| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
சதுப்³பி³த⁴வினயகதா²வண்ணனா
Catubbidhavinayakathāvaṇṇanā
45. நீஹரித்வாதி ஸாஸனதோ நீஹரித்வா. ததா² ஹி ‘‘பஞ்சஹுபாலி அங்கே³ஹி ஸமன்னாக³தேன பி⁴க்கு²னா நானுயுஞ்ஜிதப்³ப³ங். கதமேஹி பஞ்சஹி? ஸுத்தங் ந ஜானாதி, ஸுத்தானுலோமங் ந ஜானாதீ’’தி (பரி॰ 442) ஏவமாதி³பரியத்திஸாஸனதோ ஸுத்தங் ஸுத்தானுலோமஞ்ச நீஹரித்வா பகாஸேஸுங், ‘‘அனாபத்தி ஏவங் அம்ஹாகங் ஆசரியானங் உக்³க³ஹோ பரிபுச்சா²தி க³ண்ஹாதீ’’தி ஏவமாதி³பரியத்திஸாஸனதோ ஆசரியவாத³ங் நீஹரித்வா பகாஸேஸுங், பா⁴ருகச்ச²கவத்து²ஸ்மிங் (பாரா॰ 78) ‘‘ஆயஸ்மா உபாலி ஏவமாஹ அனாபத்தி ஆவுஸோ ஸுபினந்தேனா’’தி ஏவமாதி³பரியத்திஸாஸனதோ ஏவ அத்தனோமதிங் நீஹரித்வா பகாஸேஸுங். தாய ஹி அத்தனோமதியா தே²ரோ ஏதத³க்³க³ட்டா²னங் லபி⁴.
45.Nīharitvāti sāsanato nīharitvā. Tathā hi ‘‘pañcahupāli aṅgehi samannāgatena bhikkhunā nānuyuñjitabbaṃ. Katamehi pañcahi? Suttaṃ na jānāti, suttānulomaṃ na jānātī’’ti (pari. 442) evamādipariyattisāsanato suttaṃ suttānulomañca nīharitvā pakāsesuṃ, ‘‘anāpatti evaṃ amhākaṃ ācariyānaṃ uggaho paripucchāti gaṇhātī’’ti evamādipariyattisāsanato ācariyavādaṃ nīharitvā pakāsesuṃ, bhārukacchakavatthusmiṃ (pārā. 78) ‘‘āyasmā upāli evamāha anāpatti āvuso supinantenā’’ti evamādipariyattisāsanato eva attanomatiṃ nīharitvā pakāsesuṃ. Tāya hi attanomatiyā thero etadaggaṭṭhānaṃ labhi.
வுத்தந்தி நாக³ஸேனத்தே²ரேன வுத்தங். பஜ்ஜதே அனேன அத்தோ²தி பத³ங், ப⁴க³வதா கண்டா²தி³வண்ணப்பவத்திட்டா²னங் ஆஹச்ச விஸேஸெத்வா பா⁴ஸிதங் பத³ங் ஆஹச்சபத³ங், ப⁴க³வதோயேவ வசனங். தேனாஹ ‘‘ஆஹச்சபத³ந்தி ஸுத்தங் அதி⁴ப்பேத’’ந்தி. ‘‘இத³ங் கப்பதி, இத³ங் ந கப்பதீ’’தி ஏவங் அவிஸேஸெத்வா ‘‘யங், பி⁴க்க²வே, மயா ‘இத³ங் ந கப்பதீ’தி அப்படிக்கி²த்தங், தஞ்சே அகப்பியங் அனுலோமேதி, கப்பியங் படிபா³ஹதி, தங் வோ ந கப்பதீ’’திஆதி³னா (மஹாவ॰ 305) வுத்தங் ஸாமஞ்ஞலக்க²ணங் இத⁴ ‘‘ரஸோ’’தி அதி⁴ப்பேதந்தி ஆஹ ‘‘ரஸோதி ஸுத்தானுலோம’’ந்தி. த⁴ம்மஸங்கா³ஹகப்பபு⁴திஆசரியபரம்பரதோ ஆனீதா அட்ட²கதா²தந்தி இத⁴ ‘‘ஆசரியவங்ஸோ’’தி அதி⁴ப்பேதாதி ஆஹ ‘‘ஆசரியவங்ஸோதி ஆசரியவாதோ³’’தி.
Vuttanti nāgasenattherena vuttaṃ. Pajjate anena atthoti padaṃ, bhagavatā kaṇṭhādivaṇṇappavattiṭṭhānaṃ āhacca visesetvā bhāsitaṃ padaṃ āhaccapadaṃ, bhagavatoyeva vacanaṃ. Tenāha ‘‘āhaccapadanti suttaṃ adhippeta’’nti. ‘‘Idaṃ kappati, idaṃ na kappatī’’ti evaṃ avisesetvā ‘‘yaṃ, bhikkhave, mayā ‘idaṃ na kappatī’ti appaṭikkhittaṃ, tañce akappiyaṃ anulometi, kappiyaṃ paṭibāhati, taṃ vo na kappatī’’tiādinā (mahāva. 305) vuttaṃ sāmaññalakkhaṇaṃ idha ‘‘raso’’ti adhippetanti āha ‘‘rasoti suttānuloma’’nti. Dhammasaṅgāhakappabhutiācariyaparamparato ānītā aṭṭhakathātanti idha ‘‘ācariyavaṃso’’ti adhippetāti āha ‘‘ācariyavaṃsoti ācariyavādo’’ti.
இத⁴ வினயவினிச்ச²யஸ்ஸ அதி⁴கதத்தா தத³னுச்ச²விகமேவ ஸுத்தங் த³ஸ்ஸெந்தோ ஆஹ – ‘‘ஸுத்தங் நாம ஸகலே வினயபிடகே பாளீ’’தி. மஹாபதே³ஸாதி மஹாஓகாஸா, மஹந்தானி வினயஸ்ஸ பதிட்டா²பனட்டா²னானி யேஸு பதிட்டா²பிதோ வினயோ வினிச்ச²யதி அஸந்தே³ஹதோ. மஹந்தானி வா காரணானி மஹாபதே³ஸா, மஹந்தானி வினயவினிச்ச²யகாரணானீதி வுத்தங் ஹோதி. ‘‘அத்த²தோ பன ‘யங், பி⁴க்க²வே’திஆதி³னா வுத்தா ஸாதி⁴ப்பாயா பாளியேவ மஹாபதே³ஸா’’தி வத³ந்தி. தேனேவாஹ ‘‘யே ப⁴க³வதா ஏவங் வுத்தா’’திஆதி³. இமே ச மஹாபதே³ஸா க²ந்த⁴கே ஆக³தா, தஸ்மா தேஸங் வினிச்ச²யகதா² தத்தே²வ ஆவி ப⁴விஸ்ஸதீதி இத⁴ ந வுச்சதி. யதி³பி தத்த² தத்த² ப⁴க³வதா பவத்திதா பகிண்ணகதே³ஸனாவ அட்ட²கதா², ஸா பன த⁴ம்மஸங்கா³ஹகேஹி பட²மங் தீணி பிடகானி ஸங்கா³யித்வா தஸ்ஸ அத்த²வண்ணனானுரூபேனேவ வாசனாமக்³க³ங் ஆரோபிதத்தா ‘‘ஆசரியவாதோ³’’தி வுச்சதி ஆசரியா வத³ந்தி ஸங்வண்ணெந்தி பாளிங் ஏதேனாதி கத்வா. தேனாஹ – ‘‘ஆசரியவாதோ³ நாம…பே॰… அட்ட²கதா²தந்தீ’’தி. திஸ்ஸோ ஸங்கீ³தியோ ஆருள்ஹோயேவ ச பு³த்³த⁴வசனஸ்ஸ அத்த²ஸங்வண்ணனாபூ⁴தோ கதா²மக்³கோ³ மஹாமஹிந்த³த்தே²ரேன தம்ப³பண்ணிதீ³பங் ஆப⁴தோ, பச்சா² தம்ப³பண்ணியேஹி மஹாதே²ரேஹி ஸீஹளபா⁴ஸாய ட²பிதோ நிகாயந்தரலத்³தி⁴ஸங்கரபரிஹரணத்த²ங். கிஞ்சாபி அத்தனோமதி ஸுத்தாதீ³ஹி ஸங்ஸந்தி³த்வாவ பரிகப்பீயதி, ததா²பி ஸா ந ஸுத்தாதீ³ஸு விஸேஸதோ நித்³தி³ட்டா²தி ஆஹ ‘‘ஸுத்தஸுத்தானுலோமஆசரியவாதே³ முஞ்சித்வா’’தி. அனுபு³த்³தி⁴யாதி ஸுத்தாதீ³னியேவ அனுக³தபு³த்³தி⁴யா. நயக்³கா³ஹேனாதி ஸுத்தாதி³தோ லப்³ப⁴மானநயக்³க³ஹணேன.
Idha vinayavinicchayassa adhikatattā tadanucchavikameva suttaṃ dassento āha – ‘‘suttaṃ nāma sakale vinayapiṭake pāḷī’’ti. Mahāpadesāti mahāokāsā, mahantāni vinayassa patiṭṭhāpanaṭṭhānāni yesu patiṭṭhāpito vinayo vinicchayati asandehato. Mahantāni vā kāraṇāni mahāpadesā, mahantāni vinayavinicchayakāraṇānīti vuttaṃ hoti. ‘‘Atthato pana ‘yaṃ, bhikkhave’tiādinā vuttā sādhippāyā pāḷiyeva mahāpadesā’’ti vadanti. Tenevāha ‘‘ye bhagavatā evaṃ vuttā’’tiādi. Ime ca mahāpadesā khandhake āgatā, tasmā tesaṃ vinicchayakathā tattheva āvi bhavissatīti idha na vuccati. Yadipi tattha tattha bhagavatā pavattitā pakiṇṇakadesanāva aṭṭhakathā, sā pana dhammasaṅgāhakehi paṭhamaṃ tīṇi piṭakāni saṅgāyitvā tassa atthavaṇṇanānurūpeneva vācanāmaggaṃ āropitattā ‘‘ācariyavādo’’ti vuccati ācariyā vadanti saṃvaṇṇenti pāḷiṃ etenāti katvā. Tenāha – ‘‘ācariyavādo nāma…pe… aṭṭhakathātantī’’ti. Tisso saṅgītiyo āruḷhoyeva ca buddhavacanassa atthasaṃvaṇṇanābhūto kathāmaggo mahāmahindattherena tambapaṇṇidīpaṃ ābhato, pacchā tambapaṇṇiyehi mahātherehi sīhaḷabhāsāya ṭhapito nikāyantaraladdhisaṅkarapariharaṇatthaṃ. Kiñcāpi attanomati suttādīhi saṃsanditvāva parikappīyati, tathāpi sā na suttādīsu visesato niddiṭṭhāti āha ‘‘suttasuttānulomaācariyavāde muñcitvā’’ti. Anubuddhiyāti suttādīniyeva anugatabuddhiyā. Nayaggāhenāti suttādito labbhamānanayaggahaṇena.
அத்தனோமதிங் ஸாமஞ்ஞதோ பட²மங் த³ஸ்ஸெத்வா இதா³னி தமேவ விஸேஸெத்வா த³ஸ்ஸெந்தோ ‘‘அபிசா’’திஆதி³மாஹ. இதா³னி தத்த² படிபஜ்ஜிதப்³பா³காரங் த³ஸ்ஸெந்தோ ஆஹ – ‘‘தங் பன அத்தனோமதிங் க³ஹெத்வா கதெ²ந்தேனா’’திஆதி³. அத்தே²னாதி அத்தனா ஸல்லக்கி²தேன அத்தே²ன. ஆசரியவாதே³ ஓதாரேதப்³பா³தி ஆசரியவாதே³ ஞாணேன அனுப்பவேஸேதப்³பா³. ஸப்³ப³து³ப்³ப³லாதி புக்³க³லஸ்ஸ ஸயங் படிபா⁴னபா⁴வதோ. பமாத³பாட²வஸேன ஆசரியவாத³ஸ்ஸ கதா³சி ஸுத்தானுலோமேன அஸங்ஸந்த³னாபி ஸியா, ஸோ ந க³ஹேதப்³போ³தி த³ஸ்ஸெந்தோ ஆஹ – ‘‘ஆசரியவாதோ³பி…பே॰… ஸமெந்தோ ஏவ க³ஹேதப்³போ³’’தி. ஸமெந்தமேவ க³ஹேதப்³ப³ந்தி யதா² ஸுத்தேன ஸங்ஸந்த³தி, ஏவங் மஹாபதே³ஸதோ அத்தா² உத்³த⁴ரிதப்³பா³தி த³ஸ்ஸேதி. ஸுத்தானுலோமஸ்ஸ ஸுத்தேகதே³ஸத்தேபி ஸுத்தே விய ‘‘இத³ங் கப்பதி, இத³ங் ந கப்பதீ’’தி பரிச்சி²ந்தி³த்வா ஆஹச்சபா⁴ஸிதங் கிஞ்சி நத்தீ²தி ஆஹ – ‘‘ஸுத்தானுலோமதோ ஹி ஸுத்தமேவ ப³லவதர’’ந்தி. அப்படிவத்தியந்தி அப்படிபா³ஹியங். காரகஸங்க⁴ஸதி³ஸந்தி பமாணத்தா ஸங்கீ³திகாரகஸங்க⁴ஸதி³ஸங். பு³த்³தா⁴னங் டி²தகாலஸதி³ஸந்தி இமினா பு³த்³தே⁴ஹேவ கதி²தத்தா த⁴ரமானபு³த்³த⁴ஸதி³ஸந்தி வுத்தங் ஹோதி. ஸுத்தே ஹி படிபா³ஹிதே பு³த்³தோ⁴வ படிபா³ஹிதோ ஹோதி. ஸகவாதீ³ ஸுத்தங் க³ஹெத்வா கதே²தீதி ஸகவாதீ³ அத்தனோ ஸுத்தங் க³ஹெத்வா வோஹரதி. பரவாதீ³ ஸுத்தானுலோமந்தி அஞ்ஞனிகாயவாதீ³ அத்தனோ நிகாயே ஸுத்தானுலோமங் க³ஹெத்வா கதே²தி. கே²பங் வா க³ரஹங் வா அகத்வாதி ‘‘கிங் இமினா’’தி கே²பங் வா ‘‘கிமேஸ பா³லோ வத³தீ’’தி க³ரஹங் வா அகத்வா. ஸுத்தானுலோமந்தி பரவாதி³னா வுத்தங் அஞ்ஞனிகாயே ஸுத்தானுலோமங். ஸுத்தே ஓதாரேதப்³ப³ந்தி ஸகவாதி³னா அத்தனோ ஸுத்தே ஓதாரேதப்³ப³ங். ஸுத்தஸ்மிங்யேவ டா²தப்³ப³ந்தி அத்தனோ ஸுத்தேயேவ டா²தப்³ப³ங். ஏவங் ஸேஸவாரேஸுபி அத்த²யோஜனா காதப்³பா³. அயந்தி ஸகவாதீ³. பரோதி அஞ்ஞனிகாயவாதீ³. ஏவங் ஸேஸேஸுபி.
Attanomatiṃ sāmaññato paṭhamaṃ dassetvā idāni tameva visesetvā dassento ‘‘apicā’’tiādimāha. Idāni tattha paṭipajjitabbākāraṃ dassento āha – ‘‘taṃ pana attanomatiṃ gahetvā kathentenā’’tiādi. Atthenāti attanā sallakkhitena atthena. Ācariyavāde otāretabbāti ācariyavāde ñāṇena anuppavesetabbā. Sabbadubbalāti puggalassa sayaṃ paṭibhānabhāvato. Pamādapāṭhavasena ācariyavādassa kadāci suttānulomena asaṃsandanāpi siyā, so na gahetabboti dassento āha – ‘‘ācariyavādopi…pe… samento eva gahetabbo’’ti. Samentameva gahetabbanti yathā suttena saṃsandati, evaṃ mahāpadesato atthā uddharitabbāti dasseti. Suttānulomassa suttekadesattepi sutte viya ‘‘idaṃ kappati, idaṃ na kappatī’’ti paricchinditvā āhaccabhāsitaṃ kiñci natthīti āha – ‘‘suttānulomato hi suttameva balavatara’’nti. Appaṭivattiyanti appaṭibāhiyaṃ. Kārakasaṅghasadisanti pamāṇattā saṅgītikārakasaṅghasadisaṃ. Buddhānaṃ ṭhitakālasadisanti iminā buddheheva kathitattā dharamānabuddhasadisanti vuttaṃ hoti. Sutte hi paṭibāhite buddhova paṭibāhito hoti. Sakavādī suttaṃ gahetvā kathetīti sakavādī attano suttaṃ gahetvā voharati. Paravādī suttānulomanti aññanikāyavādī attano nikāye suttānulomaṃ gahetvā katheti. Khepaṃ vā garahaṃ vā akatvāti ‘‘kiṃ iminā’’ti khepaṃ vā ‘‘kimesa bālo vadatī’’ti garahaṃ vā akatvā. Suttānulomanti paravādinā vuttaṃ aññanikāye suttānulomaṃ. Sutte otāretabbanti sakavādinā attano sutte otāretabbaṃ. Suttasmiṃyeva ṭhātabbanti attano sutteyeva ṭhātabbaṃ. Evaṃ sesavāresupi atthayojanā kātabbā. Ayanti sakavādī. Paroti aññanikāyavādī. Evaṃ sesesupi.
நனு ச ‘‘ஸுத்தானுலோமதோ ஸுத்தமேவ ப³லவதர’’ந்தி ஹெட்டா² வுத்தங், இத⁴ பன ‘‘ஸுத்தானுலோமே ஸுத்தங் ஓதாரேதப்³ப³’’ந்திஆதி³ கஸ்மா வுத்தந்தி? நாயங் விரோதோ⁴. ‘‘ஸுத்தானுலோமதோ ஸுத்தமேவ ப³லவதர’’ந்தி ஹி இத³ங் ஸகமதேயேவ ஸுத்தங் ஸந்தா⁴ய வுத்தங். தத்த² ஹி ஸகமதிபரியாபன்னமேவ ஸுத்தாதி³ங் ஸந்தா⁴ய ‘‘அத்தனோமதி ஸப்³ப³து³ப்³ப³லா, அத்தனோமதிதோ ஆசரியவாதோ³ ப³லவதரோ, ஆசரியவாத³தோ ஸுத்தானுலோமங் ப³லவதரங், ஸுத்தானுலோமதோ ஸுத்தமேவ ப³லவதர’’ந்தி ச வுத்தங். இத⁴ பன பரவாதி³னா ஆனீதங் அஞ்ஞனிகாயே ஸுத்தங் ஸந்தா⁴ய ‘‘ஸுத்தானுலோமே ஸுத்தங் ஓதாரேதப்³ப³’’ந்திஆதி³ வுத்தங். தஸ்மா பரவாதி³னா ஆனீதங் ஸுத்தாதி³ங் அத்தனோ ஸுத்தானுலோமஆசரியவாத³அத்தனோமதீஸு ஓதாரெத்வா ஸமெந்தங்யேவ க³ஹேதப்³ப³ங், இதரங் ந க³ஹேதப்³ப³ந்தி அயங் நயோ இத⁴ வுச்சதீதி ந கோசி புப்³பா³பரவிரோதோ⁴.
Nanu ca ‘‘suttānulomato suttameva balavatara’’nti heṭṭhā vuttaṃ, idha pana ‘‘suttānulome suttaṃ otāretabba’’ntiādi kasmā vuttanti? Nāyaṃ virodho. ‘‘Suttānulomato suttameva balavatara’’nti hi idaṃ sakamateyeva suttaṃ sandhāya vuttaṃ. Tattha hi sakamatipariyāpannameva suttādiṃ sandhāya ‘‘attanomati sabbadubbalā, attanomatito ācariyavādo balavataro, ācariyavādato suttānulomaṃ balavataraṃ, suttānulomato suttameva balavatara’’nti ca vuttaṃ. Idha pana paravādinā ānītaṃ aññanikāye suttaṃ sandhāya ‘‘suttānulome suttaṃ otāretabba’’ntiādi vuttaṃ. Tasmā paravādinā ānītaṃ suttādiṃ attano suttānulomaācariyavādaattanomatīsu otāretvā samentaṃyeva gahetabbaṃ, itaraṃ na gahetabbanti ayaṃ nayo idha vuccatīti na koci pubbāparavirodho.
பா³ஹிரகஸுத்தந்தி திஸ்ஸோ ஸங்கீ³தியோ அனாருள்ஹகு³ள்ஹவெஸ்ஸந்தராதீ³னி மஹாஸங்கி⁴கனிகாயவாஸீனங் ஸுத்தானி. வேத³ல்லாதீ³னந்தி ஆதி³-ஸத்³தே³ன கு³ள்ஹஉம்மக்³கா³தி³க்³க³ஹணங் வேதி³தப்³ப³ங், இதரங் கா³ரய்ஹஸுத்தங் ந க³ஹேதப்³ப³ங். அத்தனோமதியமேவ டா²தப்³ப³ந்தி இமினா அஞ்ஞனிகாயதோ ஆனீதஸுத்ததோபி ஸகனிகாயே அத்தனோமதியேவ ப³லவதராதி த³ஸ்ஸேதி. ஸகவாதீ³ ஸுத்தங் க³ஹெத்வா கதே²தி, பரவாதீ³பி ஸுத்தமேவாதிஏவமாதி³னா ஸமானஜாதிகானங் வஸேன வாரோ ந வுத்தோ, ஸுத்தஸ்ஸ ஸுத்தேயேவ ஓதாரணங் பி⁴ன்னங் விய ஹுத்வா ந பஞ்ஞாயதி, வுத்தனயேனேவ ச ஸக்கா யோஜேதுந்தி.
Bāhirakasuttanti tisso saṅgītiyo anāruḷhaguḷhavessantarādīni mahāsaṅghikanikāyavāsīnaṃ suttāni. Vedallādīnanti ādi-saddena guḷhaummaggādiggahaṇaṃ veditabbaṃ, itaraṃ gārayhasuttaṃ na gahetabbaṃ. Attanomatiyameva ṭhātabbanti iminā aññanikāyato ānītasuttatopi sakanikāye attanomatiyeva balavatarāti dasseti. Sakavādī suttaṃ gahetvā katheti, paravādīpi suttamevātievamādinā samānajātikānaṃ vasena vāro na vutto, suttassa sutteyeva otāraṇaṃ bhinnaṃ viya hutvā na paññāyati, vuttanayeneva ca sakkā yojetunti.
இதா³னி ஸகவாதீ³பரவாதீ³னங் கப்பியாகப்பியாதி³பா⁴வங் ஸந்தா⁴ய விவாதே³ உப்பன்னே தத்த² படிபஜ்ஜிதப்³ப³விதி⁴ங் த³ஸ்ஸெந்தோ ஆஹ – ‘‘அத² பனாயங் கப்பியந்தி க³ஹெத்வா கதே²தீ’’திஆதி³. தத்த² ஸுத்தே ச ஸுத்தானுலோமே ச ஓதாரேதப்³ப³ந்தி ஸகவாதி³னா அத்தனோயேவ ஸுத்தே ச ஸுத்தானுலோமே ச ஓதாரேதப்³ப³ங். பரோ காரணங் ந விந்த³தீதி பரவாதீ³ காரணங் ந லப⁴தி. ஸுத்ததோ ப³ஹுங் காரணஞ்ச வினிச்ச²யஞ்ச த³ஸ்ஸேதீதி பரவாதீ³ அத்தனோ ஸுத்ததோ ப³ஹுங் காரணங் வினிச்ச²யஞ்ச ஆஹரித்வா த³ஸ்ஸேதி. ஸாதூ⁴தி ஸம்படிச்சி²த்வா அகப்பியேவ டா²தப்³ப³ந்தி இமினா அத்தனோ நிகாயே ஸுத்தாதீ³னி அலப⁴ந்தேன ஸகவாதி³னா பரவாதீ³வசனேயேவ டா²தப்³ப³ந்தி வத³தி. த்³வின்னம்பி காரணச்சா²யா தி³ஸ்ஸதீதி ஸகவாதீ³பரவாதீ³னங் உபி⁴ன்னம்பி கப்பியாகப்பியபா⁴வஸாத⁴கங் காரணபதிரூபகங் தி³ஸ்ஸதி. யதி³ த்³வின்னம்பி காரணச்சா²யா தி³ஸ்ஸதி, கஸ்மா ‘‘அகப்பியேவ டா²தப்³ப³’’ந்தி ஆஹ ‘‘வினயஞ்ஹி பத்வா’’திஆதி³. ‘‘வினயங் பத்வா’’தி வுத்தமேவத்த²ங் பாகடதரங் கத்வா த³ஸ்ஸெந்தோ ஆஹ ‘‘கப்பியாகப்பியவிசாரணமாக³ம்மா’’தி. ருந்தி⁴தப்³ப³ந்திஆதீ³ஸு து³ப்³பி³ஞ்ஞெய்யவினிச்ச²யே கப்பியாகப்பியபா⁴வே ஸதி கப்பியந்தி க³ஹணங் ருந்தி⁴தப்³ப³ங், அகப்பியந்தி க³ஹணங் கா³ள்ஹங் காதப்³ப³ங். அபராபரங் பவத்தகப்பியக³ஹணஸோதங் பச்சி²ந்தி³தப்³ப³ங், க³ருகபா⁴வஸங்கா²தே அகப்பியபா⁴வேயேவ டா²தப்³ப³ந்தி அத்தோ².
Idāni sakavādīparavādīnaṃ kappiyākappiyādibhāvaṃ sandhāya vivāde uppanne tattha paṭipajjitabbavidhiṃ dassento āha – ‘‘atha panāyaṃ kappiyanti gahetvā kathetī’’tiādi. Tattha sutte ca suttānulome ca otāretabbanti sakavādinā attanoyeva sutte ca suttānulome ca otāretabbaṃ. Paro kāraṇaṃ na vindatīti paravādī kāraṇaṃ na labhati. Suttato bahuṃ kāraṇañca vinicchayañca dassetīti paravādī attano suttato bahuṃ kāraṇaṃ vinicchayañca āharitvā dasseti. Sādhūti sampaṭicchitvā akappiyeva ṭhātabbanti iminā attano nikāye suttādīni alabhantena sakavādinā paravādīvacaneyeva ṭhātabbanti vadati. Dvinnampi kāraṇacchāyā dissatīti sakavādīparavādīnaṃ ubhinnampi kappiyākappiyabhāvasādhakaṃ kāraṇapatirūpakaṃ dissati. Yadi dvinnampi kāraṇacchāyā dissati, kasmā ‘‘akappiyeva ṭhātabba’’nti āha ‘‘vinayañhi patvā’’tiādi. ‘‘Vinayaṃ patvā’’ti vuttamevatthaṃ pākaṭataraṃ katvā dassento āha ‘‘kappiyākappiyavicāraṇamāgammā’’ti. Rundhitabbantiādīsu dubbiññeyyavinicchaye kappiyākappiyabhāve sati kappiyanti gahaṇaṃ rundhitabbaṃ, akappiyanti gahaṇaṃ gāḷhaṃ kātabbaṃ. Aparāparaṃ pavattakappiyagahaṇasotaṃ pacchinditabbaṃ, garukabhāvasaṅkhāte akappiyabhāveyeva ṭhātabbanti attho.
ப³ஹூஹி ஸுத்தவினிச்ச²யகாரணேஹீதி ப³ஹூஹி ஸுத்தேஹி சேவ ததோ ஆனீதவினிச்ச²யகாரணேஹி ச. அத்தனோ க³ஹணங் ந விஸ்ஸஜ்ஜேதப்³ப³ந்தி ஸகவாதி³னா அத்தனோ அகப்பியந்தி க³ஹணங் ந விஸ்ஸஜ்ஜேதப்³ப³ங். இதா³னி வுத்தமேவத்த²ங் நிக³மெந்தோ ‘‘ஏவ’’ந்திஆதி³மாஹ. தத்த² யோதி ஸகவாதீ³பரவாதீ³ஸு யோ கோசி. கேசி பன ‘‘ஸகவாதீ³ஸுயேவ யோ கோசி இதா⁴தி⁴ப்பேதோ’’தி வத³ந்தி, ஏவங் ஸந்தே ‘‘அத² பனாயங் கப்பியந்தி க³ஹெத்வா கதே²தீ’’திஆதீ³ஸு ஸப்³ப³த்த² உபோ⁴பி ஸகவாதி³னோயேவ ஸியுங் ஹெட்டா² வுத்தஸ்ஸேவ நிக³மனவஸேன ‘‘ஏவ’’ந்திஆதீ³னங் வுத்தத்தா, தஸ்மா தங் ந க³ஹேதப்³ப³ங். அதிரேககாரணங் லப⁴தீதி எத்த² ஸுத்தாதீ³ஸு புரிமங் புரிமங் அதிரேககாரணங் நாம, யோ வா ஸுத்தாதீ³ஸு சதூஸு ப³ஹுதரங் காரணங் லப⁴தி, ஸோ அதிரேககாரணங் லப⁴தி நாம.
Bahūhi suttavinicchayakāraṇehīti bahūhi suttehi ceva tato ānītavinicchayakāraṇehi ca. Attano gahaṇaṃ na vissajjetabbanti sakavādinā attano akappiyanti gahaṇaṃ na vissajjetabbaṃ. Idāni vuttamevatthaṃ nigamento ‘‘eva’’ntiādimāha. Tattha yoti sakavādīparavādīsu yo koci. Keci pana ‘‘sakavādīsuyeva yo koci idhādhippeto’’ti vadanti, evaṃ sante ‘‘atha panāyaṃ kappiyanti gahetvā kathetī’’tiādīsu sabbattha ubhopi sakavādinoyeva siyuṃ heṭṭhā vuttasseva nigamanavasena ‘‘eva’’ntiādīnaṃ vuttattā, tasmā taṃ na gahetabbaṃ. Atirekakāraṇaṃ labhatīti ettha suttādīsu purimaṃ purimaṃ atirekakāraṇaṃ nāma, yo vā suttādīsu catūsu bahutaraṃ kāraṇaṃ labhati, so atirekakāraṇaṃ labhati nāma.
ஸுட்டு² பவத்தி ஏதஸ்ஸாதி ஸுப்பவத்தி, ஸுட்டு² பவத்ததி ஸீலேனாதி வா ஸுப்பவத்தி. தேனாஹ ‘‘ஸுப்பவத்தீதி ஸுட்டு² பவத்த’’ந்தி. வாசாய உக்³க³தங் வாசுக்³க³தங், வசஸா ஸுக்³க³ஹிதந்தி வுத்தங் ஹோதி. ஸுத்ததோதி இமஸ்ஸ விவரணங் ‘‘பாளிதோ’’தி. எத்த² ச ‘‘ஸுத்தங் நாம ஸகலங் வினயபிடக’’ந்தி வுத்தத்தா பாளிதோதி தத³த்த²தீ³பிகா அஞ்ஞாயேவ பாளி வேதி³தப்³பா³. அனுப்³யஞ்ஜனஸோதி இமஸ்ஸ விவரணங் ‘‘பரிபுச்ச²தோ ச அட்ட²கதா²தோ சா’’தி. பாளிங் அனுக³ந்த்வா அத்த²ஸ்ஸ ப்³யஞ்ஜனதோ பகாஸனதோ அனுப்³யஞ்ஜனந்தி ஹி பரிபுச்சா² அட்ட²கதா² ச வுச்சதி. எத்த² ச அட்ட²கதா²ய விஸுங் க³ஹிதத்தா பரிபுச்சா²தி தே²ரவாதோ³ வுத்தோ. ஸங்க⁴பே⁴த³ஸ்ஸ புப்³ப³பா⁴கே³ பவத்தகலஹஸ்ஸேதங் அதி⁴வசனங் ஸங்க⁴ராஜீதி. குக்குச்சகோதி அணுமத்தேஸுபி வஜ்ஜேஸு ப⁴யத³ஸ்ஸனவஸேன குக்குச்சங் உப்பாதெ³ந்தோ. தந்திங் அவிஸங்வாதெ³த்வாதி பாளிங் அஞ்ஞதா² அகத்வா. அவோக்கமந்தோதி அனதிக்கமந்தோ.
Suṭṭhu pavatti etassāti suppavatti, suṭṭhu pavattati sīlenāti vā suppavatti. Tenāha ‘‘suppavattīti suṭṭhu pavatta’’nti. Vācāya uggataṃ vācuggataṃ, vacasā suggahitanti vuttaṃ hoti. Suttatoti imassa vivaraṇaṃ ‘‘pāḷito’’ti. Ettha ca ‘‘suttaṃ nāma sakalaṃ vinayapiṭaka’’nti vuttattā pāḷitoti tadatthadīpikā aññāyeva pāḷi veditabbā. Anubyañjanasoti imassa vivaraṇaṃ ‘‘paripucchato ca aṭṭhakathāto cā’’ti. Pāḷiṃ anugantvā atthassa byañjanato pakāsanato anubyañjananti hi paripucchā aṭṭhakathā ca vuccati. Ettha ca aṭṭhakathāya visuṃ gahitattā paripucchāti theravādo vutto. Saṅghabhedassa pubbabhāge pavattakalahassetaṃ adhivacanaṃ saṅgharājīti. Kukkuccakoti aṇumattesupi vajjesu bhayadassanavasena kukkuccaṃ uppādento. Tantiṃ avisaṃvādetvāti pāḷiṃ aññathā akatvā. Avokkamantoti anatikkamanto.
வித்து²னதீதி அத்த²ங் அதி³ஸ்வா நித்து²னதி. விப்ப²ந்த³தீதி கம்பதி. ஸந்திட்டி²துங் ந ஸக்கோதீதி ஏகஸ்மிங்யேவ அத்தே² பதிட்டா²துங் ந ஸக்கோதி. தேனாஹ ‘‘யங் யங் பரேன வுச்சதி, தங் தங் அனுஜானாதீ’’தி. பரவாத³ங் க³ண்ஹாதீதி ‘‘உச்சு²ம்ஹி கஸடங் யாவஜீவிகங், ரஸோ ஸத்தாஹகாலிகோ, தது³ப⁴யவினிமுத்தோ ச உச்சு² நாம விஸுங் நத்தி², தஸ்மா உச்சு²பி விகாலே வட்டதீ’’தி பரவாதி³னா வுத்தே தம்பி க³ண்ஹாதி. ஏகேகலோமந்தி பலிதங் ஸந்தா⁴ய வுத்தங். யம்ஹீதி யஸ்மிங் புக்³க³லே. பரிக்க²யங் பரியாதா³னந்தி அத்த²தோ ஏகங்.
Vitthunatīti atthaṃ adisvā nitthunati. Vipphandatīti kampati. Santiṭṭhituṃ na sakkotīti ekasmiṃyeva atthe patiṭṭhātuṃ na sakkoti. Tenāha ‘‘yaṃyaṃ parena vuccati, taṃ taṃ anujānātī’’ti. Paravādaṃ gaṇhātīti ‘‘ucchumhi kasaṭaṃ yāvajīvikaṃ, raso sattāhakāliko, tadubhayavinimutto ca ucchu nāma visuṃ natthi, tasmā ucchupi vikāle vaṭṭatī’’ti paravādinā vutte tampi gaṇhāti. Ekekalomanti palitaṃ sandhāya vuttaṃ. Yamhīti yasmiṃ puggale. Parikkhayaṃ pariyādānanti atthato ekaṃ.
ஆசரியபரம்பரா கோ² பனஸ்ஸ ஸுக்³க³ஹிதா ஹோதீதி எத்த² ஆசரியபரம்பராதி ஆசரியானங் வினிச்ச²யபரம்பரா. தேனேவ வக்க²தி ‘‘யதா² ஆசரியோ ச ஆசரியாசரியோ ச பாளிஞ்ச பரிபுச்ச²ஞ்ச வத³ந்தி, ததா² ஞாதுங் வட்டதீ’’தி. புப்³பா³பரானுஸந்தி⁴தோதி ‘‘இத³ங் புப்³ப³வசனங், இத³ங் பரவசனங், அயமனுஸந்தீ⁴’’தி ஏவங் புப்³பா³பரானுஸந்தி⁴தோ. ஆசரியபரம்பரந்தி இமஸ்ஸேவ வேவசனங் தே²ரவாத³ங்க³ந்தி, தே²ரபடிபாடிந்தி அத்தோ². த்³வே தயோ பரிவட்டாதி த்³வே திஸ்ஸோ பரம்பரா.
Ācariyaparamparā kho panassa suggahitā hotīti ettha ācariyaparamparāti ācariyānaṃ vinicchayaparamparā. Teneva vakkhati ‘‘yathā ācariyo ca ācariyācariyo ca pāḷiñca paripucchañca vadanti, tathā ñātuṃ vaṭṭatī’’ti. Pubbāparānusandhitoti ‘‘idaṃ pubbavacanaṃ, idaṃ paravacanaṃ, ayamanusandhī’’ti evaṃ pubbāparānusandhito. Ācariyaparamparanti imasseva vevacanaṃ theravādaṅganti, therapaṭipāṭinti attho. Dve tayo parivaṭṭāti dve tisso paramparā.
இமேஹி ச பன தீஹி லக்க²ணேஹீதி ‘‘ஸுத்தமஸ்ஸ ஸ்வாக³தங் ஹோதீ’’திஆதி³னா ஹெட்டா² வுத்தேஹி தீஹி லக்க²ணேஹி. எத்த² ச பட²மேன லக்க²ணேன வினயஸ்ஸ ஸுட்டு² உக்³க³ஹிதபா⁴வோ வுத்தோ, து³தியேன உக்³க³ஹிதேன அசலதா ஸுப்பதிட்டி²ததா வுத்தா, ததியேன யங் பாளியா அட்ட²கதா²ய ச நத்தி², தம்பி ஆசரியவசனேன வினிச்சி²னிதுங் ஸமத்த²தா வுத்தா. ஓதிண்ணே வத்து²ஸ்மிந்தி சோத³னாஸங்கா²தே வீதிக்கமஸங்கா²தே வா வத்து²ஸ்மிங் ஸங்க⁴மஜ்ஜே² ஓதிண்ணே, ஓஸடேதி அத்தோ². வுத்தமேவ விபா⁴வெந்தோ ‘‘சோத³கேன ச சுதி³தகேன ச வுத்தே வத்தப்³பே³’’தி ஆஹ. கேசி பன ‘‘சோத³கேன ஓதிண்ணே வத்து²ஸ்மிங் சுதி³தகேன ச வுத்தே வத்தப்³பே³’’தி ஏவங் யோஜெந்தி. அபரே பன ‘‘சோத³கேன ச சுதி³தகேன ச வுத்தே வினயத⁴ரேன ச வத்தப்³பே³’’தி ஏவம்பி யோஜெந்தி. ‘‘சோத³கேன ச சுதி³தகேன ச வுத்தே வத்தப்³பே³’’தி அயமேவ பன யோஜனா ஸுந்த³ரதராதி வேதி³தப்³பா³. வத்து² ஓலோகேதப்³ப³ந்தி தஸ்ஸ தஸ்ஸ ஸிக்கா²பத³ஸ்ஸ வத்து² ஓலோகேதப்³ப³ங். ‘‘திணேன வா பண்ணேன வா…பே॰… யோ ஆக³ச்செ²ய்ய, ஆபத்தி து³க்கடஸ்ஸா’’தி (பாரா॰ 517) ஹி இத³ங் நிஸ்ஸக்³கி³யே அஞ்ஞாதகவிஞ்ஞத்திஸிக்கா²பத³ஸ்ஸ வத்து²ஸ்மிங் பஞ்ஞத்தங், து²ல்லச்சயது³ப்³பா⁴ஸிதாபத்தீனங் மாதிகாய அனாக³தத்தா ‘‘பஞ்சன்னங் ஆபத்தீனங் அஞ்ஞதர’’ந்தி வுத்தங். அஞ்ஞதரங் வா ஆபத்திந்தி ‘‘காலே விகாலஸஞ்ஞீ ஆபத்தி து³க்கடஸ்ஸ, காலே வேமதிகோ ஆபத்தி து³க்கடஸ்ஸா’’தி ஏவமாதி³னா (பாசி॰ 250) ஆக³தங் து³க்கடங் ஸந்தா⁴ய வுத்தங். ஸிக்கா²பத³ந்தரேஸூதி வினீதவத்து²ங் அந்தோகத்வா ஏகேகஸ்மிங் ஸிக்கா²பத³ந்தரே.
Imehi ca pana tīhi lakkhaṇehīti ‘‘suttamassa svāgataṃ hotī’’tiādinā heṭṭhā vuttehi tīhi lakkhaṇehi. Ettha ca paṭhamena lakkhaṇena vinayassa suṭṭhu uggahitabhāvo vutto, dutiyena uggahitena acalatā suppatiṭṭhitatā vuttā, tatiyena yaṃ pāḷiyā aṭṭhakathāya ca natthi, tampi ācariyavacanena vinicchinituṃ samatthatā vuttā. Otiṇṇe vatthusminti codanāsaṅkhāte vītikkamasaṅkhāte vā vatthusmiṃ saṅghamajjhe otiṇṇe, osaṭeti attho. Vuttameva vibhāvento ‘‘codakena ca cuditakena ca vutte vattabbe’’ti āha. Keci pana ‘‘codakena otiṇṇe vatthusmiṃ cuditakena ca vutte vattabbe’’ti evaṃ yojenti. Apare pana ‘‘codakena ca cuditakena ca vutte vinayadharena ca vattabbe’’ti evampi yojenti. ‘‘Codakena ca cuditakena ca vutte vattabbe’’ti ayameva pana yojanā sundaratarāti veditabbā. Vatthu oloketabbanti tassa tassa sikkhāpadassa vatthu oloketabbaṃ. ‘‘Tiṇena vā paṇṇena vā…pe… yo āgaccheyya, āpatti dukkaṭassā’’ti (pārā. 517) hi idaṃ nissaggiye aññātakaviññattisikkhāpadassa vatthusmiṃ paññattaṃ, thullaccayadubbhāsitāpattīnaṃ mātikāya anāgatattā ‘‘pañcannaṃ āpattīnaṃ aññatara’’nti vuttaṃ. Aññataraṃ vā āpattinti ‘‘kāle vikālasaññī āpatti dukkaṭassa, kāle vematiko āpatti dukkaṭassā’’ti evamādinā (pāci. 250) āgataṃ dukkaṭaṃ sandhāya vuttaṃ. Sikkhāpadantaresūti vinītavatthuṃ antokatvā ekekasmiṃ sikkhāpadantare.
ஸுகு²மாதி அத்தனோபி து³விஞ்ஞெய்யஸபா⁴வஸ்ஸ லஹுபரிவத்தினோ சித்தஸ்ஸ ஸீக⁴பரிவத்திதாய வுத்தங். தேனாஹ ‘‘சித்தலஹுகா’’தி. சித்தங் லஹு ஸீக⁴பரிவத்தி ஏதேஸந்தி சித்தலஹுகா. தேதி தே வீதிக்கமே. தங்வத்து²கந்தி தே அதி³ன்னாதா³னமனுஸ்ஸவிக்³க³ஹவீதிக்கமா வத்து² அதி⁴ட்டா²னங் காரணமேதஸ்ஸாதி தங்வத்து²கங். ஸீலானி ஸோதெ⁴த்வாதி யங்வத்து²கங் குக்குச்சங் உப்பன்னங், தங் அமனஸிகரித்வா அவஸேஸஸீலானி ஸோதெ⁴த்வா. பாகடபா⁴வதோ ஸுக²வளஞ்ஜனதாய ச ‘‘த்³வத்திங்ஸாகாரங் தாவ மனஸி கரோஹீ’’தி வுத்தங். அஞ்ஞஸ்மிங் பன கம்மட்டா²னே கதபரிசயேன ததே³வ மனஸி காதப்³ப³ங். கம்மட்டா²னங் க⁴டயதீதி அந்தரந்தரா க²ண்ட³ங் அத³ஸ்ஸெத்வா சித்தேன ஸத்³தி⁴ங் ஆலம்ப³னபா⁴வேன சிரகாலங் க⁴டயதி. ஸங்கா²ரா பாகடா ஹுத்வா உபட்ட²ஹந்தீதி விபஸ்ஸனாகம்மட்டா²னிகோ சே, தஸ்ஸ ஸங்கா²ரா பாகடா ஹுத்வா உபட்ட²ஹந்தி. ஸசே கதபாராஜிகவீதிக்கமோ ப⁴வெய்ய, தஸ்ஸ ஸதிபி அஸரிதுகாமதாய விப்படிஸாரவத்து²வஸேன புனப்புனங் தங் உபட்ட²ஹதீதி சித்தேகக்³க³தங் ந விந்த³தி. தேன வுத்தங் ‘‘கம்மட்டா²னங் ந க⁴டயதீ’’திஆதி³. அத்தனா ஜானாதீதி ஸயமேவ ஜானாதி. பச்சத்தே சேதங் கரணவசனங், அத்தா ஜானாதீதி வுத்தங் ஹோதி. அஞ்ஞா ச தே³வதா ஜானந்தீதி ஆரக்க²தே³வதாஹி அஞ்ஞா பரசித்தவிது³னியோ தே³வதா ச ஜானந்தி.
Sukhumāti attanopi duviññeyyasabhāvassa lahuparivattino cittassa sīghaparivattitāya vuttaṃ. Tenāha ‘‘cittalahukā’’ti. Cittaṃ lahu sīghaparivatti etesanti cittalahukā. Teti te vītikkame. Taṃvatthukanti te adinnādānamanussaviggahavītikkamā vatthu adhiṭṭhānaṃ kāraṇametassāti taṃvatthukaṃ. Sīlāni sodhetvāti yaṃvatthukaṃ kukkuccaṃ uppannaṃ, taṃ amanasikaritvā avasesasīlāni sodhetvā. Pākaṭabhāvato sukhavaḷañjanatāya ca ‘‘dvattiṃsākāraṃ tāva manasi karohī’’ti vuttaṃ. Aññasmiṃ pana kammaṭṭhāne kataparicayena tadeva manasi kātabbaṃ. Kammaṭṭhānaṃ ghaṭayatīti antarantarā khaṇḍaṃ adassetvā cittena saddhiṃ ālambanabhāvena cirakālaṃ ghaṭayati. Saṅkhārā pākaṭā hutvā upaṭṭhahantīti vipassanākammaṭṭhāniko ce, tassa saṅkhārā pākaṭā hutvā upaṭṭhahanti. Sace katapārājikavītikkamo bhaveyya, tassa satipi asaritukāmatāya vippaṭisāravatthuvasena punappunaṃ taṃ upaṭṭhahatīti cittekaggataṃ na vindati. Tena vuttaṃ ‘‘kammaṭṭhānaṃ na ghaṭayatī’’tiādi. Attanā jānātīti sayameva jānāti. Paccatte cetaṃ karaṇavacanaṃ, attā jānātīti vuttaṃ hoti. Aññā ca devatā jānantīti ārakkhadevatāhi aññā paracittaviduniyo devatā ca jānanti.
நிட்டி²தா சதுப்³பி³த⁴வினயகதா²வண்ணனா
Niṭṭhitā catubbidhavinayakathāvaṇṇanā
வினயத⁴ரஸ்ஸ ச லக்க²ணாதி³கதா²வண்ணனா.
Vinayadharassa ca lakkhaṇādikathāvaṇṇanā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / சதுப்³பி³த⁴வினயகதா²வண்ணனா • Catubbidhavinayakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சதுப்³பி³த⁴வினயாதி³கதா²வண்ணனா • Catubbidhavinayādikathāvaṇṇanā
