| Library / Tipiṭaka / तिपिटक • Tipiṭaka / कङ्खावितरणी-पुराण-टीका • Kaṅkhāvitaraṇī-purāṇa-ṭīkā |
६. चारित्तसिक्खापदवण्णना
6. Cārittasikkhāpadavaṇṇanā
सभत्तो समानोति निमन्तनभत्तोति पोराणा। सन्तं भिक्खुं, अनापुच्छा, पुरेभत्तं पच्छाभत्तं, अञ्ञत्र समयाति अयमेत्थ चतुब्बिधा अनुपञ्ञत्ति। तत्थ समया द्वे समया। भत्तियघरन्ति निमन्तितस्स घरं वा सलाकाभत्तादिदायकानं वा घरं। ‘‘समुट्ठानादीनि पठमकथिनसदिसानि, इदं पन किरियाकिरिय’’न्ति पाठो, ‘‘इध निमन्तना अकप्पियनिमन्तना’’ति एके।
Sabhattosamānoti nimantanabhattoti porāṇā. Santaṃ bhikkhuṃ, anāpucchā, purebhattaṃ pacchābhattaṃ, aññatra samayāti ayamettha catubbidhā anupaññatti. Tattha samayā dve samayā. Bhattiyagharanti nimantitassa gharaṃ vā salākābhattādidāyakānaṃ vā gharaṃ. ‘‘Samuṭṭhānādīni paṭhamakathinasadisāni, idaṃ pana kiriyākiriya’’nti pāṭho, ‘‘idha nimantanā akappiyanimantanā’’ti eke.
पुरेभत्तञ्च पिण्डाय, चरित्वा यदि भुञ्जति।
Purebhattañca piṇḍāya, caritvā yadi bhuñjati;
सिया परम्परापत्ति, पच्छाभत्तं न सा सिया॥
Siyā paramparāpatti, pacchābhattaṃ na sā siyā.
पच्छाभत्तञ्च गमिको, पुब्बगेहं यदि गच्छे।
Pacchābhattañca gamiko, pubbagehaṃ yadi gacche;
एके आपत्तियेवाति, अनापत्तीति एकच्चे॥
Eke āpattiyevāti, anāpattīti ekacce.
कुलन्तरस्सोक्कमने, आपत्तिमतयो हि ते।
Kulantarassokkamane, āpattimatayo hi te;
समानभत्तपच्चासा, इति आहु इधापरे॥
Samānabhattapaccāsā, iti āhu idhāpare.
मता गणिकभत्तेन, समेन्ति नं निमन्तने।
Matā gaṇikabhattena, samenti naṃ nimantane;
विस्सज्जनं समानन्ति, एके सम्मुखतापरे॥
Vissajjanaṃ samānanti, eke sammukhatāpare.
सन्निट्ठानत्थिकेहेव, विचारेतब्बभेदतो।
Sanniṭṭhānatthikeheva, vicāretabbabhedato;
विञ्ञू चारित्तमिच्चेव, सिक्खापदमिदं विदू॥ (वजिर॰ टी॰ पाचित्तिय २९४)।
Viññū cārittamicceva, sikkhāpadamidaṃ vidū. (vajira. ṭī. pācittiya 294);
चारित्तसिक्खापदवण्णना निट्ठिता।
Cārittasikkhāpadavaṇṇanā niṭṭhitā.
