| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
4. சதுக்கனித்³தே³ஸவண்ணனா
4. Catukkaniddesavaṇṇanā
133. பரேன கதங் து³ஸ்ஸீல்யங் ஆணத்தியா அத்தனா ச பயோகே³ன கதந்தி ஆணத்தியா பாபஸ்ஸ தா³யாதோ³ ‘‘ததோ உபட்³ட⁴ஸ்ஸ தா³யாதோ³’’தி வுத்தோ.
133. Parena kataṃ dussīlyaṃ āṇattiyā attanā ca payogena katanti āṇattiyā pāpassa dāyādo ‘‘tato upaḍḍhassa dāyādo’’ti vutto.
145. அயந்தி ‘‘தேஸு பட²மோ’’திஆதி³கங் நயங் வத³தி.
145. Ayanti ‘‘tesu paṭhamo’’tiādikaṃ nayaṃ vadati.
148. தே³ஸனாய த⁴ம்மானங் ஞாணஸ்ஸ ஆபாத²பா⁴வஸம்பாத³னங் ஞாணுக்³கா⁴டனங். ஸஹ உதா³ஹடவேலாயாதி உதா³ஹடவேலாய ஸத்³தி⁴ங் தஸ்மிங் காலே அனதிக்கந்தே ஏவாதி அத்தோ².
148. Desanāya dhammānaṃ ñāṇassa āpāthabhāvasampādanaṃ ñāṇugghāṭanaṃ. Saha udāhaṭavelāyāti udāhaṭavelāya saddhiṃ tasmiṃ kāle anatikkante evāti attho.
152. தந்தி அனந்தரவசனங் வத³தி. ‘‘கதமோ லோகோ’’தி வுத்தே ‘‘பஞ்சுபாதா³னக்க²ந்தா⁴’’தி மஹந்தங் அத்த²ங் ஸங்க³ஹித்வா டி²தவசனங் அத்த²யுத்தங். லுஜ்ஜதீதி லோகோதி காரணயுத்தங்.
152. Tanti anantaravacanaṃ vadati. ‘‘Katamo loko’’ti vutte ‘‘pañcupādānakkhandhā’’ti mahantaṃ atthaṃ saṅgahitvā ṭhitavacanaṃ atthayuttaṃ. Lujjatīti lokoti kāraṇayuttaṃ.
156. ஸஹிதாஸஹிதஸ்ஸாதி ஸஹிதாஸஹிதேதி அத்தோ², ஸஹிதாஸஹிதஸ்ஸ பரிச்சி²ந்த³னேதி வா . த்³வேயேவாதி து³தியசதுத்தா²யேவ. தே³ஸகஸாவகஸம்பத்தியா போ³தே⁴துங் ஸமத்த²தாய ஸபா⁴வத⁴ம்மகதி²கா, ஸச்சத⁴ம்மகதி²காதி அத்தோ².
156. Sahitāsahitassāti sahitāsahiteti attho, sahitāsahitassa paricchindaneti vā . Dveyevāti dutiyacatutthāyeva. Desakasāvakasampattiyā bodhetuṃ samatthatāya sabhāvadhammakathikā, saccadhammakathikāti attho.
157. குஸலத⁴ம்மேஹி சித்தஸ்ஸ வாஸனாபா⁴வனா வாஸது⁴ரங். அயங் பாபபுக்³க³லோதி சதுத்தோ² வுத்தோ, ந பட²மோ. பட²மோ ஹி அவிஸங்வாதே³துகாமோ வேரஞ்ஜப்³ராஹ்மணஸதி³ஸோ அதி⁴ப்பேதோதி.
157. Kusaladhammehi cittassa vāsanābhāvanā vāsadhuraṃ. Ayaṃ pāpapuggaloti catuttho vutto, na paṭhamo. Paṭhamo hi avisaṃvādetukāmo verañjabrāhmaṇasadiso adhippetoti.
159. புக்³க³லேபி அரியானங் அபி⁴க்கமனாதி³ஸதி³ஸதாதி புக்³க³லே அபி⁴க்கமனாதீ³னங் அரியானங் அபி⁴க்கமனாதி³ஸதி³ஸதாதி அத்தோ², அரியானங் அபி⁴க்கமனாதி³னா புக்³க³லஸ்ஸ ஸதி³ஸதாதி வா ஸதி³ஸாபி⁴க்கமனாதி³தாதி அத்தோ².
159. Puggalepi ariyānaṃ abhikkamanādisadisatāti puggale abhikkamanādīnaṃ ariyānaṃ abhikkamanādisadisatāti attho, ariyānaṃ abhikkamanādinā puggalassa sadisatāti vā sadisābhikkamanāditāti attho.
166. து³ஸ்ஸீலங் ‘‘து³ஸ்ஸீலோ’’தி வத³ந்தோ பூ⁴தங் பா⁴ஸதி நாம. பாணாதிபாதேன து³ஸ்ஸீலங் அதி³ன்னாதா³னேன து³ஸ்ஸீலோதி அவத்வா பாணாதிபாதேனேவாதி வத³ந்தோ தச்ச²ங் பா⁴ஸதி நாம. யமித³ங் ‘‘காலேனா’’தி வுத்தங், தத்ர தஸ்மிங் வசனே, யோ ‘‘காலேன ப⁴ணதீ’’தி வுத்தோ, ஸோ கீதி³ஸோதி த³ஸ்ஸனத்த²ங் ‘‘காலஞ்ஞூ ஹோதீ’’திஆதி³ வுத்தந்தி த³ஸ்ஸெந்தோ ‘‘யமித³ங் காலேனாதி வுத்தங், தத்ர யோ புக்³க³லோ’’திஆதி³மாஹ.
166. Dussīlaṃ ‘‘dussīlo’’ti vadanto bhūtaṃ bhāsati nāma. Pāṇātipātena dussīlaṃ adinnādānena dussīloti avatvā pāṇātipātenevāti vadanto tacchaṃ bhāsati nāma. Yamidaṃ ‘‘kālenā’’ti vuttaṃ, tatra tasmiṃ vacane, yo ‘‘kālena bhaṇatī’’ti vutto, so kīdisoti dassanatthaṃ ‘‘kālaññū hotī’’tiādi vuttanti dassento ‘‘yamidaṃ kālenāti vuttaṃ, tatra yo puggalo’’tiādimāha.
168. ஆக³மனவிபத்தி நாம கம்மங், புப்³பு³ப்பன்னபச்சயவிபத்தி ஸுக்கஸோணிதங். பவத்தே, பவத்தஸ்ஸ வா பச்சயா பவத்தபச்சயா, ஆஹாராத³யோ. ஜோதேதீதி ஜோதி, ஆலோகோ. குலஸம்பத்தியாதீ³ஹி ஜோதமானோ ச ஜோதி வியாதி ஜோதி.
168. Āgamanavipatti nāma kammaṃ, pubbuppannapaccayavipatti sukkasoṇitaṃ. Pavatte, pavattassa vā paccayā pavattapaccayā, āhārādayo. Jotetīti joti, āloko. Kulasampattiyādīhi jotamāno ca joti viyāti joti.
173. பஹீனாவஸிட்ட²கிலேஸபச்சவெக்க²ணாபி யேஹி கிலேஸேஹி விமுத்தோ அவிமுத்தோ ச, தேஸங் த³ஸ்ஸனவஸேன விமுத்தித³ஸ்ஸனமேவ ஹோதீதி ஆஹ ‘‘விமுத்திஞாணத³ஸ்ஸனங் ஏகூனவீஸதிவித⁴ங் பச்சவெக்க²ணஞாண’’ந்தி.
173. Pahīnāvasiṭṭhakilesapaccavekkhaṇāpi yehi kilesehi vimutto avimutto ca, tesaṃ dassanavasena vimuttidassanameva hotīti āha ‘‘vimuttiñāṇadassanaṃ ekūnavīsatividhaṃ paccavekkhaṇañāṇa’’nti.
174. யானி கானிசி தந்தாவுதானந்தி தந்தாவுதானங் வத்தா²னங் யானி கானிசி வத்தா²னீதி வுத்தங் ஹோதி. ஸாயங் ததியங் அஸ்ஸாதி ஸாயததியோ. அனுயுஞ்ஜனங் அனுயோகோ³. தங் அனுயுத்தோதி உபயோக³வசனங் த³ட்ட²ப்³ப³ங், பா⁴வனபுங்ஸகங் வா.
174. Yāni kānici tantāvutānanti tantāvutānaṃ vatthānaṃ yāni kānici vatthānīti vuttaṃ hoti. Sāyaṃ tatiyaṃ assāti sāyatatiyo. Anuyuñjanaṃ anuyogo. Taṃ anuyuttoti upayogavacanaṃ daṭṭhabbaṃ, bhāvanapuṃsakaṃ vā.
178. தத்த² ஸிக்க²னபா⁴வேனாதி ஸிக்கா²ய ஸாஜீவே ச ஸிக்க²னபா⁴வேன. ஸிக்க²ங் பரிபூரெந்தோதி ஸீலஸங்வரங் பரிபூரெந்தோ. ஸாஜீவஞ்ச அவீதிக்கமந்தோதி ‘‘நாமகாயோ பத³காயோ நிருத்திகாயோ ப்³யஞ்ஜனகாயோ’’தி வுத்தங் ஸிக்கா²பத³ங் ப⁴க³வதோ வசனங் அவீதிக்கமந்தோ ஹுத்வாதி அத்தோ². இத³மேவ ச த்³வயங் ‘‘ஸிக்க²ன’’ந்தி வுத்தங். தத்த² ஸாஜீவானதிக்கமோ ஸிக்கா²பாரிபூரியா பச்சயோ. ததோ ஹி யாவ மக்³கா³ ஸங்வரபாரிபூரீ ஹோதீதி. வினாஸனபா⁴வதோதி ஹிங்ஸனபா⁴வதோ. ஹலித்³தி³ராகோ³ விய ந தி²ரகதோ² ஹோதீதி எத்த² கதா²ய அட்டி²தபா⁴வேன ஹலித்³தி³ராக³ஸதி³ஸதா வேதி³தப்³பா³, ந புக்³க³லஸ்ஸ.
178. Tatthasikkhanabhāvenāti sikkhāya sājīve ca sikkhanabhāvena. Sikkhaṃ paripūrentoti sīlasaṃvaraṃ paripūrento. Sājīvañca avītikkamantoti ‘‘nāmakāyo padakāyo niruttikāyo byañjanakāyo’’ti vuttaṃ sikkhāpadaṃ bhagavato vacanaṃ avītikkamanto hutvāti attho. Idameva ca dvayaṃ ‘‘sikkhana’’nti vuttaṃ. Tattha sājīvānatikkamo sikkhāpāripūriyā paccayo. Tato hi yāva maggā saṃvarapāripūrī hotīti. Vināsanabhāvatoti hiṃsanabhāvato. Haliddirāgo viya na thirakatho hotīti ettha kathāya aṭṭhitabhāvena haliddirāgasadisatā veditabbā, na puggalassa.
179. தா³ருமாஸகோதி யே வோஹாரங் க³ச்ச²ந்தீதி இதி-ஸத்³தே³ன ஏவங்பகாரே த³ஸ்ஸேதி. அஞ்ஞங் த³ஸ்ஸெத்வா அஞ்ஞஸ்ஸ பரிவத்தனந்தி த³ஸக்³க⁴னகங் வத்த²யுக³ங் த³ஸ்ஸெத்வா தஸ்ஸ அஜானந்தஸ்ஸ பஞ்சக்³க⁴னகஸ்ஸ தா³னங்.
179. Dārumāsakoti ye vohāraṃ gacchantīti iti-saddena evaṃpakāre dasseti. Aññaṃ dassetvā aññassa parivattananti dasagghanakaṃ vatthayugaṃ dassetvā tassa ajānantassa pañcagghanakassa dānaṃ.
181. அவிகிண்ணஸுக²ந்தி ரூபாதீ³ஸு ஸுபா⁴தி³பரிகப்பனவஸேன அவிஸடஸுக²ங்.
181. Avikiṇṇasukhanti rūpādīsu subhādiparikappanavasena avisaṭasukhaṃ.
187. க²ந்த⁴த⁴ம்மேஸு அனிச்சாதி³வஸேன பவத்தா விபஸ்ஸனா மக்³க³ப²லலாபே⁴ன படிலத்³தா⁴ நாம ஹோதி தத³லாபே⁴ன அனவட்டா²னதோதி மக்³க³ப²லலாபீ⁴ ஏவ ‘‘அதி⁴பஞ்ஞாத⁴ம்மவிபஸ்ஸனாலாபீ⁴’’தி வுத்தோ, மக்³க³ப²லஞாணமேவ ச அதி⁴கபஞ்ஞாபா⁴வதோ சதுஸச்சத⁴ம்மே ஸப்³ப³த⁴ம்மஸ்ஸ வரே நிப்³பா³னே ஏவ வா விஸிட்ட²த³ஸ்ஸனபா⁴வதோ ச அதி⁴பஞ்ஞாத⁴ம்மவிபஸ்ஸனாதி த³ட்ட²ப்³பா³.
187. Khandhadhammesu aniccādivasena pavattā vipassanā maggaphalalābhena paṭiladdhā nāma hoti tadalābhena anavaṭṭhānatoti maggaphalalābhī eva ‘‘adhipaññādhammavipassanālābhī’’ti vutto, maggaphalañāṇameva ca adhikapaññābhāvato catusaccadhamme sabbadhammassa vare nibbāne eva vā visiṭṭhadassanabhāvato ca adhipaññādhammavipassanāti daṭṭhabbā.
189. ஸுதேன அனுபபன்னோதி யதா²ஸுதேன வா அத்தே²ன வா ந ஸமன்னாக³தோதி அத்தோ².
189. Sutena anupapannoti yathāsutena vā atthena vā na samannāgatoti attho.
சதுக்கனித்³தே³ஸவண்ணனா நிட்டி²தா.
Catukkaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / புக்³க³லபஞ்ஞத்திபாளி • Puggalapaññattipāḷi / 4. சதுக்கபுக்³க³லபஞ்ஞத்தி • 4. Catukkapuggalapaññatti
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 4. சதுக்கனித்³தே³ஸவண்ணனா • 4. Catukkaniddesavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. சதுக்கனித்³தே³ஸவண்ணனா • 4. Catukkaniddesavaṇṇanā
