| Library / Tipiṭaka / திபிடக • Tipiṭaka / தே²ரீகா³தா²-அட்ட²கதா² • Therīgāthā-aṭṭhakathā |
2. சாலாதே²ரீகா³தா²வண்ணனா
2. Cālātherīgāthāvaṇṇanā
ஸதிங் உபட்ட²பெத்வானாதிஆதி³கா சாலாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயங் குஸலங் உபசினித்வா இமஸ்மிங் பு³த்³து⁴ப்பாதே³ மக³தே⁴ஸு நாலககா³மே ரூபஸாரிப்³ராஹ்மணியா குச்சி²ம்ஹி நிப்³ப³த்தி. தஸ்ஸா நாமக்³க³ஹணதி³வஸே சாலாதி நாமங் அகங்ஸு, தஸ்ஸா கனிட்டா²ய உபசாலாதி, அத² தஸ்ஸா கனிட்டா²ய ஸீஸூபசாலாதி . இமா திஸ்ஸோபி த⁴ம்மஸேனாபதிஸ்ஸ கனிட்ட²ப⁴கி³னியோ, இமாஸங் புத்தானம்பி திண்ணங் இத³மேவ நாமங். யே ஸந்தா⁴ய தே²ரகா³தா²ய ‘‘சாலே உபசாலே ஸீஸூபசாலே’’தி (தே²ரகா³॰ 42) ஆக³தங்.
Satiṃupaṭṭhapetvānātiādikā cālāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā imasmiṃ buddhuppāde magadhesu nālakagāme rūpasāribrāhmaṇiyā kucchimhi nibbatti. Tassā nāmaggahaṇadivase cālāti nāmaṃ akaṃsu, tassā kaniṭṭhāya upacālāti, atha tassā kaniṭṭhāya sīsūpacālāti . Imā tissopi dhammasenāpatissa kaniṭṭhabhaginiyo, imāsaṃ puttānampi tiṇṇaṃ idameva nāmaṃ. Ye sandhāya theragāthāya ‘‘cāle upacāle sīsūpacāle’’ti (theragā. 42) āgataṃ.
இமா பன திஸ்ஸோபி ப⁴கி³னியோ ‘‘த⁴ம்மஸேனாபதி பப்³ப³ஜீ’’தி ஸுத்வா ‘‘ந ஹி நூன ஸோ ஓரகோ த⁴ம்மவினயோ, ந ஸா ஓரிகா பப்³ப³ஜ்ஜா, யத்த² அம்ஹாகங் அய்யோ பப்³ப³ஜிதோ’’தி உஸ்ஸாஹஜாதா திப்³ப³ச்ச²ந்தா³ அஸ்ஸுமுக²ங் ருத³மானங் ஞாதிபரிஜனங் பஹாய பப்³ப³ஜிங்ஸு. பப்³ப³ஜித்வா ச க⁴டெந்தியோ வாயமந்தியோ நசிரஸ்ஸேவ அரஹத்தங் பாபுணிங்ஸு. அரஹத்தங் பன பத்வா நிப்³பா³னஸுகே²ன ப²லஸுகே²ன விஹரந்தி.
Imā pana tissopi bhaginiyo ‘‘dhammasenāpati pabbajī’’ti sutvā ‘‘na hi nūna so orako dhammavinayo, na sā orikā pabbajjā, yattha amhākaṃ ayyo pabbajito’’ti ussāhajātā tibbacchandā assumukhaṃ rudamānaṃ ñātiparijanaṃ pahāya pabbajiṃsu. Pabbajitvā ca ghaṭentiyo vāyamantiyo nacirasseva arahattaṃ pāpuṇiṃsu. Arahattaṃ pana patvā nibbānasukhena phalasukhena viharanti.
தாஸு சாலா பி⁴க்கு²னீ ஏகதி³வஸங் பச்சா²ப⁴த்தங் பிண்ட³பாதபடிக்கந்தா அந்த⁴வனங் பவிஸித்வா தி³வாவிஹாரங் நிஸீதி³. அத² நங் மாரோ உபஸங்கமித்வா காமேஹி உபனேஸி. யங் ஸந்தா⁴ய ஸுத்தே வுத்தங் –
Tāsu cālā bhikkhunī ekadivasaṃ pacchābhattaṃ piṇḍapātapaṭikkantā andhavanaṃ pavisitvā divāvihāraṃ nisīdi. Atha naṃ māro upasaṅkamitvā kāmehi upanesi. Yaṃ sandhāya sutte vuttaṃ –
‘‘அத² கோ² சாலா பி⁴க்கு²னீ புப்³ப³ண்ஹஸமயங் நிவாஸெத்வா பத்தசீவரங் ஆதா³ய ஸாவத்தி²ங் பிண்டா³ய பாவிஸி. ஸாவத்தி²யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தா யேன அந்த⁴வனங், தேனுபஸங்கமி தி³வாவிஹாராய. அந்த⁴வனங் அஜ்ஜோ²கா³ஹெத்வா அஞ்ஞதரஸ்மிங் ருக்க²மூலே தி³வாவிஹாரங் நிஸீதி³. அத² கோ² மாரோ பாபிமா யேன சாலா பி⁴க்கு²னீ, தேனுபஸங்கமி, உபஸங்கமித்வா சாலங் பி⁴க்கு²னிங் ஏதத³வோசா’’தி (ஸங்॰ நி॰ 1.167).
‘‘Atha kho cālā bhikkhunī pubbaṇhasamayaṃ nivāsetvā pattacīvaraṃ ādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena andhavanaṃ, tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi. Atha kho māro pāpimā yena cālā bhikkhunī, tenupasaṅkami, upasaṅkamitvā cālaṃ bhikkhuniṃ etadavocā’’ti (saṃ. ni. 1.167).
அந்த⁴வனம்ஹி தி³வாவிஹாரங் நிஸின்னங் மாரோ உபஸங்கமித்வா ப்³ரஹ்மசரியவாஸதோ விச்சி²ந்தி³துகாமோ ‘‘கங் நு உத்³தி³ஸ்ஸ முண்டா³ஸீ’’திஆதி³ங் புச்சி². அத²ஸ்ஸ ஸத்து² கு³ணே த⁴ம்மஸ்ஸ ச நிய்யானிகபா⁴வங் பகாஸெத்வா அத்தனோ கதகிச்சபா⁴வவிபா⁴வனேன தஸ்ஸ விஸயாதிக்கமங் பவேதே³ஸி. தங் ஸுத்வா மாரோ து³க்கீ² து³ம்மனோ தத்தே²வந்தரதா⁴யி. அத² ஸா அத்தனா மாரேன ச பா⁴ஸிதா கா³தா² உதா³னவஸேன கதெ²ந்தீ –
Andhavanamhi divāvihāraṃ nisinnaṃ māro upasaṅkamitvā brahmacariyavāsato vicchinditukāmo ‘‘kaṃ nu uddissa muṇḍāsī’’tiādiṃ pucchi. Athassa satthu guṇe dhammassa ca niyyānikabhāvaṃ pakāsetvā attano katakiccabhāvavibhāvanena tassa visayātikkamaṃ pavedesi. Taṃ sutvā māro dukkhī dummano tatthevantaradhāyi. Atha sā attanā mārena ca bhāsitā gāthā udānavasena kathentī –
182.
182.
‘‘ஸதிங் உபட்ட²பெத்வான, பி⁴க்கு²னீ பா⁴விதிந்த்³ரியா;
‘‘Satiṃ upaṭṭhapetvāna, bhikkhunī bhāvitindriyā;
படிவிஜ்ஜி² பத³ங் ஸந்தங், ஸங்கா²ரூபஸமங் ஸுக²ங்.
Paṭivijjhi padaṃ santaṃ, saṅkhārūpasamaṃ sukhaṃ.
183.
183.
‘‘கங் நு உத்³தி³ஸ்ஸ முண்டா³ஸி, ஸமணீ விய தி³ஸ்ஸதி;
‘‘Kaṃ nu uddissa muṇḍāsi, samaṇī viya dissati;
ந ச ரோசேஸி பாஸண்டே³, கிமித³ங் சரஸி மோமுஹா.
Na ca rocesi pāsaṇḍe, kimidaṃ carasi momuhā.
184.
184.
‘‘இதோ ப³ஹித்³தா⁴ பாஸண்டா³, தி³ட்டி²யோ உபனிஸ்ஸிதா;
‘‘Ito bahiddhā pāsaṇḍā, diṭṭhiyo upanissitā;
ந தே த⁴ம்மங் விஜானந்தி, ந தே த⁴ம்மஸ்ஸ கோவிதா³.
Na te dhammaṃ vijānanti, na te dhammassa kovidā.
185.
185.
‘‘அத்தி² ஸக்யகுலே ஜாதோ, பு³த்³தோ⁴ அப்படிபுக்³க³லோ;
‘‘Atthi sakyakule jāto, buddho appaṭipuggalo;
ஸோ மே த⁴ம்மமதே³ஸேஸி, தி³ட்டீ²னங் ஸமதிக்கமங்.
So me dhammamadesesi, diṭṭhīnaṃ samatikkamaṃ.
186.
186.
‘‘து³க்க²ங் து³க்க²ஸமுப்பாத³ங், து³க்க²ஸ்ஸ ச அதிக்கமங்;
‘‘Dukkhaṃ dukkhasamuppādaṃ, dukkhassa ca atikkamaṃ;
அரியங் சட்ட²ங்கி³கங் மக்³க³ங், து³க்கூ²பஸமகா³மினங்.
Ariyaṃ caṭṭhaṅgikaṃ maggaṃ, dukkhūpasamagāminaṃ.
187.
187.
‘‘தஸ்ஸாஹங் வசனங் ஸுத்வா, விஹரிங் ஸாஸனே ரதா;
‘‘Tassāhaṃ vacanaṃ sutvā, vihariṃ sāsane ratā;
திஸ்ஸோ விஜ்ஜா அனுப்பத்தா, கதங் பு³த்³த⁴ஸ்ஸ ஸாஸனங்.
Tisso vijjā anuppattā, kataṃ buddhassa sāsanaṃ.
188.
188.
‘‘ஸப்³ப³த்த² விஹதா நந்தீ³, தமொக்க²ந்தோ⁴ பதா³லிதோ;
‘‘Sabbattha vihatā nandī, tamokkhandho padālito;
ஏவங் ஜானாஹி பாபிம, நிஹதோ த்வமஸி அந்தகா’’தி. –
Evaṃ jānāhi pāpima, nihato tvamasi antakā’’ti. –
இமா கா³தா² அபா⁴ஸி.
Imā gāthā abhāsi.
தத்த² ஸதிங் உபட்ட²பெத்வானாதி ஸதிபட்டா²னபா⁴வனாவஸேன காயாதீ³ஸு அஸுப⁴து³க்கா²னிச்சானத்தவஸேன ஸதிங் ஸுட்டு² உபட்டி²தங் கத்வா. பி⁴க்கு²னீதி அத்தானங் ஸந்தா⁴ய வத³தி. பா⁴விதிந்த்³ரியாதி அரியமக்³க³பா⁴வனாய பா⁴விதஸத்³தா⁴தி³பஞ்சிந்த்³ரியா. படிவிஜ்ஜி² பத³ங் ஸந்தந்தி ஸந்தங் பத³ங் நிப்³பா³னங் ஸச்சி²கிரியாபடிவேதே⁴ன படிவிஜ்ஜி² ஸச்சா²காஸி. ஸங்கா²ரூபஸமந்தி ஸப்³ப³ஸங்கா²ரானங் உபஸமஹேதுபூ⁴தங். ஸுக²ந்தி அச்சந்தஸுக²ங்.
Tattha satiṃ upaṭṭhapetvānāti satipaṭṭhānabhāvanāvasena kāyādīsu asubhadukkhāniccānattavasena satiṃ suṭṭhu upaṭṭhitaṃ katvā. Bhikkhunīti attānaṃ sandhāya vadati. Bhāvitindriyāti ariyamaggabhāvanāya bhāvitasaddhādipañcindriyā. Paṭivijjhi padaṃ santanti santaṃ padaṃ nibbānaṃ sacchikiriyāpaṭivedhena paṭivijjhi sacchākāsi. Saṅkhārūpasamanti sabbasaṅkhārānaṃ upasamahetubhūtaṃ. Sukhanti accantasukhaṃ.
‘‘கங் நு உத்³தி³ஸ்ஸா’’தி கா³தா² மாரேன வுத்தா. தத்ராயங் ஸங்கே²பத்தோ² – இமஸ்மிங் லோகே ப³ஹூ ஸமயா தேஸஞ்ச தே³ஸேதாரோ ப³ஹூ ஏவ தித்த²கரா, தேஸு கங் நு கோ² த்வங் உத்³தி³ஸ்ஸ முண்டா³ஸி முண்டி³தகேஸா அஸி. ந கேவலங் முண்டா³வ, அத² கோ² காஸாவதா⁴ரணேன ச ஸமணீ விய தி³ஸ்ஸதி. ந ச ரோசேஸி பாஸண்டே³தி தாபஸபரிப்³பா³ஜகாதீ³னங் ஆதா³ஸபூ⁴தே பாஸண்டே³ தே தே ஸமயந்தரே நேவ ரோசேஸி. கிமித³ங் சரஸி மோமுஹாதி கிங் நாமித³ங், யங் பாஸண்ட³விஹிதங் உஜுங் நிப்³பா³னமக்³க³ங் பஹாய அஜ்ஜ காலிகங் குமக்³க³ங் படிபஜ்ஜந்தீ அதிவிய மூள்ஹா சரஸி பரிப்³ப⁴மஸீதி.
‘‘Kaṃ nu uddissā’’ti gāthā mārena vuttā. Tatrāyaṃ saṅkhepattho – imasmiṃ loke bahū samayā tesañca desetāro bahū eva titthakarā, tesu kaṃ nu kho tvaṃ uddissa muṇḍāsi muṇḍitakesā asi. Na kevalaṃ muṇḍāva, atha kho kāsāvadhāraṇena ca samaṇī viya dissati. Na ca rocesi pāsaṇḍeti tāpasaparibbājakādīnaṃ ādāsabhūte pāsaṇḍe te te samayantare neva rocesi. Kimidaṃ carasi momuhāti kiṃ nāmidaṃ, yaṃ pāsaṇḍavihitaṃ ujuṃ nibbānamaggaṃ pahāya ajja kālikaṃ kumaggaṃ paṭipajjantī ativiya mūḷhā carasi paribbhamasīti.
தங் ஸுத்வா தே²ரீ படிவசனதா³னமுகே²ன தங் தஜ்ஜெந்தீ ‘‘இதோ ப³ஹித்³தா⁴’’திஆதி³மாஹ. தத்த² இதோ ப³ஹித்³தா⁴ பாஸண்டா³ நாம இதோ ஸம்மாஸம்பு³த்³த⁴ஸ்ஸ ஸாஸனதோ ப³ஹித்³தா⁴ குடீஸகப³ஹுகாராதி³கா. தே ஹி ஸத்தானங் தண்ஹாபாஸங் தி³ட்டி²பாஸஞ்ச டெ³ந்தி ஒட்³டெ³ந்தீதி பாஸண்டா³தி வுச்சதி. தேனாஹ – ‘‘தி³ட்டி²யோ உபனிஸ்ஸிதா’’தி ஸஸ்ஸததி³ட்டி²க³தானி உபேச்ச நிஸ்ஸிதா, தி³ட்டி²க³தானி ஆதி³யிங்ஸூதி அத்தோ². யத³க்³கே³ன ச தி³ட்டி²ஸன்னிஸ்ஸிதா, தத³க்³கே³ன பாஸண்ட³ஸன்னிஸ்ஸிதா. ந தே த⁴ம்மங் விஜானந்தீதி யே பாஸண்டி³னோ ஸஸ்ஸததி³ட்டி²க³தஸன்னிஸ்ஸிதா ‘‘அயங் பவத்தி ஏவங் பவத்ததீ’’தி பவத்தித⁴ம்மம்பி யதா²பூ⁴தங் ந விஜானந்தி. ந தே த⁴ம்மஸ்ஸ கோவிதா³தி ‘‘அயங் நிவத்தி ஏவங் நிவத்ததீ’’தி நிவத்தித⁴ம்மஸ்ஸாபி அகுஸலா, பவத்தித⁴ம்மமக்³கே³பி ஹி தே ஸங்மூள்ஹா, கிமங்க³ங் பன நிவத்தித⁴ம்மேதி.
Taṃ sutvā therī paṭivacanadānamukhena taṃ tajjentī ‘‘ito bahiddhā’’tiādimāha. Tattha ito bahiddhā pāsaṇḍā nāma ito sammāsambuddhassa sāsanato bahiddhā kuṭīsakabahukārādikā. Te hi sattānaṃ taṇhāpāsaṃ diṭṭhipāsañca ḍenti oḍḍentīti pāsaṇḍāti vuccati. Tenāha – ‘‘diṭṭhiyo upanissitā’’ti sassatadiṭṭhigatāni upecca nissitā, diṭṭhigatāni ādiyiṃsūti attho. Yadaggena ca diṭṭhisannissitā, tadaggena pāsaṇḍasannissitā. Na te dhammaṃ vijānantīti ye pāsaṇḍino sassatadiṭṭhigatasannissitā ‘‘ayaṃ pavatti evaṃ pavattatī’’ti pavattidhammampi yathābhūtaṃ na vijānanti. Na te dhammassa kovidāti ‘‘ayaṃ nivatti evaṃ nivattatī’’ti nivattidhammassāpi akusalā, pavattidhammamaggepi hi te saṃmūḷhā, kimaṅgaṃ pana nivattidhammeti.
ஏவங் பாஸண்ட³வாதா³னங் அனிய்யானிகதங் த³ஸ்ஸெத்வா இதா³னி கங் நு உத்³தி³ஸ்ஸ முண்டா³ஸீதி பஞ்ஹங் விஸ்ஸஜ்ஜேதுங் ‘‘அத்தி² ஸக்யகுலே ஜாதோ’’திஆதி³ வுத்தங். தத்த² தி³ட்டீ²னங் ஸமதிக்கமந்தி ஸப்³பா³ஸங் தி³ட்டீ²னங் ஸமதிக்கமனுபாயங் தி³ட்டி²ஜாலவினிவேட²னங். ஸேஸங் வுத்தனயமேவ.
Evaṃ pāsaṇḍavādānaṃ aniyyānikataṃ dassetvā idāni kaṃ nu uddissa muṇḍāsīti pañhaṃ vissajjetuṃ ‘‘atthi sakyakule jāto’’tiādi vuttaṃ. Tattha diṭṭhīnaṃ samatikkamanti sabbāsaṃ diṭṭhīnaṃ samatikkamanupāyaṃ diṭṭhijālaviniveṭhanaṃ. Sesaṃ vuttanayameva.
சாலாதே²ரீகா³தா²வண்ணனா நிட்டி²தா.
Cālātherīgāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரீகா³தா²பாளி • Therīgāthāpāḷi / 2. சாலாதே²ரீகா³தா² • 2. Cālātherīgāthā
