| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[506] 10. жамбзяяаж̇аад̇агаван̣н̣анаа
[506] 10. Campeyyajātakavaṇṇanā
гаа ну виж̇ж̇уриваабхаасийд̇и ид̣̇ам̣ сад̇т̇аа ж̇зд̇аванз вихаранд̇о убосат̇агаммам̣ аараб̣бха гат̇зси. д̇ад̣̇аа хи сад̇т̇аа ‘‘саад̇ху во гад̇ам̣ убаасагаа убосат̇аваасам̣ васанд̇зхи, бораан̣агабан̣д̣ид̇аа нааг̇асамбад̇д̇им̣ бахааяа убосат̇аваасам̣ васим̣суязваа’’д̇и вад̇ваа д̇зхи яаажид̇о ад̇ийд̇ам̣ аахари.
Kānu vijjurivābhāsīti idaṃ satthā jetavane viharanto uposathakammaṃ ārabbha kathesi. Tadā hi satthā ‘‘sādhu vo kataṃ upāsakā uposathavāsaṃ vasantehi, porāṇakapaṇḍitā nāgasampattiṃ pahāya uposathavāsaṃ vasiṃsuyevā’’ti vatvā tehi yācito atītaṃ āhari.
ад̇ийд̇з ан̇г̇арадтз ан̇г̇з жа маг̇ад̇харадтз маг̇ад̇хз жа раж̇ж̇ам̣ гаарзнд̇з ан̇г̇амаг̇ад̇харадтаанам̣ анд̇арз жамбаа наама над̣̇ий, д̇ад̇т̇а нааг̇абхаванам̣ ахоси. жамбзяяо наама нааг̇арааж̇аа раж̇ж̇ам̣ гаарзси. гад̣̇аажи маг̇ад̇харааж̇аа ан̇г̇арадтам̣ г̇ан̣хаад̇и, гад̣̇аажи ан̇г̇арааж̇аа маг̇ад̇харадтам̣. ат̇згад̣̇ивасам̣ маг̇ад̇харааж̇аа ан̇г̇зна сад̣̇д̇хим̣ яуж̇жхид̇ваа яуд̣̇д̇хабарааж̇ид̇о ассам̣ ааруяха балааяанд̇о ан̇г̇аран̃н̃о яод̇хзхи ануб̣ад̣̇д̇хо бун̣н̣ам̣ жамбаанад̣̇им̣ бад̇ваа ‘‘барахад̇т̇з маран̣ад̇о над̣̇им̣ бависид̇ваа мад̇ам̣ сзяяо’’д̇и ассзнзва сад̣̇д̇хим̣ над̣̇им̣ од̇ари. д̇ад̣̇аа жамбзяяо нааг̇арааж̇аа анд̇од̣̇агз рад̇анаман̣д̣абам̣ нимминид̇ваа махаабаривааро махаабаанам̣ бивад̇и. ассо ран̃н̃аа сад̣̇д̇хим̣ уд̣̇агз нимуж̇ж̇ид̇ваа нааг̇аран̃н̃о бурад̇о од̇ари. нааг̇арааж̇аа алан̇гад̇абадияад̇д̇ам̣ рааж̇аанам̣ д̣̇исваа синзхам̣ уббаад̣̇зд̇ваа аасанаа удтааяа ‘‘маа бхааяи, махаарааж̇аа’’д̇и рааж̇аанам̣ ад̇д̇ано баллан̇гз нисийд̣̇аабзд̇ваа уд̣̇агз нимуг̇г̇агааран̣ам̣ бужчи. рааж̇аа яат̇аабхууд̇ам̣ гат̇зси. ат̇а нам̣ ‘‘маа бхааяи, махаарааж̇а, ахам̣ д̇ам̣ д̣̇виннам̣ радтаанам̣ саамигам̣ гариссаамий’’д̇и ассаасзд̇ваа сад̇д̇аахам̣ маханд̇ам̣ яасам̣ анубхавид̇ваа сад̇д̇амз д̣̇ивасз маг̇ад̇харааж̇зна сад̣̇д̇хим̣ нааг̇абхаванаа нигками. маг̇ад̇харааж̇аа нааг̇арааж̇ассаанубхаавзна ан̇г̇арааж̇аанам̣ г̇ахзд̇ваа ж̇ийвид̇аа воробзд̇ваа д̣̇вийсу радтзсу раж̇ж̇ам̣ гаарзси. д̇ад̇о бадтааяа ран̃н̃о жа нааг̇арааж̇асса жа виссаасо т̇иро ахоси. рааж̇аа анусам̣важчарам̣ жамбаанад̣̇ийд̇ийрз рад̇анаман̣д̣абам̣ гаарзд̇ваа маханд̇зна барижжааг̇зна нааг̇аран̃н̃о б̣алигаммам̣ гарод̇и. соби маханд̇зна бариваарзна нааг̇абхаванаа нигкамид̇ваа б̣алигаммам̣ самбадижчад̇и. махааж̇ано нааг̇аран̃н̃о самбад̇д̇им̣ ологзд̇и.
Atīte aṅgaraṭṭhe aṅge ca magadharaṭṭhe magadhe ca rajjaṃ kārente aṅgamagadharaṭṭhānaṃ antare campā nāma nadī, tattha nāgabhavanaṃ ahosi. Campeyyo nāma nāgarājā rajjaṃ kāresi. Kadāci magadharājā aṅgaraṭṭhaṃ gaṇhāti, kadāci aṅgarājā magadharaṭṭhaṃ. Athekadivasaṃ magadharājā aṅgena saddhiṃ yujjhitvā yuddhaparājito assaṃ āruyha palāyanto aṅgarañño yodhehi anubaddho puṇṇaṃ campānadiṃ patvā ‘‘parahatthe maraṇato nadiṃ pavisitvā mataṃ seyyo’’ti asseneva saddhiṃ nadiṃ otari. Tadā campeyyo nāgarājā antodake ratanamaṇḍapaṃ nimminitvā mahāparivāro mahāpānaṃ pivati. Asso raññā saddhiṃ udake nimujjitvā nāgarañño purato otari. Nāgarājā alaṅkatapaṭiyattaṃ rājānaṃ disvā sinehaṃ uppādetvā āsanā uṭṭhāya ‘‘mā bhāyi, mahārājā’’ti rājānaṃ attano pallaṅke nisīdāpetvā udake nimuggakāraṇaṃ pucchi. Rājā yathābhūtaṃ kathesi. Atha naṃ ‘‘mā bhāyi, mahārāja, ahaṃ taṃ dvinnaṃ raṭṭhānaṃ sāmikaṃ karissāmī’’ti assāsetvā sattāhaṃ mahantaṃ yasaṃ anubhavitvā sattame divase magadharājena saddhiṃ nāgabhavanā nikkhami. Magadharājā nāgarājassānubhāvena aṅgarājānaṃ gahetvā jīvitā voropetvā dvīsu raṭṭhesu rajjaṃ kāresi. Tato paṭṭhāya rañño ca nāgarājassa ca vissāso thiro ahosi. Rājā anusaṃvaccharaṃ campānadītīre ratanamaṇḍapaṃ kāretvā mahantena pariccāgena nāgarañño balikammaṃ karoti. Sopi mahantena parivārena nāgabhavanā nikkhamitvā balikammaṃ sampaṭicchati. Mahājano nāgarañño sampattiṃ oloketi.
д̇ад̣̇аа б̣од̇хисад̇д̇о д̣̇алид̣̇д̣̇агулз ниб̣б̣ад̇д̇о рааж̇абарисааяа сад̣̇д̇хим̣ над̣̇ийд̇ийрам̣ г̇анд̇ваа д̇ам̣ нааг̇арааж̇асса самбад̇д̇им̣ д̣̇исваа лобхам̣ уббаад̣̇зд̇ваа д̇ам̣ бад̇т̇аяамаано д̣̇аанам̣ д̣̇ад̇ваа сийлам̣ рагкид̇ваа жамбзяяанааг̇арааж̇асса гаалагирияад̇о сад̇д̇амз д̣̇ивасз жавид̇ваа д̇асса васанабаасаад̣̇з сириг̇аб̣бхз сирисаяанабидтз ниб̣б̣ад̇д̇и . сарийрам̣ суманад̣̇аамаван̣н̣ам̣ маханд̇ам̣ ахоси. со д̇ам̣ д̣̇исваа виббадисаарий худ̇ваа ‘‘маяаа гад̇агусаланиссанд̣̇зна часу гаамасаг̇г̇зсу иссарияам̣ годтз бадисаамид̇ам̣ д̇хан̃н̃ам̣ вияа ахоси. сваахам̣ имиссаа д̇иражчаанаяонияаа бадисанд̇хим̣ г̇ан̣хим̣, гим̣ мз ж̇ийвид̇знаа’’д̇и маран̣ааяа жид̇д̇ам̣ уббаад̣̇зси. ат̇а нам̣ суманаа наама нааг̇амаан̣авигаа д̣̇исваа ‘‘махаанубхааво сад̇д̇о ниб̣б̣ад̇д̇о бхависсад̇ий’’д̇и сзсанааг̇амаан̣авигаанам̣ сан̃н̃ам̣ ад̣̇ааси, саб̣б̣аа наанаад̇уурияахад̇т̇аа ааг̇анд̇ваа д̇асса убахаарам̣ гарим̣су. д̇асса д̇ам̣ нааг̇абхаванам̣ саггабхаванам̣ вияа ахоси, маран̣ажид̇д̇ам̣ бадиббассамбхи, саббасарийрам̣ виж̇ахид̇ваа саб̣б̣аалан̇гаарабадиман̣д̣ид̇о саяанабидтз нисийд̣̇и. ат̇асса д̇ад̇о бадтааяа яасо махаа ахоси.
Tadā bodhisatto daliddakule nibbatto rājaparisāya saddhiṃ nadītīraṃ gantvā taṃ nāgarājassa sampattiṃ disvā lobhaṃ uppādetvā taṃ patthayamāno dānaṃ datvā sīlaṃ rakkhitvā campeyyanāgarājassa kālakiriyato sattame divase cavitvā tassa vasanapāsāde sirigabbhe sirisayanapiṭṭhe nibbatti . Sarīraṃ sumanadāmavaṇṇaṃ mahantaṃ ahosi. So taṃ disvā vippaṭisārī hutvā ‘‘mayā katakusalanissandena chasu kāmasaggesu issariyaṃ koṭṭhe paṭisāmitaṃ dhaññaṃ viya ahosi. Svāhaṃ imissā tiracchānayoniyā paṭisandhiṃ gaṇhiṃ, kiṃ me jīvitenā’’ti maraṇāya cittaṃ uppādesi. Atha naṃ sumanā nāma nāgamāṇavikā disvā ‘‘mahānubhāvo satto nibbatto bhavissatī’’ti sesanāgamāṇavikānaṃ saññaṃ adāsi, sabbā nānātūriyahatthā āgantvā tassa upahāraṃ kariṃsu. Tassa taṃ nāgabhavanaṃ sakkabhavanaṃ viya ahosi, maraṇacittaṃ paṭippassambhi, sappasarīraṃ vijahitvā sabbālaṅkārapaṭimaṇḍito sayanapiṭṭhe nisīdi. Athassa tato paṭṭhāya yaso mahā ahosi.
со д̇ад̇т̇а нааг̇араж̇ж̇ам̣ гаарзнд̇о абарабхааг̇з виббадисаарий худ̇ваа ‘‘гим̣ мз имааяа д̇иражчаанаяонияаа , убосат̇аваасам̣ васид̇ваа ид̇о мужжид̇ваа мануссабат̇ам̣ г̇анд̇ваа сажжаани бадивиж̇жхид̇ваа д̣̇угкассанд̇ам̣ гариссаамий’’д̇и жинд̇зд̇ваа д̇ад̇о бадтааяа д̇асмим̣язва баасаад̣̇з убосат̇агаммам̣ гарод̇и. алан̇гад̇анааг̇амаан̣авигаа д̇асса санд̇игам̣ г̇ажчанд̇и, язбхуяязнасса сийлам̣ бхиж̇ж̇ад̇и. со д̇ад̇о бадтааяа баасаад̣̇аа нигкамид̇ваа уяяаанам̣ г̇ажчад̇и. д̇аа д̇ад̇рааби г̇ажчанд̇и, убосат̇о бхиж̇ж̇ад̇зва. со жинд̇зси ‘‘маяаа ид̇о нааг̇абхаванаа нигкамид̇ваа мануссалогам̣ г̇анд̇ваа убосат̇аваасам̣ васид̇ум̣ ваддад̇ий’’д̇и. со д̇ад̇о бадтааяа убосат̇ад̣̇ивасзсу нааг̇абхаванаа нигкамид̇ваа згасса бажжанд̇аг̇аамасса авид̣̇уурз махаамаг̇г̇асамийбз ваммигамад̇т̇агз ‘‘мама жаммаад̣̇ийхи ад̇т̇игаа г̇ан̣ханд̇у, мам̣ гийл̣аасаббам̣ ваа гаад̇угаамаа гаронд̇уу’’д̇и сарийрам̣ д̣̇аанамукз виссаж̇ж̇зд̇ваа бхог̇з аабхуж̇ид̇ваа нибанно убосат̇аваасам̣ васад̇и. махаамаг̇г̇зна г̇ажчанд̇аа жа ааг̇ажчанд̇аа жа д̇ам̣ д̣̇исваа г̇анд̇хаад̣̇ийхи бууж̇зд̇ваа баггаманд̇и. бажжанд̇аг̇аамаваасино г̇анд̇ваа ‘‘махаанубхааво нааг̇арааж̇аа’’д̇и д̇асса убари ман̣д̣абам̣ гарид̇ваа саманд̇аа ваалугам̣ огирид̇ваа г̇анд̇хаад̣̇ийхи бууж̇аяим̣су. д̇ад̇о бадтааяа мануссаа махаасад̇д̇з басийд̣̇ид̇ваа бууж̇ам̣ гад̇ваа буд̇д̇ам̣ бад̇т̇знд̇и, д̇хийд̇арам̣ бад̇т̇знд̇и.
So tattha nāgarajjaṃ kārento aparabhāge vippaṭisārī hutvā ‘‘kiṃ me imāya tiracchānayoniyā , uposathavāsaṃ vasitvā ito muccitvā manussapathaṃ gantvā saccāni paṭivijjhitvā dukkhassantaṃ karissāmī’’ti cintetvā tato paṭṭhāya tasmiṃyeva pāsāde uposathakammaṃ karoti. Alaṅkatanāgamāṇavikā tassa santikaṃ gacchanti, yebhuyyenassa sīlaṃ bhijjati. So tato paṭṭhāya pāsādā nikkhamitvā uyyānaṃ gacchati. Tā tatrāpi gacchanti, uposatho bhijjateva. So cintesi ‘‘mayā ito nāgabhavanā nikkhamitvā manussalokaṃ gantvā uposathavāsaṃ vasituṃ vaṭṭatī’’ti. So tato paṭṭhāya uposathadivasesu nāgabhavanā nikkhamitvā ekassa paccantagāmassa avidūre mahāmaggasamīpe vammikamatthake ‘‘mama cammādīhi atthikā gaṇhantu, maṃ kīḷāsappaṃ vā kātukāmā karontū’’ti sarīraṃ dānamukhe vissajjetvā bhoge ābhujitvā nipanno uposathavāsaṃ vasati. Mahāmaggena gacchantā ca āgacchantā ca taṃ disvā gandhādīhi pūjetvā pakkamanti. Paccantagāmavāsino gantvā ‘‘mahānubhāvo nāgarājā’’ti tassa upari maṇḍapaṃ karitvā samantā vālukaṃ okiritvā gandhādīhi pūjayiṃsu. Tato paṭṭhāya manussā mahāsatte pasīditvā pūjaṃ katvā puttaṃ patthenti, dhītaraṃ patthenti.
махаасад̇д̇оби убосат̇агаммам̣ гаронд̇о жаад̇уд̣̇д̣̇асийбаннарасийсу ваммигамад̇т̇агз нибаж̇ж̇ид̇ваа баадибад̣̇з нааг̇абхаванам̣ г̇ажчад̇и. д̇ассзвам̣ убосат̇ам̣ гаронд̇асса ад̣̇д̇хаа вийд̇ивад̇д̇о. згад̣̇ивасам̣ суманаа аг̇г̇амахзсий ааха ‘‘д̣̇зва , д̇вам̣ мануссалогам̣ г̇анд̇ваа убосат̇ам̣ убавасаси, мануссалого жа саасан̇го саббадибхаяо, сажз д̇з бхаяам̣ уббаж̇ж̇зяяа, ат̇а маяам̣ язна нимид̇д̇зна ж̇аанзяяаама, д̇ам̣ но аажигкаахий’’д̇и. ат̇а нам̣ махаасад̇д̇о ман̇г̇алабогкаран̣ияаа д̇ийрам̣ нзд̇ваа ‘‘сажз мам̣ бхад̣̇д̣̇з, гожи бахарид̇ваа гиламзссад̇и, имиссаа богкаран̣ияаа уд̣̇агам̣ аавилам̣ бхависсад̇и, сажз субан̣н̣о г̇ахзссад̇и, уд̣̇агам̣ баггут̇иссад̇и, сажз ахид̇ун̣д̣иго г̇ан̣хиссад̇и, уд̣̇агам̣ лохид̇аван̣н̣ам̣ бхависсад̇ий’’д̇и ааха. звам̣ д̇ассаа д̇ийн̣и нимид̇д̇аани аажигкид̇ваа жаад̇уд̣̇д̣̇асийубосат̇ам̣ ад̇хидтааяа нааг̇абхаванаа нигкамид̇ваа д̇ад̇т̇а г̇анд̇ваа ваммигамад̇т̇агз нибаж̇ж̇и сарийрасобхааяа ваммигам̣ собхаяамаано. сарийран̃хисса раж̇ад̇ад̣̇аамам̣ вияа сзд̇ам̣ ахоси мад̇т̇аго рад̇д̇агамб̣алаг̇зн̣д̣уго вияа. имасмим̣ бана ж̇аад̇агз б̣од̇хисад̇д̇асса сарийрам̣ нан̇г̇аласийсабамаан̣ам̣ ахоси, бхуурид̣̇ад̇д̇аж̇аад̇агз (ж̇аа. 2.22.784 аад̣̇аяо) ууруббамаан̣ам̣, сан̇кабаалаж̇аад̇агз (ж̇аа. 2.17.143 аад̣̇аяо) згад̣̇он̣иганаавабамаан̣ам̣.
Mahāsattopi uposathakammaṃ karonto cātuddasīpannarasīsu vammikamatthake nipajjitvā pāṭipade nāgabhavanaṃ gacchati. Tassevaṃ uposathaṃ karontassa addhā vītivatto. Ekadivasaṃ sumanā aggamahesī āha ‘‘deva , tvaṃ manussalokaṃ gantvā uposathaṃ upavasasi, manussaloko ca sāsaṅko sappaṭibhayo, sace te bhayaṃ uppajjeyya, atha mayaṃ yena nimittena jāneyyāma, taṃ no ācikkhāhī’’ti. Atha naṃ mahāsatto maṅgalapokkharaṇiyā tīraṃ netvā ‘‘sace maṃ bhadde, koci paharitvā kilamessati, imissā pokkharaṇiyā udakaṃ āvilaṃ bhavissati, sace supaṇṇo gahessati, udakaṃ pakkuthissati, sace ahituṇḍiko gaṇhissati, udakaṃ lohitavaṇṇaṃ bhavissatī’’ti āha. Evaṃ tassā tīṇi nimittāni ācikkhitvā cātuddasīuposathaṃ adhiṭṭhāya nāgabhavanā nikkhamitvā tattha gantvā vammikamatthake nipajji sarīrasobhāya vammikaṃ sobhayamāno. Sarīrañhissa rajatadāmaṃ viya setaṃ ahosi matthako rattakambalageṇḍuko viya. Imasmiṃ pana jātake bodhisattassa sarīraṃ naṅgalasīsapamāṇaṃ ahosi, bhūridattajātake (jā. 2.22.784 ādayo) ūruppamāṇaṃ, saṅkhapālajātake (jā. 2.17.143 ādayo) ekadoṇikanāvapamāṇaṃ.
д̇ад̣̇аа зго б̣аараан̣асиваасий маан̣аво д̇аггасилам̣ г̇анд̇ваа д̣̇исаабаамогкасса аажарияасса санд̇игз аламбааяанаманд̇ам̣ уг̇г̇ан̣хид̇ваа д̇зна маг̇г̇зна ад̇д̇ано г̇зхам̣ г̇ажчанд̇о махаасад̇д̇ам̣ д̣̇исваа ‘‘имам̣ саббам̣ г̇ахзд̇ваа г̇ааманиг̇амарааж̇ад̇хаанийсу гийл̣аабзнд̇о д̇ханам̣ уббаад̣̇зссаамий’’д̇и жинд̇зд̇ваа д̣̇иб̣б̣осад̇хаани г̇ахзд̇ваа д̣̇иб̣б̣аманд̇ам̣ баривад̇д̇зд̇ваа д̇асса санд̇игам̣ аг̇амааси. д̣̇иб̣б̣аманд̇асуд̇агаалад̇о бадтааяа махаасад̇д̇асса ган̣н̣зсу аяасалаагабавзсанагаало вияа ж̇аад̇о, мад̇т̇аго сикарзна абхимад̇т̇ияамаано вияа ж̇аад̇о. со ‘‘го ну ко зсо’’д̇и бхог̇анд̇арад̇о сийсам̣ угкибид̇ваа ологзнд̇о ахид̇ун̣д̣игам̣ д̣̇исваа жинд̇зси ‘‘мама висам̣ маханд̇ам̣, сажаахам̣ гуж̇жхид̇ваа наасаваад̇ам̣ виссаж̇ж̇зссаами, зд̇асса сарийрам̣ бхасмамудти вияа виббагириссад̇и, ат̇а мз сийлам̣ кан̣д̣ам̣ бхависсад̇и, на д̣̇аани д̇ам̣ ологзссаамий’’д̇и. со агкийни ниммийлзд̇ваа сийсам̣ бхог̇анд̇арз табзси.
Tadā eko bārāṇasivāsī māṇavo takkasilaṃ gantvā disāpāmokkhassa ācariyassa santike alampāyanamantaṃ uggaṇhitvā tena maggena attano gehaṃ gacchanto mahāsattaṃ disvā ‘‘imaṃ sappaṃ gahetvā gāmanigamarājadhānīsu kīḷāpento dhanaṃ uppādessāmī’’ti cintetvā dibbosadhāni gahetvā dibbamantaṃ parivattetvā tassa santikaṃ agamāsi. Dibbamantasutakālato paṭṭhāya mahāsattassa kaṇṇesu ayasalākapavesanakālo viya jāto, matthako sikharena abhimatthiyamāno viya jāto. So ‘‘ko nu kho eso’’ti bhogantarato sīsaṃ ukkhipitvā olokento ahituṇḍikaṃ disvā cintesi ‘‘mama visaṃ mahantaṃ, sacāhaṃ kujjhitvā nāsavātaṃ vissajjessāmi, etassa sarīraṃ bhasmamuṭṭhi viya vippakirissati, atha me sīlaṃ khaṇḍaṃ bhavissati, na dāni taṃ olokessāmī’’ti. So akkhīni nimmīletvā sīsaṃ bhogantare ṭhapesi.
ахид̇ун̣д̣иго б̣раахман̣о осад̇хам̣ каад̣̇ид̇ваа манд̇ам̣ баривад̇д̇зд̇ваа кзл̣ам̣ махаасад̇д̇асса сарийрз оби, осад̇хаанан̃жа манд̇асса жаанубхаавзна кзл̣зна пудтапудтадтаанз подаанам̣ удтаанагаало вияа ж̇аад̇о. ат̇а нам̣ со нан̇г̇удтз г̇ахзд̇ваа гад̣дхид̇ваа д̣̇ийгхасо нибаж̇ж̇аабзд̇ваа аж̇абад̣̇зна д̣̇ан̣д̣зна уббийл̣знд̇о д̣̇уб̣б̣алам̣ гад̇ваа сийсам̣ д̣̇ал̣хам̣ г̇ахзд̇ваа ниббийл̣и, махаасад̇д̇асса мукам̣ вивари. ат̇асса мукз кзл̣ам̣ обид̇ваа осад̇хаманд̇ам̣ гад̇ваа д̣̇анд̇з бхинд̣̇и, мукам̣ лохид̇асса буури. махаасад̇д̇о ад̇д̇ано сийлабхзд̣̇абхаязна зваруубам̣ д̣̇угкам̣ ад̇хиваасзнд̇о агкийни уммийлзд̇ваа ологанамад̇д̇амби наагари. соби ‘‘нааг̇арааж̇аанам̣ д̣̇уб̣б̣алам̣ гариссаамий’’д̇и нан̇г̇удтад̇о бадтааяасса адтийни жун̣н̣аяамаано вияа сагаласарийрам̣ мад̣̇д̣̇ид̇ваа баддагавзтанам̣ наама взтзси, д̇анд̇амаж̇ж̇ид̇ам̣ наама маж̇ж̇и, нан̇г̇удтам̣ г̇ахзд̇ваа д̣̇уссабот̇имам̣ наама бот̇зси. махаасад̇д̇асса сагаласарийрам̣ лохид̇амагкид̇ам̣ ахоси. со махаавзд̣̇анам̣ ад̇хиваасзси.
Ahituṇḍiko brāhmaṇo osadhaṃ khāditvā mantaṃ parivattetvā kheḷaṃ mahāsattassa sarīre opi, osadhānañca mantassa cānubhāvena kheḷena phuṭṭhaphuṭṭhaṭṭhāne phoṭānaṃ uṭṭhānakālo viya jāto. Atha naṃ so naṅguṭṭhe gahetvā kaḍḍhitvā dīghaso nipajjāpetvā ajapadena daṇḍena uppīḷento dubbalaṃ katvā sīsaṃ daḷhaṃ gahetvā nippīḷi, mahāsattassa mukhaṃ vivari. Athassa mukhe kheḷaṃ opitvā osadhamantaṃ katvā dante bhindi, mukhaṃ lohitassa pūri. Mahāsatto attano sīlabhedabhayena evarūpaṃ dukkhaṃ adhivāsento akkhīni ummīletvā olokanamattampi nākari. Sopi ‘‘nāgarājānaṃ dubbalaṃ karissāmī’’ti naṅguṭṭhato paṭṭhāyassa aṭṭhīni cuṇṇayamāno viya sakalasarīraṃ madditvā paṭṭakaveṭhanaṃ nāma veṭhesi, tantamajjitaṃ nāma majji, naṅguṭṭhaṃ gahetvā dussapothimaṃ nāma pothesi. Mahāsattassa sakalasarīraṃ lohitamakkhitaṃ ahosi. So mahāvedanaṃ adhivāsesi.
ат̇асса д̣̇уб̣б̣алабхаавам̣ н̃ад̇ваа валлийхи бзл̣ам̣ гарид̇ваа д̇ад̇т̇а нам̣ багкибид̇ваа бажжанд̇аг̇аамам̣ нзд̇ваа махааж̇анамаж̇жхз гийл̣аабзси. нийлаад̣̇ийсу ван̣н̣зсу ваддажад̇урассаад̣̇ийсу сан̣таанзсу ан̣ум̣т̇уулаад̣̇ийсу бамаан̣зсу яам̣ яам̣ б̣раахман̣о ижчад̇и, махаасад̇д̇о д̇ам̣д̇ад̣̇зва гад̇ваа нажжад̇и, пан̣асад̇ам̣ пан̣асахассамби гарод̇иязва. махааж̇ано басийд̣̇ид̇ваа б̣ахум̣ д̇ханам̣ ад̣̇ааси. згад̣̇ивасамзва гахаабан̣асахассан̃жзва сахассаг̇гханагз жа баригкаарз лабхи. б̣раахман̣о аад̣̇ид̇ова сахассам̣ лабхид̇ваа ‘‘виссаж̇ж̇зссаамий’’д̇и жинд̇зси, д̇ам̣ бана д̇ханам̣ лабхид̇ваа ‘‘бажжанд̇аг̇аамзязва д̇аава мз зд̇д̇агам̣ д̇ханам̣ лад̣̇д̇хам̣, рааж̇арааж̇амахаамажжаанам̣ санд̇игз б̣ахум̣ д̇ханам̣ лабхиссаамий’’д̇и сагадан̃жа сукаяаанаган̃жа г̇ахзд̇ваа сагадз баригкаарз табзд̇ваа сукаяаанагз нисинно маханд̇зна бариваарзна махаасад̇д̇ам̣ г̇ааманиг̇амаад̣̇ийсу гийл̣аабзнд̇о ‘‘б̣аараан̣асияам̣ уг̇г̇асзнаран̃н̃о санд̇игз гийл̣аабзд̇ваа виссаж̇ж̇зссаамий’’д̇и аг̇амааси. со ман̣д̣уугз маарзд̇ваа нааг̇аран̃н̃о д̣̇зд̇и. нааг̇арааж̇аа ‘‘бунаббунам̣ зса мам̣ ниссааяа маарзссад̇ий’’д̇и на каад̣̇ад̇и. ат̇асса мад̇хулааж̇з ад̣̇ааси. махаасад̇д̇о ‘‘сажаахам̣ бхож̇анам̣ г̇ан̣хиссаами, анд̇обзл̣ааяа зва маран̣ам̣ бхависсад̇ий’’д̇и д̇зби на каад̣̇ад̇и. б̣раахман̣о маасамад̇д̇зна б̣аараан̣асим̣ бад̇ваа д̣̇ваараг̇аамзсу гийл̣аабзнд̇о б̣ахум̣ д̇ханам̣ лабхи.
Athassa dubbalabhāvaṃ ñatvā vallīhi peḷaṃ karitvā tattha naṃ pakkhipitvā paccantagāmaṃ netvā mahājanamajjhe kīḷāpesi. Nīlādīsu vaṇṇesu vaṭṭacaturassādīsu saṇṭhānesu aṇuṃthūlādīsu pamāṇesu yaṃ yaṃ brāhmaṇo icchati, mahāsatto taṃtadeva katvā naccati, phaṇasataṃ phaṇasahassampi karotiyeva. Mahājano pasīditvā bahuṃ dhanaṃ adāsi. Ekadivasameva kahāpaṇasahassañceva sahassagghanake ca parikkhāre labhi. Brāhmaṇo āditova sahassaṃ labhitvā ‘‘vissajjessāmī’’ti cintesi, taṃ pana dhanaṃ labhitvā ‘‘paccantagāmeyeva tāva me ettakaṃ dhanaṃ laddhaṃ, rājarājamahāmaccānaṃ santike bahuṃ dhanaṃ labhissāmī’’ti sakaṭañca sukhayānakañca gahetvā sakaṭe parikkhāre ṭhapetvā sukhayānake nisinno mahantena parivārena mahāsattaṃ gāmanigamādīsu kīḷāpento ‘‘bārāṇasiyaṃ uggasenarañño santike kīḷāpetvā vissajjessāmī’’ti agamāsi. So maṇḍūke māretvā nāgarañño deti. Nāgarājā ‘‘punappunaṃ esa maṃ nissāya māressatī’’ti na khādati. Athassa madhulāje adāsi. Mahāsatto ‘‘sacāhaṃ bhojanaṃ gaṇhissāmi, antopeḷāya eva maraṇaṃ bhavissatī’’ti tepi na khādati. Brāhmaṇo māsamattena bārāṇasiṃ patvā dvāragāmesu kīḷāpento bahuṃ dhanaṃ labhi.
рааж̇ааби нам̣ баггосаабзд̇ваа ‘‘амхаагам̣ гийл̣аабзхий’’д̇и ааха. ‘‘саад̇ху, д̣̇зва, свз баннарасз д̇умхаагам̣ гийл̣аабзссаамий’’д̇и. рааж̇аа ‘‘свз нааг̇арааж̇аа рааж̇ан̇г̇ан̣з нажжиссад̇и, махааж̇ано саннибад̇ид̇ваа бассад̇уу’’д̇и бхзрим̣ жараабзд̇ваа бунад̣̇ивасз рааж̇ан̇г̇ан̣ам̣ алан̇гаараабзд̇ваа б̣раахман̣ам̣ баггосаабзси. со рад̇анабзл̣ааяа махаасад̇д̇ам̣ нзд̇ваа вижид̇д̇ад̇т̇арз бзл̣ам̣ табзд̇ваа нисийд̣̇и. рааж̇ааби баасаад̣̇аа оруяха махааж̇анабаривуд̇о рааж̇аасанз нисийд̣̇и. б̣раахман̣о махаасад̇д̇ам̣ нийхарид̇ваа нажжаабзси. махааж̇ано сагабхаавзна сан̣таад̇ум̣ асаггонд̇о жзлугкзбасахассам̣ бавад̇д̇зд̇и. б̣од̇хисад̇д̇асса убари сад̇д̇арад̇анавассам̣ вассад̇и. д̇асса г̇ахид̇асса маасо самбуури. зд̇д̇агам̣ гаалам̣ нираахаарова ахоси. суманаа ‘‘ад̇ижирааяад̇и мз бияасаамиго, ид̣̇аанисса ид̇ха анааг̇ажчанд̇асса маасо самбун̣н̣о, гим̣ ну ко гааран̣а’’нд̇и г̇анд̇ваа богкаран̣им̣ ологзнд̇ий лохид̇аван̣н̣ам̣ уд̣̇агам̣ д̣̇исваа ‘‘ахид̇ун̣д̣игзна г̇ахид̇о бхависсад̇ий’’д̇и н̃ад̇ваа нааг̇абхаванаа нигкамид̇ваа ваммигасанд̇игам̣ г̇анд̇ваа махаасад̇д̇асса г̇ахид̇адтаанан̃жа гиламид̇адтаанан̃жа д̣̇исваа род̣̇ид̇ваа ганд̣̇ид̇ваа бажжанд̇аг̇аамам̣ г̇анд̇ваа бужчид̇ваа д̇ам̣ бавад̇д̇им̣ суд̇ваа б̣аараан̣асим̣ г̇анд̇ваа рааж̇ан̇г̇ан̣з барисамаж̇жхз аагаасз род̣̇амаанаа адтааси. махаасад̇д̇о нажжанд̇ова аагаасам̣ ологзд̇ваа д̇ам̣ д̣̇исваа лаж̇ж̇ид̇о бзл̣ам̣ бависид̇ваа нибаж̇ж̇и. рааж̇аа д̇асса бзл̣ам̣ бавидтагаалз ‘‘гим̣ ну ко гааран̣а’’нд̇и ид̇о жид̇о жа ологзнд̇о д̇ам̣ аагаасз тид̇ам̣ д̣̇исваа батамам̣ г̇аат̇амааха –
Rājāpi naṃ pakkosāpetvā ‘‘amhākaṃ kīḷāpehī’’ti āha. ‘‘Sādhu, deva, sve pannarase tumhākaṃ kīḷāpessāmī’’ti. Rājā ‘‘sve nāgarājā rājaṅgaṇe naccissati, mahājano sannipatitvā passatū’’ti bheriṃ carāpetvā punadivase rājaṅgaṇaṃ alaṅkārāpetvā brāhmaṇaṃ pakkosāpesi. So ratanapeḷāya mahāsattaṃ netvā vicittatthare peḷaṃ ṭhapetvā nisīdi. Rājāpi pāsādā oruyha mahājanaparivuto rājāsane nisīdi. Brāhmaṇo mahāsattaṃ nīharitvā naccāpesi. Mahājano sakabhāvena saṇṭhātuṃ asakkonto celukkhepasahassaṃ pavatteti. Bodhisattassa upari sattaratanavassaṃ vassati. Tassa gahitassa māso sampūri. Ettakaṃ kālaṃ nirāhārova ahosi. Sumanā ‘‘aticirāyati me piyasāmiko, idānissa idha anāgacchantassa māso sampuṇṇo, kiṃ nu kho kāraṇa’’nti gantvā pokkharaṇiṃ olokentī lohitavaṇṇaṃ udakaṃ disvā ‘‘ahituṇḍikena gahito bhavissatī’’ti ñatvā nāgabhavanā nikkhamitvā vammikasantikaṃ gantvā mahāsattassa gahitaṭṭhānañca kilamitaṭṭhānañca disvā roditvā kanditvā paccantagāmaṃ gantvā pucchitvā taṃ pavattiṃ sutvā bārāṇasiṃ gantvā rājaṅgaṇe parisamajjhe ākāse rodamānā aṭṭhāsi. Mahāsatto naccantova ākāsaṃ oloketvā taṃ disvā lajjito peḷaṃ pavisitvā nipajji. Rājā tassa peḷaṃ paviṭṭhakāle ‘‘kiṃ nu kho kāraṇa’’nti ito cito ca olokento taṃ ākāse ṭhitaṃ disvā paṭhamaṃ gāthamāha –
240.
240.
‘‘гаа ну виж̇ж̇уриваабхааси, осад̇хий вияа д̇аарагаа;
‘‘Kā nu vijjurivābhāsi, osadhī viya tārakā;
д̣̇звад̇аа нуси г̇анд̇хаб̣б̣ий, на д̇ам̣ ман̃н̃аамий маануси’’нд̇и.
Devatā nusi gandhabbī, na taṃ maññāmī mānusi’’nti.
д̇ад̇т̇а на д̇ам̣ ман̃н̃аами маанусинд̇и ахам̣ д̇ам̣ маанусийд̇и на ман̃н̃аами, д̇аяаа згааяа д̣̇звад̇ааяа г̇анд̇хаб̣б̣ияаа ваа бхавид̇ум̣ ваддад̇ийд̇и вад̣̇ад̇и.
Tattha na taṃ maññāmi mānusinti ahaṃ taṃ mānusīti na maññāmi, tayā ekāya devatāya gandhabbiyā vā bhavituṃ vaṭṭatīti vadati.
ид̣̇аани д̇зсам̣ важанабадиважанаг̇аат̇аа хонд̇и –
Idāni tesaṃ vacanapaṭivacanagāthā honti –
241.
241.
‘‘намхи д̣̇звий на г̇анд̇хаб̣б̣ий, на махаарааж̇а маанусий;
‘‘Namhi devī na gandhabbī, na mahārāja mānusī;
нааг̇аган̃н̃аасми бхад̣̇д̣̇анд̇з, ад̇т̇знамхи ид̇хааг̇ад̇аа.
Nāgakaññāsmi bhaddante, atthenamhi idhāgatā.
242.
242.
‘‘виб̣бханд̇ажид̇д̇аа губид̇инд̣̇рияааси, нзд̇д̇зхи д̇з ваариг̇ан̣аа саванд̇и;
‘‘Vibbhantacittā kupitindriyāsi, nettehi te vārigaṇā savanti;
гим̣ д̇з надтам̣ гим̣ бана бад̇т̇аяаанаа, ид̇хааг̇ад̇аа наари д̇ад̣̇ин̇гха б̣руухи.
Kiṃ te naṭṭhaṃ kiṃ pana patthayānā, idhāgatā nāri tadiṅgha brūhi.
243.
243.
‘‘яамуг̇г̇ад̇зж̇о ураг̇од̇и жааху, нааг̇од̇и нам̣ ааху ж̇анаа ж̇анинд̣̇а;
‘‘Yamuggatejo uragoti cāhu, nāgoti naṃ āhu janā janinda;
д̇амаг̇г̇ахий бурисо ж̇ийвигад̇т̇о, д̇ам̣ б̣анд̇ханаа мун̃жа бад̇ий мамзсо.
Tamaggahī puriso jīvikattho, taṃ bandhanā muñca patī mameso.
244.
244.
‘‘гат̇ам̣ нваяам̣ б̣алавирияуубабанно, хад̇т̇ад̇д̇амааг̇ажчи ваниб̣б̣агасса;
‘‘Kathaṃ nvayaṃ balaviriyūpapanno, hatthattamāgacchi vanibbakassa;
агкаахи мз нааг̇аган̃н̃з д̇амад̇т̇ам̣, гат̇ам̣ виж̇аанзму г̇ахийд̇анааг̇ам̣.
Akkhāhi me nāgakaññe tamatthaṃ, kathaṃ vijānemu gahītanāgaṃ.
245.
245.
‘‘наг̇арамби нааг̇о бхасмам̣ гарзяяа, д̇ат̇аа хи со б̣алавирияуубабанно;
‘‘Nagarampi nāgo bhasmaṃ kareyya, tathā hi so balaviriyūpapanno;
д̇хамман̃жа нааг̇о абажааяамаано, д̇асмаа бараггамма д̇або гарод̇ий’’д̇и.
Dhammañca nāgo apacāyamāno, tasmā parakkamma tapo karotī’’ti.
д̇ад̇т̇а ад̇т̇знамхийд̇и ахам̣ згам̣ гааран̣ам̣ бадижжа ид̇хааг̇ад̇аа. губид̇инд̣̇рияаад̇и гиланд̇инд̣̇рияаа. ваариг̇ан̣аад̇и ассуб̣инд̣̇угхадаа. ураг̇од̇и жаахууд̇и ураг̇од̇и жааяам̣ махааж̇ано гат̇зси. д̇амаг̇г̇ахий бурисод̇и аяам̣ бурисо д̇ам̣ нааг̇арааж̇аанам̣ ж̇ийвигад̇т̇ааяа аг̇г̇ахзси. ваниб̣б̣агассаад̇и имасса ваниб̣б̣агасса гат̇ам̣ ну зса махаанубхааво самаано хад̇т̇ад̇д̇ам̣ ааг̇ад̇од̇и бужчад̇и. д̇хамман̃жаад̇и бан̃жасийлад̇хаммам̣ убосат̇аваасад̇хамман̃жа г̇арум̣ гаронд̇о вихарад̇и, д̇асмаа иминаа бурисзна г̇ахид̇оби ‘‘сажаахам̣ имасса убари наасаваад̇ам̣ виссаж̇ж̇зссаами, бхасмамудти вияа вигириссад̇и, звам̣ мз сийлам̣ бхиж̇ж̇иссад̇ий’’д̇и сийлабхзд̣̇абхаяаа бараггамма д̇ам̣ д̣̇угкам̣ ад̇хиваасзд̇ваа д̇або гарод̇и, вийрияамзва гарод̇ийд̇и ааха.
Tattha atthenamhīti ahaṃ ekaṃ kāraṇaṃ paṭicca idhāgatā. Kupitindriyāti kilantindriyā. Vārigaṇāti assubindughaṭā. Uragoti cāhūti uragoti cāyaṃ mahājano kathesi. Tamaggahī purisoti ayaṃ puriso taṃ nāgarājānaṃ jīvikatthāya aggahesi. Vanibbakassāti imassa vanibbakassa kathaṃ nu esa mahānubhāvo samāno hatthattaṃ āgatoti pucchati. Dhammañcāti pañcasīladhammaṃ uposathavāsadhammañca garuṃ karonto viharati, tasmā iminā purisena gahitopi ‘‘sacāhaṃ imassa upari nāsavātaṃ vissajjessāmi, bhasmamuṭṭhi viya vikirissati, evaṃ me sīlaṃ bhijjissatī’’ti sīlabhedabhayā parakkamma taṃ dukkhaṃ adhivāsetvā tapo karoti, vīriyameva karotīti āha.
рааж̇аа ‘‘гахам̣ банзсо иминаа г̇ахид̇о’’д̇и бужчи. ат̇асса саа аажигканд̇ий г̇аат̇амааха –
Rājā ‘‘kahaṃ paneso iminā gahito’’ti pucchi. Athassa sā ācikkhantī gāthamāha –
246.
246.
‘‘жаад̇уд̣̇д̣̇асим̣ бан̃жад̣̇асин̃жа рааж̇а, жад̇уббат̇з саммад̇и нааг̇арааж̇аа;
‘‘Cātuddasiṃ pañcadasiñca rāja, catuppathe sammati nāgarājā;
д̇амаг̇г̇ахий бурисо ж̇ийвигад̇т̇о, д̇ам̣ б̣анд̇ханаа мун̃жа бад̇ий мамзсо’’д̇и.
Tamaggahī puriso jīvikattho, taṃ bandhanā muñca patī mameso’’ti.
д̇ад̇т̇а жад̇уббат̇зд̇и жад̇уггамаг̇г̇асса аасаннадтаанз згасмим̣ ваммигз жад̇уран̇г̇асаманнааг̇ад̇ам̣ ад̇хидтаанам̣ ад̇хидтахид̇ваа убосат̇аваасам̣ васанд̇о нибаж̇ж̇ад̇ийд̇и ад̇т̇о. д̇ам̣ б̣анд̇ханаад̇и д̇ам̣ звам̣ д̇хаммигам̣ г̇ун̣аванд̇ам̣ нааг̇арааж̇аанам̣ зд̇асса д̇ханам̣ д̣̇ад̇ваа бзл̣аб̣анд̇ханаа бамун̃жа.
Tattha catuppatheti catukkamaggassa āsannaṭṭhāne ekasmiṃ vammike caturaṅgasamannāgataṃ adhiṭṭhānaṃ adhiṭṭhahitvā uposathavāsaṃ vasanto nipajjatīti attho. Taṃ bandhanāti taṃ evaṃ dhammikaṃ guṇavantaṃ nāgarājānaṃ etassa dhanaṃ datvā peḷabandhanā pamuñca.
зван̃жа бана вад̇ваа бунаби д̇ам̣ яаажанд̇ий д̣̇вз г̇аат̇аа абхааси –
Evañca pana vatvā punapi taṃ yācantī dve gāthā abhāsi –
247.
247.
‘‘сол̣асид̇т̇исахассаани, аамуд̇д̇аман̣игун̣д̣алаа;
‘‘Soḷasitthisahassāni, āmuttamaṇikuṇḍalā;
ваариг̇зхасаяаа наарий, д̇ааби д̇ам̣ саран̣ам̣ г̇ад̇аа.
Vārigehasayā nārī, tāpi taṃ saraṇaṃ gatā.
248.
248.
‘‘д̇хаммзна можзхи асаахасзна, г̇аамзна нигкзна г̇авам̣ сад̇зна;
‘‘Dhammena mocehi asāhasena, gāmena nikkhena gavaṃ satena;
оссадтагааяо ураг̇о жараад̇у, бун̃н̃ад̇т̇иго мун̃жад̇у б̣анд̇ханасмаа’’д̇и.
Ossaṭṭhakāyo urago carātu, puññatthiko muñcatu bandhanasmā’’ti.
д̇ад̇т̇а сол̣асид̇т̇исахассаанийд̇и маа д̇вам̣ зса яо ваа со ваа д̣̇алид̣̇д̣̇анааг̇од̇и ман̃н̃ид̇т̇а. зд̇асса хи зд̇д̇агаа саб̣б̣аалан̇гаарабадиман̣д̣ид̇аа ид̇т̇ияова, сзсаа самбад̇д̇и абаримаан̣аад̇и д̣̇ассзд̇и. ваариг̇зхасаяаад̇и уд̣̇агажчад̣̇анам̣ уд̣̇агаг̇аб̣бхам̣ гад̇ваа д̇ад̇т̇а саяанасийлаа. оссадтагааяод̇и ниссадтагааяо худ̇ваа. жараад̇ууд̇и жарад̇у.
Tattha soḷasitthisahassānīti mā tvaṃ esa yo vā so vā daliddanāgoti maññittha. Etassa hi ettakā sabbālaṅkārapaṭimaṇḍitā itthiyova, sesā sampatti aparimāṇāti dasseti. Vārigehasayāti udakacchadanaṃ udakagabbhaṃ katvā tattha sayanasīlā. Ossaṭṭhakāyoti nissaṭṭhakāyo hutvā. Carātūti caratu.
ат̇а нам̣ рааж̇аа д̇иссо г̇аат̇аа абхааси –
Atha naṃ rājā tisso gāthā abhāsi –
249.
249.
‘‘д̇хаммзна можзми асаахасзна, г̇аамзна нигкзна г̇авам̣ сад̇зна;
‘‘Dhammena mocemi asāhasena, gāmena nikkhena gavaṃ satena;
оссадтагааяо ураг̇о жараад̇у, бун̃н̃ад̇т̇иго мун̃жад̇у б̣анд̇ханасмаа.
Ossaṭṭhakāyo urago carātu, puññatthiko muñcatu bandhanasmā.
250.
250.
‘‘д̣̇амми нигкасад̇ам̣ луд̣̇д̣̇а, т̇уулан̃жа ман̣игун̣д̣алам̣;
‘‘Dammi nikkhasataṃ ludda, thūlañca maṇikuṇḍalaṃ;
жад̇уссад̣̇ан̃жа баллан̇гам̣, умаабубпасариннибхам̣.
Catussadañca pallaṅkaṃ, umāpupphasarinnibhaṃ.
251.
251.
‘‘д̣̇вз жа саад̣̇исияо бхарияаа, усабхан̃жа г̇авам̣ сад̇ам̣;
‘‘Dve ca sādisiyo bhariyā, usabhañca gavaṃ sataṃ;
оссадтагааяо ураг̇о жараад̇у, бун̃н̃ад̇т̇иго мун̃жад̇у б̣анд̇ханасмаа’’д̇и.
Ossaṭṭhakāyo urago carātu, puññatthiko muñcatu bandhanasmā’’ti.
д̇ад̇т̇а луд̣̇д̣̇аад̇и рааж̇аа ураг̇ам̣ можзд̇ум̣ ахид̇ун̣д̣игам̣ ааманд̇зд̇ваа д̇асса д̣̇аад̇аб̣б̣ам̣ д̣̇зяяад̇хаммам̣ д̣̇ассзнд̇о звамааха. г̇аат̇аа бана хздтаа вуд̇д̇ад̇т̇ааязва.
Tattha luddāti rājā uragaṃ mocetuṃ ahituṇḍikaṃ āmantetvā tassa dātabbaṃ deyyadhammaṃ dassento evamāha. Gāthā pana heṭṭhā vuttatthāyeva.
ат̇а нам̣ луд̣̇д̣̇о ааха –
Atha naṃ luddo āha –
252.
252.
‘‘винааби д̣̇аанаа д̇ава важанам̣ ж̇анинд̣̇а, мун̃жзму нам̣ ураг̇ам̣ б̣анд̇ханасмаа;
‘‘Vināpi dānā tava vacanaṃ janinda, muñcemu naṃ uragaṃ bandhanasmā;
оссадтагааяо ураг̇о жараад̇у, бун̃н̃ад̇т̇иго мун̃жад̇у б̣анд̇ханасмаа’’д̇и.
Ossaṭṭhakāyo urago carātu, puññatthiko muñcatu bandhanasmā’’ti.
д̇ад̇т̇а д̇ава важананд̇и махаарааж̇а, винааби д̣̇аанзна д̇ава важанамзва амхаагам̣ г̇ару. мун̃жзму нанд̇и мун̃жиссаами зд̇анд̇и вад̣̇ад̇и.
Tattha tava vacananti mahārāja, vināpi dānena tava vacanameva amhākaṃ garu. Muñcemu nanti muñcissāmi etanti vadati.
зван̃жа бана вад̇ваа махаасад̇д̇ам̣ бзл̣ад̇о нийхари. нааг̇арааж̇аа нигкамид̇ваа бубпанд̇арам̣ бависид̇ваа д̇ам̣ ад̇д̇абхаавам̣ виж̇ахид̇ваа маан̣авагаван̣н̣зна алан̇гад̇асарийро худ̇ваа бат̇авим̣ бхинд̣̇анд̇о вияа нигканд̇о адтааси. суманаа аагаасад̇о од̇арид̇ваа д̇асса санд̇игз тид̇аа. нааг̇арааж̇аа ан̃ж̇алим̣ баг̇г̇аяха рааж̇аанам̣ намассамаано адтааси. д̇амад̇т̇ам̣ багаасзнд̇о сад̇т̇аа д̣̇вз г̇аат̇аа абхааси –
Evañca pana vatvā mahāsattaṃ peḷato nīhari. Nāgarājā nikkhamitvā pupphantaraṃ pavisitvā taṃ attabhāvaṃ vijahitvā māṇavakavaṇṇena alaṅkatasarīro hutvā pathaviṃ bhindanto viya nikkhanto aṭṭhāsi. Sumanā ākāsato otaritvā tassa santike ṭhitā. Nāgarājā añjaliṃ paggayha rājānaṃ namassamāno aṭṭhāsi. Tamatthaṃ pakāsento satthā dve gāthā abhāsi –
253.
253.
‘‘муд̇д̇о жамбзяяаго нааг̇о, рааж̇аанам̣ зд̇ад̣̇аб̣рави;
‘‘Mutto campeyyako nāgo, rājānaṃ etadabravi;
намо д̇з гаасирааж̇ад̇т̇у, намо д̇з гаасивад̣дхана;
Namo te kāsirājatthu, namo te kāsivaḍḍhana;
ан̃ж̇алим̣ д̇з баг̇г̇ан̣хаами, бассзяяам̣ мз нивзсанам̣.
Añjaliṃ te paggaṇhāmi, passeyyaṃ me nivesanaṃ.
254.
254.
‘‘ад̣̇д̇хаа хи д̣̇уб̣б̣иссасамзд̇амааху, яам̣ маанусо виссасз амаанусамхи;
‘‘Addhā hi dubbissasametamāhu, yaṃ mānuso vissase amānusamhi;
сажз жа мам̣ яаажаси зд̇амад̇т̇ам̣, д̣̇агкзму д̇з нааг̇а нивзсанааний’’д̇и.
Sace ca maṃ yācasi etamatthaṃ, dakkhemu te nāga nivesanānī’’ti.
д̇ад̇т̇а бассзяяам̣ мз нивзсананд̇и мама нивзсанам̣ жамбзяяанааг̇абхаванам̣ раман̣ийяам̣ бассид̇аб̣б̣аяуд̇д̇агам̣. д̇ам̣ д̇з ахам̣ д̣̇ассзд̇угаамо, д̇ам̣ саб̣алаваахано д̇вам̣ ааг̇анд̇ваа басса, наринд̣̇аад̇и вад̣̇ад̇и. д̣̇уб̣б̣иссасанд̇и д̣̇увиссаасанийяам̣. сажз жаад̇и сажз мам̣ яаажаси, бассзяяаама д̇з нивзсанаани, аби жа ко бана д̇ам̣ на сад̣̇д̣̇ахаамийд̇и вад̣̇ад̇и.
Tattha passeyyaṃ me nivesananti mama nivesanaṃ campeyyanāgabhavanaṃ ramaṇīyaṃ passitabbayuttakaṃ. Taṃ te ahaṃ dassetukāmo, taṃ sabalavāhano tvaṃ āgantvā passa, narindāti vadati. Dubbissasanti duvissāsanīyaṃ. Sace cāti sace maṃ yācasi, passeyyāma te nivesanāni, api ca kho pana taṃ na saddahāmīti vadati.
ат̇а нам̣ сад̣̇д̣̇ахаабзд̇ум̣ сабат̇ам̣ гаронд̇о махаасад̇д̇о д̣̇вз г̇аат̇аа абхааси –
Atha naṃ saddahāpetuṃ sapathaṃ karonto mahāsatto dve gāthā abhāsi –
255.
255.
‘‘сажзби ваад̇о г̇иримаавахзяяа, жанд̣̇о жа сурияо жа чамаа бад̇зяяум̣;
‘‘Sacepi vāto girimāvaheyya, cando ca suriyo ca chamā pateyyuṃ;
саб̣б̣аа жа наж̇ж̇о бадисод̇ам̣ важ̇зяяум̣, на д̇взвахам̣ рааж̇а мусаа бхан̣зяяам̣.
Sabbā ca najjo paṭisotaṃ vajeyyuṃ, na tvevahaṃ rāja musā bhaṇeyyaṃ.
256.
256.
‘‘набхам̣ палзяяа уд̣̇ад̇хийби суссз, сам̣ваддаяз бхууд̇ад̇хараа васунд̇хараа;
‘‘Nabhaṃ phaleyya udadhīpi susse, saṃvaṭṭaye bhūtadharā vasundharā;
силужжаяо мзру самууламуббад̇з, на д̇взвахам̣ рааж̇а мусаа бхан̣зяяа’’нд̇и.
Siluccayo meru samūlamuppate, na tvevahaṃ rāja musā bhaṇeyya’’nti.
д̇ад̇т̇а сам̣ваддаяз бхууд̇ад̇хараа васунд̇хараад̇и аяам̣ бхууд̇ад̇хараад̇и жа васунд̇хараад̇и жа сан̇кам̣ г̇ад̇аа махаабат̇авий гилан̃ж̇ам̣ вияа сам̣ваддзяяа. самууламуббад̇зд̇и звам̣ махаасинзрубаб̣б̣ад̇о самууло удтааяа бураан̣абан̣н̣ам̣ вияа аагаасз багканд̣̇зяяа.
Tattha saṃvaṭṭaye bhūtadharā vasundharāti ayaṃ bhūtadharāti ca vasundharāti ca saṅkhaṃ gatā mahāpathavī kilañjaṃ viya saṃvaṭṭeyya. Samūlamuppateti evaṃ mahāsinerupabbato samūlo uṭṭhāya purāṇapaṇṇaṃ viya ākāse pakkhandeyya.
со махаасад̇д̇зна звам̣ вуд̇д̇зби асад̣̇д̣̇аханд̇о –
So mahāsattena evaṃ vuttepi asaddahanto –
257.
257.
‘‘ад̣̇д̇хаа хи д̣̇уб̣б̣иссасамзд̇амааху, яам̣ маанусо виссасз амаанусамхи;
‘‘Addhā hi dubbissasametamāhu, yaṃ mānuso vissase amānusamhi;
сажз жа мам̣ яаажаси зд̇амад̇т̇ам̣, д̣̇агкзму д̇з нааг̇а нивзсанааний’’д̇и. –
Sace ca maṃ yācasi etamatthaṃ, dakkhemu te nāga nivesanānī’’ti. –
бунаби д̇амзва г̇аат̇ам̣ вад̇ваа ‘‘д̇вам̣ маяаа гад̇аг̇ун̣ам̣ ж̇аанид̇ум̣ арахаси, сад̣̇д̣̇ахид̇ум̣ бана яуд̇д̇абхаавам̣ ваа аяуд̇д̇абхаавам̣ ваа ахам̣ ж̇ааниссаамий’’д̇и багаасзнд̇о ид̇арам̣ г̇аат̇амааха –
Punapi tameva gāthaṃ vatvā ‘‘tvaṃ mayā kataguṇaṃ jānituṃ arahasi, saddahituṃ pana yuttabhāvaṃ vā ayuttabhāvaṃ vā ahaṃ jānissāmī’’ti pakāsento itaraṃ gāthamāha –
258.
258.
‘‘д̇умхз код̇т̇а гхорависаа ул̣аараа, махаад̇зж̇аа киббагобий жа хот̇а;
‘‘Tumhe khottha ghoravisā uḷārā, mahātejā khippakopī ca hotha;
мам̣гааран̣аа б̣анд̇ханасмаа бамуд̇д̇о, арахаси но ж̇аанид̇уяз гад̇ааний’’д̇и.
Maṃkāraṇā bandhanasmā pamutto, arahasi no jānituye katānī’’ti.
д̇ад̇т̇а ул̣аараад̇и ул̣аарависаа. ж̇аанид̇уязд̇и ж̇аанид̇ум̣.
Tattha uḷārāti uḷāravisā. Jānituyeti jānituṃ.
ат̇а нам̣ сад̣̇д̣̇ахаабзд̇ум̣ буна сабат̇ам̣ гаронд̇о махаасад̇д̇о г̇аат̇амааха –
Atha naṃ saddahāpetuṃ puna sapathaṃ karonto mahāsatto gāthamāha –
259.
259.
‘‘со бажжад̇ам̣ нираяз гхораруубз, маа гааяигам̣ саад̇амалад̇т̇а гин̃жи;
‘‘So paccataṃ niraye ghorarūpe, mā kāyikaṃ sātamalattha kiñci;
бзл̣ааяа б̣ад̣̇д̇хо маран̣ам̣ убзд̇у, яо д̇аад̣̇исам̣ гаммагад̇ам̣ на ж̇аанз’’д̇и.
Peḷāya baddho maraṇaṃ upetu, yo tādisaṃ kammakataṃ na jāne’’ti.
д̇ад̇т̇а бажжад̇анд̇и бажжад̇у. гаммагад̇анд̇и гад̇агаммам̣ звам̣ г̇ун̣агаарагам̣ д̇умхаад̣̇исам̣ яо на ж̇аанаад̇и, со зваруубо ход̇ууд̇и вад̣̇ад̇и.
Tattha paccatanti paccatu. Kammakatanti katakammaṃ evaṃ guṇakārakaṃ tumhādisaṃ yo na jānāti, so evarūpo hotūti vadati.
ат̇асса рааж̇аа сад̣̇д̣̇ахид̇ваа т̇уд̇им̣ гаронд̇о г̇аат̇амааха –
Athassa rājā saddahitvā thutiṃ karonto gāthamāha –
260.
260.
‘‘сажжаббадин̃н̃аа д̇ава мзса ход̇у, аггод̇хано хохи анубанаахий;
‘‘Saccappaṭiññā tava mesa hotu, akkodhano hohi anupanāhī;
саб̣б̣ан̃жа д̇з нааг̇агулам̣ субан̣н̣аа, аг̇г̇им̣ва г̇имхзсу виваж̇ж̇аяанд̇уу’’д̇и.
Sabbañca te nāgakulaṃ supaṇṇā, aggiṃva gimhesu vivajjayantū’’ti.
д̇ад̇т̇а д̇ава мзса ход̇ууд̇и д̇ава зсаа бадин̃н̃аа сажжаа ход̇у. аг̇г̇им̣ва г̇имхзсу виваж̇ж̇аяанд̇ууд̇и яат̇аа мануссаа г̇имхагаалз санд̇аабам̣ анижчанд̇аа ж̇аламаанам̣ аг̇г̇им̣ виваж̇ж̇знд̇и, звам̣ виваж̇ж̇знд̇у д̣̇уурад̇ова барихаранд̇у.
Tattha tava mesa hotūti tava esā paṭiññā saccā hotu. Aggiṃva gimhesu vivajjayantūti yathā manussā gimhakāle santāpaṃ anicchantā jalamānaṃ aggiṃ vivajjenti, evaṃ vivajjentu dūratova pariharantu.
махаасад̇д̇оби ран̃н̃о т̇уд̇им̣ гаронд̇о ид̇арам̣ г̇аат̇амааха –
Mahāsattopi rañño thutiṃ karonto itaraṃ gāthamāha –
261.
261.
‘‘анугамбасий нааг̇агулам̣ ж̇анинд̣̇а, маад̇аа яат̇аа суббияам̣ згабуд̇д̇ам̣;
‘‘Anukampasī nāgakulaṃ janinda, mātā yathā suppiyaṃ ekaputtaṃ;
ахан̃жа д̇з нааг̇агулзна сад̣̇д̇хим̣, гаахаами взяяаавадигам̣ ул̣аара’’нд̇и.
Ahañca te nāgakulena saddhiṃ, kāhāmi veyyāvaṭikaṃ uḷāra’’nti.
д̇ам̣ суд̇ваа рааж̇аа нааг̇абхаванам̣ г̇анд̇угаамо сзнам̣ г̇аманасаж̇ж̇ам̣ гаад̇ум̣ аан̣аабзнд̇о г̇аат̇амааха –
Taṃ sutvā rājā nāgabhavanaṃ gantukāmo senaṃ gamanasajjaṃ kātuṃ āṇāpento gāthamāha –
262.
262.
‘‘яож̇знд̇у вз рааж̇арат̇з сужид̇д̇з, гамб̣ож̇агз ассад̇арз суд̣̇анд̇з;
‘‘Yojentu ve rājarathe sucitte, kambojake assatare sudante;
нааг̇з жа яож̇знд̇у суван̣н̣агаббанз, д̣̇агкзму нааг̇асса нивзсанааний’’д̇и.
Nāge ca yojentu suvaṇṇakappane, dakkhemu nāgassa nivesanānī’’ti.
д̇ад̇т̇а гамб̣ож̇агз ассад̇арз суд̣̇анд̇зд̇и сусигкид̇з гамб̣ож̇арадтасамбхавз ассад̇арз яож̇знд̇у.
Tattha kambojake assatare sudanteti susikkhite kambojaraṭṭhasambhave assatare yojentu.
ид̇араа абхисамб̣уд̣̇д̇хаг̇аат̇аа –
Itarā abhisambuddhagāthā –
263.
263.
‘‘бхзрий муд̣̇ин̇г̇аа бан̣аваа жа сан̇каа, аваж̇ж̇аяим̣су уг̇г̇асзнасса ран̃н̃о;
‘‘Bherī mudiṅgā paṇavā ca saṅkhā, avajjayiṃsu uggasenassa rañño;
бааяааси рааж̇аа б̣аху собхамаано, бурагкад̇о наариг̇ан̣асса маж̇жхз’’д̇и.
Pāyāsi rājā bahu sobhamāno, purakkhato nārigaṇassa majjhe’’ti.
д̇ад̇т̇а б̣аху собхамаанод̇и бхигкавз, б̣аараан̣асирааж̇аа сол̣асахи наарийсахассзхи бурагкад̇о бариваарид̇о д̇асса наарийг̇ан̣асса маж̇жхз б̣аараан̣асид̇о нааг̇абхаванам̣ г̇ажчанд̇о ад̇ивияа собхамаано бааяааси.
Tattha bahu sobhamānoti bhikkhave, bārāṇasirājā soḷasahi nārīsahassehi purakkhato parivārito tassa nārīgaṇassa majjhe bārāṇasito nāgabhavanaṃ gacchanto ativiya sobhamāno pāyāsi.
д̇асса наг̇араа нигканд̇агаалзязва махаасад̇д̇о ад̇д̇ано аанубхаавзна нааг̇абхаванам̣ саб̣б̣арад̇анамаяам̣ баагааран̃жа д̣̇ваараддаалагз жа д̣̇иссамаанаруубз гад̇ваа нааг̇абхаванаг̇аамим̣ маг̇г̇ам̣ алан̇гад̇абадияад̇д̇ам̣ маабзси . рааж̇аа сабарисо д̇зна маг̇г̇зна нааг̇абхаванам̣ бависид̇ваа раман̣ийяам̣ бхуумибхааг̇ан̃жа баасаад̣̇з жа ад̣̇д̣̇аса. д̇амад̇т̇ам̣ багаасзнд̇о сад̇т̇аа ааха –
Tassa nagarā nikkhantakāleyeva mahāsatto attano ānubhāvena nāgabhavanaṃ sabbaratanamayaṃ pākārañca dvāraṭṭālake ca dissamānarūpe katvā nāgabhavanagāmiṃ maggaṃ alaṅkatapaṭiyattaṃ māpesi . Rājā sapariso tena maggena nāgabhavanaṃ pavisitvā ramaṇīyaṃ bhūmibhāgañca pāsāde ca addasa. Tamatthaṃ pakāsento satthā āha –
264.
264.
‘‘суван̣н̣ажид̇агам̣ бхуумим̣, ад̣̇д̣̇агки гаасивад̣дхано;
‘‘Suvaṇṇacitakaṃ bhūmiṃ, addakkhi kāsivaḍḍhano;
сован̣н̣амаяабаасаад̣̇з, взл̣урияапалагад̇т̇ад̇з.
Sovaṇṇamayapāsāde, veḷuriyaphalakatthate.
265.
265.
‘‘са рааж̇аа баависи б̣яамхам̣, жамбзяяасса нивзсанам̣;
‘‘Sa rājā pāvisi byamhaṃ, campeyyassa nivesanaṃ;
аад̣̇ижжаван̣н̣асаннибхам̣, гам̣савиж̇ж̇убабхассарам̣.
Ādiccavaṇṇasannibhaṃ, kaṃsavijjupabhassaraṃ.
266.
266.
‘‘наанааругкзхи сан̃чаннам̣, наанааг̇анд̇хасамийрид̇ам̣;
‘‘Nānārukkhehi sañchannaṃ, nānāgandhasamīritaṃ;
со баавзгки гаасирааж̇аа, жамбзяяасса нивзсанам̣.
So pāvekkhi kāsirājā, campeyyassa nivesanaṃ.
267.
267.
‘‘бавидтасмим̣ гаасиран̃н̃з, жамбзяяасса нивзсанам̣;
‘‘Paviṭṭhasmiṃ kāsiraññe, campeyyassa nivesanaṃ;
д̣̇иб̣б̣аа д̇уурияаа баваж̇ж̇им̣су, нааг̇аган̃н̃аа жа нажжисум̣.
Dibbā tūriyā pavajjiṃsu, nāgakaññā ca naccisuṃ.
268.
268.
‘‘д̇ам̣ нааг̇аган̃н̃аа жарид̇ам̣ г̇ан̣зна, анваарухий гаасирааж̇аа басанно;
‘‘Taṃ nāgakaññā caritaṃ gaṇena, anvāruhī kāsirājā pasanno;
нисийд̣̇и сован̣н̣амаяамхи бийтз, саабассаяз жанд̣̇анасааралид̇д̇з’’д̇и.
Nisīdi sovaṇṇamayamhi pīṭhe, sāpassaye candanasāralitte’’ti.
д̇ад̇т̇а суван̣н̣ажид̇аганд̇и суван̣н̣аваалугааяа сант̇ад̇ам̣. б̣яамханд̇и алан̇гад̇анааг̇абхаванам̣. жамбзяяассаад̇и нааг̇абхаванам̣ бависид̇ваа жамбзяяанааг̇арааж̇асса нивзсанам̣ баависи. гам̣савиж̇ж̇убабхассаранд̇и мзгхамукз сан̃жаран̣асуван̣н̣авиж̇ж̇у вияа обхаасамаанам̣. наанааг̇анд̇хасамийрид̇анд̇и наанаавид̇хзхи д̣̇иб̣б̣аг̇анд̇хзхи анусан̃жарид̇ам̣. жарид̇ам̣ г̇ан̣знаад̇и д̇ам̣ нивзсанам̣ нааг̇аган̃н̃ааг̇ан̣зна жарид̇ам̣ анусан̃жарид̇ам̣. жанд̣̇анасааралид̇д̇зд̇и д̣̇иб̣б̣асааражанд̣̇анзна анулид̇д̇з.
Tattha suvaṇṇacitakanti suvaṇṇavālukāya santhataṃ. Byamhanti alaṅkatanāgabhavanaṃ. Campeyyassāti nāgabhavanaṃ pavisitvā campeyyanāgarājassa nivesanaṃ pāvisi. Kaṃsavijjupabhassaranti meghamukhe sañcaraṇasuvaṇṇavijju viya obhāsamānaṃ. Nānāgandhasamīritanti nānāvidhehi dibbagandhehi anusañcaritaṃ. Caritaṃ gaṇenāti taṃ nivesanaṃ nāgakaññāgaṇena caritaṃ anusañcaritaṃ. Candanasāralitteti dibbasāracandanena anulitte.
д̇ад̇т̇а нисиннамад̇д̇ассзвасса наанаг̇г̇арасам̣ д̣̇иб̣б̣абхож̇анам̣ убанаамзсум̣, д̇ат̇аа сол̣асаннам̣ ид̇т̇исахассаанам̣ сзсарааж̇абарисааяа жа. со сад̇д̇аахамад̇д̇ам̣ сабарисо д̣̇иб̣б̣аннабаанаад̣̇ийни барибхун̃ж̇ид̇ваа д̣̇иб̣б̣зхи гаамаг̇ун̣зхи абхирамид̇ваа сукасаяанз нисинно махаасад̇д̇асса яасам̣ ван̣н̣зд̇ваа ‘‘нааг̇арааж̇а, д̇вам̣ зваруубам̣ самбад̇д̇им̣ бахааяа мануссалогз ваммигамад̇т̇агз нибаж̇ж̇ид̇ваа гасмаа убосат̇аваасам̣ васий’’д̇и бужчи. собисса гат̇зси. д̇амад̇т̇ам̣ багаасзнд̇о сад̇т̇аа ааха –
Tattha nisinnamattassevassa nānaggarasaṃ dibbabhojanaṃ upanāmesuṃ, tathā soḷasannaṃ itthisahassānaṃ sesarājaparisāya ca. So sattāhamattaṃ sapariso dibbannapānādīni paribhuñjitvā dibbehi kāmaguṇehi abhiramitvā sukhasayane nisinno mahāsattassa yasaṃ vaṇṇetvā ‘‘nāgarāja, tvaṃ evarūpaṃ sampattiṃ pahāya manussaloke vammikamatthake nipajjitvā kasmā uposathavāsaṃ vasī’’ti pucchi. Sopissa kathesi. Tamatthaṃ pakāsento satthā āha –
269.
269.
‘‘со д̇ад̇т̇а бхуд̇ваа жа ат̇о рамид̇ваа, жамбзяяагам̣ гаасирааж̇аа авожа;
‘‘So tattha bhutvā ca atho ramitvā, campeyyakaṃ kāsirājā avoca;
вимаанасздтаани имаани д̇уяхам̣, аад̣̇ижжаван̣н̣аани бабхассараани;
Vimānaseṭṭhāni imāni tuyhaṃ, ādiccavaṇṇāni pabhassarāni;
нзд̇аад̣̇исам̣ ад̇т̇и мануссалогз, гим̣ бад̇т̇аяам̣ нааг̇а д̇або гароси.
Netādisaṃ atthi manussaloke, kiṃ patthayaṃ nāga tapo karosi.
270.
270.
‘‘д̇аа гамб̣угааяуурад̇хараа сувад̇т̇аа, ваддан̇г̇улий д̇амб̣ад̇алуубабаннаа;
‘‘Tā kambukāyūradharā suvatthā, vaṭṭaṅgulī tambatalūpapannā;
баг̇г̇аяха бааязнд̇и аномаван̣н̣аа, нзд̇аад̣̇исам̣ ад̇т̇и мануссалогз;
Paggayha pāyenti anomavaṇṇā, netādisaṃ atthi manussaloke;
гим̣ бад̇т̇аяам̣ нааг̇а д̇або гароси.
Kiṃ patthayaṃ nāga tapo karosi.
271.
271.
‘‘наж̇ж̇о жа д̇змаа бут̇уломамажчаа, аадаасагунд̇аабхируд̣̇аа суд̇ид̇т̇аа;
‘‘Najjo ca temā puthulomamacchā, āṭāsakuntābhirudā sutitthā;
нзд̇аад̣̇исам̣ ад̇т̇и мануссалогз, гим̣ бад̇т̇аяам̣ нааг̇а д̇або гароси.
Netādisaṃ atthi manussaloke, kiṃ patthayaṃ nāga tapo karosi.
272.
272.
‘‘гон̃жаа маяуураа д̣̇ивияаа жа хам̣саа, ваг̇г̇уссараа гогилаа самбад̇анд̇и;
‘‘Koñcā mayūrā diviyā ca haṃsā, vaggussarā kokilā sampatanti;
нзд̇аад̣̇исам̣ ад̇т̇и мануссалогз, гим̣ бад̇т̇аяам̣ нааг̇а д̇або гароси.
Netādisaṃ atthi manussaloke, kiṃ patthayaṃ nāga tapo karosi.
273.
273.
‘‘амб̣аа жа саалаа д̇илагаа жа ж̇амб̣уяо, уд̣̇д̣̇аалагаа баадалияо жа пуллаа;
‘‘Ambā ca sālā tilakā ca jambuyo, uddālakā pāṭaliyo ca phullā;
нзд̇аад̣̇исам̣ ад̇т̇и мануссалогз, гим̣ бад̇т̇аяам̣ нааг̇а д̇або гароси.
Netādisaṃ atthi manussaloke, kiṃ patthayaṃ nāga tapo karosi.
274.
274.
‘‘имаа жа д̇з богкаран̃н̃о саманд̇ад̇о, д̣̇иб̣б̣аа жа г̇анд̇хаа сад̇ад̇ам̣ бавааяанд̇и;
‘‘Imā ca te pokkharañño samantato, dibbā ca gandhā satataṃ pavāyanti;
нзд̇аад̣̇исам̣ ад̇т̇и мануссалогз, гим̣ бад̇т̇аяам̣ нааг̇а д̇або гароси.
Netādisaṃ atthi manussaloke, kiṃ patthayaṃ nāga tapo karosi.
275.
275.
‘‘на буд̇д̇ахзд̇у на д̇ханасса хзд̇у, на ааяуно жааби ж̇анинд̣̇а хзд̇у;
‘‘Na puttahetu na dhanassa hetu, na āyuno cāpi janinda hetu;
мануссаяоним̣ абхибад̇т̇аяаано, д̇асмаа бараггамма д̇або гаромий’’д̇и.
Manussayoniṃ abhipatthayāno, tasmā parakkamma tapo karomī’’ti.
д̇ад̇т̇а д̇аад̇и сол̣асасахассанааг̇аган̃н̃ааяо санд̇хааяааха. гамб̣угааяуурад̇хараад̇и суван̣н̣аабхаран̣ад̇хараа. ваддан̇г̇улийд̇и баваал̣ан̇гурасад̣̇исаваддан̇г̇улий. д̇амб̣ад̇алуубабаннаад̇и абхирад̇д̇зхи хад̇т̇абаад̣̇ад̇алзхи саманнааг̇ад̇аа. бааязнд̇ийд̇и д̣̇иб̣б̣абаанам̣ угкибид̇ваа д̇ам̣ бааязнд̇и. бут̇уломамажчаад̇и бут̇улабад̇д̇зхи наанаамажчзхи саманнааг̇ад̇аа. аадаасагунд̇аабхируд̣̇аад̇и аадаасан̇каад̇зхи сагун̣зхи абхируд̣̇аа. суд̇ид̇т̇аад̇и сунд̣̇арад̇ид̇т̇аа. д̣̇ивияаа жа хам̣саад̇и д̣̇иб̣б̣ахам̣саа жа. самбад̇анд̇ийд̇и манун̃н̃аравам̣ раванд̇аа ругкад̇о ругкам̣ самбад̇анд̇и. д̣̇иб̣б̣аа жа г̇анд̇хаад̇и д̇аасу богкаран̣ийсу сад̇ад̇ам̣ д̣̇иб̣б̣аг̇анд̇хаа вааяанд̇и. абхибад̇т̇аяаанод̇и бад̇т̇аяанд̇о вижараами. д̇асмаад̇и д̇зна гааран̣зна бараггамма вийрияам̣ баг̇г̇ахзд̇ваа д̇або гароми, убосат̇ам̣ убавасаамийд̇и.
Tattha tāti soḷasasahassanāgakaññāyo sandhāyāha. Kambukāyūradharāti suvaṇṇābharaṇadharā. Vaṭṭaṅgulīti pavāḷaṅkurasadisavaṭṭaṅgulī. Tambatalūpapannāti abhirattehi hatthapādatalehi samannāgatā. Pāyentīti dibbapānaṃ ukkhipitvā taṃ pāyenti. Puthulomamacchāti puthulapattehi nānāmacchehi samannāgatā. Āṭāsakuntābhirudāti āṭāsaṅkhātehi sakuṇehi abhirudā. Sutitthāti sundaratitthā. Diviyā ca haṃsāti dibbahaṃsā ca. Sampatantīti manuññaravaṃ ravantā rukkhato rukkhaṃ sampatanti. Dibbā ca gandhāti tāsu pokkharaṇīsu satataṃ dibbagandhā vāyanti. Abhipatthayānoti patthayanto vicarāmi. Tasmāti tena kāraṇena parakkamma vīriyaṃ paggahetvā tapo karomi, uposathaṃ upavasāmīti.
звам̣ вуд̇д̇з рааж̇аа ааха –
Evaṃ vutte rājā āha –
276.
276.
‘‘д̇вам̣ лохид̇агко вихад̇анд̇арам̣со, алан̇гад̇о габбид̇агзсамассу;
‘‘Tvaṃ lohitakkho vihatantaraṃso, alaṅkato kappitakesamassu;
суросид̇о лохид̇ажанд̣̇анзна, г̇анд̇хаб̣б̣арааж̇аава д̣̇исаа бабхаасаси.
Surosito lohitacandanena, gandhabbarājāva disā pabhāsasi.
277.
277.
‘‘д̣̇звид̣̇д̇хибад̇д̇оси махаанубхааво, саб̣б̣зхи гаамзхи саман̇г̇ибхууд̇о;
‘‘Deviddhipattosi mahānubhāvo, sabbehi kāmehi samaṅgibhūto;
бужчаами д̇ам̣ нааг̇арааж̇зд̇амад̇т̇ам̣, сзяяо ид̇о гзна мануссалого’’д̇и.
Pucchāmi taṃ nāgarājetamatthaṃ, seyyo ito kena manussaloko’’ti.
д̇ад̇т̇а суросид̇од̇и сувилид̇д̇о.
Tattha surositoti suvilitto.
ат̇асса аажигканд̇о нааг̇арааж̇аа ааха –
Athassa ācikkhanto nāgarājā āha –
278.
278.
‘‘ж̇анинд̣̇а наан̃н̃ад̇ра мануссалогаа, суд̣̇д̇хийва сам̣виж̇ж̇ад̇и сам̣яамо ваа;
‘‘Janinda nāññatra manussalokā, suddhīva saṃvijjati saṃyamo vā;
ахан̃жа лад̣̇д̇хаана мануссаяоним̣, гаахаами ж̇аад̇имаран̣асса анд̇а’’нд̇и.
Ahañca laddhāna manussayoniṃ, kāhāmi jātimaraṇassa anta’’nti.
д̇ад̇т̇а суд̣̇д̇хий ваад̇и махаарааж̇а, ан̃н̃ад̇ра мануссалогаа амад̇амахааниб̣б̣аанасан̇каад̇аа суд̣̇д̇хи ваа сийласам̣яамо ваа над̇т̇и. анд̇анд̇и мануссаяоним̣ лад̣̇д̇хаа ж̇аад̇имаран̣асса анд̇ам̣ гариссаамийд̇и д̇або гаромийд̇и.
Tattha suddhī vāti mahārāja, aññatra manussalokā amatamahānibbānasaṅkhātā suddhi vā sīlasaṃyamo vā natthi. Antanti manussayoniṃ laddhā jātimaraṇassa antaṃ karissāmīti tapo karomīti.
д̇ам̣ суд̇ваа рааж̇аа ааха –
Taṃ sutvā rājā āha –
279.
279.
‘‘ад̣̇д̇хаа хавз сзвид̇аб̣б̣аа сабан̃н̃аа, б̣ахуссуд̇аа яз б̣ахутаанажинд̇ино;
‘‘Addhā have sevitabbā sapaññā, bahussutā ye bahuṭhānacintino;
наарияо жа д̣̇исваана д̇уван̃жа нааг̇а, гаахаами бун̃н̃аани анаббагааний’’д̇и.
Nāriyo ca disvāna tuvañca nāga, kāhāmi puññāni anappakānī’’ti.
д̇ад̇т̇а наарияо жаад̇и имаа д̇ава нааг̇аган̃н̃ааяо жа д̇уван̃жа д̣̇исваа б̣ахууни бун̃н̃аани гариссаамийд̇и вад̣̇ад̇и.
Tattha nāriyo cāti imā tava nāgakaññāyo ca tuvañca disvā bahūni puññāni karissāmīti vadati.
ат̇а нам̣ нааг̇арааж̇аа ааха –
Atha naṃ nāgarājā āha –
280.
280.
‘‘ад̣̇д̇хаа хавз сзвид̇аб̣б̣аа сабан̃н̃аа, б̣ахуссуд̇аа яз б̣ахутаанажинд̇ино;
‘‘Addhā have sevitabbā sapaññā, bahussutā ye bahuṭhānacintino;
наарияо жа д̣̇исваана маман̃жа рааж̇а, гарохи бун̃н̃аани анаббагааний’’д̇и.
Nāriyo ca disvāna mamañca rāja, karohi puññāni anappakānī’’ti.
д̇ад̇т̇а гарохийд̇и гарзяяааси, махаарааж̇аад̇и.
Tattha karohīti kareyyāsi, mahārājāti.
звам̣ вуд̇д̇з уг̇г̇асзно г̇анд̇угаамо худ̇ваа ‘‘нааг̇арааж̇а, жирам̣ васимха, г̇амиссаамаа’’д̇и аабужчи. ат̇а нам̣ махаасад̇д̇о ‘‘д̇зна хи махаарааж̇а, яаавад̣̇ижчагам̣ д̇ханам̣ г̇ан̣хаахий’’д̇и д̇ханам̣ д̣̇ассзнд̇о ааха –
Evaṃ vutte uggaseno gantukāmo hutvā ‘‘nāgarāja, ciraṃ vasimha, gamissāmā’’ti āpucchi. Atha naṃ mahāsatto ‘‘tena hi mahārāja, yāvadicchakaṃ dhanaṃ gaṇhāhī’’ti dhanaṃ dassento āha –
281.
281.
‘‘ид̣̇ан̃жа мз ж̇аад̇аруубам̣ бахууд̇ам̣, раасий суван̣н̣асса жа д̇ааламад̇д̇аа;
‘‘Idañca me jātarūpaṃ pahūtaṃ, rāsī suvaṇṇassa ca tālamattā;
ид̇о харид̇ваана суван̣н̣агхараани, гарассу руубияабаагаарам̣ гаронд̇у.
Ito haritvāna suvaṇṇagharāni, karassu rūpiyapākāraṃ karontu.
282.
282.
‘‘муд̇д̇аа жа ваахасахассаани бан̃жа, взл̣урияамиссаани ид̇о харид̇ваа;
‘‘Muttā ca vāhasahassāni pañca, veḷuriyamissāni ito haritvā;
анд̇збурз бхуумияам̣ сант̇аранд̇у, ниггад̣̇д̣̇амаа хзхид̇и нийраж̇аа жа.
Antepure bhūmiyaṃ santharantu, nikkaddamā hehiti nīrajā ca.
283.
283.
‘‘зд̇аад̣̇исам̣ ааваса рааж̇асздта, вимаанасздтам̣ б̣аху собхамаанам̣;
‘‘Etādisaṃ āvasa rājaseṭṭha, vimānaseṭṭhaṃ bahu sobhamānaṃ;
б̣аараан̣асим̣ наг̇арам̣ ид̣̇д̇хам̣ пийд̇ам̣, раж̇ж̇ан̃жа гаарзхи аномабан̃н̃аа’’д̇и.
Bārāṇasiṃ nagaraṃ iddhaṃ phītaṃ, rajjañca kārehi anomapaññā’’ti.
д̇ад̇т̇а раасийд̇и д̇зсу д̇зсу таанзсу д̇аалабамаан̣аа раасияо. суван̣н̣агхараанийд̇и суван̣н̣аг̇зхаани. ниггад̣̇д̣̇амаад̇и звам̣ д̇з анд̇збурз бхууми ниггад̣̇д̣̇амаа жа нираж̇аа жа бхависсад̇и. зд̇аад̣̇исанд̇и зваруубам̣ суван̣н̣амаяам̣ раж̇ад̇абаагаарам̣ муд̇д̇аавзл̣урияасант̇ад̇абхуумибхааг̇ам̣. пийд̇анд̇и пийд̇ам̣ б̣аараан̣асинаг̇аран̃жа ааваса. аномабан̃н̃аад̇и алаамагабан̃н̃аа.
Tattha rāsīti tesu tesu ṭhānesu tālapamāṇā rāsiyo. Suvaṇṇagharānīti suvaṇṇagehāni. Nikkaddamāti evaṃ te antepure bhūmi nikkaddamā ca nirajā ca bhavissati. Etādisanti evarūpaṃ suvaṇṇamayaṃ rajatapākāraṃ muttāveḷuriyasanthatabhūmibhāgaṃ. Phītanti phītaṃ bārāṇasinagarañca āvasa. Anomapaññāti alāmakapaññā.
рааж̇аа д̇асса гат̇ам̣ суд̇ваа ад̇хиваасзси. ат̇а махаасад̇д̇о нааг̇абхаванз бхзрим̣ жараабзси ‘‘саб̣б̣аа рааж̇абарисаа яаавад̣̇ижчагам̣ хиран̃н̃асуван̣н̣аад̣̇игам̣ д̇ханам̣ г̇ан̣ханд̇уу’’д̇и. ран̃н̃о жа анзгзхи сагадасад̇зхи д̇ханам̣ бзсзси. рааж̇аа маханд̇зна яасзна нааг̇абхаванаа нигкамид̇ваа б̣аараан̣асимзва г̇ад̇о. д̇ад̇о бадтааяа гира ж̇амб̣уд̣̇ийбад̇алам̣ сахиран̃н̃ам̣ ж̇аад̇ам̣.
Rājā tassa kathaṃ sutvā adhivāsesi. Atha mahāsatto nāgabhavane bheriṃ carāpesi ‘‘sabbā rājaparisā yāvadicchakaṃ hiraññasuvaṇṇādikaṃ dhanaṃ gaṇhantū’’ti. Rañño ca anekehi sakaṭasatehi dhanaṃ pesesi. Rājā mahantena yasena nāgabhavanā nikkhamitvā bārāṇasimeva gato. Tato paṭṭhāya kira jambudīpatalaṃ sahiraññaṃ jātaṃ.
сад̇т̇аа имам̣ д̇хаммад̣̇зсанам̣ аахарид̇ваа ‘‘звам̣ бораан̣агабан̣д̣ид̇аа нааг̇асамбад̇д̇им̣ бахааяа убосат̇аваасам̣ васим̣суу’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа ахид̇ун̣д̣иго д̣̇звад̣̇ад̇д̇о ахоси, суманаа раахуламаад̇аа, уг̇г̇асзно саарибуд̇д̇о, жамбзяяанааг̇арааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā ‘‘evaṃ porāṇakapaṇḍitā nāgasampattiṃ pahāya uposathavāsaṃ vasiṃsū’’ti vatvā jātakaṃ samodhānesi – ‘‘tadā ahituṇḍiko devadatto ahosi, sumanā rāhulamātā, uggaseno sāriputto, campeyyanāgarājā pana ahameva ahosi’’nti.
жамбзяяаж̇аад̇агаван̣н̣анаа д̣̇асамаа.
Campeyyajātakavaṇṇanā dasamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 506. жамбзяяаж̇аад̇агам̣ • 506. Campeyyajātakaṃ
