದನಾಸುತ್ತವಣ್ಣನಾ • 7. Buddhavandanāsuttavaṇṇanā