Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā

    4. சதுக்கனித்³தே³ஸவண்ணனா

    4. Catukkaniddesavaṇṇanā

    132. சதுக்கனித்³தே³ஸே – அஸப்புரிஸோதி லாமகபுரிஸோ. பாணங் அதிபாதேதீதி பாணாதிபாதீ. அதி³ன்னங் ஆதி³யதீதி அதி³ன்னாதா³யீ. காமேஸு மிச்சா² சரதீதி காமேஸுமிச்சா²சாரீ. முஸா வத³தீதி முஸாவாதீ³. ஸுராமேரயமஜ்ஜபமாதே³ திட்ட²தீதி ஸுராமேரயமஜ்ஜபமாத³ட்டா²யீ.

    132. Catukkaniddese – asappurisoti lāmakapuriso. Pāṇaṃ atipātetīti pāṇātipātī. Adinnaṃ ādiyatīti adinnādāyī. Kāmesu micchā caratīti kāmesumicchācārī. Musā vadatīti musāvādī. Surāmerayamajjapamāde tiṭṭhatīti surāmerayamajjapamādaṭṭhāyī.

    133. பாணாதிபாதே ஸமாத³பேதீதி யதா² பாணங் அதிபாதேதி, ததா² நங் தத்த² க³ஹணங் க³ண்ஹாபேதி. ஸேஸேஸுபி ஏஸேவ நயோ. அயங் வுச்சதீதி அயங் ஏவரூபோ புக்³க³லோ யஸ்மா ஸயங் கதேன ச து³ஸ்ஸீல்யேன ஸமன்னாக³தோ யஞ்ச ஸமாத³பிதேன கதங், ததோ உபட்³ட⁴ஸ்ஸ தா³யாதோ³, தஸ்மா அஸப்புரிஸேன அஸப்புரிஸதரோதி வுச்சதி. ஸப்புரிஸோதி உத்தமபுரிஸோ.

    133. Pāṇātipāte samādapetīti yathā pāṇaṃ atipāteti, tathā naṃ tattha gahaṇaṃ gaṇhāpeti. Sesesupi eseva nayo. Ayaṃ vuccatīti ayaṃ evarūpo puggalo yasmā sayaṃ katena ca dussīlyena samannāgato yañca samādapitena kataṃ, tato upaḍḍhassa dāyādo, tasmā asappurisena asappurisataroti vuccati. Sappurisoti uttamapuriso.

    135. ஸப்புரிஸேன ஸப்புரிஸதரோதி அத்தனா கதேன ஸுஸீல்யேன ஸமன்னாக³தத்தா யஞ்ச ஸமாத³பிதோ கரோதி. ததோ உபட்³ட⁴ஸ்ஸ தா³யாத³த்தா உத்தமபுரிஸேன உத்தமபுரிஸதரோ.

    135. Sappurisena sappurisataroti attanā katena susīlyena samannāgatattā yañca samādapito karoti. Tato upaḍḍhassa dāyādattā uttamapurisena uttamapurisataro.

    136. பாபோதி அகுஸலகம்மபத²ஸங்கா²தேன த³ஸவிதே⁴ன பாபேன ஸமன்னாக³தோ.

    136. Pāpoti akusalakammapathasaṅkhātena dasavidhena pāpena samannāgato.

    138. கல்யாணோதி குஸலகம்மபத²ஸங்கா²தேன த³ஸவிதே⁴ன கல்யாணத⁴ம்மேன ஸமன்னாக³தோ ஸுத்³த⁴கோ ப⁴த்³ரகோ. ஸேஸமெத்த² ஹெட்டா² வுத்தனயத்தா உத்தானத்த²மேவ.

    138. Kalyāṇoti kusalakammapathasaṅkhātena dasavidhena kalyāṇadhammena samannāgato suddhako bhadrako. Sesamettha heṭṭhā vuttanayattā uttānatthameva.

    140. பாபத⁴ம்மாதீ³ஸு – பாபோ த⁴ம்மோ அஸ்ஸாதி பாபத⁴ம்மோ. கல்யாணோ த⁴ம்மோ அஸ்ஸாதி கல்யாணத⁴ம்மோ. ஸேஸமெத்த² உத்தானத்த²மேவ.

    140. Pāpadhammādīsu – pāpo dhammo assāti pāpadhammo. Kalyāṇo dhammo assāti kalyāṇadhammo. Sesamettha uttānatthameva.

    144. ஸாவஜ்ஜாதீ³ஸு – ஸாவஜ்ஜோதி ஸதோ³ஸோ. ஸாவஜ்ஜேன காயகம்மேனாதி ஸதோ³ஸேன பாணாதிபாதாதி³னா காயகம்மேன. இதரேஸுபி ஏஸேவ நயோ. அயங் வுச்சதீதி அயங் ஏவரூபோ புக்³க³லோ தீஹி த்³வாரேஹி ஆயூஹனகம்மஸ்ஸ ஸதோ³ஸத்தா, கூ³த²குணபாதி³ப⁴ரிதோ பதே³ஸோ விய ஸாவஜ்ஜோதி வுச்சதி.

    144. Sāvajjādīsu – sāvajjoti sadoso. Sāvajjena kāyakammenāti sadosena pāṇātipātādinā kāyakammena. Itaresupi eseva nayo. Ayaṃ vuccatīti ayaṃ evarūpo puggalo tīhi dvārehi āyūhanakammassa sadosattā, gūthakuṇapādibharito padeso viya sāvajjoti vuccati.

    145. ஸாவஜ்ஜேன ப³ஹுலந்தி யஸ்ஸ ஸாவஜ்ஜமேவ காயகம்மங் ப³ஹு ஹோதி, அப்பங் அனவஜ்ஜங்; ஸோ ஸாவஜ்ஜேன ப³ஹுலங் காயகம்மேன ஸமன்னாக³தோ, அப்பங் அனவஜ்ஜேனாதி வுச்சதி. இதரேஸுபி ஏஸேவ நயோ. கோ பன ஏவரூபோ ஹோதீதி? யோ கா³மத⁴ம்மதாய வா நிக³மத⁴ம்மதாய வா கதா³சி கரஹசி உபோஸத²ங் ஸமாதி³யதி, ஸீலானி பூரேதி. அயங் வுச்சதீதி அயங் ஏவரூபோ புக்³க³லோ தீஹி த்³வாரேஹி ஆயூஹனகம்மேஸு ஸாவஜ்ஜஸ்ஸேவ ப³ஹுலதாய அனவஜ்ஜஸ்ஸ அப்பதாய வஜ்ஜப³ஹுலோதி வுச்சதி.

    145. Sāvajjena bahulanti yassa sāvajjameva kāyakammaṃ bahu hoti, appaṃ anavajjaṃ; so sāvajjena bahulaṃ kāyakammena samannāgato, appaṃ anavajjenāti vuccati. Itaresupi eseva nayo. Ko pana evarūpo hotīti? Yo gāmadhammatāya vā nigamadhammatāya vā kadāci karahaci uposathaṃ samādiyati, sīlāni pūreti. Ayaṃ vuccatīti ayaṃ evarūpo puggalo tīhi dvārehi āyūhanakammesu sāvajjasseva bahulatāya anavajjassa appatāya vajjabahuloti vuccati.

    யதா² ஹி ஏகஸ்மிங் பதே³ஸே து³ப்³ப³ண்ணானி து³க்³க³ந்தா⁴னி புப்பா²னி ராஸிகதானஸ்ஸு, தேஸங் உபரி தஹங் தஹங் அதிமுத்தகவஸ்ஸிகபாடலானி பதிதானி ப⁴வெய்யுங். ஏவரூபோ அயங் புக்³க³லோ வேதி³தப்³போ³. யதா² பன ஏகஸ்மிங் பதே³ஸே அதிமுத்தகவஸ்ஸிகபாடலானி ராஸிகதானஸ்ஸு, தேஸங் உபரி தஹங் தஹங் து³ப்³ப³ண்ணது³க்³க³ந்தா⁴னி ப³த³ரபுப்பா²தீ³னி பதிதானி ப⁴வெய்யுங். ஏவரூபோ ததியோ புக்³க³லோ வேதி³தப்³போ³. சதுத்தோ² பன தீஹிபி த்³வாரேஹி ஆயூஹனகம்மஸ்ஸ நித்³தோ³ஸத்தா, சதுமது⁴ரப⁴ரிதஸுவண்ணபாதி விய த³ட்ட²ப்³போ³. தேஸு பட²மோ அந்த⁴பா³லபுது²ஜ்ஜனோ. து³தியோ அந்தரந்தரா குஸலஸ்ஸ காரகோ லோகியபுது²ஜ்ஜனோ. ததியோ ஸோதாபன்னோ ஸகதா³கா³மிஅனாகா³மினோபி ஏதேனேவ ஸங்க³ஹிதா. சதுத்தோ² கீ²ணாஸவோ. ஸோ ஹி ஏகந்தேன அனவஜ்ஜோயேவ. அயங் அங்கு³த்தரட்ட²கதா²யோ.

    Yathā hi ekasmiṃ padese dubbaṇṇāni duggandhāni pupphāni rāsikatānassu, tesaṃ upari tahaṃ tahaṃ atimuttakavassikapāṭalāni patitāni bhaveyyuṃ. Evarūpo ayaṃ puggalo veditabbo. Yathā pana ekasmiṃ padese atimuttakavassikapāṭalāni rāsikatānassu, tesaṃ upari tahaṃ tahaṃ dubbaṇṇaduggandhāni badarapupphādīni patitāni bhaveyyuṃ. Evarūpo tatiyo puggalo veditabbo. Catuttho pana tīhipi dvārehi āyūhanakammassa niddosattā, catumadhurabharitasuvaṇṇapāti viya daṭṭhabbo. Tesu paṭhamo andhabālaputhujjano. Dutiyo antarantarā kusalassa kārako lokiyaputhujjano. Tatiyo sotāpanno sakadāgāmianāgāminopi eteneva saṅgahitā. Catuttho khīṇāsavo. So hi ekantena anavajjoyeva. Ayaṃ aṅguttaraṭṭhakathāyo.

    148. உக்³க⁴டிதஞ்ஞூஆதீ³ஸு – உக்³க⁴டிதஞ்ஞூதி எத்த² உக்³க⁴டிதங் நாம ஞாணுக்³கா⁴டனங், ஞாணே உக்³க⁴டிதமத்தேயேவ ஜானாதீதி அத்தோ². ஸஹ உதா³ஹடவேலாயாதி உதா³ஹாரே உதா³ஹடமத்தேயேவ. த⁴ம்மாபி⁴ஸமயோதி சதுஸச்சத⁴ம்மஸ்ஸ ஞாணேன ஸத்³தி⁴ங் அபி⁴ஸமயோ. அயங் வுச்சதீதி அயங் ‘சத்தாரோ ஸதிபட்டா²னா’திஆதி³னா நயேன ஸங்கி²த்தேன மாதிகாய ட²பியமானாய தே³ஸனானுஸாரேன ஞாணங் பேஸெத்வா அரஹத்தங் க³ண்ஹிதுங் ஸமத்தோ² புக்³க³லோ உக்³க⁴டிதஞ்ஞூதி வுச்சதி.

    148. Ugghaṭitaññūādīsu – ugghaṭitaññūti ettha ugghaṭitaṃ nāma ñāṇugghāṭanaṃ, ñāṇe ugghaṭitamatteyeva jānātīti attho. Saha udāhaṭavelāyāti udāhāre udāhaṭamatteyeva. Dhammābhisamayoti catusaccadhammassa ñāṇena saddhiṃ abhisamayo. Ayaṃ vuccatīti ayaṃ ‘cattāro satipaṭṭhānā’tiādinā nayena saṃkhittena mātikāya ṭhapiyamānāya desanānusārena ñāṇaṃ pesetvā arahattaṃ gaṇhituṃ samattho puggalo ugghaṭitaññūti vuccati.

    149. விபஞ்சிதங் வித்தா²ரிதமேவ அத்த²ங் ஜானாதீதி விபஞ்சிதஞ்ஞூ. அயங் வுச்சதீதி அயங் ஸங்கி²த்தேன மாதிகங் ட²பெத்வா வித்தா²ரேன அத்தே² பா⁴ஜியமானே அரஹத்தங் பாபுணிதுங் ஸமத்தோ² புக்³க³லோ விபஞ்சிதஞ்ஞூதி வுச்சதி.

    149. Vipañcitaṃ vitthāritameva atthaṃ jānātīti vipañcitaññū. Ayaṃ vuccatīti ayaṃ saṅkhittena mātikaṃ ṭhapetvā vitthārena atthe bhājiyamāne arahattaṃ pāpuṇituṃ samattho puggalo vipañcitaññūti vuccati.

    150. உத்³தே³ஸாதீ³ஹி நேதப்³போ³தி நெய்யோ. அனுபுப்³பே³ன த⁴ம்மாபி⁴ஸமயோ ஹோதீதி அனுக்கமேன அரஹத்தப்பத்தி.

    150. Uddesādīhi netabboti neyyo. Anupubbena dhammābhisamayo hotīti anukkamena arahattappatti.

    151. ப்³யஞ்ஜனபத³மேவ பரமங் அஸ்ஸாதி பத³பரமோ. ந தாய ஜாதியா த⁴ம்மாபி⁴ஸமயோ ஹோதீதி ந தேன அத்தபா⁴வேன ஜா²னங் வா விபஸ்ஸனங் வா மக்³க³ங் வா ப²லங் வா நிப்³ப³த்தேதுங் ஸக்கோதீதி அத்தோ².

    151. Byañjanapadameva paramaṃ assāti padaparamo. Na tāya jātiyā dhammābhisamayo hotīti na tena attabhāvena jhānaṃ vā vipassanaṃ vā maggaṃ vā phalaṃ vā nibbattetuṃ sakkotīti attho.

    152. யுத்தபடிபா⁴னாதீ³ஸு – படிபா⁴னங் வுச்சதி ஞாணம்பி, ஞாணஸ்ஸ உபட்டி²தவசனம்பி. தங் இத⁴ அதி⁴ப்பேதங். அத்த²யுத்தங் காரணயுத்தஞ்ச படிபா⁴னமஸ்ஸாதி யுத்தப்படிபா⁴னோ. புச்சி²தானந்தரமேவ ஸீக⁴ங் ப்³யாகாதுங் அஸமத்த²தாய நோ முத்தங் படிபா⁴னமஸ்ஸாதி நோ முத்தப்படிபா⁴னோ. இமினா நயேன ஸேஸா வேதி³தப்³பா³. எத்த² பன பட²மோ – கிஞ்சி காலங் வீமங்ஸித்வா யுத்தமேவ பெக்க²தி, திபிடகசூளனாக³த்தே²ரோ விய. ஸோ கிர பஞ்ஹங் புட்டோ² பரிக்³க³ஹெத்வா யுத்தபயுத்தகாரணமேவ கதே²தி.

    152. Yuttapaṭibhānādīsu – paṭibhānaṃ vuccati ñāṇampi, ñāṇassa upaṭṭhitavacanampi. Taṃ idha adhippetaṃ. Atthayuttaṃ kāraṇayuttañca paṭibhānamassāti yuttappaṭibhāno. Pucchitānantarameva sīghaṃ byākātuṃ asamatthatāya no muttaṃ paṭibhānamassāti no muttappaṭibhāno. Iminā nayena sesā veditabbā. Ettha pana paṭhamo – kiñci kālaṃ vīmaṃsitvā yuttameva pekkhati, tipiṭakacūḷanāgatthero viya. So kira pañhaṃ puṭṭho pariggahetvā yuttapayuttakāraṇameva katheti.

    து³தியோ – புச்சா²னந்தரமேவ யேன வா தேன வா வசனேன படிபா³ஹதி, வீமங்ஸித்வாபி ச யுத்தங் ந பெக்க²தி சதுனிகாயிகபண்டி³ததிஸ்ஸத்தே²ரோ விய. ஸோ கிர பஞ்ஹங் புட்டோ² பஞ்ஹபரியோஸானம்பி நாக³மேதி, யங் வா தங் வா கதே²தியேவ. வசனத்த²ங் பனஸ்ஸ வீமங்ஸியமானங் கத்த²சி ந லக்³க³தி.

    Dutiyo – pucchānantarameva yena vā tena vā vacanena paṭibāhati, vīmaṃsitvāpi ca yuttaṃ na pekkhati catunikāyikapaṇḍitatissatthero viya. So kira pañhaṃ puṭṭho pañhapariyosānampi nāgameti, yaṃ vā taṃ vā kathetiyeva. Vacanatthaṃ panassa vīmaṃsiyamānaṃ katthaci na laggati.

    ததியோ – புச்சா²ஸமகாலமேவ யுத்தங் பெக்க²தி, தங்க²ணஞ்ஞேவ வசனங் ப்³யாகரோதி திபிடகசூளாப⁴யத்தே²ரோ விய. ஸோ கிர பஞ்ஹங் புட்டோ² ஸீக⁴மேவ கதே²தி, யுத்தபயுத்தகாரணோ ச ஹோதி.

    Tatiyo – pucchāsamakālameva yuttaṃ pekkhati, taṅkhaṇaññeva vacanaṃ byākaroti tipiṭakacūḷābhayatthero viya. So kira pañhaṃ puṭṭho sīghameva katheti, yuttapayuttakāraṇo ca hoti.

    சதுத்தோ² – புட்டோ² ஸமானோ நேவ யுத்தங் பெக்க²தி , ந யேன வா தேன வா படிபா³ஹிதுங் ஸக்கோதி திப்³ப³ந்த⁴காரனிமுக்³கோ³ விய ஹோதி லாளுதா³யித்தே²ரோ விய.

    Catuttho – puṭṭho samāno neva yuttaṃ pekkhati , na yena vā tena vā paṭibāhituṃ sakkoti tibbandhakāranimuggo viya hoti lāḷudāyitthero viya.

    156. த⁴ம்மகதி²கேஸு – அப்பஞ்ச பா⁴ஸதீதி ஸம்பத்தபரிஸாய தோ²கமேவ கதே²தி. அஸஹிதஞ்சாதி கதெ²ந்தோ ச பன ந அத்த²யுத்தங் காரணயுத்தங் கதே²தி. பரிஸா சஸ்ஸ ந குஸலா ஹோதீதி ஸோதுங் நிஸின்னபரிஸா சஸ்ஸ யுத்தாயுத்தங் காரணாகாரணங் ஸிலிட்டா²ஸிலிட்ட²ங் ந ஜானாதீதி அத்தோ². ஏவரூபோதி அயங் ஏவங்ஜாதிகோ பா³லத⁴ம்மகதி²கோ. ஏவங்ஜாதிகாய பா³லபரிஸாய த⁴ம்மகதி²கொத்வேவ நாமங் லப⁴தி. இமினா நயேன ஸப்³ப³த்த² அத்தோ² வேதி³தப்³போ³. எத்த² ச த்³வேயேவ ஜனா ஸபா⁴வத⁴ம்மகதி²கா, இதரே பன த⁴ம்மகதி²கானங் அந்தரே பவிட்ட²த்தா ஏவங் வுத்தா.

    156. Dhammakathikesu – appañca bhāsatīti sampattaparisāya thokameva katheti. Asahitañcāti kathento ca pana na atthayuttaṃ kāraṇayuttaṃ katheti. Parisā cassa na kusalā hotīti sotuṃ nisinnaparisā cassa yuttāyuttaṃ kāraṇākāraṇaṃ siliṭṭhāsiliṭṭhaṃ na jānātīti attho. Evarūpoti ayaṃ evaṃjātiko bāladhammakathiko. Evaṃjātikāya bālaparisāya dhammakathikotveva nāmaṃ labhati. Iminā nayena sabbattha attho veditabbo. Ettha ca dveyeva janā sabhāvadhammakathikā, itare pana dhammakathikānaṃ antare paviṭṭhattā evaṃ vuttā.

    157. வலாஹகூபமேஸு வலாஹகாதி மேகா⁴. க³ஜ்ஜிதாதி த²னிதா. தத்த² க³ஜ்ஜித்வா நோ வஸ்ஸனபா⁴வோ நாம பாபகோ. மனுஸ்ஸா ஹி யதா² தே³வோ க³ஜ்ஜதி ‘ஸுவுட்டி²கா ப⁴விஸ்ஸதீ’தி பீ³ஜானி நீஹரித்வா வபந்தி. அத² தே³வே அவஸ்ஸந்தே கெ²த்தே பீ³ஜானி கெ²த்தேயேவ நஸ்ஸந்தி, கே³ஹே பீ³ஜானி கே³ஹேயேவ நஸ்ஸந்தீதி து³ப்³பி⁴க்க²ங் ஹோதி. நோ க³ஜ்ஜித்வா வஸ்ஸனபா⁴வோபி பாபகோவ. மனுஸ்ஸா ஹி ‘இமஸ்மிங் காலே து³ப்³பு³ட்டி²கா ப⁴விஸ்ஸதீ’தி நின்னட்டா²னேஸுயேவ வப்பங் கரொந்தி. அத² தே³வோ வஸ்ஸித்வா ஸப்³ப³பீ³ஜானி மஹாஸமுத்³த³ங் பாபேதி, து³ப்³பி⁴க்க²மேவ ஹோதி. க³ஜ்ஜித்வா வஸ்ஸனபா⁴வோ பன ப⁴த்³த³கோ. ததா³ ஹி ஸுபி⁴க்க²ங் ஹோதி. நோ க³ஜ்ஜித்வா நோ வஸ்ஸனபா⁴வோ ஏகந்தபாபகோவ.

    157. Valāhakūpamesu valāhakāti meghā. Gajjitāti thanitā. Tattha gajjitvā no vassanabhāvo nāma pāpako. Manussā hi yathā devo gajjati ‘suvuṭṭhikā bhavissatī’ti bījāni nīharitvā vapanti. Atha deve avassante khette bījāni khetteyeva nassanti, gehe bījāni geheyeva nassantīti dubbhikkhaṃ hoti. No gajjitvā vassanabhāvopi pāpakova. Manussā hi ‘imasmiṃ kāle dubbuṭṭhikā bhavissatī’ti ninnaṭṭhānesuyeva vappaṃ karonti. Atha devo vassitvā sabbabījāni mahāsamuddaṃ pāpeti, dubbhikkhameva hoti. Gajjitvā vassanabhāvo pana bhaddako. Tadā hi subhikkhaṃ hoti. No gajjitvā no vassanabhāvo ekantapāpakova.

    பா⁴ஸிதா ஹோதி நோ கத்தாதி ‘இதா³னி க³ந்த²து⁴ரங் பூரெஸ்ஸாமி, வாஸது⁴ரங் பூரெஸ்ஸாமீ’தி கதே²தியேவ, ந பன உத்³தே³ஸங் க³ண்ஹாதி, ந கம்மட்டா²னங் பா⁴வேதி.

    Bhāsitā hoti no kattāti ‘idāni ganthadhuraṃ pūressāmi, vāsadhuraṃ pūressāmī’ti kathetiyeva, na pana uddesaṃ gaṇhāti, na kammaṭṭhānaṃ bhāveti.

    கத்தா ஹோதி நோ பா⁴ஸிதாதி ‘க³ந்த²து⁴ரங் வா பூரெஸ்ஸாமி வாஸது⁴ரங் வா’தி ந பா⁴ஸதி. ஸம்பத்தே பன காலே தமத்த²ங் ஸம்பாதே³தி. இமினா நயேன இதரேபி வேதி³தப்³பா³. ஸப்³ப³ங் பனேதங் பச்சயதா³யகேனேவ கதி²தங். ஏகோ ஹி ‘அஸுகதி³வஸே நாம தா³னங் த³ஸ்ஸாமீ’தி ஸங்க⁴ங் நிமந்தேதி, ஸம்பத்தகாலே நோ கரோதி. அயங் புக்³க³லோ புஞ்ஞேன பரிஹாயதி, பி⁴க்கு²ஸங்கோ⁴பி லாபே⁴ன பரிஹாயதி . அபரோ ஸங்க⁴ங் அனிமந்தெத்வாவ ஸக்காரங் கத்வா ‘பி⁴க்கூ² ஆனெஸ்ஸாமீ’தி ந லப⁴தி, ஸப்³பே³ அஞ்ஞத்த² நிமந்திதா ஹொந்தி. அயம்பி புஞ்ஞேன பரிஹாயதி , ஸங்கோ⁴பி தேன லாபே⁴ன பரிஹாயதி. அபரோ பட²மங் ஸங்க⁴ங் நிமந்தெத்வா, பச்சா² ஸக்காரங் கத்வா தா³னங் தே³தி, அயங் கிச்சகாரீ ஹோதி. அபரோ நேவ ஸங்க⁴ங் நிமந்தேதி, ந தா³னங் தே³தி, அயங் ‘பாபபுக்³க³லோ’தி வேதி³தப்³போ³.

    Kattā hoti no bhāsitāti ‘ganthadhuraṃ vā pūressāmi vāsadhuraṃ vā’ti na bhāsati. Sampatte pana kāle tamatthaṃ sampādeti. Iminā nayena itarepi veditabbā. Sabbaṃ panetaṃ paccayadāyakeneva kathitaṃ. Eko hi ‘asukadivase nāma dānaṃ dassāmī’ti saṅghaṃ nimanteti, sampattakāle no karoti. Ayaṃ puggalo puññena parihāyati, bhikkhusaṅghopi lābhena parihāyati . Aparo saṅghaṃ animantetvāva sakkāraṃ katvā ‘bhikkhū ānessāmī’ti na labhati, sabbe aññattha nimantitā honti. Ayampi puññena parihāyati , saṅghopi tena lābhena parihāyati. Aparo paṭhamaṃ saṅghaṃ nimantetvā, pacchā sakkāraṃ katvā dānaṃ deti, ayaṃ kiccakārī hoti. Aparo neva saṅghaṃ nimanteti, na dānaṃ deti, ayaṃ ‘pāpapuggalo’ti veditabbo.

    158. மூஸிகூபமேஸு – கா³த⁴ங் கத்தா நோ வஸிதாதி அத்தனோ ஆஸயங் பி³லங் கூபங் க²ணதி, நோ தத்த² வஸதி, கிஸ்மிஞ்சிதே³வ டா²னே வஸதி, ஏவங் பி³ளாராதி³அமித்தவஸங் க³ச்ச²தி. க²த்தாதிபி பாடோ². வஸிதா நோ கா³த⁴ங் கத்தாதி ஸயங் ந க²ணதி, பரேன க²தே பி³லே வஸதி, ஏவங் ஜீவிதங் ரக்க²தி. ததியா த்³வேபி கரொந்தீ, ஜீவிதங் ரக்க²தி. சதுத்தா² த்³வேபி அகரொந்தீ அமித்தவஸங் க³ச்ச²தி. இமாய பன உபமாய உபமிதேஸு புக்³க³லேஸு பட²மோ யதா² ஸா மூஸிகா கா³த⁴ங் க²ணதி, ஏவங் நவங்க³ங் ஸத்து²ஸாஸனங் உக்³க³ண்ஹாதி. யதா² பன ஸா தத்த² ந வஸதி, கிஸ்மிஞ்சிதே³வ டா²னே வஸந்தீ, அமித்தவஸங் க³ச்ச²தி; ததா² அயம்பி பரியத்திவஸேன ஞாணங் பேஸெத்வா சதுஸச்சத⁴ம்மங் ந படிவிஜ்ஜ²தி, லோகாமிஸட்டா²னேஸுயேவ சரந்தோ மச்சுமாரகிலேஸமாரதே³வபுத்தமாரஸங்கா²தானங் அமித்தானங் வஸங் க³ச்ச²தி. து³தியோ யதா² ஸா மூஸிகா கா³த⁴ங் ந க²ணதி, ஏவங் நவங்க³ங் ஸத்து²ஸாஸனங் ந உக்³க³ண்ஹாதி. யதா² பன பரேன க²தபி³லே வஸந்தீ ஜீவிதங் ரக்க²தி; ஏவங் பரஸ்ஸ கத²ங் ஸுத்வா சதுஸச்சத⁴ம்மங் படிவிஜ்ஜி²த்வா திண்ணங் மாரானங் வஸங் அதிக்கமதி. இமினா நயேன ததியசதுத்தே²ஸுபி ஓபம்மஸங்ஸந்த³னங் வேதி³தப்³ப³ங்.

    158. Mūsikūpamesu – gādhaṃ kattā no vasitāti attano āsayaṃ bilaṃ kūpaṃ khaṇati, no tattha vasati, kismiñcideva ṭhāne vasati, evaṃ biḷārādiamittavasaṃ gacchati. Khattātipi pāṭho. Vasitā no gādhaṃ kattāti sayaṃ na khaṇati, parena khate bile vasati, evaṃ jīvitaṃ rakkhati. Tatiyā dvepi karontī, jīvitaṃ rakkhati. Catutthā dvepi akarontī amittavasaṃ gacchati. Imāya pana upamāya upamitesu puggalesu paṭhamo yathā sā mūsikā gādhaṃ khaṇati, evaṃ navaṅgaṃ satthusāsanaṃ uggaṇhāti. Yathā pana sā tattha na vasati, kismiñcideva ṭhāne vasantī, amittavasaṃ gacchati; tathā ayampi pariyattivasena ñāṇaṃ pesetvā catusaccadhammaṃ na paṭivijjhati, lokāmisaṭṭhānesuyeva caranto maccumārakilesamāradevaputtamārasaṅkhātānaṃ amittānaṃ vasaṃ gacchati. Dutiyo yathā sā mūsikā gādhaṃ na khaṇati, evaṃ navaṅgaṃ satthusāsanaṃ na uggaṇhāti. Yathā pana parena khatabile vasantī jīvitaṃ rakkhati; evaṃ parassa kathaṃ sutvā catusaccadhammaṃ paṭivijjhitvā tiṇṇaṃ mārānaṃ vasaṃ atikkamati. Iminā nayena tatiyacatutthesupi opammasaṃsandanaṃ veditabbaṃ.

    159. அம்பூ³பமேஸு – ஆமங் பக்கவண்ணீதி அந்தோ ஆமங் ப³ஹி பக்கஸதி³ஸங். பக்கங் ஆமவண்ணீதி அந்தோ பக்கங் ப³ஹி ஆமஸதி³ஸங். ஸேஸத்³வயேஸுபி ஏஸேவ நயோ. தத்த² யதா² அம்பே³ அபக்கபா⁴வோ ஆமதா ஹோதி, ஏவங் புக்³க³லேபி புது²ஜ்ஜனபா⁴வோ ஆமதா, அரியபா⁴வோ பக்கதா. யதா² ச தத்த² பக்கஸதி³ஸதா பக்கவண்ணிதா; ஏவங் புக்³க³லேபி அரியானங் அபி⁴க்கமனாதி³ஸதி³ஸதா பக்கவண்ணிதாதி – இமினா நயேன உபமிதபுக்³க³லேஸு ஓபம்மஸங்ஸந்த³னங் வேதி³தப்³ப³ங்.

    159. Ambūpamesu – āmaṃ pakkavaṇṇīti anto āmaṃ bahi pakkasadisaṃ. Pakkaṃ āmavaṇṇīti anto pakkaṃ bahi āmasadisaṃ. Sesadvayesupi eseva nayo. Tattha yathā ambe apakkabhāvo āmatā hoti, evaṃ puggalepi puthujjanabhāvo āmatā, ariyabhāvo pakkatā. Yathā ca tattha pakkasadisatā pakkavaṇṇitā; evaṃ puggalepi ariyānaṃ abhikkamanādisadisatā pakkavaṇṇitāti – iminā nayena upamitapuggalesu opammasaṃsandanaṃ veditabbaṃ.

    160. கும்பூ⁴பமேஸு – கும்போ⁴தி க⁴டோ. துச்சோ²தி அந்தோ ரித்தோ. பிஹிதோதி பித³ஹித்வா ட²பிதோ. புரோதி அந்தோ புண்ணோ. விவடோதி விவரித்வா ட²பிதோ. உபமிதபுக்³க³லேஸு பனெத்த² அந்தோ கு³ணஸாரவிரஹிதோ துச்சோ² பா³ஹிரஸோப⁴னதாய பிஹிதோ புக்³க³லோ வேதி³தப்³போ³. ஸேஸேஸுபி ஏஸேவ நயோ.

    160. Kumbhūpamesu – kumbhoti ghaṭo. Tucchoti anto ritto. Pihitoti pidahitvā ṭhapito. Puroti anto puṇṇo. Vivaṭoti vivaritvā ṭhapito. Upamitapuggalesu panettha anto guṇasāravirahito tuccho bāhirasobhanatāya pihito puggalo veditabbo. Sesesupi eseva nayo.

    161. உத³கரஹதூ³பமேஸு – உத³கரஹதோ³ தாவ ஜண்ணுமத்தேபி உத³கே ஸதி பண்ணரஸஸம்பி⁴ன்னவண்ணத்தா வா ப³ஹலத்தா வா உத³கஸ்ஸ அபஞ்ஞாயமானதலோ உத்தானோ க³ம்பீ⁴ரோபா⁴ஸோ நாம ஹோதி. திபோரிஸ சதுபோரிஸேபி பன உத³கே ஸதி அச்ச²த்தா உத³கஸ்ஸ பஞ்ஞாயமானதலோ க³ம்பீ⁴ரோ உத்தானோபா⁴ஸோ நாம ஹோதி. உப⁴யகாரணஸம்பா⁴வதோ பன இதரே த்³வே வேதி³தப்³பா³. புக்³க³லோபி கிலேஸுஸ்ஸத³பா⁴வதோ கு³ணக³ம்பீ⁴ரதாய ச அபா⁴வதோ கு³ணக³ம்பீ⁴ரானங் ஸதி³ஸேஹி அபி⁴க்கமாதீ³ஹி யுத்தோ உத்தானோ க³ம்பீ⁴ரோபா⁴ஸோ நாம. இமினா நயேன ஸேஸாபி வேதி³தப்³பா³.

    161. Udakarahadūpamesu – udakarahado tāva jaṇṇumattepi udake sati paṇṇarasasambhinnavaṇṇattā vā bahalattā vā udakassa apaññāyamānatalo uttāno gambhīrobhāso nāma hoti. Tiporisa catuporisepi pana udake sati acchattā udakassa paññāyamānatalo gambhīro uttānobhāso nāma hoti. Ubhayakāraṇasambhāvato pana itare dve veditabbā. Puggalopi kilesussadabhāvato guṇagambhīratāya ca abhāvato guṇagambhīrānaṃ sadisehi abhikkamādīhi yutto uttāno gambhīrobhāso nāma. Iminā nayena sesāpi veditabbā.

    162. ப³லீப³த்³தூ³பமேஸு – ப³லீப³த்³தோ³ தாவ யோ அத்தனோ கோ³க³ணங் க⁴ட்டேதி உப்³பே³ஜேதி, பரகோ³க³ணே பன ஸோரதோ ஸுக²ஸீலோ ஹோதி – அயங் ஸகக³வசண்டோ³ நோ பரக³வசண்டோ³ நாம. புக்³க³லோபி அத்தனோ பரிஸங் க⁴ட்டெந்தோ விஜ்ஜ²ந்தோ ப²ருஸேன ஸமுதா³சரந்தோ, பரபரிஸாய பன ஸோரச்சங் நிவாதவுத்திதங் ஆபஜ்ஜந்தோ ஸகக³வசண்டோ³ ஹோதி நோ பரக³வசண்டோ³ நாமாதி. இமினா நயேன ஸேஸாபி வேதி³தப்³பா³. நித்³தே³ஸவாரே பனெத்த² உப்³பே³ஜிதா ஹோதீதி க⁴ட்டெத்வா விஜ்ஜி²த்வா உப்³பே³க³ப்பத்தங் கரோதிச்சேவ அத்தோ².

    162. Balībaddūpamesu – balībaddo tāva yo attano gogaṇaṃ ghaṭṭeti ubbejeti, paragogaṇe pana sorato sukhasīlo hoti – ayaṃ sakagavacaṇḍo no paragavacaṇḍo nāma. Puggalopi attano parisaṃ ghaṭṭento vijjhanto pharusena samudācaranto, paraparisāya pana soraccaṃ nivātavuttitaṃ āpajjanto sakagavacaṇḍo hoti no paragavacaṇḍo nāmāti. Iminā nayena sesāpi veditabbā. Niddesavāre panettha ubbejitā hotīti ghaṭṭetvā vijjhitvā ubbegappattaṃ karoticceva attho.

    163. ஆஸீவிஸூபமேஸு – ஆஸீவிஸோ தாவ யஸ்ஸ விஸங் ஆஸுங் ஆக³ச்ச²தி ஸீக⁴ங் ப²ரதி; கோ⁴ரங் பன ந ஹோதி, சிரகாலங் ந பீளேதி – அயங் ஆக³தவிஸோ நோ கோ⁴ரவிஸோ. ஸேஸபதே³ஸுபி ஏஸேவ நயோ. புக்³க³லவிபா⁴ஜனங் பன உத்தானத்த²மேவ.

    163. Āsīvisūpamesu – āsīviso tāva yassa visaṃ āsuṃ āgacchati sīghaṃ pharati; ghoraṃ pana na hoti, cirakālaṃ na pīḷeti – ayaṃ āgataviso no ghoraviso. Sesapadesupi eseva nayo. Puggalavibhājanaṃ pana uttānatthameva.

    164. அனநுவிச்ச அபரியோகா³ஹெத்வா அவண்ணாரஹஸ்ஸ வண்ணங் பா⁴ஸிதா ஹோதீதிஆதீ³ஸு அனநுவிச்சாதி அதுலயித்வா, அபரிக்³க³ண்ஹித்வா. அபரியோகா³ஹெத்வாதி பஞ்ஞாய கு³ணே அனோகா³ஹெத்வா.

    164. Ananuvicca apariyogāhetvā avaṇṇārahassa vaṇṇaṃ bhāsitā hotītiādīsu ananuviccāti atulayitvā, apariggaṇhitvā. Apariyogāhetvāti paññāya guṇe anogāhetvā.

    166. பூ⁴தங் தச்ச²ந்தி விஜ்ஜமானதோ பூ⁴தங், அவிபரீததோ தச்ச²ங். காலேனாதி யுத்தபயுத்தகாலேன. தத்ர காலஞ்ஞூ ஹோதீதி யமித³ங் காலேனாதி வுத்தங். தத்ர யோ புக்³க³லோ காலஞ்ஞூ ஹோதி, காலங் ஜானாதி, தஸ்ஸ பஞ்ஹஸ்ஸ வெய்யாகரணத்தா²ய ‘‘இமஸ்மிங் காலே புச்சி²தேனாபி மயா ந கதே²தப்³பா³, இமஸ்மிங் காலே கதே²தப்³பா³’’தி – அயங் காலேன ப⁴ணதி நாம. உபெக்க²கோ விஹரதீதி மஜ்ஜ²த்தபூ⁴தாய உபெக்கா²ய டி²தோ ஹுத்வா விஹரதி. ஸேஸங் ஸப்³ப³த்த² உத்தானத்த²மேவ.

    166. Bhūtaṃ tacchanti vijjamānato bhūtaṃ, aviparītato tacchaṃ. Kālenāti yuttapayuttakālena. Tatra kālaññū hotīti yamidaṃ kālenāti vuttaṃ. Tatra yo puggalo kālaññū hoti, kālaṃ jānāti, tassa pañhassa veyyākaraṇatthāya ‘‘imasmiṃ kāle pucchitenāpi mayā na kathetabbā, imasmiṃ kāle kathetabbā’’ti – ayaṃ kālena bhaṇati nāma. Upekkhako viharatīti majjhattabhūtāya upekkhāya ṭhito hutvā viharati. Sesaṃ sabbattha uttānatthameva.

    167. உட்டா²னப²லூபஜீவீதிஆதீ³ஸு – யோ உட்டா²னவீரியேனேவ தி³வஸங் வீதினாமெத்வா தஸ்ஸ நிஸ்ஸந்த³ப²லமத்தங் கிஞ்சிதே³வ லபி⁴த்வா ஜீவிகங் கப்பேதி, தங் பன உட்டா²னங் ஆக³ம்ம கிஞ்சி புஞ்ஞப²லங் ந படிலப⁴தி, தங் ஸந்தா⁴ய யஸ்ஸ புக்³க³லஸ்ஸ உட்ட²ஹதோதிஆதி³ வுத்தங். ததூபரி தே³வாதி ததோ உபரி ப்³ரஹ்மகாயிகாத³யோ தே³வா. தேஸஞ்ஹி உட்டா²னவீரியேன கிச்சங் நாம நத்தி². புஞ்ஞப²லமேவ உபஜீவந்தி. புஞ்ஞவதோ சாதி இத³ங் புஞ்ஞவந்தே க²த்தியப்³ராஹ்மணாத³யோ சேவ பு⁴ம்மதே³வே ஆதி³ங் கத்வா நிம்மானரதிபரியோஸானே தே³வே ச ஸந்தா⁴ய வுத்தங். ஸப்³பே³பி ஹேதே வாயாமப²லஞ்சேவ புஞ்ஞப²லஞ்ச அனுப⁴வந்தி. நேரயிகா பன நேவ உட்டா²னேன ஆஜீவங் உப்பாதே³துங் ஸக்கொந்தி, நாபி நேஸங் புஞ்ஞப²லேன கோசி ஆஜீவோ உப்பஜ்ஜதி.

    167. Uṭṭhānaphalūpajīvītiādīsu – yo uṭṭhānavīriyeneva divasaṃ vītināmetvā tassa nissandaphalamattaṃ kiñcideva labhitvā jīvikaṃ kappeti, taṃ pana uṭṭhānaṃ āgamma kiñci puññaphalaṃ na paṭilabhati, taṃ sandhāya yassa puggalassa uṭṭhahatotiādi vuttaṃ. Tatūpari devāti tato upari brahmakāyikādayo devā. Tesañhi uṭṭhānavīriyena kiccaṃ nāma natthi. Puññaphalameva upajīvanti. Puññavato cāti idaṃ puññavante khattiyabrāhmaṇādayo ceva bhummadeve ādiṃ katvā nimmānaratipariyosāne deve ca sandhāya vuttaṃ. Sabbepi hete vāyāmaphalañceva puññaphalañca anubhavanti. Nerayikā pana neva uṭṭhānena ājīvaṃ uppādetuṃ sakkonti, nāpi nesaṃ puññaphalena koci ājīvo uppajjati.

    168. தமாதீ³ஸு – ‘‘நீசே குலே பச்சாஜாதோ’’திஆதி³கேன தமேன யுத்தோதி தமோ. காயது³ச்சரிதாதீ³ஹி புன நிரயதமூபக³மனதோ தமபராயணோ. நேஸாத³குலேதி மிக³லுத்³த³காதீ³னங் குலே. வேனகுலேதி விலீவகாரகுலே. ரத²காரகுலேதி சம்மகாரகுலே. புக்குஸகுலேதி புப்ப²ச²ட்³ட³ககுலே. கஸிரவுத்திகேதி து³க்க²வுத்திகே. து³ப்³ப³ண்ணோதி பங்ஸுபிஸாசகோ விய ஜா²மகா²ணுவண்ணோ. து³த்³த³ஸிகோதி விஜாதமாதுயாபி அமனாபத³ஸ்ஸனோ. ஓகோடிமகோதி லகுண்ட³கோ. காணோதி ஏகக்கி²காணோ வா உப⁴யக்கி²காணோ வா. குணீதி ஏகஹத்த²குணீ வா உப⁴யஹத்த²குணீ வா. க²ஞ்ஜோதி ஏகபாத³க²ஞ்ஜோ வா உப⁴யபாத³க²ஞ்ஜோ வா. பக்க²ஹதோதி ஹதபக்கோ² பீட²ஸப்பீ. பதீ³பெய்யஸ்ஸாதி தேலகபல்லகாதி³னோ பதீ³பூபகரணஸ்ஸ. ஏவங் புக்³க³லோ தமோ ஹோதி தமபராயணோதி எத்த² ஏகோ புக்³க³லோ ப³ஹித்³தா⁴ ஆலோகங் அதி³ஸ்வா மாதுகுச்சி²ஸ்மிஞ்ஞேவ காலங் கத்வா அபாயேஸு நிப்³ப³த்தந்தோ ஸகலேபி கப்பே ஸங்ஸரதி. ஸோபி தமோ தமபராயணோவ. ஸோ பன குஹகபுக்³க³லோ ப⁴வெய்ய. குஹகஸ்ஸ ஹி ஏவரூபா நிப்³ப³த்தி ஹோதீதி வுத்தங்.

    168. Tamādīsu – ‘‘nīce kule paccājāto’’tiādikena tamena yuttoti tamo. Kāyaduccaritādīhi puna nirayatamūpagamanato tamaparāyaṇo. Nesādakuleti migaluddakādīnaṃ kule. Venakuleti vilīvakārakule. Rathakārakuleti cammakārakule. Pukkusakuleti pupphachaḍḍakakule. Kasiravuttiketi dukkhavuttike. Dubbaṇṇoti paṃsupisācako viya jhāmakhāṇuvaṇṇo. Duddasikoti vijātamātuyāpi amanāpadassano. Okoṭimakoti lakuṇḍako. Kāṇoti ekakkhikāṇo vā ubhayakkhikāṇo vā. Kuṇīti ekahatthakuṇī vā ubhayahatthakuṇī vā. Khañjoti ekapādakhañjo vā ubhayapādakhañjo vā. Pakkhahatoti hatapakkho pīṭhasappī. Padīpeyyassāti telakapallakādino padīpūpakaraṇassa. Evaṃ puggalo tamo hoti tamaparāyaṇoti ettha eko puggalo bahiddhā ālokaṃ adisvā mātukucchismiññeva kālaṃ katvā apāyesu nibbattanto sakalepi kappe saṃsarati. Sopi tamo tamaparāyaṇova. So pana kuhakapuggalo bhaveyya. Kuhakassa hi evarūpā nibbatti hotīti vuttaṃ.

    எத்த² ச நீசே குலே பச்சாஜாதோ ஹோதி சண்டா³லகுலே வாதிஆதீ³ஹி ஆக³மனவிபத்தி சேவ புப்³பு³ப்பன்னபச்சயவிபத்தி ச த³ஸ்ஸிதா. த³லித்³தே³திஆதீ³ஹி பவத்திபச்சயவிபத்தி. கஸிரவுத்திகேதிஆதீ³ஹி ஆஜீவுபாயவிபத்தி. து³ப்³ப³ண்ணோதிஆதீ³ஹி ரூபவிபத்தி. ப³ஹ்வாபா³தோ⁴திஆதீ³ஹி து³க்க²காரணஸமாயோகோ³. ந லாபீ⁴திஆதீ³ஹி ஸுக²காரணவிபத்தி சேவ உபபோ⁴க³விபத்தி ச. காயேன து³ச்சரிதந்திஆதீ³ஹி தமபராயணபா⁴வஸ்ஸ காரணஸமாயோகோ³. காயஸ்ஸ பே⁴தா³திஆதீ³ஹி ஸம்பராயிகதமூபக³மோ. ஸுக்கபக்கோ² வுத்தபடிபக்க²னயேன வேதி³தப்³போ³.

    Ettha ca nīce kule paccājāto hoti caṇḍālakule vātiādīhi āgamanavipatti ceva pubbuppannapaccayavipatti ca dassitā. Daliddetiādīhi pavattipaccayavipatti. Kasiravuttiketiādīhi ājīvupāyavipatti. Dubbaṇṇotiādīhi rūpavipatti. Bahvābādhotiādīhi dukkhakāraṇasamāyogo. Na lābhītiādīhi sukhakāraṇavipatti ceva upabhogavipatti ca. Kāyena duccaritantiādīhi tamaparāyaṇabhāvassa kāraṇasamāyogo. Kāyassa bhedātiādīhi samparāyikatamūpagamo. Sukkapakkho vuttapaṭipakkhanayena veditabbo.

    அபிசெத்த² திவிதா⁴ய குலஸம்பத்தியா பச்சாஜாதிஆதி³கேன ஜோதினா யுத்ததோ ஜோதி, ஆலோகபூ⁴தோதி வுத்தங் ஹோதி. காயஸுசரிதாதீ³ஹி பன ஸக்³கூ³பபத்திஜோதிபா⁴வூபக³மனதோ ஜோதிபராயணோ. க²த்தியமஹாஸாலகுலே வாதிஆதீ³ஸு க²த்தியமஹாஸாலாதி க²த்தியா மஹாஸாரா மஹாஸாரப்பத்தா க²த்தியா. யேஸஞ்ஹி க²த்தியானங் ஹெட்டி²மந்தேன கோடிஸதங் நிதா⁴னக³தங் ஹோதி, தயோ கஹாபணகும்பா⁴ வளஞ்ஜனத்தா²ய கே³ஹமஜ்ஜே² ராஸிங் கத்வா ட²பிதா ஹொந்தி, தே க²த்தியமஹாஸாலா நாம. யேஸங் ப்³ராஹ்மணானங் அஸீதிகோடித⁴னங் நிஹிதங் ஹோதி, தி³யட்³டோ⁴ கஹாபணகும்போ⁴ வளஞ்ஜனத்தா²ய கே³ஹமஜ்ஜே² ராஸிங் கத்வா ட²பிதோ ஹோதி, தே ப்³ராஹ்மணமஹாஸாலா நாம. யேஸங் க³ஹபதீனங் சத்தாலீஸகோடித⁴னங் நிஹிதங் ஹோதி, கஹாபணகும்போ⁴ வளஞ்ஜத்தா²ய கே³ஹமஜ்ஜே² ராஸிங் கத்வா ட²பிதோ ஹோதி, தே க³ஹபதிமஹாஸாலா நாம. தேஸங் குலேதி அத்தோ². அட்³டே⁴தி இஸ்ஸரே. நிதா⁴னக³தத⁴னஸ்ஸ மஹந்ததாய மஹத்³த⁴னே. ஸுவண்ணரஜதபா⁴ஜனாதீ³னங் உபபோ⁴க³ப⁴ண்டா³னங் மஹந்ததாய மஹாபோ⁴கே³. நிதா⁴னக³தஸ்ஸ ஜாதரூபரஜதஸ்ஸ பஹூததாய பஹூதஜாதரூபரஜதே. வித்தூபகரணஸ்ஸ துட்டி²கரணஸ்ஸ பஹூததாய பஹூதவித்தூபகரணே. கோ³த⁴னாதீ³னஞ்ச ஸத்தவித⁴த⁴ஞ்ஞானஞ்ச பஹூததாய பஹூதத⁴னத⁴ஞ்ஞே. அபி⁴ரூபோதி ஸுந்த³ரரூபோ. த³ஸ்ஸனீயோதி அஞ்ஞங் கம்மங் பஹாய தி³வஸம்பி பஸ்ஸிதப்³ப³யுத்தோ. பாஸாதி³கோதி த³ஸ்ஸனேனேவ சித்தபஸாதா³வஹோ. பரமாயாதி உத்தமாய. வண்ணபொக்க²ரதாயாதி பொக்க²ரவண்ணதாய. பொக்க²ரங் வுச்சதி ஸரீரங். தஸ்ஸ வண்ணஸம்பத்தியாதி அத்தோ². ஸமன்னாக³தோதி உபேதோ.

    Apicettha tividhāya kulasampattiyā paccājātiādikena jotinā yuttato joti, ālokabhūtoti vuttaṃ hoti. Kāyasucaritādīhi pana saggūpapattijotibhāvūpagamanato jotiparāyaṇo. Khattiyamahāsālakule vātiādīsu khattiyamahāsālāti khattiyā mahāsārā mahāsārappattā khattiyā. Yesañhi khattiyānaṃ heṭṭhimantena koṭisataṃ nidhānagataṃ hoti, tayo kahāpaṇakumbhā vaḷañjanatthāya gehamajjhe rāsiṃ katvā ṭhapitā honti, te khattiyamahāsālā nāma. Yesaṃ brāhmaṇānaṃ asītikoṭidhanaṃ nihitaṃ hoti, diyaḍḍho kahāpaṇakumbho vaḷañjanatthāya gehamajjhe rāsiṃ katvā ṭhapito hoti, te brāhmaṇamahāsālā nāma. Yesaṃ gahapatīnaṃ cattālīsakoṭidhanaṃ nihitaṃ hoti, kahāpaṇakumbho vaḷañjatthāya gehamajjhe rāsiṃ katvā ṭhapito hoti, te gahapatimahāsālā nāma. Tesaṃ kuleti attho. Aḍḍheti issare. Nidhānagatadhanassa mahantatāya mahaddhane. Suvaṇṇarajatabhājanādīnaṃ upabhogabhaṇḍānaṃ mahantatāya mahābhoge. Nidhānagatassa jātarūparajatassa pahūtatāya pahūtajātarūparajate. Vittūpakaraṇassa tuṭṭhikaraṇassa pahūtatāya pahūtavittūpakaraṇe. Godhanādīnañca sattavidhadhaññānañca pahūtatāya pahūtadhanadhaññe. Abhirūpoti sundararūpo. Dassanīyoti aññaṃ kammaṃ pahāya divasampi passitabbayutto. Pāsādikoti dassaneneva cittapasādāvaho. Paramāyāti uttamāya. Vaṇṇapokkharatāyāti pokkharavaṇṇatāya. Pokkharaṃ vuccati sarīraṃ. Tassa vaṇṇasampattiyāti attho. Samannāgatoti upeto.

    169. ஓணதோணதாதீ³ஸு – தி³ட்ட²த⁴ம்மிகாய வா ஸம்பராயிகாய வா ஸம்பத்தியா விரஹிதோ ஓணதோ. நீசோ, லாமகோதி அத்தோ². தப்³பி³பக்க²தோ உண்ணதோ. உச்சோ, உக்³க³தோதி அத்தோ². ஸேஸமெத்த² தமாதீ³ஸு வுத்தனயேனேவ வேதி³தப்³ப³ங். அபிச – ஓணதோணதோதி இதா³னி நீசோ, ஆயதிம்பி நீசோவ ப⁴விஸ்ஸதி. ஓணதுண்ணதோதி இதா³னி நீசோ, ஆயதிங் உச்சோ ப⁴விஸ்ஸதி. உண்ணதோணதோதி இதா³னி உச்சோ, ஆயதிங் நீசோ ப⁴விஸ்ஸதி. உண்ணதுண்ணதோதி இதா³னி உச்சோ, ஆயதிம்பி உச்சோவ ப⁴விஸ்ஸதீதி.

    169. Oṇatoṇatādīsu – diṭṭhadhammikāya vā samparāyikāya vā sampattiyā virahito oṇato. Nīco, lāmakoti attho. Tabbipakkhato uṇṇato. Ucco, uggatoti attho. Sesamettha tamādīsu vuttanayeneva veditabbaṃ. Apica – oṇatoṇatoti idāni nīco, āyatimpi nīcova bhavissati. Oṇatuṇṇatoti idāni nīco, āyatiṃ ucco bhavissati. Uṇṇatoṇatoti idāni ucco, āyatiṃ nīco bhavissati. Uṇṇatuṇṇatoti idāni ucco, āyatimpi uccova bhavissatīti.

    170. ருக்கூ²பமேஸு – ருக்கோ² தாவ பெ²க்³கு³ஸாரபரிவாரோதி வனஜெட்ட²கருக்கோ² ஸயங் பெ²க்³கு³ ஹோதி , பரிவாரருக்கா² பனஸ்ஸ ஸாரா ஹொந்தி. இமினா நயேன ஸேஸா வேதி³தப்³பா³. புக்³க³லேஸு பன ஸீலஸாரவிரஹதோ பெ²க்³கு³தா, ஸீலாசாரஸமன்னாக³மேன ச ஸாரதா வேதி³தப்³பா³.

    170. Rukkhūpamesu – rukkho tāva pheggusāraparivāroti vanajeṭṭhakarukkho sayaṃ pheggu hoti , parivārarukkhā panassa sārā honti. Iminā nayena sesā veditabbā. Puggalesu pana sīlasāravirahato pheggutā, sīlācārasamannāgamena ca sāratā veditabbā.

    171. ரூபப்பமாணாதீ³ஸு – ஸம்பத்தியுத்தங் ரூபங் பமாணங் கரோதீதி ரூபப்பமாணோ. தத்த² பஸாத³ங் ஜனேதீதி ரூபப்பஸன்னோ. கித்திஸத்³த³பூ⁴தங் கோ⁴ஸங் பமாணங் கரோதீதி கோ⁴ஸப்பமாணோ. ஆரோஹங் வாதிஆதீ³ஸு பன – ஆரோஹந்தி உச்சத்தனங். பரிணாஹந்தி கிஸதூ²லபா⁴வாபக³தங் பரிக்கே²பஸம்பத்திங். ஸண்டா²னந்தி அங்க³பச்சங்கா³னங் தீ³க⁴ரஸ்ஸவட்டதாதி³யுத்தட்டா²னேஸு ததா²பா⁴வங். பாரிபூரிந்தி யதா²வுத்தப்பகாரானங் அனூனதங், லக்க²ணபரிபுண்ணபா⁴வங் வா. பரவண்ணனாயாதி பரேஹி பரம்முகா² நிச்சா²ரிதாய கு³ணவண்ணனாய. பரதோ²மனாயாதி பரேஹி து²திவஸேன கா³தா²தி³உபனிப³ந்த⁴னேன வுத்தாய தோ²மனாய. பரபஸங்ஸனாயாதி பரேஹி ஸம்முகா² வுத்தாய பஸங்ஸாய. பரவண்ணஹாரிகாயாதி பரம்பரது²திவஸேன பரேஹி பவத்திதாய வண்ணஹரணாய.

    171. Rūpappamāṇādīsu – sampattiyuttaṃ rūpaṃ pamāṇaṃ karotīti rūpappamāṇo. Tattha pasādaṃ janetīti rūpappasanno. Kittisaddabhūtaṃ ghosaṃ pamāṇaṃ karotīti ghosappamāṇo. Ārohaṃ vātiādīsu pana – ārohanti uccattanaṃ. Pariṇāhanti kisathūlabhāvāpagataṃ parikkhepasampattiṃ. Saṇṭhānanti aṅgapaccaṅgānaṃ dīgharassavaṭṭatādiyuttaṭṭhānesu tathābhāvaṃ. Pāripūrinti yathāvuttappakārānaṃ anūnataṃ, lakkhaṇaparipuṇṇabhāvaṃ vā. Paravaṇṇanāyāti parehi parammukhā nicchāritāya guṇavaṇṇanāya. Parathomanāyāti parehi thutivasena gāthādiupanibandhanena vuttāya thomanāya. Parapasaṃsanāyāti parehi sammukhā vuttāya pasaṃsāya. Paravaṇṇahārikāyāti paramparathutivasena parehi pavattitāya vaṇṇaharaṇāya.

    172. சீவரலூக²ந்தி சீவரஸ்ஸ து³ப்³ப³ண்ணாதி³பா⁴வேன லூக²தங். பத்தலூக²ந்தி பா⁴ஜனஸ்ஸ வண்ணஸண்டா²னவத்தூ²ஹி லூக²தங். ஸேனாஸனலூக²ந்தி நாடகாதி³ஸம்பத்திவிரஹேன ஸேனாஸனஸ்ஸ லூக²தங். விவித⁴ந்தி அசேலகாதி³பா⁴வேன அனேகப்பகாரங். து³க்கரகாரிகந்தி ஸரீரதாபனங்.

    172. Cīvaralūkhanti cīvarassa dubbaṇṇādibhāvena lūkhataṃ. Pattalūkhanti bhājanassa vaṇṇasaṇṭhānavatthūhi lūkhataṃ. Senāsanalūkhanti nāṭakādisampattivirahena senāsanassa lūkhataṃ. Vividhanti acelakādibhāvena anekappakāraṃ. Dukkarakārikanti sarīratāpanaṃ.

    அபரோ நயோ – இமேஸு ஹி சதூஸு புக்³க³லேஸு ரூபே பமாணங் க³ஹெத்வா பஸன்னோ ரூபப்பமாணோ நாம. ரூபப்பஸன்னோதி தஸ்ஸேவ அத்த²வசனங். கோ⁴ஸே பமாணங் க³ஹெத்வா பஸன்னோ கோ⁴ஸப்பமாணோ நாம. சீவரலூக²பத்தலூகே²ஸு பமாணங் க³ஹெத்வா பஸன்னோ லூக²ப்பமாணோ நாம. த⁴ம்மே பமாணங் க³ஹெத்வா பஸன்னோ த⁴ம்மப்பமாணோ நாம. இதரானி தேஸங்யேவ அத்த²வசனானி. ஸப்³ப³ஸத்தே ச தயோ கொட்டா²ஸே கத்வா த்³வே கொட்டா²ஸா ரூபப்பமாணா, ஏகோ ந ரூபப்பமாணோ. பஞ்ச கொட்டா²ஸே கத்வா சத்தாரோ கொட்டா²ஸா கோ⁴ஸப்பமாணா, ஏகோ ந கோ⁴ஸப்பமாணோ. த³ஸ கொட்டா²ஸே கத்வா நவ கொட்டா²ஸா லூக²ப்பமாணா, ஏகோ ந லூக²ப்பமாணோ. ஸதஸஹஸ்ஸங் கொட்டா²ஸே கத்வா பன ஏகோ கொட்டா²ஸோவ த⁴ம்மப்பமாணோ, ஸேஸா ந த⁴ம்மப்பமாணா. ஏவமயங் சதுப்பமாணோ லோகஸன்னிவாஸோ.

    Aparo nayo – imesu hi catūsu puggalesu rūpe pamāṇaṃ gahetvā pasanno rūpappamāṇo nāma. Rūpappasannoti tasseva atthavacanaṃ. Ghose pamāṇaṃ gahetvā pasanno ghosappamāṇo nāma. Cīvaralūkhapattalūkhesu pamāṇaṃ gahetvā pasanno lūkhappamāṇo nāma. Dhamme pamāṇaṃ gahetvā pasanno dhammappamāṇo nāma. Itarāni tesaṃyeva atthavacanāni. Sabbasatte ca tayo koṭṭhāse katvā dve koṭṭhāsā rūpappamāṇā, eko na rūpappamāṇo. Pañca koṭṭhāse katvā cattāro koṭṭhāsā ghosappamāṇā, eko na ghosappamāṇo. Dasa koṭṭhāse katvā nava koṭṭhāsā lūkhappamāṇā, eko na lūkhappamāṇo. Satasahassaṃ koṭṭhāse katvā pana eko koṭṭhāsova dhammappamāṇo, sesā na dhammappamāṇā. Evamayaṃ catuppamāṇo lokasannivāso.

    ஏதஸ்மிங் சதுப்பமாணே லோகஸன்னிவாஸே பு³த்³தே⁴ஸு அப்பஸன்னா மந்தா³, பஸன்னாவ ப³ஹுகா. ரூபப்பமாணஸ்ஸ ஹி பு³த்³த⁴ரூபதோ உத்தரி பஸாதா³வஹங் ரூபங் நாம நத்தி². கோ⁴ஸப்பமாணஸ்ஸ பு³த்³தா⁴னங் கித்திகோ⁴ஸதோ உத்தரி பஸாதா³வஹோ கோ⁴ஸோ நாம நத்தி². லூக²ப்பமாணஸ்ஸ காஸிகானி வத்தா²னி மஹாரஹானி கஞ்சனபா⁴ஜனானி திண்ணங் உதூனங் அனுச்ச²விகே ஸப்³ப³ஸம்பத்தியுத்தே பாஸாத³வரே பஹாய பங்ஸுகூலசீவரஸேலமயபத்தருக்க²மூலாதி³ஸேனாஸனஸேவினோ பு³த்³த⁴ஸ்ஸ ப⁴க³வதோ லூக²தோ உத்தரி பஸாதா³வஹங் அஞ்ஞங் லூக²ங் நாம நத்தி². த⁴ம்மப்பமாணஸ்ஸ ஸதே³வகே லோகே அஸாதா⁴ரணஸீலாதி³கு³ணஸ்ஸ ததா²க³தஸ்ஸ ஸீலாதி³கு³ணதோ உத்தரி பஸாதா³வஹோ அஞ்ஞோ ஸீலாதி³கு³ணோ நாம நத்தி². இதி ப⁴க³வா இமங் சதுப்பமாணிகங் லோகஸன்னிவாஸங் முட்டி²னா க³ஹெத்வா விய டி²தோதி.

    Etasmiṃ catuppamāṇe lokasannivāse buddhesu appasannā mandā, pasannāva bahukā. Rūpappamāṇassa hi buddharūpato uttari pasādāvahaṃ rūpaṃ nāma natthi. Ghosappamāṇassa buddhānaṃ kittighosato uttari pasādāvaho ghoso nāma natthi. Lūkhappamāṇassa kāsikāni vatthāni mahārahāni kañcanabhājanāni tiṇṇaṃ utūnaṃ anucchavike sabbasampattiyutte pāsādavare pahāya paṃsukūlacīvaraselamayapattarukkhamūlādisenāsanasevino buddhassa bhagavato lūkhato uttari pasādāvahaṃ aññaṃ lūkhaṃ nāma natthi. Dhammappamāṇassa sadevake loke asādhāraṇasīlādiguṇassa tathāgatassa sīlādiguṇato uttari pasādāvaho añño sīlādiguṇo nāma natthi. Iti bhagavā imaṃ catuppamāṇikaṃ lokasannivāsaṃ muṭṭhinā gahetvā viya ṭhitoti.

    173. அத்தஹிதாய படிபன்னாதீ³ஸு – ஸீலஸம்பன்னோதி ஸீலேன ஸம்பன்னோ ஸமன்னாக³தோ. ஸமாதி⁴ஸம்பன்னோதிஆதீ³ஸுபி ஏஸேவ நயோ. எத்த² ச ஸீலங் லோகியலோகுத்தரங் கதி²தங். ததா² ஸமாதி⁴பஞ்ஞா ச. விமுத்தி அரஹத்தப²லவிமுத்தியேவ. ஞாணத³ஸ்ஸனங் ஏகூனவீஸதிவித⁴ங் பச்சவெக்க²ணஞாணங். நோ பரந்திஆதீ³ஸு – பரபுக்³க³லங் ‘‘தயாபி ஸீலஸம்பன்னேன ப⁴விதுங் வட்டதீ’’தி வத்வா யதா² ஸீலங் ஸமாதி³யதி, ஏவங் ந ஸமாத³பேதி, ந க³ண்ஹாபேதி. ஏஸேவ நயோ ஸப்³ப³த்த². ஏதேஸு பன சதூஸு பட²மோ வக்கலித்தே²ரஸதி³ஸோ ஹோதி. து³தியோ உபனந்த³ஸக்யபுத்தஸதி³ஸோ . ததியோ ஸாரிபுத்தமொக்³க³ல்லானத்தே²ரஸதி³ஸோ. சதுத்தோ² தே³வத³த்தஸதி³ஸோதி வேதி³தப்³போ³.

    173. Attahitāya paṭipannādīsu – sīlasampannoti sīlena sampanno samannāgato. Samādhisampannotiādīsupi eseva nayo. Ettha ca sīlaṃ lokiyalokuttaraṃ kathitaṃ. Tathā samādhipaññā ca. Vimutti arahattaphalavimuttiyeva. Ñāṇadassanaṃ ekūnavīsatividhaṃ paccavekkhaṇañāṇaṃ. No parantiādīsu – parapuggalaṃ ‘‘tayāpi sīlasampannena bhavituṃ vaṭṭatī’’ti vatvā yathā sīlaṃ samādiyati, evaṃ na samādapeti, na gaṇhāpeti. Eseva nayo sabbattha. Etesu pana catūsu paṭhamo vakkalittherasadiso hoti. Dutiyo upanandasakyaputtasadiso . Tatiyo sāriputtamoggallānattherasadiso. Catuttho devadattasadisoti veditabbo.

    174. அத்தந்தபாதீ³ஸு – அத்தானங் தபதி து³க்கா²பேதீதி அத்தந்தபோ. அத்தனோ பரிதாபனானுயோக³ங் அத்தபரிதாபனானுயோக³ங். அசேலகோதி நிச்சேலோ, நக்³கோ³. முத்தாசாரோதி விஸட்டா²சாரோ. உச்சாரகம்மாதீ³ஸு லோகியகுலபுத்தாசாரேன விரஹிதோ டி²தகோவ உச்சாரங் கரோதி, பஸ்ஸாவங் கரோதி, கா²த³தி, பு⁴ஞ்ஜதி ச. ஹத்தா²பலேக²னோதி ஹத்தே² பிண்ட³ம்ஹி நிட்டி²தே ஜிவ்ஹாய ஹத்த²ங் அபலேக²தி. உச்சாரங் வா கத்வா ஹத்த²ஸ்மிஞ்ஞேவ த³ண்ட³கஸஞ்ஞீ ஹுத்வா ஹத்தே²ன அபலேக²தீதி த³ஸ்ஸேதி. தே கிர த³ண்ட³கங் ஸத்தோதி பஞ்ஞபெந்தி. தஸ்மா தேஸங் படிபத³ங் பூரெந்தோ ஏவங் கரோதி. பி⁴க்கா²க³ஹணத்த²ங் ‘ஏஹி ப⁴த்³த³ந்தே’தி வுத்தோ, ந ஏதீதி நஏஹிப⁴த்³த³ந்திகோ. தேன ஹி ‘திட்ட² ப⁴த்³த³ந்தே’தி வுத்தோபி ந திட்ட²தீதி நதிட்ட²ப⁴த்³த³ந்திகோ. தது³ப⁴யம்பி ஹேதங் தித்தி²யா ‘‘ஏதஸ்ஸ வசனங் கதங் ப⁴விஸ்ஸதீ’’தி ந கரொந்தி. அபி⁴ஹடந்தி புரேதரங் க³ஹெத்வா ஆஹடங் பி⁴க்க²ங். உத்³தி³ஸ்ஸகதந்தி ‘‘இமங் தும்ஹே உத்³தி³ஸ்ஸ கத’’ந்தி ஏவங் ஆரோசிதபி⁴க்க²ங். ந நிமந்தனந்தி ‘‘அஸுகங் நாம குலங் வா வீதி²ங் வா கா³மங் வா பவிஸெய்யாதா²’’தி ஏவங் நிமந்திதபி⁴க்க²ம்பி ந ஸாதி³யதி, ந க³ண்ஹாதி.

    174. Attantapādīsu – attānaṃ tapati dukkhāpetīti attantapo. Attano paritāpanānuyogaṃ attaparitāpanānuyogaṃ. Acelakoti niccelo, naggo. Muttācāroti visaṭṭhācāro. Uccārakammādīsu lokiyakulaputtācārena virahito ṭhitakova uccāraṃ karoti, passāvaṃ karoti, khādati, bhuñjati ca. Hatthāpalekhanoti hatthe piṇḍamhi niṭṭhite jivhāya hatthaṃ apalekhati. Uccāraṃ vā katvā hatthasmiññeva daṇḍakasaññī hutvā hatthena apalekhatīti dasseti. Te kira daṇḍakaṃ sattoti paññapenti. Tasmā tesaṃ paṭipadaṃ pūrento evaṃ karoti. Bhikkhāgahaṇatthaṃ ‘ehi bhaddante’ti vutto, na etīti naehibhaddantiko. Tena hi ‘tiṭṭha bhaddante’ti vuttopi na tiṭṭhatīti natiṭṭhabhaddantiko. Tadubhayampi hetaṃ titthiyā ‘‘etassa vacanaṃ kataṃ bhavissatī’’ti na karonti. Abhihaṭanti puretaraṃ gahetvā āhaṭaṃ bhikkhaṃ. Uddissakatanti ‘‘imaṃ tumhe uddissa kata’’nti evaṃ ārocitabhikkhaṃ. Na nimantananti ‘‘asukaṃ nāma kulaṃ vā vīthiṃ vā gāmaṃ vā paviseyyāthā’’ti evaṃ nimantitabhikkhampi na sādiyati, na gaṇhāti.

    ந கும்பி⁴முகா²தி கும்பி⁴தோ உத்³த⁴ரித்வா தி³ய்யமானங் பி⁴க்க²ங் ந க³ண்ஹாதி. ந களோபிமுகா²தி களோபீதி உக்க²லி, பச்சி² வா. ததோபி ந க³ண்ஹாதி. கஸ்மா? கும்பீ⁴ களோபியோ கடச்சு²னா பஹாரங் லப⁴ந்தீதி. ந ஏளகமந்தரந்தி உம்மாரங் அந்தரங் கத்வா தி³ய்யமானங் ந க³ண்ஹாதி. கஸ்மா? அயங் மங் நிஸ்ஸாய அந்தரகரணங் லப⁴தீதி. த³ண்ட³முஸலேஸுபி ஏஸேவ நயோ. த்³வின்னந்தி த்³வீஸு பு⁴ஞ்ஜமானேஸு ஏகஸ்மிங் உட்டா²ய தெ³ந்தே ந க³ண்ஹதி. கஸ்மா? கப³ளந்தராயோ ஹோதீதி. ந க³ப்³பி⁴னியாதிஆதீ³ஸு பன க³ப்³பி⁴னியா குச்சி²யங் தா³ரகோ கிலமதி. பாயந்தியா தா³ரகஸ்ஸ கீ²ரந்தராயோ ஹோதி. புரிஸந்தரக³தாய ரதிஅந்தராயோ ஹோதீதி ந க³ண்ஹாதி ந ஸங்கித்தீஸூதி ஸங்கித்தெத்வா கதப⁴த்தேஸு. து³ப்³பி⁴க்க²ஸமயே கிர அசேலகஸாவகா அசேலகானங் அத்தா²ய ததோ ததோ தண்டு³லாதீ³னி ஸமாத³பெத்வா ப⁴த்தங் பசந்தி, உக்கட்டா²சேலகோ ததோ ந படிக்³க³ண்ஹாதி. ந யத்த² ஸாதி யத்த² ஸுனகோ² ‘பிண்ட³ங் லபி⁴ஸ்ஸாமீ’தி உபட்டி²தோ ஹோதி, தத்த² தஸ்ஸ அத³த்வா ஆஹடங் ந க³ண்ஹாதி. கஸ்மா? ஏதஸ்ஸ பிண்ட³ந்தராயோ ஹோதீதி.

    Nakumbhimukhāti kumbhito uddharitvā diyyamānaṃ bhikkhaṃ na gaṇhāti. Na kaḷopimukhāti kaḷopīti ukkhali, pacchi vā. Tatopi na gaṇhāti. Kasmā? Kumbhī kaḷopiyo kaṭacchunā pahāraṃ labhantīti. Na eḷakamantaranti ummāraṃ antaraṃ katvā diyyamānaṃ na gaṇhāti. Kasmā? Ayaṃ maṃ nissāya antarakaraṇaṃ labhatīti. Daṇḍamusalesupi eseva nayo. Dvinnanti dvīsu bhuñjamānesu ekasmiṃ uṭṭhāya dente na gaṇhati. Kasmā? Kabaḷantarāyo hotīti. Na gabbhiniyātiādīsu pana gabbhiniyā kucchiyaṃ dārako kilamati. Pāyantiyā dārakassa khīrantarāyo hoti. Purisantaragatāya ratiantarāyo hotīti na gaṇhāti na saṅkittīsūti saṅkittetvā katabhattesu. Dubbhikkhasamaye kira acelakasāvakā acelakānaṃ atthāya tato tato taṇḍulādīni samādapetvā bhattaṃ pacanti, ukkaṭṭhācelako tato na paṭiggaṇhāti. Na yattha sāti yattha sunakho ‘piṇḍaṃ labhissāmī’ti upaṭṭhito hoti, tattha tassa adatvā āhaṭaṃ na gaṇhāti. Kasmā? Etassa piṇḍantarāyo hotīti.

    ஸண்ட³ஸண்ட³சாரினீதி ஸமூஹஸமூஹசாரினீ. ஸசே ஹி அசேலகங் தி³ஸ்வா ‘இமஸ்ஸ பி⁴க்க²ங் த³ஸ்ஸாமா’தி மானுஸ்ஸகா ப⁴த்தகே³ஹங் பவிஸந்தி, தேஸு ச பவிஸந்தேஸு களோபிமுகா²தீ³ஸு நிலீனா மக்கி²கா உப்பதித்வா ஸண்ட³ஸண்டா³ சரந்தி, ததோ ஆஹடங் பி⁴க்க²ங் ந க³ண்ஹாதி. கஸ்மா? மங் நிஸ்ஸாய மக்கி²கானங் கோ³சரந்தராயோ ஜாதோதி. து²ஸோத³கந்தி ஸப்³ப³ஸஸ்ஸஸம்பா⁴ரேஹி கதங் ஸோவீரகங். எத்த² ச ஸுராபானமேவ ஸாவஜ்ஜங். அயங் பன ஏதஸ்மிம்பி ஸாவஜ்ஜஸஞ்ஞீ. ஏகாகா³ரிகோதி யோ ஏகஸ்மிங்யேவ கே³ஹே பி⁴க்க²ங் லபி⁴த்வா நிவத்ததி. ஏகாலோபிகோதி யோ ஏகேனேவ ஆலோபேன யாபேதி. த்³வாகா³ரிகாதீ³ஸுபி ஏஸேவ நயோ. ஏகிஸ்ஸாபி த³த்தியாதி ஏகாய த³த்தியா. த³த்தி நாம ஏகா கு²த்³த³கபாதி ஹோதி, யத்த² அக்³க³பி⁴க்க²ங் பக்கி²பித்வா ட²பெந்தி.

    Saṇḍasaṇḍacārinīti samūhasamūhacārinī. Sace hi acelakaṃ disvā ‘imassa bhikkhaṃ dassāmā’ti mānussakā bhattagehaṃ pavisanti, tesu ca pavisantesu kaḷopimukhādīsu nilīnā makkhikā uppatitvā saṇḍasaṇḍā caranti, tato āhaṭaṃ bhikkhaṃ na gaṇhāti. Kasmā? Maṃ nissāya makkhikānaṃ gocarantarāyo jātoti. Thusodakanti sabbasassasambhārehi kataṃ sovīrakaṃ. Ettha ca surāpānameva sāvajjaṃ. Ayaṃ pana etasmimpi sāvajjasaññī. Ekāgārikoti yo ekasmiṃyeva gehe bhikkhaṃ labhitvā nivattati. Ekālopikoti yo ekeneva ālopena yāpeti. Dvāgārikādīsupi eseva nayo. Ekissāpi dattiyāti ekāya dattiyā. Datti nāma ekā khuddakapāti hoti, yattha aggabhikkhaṃ pakkhipitvā ṭhapenti.

    ஏகாஹிகந்தி ஏகதி³வஸந்தரிகங். அட்³ட⁴மாஸிகந்தி அட்³ட⁴மாஸந்தரிகங். பரியாயப⁴த்தபோ⁴ஜனந்தி வாரப⁴த்தபோ⁴ஜனங். ஏகாஹவாரேன த்³வீஹவாரேன ஸத்தாஹவாரேன அட்³ட⁴மாஸவாரேனாதி – ஏவங் தி³வஸவாரேன ஆப⁴தப⁴த்தபோ⁴ஜனங். ஸாகப⁴க்கோ²தி அல்லஸாகப⁴க்கோ². ஸாமாகப⁴க்கோ²தி ஸாமாகதண்டு³லப⁴க்கோ². நீவாராதீ³ஸு – நீவாரா நாம தாவ அரஞ்ஞே ஸயங் ஜாதா வீஹிஜாதி. த³த்³து³லந்தி சம்மகாரேஹி சம்மங் விலிகி²த்வா ச²ட்³டி³தகஸடங். ஹடங் வுச்சதி ஸிலேஸோபி, ஸேவாலோபி கணிகாராதி³ருக்க²னிய்யாஸோபி. கணந்தி குண்ட³கங். ஆசாமோதி ப⁴த்தஉக்க²லிகாய லக்³கோ³ ஜா²மோத³னோ. தங் ச²ட்³டி³தட்டா²னே க³ஹெத்வா கா²த³தி. ‘‘ஓத³னகஞ்ஜிய’’ந்திபி வத³ந்தி. பிஞ்ஞாகாத³யோ பாகடா ஏவ. பவத்தப²லபோ⁴ஜீதி பதிதப²லபோ⁴ஜீ.

    Ekāhikanti ekadivasantarikaṃ. Aḍḍhamāsikanti aḍḍhamāsantarikaṃ. Pariyāyabhattabhojananti vārabhattabhojanaṃ. Ekāhavārena dvīhavārena sattāhavārena aḍḍhamāsavārenāti – evaṃ divasavārena ābhatabhattabhojanaṃ. Sākabhakkhoti allasākabhakkho. Sāmākabhakkhoti sāmākataṇḍulabhakkho. Nīvārādīsu – nīvārā nāma tāva araññe sayaṃ jātā vīhijāti. Daddulanti cammakārehi cammaṃ vilikhitvā chaḍḍitakasaṭaṃ. Haṭaṃ vuccati silesopi, sevālopi kaṇikārādirukkhaniyyāsopi. Kaṇanti kuṇḍakaṃ. Ācāmoti bhattaukkhalikāya laggo jhāmodano. Taṃ chaḍḍitaṭṭhāne gahetvā khādati. ‘‘Odanakañjiya’’ntipi vadanti. Piññākādayo pākaṭā eva. Pavattaphalabhojīti patitaphalabhojī.

    ஸாணானீதி ஸாணவாகசேலானி. மஸாணானீதி மிஸ்ஸகசேலானி. ச²வது³ஸ்ஸானீதி மதஸரீரதோ ச²ட்³டி³தவத்தா²னி. ஏரகதிணாதீ³னி வா க³ந்தெ²த்வா கதனிவாஸனானி. பங்ஸுகூலானீதி பத²வியங் ச²ட்³டி³தனந்தகானி. திரீடானீதி ருக்க²த்தசவத்தா²னி. அஜினந்தி அஜினமிக³சம்மங். அஜினக்கி²பந்தி ததே³வ மஜ்ஜே² பா²லிதங். ஸகு²ரகந்திபி வத³ந்தி. குஸசீரந்தி குஸதிணானி க³ந்தெ²த்வா கதசீரகங். வாகசீரப²லகசீரேஸுபி ஏஸேவ நயோ. கேஸகம்ப³லந்தி மனுஸ்ஸகேஸேஹி கதகம்ப³லங். யங் ஸந்தா⁴ய வுத்தங் – ‘‘ஸெய்யதா²பி, பி⁴க்க²வே, யானி கானிசி தந்தாவுதானங் வத்தா²னங் கேஸகம்ப³லோ தேஸங் பதிகுட்டோ² அக்கா²யதீ’’தி (அ॰ நி॰ 3.138). வாளகம்ப³லந்தி அஸ்ஸவாளாதீ³ஹி கதகம்ப³லங். உலூகபக்க²ந்தி உலூகபத்தானி க³ந்தெ²த்வா கதனிவாஸனங். உப்³ப⁴ட்ட²கோதி உத்³த⁴ங் டி²தகோ.

    Sāṇānīti sāṇavākacelāni. Masāṇānīti missakacelāni. Chavadussānīti matasarīrato chaḍḍitavatthāni. Erakatiṇādīni vā ganthetvā katanivāsanāni. Paṃsukūlānīti pathaviyaṃ chaḍḍitanantakāni. Tirīṭānīti rukkhattacavatthāni. Ajinanti ajinamigacammaṃ. Ajinakkhipanti tadeva majjhe phālitaṃ. Sakhurakantipi vadanti. Kusacīranti kusatiṇāni ganthetvā katacīrakaṃ. Vākacīraphalakacīresupi eseva nayo. Kesakambalanti manussakesehi katakambalaṃ. Yaṃ sandhāya vuttaṃ – ‘‘seyyathāpi, bhikkhave, yāni kānici tantāvutānaṃ vatthānaṃ kesakambalo tesaṃ patikuṭṭho akkhāyatī’’ti (a. ni. 3.138). Vāḷakambalanti assavāḷādīhi katakambalaṃ. Ulūkapakkhanti ulūkapattāni ganthetvā katanivāsanaṃ. Ubbhaṭṭhakoti uddhaṃ ṭhitako.

    உக்குடிகப்பதா⁴னமனுயுத்தோதி உக்குடிகவீரியங் அனுயுத்தோ. க³ச்ச²ந்தோபி உக்குடிகோவ ஹுத்வா உப்பதித்வா உப்பதித்வா க³ச்ச²தி. கண்டகாபஸ்ஸயிகோதி அயகண்டகே வா பகதிகண்டகே வா பூ⁴மியங் கொட்டெத்வா தத்த² சம்மங் அத்த²ரித்வா டா²னசங்கமாதீ³னி கரோதி. ஸெய்யந்தி ஸயந்தோபி தத்தே²வ ஸெய்யங் கப்பேதி. ஸாயங் ததியமஸ்ஸாதி ஸாயததியகங். ‘‘பாதோ, மஜ்ஜ²ன்ஹிகே, ஸாயந்தி தி³வஸஸ்ஸ திக்க²த்துங் பாபங் பவாஹெஸ்ஸாமீ’’தி உத³கோரோஹனானுயோக³ங் அனுயுத்தோ விஹரதி.

    Ukkuṭikappadhānamanuyuttoti ukkuṭikavīriyaṃ anuyutto. Gacchantopi ukkuṭikova hutvā uppatitvā uppatitvā gacchati. Kaṇṭakāpassayikoti ayakaṇṭake vā pakatikaṇṭake vā bhūmiyaṃ koṭṭetvā tattha cammaṃ attharitvā ṭhānacaṅkamādīni karoti. Seyyanti sayantopi tattheva seyyaṃ kappeti. Sāyaṃ tatiyamassāti sāyatatiyakaṃ. ‘‘Pāto, majjhanhike, sāyanti divasassa tikkhattuṃ pāpaṃ pavāhessāmī’’ti udakorohanānuyogaṃ anuyutto viharati.

    175. பரங் தபதீதி பரந்தபோ. பரேஸங் பரிதாபனானுயோக³ங் பரபரிதாபனானுயோக³ங். ஓரப்³பி⁴காதீ³ஸு – உரப்³பா⁴ வுச்சந்தி ஏளகா. உரப்³பே⁴ ஹனதீதி ஓரப்³பி⁴கோ. ஸூகரிகாதீ³ஸுபி – ஏஸேவ நயோ. லுத்³தோ³தி தா³ருணோ கக்க²ளோ. மச்ச²கா⁴தகோதி மச்ச²ப³ந்தோ⁴ கேவட்டோ. ப³ந்த⁴னாகா³ரிகோதி ப³ந்த⁴னாகா³ரகோ³பகோ. குரூரகம்மந்தாதி தா³ருணகம்மந்தா.

    175. Paraṃ tapatīti parantapo. Paresaṃ paritāpanānuyogaṃ paraparitāpanānuyogaṃ. Orabbhikādīsu – urabbhā vuccanti eḷakā. Urabbhe hanatīti orabbhiko. Sūkarikādīsupi – eseva nayo. Luddoti dāruṇo kakkhaḷo. Macchaghātakoti macchabandho kevaṭṭo. Bandhanāgārikoti bandhanāgāragopako. Kurūrakammantāti dāruṇakammantā.

    176. முத்³தா⁴வஸித்தோதி க²த்தியாபி⁴ஸேகேன முத்³த⁴னி அபி⁴ஸித்தோ. புரத்தி²மேன நக³ரஸ்ஸாதி நக³ரதோ புரத்தி²மதி³ஸாய. ஸந்தா⁴கா³ரந்தி யஞ்ஞஸாலங் . க²ராஜினங் நிவாஸெத்வாதி ஸகு²ரங் அஜினசம்மங் நிவாஸெத்வா. ஸப்பிதேலேனாதி ஸப்பினா ச தேலேன ச. ட²பெத்வா ஹி ஸப்பிங் அவஸேஸோ யோ கோசி ஸ்னேஹோ தேலந்தி வுச்சதி. கண்டு³வமானோதி நகா²னங் சி²ன்னத்தா கண்டு³விதப்³ப³காலே தேன கண்டு³வமானோ. அனந்தரஹிதாயாதி அஸந்த²தாய. ஸரூபவச்சா²யாதி ஸதி³ஸவச்சா²ய. ஸசே கா³வீ ஸேதா ஹோதி, வச்சோ²பி ஸேதகோவ ஸசே கப³ரா வா, ரத்தா வா, வச்சோ²பி தாதி³ஸோவாதி – ஏவங் ஸரூபவச்சா²ய. ஸோ ஏவமாஹாதி ஸோ ராஜா ஏவங் வதே³தி. வச்ச²தராதி தருணவச்ச²கபா⁴வங் அதிக்கந்தா ப³லவவச்சா². வச்ச²தரீஸுபி ஏஸேவ நயோ. ப³ரிஹிஸத்தா²யாதி பரிக்கே²பகரணத்தா²ய சேவ யஞ்ஞபூ⁴மியங் அத்த²ரணத்தா²ய ச.

    176. Muddhāvasittoti khattiyābhisekena muddhani abhisitto. Puratthimena nagarassāti nagarato puratthimadisāya. Sandhāgāranti yaññasālaṃ . Kharājinaṃ nivāsetvāti sakhuraṃ ajinacammaṃ nivāsetvā. Sappitelenāti sappinā ca telena ca. Ṭhapetvā hi sappiṃ avaseso yo koci sneho telanti vuccati. Kaṇḍuvamānoti nakhānaṃ chinnattā kaṇḍuvitabbakāle tena kaṇḍuvamāno. Anantarahitāyāti asanthatāya. Sarūpavacchāyāti sadisavacchāya. Sace gāvī setā hoti, vacchopi setakova sace kabarā vā, rattā vā, vacchopi tādisovāti – evaṃ sarūpavacchāya. So evamāhāti so rājā evaṃ vadeti. Vacchatarāti taruṇavacchakabhāvaṃ atikkantā balavavacchā. Vacchatarīsupi eseva nayo. Barihisatthāyāti parikkhepakaraṇatthāya ceva yaññabhūmiyaṃ attharaṇatthāya ca.

    177. தி³ட்டே²வ த⁴ம்மேதி இமஸ்மிங்யேவ அத்தபா⁴வே. நிச்சா²தோதி சா²தங் வுச்சதி தண்ஹா, ஸா அஸ்ஸ நத்தீ²தி நிச்சா²தோ. ஸப்³ப³கிலேஸானங் நிப்³பு³தத்தா நிப்³பு³தோ. அந்தோ தாபனகிலேஸானங் அபா⁴வா ஸீதலோ ஜாதோதி ஸீதீபூ⁴தோ. ஜா²னமக்³க³ப²லனிப்³பா³னஸுகா²னி படிஸங்வேதே³தீதி ஸுக²ப்படிஸங்வேதீ³. ப்³ரஹ்மபூ⁴தேன அத்தனாதி ஸெட்ட²பூ⁴தேன அத்தனா.

    177. Diṭṭheva dhammeti imasmiṃyeva attabhāve. Nicchātoti chātaṃ vuccati taṇhā, sā assa natthīti nicchāto. Sabbakilesānaṃ nibbutattā nibbuto. Anto tāpanakilesānaṃ abhāvā sītalo jātoti sītībhūto. Jhānamaggaphalanibbānasukhāni paṭisaṃvedetīti sukhappaṭisaṃvedī. Brahmabhūtena attanāti seṭṭhabhūtena attanā.

    இமங் பன புக்³க³லங் பு³த்³து⁴ப்பாத³தோ பட்டா²ய த³ஸ்ஸேதுங் – இத⁴ ததா²க³தோதிஆதி³மாஹ. தத்த² ததா²க³தோதி அட்ட²ஹி காரணேஹி ப⁴க³வா ததா²க³தோ – ததா² ஆக³தோதி ததா²க³தோ, ததா² க³தோதி ததா²க³தோ, தத²லக்க²ணங் ஆக³தோதி ததா²க³தோ, தத²த⁴ம்மே யாதா²வதோ அபி⁴ஸம்பு³த்³தோ⁴தி ததா²க³தோ, தத²த³ஸ்ஸிதாய ததா²க³தோ, ததா²வாதி³தாய ததா²க³தோ, ததா²காரிதாய ததா²க³தோ, அபி⁴ப⁴வனட்டே²ன ததா²க³தோதி. அரஹங் ஸம்மாஸம்பு³த்³தோ⁴திஆதீ³னி விஸுத்³தி⁴மக்³கே³ வித்தா²ரிதானேவ. தங் த⁴ம்மந்தி தங் வுத்தப்பகாரஸம்பத³ங் த⁴ம்மங். ஸுணாதி க³ஹபதி வாதி கஸ்மா பட²மங் க³ஹபதிங் நித்³தி³ஸதி? நிஹதமானத்தா உஸ்ஸன்னத்தா ச. யேபு⁴ய்யேன ஹி க²த்தியகுலதோ பப்³ப³ஜிதா ஜாதிங் நிஸ்ஸாய மானங் கரொந்தி. ப்³ராஹ்மணகுலா பப்³ப³ஜிதா மந்தே நிஸ்ஸாய மானங் கரொந்தி. ஹீனஜச்சகுலா பப்³ப³ஜிதா அத்தனோ விஜாதிதாய பதிட்டா²துங் ந ஸக்கொந்தி. க³ஹபதிதா³ரகா பன கச்சே²ஹி ஸேத³ங் முஞ்சந்தேஹி பிட்டி²யா லோணங் புப்ப²மானாய பூ⁴மிங் கஸித்வா தாதி³ஸஸ்ஸ மானஸ்ஸ அபா⁴வதோ நிஹதமானத³ப்பா ஹொந்தி. தே பப்³ப³ஜித்வா மானங் வா த³ப்பங் வா அகத்வா யதா²ப³லங் பு³த்³த⁴வசனங் உக்³க³ஹெத்வா விபஸ்ஸனாய கம்மங் கரொந்தா ஸக்கொந்தி அரஹத்தே பதிட்டா²துங். இதரேஹி ச குலேஹி நிக்க²மித்வா பப்³ப³ஜிதா நாம ந ப³ஹுகா, க³ஹபதிகாவ ப³ஹுகா. இதி நிஹதமானத்தா உஸ்ஸன்னத்தா ச பட²மங் க³ஹபதிங் நித்³தி³ஸதீதி.

    Imaṃ pana puggalaṃ buddhuppādato paṭṭhāya dassetuṃ – idha tathāgatotiādimāha. Tattha tathāgatoti aṭṭhahi kāraṇehi bhagavā tathāgato – tathā āgatoti tathāgato, tathā gatoti tathāgato, tathalakkhaṇaṃ āgatoti tathāgato, tathadhamme yāthāvato abhisambuddhoti tathāgato, tathadassitāya tathāgato, tathāvāditāya tathāgato, tathākāritāya tathāgato, abhibhavanaṭṭhena tathāgatoti. Arahaṃ sammāsambuddhotiādīni visuddhimagge vitthāritāneva. Taṃ dhammanti taṃ vuttappakārasampadaṃ dhammaṃ. Suṇāti gahapati vāti kasmā paṭhamaṃ gahapatiṃ niddisati? Nihatamānattā ussannattā ca. Yebhuyyena hi khattiyakulato pabbajitā jātiṃ nissāya mānaṃ karonti. Brāhmaṇakulā pabbajitā mante nissāya mānaṃ karonti. Hīnajaccakulā pabbajitā attano vijātitāya patiṭṭhātuṃ na sakkonti. Gahapatidārakā pana kacchehi sedaṃ muñcantehi piṭṭhiyā loṇaṃ pupphamānāya bhūmiṃ kasitvā tādisassa mānassa abhāvato nihatamānadappā honti. Te pabbajitvā mānaṃ vā dappaṃ vā akatvā yathābalaṃ buddhavacanaṃ uggahetvā vipassanāya kammaṃ karontā sakkonti arahatte patiṭṭhātuṃ. Itarehi ca kulehi nikkhamitvā pabbajitā nāma na bahukā, gahapatikāva bahukā. Iti nihatamānattā ussannattā ca paṭhamaṃ gahapatiṃ niddisatīti.

    அஞ்ஞதரஸ்மிங் வாதி இதரேஸங் வா குலானங் அஞ்ஞதரஸ்மிங். பச்சாஜாதோதி பதிஜாதோ. ததா²க³தே ஸத்³த⁴ங் படிலப⁴தீதி பரிஸுத்³த⁴ங் த⁴ம்மங் ஸுத்வா த⁴ம்மஸ்ஸாமிம்ஹி ததா²க³தே ‘‘ஸம்மாஸம்பு³த்³தோ⁴ வத ஸோ ப⁴க³வா’’தி ஸத்³த⁴ங் படிலப⁴தி. இதி படிஸஞ்சிக்க²தீதி ஏவங் பச்சவெக்க²தி. ஸம்பா³தோ⁴ க⁴ராவாஸோதி ஸசேபி ஸட்டி²ஹத்தே² க⁴ரே யோஜனஸதந்தரேபி வா த்³வே ஜாயம்பதிகா வஸந்தி, ததா²பி நேஸங் ஸகிஞ்சனஸபலிபோ³த⁴ட்டே²ன க⁴ராவாஸோ ஸம்பா³தோ⁴யேவ. ரஜோபதோ²தி ராக³ரஜாதீ³னங் உட்டா²னட்டா²னந்தி மஹாஅட்ட²கதா²யங் வுத்தங். ஆக³மனபதோ²திபி வத்துங் வட்டதி. அலக்³க³னட்டே²ன அப்³போ⁴காஸோ வியாதி அப்³போ⁴காஸோ. பப்³ப³ஜிதோ ஹி கூடாகா³ரரதனபாஸாதே³ ச தே³வவிமானாதீ³ஸு ச ஸுபிஹிதத்³வாரவாதபானேஸு படிச்ச²ன்னேஸு வஸந்தோபி நேவ லக்³க³தி, ந ஸஜ்ஜதி, ந ப³ஜ்ஜ²தி. தேன வுத்தங் – ‘‘அப்³போ⁴காஸோ பப்³ப³ஜ்ஜா’’தி.

    Aññatarasmiṃ vāti itaresaṃ vā kulānaṃ aññatarasmiṃ. Paccājātoti patijāto. Tathāgate saddhaṃ paṭilabhatīti parisuddhaṃ dhammaṃ sutvā dhammassāmimhi tathāgate ‘‘sammāsambuddho vata so bhagavā’’ti saddhaṃ paṭilabhati. Iti paṭisañcikkhatīti evaṃ paccavekkhati. Sambādho gharāvāsoti sacepi saṭṭhihatthe ghare yojanasatantarepi vā dve jāyampatikā vasanti, tathāpi nesaṃ sakiñcanasapalibodhaṭṭhena gharāvāso sambādhoyeva. Rajopathoti rāgarajādīnaṃ uṭṭhānaṭṭhānanti mahāaṭṭhakathāyaṃ vuttaṃ. Āgamanapathotipi vattuṃ vaṭṭati. Alagganaṭṭhena abbhokāso viyāti abbhokāso. Pabbajito hi kūṭāgāraratanapāsāde ca devavimānādīsu ca supihitadvāravātapānesu paṭicchannesu vasantopi neva laggati, na sajjati, na bajjhati. Tena vuttaṃ – ‘‘abbhokāso pabbajjā’’ti.

    அபிச – ஸம்பா³தோ⁴ க⁴ராவாஸோ குஸலகிரியாய ஓகாஸாபா⁴வதோ. ரஜோபதோ² அஸங்வுதஸங்காரட்டா²னங் விய ரஜானங் கிலேஸரஜானங் ஸன்னிபாதட்டா²னதோ. அப்³போ⁴காஸோ பப்³ப³ஜ்ஜா குஸலகிரியாய யதா²ஸுக²ங் ஓகாஸஸம்பா⁴வதோ. நயித³ங் ஸுகரங்…பே॰… பப்³ப³ஜெய்யந்தி எத்த² அயங் ஸங்கே²பகதா² – யதே³தங் ஸிக்க²த்தயப்³ரஹ்மசரியங் ஏகம்பி தி³வஸங் அக²ண்ட³ங் கத்வா சரிமகசித்தங் பாபேதப்³ப³தாய ஏகந்தபரிபுண்ணங். ஏகதி³வஸம்பி ச கிலேஸமலேன அமலினங் கத்வா சரிமகசித்தங் பாபேதப்³ப³தாய ஏகந்தபரிஸுத்³த⁴ங். ஸங்க²லிகி²தங் லிகி²தஸங்க²ஸதி³ஸங் தோ⁴தஸங்க²ஸப்படிபா⁴க³ங் சரிதப்³ப³ங். இத³ங் ந ஸுகரங் அகா³ரங் அஜ்ஜா²வஸதா அகா³ரமஜ்ஜே² வஸந்தேன ஏகந்தபரிபுண்ணங்…பே॰… சரிதுங் – ‘‘யங்னூனாஹங் கேஸே ச மஸ்ஸுஞ்ச ஓஹாரெத்வா கஸாயரஸபீததாய காஸாயானி ப்³ரஹ்மசரியங் சரந்தானங் அனுச்ச²விகானி வத்தா²னி அச்சா²தெ³த்வா பரித³ஹித்வா அகா³ரஸ்மா நிக்க²மித்வா அனகா³ரியங் பப்³ப³ஜெய்ய’’ந்தி. எத்த² ச யஸ்மா அகா³ரஸ்ஸ ஹிதங் கஸிவாணிஜ்ஜாதி³கம்மங் ‘‘அகா³ரிய’’ந்தி வுச்சதி, தஞ்ச பப்³ப³ஜ்ஜாய நத்தி², தஸ்மா பப்³ப³ஜ்ஜா ‘‘அனகா³ரிய’’ந்தி ஞாதப்³பா³. தங் அனகா³ரியங். பப்³ப³ஜெய்யந்தி படிபஜ்ஜெய்யங். அப்பங் வாதி ஸஹஸ்ஸதோ ஹெட்டா² போ⁴க³க்க²ந்தோ⁴ அப்போ நாம ஹோதி, ஸஹஸ்ஸதோ பட்டா²ய மஹா. அப³ந்த⁴னட்டே²ன ஞாதியேவ ஞாதிபரிவட்டோ. ஸோபி வீஸதியா ஹெட்டா² அப்போ ஹோதி, வீஸதியா பட்டா²ய மஹா.

    Apica – sambādho gharāvāso kusalakiriyāya okāsābhāvato. Rajopatho asaṃvutasaṅkāraṭṭhānaṃ viya rajānaṃ kilesarajānaṃ sannipātaṭṭhānato. Abbhokāso pabbajjā kusalakiriyāya yathāsukhaṃ okāsasambhāvato. Nayidaṃ sukaraṃ…pe… pabbajeyyanti ettha ayaṃ saṅkhepakathā – yadetaṃ sikkhattayabrahmacariyaṃ ekampi divasaṃ akhaṇḍaṃ katvā carimakacittaṃ pāpetabbatāya ekantaparipuṇṇaṃ. Ekadivasampi ca kilesamalena amalinaṃ katvā carimakacittaṃ pāpetabbatāya ekantaparisuddhaṃ. Saṅkhalikhitaṃ likhitasaṅkhasadisaṃ dhotasaṅkhasappaṭibhāgaṃ caritabbaṃ. Idaṃ na sukaraṃ agāraṃ ajjhāvasatā agāramajjhe vasantena ekantaparipuṇṇaṃ…pe… carituṃ – ‘‘yaṃnūnāhaṃ kese ca massuñca ohāretvā kasāyarasapītatāya kāsāyāni brahmacariyaṃ carantānaṃ anucchavikāni vatthāni acchādetvā paridahitvā agārasmā nikkhamitvā anagāriyaṃ pabbajeyya’’nti. Ettha ca yasmā agārassa hitaṃ kasivāṇijjādikammaṃ ‘‘agāriya’’nti vuccati, tañca pabbajjāya natthi, tasmā pabbajjā ‘‘anagāriya’’nti ñātabbā. Taṃ anagāriyaṃ. Pabbajeyyanti paṭipajjeyyaṃ. Appaṃ vāti sahassato heṭṭhā bhogakkhandho appo nāma hoti, sahassato paṭṭhāya mahā. Abandhanaṭṭhena ñātiyeva ñātiparivaṭṭo. Sopi vīsatiyā heṭṭhā appo hoti, vīsatiyā paṭṭhāya mahā.

    178. பி⁴க்கூ²னங் ஸிக்கா²ஸாஜீவஸமாபன்னோதி யா பி⁴க்கூ²னங் அதி⁴ஸீலஸங்கா²தா ஸிக்கா², தஞ்ச. யத்த² சேதே ஸஹ ஜீவந்தி, ஏகஜீவிகா ஸபா⁴க³வுத்தினோ ஹொந்தி, தங் ப⁴க³வதா பஞ்ஞத்தஸிக்கா²பத³ஸங்கா²தங் ஸாஜீவஞ்ச. தத்த² ஸிக்க²னபா⁴வேன ஸமாபன்னோதி பி⁴க்கூ²னங் ஸிக்கா²ஸாஜீவஸமாபன்னோ. ஸமாபன்னோதி ஸிக்க²ங் பரிபூரெந்தோ ஸாஜீவஞ்ச அவீதிக்கமந்தோ ஹுத்வா தது³ப⁴யங் உபக³தோதி அத்தோ². பாணாதிபாதங் பஹாயாதிஆதீ³ஸு பாணாதிபாதாதி³கதா² ஹெட்டா² வித்தா²ரிதா ஏவ. பஹாயாதி இமங் பாணாதிபாதசேதனாஸங்கா²தங் து³ஸ்ஸீல்யங் பஜஹித்வா. படிவிரதோ ஹோதீதி பஹீனகாலதோ பட்டா²ய ததோ து³ஸ்ஸீல்யதோ ஓரதோ விரதோவ ஹோதி. நிஹிதத³ண்டோ³ நிஹிதஸத்தோ²தி பரூபகா⁴தத்தா²ய த³ண்ட³ங் வா ஸத்த²ங் வா ஆதா³ய அவத்தனதோ நிக்கி²த்தத³ண்டோ³ சேவ நிக்கி²த்தஸத்தோ² சாதி அத்தோ². எத்த² ச ட²பெத்வா த³ண்ட³ங், ஸப்³ப³ம்பி அவஸேஸங் உபகரணங் ஸத்தானங் வினாஸனபா⁴வதோ ‘ஸத்த²’ந்தி வேதி³தப்³ப³ங். யங் பன பி⁴க்கூ² கத்தரத³ண்ட³ங் வா த³ந்தகட்ட²வாஸிங் வா பிப்ப²லிகங் வா க³ஹெத்வா விசரந்தி, ந தங் பரூபகா⁴தத்தா²ய. தஸ்மா நிஹிதத³ண்டா³ நிஹிதஸத்தா²த்வேவ ஸங்க²ங் க³ச்ச²ந்தி. லஜ்ஜீதி பாபஜிகு³ச்ச²னலக்க²ணாய லஜ்ஜாய ஸமன்னாக³தோ. த³யாபன்னோதி த³யங் மெத்தசித்ததங் ஆபன்னோ. ஸப்³ப³பாணபூ⁴தஹிதானுகம்பீதி ஸப்³பே³ பாணபூ⁴தே ஹிதேன அனுகம்பகோ. தாய த³யாபன்னதாய ஸப்³பே³ஸங் பாணபூ⁴தானங் ஹிதசித்தகோதி அத்தோ². விஹரதீதி இரியதி, பாலேதி.

    178. Bhikkhūnaṃ sikkhāsājīvasamāpannoti yā bhikkhūnaṃ adhisīlasaṅkhātā sikkhā, tañca. Yattha cete saha jīvanti, ekajīvikā sabhāgavuttino honti, taṃ bhagavatā paññattasikkhāpadasaṅkhātaṃ sājīvañca. Tattha sikkhanabhāvena samāpannoti bhikkhūnaṃ sikkhāsājīvasamāpanno. Samāpannoti sikkhaṃ paripūrento sājīvañca avītikkamanto hutvā tadubhayaṃ upagatoti attho. Pāṇātipātaṃ pahāyātiādīsu pāṇātipātādikathā heṭṭhā vitthāritā eva. Pahāyāti imaṃ pāṇātipātacetanāsaṅkhātaṃ dussīlyaṃ pajahitvā. Paṭivirato hotīti pahīnakālato paṭṭhāya tato dussīlyato orato viratova hoti. Nihitadaṇḍo nihitasatthoti parūpaghātatthāya daṇḍaṃ vā satthaṃ vā ādāya avattanato nikkhittadaṇḍo ceva nikkhittasattho cāti attho. Ettha ca ṭhapetvā daṇḍaṃ, sabbampi avasesaṃ upakaraṇaṃ sattānaṃ vināsanabhāvato ‘sattha’nti veditabbaṃ. Yaṃ pana bhikkhū kattaradaṇḍaṃ vā dantakaṭṭhavāsiṃ vā pipphalikaṃ vā gahetvā vicaranti, na taṃ parūpaghātatthāya. Tasmā nihitadaṇḍā nihitasatthātveva saṅkhaṃ gacchanti. Lajjīti pāpajigucchanalakkhaṇāya lajjāya samannāgato. Dayāpannoti dayaṃ mettacittataṃ āpanno. Sabbapāṇabhūtahitānukampīti sabbe pāṇabhūte hitena anukampako. Tāya dayāpannatāya sabbesaṃ pāṇabhūtānaṃ hitacittakoti attho. Viharatīti iriyati, pāleti.

    தி³ன்னமேவ ஆதி³யதீதி தி³ன்னாதா³யீ. சித்தேனபி தி³ன்னமேவ படிகங்க²தீதி தி³ன்னபாடிகங்கீ². தே²னேதீதி தே²னோ. ந தே²னேன அதே²னேன. அதே²னத்தாயேவ ஸுசிபூ⁴தேன. அத்தனாதி அத்தபா⁴வேன. அதே²னங் ஸுசிபூ⁴தங் அத்தபா⁴வங் கத்வா விஹரதீதி வுத்தங் ஹோதி.

    Dinnameva ādiyatīti dinnādāyī. Cittenapi dinnameva paṭikaṅkhatīti dinnapāṭikaṅkhī. Thenetīti theno. Na thenena athenena. Athenattāyeva sucibhūtena. Attanāti attabhāvena. Athenaṃ sucibhūtaṃ attabhāvaṃ katvā viharatīti vuttaṃ hoti.

    அப்³ரஹ்மசரியந்தி அஸெட்ட²சரியங். ப்³ரஹ்மங் ஸெட்ட²ங் ஆசாரங் சரதீதி ப்³ரஹ்மசாரீ. ஆராசாரீதி அப்³ரஹ்மசரியதோ தூ³ரசாரீ. மேது²னாதி ராக³பரியுட்டா²னவஸேன ஸதி³ஸத்தா மேது²னகாதி லத்³த⁴வோஹாரேஹி படிஸேவிதப்³ப³தோ மேது²னாதி ஸங்க²ங் க³தா அஸத்³த⁴ம்மா. கா³மத⁴ம்மாதி கா³மவாஸீனங் த⁴ம்மா.

    Abrahmacariyanti aseṭṭhacariyaṃ. Brahmaṃ seṭṭhaṃ ācāraṃ caratīti brahmacārī. Ārācārīti abrahmacariyato dūracārī. Methunāti rāgapariyuṭṭhānavasena sadisattā methunakāti laddhavohārehi paṭisevitabbato methunāti saṅkhaṃ gatā asaddhammā. Gāmadhammāti gāmavāsīnaṃ dhammā.

    ஸச்சங் வத³தீதி ஸச்சவாதீ³. ஸச்சேன ஸச்சங் ஸந்த³ஹதி க⁴டேதீதி ஸச்சஸந்தோ⁴. ந அந்தரந்தரா முஸா வத³தீதி அத்தோ². யோ ஹி புரிஸோ கதா³சி முஸா வத³தி, கதா³சி ஸச்சங், தஸ்ஸ முஸாவாதே³ன அந்தரிதத்தா ஸச்சங் ஸச்சேன ந க⁴டீயதி, தஸ்மா ந ஸோ ஸச்சஸந்தோ⁴. அயங் பன ந தாதி³ஸோ. ஜீவிதஹேதுபி முஸா அவத்வா ஸச்சேன ஸச்சங் ஸந்த³ஹதியேவாதி ஸச்சஸந்தோ⁴. தே²தோதி தி²ரோ, தி²ரகதோ²தி அத்தோ². ஏகோ ஹி புக்³க³லோ ஹலித்³தி³ராகோ³ விய, து²ஸராஸிம்ஹி நிகா²தகா²ணுகோ விய, அஸ்ஸபிட்டே² ட²பிதகும்ப⁴ண்ட³மிவ ச, ந தி²ரகதோ² ஹோதி. ஏகோ பாஸாணலேகா² விய, இந்த³கீ²லோ விய ச தி²ரகதோ² ஹோதி. அஸினா ஸீஸே சி²ந்த³ந்தேபி த்³வே கதா² ந கதே²தி. அயங் வுச்சதி தே²தோ. பச்சயிகோதி பத்தியாயிதப்³ப³கோ, ஸத்³தா⁴யிகோதி அத்தோ². ஏகச்சோ ஹி புக்³க³லோ ந பச்சயிகோ ஹோதி. ‘இத³ங் கேன வுத்தங்? அஸுகேனா’தி வுத்தே ‘மா தஸ்ஸ வசனங் ஸத்³த³ஹதா²’தி வத்தப்³ப³தங் ஆபஜ்ஜதி. ஏகோ பச்சயிகோ ஹோதி. ‘இத³ங் கேன வுத்தங்? அஸுகேனா’தி வுத்தே ‘யதி³ தேன வுத்தங், இத³மேவ பமாணங், இதா³னி உபபரிக்கி²தப்³ப³ங் நத்தி², ஏவமேவ இத³’ந்தி வத்தப்³ப³தங் ஆபஜ்ஜதி. அயங் வுச்சதி பச்சயிகோ. அவிஸங்வாத³கோ லோகஸ்ஸாதி தாய ஸச்சவாதி³தாய லோகங் ந விஸங்வாதே³தீதி அத்தோ².

    Saccaṃ vadatīti saccavādī. Saccena saccaṃ sandahati ghaṭetīti saccasandho. Na antarantarā musā vadatīti attho. Yo hi puriso kadāci musā vadati, kadāci saccaṃ, tassa musāvādena antaritattā saccaṃ saccena na ghaṭīyati, tasmā na so saccasandho. Ayaṃ pana na tādiso. Jīvitahetupi musā avatvā saccena saccaṃ sandahatiyevāti saccasandho. Thetoti thiro, thirakathoti attho. Eko hi puggalo haliddirāgo viya, thusarāsimhi nikhātakhāṇuko viya, assapiṭṭhe ṭhapitakumbhaṇḍamiva ca, na thirakatho hoti. Eko pāsāṇalekhā viya, indakhīlo viya ca thirakatho hoti. Asinā sīse chindantepi dve kathā na katheti. Ayaṃ vuccati theto. Paccayikoti pattiyāyitabbako, saddhāyikoti attho. Ekacco hi puggalo na paccayiko hoti. ‘Idaṃ kena vuttaṃ? Asukenā’ti vutte ‘mā tassa vacanaṃ saddahathā’ti vattabbataṃ āpajjati. Eko paccayiko hoti. ‘Idaṃ kena vuttaṃ? Asukenā’ti vutte ‘yadi tena vuttaṃ, idameva pamāṇaṃ, idāni upaparikkhitabbaṃ natthi, evameva ida’nti vattabbataṃ āpajjati. Ayaṃ vuccati paccayiko. Avisaṃvādako lokassāti tāya saccavāditāya lokaṃ na visaṃvādetīti attho.

    இமேஸங் பே⁴தா³யாதி யேஸங் இதோ ஸுத்வாதி வுத்தானங் ஸந்திகே ஸுதங், தேஸங் பே⁴தா³ய. பி⁴ன்னானங் வா ஸந்தா⁴தாதி த்³வின்னங் மித்தானங் வா ஸமானுபஜ்ஜா²யகாதீ³னங் வா கேனசிதே³வ காரணேன பி⁴ன்னானங் ஏகமேகங் உபஸங்கமித்வா – ‘தும்ஹாகங் ஈதி³ஸே குலே ஜாதானங், ஏவங் ப³ஹுஸ்ஸுதானங் இத³ங் ந யுத்த’ந்திஆதீ³னி வத்வா ஸந்தா⁴னங் கத்தா. அனுப்பதா³தாதி ஸந்தா⁴னானுப்பதா³தா. த்³வே ஜனே ஸமக்³கே³ தி³ஸ்வா – ‘தும்ஹாகங் ஏவரூபே குலே ஜாதானங், ஏவரூபேஹி கு³ணேஹி ஸமன்னாக³தானங் அனுச்ச²விகமேத’ந்திஆதீ³னி வத்வா த³ள்ஹீகம்மங் கத்தாதி அத்தோ². ஸமக்³கோ³ ஆராமோ அஸ்ஸாதி ஸமக்³கா³ராமோ. யத்த² ஸமக்³கா³ நத்தி², தத்த² வஸிதும்பி ந இச்ச²தீதி அத்தோ². ஸமக்³க³ராமோதிபி பாளி. அயமேவ அத்தோ². ஸமக்³க³ரதோதி ஸமக்³கே³ஸு ரதோ. தே பஹாய அஞ்ஞத்ர க³ந்தும்பி ந இச்ச²தீதி அத்தோ². ஸமக்³கே³ தி³ஸ்வாபி ஸுத்வாபி நந்த³தீதி ஸமக்³க³னந்தீ³. ஸமக்³க³கரணிங் வாசங் பா⁴ஸிதாதி யா வாசா ஸத்தே ஸமக்³கே³யேவ கரோதி, தங் ஸாமக்³கீ³கு³ணபரிதீ³பகமேவ வாசங் பா⁴ஸதி, ந இதரந்தி.

    Imesaṃbhedāyāti yesaṃ ito sutvāti vuttānaṃ santike sutaṃ, tesaṃ bhedāya. Bhinnānaṃ vā sandhātāti dvinnaṃ mittānaṃ vā samānupajjhāyakādīnaṃ vā kenacideva kāraṇena bhinnānaṃ ekamekaṃ upasaṅkamitvā – ‘tumhākaṃ īdise kule jātānaṃ, evaṃ bahussutānaṃ idaṃ na yutta’ntiādīni vatvā sandhānaṃ kattā. Anuppadātāti sandhānānuppadātā. Dve jane samagge disvā – ‘tumhākaṃ evarūpe kule jātānaṃ, evarūpehi guṇehi samannāgatānaṃ anucchavikameta’ntiādīni vatvā daḷhīkammaṃ kattāti attho. Samaggo ārāmo assāti samaggārāmo. Yattha samaggā natthi, tattha vasitumpi na icchatīti attho. Samaggarāmotipi pāḷi. Ayameva attho. Samaggaratoti samaggesu rato. Te pahāya aññatra gantumpi na icchatīti attho. Samagge disvāpi sutvāpi nandatīti samagganandī. Samaggakaraṇiṃ vācaṃ bhāsitāti yā vācā satte samaggeyeva karoti, taṃ sāmaggīguṇaparidīpakameva vācaṃ bhāsati, na itaranti.

    காலேன வத³தீதி காலவாதீ³. வத்தப்³ப³யுத்தகாலங் ஸல்லக்கெ²த்வா வத³தீதி அத்தோ². பூ⁴தங் தத²ங் தச்ச²ங் ஸபா⁴வமேவ வத³தீதி பூ⁴தவாதீ³. தி³ட்ட²த⁴ம்மிகஸம்பராயிகத்த²ஸன்னிஸ்ஸிதமேவ கத்வா வத³தீதி அத்த²வாதீ³. நவலோகுத்தரத⁴ம்மஸன்னிஸ்ஸிதங் கத்வா வத³தீதி த⁴ம்மவாதீ³. ஸங்வரவினயபஹானவினயஸன்னிஸ்ஸிதங் கத்வா வத³தீதி வினயவாதீ³. நிதா⁴னங் வுச்சதி ட²பனோகாஸோ. நிதா⁴னமஸ்ஸ அத்தீ²தி நிதா⁴னவதீ. ஹத³யே நிதா⁴தப்³ப³யுத்தகங் வாசங் பா⁴ஸிதாதி அத்தோ². காலேனாதி ஏவரூபிங் பா⁴ஸமானோபி ச ‘‘அஹங் நிதா⁴னவதிங் வாசங் பா⁴ஸிஸ்ஸாமீ’’தி ந அகாலேன பா⁴ஸதி. யுத்தகாலங் பன ஸல்லக்கெ²த்வாவ பா⁴ஸதீதி அத்தோ². ஸாபதே³ஸந்தி ஸஉபமங், ஸகாரணந்தி அத்தோ². பரியந்தவதிந்தி பரிச்சே²த³ங் த³ஸ்ஸெத்வா. யதா²ஸ்ஸா பரிச்சே²தோ³ பஞ்ஞாயதி, ஏவங் பா⁴ஸதீதி அத்தோ². அத்த²ஸங்ஹிதந்தி அனேகேஹிபி நயேஹி விப⁴ஜந்தேன பரியாதா³துங் அஸக்குணெய்யதாய அத்த²ஸம்பன்னங் பா⁴ஸதி. யங் வா ஸோ அத்த²வாதீ³ அத்த²ங் வத³தி, தேன அத்தே²ன ஸங்ஹிதத்தா அத்த²ஸங்ஹிதங் வாசங் பா⁴ஸதி. ந அஞ்ஞங் நிக்கி²பித்வா அஞ்ஞங் பா⁴ஸதீதி வுத்தங் ஹோதி.

    Kālena vadatīti kālavādī. Vattabbayuttakālaṃ sallakkhetvā vadatīti attho. Bhūtaṃ tathaṃ tacchaṃ sabhāvameva vadatīti bhūtavādī. Diṭṭhadhammikasamparāyikatthasannissitameva katvā vadatīti atthavādī. Navalokuttaradhammasannissitaṃ katvā vadatīti dhammavādī. Saṃvaravinayapahānavinayasannissitaṃ katvā vadatīti vinayavādī. Nidhānaṃ vuccati ṭhapanokāso. Nidhānamassa atthīti nidhānavatī. Hadaye nidhātabbayuttakaṃ vācaṃ bhāsitāti attho. Kālenāti evarūpiṃ bhāsamānopi ca ‘‘ahaṃ nidhānavatiṃ vācaṃ bhāsissāmī’’ti na akālena bhāsati. Yuttakālaṃ pana sallakkhetvāva bhāsatīti attho. Sāpadesanti saupamaṃ, sakāraṇanti attho. Pariyantavatinti paricchedaṃ dassetvā. Yathāssā paricchedo paññāyati, evaṃ bhāsatīti attho. Atthasaṃhitanti anekehipi nayehi vibhajantena pariyādātuṃ asakkuṇeyyatāya atthasampannaṃ bhāsati. Yaṃ vā so atthavādī atthaṃ vadati, tena atthena saṃhitattā atthasaṃhitaṃ vācaṃ bhāsati. Na aññaṃ nikkhipitvā aññaṃ bhāsatīti vuttaṃ hoti.

    179. பீ³ஜகா³மபூ⁴தகா³மஸமாரம்பா⁴தி மூலபீ³ஜங், க²ந்த⁴பீ³ஜங், ப²ளுபீ³ஜங், அக்³க³பீ³ஜங் பீ³ஜபீ³ஜந்தி பஞ்சவித⁴ஸ்ஸ பீ³ஜகா³மஸ்ஸ சேவ யஸ்ஸ கஸ்ஸசி நீலதிணருக்கா²தி³கஸ்ஸ பூ⁴தகா³மஸ்ஸ ச ஸமாரம்பா⁴. சே²த³னபே⁴த³னபசனாதி³பா⁴வேன விகோபனா படிவிரதோதி அத்தோ². ஏகப⁴த்திகோதி பாதராஸப⁴த்தங், ஸாயமாஸப⁴த்தந்தி த்³வே ப⁴த்தானி. தேஸு பாதராஸப⁴த்தங் அந்தோமஜ்ஜ²ன்ஹிகேன பரிச்சி²ன்னங். இதரங் மஜ்ஜ²ன்ஹிகதோ உத்³த⁴ங் அந்தோஅருணேன. தஸ்மா அந்தோமஜ்ஜ²ன்ஹிகே த³ஸக்க²த்துங் பு⁴ஞ்ஜமானோபி ஏகப⁴த்திகோவ ஹோதி. தங் ஸந்தா⁴ய வுத்தங் – ஏகப⁴த்திகோதி. ரத்தியா போ⁴ஜனங் ரத்தி, ததோ உபரதோதி ரத்தூபரதோ. அதிக்கந்தே மஜ்ஜ²ன்ஹிகே யாவ ஸூரியஸத்த²ங்க³மனா போ⁴ஜனங் விகாலபோ⁴ஜனங் நாம, ததோ விரதத்தா விரதோ விகாலபோ⁴ஜனா. ஸாஸனஸ்ஸ அனநுலோமத்தா விஸூகங் படாணீபூ⁴தங் த³ஸ்ஸனந்தி விஸூகத³ஸ்ஸனங். அத்தனா நச்சனநச்சாபனாதி³வஸேன நச்சா ச கீ³தா ச வாதி³தா ச அந்தமஸோ மயூரனச்சனாபனாதி³வஸேனபி பவத்தானங் நச்சாதீ³னங் விஸூகபூ⁴தா த³ஸ்ஸனா சாதி நச்சகீ³தவாதி³தவிஸூகத³ஸ்ஸனா. நச்சாதீ³னி ஹி அத்தனா பயோஜேதுங் வா பரேஹி பயோஜாபேதுங் வா யுத்தானி பஸ்ஸிதுங் வா நேவ பி⁴க்கூ²னங் ந பி⁴க்கு²னீனங் வட்டந்தி. மாலாதீ³ஸு – மாலாதி யங்கிஞ்சி புப்ப²ங். க³ந்த⁴ந்தி யங்கிஞ்சி க³ந்த⁴ஜாதங். விலேபனந்தி ச²விராக³கரணங். தத்த² பிளந்த⁴ந்தோ தா⁴ரேதி நாம. ஊனட்டா²னங் பூரெந்தோ மண்டே³தி நாம. க³ந்த⁴வஸேன ச²விராக³வஸேன ச ஸாதி³யந்தோ விபூ⁴ஸேதி நாம. டா²னங் வுச்சதி காரணங். தஸ்மா யாய து³ஸ்ஸீல்யசேதனாய தானி மாலாதா⁴ரணாதீ³னி மஹாஜனோ கரோதி, ததோ படிவிரதோதி அத்தோ². உச்சாஸயனங் வுச்சதி பமாணாதிக்கந்தங். மஹாஸயனங் அகப்பியஸந்த²தங், ததோ படிவிரதோதி அத்தோ². ஜாதரூபந்தி ஸுவண்ணங். ரஜதந்தி கஹாபணோ, லோஹமாஸகோ, ஜதுமாஸகோ, தா³ருமாஸகோதி யே வோஹாரங் க³ச்ச²ந்தி. தஸ்ஸ உப⁴யஸ்ஸாபி படிக்³க³ஹணா படிவிரதோ, நேவ நங் உக்³க³ண்ஹாதி, ந உக்³க³ண்ஹாபேதி, ந உபனிக்கி²த்தங் ஸாதி³யதீதி அத்தோ².

    179. Bījagāmabhūtagāmasamārambhāti mūlabījaṃ, khandhabījaṃ, phaḷubījaṃ, aggabījaṃ bījabījanti pañcavidhassa bījagāmassa ceva yassa kassaci nīlatiṇarukkhādikassa bhūtagāmassa ca samārambhā. Chedanabhedanapacanādibhāvena vikopanā paṭiviratoti attho. Ekabhattikoti pātarāsabhattaṃ, sāyamāsabhattanti dve bhattāni. Tesu pātarāsabhattaṃ antomajjhanhikena paricchinnaṃ. Itaraṃ majjhanhikato uddhaṃ antoaruṇena. Tasmā antomajjhanhike dasakkhattuṃ bhuñjamānopi ekabhattikova hoti. Taṃ sandhāya vuttaṃ – ekabhattikoti. Rattiyā bhojanaṃ ratti, tato uparatoti rattūparato. Atikkante majjhanhike yāva sūriyasatthaṅgamanā bhojanaṃ vikālabhojanaṃ nāma, tato viratattā virato vikālabhojanā. Sāsanassa ananulomattā visūkaṃ paṭāṇībhūtaṃ dassananti visūkadassanaṃ. Attanā naccananaccāpanādivasena naccā ca gītā ca vāditā ca antamaso mayūranaccanāpanādivasenapi pavattānaṃ naccādīnaṃ visūkabhūtā dassanā cāti naccagītavāditavisūkadassanā. Naccādīni hi attanā payojetuṃ vā parehi payojāpetuṃ vā yuttāni passituṃ vā neva bhikkhūnaṃ na bhikkhunīnaṃ vaṭṭanti. Mālādīsu – mālāti yaṃkiñci pupphaṃ. Gandhanti yaṃkiñci gandhajātaṃ. Vilepananti chavirāgakaraṇaṃ. Tattha piḷandhanto dhāreti nāma. Ūnaṭṭhānaṃ pūrento maṇḍeti nāma. Gandhavasena chavirāgavasena ca sādiyanto vibhūseti nāma. Ṭhānaṃ vuccati kāraṇaṃ. Tasmā yāya dussīlyacetanāya tāni mālādhāraṇādīni mahājano karoti, tato paṭiviratoti attho. Uccāsayanaṃ vuccati pamāṇātikkantaṃ. Mahāsayanaṃ akappiyasanthataṃ, tato paṭiviratoti attho. Jātarūpanti suvaṇṇaṃ. Rajatanti kahāpaṇo, lohamāsako, jatumāsako, dārumāsakoti ye vohāraṃ gacchanti. Tassa ubhayassāpi paṭiggahaṇā paṭivirato, neva naṃ uggaṇhāti, na uggaṇhāpeti, na upanikkhittaṃ sādiyatīti attho.

    ஆமகத⁴ஞ்ஞபடிக்³க³ஹணாதி ஸாலிவீஹியவகோ³து⁴மகங்கு³வரககுத்³ரூஸகஸங்கா²தஸ்ஸ ஸத்தவித⁴ஸ்ஸாபி ஆமகத⁴ஞ்ஞஸ்ஸ படிக்³க³ஹணா. ந கேவலஞ்ச ஏதேஸங் படிக்³க³ஹணமேவ, ஆமஸனம்பி பி⁴க்கூ²னங் ந வட்டதியேவ. ஆமகமங்ஸபடிக்³க³ஹணாதி எத்த² அஞ்ஞத்ர ஓதி³ஸ்ஸ அனுஞ்ஞாதா ஆமகமச்ச²மங்ஸானங் படிக்³க³ஹணமேவ பி⁴க்கூ²னங் ந வட்டதி, நோ ஆமஸனங். இத்தி²குமாரிகபடிக்³க³ஹணாதி எத்த² இத்தீ²தி புரிஸந்தரக³தா. இதரா குமாரிகா நாம. தாஸங் படிக்³க³ஹணம்பி ஆமஸனம்பி அகப்பியமேவ. தா³ஸிதா³ஸபடிக்³க³ஹணாதி எத்த² தா³ஸிதா³ஸவஸேனேவ தேஸங் படிக்³க³ஹணங் ந வட்டதி. ‘கப்பியகாரகங் த³ம்மி’, ‘ஆராமிகங் த³ம்மீ’தி ஏவங் வுத்தே பன வட்டதி. அஜேளகாதீ³ஸுபி கெ²த்தவத்து²பரியோஸானேஸு கப்பியாகப்பியனயோ வினயவஸேன உபபரிக்கி²தப்³போ³. தத்த² கெ²த்தங் நாம யஸ்மிங் புப்³ப³ண்ணங் ருஹதி. வத்து² நாம யஸ்மிங் அபரண்ணங் ருஹதி. யத்த² வா உப⁴யம்பி ருஹதி தங் கெ²த்தங். தத³த்தா²ய அகதபூ⁴மிபா⁴கோ³ வத்து². கெ²த்தவத்து²ஸீஸேன செத்த² வாபிதளாகாதீ³னிபி ஸங்க³ஹிதானேவ.

    Āmakadhaññapaṭiggahaṇāti sālivīhiyavagodhumakaṅguvarakakudrūsakasaṅkhātassa sattavidhassāpi āmakadhaññassa paṭiggahaṇā. Na kevalañca etesaṃ paṭiggahaṇameva, āmasanampi bhikkhūnaṃ na vaṭṭatiyeva. Āmakamaṃsapaṭiggahaṇāti ettha aññatra odissa anuññātā āmakamacchamaṃsānaṃ paṭiggahaṇameva bhikkhūnaṃ na vaṭṭati, no āmasanaṃ. Itthikumārikapaṭiggahaṇāti ettha itthīti purisantaragatā. Itarā kumārikā nāma. Tāsaṃ paṭiggahaṇampi āmasanampi akappiyameva. Dāsidāsapaṭiggahaṇāti ettha dāsidāsavaseneva tesaṃ paṭiggahaṇaṃ na vaṭṭati. ‘Kappiyakārakaṃ dammi’, ‘ārāmikaṃ dammī’ti evaṃ vutte pana vaṭṭati. Ajeḷakādīsupi khettavatthupariyosānesu kappiyākappiyanayo vinayavasena upaparikkhitabbo. Tattha khettaṃ nāma yasmiṃ pubbaṇṇaṃ ruhati. Vatthu nāma yasmiṃ aparaṇṇaṃ ruhati. Yattha vā ubhayampi ruhati taṃ khettaṃ. Tadatthāya akatabhūmibhāgo vatthu. Khettavatthusīsena cettha vāpitaḷākādīnipi saṅgahitāneva.

    தூ³தெய்யங் வுச்சதி தூ³தகம்மங். கி³ஹீனங் பஹிதங் பண்ணங் வா ஸாஸனங் வா க³ஹெத்வா தத்த² தத்த² க³மனங் . பஹீணக³மனங் வுச்சதி பரக⁴ரங் பேஸிதஸ்ஸ கு²த்³த³கக³மனங். அனுயோகோ³ நாம தது³ப⁴யகரணங். தஸ்மா தூ³தெய்யபஹீணக³மனானங் அனுகோ³தி ஏவமெத்த² அத்தோ² த³ட்ட²ப்³போ³. கயவிக்கயாதி கயா ச விக்கயா ச. துலாகூடாதீ³ஸு – கூடந்தி வஞ்சனங். தத்த² துலாகூடங் நாம ரூபகூடங், அங்க³கூடங் க³ஹணகூடங், படிச்ச²ன்னகூடந்தி சதுப்³பி³த⁴ங் ஹோதி. தத்த² ரூபகூடங் நாம த்³வே துலா ஸமரூபா கத்வா க³ண்ஹந்தோ மஹதியா க³ண்ஹாதி, த³த³ந்தோ கு²த்³தி³காய தே³தி. அங்க³கூடங் நாம க³ண்ஹந்தோ பச்சா²பா⁴கே³ ஹத்தே²ன துலங் அக்கமதி, த³த³ந்தோ புப்³ப³பா⁴கே³. க³ஹணகூடங் நாம க³ண்ஹந்தோ மூலே ரஜ்ஜுங் க³ண்ஹாதி, த³த³ந்தோ அக்³கே³. படிச்ச²ன்னகூடங் நாம துலங் ஸுஸிரங் கத்வா அந்தோ அயசுண்ணங் பக்கி²பித்வா க³ண்ஹந்தோ தங் பச்சா²பா⁴கே³ கரோதி, த³த³ந்தோ அக்³க³பா⁴கே³.

    Dūteyyaṃ vuccati dūtakammaṃ. Gihīnaṃ pahitaṃ paṇṇaṃ vā sāsanaṃ vā gahetvā tattha tattha gamanaṃ . Pahīṇagamanaṃ vuccati paragharaṃ pesitassa khuddakagamanaṃ. Anuyogo nāma tadubhayakaraṇaṃ. Tasmā dūteyyapahīṇagamanānaṃ anugoti evamettha attho daṭṭhabbo. Kayavikkayāti kayā ca vikkayā ca. Tulākūṭādīsu – kūṭanti vañcanaṃ. Tattha tulākūṭaṃ nāma rūpakūṭaṃ, aṅgakūṭaṃ gahaṇakūṭaṃ, paṭicchannakūṭanti catubbidhaṃ hoti. Tattha rūpakūṭaṃ nāma dve tulā samarūpā katvā gaṇhanto mahatiyā gaṇhāti, dadanto khuddikāya deti. Aṅgakūṭaṃ nāma gaṇhanto pacchābhāge hatthena tulaṃ akkamati, dadanto pubbabhāge. Gahaṇakūṭaṃ nāma gaṇhanto mūle rajjuṃ gaṇhāti, dadanto agge. Paṭicchannakūṭaṃ nāma tulaṃ susiraṃ katvā anto ayacuṇṇaṃ pakkhipitvā gaṇhanto taṃ pacchābhāge karoti, dadanto aggabhāge.

    கங்ஸோ வுச்சதி ஸுவண்ணபாதி. தாய வஞ்சனங் கங்ஸகூடங். கத²ங்? ஏகங் ஸுவண்ணபாதிங் கத்வா அஞ்ஞா த்³வே திஸ்ஸோ லோஹபாதியோ ஸுவண்ணவண்ணா கரொந்தி, ததோ ஜனபத³ங் க³ந்த்வா கிஞ்சிதே³வ அட்³ட⁴குலங் பவிஸித்வா ஸுவண்ணபா⁴ஜனானி கிணதா²’தி வத்வா அக்³கே⁴ புச்சி²தே ஸமக்³க⁴தரங் தா³துகாமா ஹொந்தி. ததோ தேஹி ‘கத²ங் இமேஸங் ஸுவண்ணபா⁴வோ ஜானிதப்³போ³’தி வுத்தே ‘வீமங்ஸித்வா க³ண்ஹதா²’தி ஸுவண்ணபாதிங் பாஸாணே க⁴ங்ஸித்வா ஸப்³ப³பாதியோ த³த்வா க³ச்ச²ந்தி.

    Kaṃso vuccati suvaṇṇapāti. Tāya vañcanaṃ kaṃsakūṭaṃ. Kathaṃ? Ekaṃ suvaṇṇapātiṃ katvā aññā dve tisso lohapātiyo suvaṇṇavaṇṇā karonti, tato janapadaṃ gantvā kiñcideva aḍḍhakulaṃ pavisitvā suvaṇṇabhājanāni kiṇathā’ti vatvā agghe pucchite samagghataraṃ dātukāmā honti. Tato tehi ‘kathaṃ imesaṃ suvaṇṇabhāvo jānitabbo’ti vutte ‘vīmaṃsitvā gaṇhathā’ti suvaṇṇapātiṃ pāsāṇe ghaṃsitvā sabbapātiyo datvā gacchanti.

    மானகூடங் நாம ஹத³யபே⁴த³ஸிகா²பே⁴த³ரஜ்ஜுபே⁴த³வஸேன திவித⁴ங் ஹோதி. தத்த² ஹத³யபே⁴தோ³ ஸப்பிதேலாதி³மினநகாலே லப்³ப⁴தி. தானி ஹி க³ண்ஹந்தோ ஹெட்டா² சி²த்³தே³ன மானேன ‘ஸணிகங் ஆஸிஞ்சா’தி வத்வா அந்தோபா⁴ஜனே ப³ஹுங் பக்³க⁴ராபெத்வா க³ண்ஹாதி. த³த³ந்தோ சி²த்³த³ங் பிதா⁴ய ஸீக⁴ங் பூரெத்வா தே³தி. ஸிகா²பே⁴தோ³ திலதண்டு³லாதி³மினநகாலே லப்³ப⁴தி. தானி ஹி க³ண்ஹந்தோ ஸணிகங் ஸிக²ங் உஸ்ஸாபெத்வா க³ண்ஹாதி. த³த³ந்தோ வேகே³ன பூரெத்வா ஸிக²ங் சி²ந்த³ந்தோ தே³தி. ரஜ்ஜுபே⁴தோ³ கெ²த்தவத்து²மினநகாலே லப்³ப⁴தி. லஞ்ஜங் அலப⁴ந்தா ஹி கெ²த்தங் அமஹந்தம்பி மஹந்தங் கத்வா மினந்தி.

    Mānakūṭaṃ nāma hadayabhedasikhābhedarajjubhedavasena tividhaṃ hoti. Tattha hadayabhedo sappitelādiminanakāle labbhati. Tāni hi gaṇhanto heṭṭhā chiddena mānena ‘saṇikaṃ āsiñcā’ti vatvā antobhājane bahuṃ paggharāpetvā gaṇhāti. Dadanto chiddaṃ pidhāya sīghaṃ pūretvā deti. Sikhābhedo tilataṇḍulādiminanakāle labbhati. Tāni hi gaṇhanto saṇikaṃ sikhaṃ ussāpetvā gaṇhāti. Dadanto vegena pūretvā sikhaṃ chindanto deti. Rajjubhedo khettavatthuminanakāle labbhati. Lañjaṃ alabhantā hi khettaṃ amahantampi mahantaṃ katvā minanti.

    உக்கோடனாதீ³ஸு – உக்கோடனந்தி அஸ்ஸாமிகே ஸாமிகே காதுங் லஞ்ஜக்³க³ஹணங். வஞ்சனந்தி தேஹி தேஹி உபாயேஹி பரேஸங் வஞ்சனங். தத்ரித³மேகங் வத்து² – ஏகோ கிர லுத்³த³கோ மிக³ஞ்ச மிக³போதகஞ்ச க³ஹெத்வா ஆக³ச்ச²தி. தமேகோ து⁴த்தோ – ‘‘கிங் போ⁴ மிகோ³ அக்³க⁴தி, கிங் மிக³போதகோ’’தி ஆஹ. ‘‘மிகோ³ த்³வே கஹாபணே, மிக³போதகோ ஏக’’ந்தி ச வுத்தே கஹாபணங் த³த்வா மிக³போதகங் க³ஹெத்வா தோ²கங் க³ந்த்வா நிவத்தோ , ‘‘ந மே போ⁴ மிக³போதகேன அத்தோ², மிக³ங் மே தே³ஹீ’’தி ஆஹ. தேன ஹி ‘‘த்³வே கஹாபணே தே³ஹீ’’தி. ஸோ ஆஹ – ‘‘நனு தே, போ⁴, மயா பட²மங் ஏகோ கஹாபணோ தி³ன்னோ’’தி? ‘‘ஆம தி³ன்னோ’’தி. இத³ம்பி மிக³போதகங் க³ண்ஹ, ஏவங் ஸோ ச கஹாபணோ அயஞ்ச கஹாபணக்³க⁴ணகோ மிக³போதகோதி த்³வே கஹாபணா ப⁴விஸ்ஸந்தீதி. ஸோ ‘‘காரணங் வத³தீ’’தி ஸல்லக்கெ²த்வா மிக³போதகங் க³ஹெத்வா மிக³ங் அதா³ஸீதி.

    Ukkoṭanādīsu – ukkoṭananti assāmike sāmike kātuṃ lañjaggahaṇaṃ. Vañcananti tehi tehi upāyehi paresaṃ vañcanaṃ. Tatridamekaṃ vatthu – eko kira luddako migañca migapotakañca gahetvā āgacchati. Tameko dhutto – ‘‘kiṃ bho migo agghati, kiṃ migapotako’’ti āha. ‘‘Migo dve kahāpaṇe, migapotako eka’’nti ca vutte kahāpaṇaṃ datvā migapotakaṃ gahetvā thokaṃ gantvā nivatto , ‘‘na me bho migapotakena attho, migaṃ me dehī’’ti āha. Tena hi ‘‘dve kahāpaṇe dehī’’ti. So āha – ‘‘nanu te, bho, mayā paṭhamaṃ eko kahāpaṇo dinno’’ti? ‘‘Āma dinno’’ti. Idampi migapotakaṃ gaṇha, evaṃ so ca kahāpaṇo ayañca kahāpaṇagghaṇako migapotakoti dve kahāpaṇā bhavissantīti. So ‘‘kāraṇaṃ vadatī’’ti sallakkhetvā migapotakaṃ gahetvā migaṃ adāsīti.

    நிகதீதி யோக³வஸேன வா மாயாவஸேன வா அபாமங்க³ங் பாமங்க³ந்தி, அமணிங் மணீதி, அஸுவண்ணங் ஸுவண்ணந்தி கத்வா பதிரூபகேன வஞ்சனங். ஸாசியோகோ³தி குடிலயோகோ³. ஏதேஸங்யேவ உக்கோடனாதீ³னமேதங் நாமங். தஸ்மா உக்கோடனஸாசியோகோ³ வஞ்சனஸாசியோகோ³ நிகதிஸாசியோகோ³தி ஏவமெத்த² அத்தோ² த³ட்ட²ப்³போ³. கேசி அஞ்ஞங் த³ஸ்ஸெத்வா அஞ்ஞஸ்ஸ பரிவத்தனங் ‘ஸாசியோகோ³’தி வத³ந்தி. தங் பன வஞ்சனேனேவ ஸங்க³ஹிதங்.

    Nikatīti yogavasena vā māyāvasena vā apāmaṅgaṃ pāmaṅganti, amaṇiṃ maṇīti, asuvaṇṇaṃ suvaṇṇanti katvā patirūpakena vañcanaṃ. Sāciyogoti kuṭilayogo. Etesaṃyeva ukkoṭanādīnametaṃ nāmaṃ. Tasmā ukkoṭanasāciyogo vañcanasāciyogo nikatisāciyogoti evamettha attho daṭṭhabbo. Keci aññaṃ dassetvā aññassa parivattanaṃ ‘sāciyogo’ti vadanti. Taṃ pana vañcaneneva saṅgahitaṃ.

    சே²த³னாதீ³ஸு – சே²த³னந்தி ஹத்த²ச்சே²த³னாதி³. வதோ⁴தி மாரணங். ப³ந்தோ⁴தி ரஜ்ஜுப³ந்த⁴னாதீ³ஹி ப³ந்த⁴னங். விபராமோஸோதி ஹிமவிபராமோஸோ, கு³ம்ப³விபராமோஸோதி து³விதோ⁴. யஞ்ஹி ஹிமபாதஸமயே ஹிமேன படிச்ச²ன்னா ஹுத்வா மக்³க³ப்படிபன்னங் ஜனங் முஸந்தி, அயங் ஹிமவிபராமோஸோ. யங் கு³ம்பா³தீ³ஹி படிச்ச²ன்னா முஸந்தி, அயங் கு³ம்ப³விபராமோஸோ. ஆலோபோ வுச்சதி கா³மனிக³மாதீ³னங் விலோபகரணங். ஸஹஸாகாரோதி ஸாஹஸிககிரியா. கே³ஹங் பவிஸித்வா மனுஸ்ஸானங் உரே ஸத்த²ங் ட²பெத்வா இச்சி²தப⁴ண்ட³க்³க³ஹணங். ஏவமேதஸ்மா சே²த³ன…பே॰… ஸஹஸாகாரா படிவிரதோ ஹோதி.

    Chedanādīsu – chedananti hatthacchedanādi. Vadhoti māraṇaṃ. Bandhoti rajjubandhanādīhi bandhanaṃ. Viparāmosoti himaviparāmoso, gumbaviparāmosoti duvidho. Yañhi himapātasamaye himena paṭicchannā hutvā maggappaṭipannaṃ janaṃ musanti, ayaṃ himaviparāmoso. Yaṃ gumbādīhi paṭicchannā musanti, ayaṃ gumbaviparāmoso. Ālopo vuccati gāmanigamādīnaṃ vilopakaraṇaṃ. Sahasākāroti sāhasikakiriyā. Gehaṃ pavisitvā manussānaṃ ure satthaṃ ṭhapetvā icchitabhaṇḍaggahaṇaṃ. Evametasmā chedana…pe… sahasākārā paṭivirato hoti.

    180. ஸோ ஸந்துட்டோ² ஹோதீதி ஸோ சதூஸு பச்சயேஸு த்³வாத³ஸவிதே⁴ன இதரீதரபச்சயஸந்தோஸேன ஸமன்னாக³தோ ஹோதி. காயபரிஹாரிகேனாதி காயங் பரிஹரணமத்தகேன. குச்சி²பரிஹாரிகேனாதி குச்சி²பரிஹரணமத்தகேன. ஸமாதா³யேவ பக்கமதீதி அட்ட²வித⁴ங் பி⁴க்கு² பரிக்கா²ரமத்தகங் ஸப்³ப³ங் க³ஹெத்வாவ காயபடிப³த்³த⁴ங் கத்வாவ க³ச்ச²தி. ‘‘மம விஹாரோ பரிவேணங் உபட்டா²கோ’’தி ஸங்கோ³ வா ப³த்³தோ⁴ வா ந ஹோதி. ஸோ ஜியா முத்தஸரோ விய யூதா² பக்கந்தோ, மத்தஹத்தீ² விய இச்சி²திச்சி²தங் ஸேனாஸனங் வனஸண்ட³ங் ருக்க²மூலங் வனபத்த²ங் பப்³பா⁴ரங் பரிபு⁴ஞ்ஜந்தோ ஏகோவ திட்ட²தி, ஏகோவ நிஸீத³தி. ஸப்³பி³ரியாபதே²ஸு ஏகோவ அது³தியோ.

    180. So santuṭṭho hotīti so catūsu paccayesu dvādasavidhena itarītarapaccayasantosena samannāgato hoti. Kāyaparihārikenāti kāyaṃ pariharaṇamattakena. Kucchiparihārikenāti kucchipariharaṇamattakena. Samādāyeva pakkamatīti aṭṭhavidhaṃ bhikkhu parikkhāramattakaṃ sabbaṃ gahetvāva kāyapaṭibaddhaṃ katvāva gacchati. ‘‘Mama vihāro pariveṇaṃ upaṭṭhāko’’ti saṅgo vā baddho vā na hoti. So jiyā muttasaro viya yūthā pakkanto, mattahatthī viya icchiticchitaṃ senāsanaṃ vanasaṇḍaṃ rukkhamūlaṃ vanapatthaṃ pabbhāraṃ paribhuñjanto ekova tiṭṭhati, ekova nisīdati. Sabbiriyāpathesu ekova adutiyo.

    ‘‘சாதுத்³தி³ஸோ அப்படிகோ⁴ ச ஹோதி,

    ‘‘Cātuddiso appaṭigho ca hoti,

    ஸந்துஸ்ஸமானோ இதரீதரேன;

    Santussamāno itarītarena;

    பரிஸ்ஸயானங் ஸஹிதா அச²ம்பீ⁴,

    Parissayānaṃ sahitā achambhī,

    ஏகோ சரே க²க்³க³விஸாணகப்போ’’தி. (ஸு॰ நி॰ 42);

    Eko care khaggavisāṇakappo’’ti. (su. ni. 42);

    ஏவங் வண்ணிதங் க²க்³க³விஸாணகப்பதங் ஆபஜ்ஜதி.

    Evaṃ vaṇṇitaṃ khaggavisāṇakappataṃ āpajjati.

    இதா³னி தமத்த²ங் உபமாய ஸாதெ⁴ந்தோ, ‘‘ஸெய்யதா²பீ’’திஆதி³மாஹ. தத்த² பக்கீ² ஸகுணோதி பக்க²யுத்தோ ஸகுணோ. டே³தீதி உப்பததி. அயங் பனெத்த² ஸங்கே²பத்தோ² – ஸகுணோ நாம ‘‘அஸுகஸ்மிங் பதே³ஸே ருக்கோ² பரிபக்கப²லோ’’தி ஞத்வா நானாதி³ஸாஹி ஆக³ந்த்வா நக²பக்க²துண்டா³தீ³ஹி தஸ்ஸ ப²லானி விஜ்ஜ²ந்தா விது⁴னந்தா கா²த³ந்தி. ‘‘இத³ங் அஜ்ஜதனாய, இத³ங் ஸ்வாதனாய ப⁴விஸ்ஸதீ’’தி தேஸங் ந ஹோதி. ப²லே பன கீ²ணே நேவ ருக்க²ஸ்ஸ ஆரக்க²ங் ட²பெந்தி, ந தத்த² பத்தங் வா நக²ங் வா துண்ட³ங் வா ட²பெந்தி. அத² கோ² தஸ்மிங் ருக்கே² அனபெக்கோ² ஹுத்வா யோ யங் தி³ஸாபா⁴க³ங் இச்ச²தி, ஸோ தேன ஸபத்தபா⁴ரோவ உப்பதித்வா க³ச்ச²தி. ஏவமேவ அயங் பி⁴க்கு² நிஸ்ஸங்கோ³ நிரபெக்கோ²யேவ பக்கமதி, தேன வுத்தங் ஸமாதா³யேவ பக்கமதீதி. அரியேனாதி நித்³தோ³ஸேன. அஜ்ஜ²த்தந்தி ஸகே அத்தபா⁴வே. அனவஜ்ஜஸுக²ந்தி நித்³தோ³ஸஸுக²ங்.

    Idāni tamatthaṃ upamāya sādhento, ‘‘seyyathāpī’’tiādimāha. Tattha pakkhī sakuṇoti pakkhayutto sakuṇo. Ḍetīti uppatati. Ayaṃ panettha saṅkhepattho – sakuṇo nāma ‘‘asukasmiṃ padese rukkho paripakkaphalo’’ti ñatvā nānādisāhi āgantvā nakhapakkhatuṇḍādīhi tassa phalāni vijjhantā vidhunantā khādanti. ‘‘Idaṃ ajjatanāya, idaṃ svātanāya bhavissatī’’ti tesaṃ na hoti. Phale pana khīṇe neva rukkhassa ārakkhaṃ ṭhapenti, na tattha pattaṃ vā nakhaṃ vā tuṇḍaṃ vā ṭhapenti. Atha kho tasmiṃ rukkhe anapekkho hutvā yo yaṃ disābhāgaṃ icchati, so tena sapattabhārova uppatitvā gacchati. Evameva ayaṃ bhikkhu nissaṅgo nirapekkhoyeva pakkamati, tena vuttaṃ samādāyeva pakkamatīti. Ariyenāti niddosena. Ajjhattanti sake attabhāve. Anavajjasukhanti niddosasukhaṃ.

    181. ஸோ சக்கு²னா ரூபங் தி³ஸ்வாதி ஸோ இமினா அரியேன ஸீலக்க²ந்தே⁴ன ஸமன்னாக³தோ பி⁴க்கு² சக்கு²விஞ்ஞாணேன ரூபங் பஸ்ஸித்வாதி அத்தோ². ஸேஸபதே³ஸுபி யங் வத்தப்³ப³ங், தங் ஸப்³ப³ங் ஹெட்டா² வுத்தமேவ. அப்³யாஸேகஸுக²ந்தி கிலேஸேஹி அனவஸித்தஸுக²ங். அவிகிண்ணஸுக²ந்திபி வுத்தங். இந்த்³ரியஸங்வரஸுக²ஞ்ஹி தி³ட்டா²தீ³ஸு தி³ட்ட²மத்தாதி³வஸேன பவத்ததாய அவிகிண்ணங் ஹோதி.

    181. So cakkhunā rūpaṃ disvāti so iminā ariyena sīlakkhandhena samannāgato bhikkhu cakkhuviññāṇena rūpaṃ passitvāti attho. Sesapadesupi yaṃ vattabbaṃ, taṃ sabbaṃ heṭṭhā vuttameva. Abyāsekasukhanti kilesehi anavasittasukhaṃ. Avikiṇṇasukhantipi vuttaṃ. Indriyasaṃvarasukhañhi diṭṭhādīsu diṭṭhamattādivasena pavattatāya avikiṇṇaṃ hoti.

    182. ஸோ அபி⁴க்கந்தே படிக்கந்தேதி ஸோ மனச்ச²ட்டா²னங் இந்த்³ரியானங் ஸங்வரேன ஸமன்னாக³தோ பி⁴க்கு² இமேஸு அபி⁴க்கந்தபடிக்கந்தாதீ³ஸு ஸத்தஸு டா²னேஸு ஸதிஸம்பஜஞ்ஞவஸேன ஸம்பஜானகாரீ ஹோதி. தத்த² யங் வத்தப்³ப³ங் ஸியா, தங் ஜா²னவிப⁴ங்கே³ வுத்தமேவ.

    182. Soabhikkante paṭikkanteti so manacchaṭṭhānaṃ indriyānaṃ saṃvarena samannāgato bhikkhu imesu abhikkantapaṭikkantādīsu sattasu ṭhānesu satisampajaññavasena sampajānakārī hoti. Tattha yaṃ vattabbaṃ siyā, taṃ jhānavibhaṅge vuttameva.

    ஸோ இமினா சாதிஆதி³னா கிங் த³ஸ்ஸேதி? அரஞ்ஞவாஸஸ்ஸ பச்சயஸம்பத்திங் த³ஸ்ஸேதி. யஸ்ஸ ஹி இமே சத்தாரோ பச்சயா நத்தி² , தஸ்ஸ அரஞ்ஞவாஸோ ந இஜ்ஜ²தி, திரச்சா²னக³தேஹி வா வனசரகேஹி வா ஸத்³தி⁴ங் வத்தப்³ப³தங் ஆபஜ்ஜதி. அரஞ்ஞே அதி⁴வத்தா² தே³வதா ‘‘கிங் ஏவரூபஸ்ஸ பாபபி⁴க்கு²னோ அரஞ்ஞவாஸேனா’’தி பே⁴ரவங் ஸத்³த³ங் ஸாவெந்தி. ஹத்தே²ஹி ஸீஸங் பஹரித்வா பலாயனாகாரங் கரொந்தி . ‘‘அஸுகோ பி⁴க்கு² அரஞ்ஞங் பவிஸித்வா இத³ஞ்சித³ஞ்ச பாபகம்மங் அகாஸீ’’தி அயஸோ பத்த²ரதி. யஸ்ஸ பனேதே சத்தாரோ பச்சயா அத்தி², தஸ்ஸ அரஞ்ஞவாஸோ இஜ்ஜ²தி. ஸோ ஹி அத்தனோ ஸீலங் பச்சவெக்க²ந்தோ கிஞ்சி காளகங் வா திலகங் வா அபஸ்ஸந்தோ பீதிங் உப்பாதெ³த்வா தங் க²யதோ வயதோ ஸம்மஸந்தோ அரியபூ⁴மிங் ஓக்கமதி. அரஞ்ஞே அதி⁴வத்தா² தே³வதா அத்தமனா வண்ணங் பா⁴ஸந்தி. இதிஸ்ஸ உத³கே பக்கி²த்ததேலபி³ந்து³ விய யஸோ வித்தா²ரிகோ ஹோதி. விவித்தந்திஆதீ³னி ஹெட்டா² வுத்தத்தா²னேவ. ஸோ ஏவங் ஸமாஹிதே சித்தே…பே॰… யதா²கம்மூபகே³ ஸத்தே பஜானாதீதி எத்தகே டா²னே யங் வத்தப்³ப³ங் ஸியா, தங் ஸப்³ப³ங் விஸுத்³தி⁴மக்³கே³ வுத்தமேவ.

    So iminā cātiādinā kiṃ dasseti? Araññavāsassa paccayasampattiṃ dasseti. Yassa hi ime cattāro paccayā natthi , tassa araññavāso na ijjhati, tiracchānagatehi vā vanacarakehi vā saddhiṃ vattabbataṃ āpajjati. Araññe adhivatthā devatā ‘‘kiṃ evarūpassa pāpabhikkhuno araññavāsenā’’ti bheravaṃ saddaṃ sāventi. Hatthehi sīsaṃ paharitvā palāyanākāraṃ karonti . ‘‘Asuko bhikkhu araññaṃ pavisitvā idañcidañca pāpakammaṃ akāsī’’ti ayaso pattharati. Yassa panete cattāro paccayā atthi, tassa araññavāso ijjhati. So hi attano sīlaṃ paccavekkhanto kiñci kāḷakaṃ vā tilakaṃ vā apassanto pītiṃ uppādetvā taṃ khayato vayato sammasanto ariyabhūmiṃ okkamati. Araññe adhivatthā devatā attamanā vaṇṇaṃ bhāsanti. Itissa udake pakkhittatelabindu viya yaso vitthāriko hoti. Vivittantiādīni heṭṭhā vuttatthāneva. So evaṃ samāhite citte…pe… yathākammūpage satte pajānātīti ettake ṭhāne yaṃ vattabbaṃ siyā, taṃ sabbaṃ visuddhimagge vuttameva.

    185. ததியவிஜ்ஜாய ஸோ ஏவங் ஸமாஹிதே சித்தேதி விபஸ்ஸனாபாத³கங் சதுத்த²ஜ்ஜா²னசித்தங் வேதி³தப்³ப³ங். ஆஸவானங் க²யஞாணாயாதி அரஹத்தமக்³க³ஞாணத்தா²ய. அரஹத்தமக்³கோ³ ஹி ஆஸவானங் வினாஸனதோ ஆஸவானங் க²யோதி வுச்சதி. தத்ர சேதங் ஞாணங் தப்பரியாபன்னத்தாதி. சித்தங் அபி⁴னின்னாமேதீதி விபஸ்ஸனாசித்தங் அபி⁴னீஹரதி. ஸோ இத³ங் து³க்க²ந்தி ஏவமாதீ³ஸு – ‘‘எத்தகங் து³க்க²ங், ந இதோ பி⁴ய்யோ’’தி ஸப்³ப³ம்பி து³க்க²ஸச்சங் ஸரஸலக்க²ணப்படிவேதே⁴ன யதா²பூ⁴தங் பஜானாதி, படிவிஜ்ஜ²தி. தஸ்ஸ ச து³க்க²ஸ்ஸ நிப்³ப³த்திகங் தண்ஹங் – அயங் து³க்க²ஸமுத³யோதி; தது³ப⁴யம்பி யங் டா²னங் பத்வா நிருஜ்ஜ²தி, தங் தேஸங் அப்பவத்திங் நிப்³பா³னங் – அயங் து³க்க²னிரோதோ⁴தி; தஸ்ஸ ச ஸம்பாபகங் அரியமக்³க³ங் – அயங் து³க்க²னிரோத⁴கா³மினீ படிபதா³தி ஸரஸலக்க²ணபடிவேதே⁴ன யதா²பூ⁴தங் பஜானாதி, படிவிஜ்ஜ²தீதி – ஏவமத்தோ² வேதி³தப்³போ³.

    185. Tatiyavijjāya so evaṃ samāhite citteti vipassanāpādakaṃ catutthajjhānacittaṃ veditabbaṃ. Āsavānaṃ khayañāṇāyāti arahattamaggañāṇatthāya. Arahattamaggo hi āsavānaṃ vināsanato āsavānaṃ khayoti vuccati. Tatra cetaṃ ñāṇaṃ tappariyāpannattāti. Cittaṃ abhininnāmetīti vipassanācittaṃ abhinīharati. So idaṃ dukkhanti evamādīsu – ‘‘ettakaṃ dukkhaṃ, na ito bhiyyo’’ti sabbampi dukkhasaccaṃ sarasalakkhaṇappaṭivedhena yathābhūtaṃ pajānāti, paṭivijjhati. Tassa ca dukkhassa nibbattikaṃ taṇhaṃ – ayaṃ dukkhasamudayoti; tadubhayampi yaṃ ṭhānaṃ patvā nirujjhati, taṃ tesaṃ appavattiṃ nibbānaṃ – ayaṃ dukkhanirodhoti; tassa ca sampāpakaṃ ariyamaggaṃ – ayaṃ dukkhanirodhagāminī paṭipadāti sarasalakkhaṇapaṭivedhena yathābhūtaṃ pajānāti, paṭivijjhatīti – evamattho veditabbo.

    ஏவங் ஸரூபதோ ஸச்சானி த³ஸ்ஸெத்வா இதா³னி கிலேஸவஸேன பரியாயதோ த³ஸ்ஸெந்தோ இமே ஆஸவாதிஆதி³மாஹ. தஸ்ஸ ஏவங் ஜானதோ ஏவங் பஸ்ஸதோதி தஸ்ஸ ஏவங் ஜானந்தஸ்ஸ ஏவங் பஸ்ஸந்தஸ்ஸ ஸஹ விபஸ்ஸனாய கோடிப்பத்தங் மக்³க³ங் கதே²தி. காமாஸவாதி காமாஸவதோ. விமுச்சதீதி இமினா மக்³க³க்க²ணங் த³ஸ்ஸேதி. விமுத்தஸ்மிந்தி இமினா ப²லக்க²ணங் த³ஸ்ஸேதி. மக்³க³க்க²ணே ஹி சித்தங் விமுச்சதி, ப²லக்க²ணே விமுத்தங் ஹோதி. விமுத்தஸ்மிங் விமுத்தமிதி ஞாணந்தி இமினா பச்சவெக்க²ணஞாணங் த³ஸ்ஸேதி. கீ²ணா ஜாதீதிஆதீ³ஹி தஸ்ஸ பூ⁴மிங். தேன ஹி ஞாணேன ஸோ பச்சவெக்க²ந்தோ ‘கீ²ணா ஜாதீ’திஆதீ³னி பஜானாதி. வுஸிதந்தி வுட்ட²ங் பரிவுட்ட²ங் கதங் சரிதங் நிட்டி²தந்தி அத்தோ². ப்³ரஹ்மசரியந்தி மக்³க³ப்³ரஹ்மசரியங். புது²ஜ்ஜனகல்யாணகேன ஹி ஸத்³தி⁴ங் ஸத்த ஸெக்கா² ப்³ரஹ்மசரியவாஸங் வஸந்தி நாம. கீ²ணாஸவோ வுட்ட²வாஸோ. தஸ்மா ஸோ அத்தனோ ப்³ரஹ்மசரியவாஸங் பச்சவெக்க²ந்தோ வுஸிதங் ப்³ரஹ்மசரியந்தி பஜானாதி. கதங் கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியாபா⁴வனாவஸேன ஸோளஸவித⁴ம்பி கிச்சங் நிட்டா²பிதந்தி அத்தோ². புது²ஜ்ஜனகல்யாணகாத³யோ ஹி தங் கிச்சங் கரொந்தி; கீ²ணாஸவோ கதகரணீயோ. தஸ்மா ஸோ அத்தனோ கரணீயங் பச்சவெக்க²ந்தோ. ‘‘கதங் கரணீய’’ந்தி பஜானாதி. நாபரங் இத்த²த்தாயாதி ‘‘இதா³னி புன எத்த²பா⁴வாய ஏவங் ஸோளஸகிச்சபா⁴வாய கிலேஸக்க²யாய வா மக்³க³பா⁴வனாகிச்சங் நத்தீ²’’தி பஜானாதி.

    Evaṃ sarūpato saccāni dassetvā idāni kilesavasena pariyāyato dassento ime āsavātiādimāha. Tassa evaṃ jānato evaṃpassatoti tassa evaṃ jānantassa evaṃ passantassa saha vipassanāya koṭippattaṃ maggaṃ katheti. Kāmāsavāti kāmāsavato. Vimuccatīti iminā maggakkhaṇaṃ dasseti. Vimuttasminti iminā phalakkhaṇaṃ dasseti. Maggakkhaṇe hi cittaṃ vimuccati, phalakkhaṇe vimuttaṃ hoti. Vimuttasmiṃ vimuttamiti ñāṇanti iminā paccavekkhaṇañāṇaṃ dasseti. Khīṇā jātītiādīhi tassa bhūmiṃ. Tena hi ñāṇena so paccavekkhanto ‘khīṇā jātī’tiādīni pajānāti. Vusitanti vuṭṭhaṃ parivuṭṭhaṃ kataṃ caritaṃ niṭṭhitanti attho. Brahmacariyanti maggabrahmacariyaṃ. Puthujjanakalyāṇakena hi saddhiṃ satta sekkhā brahmacariyavāsaṃ vasanti nāma. Khīṇāsavo vuṭṭhavāso. Tasmā so attano brahmacariyavāsaṃ paccavekkhanto vusitaṃ brahmacariyanti pajānāti. Kataṃ karaṇīyanti catūsu saccesu catūhi maggehi pariññāpahānasacchikiriyābhāvanāvasena soḷasavidhampi kiccaṃ niṭṭhāpitanti attho. Puthujjanakalyāṇakādayo hi taṃ kiccaṃ karonti; khīṇāsavo katakaraṇīyo. Tasmā so attano karaṇīyaṃ paccavekkhanto. ‘‘Kataṃ karaṇīya’’nti pajānāti. Nāparaṃ itthattāyāti ‘‘idāni puna etthabhāvāya evaṃ soḷasakiccabhāvāya kilesakkhayāya vā maggabhāvanākiccaṃ natthī’’ti pajānāti.

    186. ஸராகா³தீ³ஸு – அப்பஹீனோதி விக்க²ம்ப⁴னப்பஹானேன வா தத³ங்க³ப்பஹானேன வா ஸமுச்சே²த³ப்பஹானேன வா அப்பஹீனோ.

    186. Sarāgādīsu – appahīnoti vikkhambhanappahānena vā tadaṅgappahānena vā samucchedappahānena vā appahīno.

    187. லாபீ⁴ ஹோதீதிஆதீ³ஸு – லாபீ⁴தி லாப⁴வா படிலபி⁴த்வா டி²தோ. அஜ்ஜ²த்தங் சேதோஸமத²ஸ்ஸாதி நியகஜ்ஜ²த்தஸங்கா²தே அத்தனோ சித்தே உப்பன்னஸ்ஸ சேதோஸமத²ஸ்ஸ. அதி⁴பஞ்ஞாத⁴ம்மவிபஸ்ஸனாயாதி அதி⁴பஞ்ஞாஸங்கா²தாய க²ந்த⁴த⁴ம்மேஸு அனிச்சாதி³வஸேன பவத்தாய விபஸ்ஸனாய. ரூபஸஹக³தானந்தி ரூபனிமித்தாரம்மணானங் ரூபாவசரஸமாபத்தீனங். அரூபஸஹக³தானந்தி ந ரூபனிமித்தாரம்மணானங் அரூபஸமாபத்தீனங். எத்த² ச பட²மோ அட்ட²ஸமாபத்திலாபீ⁴ புது²ஜ்ஜனோ. து³தியோ ஸுக்க²விபஸ்ஸகஅரியஸாவகோ. ததியோ அட்ட²ஸமாபத்திலாபீ⁴ அரியஸாவகோ. சதுத்தோ² லோகியமஹாஜனோ வேதி³தப்³போ³.

    187. Lābhī hotītiādīsu – lābhīti lābhavā paṭilabhitvā ṭhito. Ajjhattaṃ cetosamathassāti niyakajjhattasaṅkhāte attano citte uppannassa cetosamathassa. Adhipaññādhammavipassanāyāti adhipaññāsaṅkhātāya khandhadhammesu aniccādivasena pavattāya vipassanāya. Rūpasahagatānanti rūpanimittārammaṇānaṃ rūpāvacarasamāpattīnaṃ. Arūpasahagatānanti na rūpanimittārammaṇānaṃ arūpasamāpattīnaṃ. Ettha ca paṭhamo aṭṭhasamāpattilābhī puthujjano. Dutiyo sukkhavipassakaariyasāvako. Tatiyo aṭṭhasamāpattilābhī ariyasāvako. Catuttho lokiyamahājano veditabbo.

    188. அனுஸோதகா³மீஆதீ³ஸு – அனுஸோதகா³மீதி வட்டஸோதங் அனுக³தோ, வட்டஸோதே நிமுக்³கோ³ புது²ஜ்ஜனோ வேதி³தப்³போ³. படிஸோதகா³மீதி படிஸோதக³மனோ . அனுஸோதங் அக³ந்த்வா படிஸோதங் க³ச்ச²ந்தஸ்ஸேதங் அதி⁴வசனங். பாபஞ்ச கம்மங் ந கரோதீதி பஞ்ஞத்தங் வீதிக்கமந்தோ ந கரோதி. ஸஹாபி து³க்கே²ன ஸஹாபி தோ³மனஸ்ஸேனாதி கிலேஸபரியுட்டா²னே ஸதி உப்பன்னேன து³க்க²தோ³மனஸ்ஸேன ஸத்³தி⁴ம்பி. பரிபுண்ணந்தி திஸ்ஸன்னங் ஸிக்கா²னங் ஏகாயபி அனூனங். பரிஸுத்³த⁴ந்தி நிருபக்கிலேஸங். ப்³ரஹ்மசரியந்தி ஸெட்ட²சரியங். இமினா வாரேன ஸோதாபன்னஸகதா³கா³மினோ கதி²தா. கிங் பன தே ருத³ந்தா ப்³ரஹ்மசரியங் சரந்தீதி? ஆம. கிலேஸரோத³னேன ருத³ந்தா சரந்தி நாம. ஸீலஸம்பன்னோ புது²ஜ்ஜனபி⁴க்கு²பி எத்தே²வ ஸங்க³ஹிதோ.

    188. Anusotagāmīādīsu – anusotagāmīti vaṭṭasotaṃ anugato, vaṭṭasote nimuggo puthujjano veditabbo. Paṭisotagāmīti paṭisotagamano . Anusotaṃ agantvā paṭisotaṃ gacchantassetaṃ adhivacanaṃ. Pāpañca kammaṃ na karotīti paññattaṃ vītikkamanto na karoti. Sahāpi dukkhena sahāpi domanassenāti kilesapariyuṭṭhāne sati uppannena dukkhadomanassena saddhimpi. Paripuṇṇanti tissannaṃ sikkhānaṃ ekāyapi anūnaṃ. Parisuddhanti nirupakkilesaṃ. Brahmacariyanti seṭṭhacariyaṃ. Iminā vārena sotāpannasakadāgāmino kathitā. Kiṃ pana te rudantā brahmacariyaṃ carantīti? Āma. Kilesarodanena rudantā caranti nāma. Sīlasampanno puthujjanabhikkhupi ettheva saṅgahito.

    டி²தத்தோதி டி²தஸபா⁴வோ. அனாகா³மீதி காமராக³ப்³யாபாதே³ஹி அகம்பனீயசித்ததாய ச தம்ஹா லோகா அனாவத்தித⁴ம்மதாய ச டி²தஸபா⁴வோ நாம. திண்ணோதி தண்ஹாஸோதங் உத்திண்ணோ. பாரங்க³தோதி நிப்³பா³னபாரங் க³தோ. த²லே திட்ட²தீதி அரஹத்தப²லஸமாபத்தித²லே திட்ட²தி. சேதோவிமுத்திந்தி ப²லஸமாதி⁴ங். பஞ்ஞாவிமுத்திந்தி ப²லஞாணங். அயங் வுச்சதீதி அயங் கீ²ணாஸவோ ‘‘திண்ணோ பாரங்க³தோ த²லே திட்ட²தி ப்³ராஹ்மணோ’’தி வுச்சதி. பா³ஹிதபாபதாய ஹி ஏஸ ப்³ராஹ்மணோ நாம.

    Ṭhitattoti ṭhitasabhāvo. Anāgāmīti kāmarāgabyāpādehi akampanīyacittatāya ca tamhā lokā anāvattidhammatāya ca ṭhitasabhāvo nāma. Tiṇṇoti taṇhāsotaṃ uttiṇṇo. Pāraṅgatoti nibbānapāraṃ gato. Thale tiṭṭhatīti arahattaphalasamāpattithale tiṭṭhati. Cetovimuttinti phalasamādhiṃ. Paññāvimuttinti phalañāṇaṃ. Ayaṃ vuccatīti ayaṃ khīṇāsavo ‘‘tiṇṇo pāraṅgato thale tiṭṭhati brāhmaṇo’’ti vuccati. Bāhitapāpatāya hi esa brāhmaṇo nāma.

    189. அப்பஸ்ஸுதாதீ³ஸு – அப்பகங் ஸுதங் ஹோதீதி நவங்கே³ ஸத்து²ஸாஸனே கிஞ்சிதே³வ தோ²கங் ஸுதங் ஹோதி. ந அத்த²மஞ்ஞாய, ந த⁴ம்மமஞ்ஞாய த⁴ம்மானுத⁴ம்மபடிபன்னோ ஹோதீதி அட்ட²கத²ஞ்ச பாளிஞ்ச ஜானித்வா லோகுத்தரத⁴ம்மஸ்ஸ அனுரூபத⁴ம்மங் புப்³ப³பா⁴க³படிபத³ங் படிபன்னோ ந ஹோதி. இமினா நயேன ஸப்³ப³த்த² அத்தோ² வேதி³தப்³போ³.

    189. Appassutādīsu – appakaṃ sutaṃ hotīti navaṅge satthusāsane kiñcideva thokaṃ sutaṃ hoti. Na atthamaññāya, na dhammamaññāya dhammānudhammapaṭipanno hotīti aṭṭhakathañca pāḷiñca jānitvā lokuttaradhammassa anurūpadhammaṃ pubbabhāgapaṭipadaṃ paṭipanno na hoti. Iminā nayena sabbattha attho veditabbo.

    190. ஸமணமசலாதீ³ஸு – ஸமணமசலோதி ஸமணஅசலோ, மகாரோ பத³ஸந்தி⁴கரோ. நிச்சலஸமணோ, தி²ரஸமணோதி அத்தோ² . அயங் வுச்சதீதி அயங் ஸோதாபன்னோ ஸாஸனே மூலஜாதாய ஸத்³தா⁴ய பதிட்டி²தத்தா ‘ஸமணமசலோ’தி வுச்சதி. ஸகதா³கா³மீ பன ரஜ்ஜனகிலேஸஸ்ஸ அத்தி²தாய ஸமணபது³மோதி வுத்தோ. ரத்தட்டோ² ஹி இத⁴ பது³மட்டோ² நாமாதி வுத்தங். அனாகா³மீ காமராக³ஸங்கா²தஸ்ஸ ரஜ்ஜனகிலேஸஸ்ஸ நத்தி²தாய ஸமணபுண்ட³ரீகோதி வுத்தோ. பண்ட³ரட்டோ² ஹி இத⁴ புண்ட³ரீகட்டோ² நாமாதி வுத்தங் . கீ²ணாஸவோ ச த²த்³த⁴பா⁴வகரானங் கிலேஸானங் அபா⁴வேன ஸமணேஸு ஸமணஸுகு²மாலோ நாமாதி வுத்தோ. அப்பது³க்க²ட்டே²னபி சேஸ ஸமணஸுகு²மாலோயேவாதி.

    190. Samaṇamacalādīsu – samaṇamacaloti samaṇaacalo, makāro padasandhikaro. Niccalasamaṇo, thirasamaṇoti attho . Ayaṃ vuccatīti ayaṃ sotāpanno sāsane mūlajātāya saddhāya patiṭṭhitattā ‘samaṇamacalo’ti vuccati. Sakadāgāmī pana rajjanakilesassa atthitāya samaṇapadumoti vutto. Rattaṭṭho hi idha padumaṭṭho nāmāti vuttaṃ. Anāgāmī kāmarāgasaṅkhātassa rajjanakilesassa natthitāya samaṇapuṇḍarīkoti vutto. Paṇḍaraṭṭho hi idha puṇḍarīkaṭṭho nāmāti vuttaṃ . Khīṇāsavo ca thaddhabhāvakarānaṃ kilesānaṃ abhāvena samaṇesu samaṇasukhumālo nāmāti vutto. Appadukkhaṭṭhenapi cesa samaṇasukhumāloyevāti.

    சதுக்கனித்³தே³ஸவண்ணனா.

    Catukkaniddesavaṇṇanā.




    Next: 5. பஞ்சகனித்³தே³ஸவண்ணனா • 5. Pañcakaniddesavaṇṇanā




    Related texts:



    திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / புக்³க³லபஞ்ஞத்திபாளி • Puggalapaññattipāḷi / 4. சதுக்கபுக்³க³லபஞ்ஞத்தி • 4. Catukkapuggalapaññatti

    டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. சதுக்கனித்³தே³ஸவண்ணனா • 4. Catukkaniddesavaṇṇanā

    டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. சதுக்கனித்³தே³ஸவண்ணனா • 4. Catukkaniddesavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact