| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೦. ಬುದ್ಧುಪಟ್ಠಾಕತ್ಥೇರಅಪದಾನವಣ್ಣನಾ
10. Buddhupaṭṭhākattheraapadānavaṇṇanā
ವಿಪಸ್ಸಿಸ್ಸ ಭಗವತೋತಿಆದಿಕಂ ಆಯಸ್ಮತೋ ಬುದ್ಧುಪಟ್ಠಾಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ವಿಪಸ್ಸಿಸ್ಸ ಭಗವತೋ ಕಾಲೇ ಸಙ್ಖಧಮಕಕುಲೇ ನಿಬ್ಬತ್ತೋ ವುದ್ಧಿಮನ್ವಾಯ ಅತ್ತನೋ ಸಿಪ್ಪೇ ಸಙ್ಖಧಮನೇ ಛೇಕೋ ಅಹೋಸಿ, ನಿಚ್ಚಕಾಲಂ ಭಗವತೋ ಸಙ್ಖಂ ಧಮೇತ್ವಾ ಸಙ್ಖಸದ್ದೇನೇವ ಪೂಜೇಸಿ। ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಸಬ್ಬತ್ಥ ಪಾಕಟೋ ಮಹಾಘೋಸೋ ಮಹಾನಾದೀ ಮಧುರಸ್ಸರೋ ಅಹೋಸಿ, ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಪಾಕಟಕುಲೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಮಧುರಸ್ಸರೋತಿ ಪಾಕಟೋ, ಸತ್ಥರಿ ಪಸೀದಿತ್ವಾ ಪಬ್ಬಜಿತೋ ನಚಿರಸ್ಸೇವ ಅರಹಾ ಅಹೋಸಿ, ಅಪರಭಾಗೇ ಮಧುರಸ್ಸರತ್ಥೇರೋತಿ ಪಾಕಟೋ।
Vipassissabhagavatotiādikaṃ āyasmato buddhupaṭṭhākattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle saṅkhadhamakakule nibbatto vuddhimanvāya attano sippe saṅkhadhamane cheko ahosi, niccakālaṃ bhagavato saṅkhaṃ dhametvā saṅkhasaddeneva pūjesi. So tena puññena devamanussesu saṃsaranto sabbattha pākaṭo mahāghoso mahānādī madhurassaro ahosi, imasmiṃ buddhuppāde ekasmiṃ pākaṭakule nibbatto vuddhippatto madhurassaroti pākaṭo, satthari pasīditvā pabbajito nacirasseva arahā ahosi, aparabhāge madhurassarattheroti pākaṭo.
೫೧. ಸೋ ಏಕದಿವಸಂ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ವಿಪಸ್ಸಿಸ್ಸ ಭಗವತೋತಿಆದಿಮಾಹ। ತಂ ಹೇಟ್ಠಾ ವುತ್ತಮೇವ। ಅಹೋಸಿಂ ಸಙ್ಖಧಮಕೋತಿ ಸಂ ಸುಟ್ಠು ಖನನ್ತೋ ಗಚ್ಛತೀತಿ ಸಙ್ಖೋ, ಸಮುದ್ದಜಲಪರಿಯನ್ತೇ ಚರಮಾನೋ ಗಚ್ಛತಿ ವಿಚರತೀತಿ ಅತ್ಥೋ। ತಂ ಸಙ್ಖಂ ಧಮತಿ ಘೋಸಂ ಕರೋತೀತಿ ಸಙ್ಖಧಮಕೋ, ಸೋಹಂ ಸಙ್ಖಧಮಕೋವ ಅಹೋಸಿನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
51. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento vipassissa bhagavatotiādimāha. Taṃ heṭṭhā vuttameva. Ahosiṃ saṅkhadhamakoti saṃ suṭṭhu khananto gacchatīti saṅkho, samuddajalapariyante caramāno gacchati vicaratīti attho. Taṃ saṅkhaṃ dhamati ghosaṃ karotīti saṅkhadhamako, sohaṃ saṅkhadhamakova ahosinti attho. Sesaṃ sabbattha uttānamevāti.
ಬುದ್ಧುಪಟ್ಠಾಕತ್ಥೇರಅಪದಾನವಣ್ಣನಾ ಸಮತ್ತಾ।
Buddhupaṭṭhākattheraapadānavaṇṇanā samattā.
ದಸಮವಗ್ಗವಣ್ಣನಾ ಸಮತ್ತಾ।
Dasamavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೯. ವೇಯ್ಯಾವಚ್ಚಕತ್ಥೇರಅಪದಾನಂ • 9. Veyyāvaccakattheraapadānaṃ
