| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౭. చన్దఙ్గపఞ్హో
7. Candaṅgapañho
౭. ‘‘భన్తే నాగసేన, ‘చన్దస్స పఞ్చ అఙ్గాని గహేతబ్బానీ’తి యం వదేసి, కతమాని తాని పఞ్చ అఙ్గాని గహేతబ్బానీ’’తి? ‘‘యథా, మహారాజ, చన్దో సుక్కపక్ఖే ఉదయన్తో ఉత్తరుత్తరిం వడ్ఢతి, ఏవమేవ ఖో, మహారాజ, యోగినా యోగావచరేన ఆచారసీలగుణవత్తప్పటిపత్తియా ఆగమాధిగమే పటిసల్లానే సతిపట్ఠానే ఇన్ద్రియేసు గుత్తద్వారతాయ భోజనే మత్తఞ్ఞుతాయ జాగరియానుయోగే ఉత్తరుత్తరిం వడ్ఢితబ్బం. ఇదం, మహారాజ, చన్దస్స పఠమం అఙ్గం గహేతబ్బం.
7. ‘‘Bhante nāgasena, ‘candassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, cando sukkapakkhe udayanto uttaruttariṃ vaḍḍhati, evameva kho, mahārāja, yoginā yogāvacarena ācārasīlaguṇavattappaṭipattiyā āgamādhigame paṭisallāne satipaṭṭhāne indriyesu guttadvāratāya bhojane mattaññutāya jāgariyānuyoge uttaruttariṃ vaḍḍhitabbaṃ. Idaṃ, mahārāja, candassa paṭhamaṃ aṅgaṃ gahetabbaṃ.
‘‘పున చపరం, మహారాజ, చన్దో ఉళారాధిపతి, ఏవమేవ ఖో, మహారాజ, యోగినా యోగావచరేన ఉళారేన ఛన్దాధిపతినా భవితబ్బం. ఇదం, మహారాజ, చన్దస్స దుతియం అఙ్గం గహేతబ్బం.
‘‘Puna caparaṃ, mahārāja, cando uḷārādhipati, evameva kho, mahārāja, yoginā yogāvacarena uḷārena chandādhipatinā bhavitabbaṃ. Idaṃ, mahārāja, candassa dutiyaṃ aṅgaṃ gahetabbaṃ.
‘‘పున చపరం, మహారాజ, చన్దో నిసాయ చరతి, ఏవమేవ ఖో, మహారాజ, యోగినా యోగావచరేన పవివిత్తేన భవితబ్బం. ఇదం, మహారాజ, చన్దస్స తతియం అఙ్గం గహేతబ్బం.
‘‘Puna caparaṃ, mahārāja, cando nisāya carati, evameva kho, mahārāja, yoginā yogāvacarena pavivittena bhavitabbaṃ. Idaṃ, mahārāja, candassa tatiyaṃ aṅgaṃ gahetabbaṃ.
‘‘పున చపరం, మహారాజ, చన్దో విమానకేతు, ఏవమేవ ఖో, మహారాజ, యోగినా యోగావచరేన సీలకేతునా భవితబ్బం. ఇదం, మహారాజ, చన్దస్స చతుత్థం అఙ్గం గహేతబ్బం.
‘‘Puna caparaṃ, mahārāja, cando vimānaketu, evameva kho, mahārāja, yoginā yogāvacarena sīlaketunā bhavitabbaṃ. Idaṃ, mahārāja, candassa catutthaṃ aṅgaṃ gahetabbaṃ.
‘‘పున చపరం, మహారాజ, చన్దో ఆయాచితపత్థితో ఉదేతి, ఏవమేవ ఖో, మహారాజ, యోగినా యోగావచరేన ఆయాచితపత్థితేన కులాని ఉపసఙ్కమితబ్బాని. ఇదం, మహారాజ, చన్దస్స పఞ్చమం అఙ్గం గహేతబ్బం. భాసితమ్పేతం, మహారాజ, భగవతా దేవాతిదేవేన సంయుత్తనికాయవరే ‘చన్దూపమా, భిక్ఖవే, కులాని ఉపసఙ్కమథ, అపకస్సేవ కాయం అపకస్స చిత్తం నిచ్చనవకా కులేసు అప్పగబ్భా’’’తి 1.
‘‘Puna caparaṃ, mahārāja, cando āyācitapatthito udeti, evameva kho, mahārāja, yoginā yogāvacarena āyācitapatthitena kulāni upasaṅkamitabbāni. Idaṃ, mahārāja, candassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘candūpamā, bhikkhave, kulāni upasaṅkamatha, apakasseva kāyaṃ apakassa cittaṃ niccanavakā kulesu appagabbhā’’’ti 2.
చన్దఙ్గపఞ్హో సత్తమో.
Candaṅgapañho sattamo.
Footnotes:
