| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೩. ಚನ್ದನಪೂಜನಕತ್ಥೇರಅಪದಾನವಣ್ಣನಾ
3. Candanapūjanakattheraapadānavaṇṇanā
ಚನ್ದಭಾಗಾನದೀತೀರೇತಿಆದಿಕಂ ಆಯಸ್ಮತೋ ಚನ್ದನಪೂಜನಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಅತ್ಥದಸ್ಸಿಸ್ಸ ಭಗವತೋ ಕಾಲೇ ಹಿಮವನ್ತೇ ಚನ್ದಭಾಗಾನದಿಯಾ ಸಮೀಪೇ ಕಿನ್ನರಯೋನಿಯಂ ನಿಬ್ಬತ್ತೋ ಪುಪ್ಫಭಕ್ಖೋ ಪುಪ್ಫನಿವಸನೋ ಚನ್ದನಅಗರುಆದೀಸು ಗನ್ಧವಿಭೂಸಿತೋ ಹಿಮವನ್ತೇ ಭುಮ್ಮದೇವತಾ ವಿಯ ಉಯ್ಯಾನಕೀಳಜಲಕೀಳಾದಿಅನೇಕಸುಖಂ ಅನುಭವನ್ತೋ ವಾಸಂ ಕಪ್ಪೇಸಿ। ತದಾ ಅತ್ಥದಸ್ಸೀ ಭಗವಾ ತಸ್ಸಾನುಕಮ್ಪಾಯ ಹಿಮವನ್ತಂ ಗನ್ತ್ವಾ ಆಕಾಸತೋ ಓರುಯ್ಹ ಸಙ್ಘಾಟಿಂ ಪಞ್ಞಾಪೇತ್ವಾ ನಿಸೀದಿ। ಸೋ ಕಿನ್ನರೋ ತಂ ಭಗವನ್ತಂ ವಿಜ್ಜೋತಮಾನಂ ತತ್ಥ ನಿಸಿನ್ನಂ ದಿಸ್ವಾ ಪಸನ್ನಮಾನಸೋ ಸುಗನ್ಧಚನ್ದನೇನ ಪೂಜೇಸಿ। ತಸ್ಸ ಭಗವಾ ಅನುಮೋದನಂ ಅಕಾಸಿ।
Candabhāgānadītīretiādikaṃ āyasmato candanapūjanakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavante candabhāgānadiyā samīpe kinnarayoniyaṃ nibbatto pupphabhakkho pupphanivasano candanaagaruādīsu gandhavibhūsito himavante bhummadevatā viya uyyānakīḷajalakīḷādianekasukhaṃ anubhavanto vāsaṃ kappesi. Tadā atthadassī bhagavā tassānukampāya himavantaṃ gantvā ākāsato oruyha saṅghāṭiṃ paññāpetvā nisīdi. So kinnaro taṃ bhagavantaṃ vijjotamānaṃ tattha nisinnaṃ disvā pasannamānaso sugandhacandanena pūjesi. Tassa bhagavā anumodanaṃ akāsi.
೧೭. ಸೋ ತೇನ ಪುಞ್ಞೇನ ತೇನ ಸೋಮನಸ್ಸೇನ ಯಾವತಾಯುಕಂ ಠತ್ವಾ ತತೋ ಚುತೋ ದೇವಲೋಕೇ ನಿಬ್ಬತ್ತೋ ಅಪರಾಪರಂ ಛ ಕಾಮಾವಚರಸಮ್ಪತ್ತಿಯೋ ಅನುಭವಿತ್ವಾ ಮನುಸ್ಸೇಸು ಚಕ್ಕವತ್ತಿರಜ್ಜಪದೇಸರಜ್ಜಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಪಬ್ಬಜಿತ್ವಾ ನಚಿರಸ್ಸೇವ ಅರಹತ್ತಂ ಪತ್ವಾ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಚನ್ದಭಾಗಾನದೀತೀರೇತಿಆದಿಮಾಹ। ತತ್ಥ ಚನ್ದಂ ಮನಂ ರುಚಿಂ ಅಜ್ಝಾಸಯಂ ಞತ್ವಾ ವಿಯ ಜಾತೋತಿ ಚನ್ದೋ। ಚನ್ದಮಣ್ಡಲೇನ ಪಸನ್ನನಿಮ್ಮಲೋದಕೇನ ಉಭೋಸು ಪಸ್ಸೇಸು ಮುತ್ತಾದಲಸದಿಸಸನ್ಥರಧವಲಪುಲಿನತಲೇನ ಚ ಸಮನ್ನಾಗತತ್ತಾ ಚನ್ದೇನ ಭಾಗಾ ಸದಿಸಾತಿ ಚನ್ದಭಾಗಾ, ತಸ್ಸಾ ಚನ್ದಭಾಗಾಯ ನದಿಯಾ ತೀರೇ ಸಮೀಪೇತಿ ಅತ್ಥೋ। ಸೇಸಂ ಸಬ್ಬಂ ಹೇಟ್ಠಾ ವುತ್ತನಯತ್ತಾ ಸುವಿಞ್ಞೇಯ್ಯಮೇವಾತಿ।
17. So tena puññena tena somanassena yāvatāyukaṃ ṭhatvā tato cuto devaloke nibbatto aparāparaṃ cha kāmāvacarasampattiyo anubhavitvā manussesu cakkavattirajjapadesarajjasampattiyo anubhavitvā imasmiṃ buddhuppāde kulagehe nibbatto viññutaṃ patto pabbajitvā nacirasseva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tattha candaṃ manaṃ ruciṃ ajjhāsayaṃ ñatvā viya jātoti cando. Candamaṇḍalena pasannanimmalodakena ubhosu passesu muttādalasadisasantharadhavalapulinatalena ca samannāgatattā candena bhāgā sadisāti candabhāgā, tassā candabhāgāya nadiyā tīre samīpeti attho. Sesaṃ sabbaṃ heṭṭhā vuttanayattā suviññeyyamevāti.
ಚನ್ದನಪೂಜನಕತ್ಥೇರಅಪದಾನವಣ್ಣನಾ ಸಮತ್ತಾ।
Candanapūjanakattheraapadānavaṇṇanā samattā.
ಅಟ್ಠಮಭಾಣವಾರವಣ್ಣನಾ ಸಮತ್ತಾ।
Aṭṭhamabhāṇavāravaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೩. ಚನ್ದನಪೂಜನಕತ್ಥೇರಅಪದಾನಂ • 3. Candanapūjanakattheraapadānaṃ
