| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૯. ચરિયસુત્તવણ્ણના
9. Cariyasuttavaṇṇanā
૯. નવમે લોકન્તિ સત્તલોકં. સન્ધારેન્તીતિ આચારસન્ધારણવસેન ધારેન્તિ. ઠપેન્તીતિ મરિયાદાયં ઠપેન્તિ. રક્ખન્તીતિ આચારસન્ધારણેન મરિયાદાયં ઠપેત્વા રક્ખન્તિ. ગરુચિત્તીકારવસેન ન પઞ્ઞાયેથાતિ ગરું કત્વા ચિત્તે કરણવસેન ન પઞ્ઞાયેથ, અયમાચારો ન લબ્ભેય્ય. માતુચ્છાતિ વાતિ એત્થ ઇતિ-સદ્દો આદ્યત્થો. તેન માતુલાનીતિ વા આચરિયભરિયાતિ વા ગરૂનં દારાતિ વાતિ ઇમે સઙ્ગણ્હાતિ. તત્થ માતુ ભગિની માતુચ્છા. માતુલભરિયા માતુલાની. ગરૂનં દારા મહાપિતુચૂળપિતુજેટ્ઠભાતુઆદીનં ગરુટ્ઠાનિયાનં ભરિયા. યથા અજેળકાતિઆદીસુ અયં સઙ્ખેપત્થો – યથા અજેળકાદયો તિરચ્છાના હિરોત્તપ્પરહિતા માતાતિ સઞ્ઞં અકત્વા ભિન્નમરિયાદા સબ્બત્થ સમ્ભેદેન વત્તન્તિ, એવમયં મનુસ્સલોકો યદિ લોકપાલધમ્મા ન ભવેય્યું, સબ્બત્થ સમ્ભેદેન વત્તેય્ય. યસ્મા પનિમે લોકપાલકધમ્મા લોકં પાલેન્તિ, તસ્મા નત્થિ સમ્ભેદોતિ.
9. Navame lokanti sattalokaṃ. Sandhārentīti ācārasandhāraṇavasena dhārenti. Ṭhapentīti mariyādāyaṃ ṭhapenti. Rakkhantīti ācārasandhāraṇena mariyādāyaṃ ṭhapetvā rakkhanti. Garucittīkāravasena na paññāyethāti garuṃ katvā citte karaṇavasena na paññāyetha, ayamācāro na labbheyya. Mātucchāti vāti ettha iti-saddo ādyattho. Tena mātulānīti vā ācariyabhariyāti vā garūnaṃ dārāti vāti ime saṅgaṇhāti. Tattha mātu bhaginī mātucchā. Mātulabhariyā mātulānī. Garūnaṃ dārā mahāpitucūḷapitujeṭṭhabhātuādīnaṃ garuṭṭhāniyānaṃ bhariyā. Yathā ajeḷakātiādīsu ayaṃ saṅkhepattho – yathā ajeḷakādayo tiracchānā hirottapparahitā mātāti saññaṃ akatvā bhinnamariyādā sabbattha sambhedena vattanti, evamayaṃ manussaloko yadi lokapāladhammā na bhaveyyuṃ, sabbattha sambhedena vatteyya. Yasmā panime lokapālakadhammā lokaṃ pālenti, tasmā natthi sambhedoti.
ચરિયસુત્તવણ્ણના નિટ્ઠિતા.
Cariyasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૯. ચરિયસુત્તં • 9. Cariyasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૯. ચરિયસુત્તવણ્ણના • 9. Cariyasuttavaṇṇanā
