| Library / Tipiṭaka / திபிடக • Tipiṭaka / நெத்திவிபா⁴வினீ • Nettivibhāvinī |
6. சதுப்³யூஹஹாரஸம்பாதவிபா⁴வனா
6. Catubyūhahārasampātavibhāvanā
68. யேன யேன லக்க²ணஹாரஸம்பாதேன ஸுத்தப்பதே³ஸத்தா² ஸமானலக்க²ணேன க³ஹிதா, ஸோ லக்க²ணஹாரஸம்பாதோ பரிபுண்ணோ, ‘‘கதமோ சதுப்³யூஹஹாரஸம்பாதோ’’தி புச்சி²தப்³ப³த்தா ‘‘தத்த² கதமோ சதுப்³யூஹோ ஹாரஸம்பாதோ’’திஆதி³ வுத்தங். தத்த² தேஸு தே³ஸனாஹாரஸம்பாதாதீ³ஸு ஸோளஸஸு ஹாரஸம்பாதேஸு கதமோ ஸங்வண்ணனாவிஸேஸோ சதுப்³யூஹஹாரஸம்பாதோ நாமாதி புச்ச²தி.
68. Yena yena lakkhaṇahārasampātena suttappadesatthā samānalakkhaṇena gahitā, so lakkhaṇahārasampāto paripuṇṇo, ‘‘katamo catubyūhahārasampāto’’ti pucchitabbattā ‘‘tattha katamo catubyūho hārasampāto’’tiādi vuttaṃ. Tattha tesu desanāhārasampātādīsu soḷasasu hārasampātesu katamo saṃvaṇṇanāviseso catubyūhahārasampāto nāmāti pucchati.
‘‘கதமஸ்மிங் ஸுத்தே கதமே நிருத்யாதி⁴ப்பாயனிதா³னபுப்³பா³பரானுஸந்த⁴யோ நித்³தா⁴ரிதா’’தி புச்சி²தப்³ப³த்தா ‘‘தஸ்மா’’திஆதி³ வுத்தங். ‘‘தஸ்மா ரக்கி²தசித்தஸ்ஸா’’தி ஸுத்தப்பதே³ஸே ‘‘ரக்கீ²யதே ரக்கி²த’’ந்தி நிருத்திங் ‘‘பரிபாலீயதீ’’தி இமினா பரியாயேன த³ஸ்ஸேதி, இதிஸத்³த³ஸ்ஸ ஆத்³யத்த²த்தா ‘‘சிந்தேதீதி சித்தங், அத்தனோ ஸந்தானங் சினோதீதி சித்தங், பச்சயேஹி சிதந்தி சித்தங், சித்தவிசித்தட்டே²ன சித்தங், சித்தகரணட்டே²ன சித்தங், ரக்கி²தங் சித்தங் யஸ்ஸாதி ரக்கி²தசித்தோ. ஸம்மா ஸங்கப்பேதீதி ஸம்மாஸங்கப்போ, கா³வோ சரந்தி எத்தா²தி கோ³சரோ, கோ³சரோ வியாதி கோ³சரோ, ஸம்மாஸங்கப்போ கோ³சரோ அஸ்ஸாதி ஸம்மாஸங்கப்பகோ³சரோ. ஸம்மா பஸ்ஸதீதி ஸம்மாதி³ட்டி², ஸம்மாதி³ட்டி² புரெக்கா²ரோ அஸ்ஸாதி ஸம்மாதி³ட்டி²புரெக்கா²ரோ. ஜானாதீதி ஞத்வான. உத³யோ ச வயோ ச உத³யப்³ப³யங். தி²னஞ்ச மித்³த⁴ஞ்ச தி²னமித்³த⁴ங், அபி⁴ப⁴வதீதி அபி⁴பூ⁴, தி²னமித்³த⁴ங் அபி⁴பூ⁴தி தி²னமித்³தா⁴பி⁴பூ⁴. பி⁴க்க²தீதி பி⁴க்கூ²’’தி நிருத்திபி நீஹரிதா. தேனாஹ – ‘‘இதி-ஸத்³தோ³ ஆத்³யத்தோ²’’தி (நெத்தி॰ அட்ட²॰ 68). ஏஸா வுத்தப்பகாரா பஞ்ஞத்தி நிருத்தி நாமாதி நீஹரிதா.
‘‘Katamasmiṃ sutte katame nirutyādhippāyanidānapubbāparānusandhayo niddhāritā’’ti pucchitabbattā ‘‘tasmā’’tiādi vuttaṃ. ‘‘Tasmā rakkhitacittassā’’ti suttappadese ‘‘rakkhīyate rakkhita’’nti niruttiṃ ‘‘paripālīyatī’’ti iminā pariyāyena dasseti, itisaddassa ādyatthattā ‘‘cintetīti cittaṃ, attano santānaṃ cinotīti cittaṃ, paccayehi citanti cittaṃ, cittavicittaṭṭhena cittaṃ, cittakaraṇaṭṭhena cittaṃ, rakkhitaṃ cittaṃ yassāti rakkhitacitto. Sammā saṅkappetīti sammāsaṅkappo, gāvo caranti etthāti gocaro, gocaro viyāti gocaro, sammāsaṅkappo gocaro assāti sammāsaṅkappagocaro. Sammā passatīti sammādiṭṭhi, sammādiṭṭhi purekkhāro assāti sammādiṭṭhipurekkhāro. Jānātīti ñatvāna. Udayo ca vayo ca udayabbayaṃ. Thinañca middhañca thinamiddhaṃ, abhibhavatīti abhibhū, thinamiddhaṃ abhibhūti thinamiddhābhibhū. Bhikkhatīti bhikkhū’’ti niruttipi nīharitā. Tenāha – ‘‘iti-saddo ādyattho’’ti (netti. aṭṭha. 68). Esā vuttappakārā paññatti nirutti nāmāti nīharitā.
இத⁴ ஸுத்தப்பதே³ஸே ப⁴க³வதோ கோ அதி⁴ப்பாயோதி சே புச்செ²ய்ய, யே ஸப்புரிஸா ஸப்³பா³ஹி து³க்³க³தீஹி பரிமுச்சிதுகாமா ப⁴விஸ்ஸந்தி, தே ஸப்புரிஸா த⁴ம்மசாரினோ ரக்கி²தசித்தா ப⁴விஸ்ஸந்தீதி அயங் அதி⁴ப்பாயோ. எத்த² ‘‘தஸ்மா ரக்கி²தசித்தஸ்ஸா’’திஆதி³ஸுத்தப்பதே³ஸே ப⁴க³வதோ அதி⁴ப்பாயோதி நீஹரிதப்³போ³.
Idha suttappadese bhagavato ko adhippāyoti ce puccheyya, ye sappurisā sabbāhi duggatīhi parimuccitukāmā bhavissanti, te sappurisā dhammacārino rakkhitacittā bhavissantīti ayaṃ adhippāyo. Ettha ‘‘tasmā rakkhitacittassā’’tiādisuttappadese bhagavato adhippāyoti nīharitabbo.
‘‘கதமங் நிதா³ன’’ந்தி சே புச்செ²ய்ய, கோகாலிகோ ஸாரிபுத்தமொக்³க³ல்லானேஸு தே²ரேஸு சித்தங் அரக்கி²த்வா பதோ³ஸயித்வா மஹாபது³மனிரயே யஸ்மா உபபன்னோ, யஸ்மா ப⁴க³வா ச ஸதிஆரக்கே²ன ஸமன்னாக³தோ ஸப்³பா³ து³க்³க³தியோ ஜஹதி, தஸ்மா ச ஸப்³பா³ து³க்³க³தியோ ஜஹிதுகாமோ பி⁴க்கு² ஸப்புரிஸோ ரக்கி²தசித்தோ அஸ்ஸ ப⁴வெய்யாதி நிதா³னங் நீஹரிதப்³ப³ங்.
‘‘Katamaṃ nidāna’’nti ce puccheyya, kokāliko sāriputtamoggallānesu theresu cittaṃ arakkhitvā padosayitvā mahāpadumaniraye yasmā upapanno, yasmā bhagavā ca satiārakkhena samannāgato sabbā duggatiyo jahati, tasmā ca sabbā duggatiyo jahitukāmo bhikkhu sappuriso rakkhitacitto assa bhaveyyāti nidānaṃ nīharitabbaṃ.
‘‘கதமோ புப்³பா³பரஸந்தீ⁴’’தி சே புச்செ²ய்ய, ஸுத்தம்ஹி ‘‘ஸதியா சித்தங் ரக்கி²தப்³ப³’’ந்தி யங் வசனங் வுத்தங், தேன புப்³ப³வசனேன அயங் ‘‘தஸ்மா ரக்கி²தசித்தஸ்ஸ…பே॰… ஸப்³பா³ து³க்³க³தியோ ஜஹே’’தி ஸுத்தப்பதே³ஸோ அனுஸந்தி⁴ ஸங்ஸந்த³தி ஸமேதீதி புப்³ப³பரானுஸந்தி⁴ நித்³தா⁴ரிதப்³போ³தி.
‘‘Katamo pubbāparasandhī’’ti ce puccheyya, suttamhi ‘‘satiyā cittaṃ rakkhitabba’’nti yaṃ vacanaṃ vuttaṃ, tena pubbavacanena ayaṃ ‘‘tasmā rakkhitacittassa…pe… sabbā duggatiyo jahe’’ti suttappadeso anusandhi saṃsandati sametīti pubbaparānusandhi niddhāritabboti.
‘‘எத்தகோவ சதுப்³யூஹஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ சதுப்³யூஹோ ஹாரஸம்பாதோ’’தி வுத்தங். யேன யேன ஸங்வண்ணனாவிஸேஸபூ⁴தேன சதுப்³யூஹஹாரஸம்பாதேன நிருத்யாதி⁴ப்பாயனிதா³னபுப்³பா³பரானுஸந்தி⁴ நித்³தா⁴ரிதப்³போ³, ஸோ ஸோ ஸங்வண்ணனாவிஸேஸபூ⁴தோ சதுப்³யூஹஹாரஸம்பாதோ நியுத்தோ யதா²ரஹங் நித்³தா⁴ரெத்வா யுஜ்ஜிதப்³போ³தி அத்தோ² க³ஹேதப்³போ³தி.
‘‘Ettakova catubyūhahārasampāto paripuṇṇo’’ti vattabbattā ‘‘niyutto catubyūho hārasampāto’’ti vuttaṃ. Yena yena saṃvaṇṇanāvisesabhūtena catubyūhahārasampātena nirutyādhippāyanidānapubbāparānusandhi niddhāritabbo, so so saṃvaṇṇanāvisesabhūto catubyūhahārasampāto niyutto yathārahaṃ niddhāretvā yujjitabboti attho gahetabboti.
இதி சதுப்³யூஹஹாரஸம்பாதே ஸத்திப³லானுரூபா ரசிதா
Iti catubyūhahārasampāte sattibalānurūpā racitā
விபா⁴வனா நிட்டி²தா.
Vibhāvanā niṭṭhitā.
பண்டி³தேஹி பன…பே॰… க³ஹேதப்³போ³தி.
Paṇḍitehi pana…pe… gahetabboti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 6. சதுப்³யூஹஹாரஸம்பாதோ • 6. Catubyūhahārasampāto
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 6. சதுப்³யூஹஹாரஸம்பாதவண்ணனா • 6. Catubyūhahārasampātavaṇṇanā
