| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
சதுப்³பி³த⁴கம்மகதா²வண்ணனா
Catubbidhakammakathāvaṇṇanā
2983. அபலோகனஸஞ்ஞிதங் கம்மங், ஞத்திகம்மங், ஞத்திது³தியகம்மங், ஞத்திசதுத்த²கம்மந்தி இமானி சத்தாரி கம்மானீதி யோஜனா. தத்த² சத்தாரீதி க³ணனபரிச்சே²தோ³. இமானீதி அனந்தரமேவ வக்க²மானத்தா ஆஸன்னபச்சக்க²வசனங். கம்மானீதி பரிச்சி²ன்னகம்மனித³ஸ்ஸனங். ‘‘அபலோகனஸஅஞத’’ந்திஆதி³ தேஸங் ஸரூபத³ஸ்ஸனங்.
2983. Apalokanasaññitaṃ kammaṃ, ñattikammaṃ, ñattidutiyakammaṃ, ñatticatutthakammanti imāni cattāri kammānīti yojanā. Tattha cattārīti gaṇanaparicchedo. Imānīti anantarameva vakkhamānattā āsannapaccakkhavacanaṃ. Kammānīti paricchinnakammanidassanaṃ. ‘‘Apalokanasaañata’’ntiādi tesaṃ sarūpadassanaṃ.
தத்ராயங் ஸங்கே²பதோ வினிச்ச²யோ (சூளவ॰ அட்ட²॰ 215; பரி॰ அட்ட²॰ 482) – அபலோகனகம்மங் நாம ஸீமட்ட²கஸங்க⁴ங் ஸோதெ⁴த்வா ச²ந்தா³ரஹானங் ச²ந்த³ங் ஆஹரித்வா ஸமக்³க³ஸ்ஸ ஸங்க⁴ஸ்ஸ அனுமதியா தங் தங் வத்து²ங் கித்தெத்வா ‘‘ருச்சதி ஸங்க⁴ஸ்ஸா’’தி திக்க²த்துங் ஸாவெத்வா கத்தப்³ப³ங் கம்மங் வுச்சதி. ஞத்திகம்மங் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா கத்தப்³ப³ங் கம்மங். ஞத்திது³தியகம்மங் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா, ஏகாய ச அனுஸ்ஸாவனாயாதி ஏவங் ஞத்திது³தியாய அனுஸ்ஸாவனாய கத்தப்³ப³ங் கம்மங். ஞத்திசதுத்த²கம்மங் நாம வுத்தனயேனேவ ஸமக்³க³ஸ்ஸ ஸங்க⁴ஸ்ஸ அனுமதியா ஏகாய ஞத்தியா, தீஹி ச அனுஸ்ஸாவனாஹீதி ஏவங் ஞத்திசதுத்தா²ஹி தீஹி அனுஸ்ஸாவனாஹி கத்தப்³ப³ங் கம்மங். ஞத்தி து³தியா யஸ்ஸ அனுஸ்ஸாவனஸ்ஸ தங் ஞத்திது³தியங், தேன கத்தப்³ப³ங் கம்மங் ஞத்திது³தியகம்மங். ஞத்தி சதுத்தா² யஸ்ஸ அனுஸ்ஸாவனத்தயஸ்ஸ தங் ஞத்திசதுத்த²ங், தேன காதப்³ப³ங் கம்மங் ஞத்திசதுத்த²கம்மங்.
Tatrāyaṃ saṅkhepato vinicchayo (cūḷava. aṭṭha. 215; pari. aṭṭha. 482) – apalokanakammaṃ nāma sīmaṭṭhakasaṅghaṃ sodhetvā chandārahānaṃ chandaṃ āharitvā samaggassa saṅghassa anumatiyā taṃ taṃ vatthuṃ kittetvā ‘‘ruccati saṅghassā’’ti tikkhattuṃ sāvetvā kattabbaṃ kammaṃ vuccati. Ñattikammaṃ nāma vuttanayeneva samaggassa saṅghassa anumatiyā ekāya ñattiyā kattabbaṃ kammaṃ. Ñattidutiyakammaṃ nāma vuttanayeneva samaggassa saṅghassa anumatiyā ekāya ñattiyā, ekāya ca anussāvanāyāti evaṃ ñattidutiyāya anussāvanāya kattabbaṃ kammaṃ. Ñatticatutthakammaṃ nāma vuttanayeneva samaggassa saṅghassa anumatiyā ekāya ñattiyā, tīhi ca anussāvanāhīti evaṃ ñatticatutthāhi tīhi anussāvanāhi kattabbaṃ kammaṃ. Ñatti dutiyā yassa anussāvanassa taṃ ñattidutiyaṃ, tena kattabbaṃ kammaṃ ñattidutiyakammaṃ. Ñatti catutthā yassa anussāvanattayassa taṃ ñatticatutthaṃ, tena kātabbaṃ kammaṃ ñatticatutthakammaṃ.
2984-7. தேஸங் டா²னவஸேன பே⁴த³ங் த³ஸ்ஸேதுமாஹ ‘‘அபலோகனகம்ம’’ந்திஆதி³. நவன்னங் டா²னானங் ஸமாஹாரோ நவட்டா²னங், ‘‘க³ச்ச²தீ’’தி இமினா ஸம்ப³ந்தோ⁴. ஞத்திகம்மந்தி க³மனகிரியாகத்துனித³ஸ்ஸனங் . நவட்டா²னந்தி கம்மனித³ஸ்ஸனங். து³தியந்தி ஞத்திது³தியகம்மங். ஸத்த டா²னானி க³ச்ச²தீதி யோஜனா.
2984-7. Tesaṃ ṭhānavasena bhedaṃ dassetumāha ‘‘apalokanakamma’’ntiādi. Navannaṃ ṭhānānaṃ samāhāro navaṭṭhānaṃ, ‘‘gacchatī’’ti iminā sambandho. Ñattikammanti gamanakiriyākattunidassanaṃ . Navaṭṭhānanti kammanidassanaṃ. Dutiyanti ñattidutiyakammaṃ. Satta ṭhānāni gacchatīti yojanā.
இதா³னி தங் டா²னபே⁴த³ங் ஸரூபதோ த³ஸ்ஸேதுமாஹ ‘‘நிஸ்ஸாரணஞ்சா’’திஆதி³. நிஸ்ஸாரணாதி³ கம்மவிஸேஸானங் ஸஞ்ஞா. அபலோகனகம்மஞ்ஹி நிஸ்ஸாரணங்…பே॰… பஞ்சமங் கம்மலக்க²ணந்தி இமானி பஞ்ச டா²னானி க³ச்ச²தீதி யோஜனா.
Idāni taṃ ṭhānabhedaṃ sarūpato dassetumāha ‘‘nissāraṇañcā’’tiādi. Nissāraṇādi kammavisesānaṃ saññā. Apalokanakammañhi nissāraṇaṃ…pe… pañcamaṃ kammalakkhaṇanti imāni pañca ṭhānāni gacchatīti yojanā.
ஏவங் நாமவஸேன த³ஸ்ஸிதானி நிஸ்ஸாரணாதீ³னி அத்த²தோ விப⁴ஜித்வா த³ஸ்ஸேதுமாஹ ‘‘நிஸ்ஸாரணஞ்சா’’திஆதி³. ஸமணுத்³தே³ஸதோதி கண்டகஸாமணேரதோ நிஸ்ஸாரணஞ்ச ஓஸாரணஞ்ச வதே³தி யோஜனா. தத்த² கண்டகஸாமணேரஸ்ஸ நிஸ்ஸாரணா தாதி³ஸானங்யேவ ஸம்மாவத்தங் தி³ஸ்வா பவேஸனா ‘‘ஓஸாரணா’’தி வேதி³தப்³பா³.
Evaṃ nāmavasena dassitāni nissāraṇādīni atthato vibhajitvā dassetumāha ‘‘nissāraṇañcā’’tiādi. Samaṇuddesatoti kaṇṭakasāmaṇerato nissāraṇañca osāraṇañca vadeti yojanā. Tattha kaṇṭakasāmaṇerassa nissāraṇā tādisānaṃyeva sammāvattaṃ disvā pavesanā ‘‘osāraṇā’’ti veditabbā.
பப்³ப³ஜந்தேன ஹேதுபூ⁴தேன ப⁴ண்டு³கங் ப⁴ண்டு³கம்மபுச்ச²னங் வதெ³ய்யாதி அத்தோ². பப்³ப³ஜ்ஜாபெக்க²ஸ்ஸ கேஸச்சே²த³னபுச்ச²னங் ப⁴ண்டு³கம்மங் நாம. ச²ன்னேன ஹேதுபூ⁴தேன ப்³ரஹ்மத³ண்ட³கங் கம்மங் வதே³தி யோஜனா. ததா²ரூபஸ்ஸாதி ச²ன்னஸதி³ஸஸ்ஸ முக²ரஸ்ஸ பி⁴க்கூ² து³ருத்தவசனேன க⁴ட்டெந்தஸ்ஸ. காதப்³போ³தி ‘‘ப⁴ந்தே, இத்த²ன்னாமோ பி⁴க்கு² முக²ரோ பி⁴க்கூ² து³ருத்தவசனேஹி க⁴ட்டெந்தோ விஹரதி, ஸோ பி⁴க்கு² யங் இச்செ²ய்ய, தங் வதெ³ய்ய. பி⁴க்கூ²ஹி இத்த²ன்னாமோ பி⁴க்கு² நேவ வத்தப்³போ³, ந ஓவதி³தப்³போ³, ந அனுஸாஸிதப்³போ³. ஸங்க⁴ங், ப⁴ந்தே, புச்சா²மி ‘இத்த²ன்னாமஸ்ஸ பி⁴க்கு²னோ ப்³ரஹ்மத³ண்ட³ஸ்ஸ தா³னங் ருச்சதி ஸங்க⁴ஸ்ஸா’தி. து³தியம்பி புச்சா²மி… ததியம்பி புச்சா²மி ‘இத்த²ன்னாமஸ்ஸ, ப⁴ந்தே, பி⁴க்கு²னோ ப்³ரஹ்மத³ண்ட³ஸ்ஸ தா³னங் ருச்சதி ஸங்க⁴ஸ்ஸா’’தி (பரி॰ அட்ட²॰ 495-496) ஏவங் ப்³ரஹ்மத³ண்டோ³ காதப்³போ³.
Pabbajantena hetubhūtena bhaṇḍukaṃ bhaṇḍukammapucchanaṃ vadeyyāti attho. Pabbajjāpekkhassa kesacchedanapucchanaṃ bhaṇḍukammaṃ nāma. Channena hetubhūtena brahmadaṇḍakaṃ kammaṃ vadeti yojanā. Tathārūpassāti channasadisassa mukharassa bhikkhū duruttavacanena ghaṭṭentassa. Kātabboti ‘‘bhante, itthannāmo bhikkhu mukharo bhikkhū duruttavacanehi ghaṭṭento viharati, so bhikkhu yaṃ iccheyya, taṃ vadeyya. Bhikkhūhi itthannāmo bhikkhu neva vattabbo, na ovaditabbo, na anusāsitabbo. Saṅghaṃ, bhante, pucchāmi ‘itthannāmassa bhikkhuno brahmadaṇḍassa dānaṃ ruccati saṅghassā’ti. Dutiyampi pucchāmi… tatiyampi pucchāmi ‘itthannāmassa, bhante, bhikkhuno brahmadaṇḍassa dānaṃ ruccati saṅghassā’’ti (pari. aṭṭha. 495-496) evaṃ brahmadaṇḍo kātabbo.
2988-9. ‘‘ஆபுச்சி²த்வானா’’தி புப்³ப³கிரியாய ‘‘க³ஹிதாயா’’தி அபரகிரியா அஜ்ஜா²ஹரிதப்³பா³, ‘‘ருசியா’’தி ஏதஸ்ஸ விஸேஸனங். தே³தீதி எத்த² ‘‘அச்சி²ன்னசீவராதீ³ன’’ந்தி ஸேஸோ. ஸப்³போ³ ஸங்கோ⁴ ஸன்னிபதித்வான ஸப்³ப³ஸோ ஸப்³பே³ ஸீமட்டே² ஆக³தாக³தே பி⁴க்கூ² ஆபுச்சி²த்வான ‘‘இத்த²ன்னாமேன பரிக்கா²ரேன ப⁴விதப்³ப³ங், ருச்சதி தஸ்ஸ தா³ன’’ந்தி விஸுங் புச்சி²த்வா க³ஹிதாய பி⁴க்கூ²னங் ருசியா திக்க²த்துங் அபலோகெத்வா சீவராதி³பரிக்கா²ரங் அச்சி²ன்னசீவராதீ³னங் தே³தி, யங் ஏவங்பூ⁴தங் ஸங்க⁴ஸ்ஸ தா³னங், தங் தஸ்ஸ அபலோகனகம்மஸ்ஸ கம்மலக்க²ணங் ஹோதீதி யோஜனா. லக்கீ²யதீதி லக்க²ணங், கம்மமேவ லக்க²ணங், ந நிஸ்ஸாரணாதீ³னீதி கம்மலக்க²ணங்.
2988-9.‘‘Āpucchitvānā’’ti pubbakiriyāya ‘‘gahitāyā’’ti aparakiriyā ajjhāharitabbā, ‘‘ruciyā’’ti etassa visesanaṃ. Detīti ettha ‘‘acchinnacīvarādīna’’nti seso. Sabbo saṅgho sannipatitvāna sabbaso sabbe sīmaṭṭhe āgatāgate bhikkhū āpucchitvāna ‘‘itthannāmena parikkhārena bhavitabbaṃ, ruccati tassa dāna’’nti visuṃ pucchitvā gahitāya bhikkhūnaṃ ruciyā tikkhattuṃ apaloketvā cīvarādiparikkhāraṃ acchinnacīvarādīnaṃ deti, yaṃ evaṃbhūtaṃ saṅghassa dānaṃ, taṃ tassa apalokanakammassa kammalakkhaṇaṃ hotīti yojanā. Lakkhīyatīti lakkhaṇaṃ, kammameva lakkhaṇaṃ, na nissāraṇādīnīti kammalakkhaṇaṃ.
2990-1. ஏவங் அபலோகனகம்மஸ்ஸ பஞ்ச டா²னானி உத்³தே³ஸனித்³தே³ஸவஸேன த³ஸ்ஸெத்வா இதா³னி ஞத்திகம்மஸ்ஸ கம்மலக்க²ணங் தாவ த³ஸ்ஸேதுமாஹ ‘‘நிஸ்ஸாரண’’ந்திஆதி³. இதி ‘‘ஞத்தியா நவ டா²னானீ’’தி அயமுத்³தே³ஸோ வக்க²மானேன ‘‘வினிச்ச²யே’’திஆதி³னித்³தே³ஸேனேவ விபா⁴வீயதி.
2990-1. Evaṃ apalokanakammassa pañca ṭhānāni uddesaniddesavasena dassetvā idāni ñattikammassa kammalakkhaṇaṃ tāva dassetumāha ‘‘nissāraṇa’’ntiādi. Iti ‘‘ñattiyā nava ṭhānānī’’ti ayamuddeso vakkhamānena ‘‘vinicchaye’’tiādiniddeseneva vibhāvīyati.
2992. வினிச்ச²யேதி உப்³பா³ஹிகவினிச்ச²யே. அஸம்பத்தேதி நிட்ட²ங் அக³தே. தே²ரஸ்ஸாதி த⁴ம்மகதி²கஸ்ஸ. தேனேவாஹ ‘‘அவினயஞ்ஞுனோ’’தி. தஸ்ஸ ‘‘ஸுணந்து மே ஆயஸ்மந்தா, அயங் இத்த²ன்னாமோ பி⁴க்கு² த⁴ம்மகதி²கோ, இமஸ்ஸ நேவ ஸுத்தங் ஆக³ச்ச²தி, நோ ஸுத்தவிப⁴ங்கோ³, ஸோ அத்த²ங் அஸல்லக்கெ²த்வா ப்³யஞ்ஜனச்சா²யாய அத்த²ங் படிபா³ஹதி, யதா³யஸ்மந்தானங் பத்தகல்லங், இத்த²ன்னாமங் பி⁴க்கு²ங் வுட்டா²பெத்வா அவஸேஸா இமங் அதி⁴கரணங் வூபஸமெய்யாமா’’தி (சூளவ॰ 233) ஏவங் உப்³பா³ஹிகவினிச்ச²யே த⁴ம்மகதி²கஸ்ஸ பி⁴க்கு²னோ யா நிஸ்ஸரணா வுத்தா, ஸா ஞத்திகம்மே ‘‘நிஸ்ஸாரணா’’தி வுத்தாதி யோஜனா.
2992.Vinicchayeti ubbāhikavinicchaye. Asampatteti niṭṭhaṃ agate. Therassāti dhammakathikassa. Tenevāha ‘‘avinayaññuno’’ti. Tassa ‘‘suṇantu me āyasmantā, ayaṃ itthannāmo bhikkhu dhammakathiko, imassa neva suttaṃ āgacchati, no suttavibhaṅgo, so atthaṃ asallakkhetvā byañjanacchāyāya atthaṃ paṭibāhati, yadāyasmantānaṃ pattakallaṃ, itthannāmaṃ bhikkhuṃ vuṭṭhāpetvā avasesā imaṃ adhikaraṇaṃ vūpasameyyāmā’’ti (cūḷava. 233) evaṃ ubbāhikavinicchaye dhammakathikassa bhikkhuno yā nissaraṇā vuttā, sā ñattikamme ‘‘nissāraṇā’’ti vuttāti yojanā.
2993-4. உபஸம்பதா³பெக்க²ஸ்ஸ ‘‘ஸுணாது மே, ப⁴ந்தே ஸங்கோ⁴, இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ² , அனுஸிட்டோ² ஸோ மயா, யதி³ ஸங்க⁴ஸ்ஸ பத்தகல்லங், இத்த²ன்னாமோ ஆக³ச்செ²ய்யாதி. ஆக³ச்சா²ஹீ’’தி (மஹாவ॰ 126) வசனபடிஸங்யுத்தஸ்ஸ ஸங்க⁴ஸ்ஸ ஸம்முகா²னயனங், ஸா ஓஸாரணா நாம. ‘‘ஆக³ச்ச² ஓஸாரணா’’தி பத³ச்சே²தோ³.
2993-4.Upasampadāpekkhassa ‘‘suṇātu me, bhante saṅgho, itthannāmo itthannāmassa āyasmato upasampadāpekkho , anusiṭṭho so mayā, yadi saṅghassa pattakallaṃ, itthannāmo āgaccheyyāti. Āgacchāhī’’ti (mahāva. 126) vacanapaṭisaṃyuttassa saṅghassa sammukhānayanaṃ, sā osāraṇā nāma. ‘‘Āgaccha osāraṇā’’ti padacchedo.
உபோஸத²வஸேனாபி, பவாரணாவஸேனாபி. ஞத்தியா ட²பிதத்தாதி ‘‘ஸுணாது மே, ப⁴ந்தே ஸங்கோ⁴, அஜ்ஜுபோஸதோ² பன்னரஸோ, யதி³ ஸங்க⁴ஸ்ஸ பத்தகல்லங், ஸங்கோ⁴ உபோஸத²ங் கரெய்ய’’ (மஹாவ॰ 134), ‘‘ஸுணாது மே, ப⁴ந்தே ஸங்கோ⁴, அஜ்ஜ பவாரணா பன்னரஸீ, யதி³ ஸங்க⁴ஸ்ஸ பத்தகல்லங், ஸங்கோ⁴ பவாரெய்யா’’தி (மஹாவ॰ 210) உபோஸத²பவாரணாவஸேன ஞத்தியா ட²பிதத்தா உபோஸதோ², பவாரணா வாதி இமானி த்³வே ஞத்திகம்மானி.
Uposathavasenāpi, pavāraṇāvasenāpi. Ñattiyā ṭhapitattāti ‘‘suṇātu me, bhante saṅgho, ajjuposatho pannaraso, yadi saṅghassa pattakallaṃ, saṅgho uposathaṃ kareyya’’ (mahāva. 134), ‘‘suṇātu me, bhante saṅgho, ajja pavāraṇā pannarasī, yadi saṅghassa pattakallaṃ, saṅgho pavāreyyā’’ti (mahāva. 210) uposathapavāraṇāvasena ñattiyā ṭhapitattā uposatho, pavāraṇā vāti imāni dve ñattikammāni.
‘‘உபஸம்பதா³பெக்க²ஞ்ஹி, அனுஸாஸெய்யஹந்தி சா’’தி இமினா ‘‘ஸுணாது மே, ப⁴ந்தே ஸங்கோ⁴, இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ², யதி³ ஸங்க⁴ஸ்ஸ பத்தகல்லங், அஹங் இத்த²ன்னாமங் அனுஸாஸெய்ய’’ந்தி (மஹாவ॰ 126) அயங் ஏகா ஞத்தி க³ஹிதா.
‘‘Upasampadāpekkhañhi, anusāseyyahanti cā’’ti iminā ‘‘suṇātu me, bhante saṅgho, itthannāmo itthannāmassa āyasmato upasampadāpekkho, yadi saṅghassa pattakallaṃ, ahaṃ itthannāmaṃ anusāseyya’’nti (mahāva. 126) ayaṃ ekā ñatti gahitā.
2995. ‘‘இத்த²ன்னாமமஹங் பி⁴க்கு²ங், புச்செ²ய்யங் வினயந்தி சா’’தி இமினா ‘‘ஸுணாது மே, ப⁴ந்தே ஸங்கோ⁴, யதி³ ஸங்க⁴ஸ்ஸ பத்தகல்லங், அஹங் இத்த²ன்னாமங் வினயங் புச்செ²ய்ய’’ந்தி (மஹாவ॰ 151) அயங் ஏகா ஞத்தி க³ஹிதா. ஏவமாதீ³தி ஆதி³-ஸத்³தே³ன ‘‘யதி³ ஸங்க⁴ஸ்ஸ பத்தகல்லங், இத்த²ன்னாமோ இத்த²ன்னாமங் அனுஸாஸெய்யா’’தி, ‘‘யதி³ ஸங்க⁴ஸ்ஸ பத்தகல்லங், அஹங் இத்த²ன்னாமங் அந்தராயிகே த⁴ம்மே புச்செ²ய்ய’’ந்தி (மஹாவ॰ 126), ‘‘யதி³ ஸங்க⁴ஸ்ஸ பத்தகல்லங், இத்த²ன்னாமோ இத்த²ன்னாமங் அந்தராயிகே த⁴ம்மே புச்செ²ய்யா’’தி, ‘‘யதி³ ஸங்க⁴ஸ்ஸ பத்தகல்லங், இத்த²ன்னாமோ இத்த²ன்னாமங் வினயங் புச்செ²ய்யா’’தி (மஹாவ॰ 151), ‘‘யதி³ ஸங்க⁴ஸ்ஸ பத்தகல்லங், அஹங் இத்த²ன்னாமேன வினயங் புட்டோ² விஸ்ஸஜ்ஜெய்ய’’ந்தி (மஹாவ॰ 152), ‘‘யதி³ ஸங்க⁴ஸ்ஸ பத்தகல்லங், இத்த²ன்னாமோ இத்த²ன்னாமேன வினயங் புட்டோ² விஸ்ஸஜ்ஜெய்யா’’தி – (மஹாவ॰ 152) இமா ச² ஞத்தியோ க³ஹிதா. ஏவங் புரிமா த்³வே, இமா ச சா²தி ஏதி³ஸா இமா அட்ட² ஞத்தியோ ‘‘ஸம்முதீ’’தி வுத்தா.
2995.‘‘Itthannāmamahaṃ bhikkhuṃ, puccheyyaṃ vinayanti cā’’ti iminā ‘‘suṇātu me, bhante saṅgho, yadi saṅghassa pattakallaṃ, ahaṃ itthannāmaṃ vinayaṃ puccheyya’’nti (mahāva. 151) ayaṃ ekā ñatti gahitā. Evamādīti ādi-saddena ‘‘yadi saṅghassa pattakallaṃ, itthannāmo itthannāmaṃ anusāseyyā’’ti, ‘‘yadi saṅghassa pattakallaṃ, ahaṃ itthannāmaṃ antarāyike dhamme puccheyya’’nti (mahāva. 126), ‘‘yadi saṅghassa pattakallaṃ, itthannāmo itthannāmaṃ antarāyike dhamme puccheyyā’’ti, ‘‘yadi saṅghassa pattakallaṃ, itthannāmo itthannāmaṃ vinayaṃ puccheyyā’’ti (mahāva. 151), ‘‘yadi saṅghassa pattakallaṃ, ahaṃ itthannāmena vinayaṃ puṭṭho vissajjeyya’’nti (mahāva. 152), ‘‘yadi saṅghassa pattakallaṃ, itthannāmo itthannāmena vinayaṃ puṭṭho vissajjeyyā’’ti – (mahāva. 152) imā cha ñattiyo gahitā. Evaṃ purimā dve, imā ca chāti edisā imā aṭṭha ñattiyo ‘‘sammutī’’ti vuttā.
2996. நிஸ்ஸட்ட²சீவராதீ³னங் தா³னந்தி ‘‘ஸுணாது மே, ப⁴ந்தே ஸங்கோ⁴, இத³ங் சீவரங் இத்த²ன்னாமஸ்ஸ பி⁴க்கு²னோ நிஸ்ஸக்³கி³யங் ஸங்க⁴ஸ்ஸ நிஸ்ஸட்ட²ங், யதி³ ஸங்க⁴ஸ்ஸ பத்தகல்லங், ஸங்கோ⁴ இமங் சீவரங் இத்த²ன்னாமஸ்ஸ பி⁴க்கு²னோ த³தெ³ய்யா’’தி (பாரா॰ 464) ஏவங் நிஸ்ஸட்ட²சீவரபத்தாதீ³னங் தா³னங் ‘‘தா³ன’’ந்தி வுச்சதி. ஆபத்தீனங் படிக்³கா³ஹோதி ‘‘ஸுணாது மே, ப⁴ந்தே ஸங்கோ⁴, அயங் இத்த²ன்னாமோ பி⁴க்கு² ஆபத்திங் ஸரதி விவரதி உத்தானிங் கரோதி தே³ஸேதி, யதி³ ஸங்க⁴ஸ்ஸ பத்தகல்லங், அஹங் இத்த²ன்னாமஸ்ஸ பி⁴க்கு²னோ ஆபத்திங் படிக்³க³ண்ஹெய்ய’’ந்தி (சூளவ॰ 239), ‘‘யதா³யஸ்மந்தானங் பத்தகல்லங், அஹங் இத்த²ன்னாமஸ்ஸ பி⁴க்கு²னோ ஆபத்திங் படிக்³க³ண்ஹெய்ய’’ந்தி (சூளவ॰ 239). தேன வத்தப்³போ³ ‘‘பஸ்ஸஸீ’’தி. ‘‘ஆம பஸ்ஸாமீ’’தி. ‘‘ஆயதிங் ஸங்வரெய்யாஸீ’’தி. ஏவங் ஆபத்தீனங் படிக்³கா³ஹோ ‘‘படிக்³கா³ஹோ’’தி வுச்சதி.
2996.Nissaṭṭhacīvarādīnaṃ dānanti ‘‘suṇātu me, bhante saṅgho, idaṃ cīvaraṃ itthannāmassa bhikkhuno nissaggiyaṃ saṅghassa nissaṭṭhaṃ, yadi saṅghassa pattakallaṃ, saṅgho imaṃ cīvaraṃ itthannāmassa bhikkhuno dadeyyā’’ti (pārā. 464) evaṃ nissaṭṭhacīvarapattādīnaṃ dānaṃ ‘‘dāna’’nti vuccati. Āpattīnaṃ paṭiggāhoti ‘‘suṇātu me, bhante saṅgho, ayaṃ itthannāmo bhikkhu āpattiṃ sarati vivarati uttāniṃ karoti deseti, yadi saṅghassa pattakallaṃ, ahaṃ itthannāmassa bhikkhuno āpattiṃ paṭiggaṇheyya’’nti (cūḷava. 239), ‘‘yadāyasmantānaṃ pattakallaṃ, ahaṃ itthannāmassa bhikkhuno āpattiṃ paṭiggaṇheyya’’nti (cūḷava. 239). Tena vattabbo ‘‘passasī’’ti. ‘‘Āma passāmī’’ti. ‘‘Āyatiṃ saṃvareyyāsī’’ti. Evaṃ āpattīnaṃ paṭiggāho ‘‘paṭiggāho’’ti vuccati.
2997. பவாருக்கட்³ட⁴னாதி பவாரணுக்கட்³ட⁴னா. கா³தா²ப³ந்த⁴வஸேன ண-காரலோபோ. அத² வா பவாரணங் பவாரோதி பவாரண-ஸத்³த³பரியாயோ பவார-ஸத்³தோ³. ‘‘இமங் உபோஸத²ங் கத்வா, காளே பவாரயாமீ’’தி இமினா ‘‘ஸுணந்து மே ஆயஸ்மந்தா ஆவாஸிகா, யதா³யஸ்மந்தானங் பத்தகல்லங், இதா³னி உபோஸத²ங் கரெய்யாம, பாதிமொக்க²ங் உத்³தி³ஸெய்யாம, ஆக³மே காளே பவாரெய்யாமா’’தி (மஹாவ॰ 240) அயங் ஞத்தி உபலக்க²ணதோ த³ஸ்ஸிதா. ஏவங் கதபவாரணா ‘‘பச்சுக்கட்³ட⁴னா’’தி மதா. எத்த² ச காளேதி புப்³ப³கத்திகமாஸஸ்ஸ காளபக்கு²போஸதே². இமினா ச ‘‘ஆக³மே ஜுண்ஹே பவாரெய்யாமா’’தி அயங் ஞத்தி ச உபலக்கி²தா. ஜுண்ஹேதி அபரகத்திகஜுண்ஹபக்க²உபோஸதே².
2997.Pavārukkaḍḍhanāti pavāraṇukkaḍḍhanā. Gāthābandhavasena ṇa-kāralopo. Atha vā pavāraṇaṃ pavāroti pavāraṇa-saddapariyāyo pavāra-saddo. ‘‘Imaṃ uposathaṃ katvā, kāḷe pavārayāmī’’ti iminā ‘‘suṇantu me āyasmantā āvāsikā, yadāyasmantānaṃ pattakallaṃ, idāni uposathaṃ kareyyāma, pātimokkhaṃ uddiseyyāma, āgame kāḷe pavāreyyāmā’’ti (mahāva. 240) ayaṃ ñatti upalakkhaṇato dassitā. Evaṃ katapavāraṇā ‘‘paccukkaḍḍhanā’’ti matā. Ettha ca kāḷeti pubbakattikamāsassa kāḷapakkhuposathe. Iminā ca ‘‘āgame juṇhe pavāreyyāmā’’ti ayaṃ ñatti ca upalakkhitā. Juṇheti aparakattikajuṇhapakkhauposathe.
2998. திணவத்தா²ரகேதி திணவத்தா²ரகஸமதே². ஸப்³ப³பட²மா ஞத்தீதி ஸப்³ப³ஸங்கா³ஹிகா ஞத்தி வுச்சதி. இதரா சாதி உப⁴யபக்கே² பச்சேகங் ட²பிதா த்³வே ஞத்தியோ சாதி ஏவங் திதா⁴ பவத்தங் ஏதங் ஞத்திகம்மங் கம்மலக்க²ணங் இதி ஏவங் வுத்தனயேன ‘‘வினிச்ச²யே’’திஆதி³னா ஞத்தியா நவ டா²னானி வேதி³தப்³பா³னீதி யோஜனா.
2998.Tiṇavatthāraketi tiṇavatthārakasamathe. Sabbapaṭhamā ñattīti sabbasaṅgāhikā ñatti vuccati. Itarā cāti ubhayapakkhe paccekaṃ ṭhapitā dve ñattiyo cāti evaṃ tidhā pavattaṃ etaṃ ñattikammaṃ kammalakkhaṇaṃ iti evaṃ vuttanayena ‘‘vinicchaye’’tiādinā ñattiyā nava ṭhānāni veditabbānīti yojanā.
2999-3000. ஏவங் ஞத்திகம்மே நவ டா²னானி த³ஸ்ஸெத்வா இதா³னி ஞத்திது³தியகம்மே ஸத்த டா²னானி த³ஸ்ஸேதுமாஹ ‘‘ஞத்திது³தியகம்மம்பீ’’திஆதி³. ‘‘ஞத்திது³தியகம்ம’’ந்திஆதி³கா உத்³தே³ஸகா³தா² உத்தானத்தா²வ.
2999-3000. Evaṃ ñattikamme nava ṭhānāni dassetvā idāni ñattidutiyakamme satta ṭhānāni dassetumāha ‘‘ñattidutiyakammampī’’tiādi. ‘‘Ñattidutiyakamma’’ntiādikā uddesagāthā uttānatthāva.
நித்³தே³ஸே பத்தனிக்குஜ்ஜனாதீ³தி ஆதி³-ஸத்³தே³ன பத்துக்குஜ்ஜனங் க³ஹிதங். நிஸ்ஸாரோஸாரணா மதாதி ‘‘நிஸ்ஸாரணா, ஓஸாரணா’’தி ச மதா. தத்த² பி⁴க்கூ²னங் அலாபா⁴ய பரிஸக்கனாதி³கேஹி அட்ட²ஹி அங்கே³ஹி ஸமன்னாக³தஸ்ஸ உபாஸகஸ்ஸ ஸங்கே⁴ன அஸம்போ⁴க³கரணத்த²ங் பத்தனிக்குஜ்ஜனவஸேன நிஸ்ஸாரணா ச தஸ்ஸேவ ஸம்மா வத்தந்தஸ்ஸ பத்துக்குஜ்ஜனவஸேன ஓஸாரணா ச வேதி³தப்³பா³. ஸா கு²த்³த³கவத்து²க்க²ந்த⁴கே வட்³ட⁴லிச்ச²விவத்து²ஸ்மிங் (சூளவ॰ 265) வுத்தா.
Niddese pattanikkujjanādīti ādi-saddena pattukkujjanaṃ gahitaṃ. Nissārosāraṇā matāti ‘‘nissāraṇā, osāraṇā’’ti ca matā. Tattha bhikkhūnaṃ alābhāya parisakkanādikehi aṭṭhahi aṅgehi samannāgatassa upāsakassa saṅghena asambhogakaraṇatthaṃ pattanikkujjanavasena nissāraṇā ca tasseva sammā vattantassa pattukkujjanavasena osāraṇā ca veditabbā. Sā khuddakavatthukkhandhake vaḍḍhalicchavivatthusmiṃ (cūḷava. 265) vuttā.
3001. ஸீமாதி³ஸம்முதி ஸம்முதி நாம. ஸா பஞ்சத³ஸதா⁴ மதாதி ஸீமாஸம்முதி திசீவரேனஅவிப்பவாஸஸம்முதி ஸந்த²தஸம்முதி ப⁴த்துத்³தே³ஸக ஸேனாஸனக்³கா³ஹாபக ப⁴ண்டா³கா³ரிக சீவரபடிக்³கா³ஹக யாகு³பா⁴ஜக ப²லபா⁴ஜக க²ஜ்ஜபா⁴ஜக அப்பமத்தகவிஸ்ஸஜ்ஜக ஸாடியக்³கா³ஹாபக பத்தக்³கா³ஹாபக ஆராமிகபேஸக ஸாமணேரபேஸகஸம்முதீதி ஏவங் ஸா ஸம்முதி பஞ்சத³ஸவிதா⁴ மதாதி அத்தோ². கதி²னஸ்ஸ வத்த²ங், தஸ்ஸ. மதோயேவ மதகோ, மதகஸ்ஸ வாஸோ மதகவாஸோ, தஸ்ஸ மதகவாஸஸோ, மதகசீவரஸ்ஸ.
3001.Sīmādisammuti sammuti nāma. Sā pañcadasadhā matāti sīmāsammuti ticīvarenaavippavāsasammuti santhatasammuti bhattuddesaka senāsanaggāhāpaka bhaṇḍāgārika cīvarapaṭiggāhaka yāgubhājaka phalabhājaka khajjabhājaka appamattakavissajjaka sāṭiyaggāhāpaka pattaggāhāpaka ārāmikapesaka sāmaṇerapesakasammutīti evaṃ sā sammuti pañcadasavidhā matāti attho. Kathinassa vatthaṃ, tassa. Matoyeva matako, matakassa vāso matakavāso, tassa matakavāsaso, matakacīvarassa.
3002. ஆனிஸங்ஸகெ²த்தபூ⁴தபஞ்சமாஸப்³ப⁴ந்தரேயேவ உப்³பா⁴ரோ அந்தருப்³பா⁴ரோ. குடிவத்து²ஸ்ஸ, விஹாரஸ்ஸ வத்து²னோ ச தே³ஸனா தே³ஸனா நாமாதி யோஜனா.
3002. Ānisaṃsakhettabhūtapañcamāsabbhantareyeva ubbhāro antarubbhāro. Kuṭivatthussa, vihārassa vatthuno ca desanā desanā nāmāti yojanā.
3003. திணவத்தா²ரகே த்³வின்னங் பக்கா²னங் ஸாதா⁴ரணவஸேன ட²பேதப்³ப³ஞத்தி ச பச்சா² பக்க²த்³வயே விஸுங் விஸுங் ட²பேதப்³பா³ த்³வே ஞத்தியோ சாதி திஸ்ஸோ ஞத்தியோ கம்மவாசாய அபா⁴வேன ஞத்திகம்மே ‘‘கம்மலக்க²ண’’ந்தி த³ஸ்ஸிதா, பச்சா² விஸுங் விஸுங் த்³வீஸு பக்கே²ஸு வத்தப்³பா³ த்³வே ஞத்திது³தியகம்மவாசா ஞத்திது³தியகம்மே ‘‘கம்மலக்க²ண’’ந்தி த³ஸ்ஸிதாதி தங் த³ஸ்ஸேதுமாஹ ‘‘திணவத்தா²ரகே கம்மே’’தி. ‘‘மோஹாரோபனதாதி³ஸூ’’தி இமினா பாசித்தியேஸு த³ஸ்ஸிதமோஹாரோபனகம்மஞ்ச அஞ்ஞவாத³கவிஹேஸகாரோபனகம்மாதி³ஞ்ச ஸங்க³ண்ஹாதி. எத்தா²தி இமஸ்மிங் ஞத்திது³தியகம்மே. கம்மலக்க²ணமேவ கம்மலக்க²ணதா.
3003. Tiṇavatthārake dvinnaṃ pakkhānaṃ sādhāraṇavasena ṭhapetabbañatti ca pacchā pakkhadvaye visuṃ visuṃ ṭhapetabbā dve ñattiyo cāti tisso ñattiyo kammavācāya abhāvena ñattikamme ‘‘kammalakkhaṇa’’nti dassitā, pacchā visuṃ visuṃ dvīsu pakkhesu vattabbā dve ñattidutiyakammavācā ñattidutiyakamme ‘‘kammalakkhaṇa’’nti dassitāti taṃ dassetumāha ‘‘tiṇavatthārake kamme’’ti. ‘‘Mohāropanatādisū’’ti iminā pācittiyesu dassitamohāropanakammañca aññavādakavihesakāropanakammādiñca saṅgaṇhāti. Etthāti imasmiṃ ñattidutiyakamme. Kammalakkhaṇameva kammalakkhaṇatā.
3004-5. இதி ஏவங் யதா²வுத்தனயேன இமே ஸத்த டா²னபே⁴தா³ ஞத்திது³தியகம்மஸ்ஸ. ஏவங் ஞத்திது³தியகம்மே ஸத்த டா²னானி த³ஸ்ஸெத்வா ஞத்திசதுத்த²கம்மே டா²னபே⁴த³ங் த³ஸ்ஸேதுமாஹ ‘‘ததா²’’திஆதி³.
3004-5.Iti evaṃ yathāvuttanayena ime satta ṭhānabhedā ñattidutiyakammassa. Evaṃ ñattidutiyakamme satta ṭhānāni dassetvā ñatticatutthakamme ṭhānabhedaṃ dassetumāha ‘‘tathā’’tiādi.
3006. தஜ்ஜனாதீ³னந்தி ஆதி³-ஸத்³தே³ன நியஸ்ஸாதீ³னங் க³ஹணங். தேஸங் ஸத்தன்னங் கம்மானங். பஸ்ஸத்³தி⁴ வூபஸமோ.
3006.Tajjanādīnanti ādi-saddena niyassādīnaṃ gahaṇaṃ. Tesaṃ sattannaṃ kammānaṃ. Passaddhi vūpasamo.
3007. ‘‘பி⁴க்கு²னீனங் ஓவாதோ³’’தி பி⁴க்கு²னோவாத³கஸம்முதி ப²லூபசாரேன வுத்தா.
3007.‘‘Bhikkhunīnaṃovādo’’ti bhikkhunovādakasammuti phalūpacārena vuttā.
3008-9. மூலபடிக்கஸ்ஸோ மூலாய படிகஸ்ஸனா, கா³தா²ப³ந்த⁴வஸேன க-காரஸ்ஸ த்³வேபா⁴வோ. உக்கி²த்தஸ்ஸானுவத்திகாதி உக்கி²த்தானுவத்திகா ஏகா யாவததியகா, அட்ட² ஸங்கா⁴தி³ஸேஸா, அரிட்டோ² சண்ட³காளீ ச த்³வே, இமே ஏகாத³ஸ யாவததியகா ப⁴வந்தி. இமேஸங் வஸாதி உக்கி²த்தானுவத்திகாதீ³னி புக்³க³லாதி⁴ட்டா²னேன வுத்தானி, இமேஸங் ஸமனுபா⁴ஸனகம்மானங் வஸேன. த³ஸேகாதி ஏகாத³ஸ.
3008-9.Mūlapaṭikkasso mūlāya paṭikassanā, gāthābandhavasena ka-kārassa dvebhāvo. Ukkhittassānuvattikāti ukkhittānuvattikā ekā yāvatatiyakā, aṭṭha saṅghādisesā, ariṭṭho caṇḍakāḷī ca dve, ime ekādasa yāvatatiyakā bhavanti. Imesaṃ vasāti ukkhittānuvattikādīni puggalādhiṭṭhānena vuttāni, imesaṃ samanubhāsanakammānaṃ vasena. Dasekāti ekādasa.
3011. ஏவங் சதுன்னம்பி கம்மானங் டா²னபே⁴த³ங் த³ஸ்ஸெத்வா அன்வயதோ, ப்³யதிரேகதோ ச காதப்³ப³ப்பகாரங் த³ஸ்ஸேதுமாஹ ‘‘அபலோகனகம்மஞ்சா’’திஆதி³. ஞத்தியாபி ந காரயே, ஞத்திது³தியேனபி ந காரயேதி யோஜனா.
3011. Evaṃ catunnampi kammānaṃ ṭhānabhedaṃ dassetvā anvayato, byatirekato ca kātabbappakāraṃ dassetumāha ‘‘apalokanakammañcā’’tiādi. Ñattiyāpi na kāraye, ñattidutiyenapi na kārayeti yojanā.
3012. அபலோகனகம்மே வுத்தலக்க²ணேன ஞத்திகம்மாதீ³னம்பி காதப்³ப³ப்பகாரோ ஸக்கா விஞ்ஞாதுந்தி தங் அத³ஸ்ஸெத்வா ஞத்திது³தியகம்மே லப்³ப⁴மானவிஸேஸங் த³ஸ்ஸேதுமாஹ ‘‘ஞத்திது³தியகம்மானீ’’திஆதி³. அபலோகெத்வா காதப்³பா³னி லஹுகானிபி ஞத்திது³தியகம்மானி அத்தீ²தி யோஜனா. தானி பன கதமானீதி ஆஹ ‘‘ஸப்³பா³ ஸம்முதியோ ஸியு’’ந்தி. எத்த² ஸீமாஸம்முதிங் வினா ஸேஸா திசீவரேனஅவிப்பவாஸஸம்முதிஆத³யோ ஸப்³பா³பி ஸம்முதியோதி அத்தோ².
3012. Apalokanakamme vuttalakkhaṇena ñattikammādīnampi kātabbappakāro sakkā viññātunti taṃ adassetvā ñattidutiyakamme labbhamānavisesaṃ dassetumāha ‘‘ñattidutiyakammānī’’tiādi. Apaloketvā kātabbāni lahukānipi ñattidutiyakammāni atthīti yojanā. Tāni pana katamānīti āha ‘‘sabbā sammutiyo siyu’’nti. Ettha sīmāsammutiṃ vinā sesā ticīvarenaavippavāsasammutiādayo sabbāpi sammutiyoti attho.
3013. ஸேஸானீதி யதா²வுத்தேஹி ஸேஸானி ஸீமாஸம்முதிஆதீ³னி ச² கம்மானி. ந வட்டதீதி ந வட்டந்தி, கா³தா²ப³ந்த⁴வஸேன ந-காரலோபோ. யதா²ஹ ‘‘ஸீமாஸம்முதி, ஸீமாஸமூஹனநங், கதி²னதா³னங், கதி²னுத்³தா⁴ரோ, குடிவத்து²தே³ஸனா, விஹாரவத்து²தே³ஸனாதி இமானி ச² கம்மானி க³ருகானி அபலோகெத்வா காதுங் ந வட்டந்தி, ஞத்திது³தியகம்மவாசங் ஸாவெத்வாவ காதப்³பா³னீ’’தி (பரி॰ அட்ட²॰ 482). ‘‘அபலோகெத்வா காதுங் பன ந வட்டதீ’’தி இத³ங் நித³ஸ்ஸனமத்தங், ஞத்திசதுத்த²கம்மவஸேனாபி காதுங் ந வட்டந்தேவ. தேனேவாஹ ‘‘யதா²வுத்தனயேனேவ, தேன தேனேவ காரயே’’தி, யோ யோ நயோ தங் தங் கம்மங் காதுங் வுத்தோ, தேனேவ தேனேவ நயேனாதி அத்தோ².
3013.Sesānīti yathāvuttehi sesāni sīmāsammutiādīni cha kammāni. Na vaṭṭatīti na vaṭṭanti, gāthābandhavasena na-kāralopo. Yathāha ‘‘sīmāsammuti, sīmāsamūhananaṃ, kathinadānaṃ, kathinuddhāro, kuṭivatthudesanā, vihāravatthudesanāti imāni cha kammāni garukāni apaloketvā kātuṃ na vaṭṭanti, ñattidutiyakammavācaṃ sāvetvāva kātabbānī’’ti (pari. aṭṭha. 482). ‘‘Apaloketvā kātuṃ pana na vaṭṭatī’’ti idaṃ nidassanamattaṃ, ñatticatutthakammavasenāpi kātuṃ na vaṭṭanteva. Tenevāha ‘‘yathāvuttanayeneva, tena teneva kāraye’’ti, yo yo nayo taṃ taṃ kammaṃ kātuṃ vutto, teneva teneva nayenāti attho.
சதுப்³பி³த⁴கம்மகதா²வண்ணனா.
Catubbidhakammakathāvaṇṇanā.
