Library / Tipiṭaka / ཏིཔིཊཀ • Tipiṭaka / པུགྒལཔཉྙཏྟིཔཱལི༹ • Puggalapaññattipāḷi

༤. ཙཏུཀྐཔུགྒལཔཉྙཏྟི

4. Catukkapuggalapaññatti

༡༣༢. ཀཏམོ ཙ པུགྒལོ ཨསཔྤུརིསོ? ཨིདྷེཀཙྩོ པུགྒལོ པཱཎཱཏིཔཱཏཱི ཧོཏི, ཨདིནྣཱདཱཡཱི ཧོཏི, ཀཱམེསུམིཙྪཱཙཱརཱི ཧོཏི, མུསཱཝཱདཱི ཧོཏི, སུརཱམེརཡམཛྫཔམཱདཊྛཱཡཱི ཧོཏི – ཨཡཾ ཝུཙྩཏི པུགྒལོ ‘‘ཨསཔྤུརིསོ’’།

132. Katamo ca puggalo asappuriso? Idhekacco puggalo pāṇātipātī hoti, adinnādāyī hoti, kāmesumicchācārī hoti, musāvādī hoti, surāmerayamajjapamādaṭṭhāyī hoti – ayaṃ vuccati puggalo ‘‘asappuriso’’.

༡༣༣. ཀཏམོ ཙ པུགྒལོ ཨསཔྤུརིསེན ཨསཔྤུརིསཏརོ? ཨིདྷེཀཙྩོ པུགྒལོ ཨཏྟནཱ ཙ པཱཎཱཏིཔཱཏཱི ཧོཏི པརཉྩ པཱཎཱཏིཔཱཏེ སམཱདཔེཏི , ཨཏྟནཱ ཙ ཨདིནྣཱདཱཡཱི ཧོཏི པརཉྩ ཨདིནྣཱདཱནེ སམཱདཔེཏི, ཨཏྟནཱ ཙ ཀཱམེསུམིཙྪཱཙཱརཱི ཧོཏི པརཉྩ ཀཱམེསུམིཙྪཱཙཱརེ སམཱདཔེཏི, ཨཏྟནཱ ཙ མུསཱཝཱདཱི ཧོཏི པརཉྩ མུསཱཝཱདེ སམཱདཔེཏི, ཨཏྟནཱ ཙ སུརཱམེརཡམཛྫཔམཱདཊྛཱཡཱི ཧོཏི པརཉྩ སུརཱམེརཡམཛྫཔམཱདཊྛཱནེ སམཱདཔེཏི – ཨཡཾ ཝུཙྩཏི པུགྒལོ ‘‘ཨསཔྤུརིསེན ཨསཔྤུརིསཏརོ’’།

133. Katamo ca puggalo asappurisena asappurisataro? Idhekacco puggalo attanā ca pāṇātipātī hoti parañca pāṇātipāte samādapeti , attanā ca adinnādāyī hoti parañca adinnādāne samādapeti, attanā ca kāmesumicchācārī hoti parañca kāmesumicchācāre samādapeti, attanā ca musāvādī hoti parañca musāvāde samādapeti, attanā ca surāmerayamajjapamādaṭṭhāyī hoti parañca surāmerayamajjapamādaṭṭhāne samādapeti – ayaṃ vuccati puggalo ‘‘asappurisena asappurisataro’’.

༡༣༤. ཀཏམོ ཙ པུགྒལོ སཔྤུརིསོ? ཨིདྷེཀཙྩོ པུགྒལོ པཱཎཱཏིཔཱཏཱ པཊིཝིརཏོ ཧོཏི , ཨདིནྣཱདཱནཱ པཊིཝིརཏོ ཧོཏི, ཀཱམེསུམིཙྪཱཙཱརཱ པཊིཝིརཏོ ཧོཏི, མུསཱཝཱདཱ པཊིཝིརཏོ ཧོཏི, སུརཱམེརཡམཛྫཔམཱདཊྛཱནཱ པཊིཝིརཏོ ཧོཏི – ཨཡཾ ཝུཙྩཏི པུགྒལོ ‘‘སཔྤུརིསོ’’།

134. Katamo ca puggalo sappuriso? Idhekacco puggalo pāṇātipātā paṭivirato hoti , adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti – ayaṃ vuccati puggalo ‘‘sappuriso’’.

༡༣༥. ཀཏམོ ཙ པུགྒལོ སཔྤུརིསེན སཔྤུརིསཏརོ? ཨིདྷེཀཙྩོ པུགྒལོ ཨཏྟནཱ ཙ པཱཎཱཏིཔཱཏཱ པཊིཝིརཏོ ཧོཏི པརཉྩ པཱཎཱཏིཔཱཏཱ ཝེརམཎིཡཱ སམཱདཔེཏི, ཨཏྟནཱ ཙ ཨདིནྣཱདཱནཱ པཊིཝིརཏོ ཧོཏི པརཉྩ ཨདིནྣཱདཱནཱ ཝེརམཎིཡཱ སམཱདཔེཏི, ཨཏྟནཱ ཙ ཀཱམེསུམིཙྪཱཙཱརཱ པཊིཝིརཏོ ཧོཏི པརཉྩ ཀཱམེསུམིཙྪཱཙཱརཱ ཝེརམཎིཡཱ སམཱདཔེཏི, ཨཏྟནཱ ཙ མུསཱཝཱདཱ པཊིཝིརཏོ ཧོཏི པརཉྩ མུསཱཝཱདཱ ཝེརམཎིཡཱ སམཱདཔེཏི, ཨཏྟནཱ ཙ སུརཱམེརཡམཛྫཔམཱདཊྛཱནཱ པཊིཝིརཏོ ཧོཏི པརཉྩ སུརཱམེརཡམཛྫཔམཱདཊྛཱནཱ ཝེརམཎིཡཱ སམཱདཔེཏི – ཨཡཾ ཝུཙྩཏི པུགྒལོ ‘‘སཔྤུརིསེན སཔྤུརིསཏརོ’’།

135. Katamo ca puggalo sappurisena sappurisataro? Idhekacco puggalo attanā ca pāṇātipātā paṭivirato hoti parañca pāṇātipātā veramaṇiyā samādapeti, attanā ca adinnādānā paṭivirato hoti parañca adinnādānā veramaṇiyā samādapeti, attanā ca kāmesumicchācārā paṭivirato hoti parañca kāmesumicchācārā veramaṇiyā samādapeti, attanā ca musāvādā paṭivirato hoti parañca musāvādā veramaṇiyā samādapeti, attanā ca surāmerayamajjapamādaṭṭhānā paṭivirato hoti parañca surāmerayamajjapamādaṭṭhānā veramaṇiyā samādapeti – ayaṃ vuccati puggalo ‘‘sappurisena sappurisataro’’.

༡༣༦. ཀཏམོ ཙ པུགྒལོ པཱཔོ? ཨིདྷེཀཙྩོ པུགྒལོ པཱཎཱཏིཔཱཏཱི ཧོཏི, ཨདིནྣཱདཱཡཱི ཧོཏི, ཀཱམེསུམིཙྪཱཙཱརཱི ཧོཏི, མུསཱཝཱདཱི ཧོཏི, པིསུཎཝཱཙོ ¹ ཧོཏི, ཕརུསཝཱཙོ ² ཧོཏི, སམྥཔྤལཱཔཱི ཧོཏི, ཨབྷིཛ྄ཛྷཱལུ ཧོཏི, བྱཱཔནྣཙིཏྟོ ཧོཏི, མིཙྪཱདིཊྛི ³ ཧོཏི – ཨཡཾ ཝུཙྩཏི པུགྒལོ ‘‘པཱཔོ’’།

136. Katamo ca puggalo pāpo? Idhekacco puggalo pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco ⁴ hoti, pharusavāco ⁵ hoti, samphappalāpī hoti, abhijjhālu hoti, byāpannacitto hoti, micchādiṭṭhi ⁶ hoti – ayaṃ vuccati puggalo ‘‘pāpo’’.

༡༣༧. ཀཏམོ ཙ པུགྒལོ པཱཔེན པཱཔཏརོ? ཨིདྷེཀཙྩོ པུགྒལོ ཨཏྟནཱ ཙ པཱཎཱཏིཔཱཏཱི ཧོཏི པརཉྩ པཱཎཱཏིཔཱཏེ སམཱདཔེཏི, ཨཏྟནཱ ཙ ཨདིནྣཱདཱཡཱི ཧོཏི པརཉྩ ཨདིནྣཱདཱནེ སམཱདཔེཏི, ཨཏྟནཱ ཙ ཀཱམེསུམིཙྪཱཙཱརཱི ཧོཏི པརཉྩ ཀཱམེསུམིཙྪཱཙཱརེ སམཱདཔེཏི, ཨཏྟནཱ ཙ མུསཱཝཱདཱི ཧོཏི པརཉྩ མུསཱཝཱདེ སམཱདཔེཏི, ཨཏྟནཱ ཙ པིསུཎཝཱཙོ ཧོཏི པརཉྩ པིསུཎཱཡ ཝཱཙཱཡ སམཱདཔེཏི, ཨཏྟནཱ ཙ ཕརུསཝཱཙོ ཧོཏི པརཉྩ ཕརུསཱཡ ཝཱཙཱཡ སམཱདཔེཏི, ཨཏྟནཱ ཙ སམྥཔྤལཱཔཱི ཧོཏི པརཉྩ སམྥཔྤལཱཔེ སམཱདཔེཏི, ཨཏྟནཱ ཙ ཨབྷིཛ྄ཛྷཱལུ ཧོཏི པརཉྩ ཨབྷིཛ྄ཛྷཱཡ སམཱདཔེཏི, ཨཏྟནཱ ཙ བྱཱཔནྣཙིཏྟོ ཧོཏི པརཉྩ བྱཱཔཱདེ སམཱདཔེཏི, ཨཏྟནཱ ཙ མིཙྪཱདིཊྛི ཧོཏི པརཉྩ མིཙྪཱདིཊྛིཡཱ སམཱདཔེཏི – ཨཡཾ ཝུཙྩཏི པུགྒལོ ‘‘པཱཔེན པཱཔཏརོ’’།

137. Katamo ca puggalo pāpena pāpataro? Idhekacco puggalo attanā ca pāṇātipātī hoti parañca pāṇātipāte samādapeti, attanā ca adinnādāyī hoti parañca adinnādāne samādapeti, attanā ca kāmesumicchācārī hoti parañca kāmesumicchācāre samādapeti, attanā ca musāvādī hoti parañca musāvāde samādapeti, attanā ca pisuṇavāco hoti parañca pisuṇāya vācāya samādapeti, attanā ca pharusavāco hoti parañca pharusāya vācāya samādapeti, attanā ca samphappalāpī hoti parañca samphappalāpe samādapeti, attanā ca abhijjhālu hoti parañca abhijjhāya samādapeti, attanā ca byāpannacitto hoti parañca byāpāde samādapeti, attanā ca micchādiṭṭhi hoti parañca micchādiṭṭhiyā samādapeti – ayaṃ vuccati puggalo ‘‘pāpena pāpataro’’.

༡༣༨. ཀཏམོ ཙ པུགྒལོ ཀལྱཱཎོ? ཨིདྷེཀཙྩོ པུགྒལོ པཱཎཱཏིཔཱཏཱ པཊིཝིརཏོ ཧོཏི, ཨདིནྣཱདཱནཱ པཊིཝིརཏོ ཧོཏི , ཀཱམེསུམིཙྪཱཙཱརཱ པཊིཝིརཏོ ཧོཏི, མུསཱཝཱདཱ པཊིཝིརཏོ ཧོཏི, པིསུཎཱཡ ཝཱཙཱཡ པཊིཝིརཏོ ཧོཏི, ཕརུསཱཡ ཝཱཙཱཡ པཊིཝིརཏོ ཧོཏི, སམྥཔྤལཱཔཱ པཊིཝིརཏོ ཧོཏི, ཨནབྷིཛ྄ཛྷཱལུ ཧོཏི, ཨབྱཱཔནྣཙིཏྟོ ཧོཏི, སམྨཱདིཊྛི ⁷ ཧོཏི – ཨཡཾ ཝུཙྩཏི པུགྒལོ ‘‘ཀལྱཱཎོ’’།

138. Katamo ca puggalo kalyāṇo? Idhekacco puggalo pāṇātipātā paṭivirato hoti, adinnādānā paṭivirato hoti , kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi ⁸ hoti – ayaṃ vuccati puggalo ‘‘kalyāṇo’’.

༡༣༩. ཀཏམོ ཙ པུགྒལོ ཀལྱཱཎེན ཀལྱཱཎཏརོ? ཨིདྷེཀཙྩོ པུགྒལོ ཨཏྟནཱ ཙ པཱཎཱཏིཔཱཏཱ པཊིཝིརཏོ ཧོཏི པརཉྩ པཱཎཱཏིཔཱཏཱ ཝེརམཎིཡཱ སམཱདཔེཏི, ཨཏྟནཱ ཙ ཨདིནྣཱདཱནཱ པཊིཝིརཏོ ཧོཏི པརཉྩ ཨདིནྣཱདཱནཱ ཝེརམཎིཡཱ སམཱདཔེཏི, ཨཏྟནཱ ཙ ཀཱམེསུམིཙྪཱཙཱརཱ པཊིཝིརཏོ ཧོཏི པརཉྩ ཀཱམེསུམིཙྪཱཙཱརཱ ཝེརམཎིཡཱ སམཱདཔེཏི, ཨཏྟནཱ ཙ མུསཱཝཱདཱ པཊིཝིརཏོ ཧོཏི པརཉྩ མུསཱཝཱདཱ ཝེརམཎིཡཱ སམཱདཔེཏི, ཨཏྟནཱ ཙ པིསུཎཱཡ ཝཱཙཱཡ པཊིཝིརཏོ ཧོཏི པརཉྩ པིསུཎཱཡ ཝཱཙཱཡ ཝེརམཎིཡཱ སམཱདཔེཏི, ཨཏྟནཱ ཙ ཕརུསཱཡ ཝཱཙཱཡ པཊིཝིརཏོ ཧོཏི པརཉྩ ཕརུསཱཡ ཝཱཙཱཡ ཝེརམཎིཡཱ སམཱདཔེཏི, ཨཏྟནཱ ཙ སམྥཔྤལཱཔཱ པཊིཝིརཏོ ཧོཏི པརཉྩ སམྥཔྤལཱཔཱ ཝེརམཎིཡཱ སམཱདཔེཏི, ཨཏྟནཱ ཙ ཨནབྷིཛ྄ཛྷཱལུ ཧོཏི པརཉྩ ཨནབྷིཛ྄ཛྷཱཡ སམཱདཔེཏི, ཨཏྟནཱ ཙ ཨབྱཱཔནྣཙིཏྟོ ཧོཏི པརཉྩ ཨབྱཱཔཱདེ སམཱདཔེཏི, ཨཏྟནཱ ཙ སམྨཱདིཊྛི ཧོཏི པརཉྩ སམྨཱདིཊྛིཡཱ སམཱདཔེཏི – ཨཡཾ ཝུཙྩཏི པུགྒལོ ‘‘ཀལྱཱཎེན ཀལྱཱཎཏརོ’’།

139. Katamo ca puggalo kalyāṇena kalyāṇataro? Idhekacco puggalo attanā ca pāṇātipātā paṭivirato hoti parañca pāṇātipātā veramaṇiyā samādapeti, attanā ca adinnādānā paṭivirato hoti parañca adinnādānā veramaṇiyā samādapeti, attanā ca kāmesumicchācārā paṭivirato hoti parañca kāmesumicchācārā veramaṇiyā samādapeti, attanā ca musāvādā paṭivirato hoti parañca musāvādā veramaṇiyā samādapeti, attanā ca pisuṇāya vācāya paṭivirato hoti parañca pisuṇāya vācāya veramaṇiyā samādapeti, attanā ca pharusāya vācāya paṭivirato hoti parañca pharusāya vācāya veramaṇiyā samādapeti, attanā ca samphappalāpā paṭivirato hoti parañca samphappalāpā veramaṇiyā samādapeti, attanā ca anabhijjhālu hoti parañca anabhijjhāya samādapeti, attanā ca abyāpannacitto hoti parañca abyāpāde samādapeti, attanā ca sammādiṭṭhi hoti parañca sammādiṭṭhiyā samādapeti – ayaṃ vuccati puggalo ‘‘kalyāṇena kalyāṇataro’’.

༡༤༠. ཀཏམོ ཙ པུགྒལོ པཱཔདྷམྨོ? ཨིདྷེཀཙྩོ པུགྒལོ པཱཎཱཏིཔཱཏཱི ཧོཏི, ཨདིནྣཱདཱཡཱི ཧོཏི…པེ॰… མིཙྪཱདིཊྛི ཧོཏི – ཨཡཾ ཝུཙྩཏི པུགྒལོ ‘‘པཱཔདྷམྨོ’’།

140. Katamo ca puggalo pāpadhammo? Idhekacco puggalo pāṇātipātī hoti, adinnādāyī hoti…pe… micchādiṭṭhi hoti – ayaṃ vuccati puggalo ‘‘pāpadhammo’’.

༡༤༡. ཀཏམོ ཙ པུགྒལོ པཱཔདྷམྨེན པཱཔདྷམྨཏརོ? ཨིདྷེཀཙྩོ པུགྒལོ ཨཏྟནཱ ཙ པཱཎཱཏིཔཱཏཱི ཧོཏི པརཉྩ པཱཎཱཏིཔཱཏེ སམཱདཔེཏི, ཨཏྟནཱ ཙ ཨདིནྣཱདཱཡཱི ཧོཏི པརཉྩ ཨདིནྣཱདཱནེ སམཱདཔེཏི…པེ॰… ཨཏྟནཱ ཙ མིཙྪཱདིཊྛི ཧོཏི པརཉྩ མིཙྪཱདིཊྛིཡཱ སམཱདཔེཏི – ཨཡཾ ཝུཙྩཏི པུགྒལོ ‘‘པཱཔདྷམྨེན པཱཔདྷམྨཏརོ’’།

141. Katamo ca puggalo pāpadhammena pāpadhammataro? Idhekacco puggalo attanā ca pāṇātipātī hoti parañca pāṇātipāte samādapeti, attanā ca adinnādāyī hoti parañca adinnādāne samādapeti…pe… attanā ca micchādiṭṭhi hoti parañca micchādiṭṭhiyā samādapeti – ayaṃ vuccati puggalo ‘‘pāpadhammena pāpadhammataro’’.

༡༤༢. ཀཏམོ ཙ པུགྒལོ ཀལྱཱཎདྷམྨོ? ཨིདྷེཀཙྩོ པུགྒལོ པཱཎཱཏིཔཱཏཱ པཊིཝིརཏོ ཧོཏི, ཨདིནྣཱདཱནཱ པཊིཝིརཏོ ཧོཏི…པེ॰… སམཱདིཊྛི ཧོཏི – ཨཡཾ ཝུཙྩཏི པུགྒལོ ‘‘ཀལྱཱཎདྷམྨོ’’།

142. Katamo ca puggalo kalyāṇadhammo? Idhekacco puggalo pāṇātipātā paṭivirato hoti, adinnādānā paṭivirato hoti…pe… samādiṭṭhi hoti – ayaṃ vuccati puggalo ‘‘kalyāṇadhammo’’.

༡༤༣. ཀཏམོ ཙ པུགྒལོ ཀལྱཱཎདྷམྨེན ཀལྱཱཎདྷམྨཏརོ? ཨིདྷེཀཙྩོ པུགྒལོ ཨཏྟནཱ ཙ པཱཎཱཏིཔཱཏཱ པཊིཝིརཏོ ཧོཏི པརཉྩ པཱཎཱཏིཔཱཏཱ ཝེརམཎིཡཱ སམཱདཔེཏི…པེ॰… ཨཏྟནཱ ཙ སམྨཱདིཊྛི ཧོཏི པརཉྩ སམྨཱདིཊྛིཡཱ སམཱདཔེཏི – ཨཡཾ ཝུཙྩཏི པུགྒལོ ‘‘ཀལྱཱཎདྷམྨེན ཀལྱཱཎདྷམྨཏརོ’’།

143. Katamo ca puggalo kalyāṇadhammena kalyāṇadhammataro? Idhekacco puggalo attanā ca pāṇātipātā paṭivirato hoti parañca pāṇātipātā veramaṇiyā samādapeti…pe… attanā ca sammādiṭṭhi hoti parañca sammādiṭṭhiyā samādapeti – ayaṃ vuccati puggalo ‘‘kalyāṇadhammena kalyāṇadhammataro’’.

༡༤༤. ཀཏམོ ཙ པུགྒལོ སཱཝཛྫོ? ཨིདྷེཀཙྩོ པུགྒལོ སཱཝཛྫེན ཀཱཡཀམྨེན སམནྣཱགཏོ ཧོཏི, སཱཝཛྫེན ཝཙཱིཀམྨེན སམནྣཱགཏོ ཧོཏི, སཱཝཛྫེན མནོཀམྨེན སམནྣཱགཏོ ཧོཏི – ཨཡཾ ཝུཙྩཏི པུགྒལོ ‘‘སཱཝཛྫོ’’།

144. Katamo ca puggalo sāvajjo? Idhekacco puggalo sāvajjena kāyakammena samannāgato hoti, sāvajjena vacīkammena samannāgato hoti, sāvajjena manokammena samannāgato hoti – ayaṃ vuccati puggalo ‘‘sāvajjo’’.

༡༤༥. ཀཏམོ ཙ པུགྒལོ ཝཛྫབཧུལོ? ཨིདྷེཀཙྩོ པུགྒལོ སཱཝཛྫེན བཧུལཾ ཀཱཡཀམྨེན སམནྣཱགཏོ ཧོཏི ཨཔྤཾ ཨནཝཛྫེན, སཱཝཛྫེན བཧུལཾ ཝཙཱིཀམྨེན སམནྣཱགཏོ ཧོཏི ཨཔྤཾ ཨནཝཛྫེན, སཱཝཛྫེན བཧུལཾ མནོཀམྨེན སམནྣཱགཏོ ཧོཏི ཨཔྤཾ ཨནཝཛྫེན – ཨཡཾ ཝུཙྩཏི པུགྒལོ ‘‘ཝཛྫབཧུལོ’’།

145. Katamo ca puggalo vajjabahulo? Idhekacco puggalo sāvajjena bahulaṃ kāyakammena samannāgato hoti appaṃ anavajjena, sāvajjena bahulaṃ vacīkammena samannāgato hoti appaṃ anavajjena, sāvajjena bahulaṃ manokammena samannāgato hoti appaṃ anavajjena – ayaṃ vuccati puggalo ‘‘vajjabahulo’’.

༡༤༦. ཀཏམོ ཙ པུགྒལོ ཨཔྤཝཛྫོ? ཨིདྷེཀཙྩོ པུགྒལོ ཨནཝཛྫེན བཧུལཾ ཀཱཡཀམྨེན སམནྣཱགཏོ ཧོཏི ཨཔྤཾ སཱཝཛྫེན, ཨནཝཛྫེན བཧུལཾ ཝཙཱིཀམྨེན སམནྣཱགཏོ ཧོཏི ཨཔྤཾ སཱཝཛྫེན, ཨནཝཛྫེན བཧུལཾ མནོཀམྨེན སམནྣཱགཏོ ཧོཏི ཨཔྤཾ སཱཝཛྫེན – ཨཡཾ ཝུཙྩཏི པུགྒལོ ‘‘ཨཔྤཝཛྫོ’’།

146. Katamo ca puggalo appavajjo? Idhekacco puggalo anavajjena bahulaṃ kāyakammena samannāgato hoti appaṃ sāvajjena, anavajjena bahulaṃ vacīkammena samannāgato hoti appaṃ sāvajjena, anavajjena bahulaṃ manokammena samannāgato hoti appaṃ sāvajjena – ayaṃ vuccati puggalo ‘‘appavajjo’’.

༡༤༧. ཀཏམོ ཙ པུགྒལོ ཨནཝཛྫོ? ཨིདྷེཀཙྩོ པུགྒལོ ཨནཝཛྫེན ཀཱཡཀམྨེན སམནྣཱགཏོ ཧོཏི, ཨནཝཛྫེན ཝཙཱིཀམྨེན སམནྣཱགཏོ ཧོཏི, ཨནཝཛྫེན མནོཀམྨེན སམནྣཱགཏོ ཧོཏི – ཨཡཾ ཝུཙྩཏི པུགྒལོ ‘‘ཨནཝཛྫོ’’།

147. Katamo ca puggalo anavajjo? Idhekacco puggalo anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti – ayaṃ vuccati puggalo ‘‘anavajjo’’.

༡༤༨. ཀཏམོ ཙ པུགྒལོ ཨུགྒྷཊིཏཉྙཱུ? ཡསྶ པུགྒལསྶ སཧ ཨུདཱཧཊཝེལཱཡ དྷམྨཱབྷིསམཡོ ཧོཏི – ཨཡཾ ཝུཙྩཏི པུགྒལོ ‘‘ཨུགྒྷཊིཏཉྙཱུ’’།

148. Katamo ca puggalo ugghaṭitaññū? Yassa puggalassa saha udāhaṭavelāya dhammābhisamayo hoti – ayaṃ vuccati puggalo ‘‘ugghaṭitaññū’’.

༡༤༩. ཀཏམོ ཙ པུགྒལོ ཝིཔཉྩིཏཉྙཱུ? ཡསྶ པུགྒལསྶ སཾཁིཏྟེན བྷཱསིཏསྶ ཝིཏྠཱརེན ཨཏྠེ ཝིབྷཛིཡམཱནེ དྷམྨཱབྷིསམཡོ ཧོཏི – ཨཡཾ ཝུཙྩཏི པུགྒལོ ‘‘ཝིཔཉྩིཏཉྙཱུ’’།

149. Katamo ca puggalo vipañcitaññū? Yassa puggalassa saṃkhittena bhāsitassa vitthārena atthe vibhajiyamāne dhammābhisamayo hoti – ayaṃ vuccati puggalo ‘‘vipañcitaññū’’.

༡༥༠. ཀཏམོ ཙ པུགྒལོ ནེཡྻོ? ཡསྶ པུགྒལསྶ ཨུདྡེསཏོ པརིཔུཙྪཏོ ཡོནིསོ མནསིཀརོཏོ ཀལྱཱཎམིཏྟེ སེཝཏོ བྷཛཏོ པཡིརུཔཱསཏོ ཨེཝཾ ཨནུཔུབྦེན དྷམྨཱབྷིསམཡོ ཧོཏི – ཨཡཾ ཝུཙྩཏི པུགྒལོ ‘‘ནེཡྻོ’’།

150. Katamo ca puggalo neyyo? Yassa puggalassa uddesato paripucchato yoniso manasikaroto kalyāṇamitte sevato bhajato payirupāsato evaṃ anupubbena dhammābhisamayo hoti – ayaṃ vuccati puggalo ‘‘neyyo’’.

༡༥༡. ཀཏམོ ཙ པུགྒལོ པདཔརམོ? ཡསྶ པུགྒལསྶ བཧུམྤི སུཎཏོ བཧུམྤི བྷཎཏོ བཧུམྤི དྷཱརཡཏོ བཧུམྤི ཝཱཙཡཏོ ན ཏཱཡ ཛཱཏིཡཱ དྷམྨཱབྷིསམཡོ ཧོཏི – ཨཡཾ ཝུཙྩཏི པུགྒལོ ‘‘པདཔརམོ’’།

151. Katamo ca puggalo padaparamo? Yassa puggalassa bahumpi suṇato bahumpi bhaṇato bahumpi dhārayato bahumpi vācayato na tāya jātiyā dhammābhisamayo hoti – ayaṃ vuccati puggalo ‘‘padaparamo’’.

༡༥༢. ཀཏམོ ཙ པུགྒལོ ཡུཏྟཔྤཊིབྷཱནོ ⁹ ནོ མུཏྟཔྤཊིབྷཱནོ? ཨིདྷེཀཙྩོ པུགྒལོ པཉྷཾ པུཊྛོ སམཱནོ ཡུཏྟཾ ཝདཏི ནོ སཱིགྷཾ – ཨཡཾ ཝུཙྩཏི པུགྒལོ ‘‘ཡུཏྟཔྤཊིབྷཱནོ ནོ མུཏྟཔྤཊིབྷཱནོ’’།

152. Katamo ca puggalo yuttappaṭibhāno ¹⁰ no muttappaṭibhāno? Idhekacco puggalo pañhaṃ puṭṭho samāno yuttaṃ vadati no sīghaṃ – ayaṃ vuccati puggalo ‘‘yuttappaṭibhāno no muttappaṭibhāno’’.

༡༥༣. ཀཏམོ ཙ པུགྒལོ མུཏྟཔྤཊིབྷཱནོ ནོ ཡུཏྟཔྤཊིབྷཱནོ? ཨིདྷེཀཙྩོ པུགྒལོ པཉྷཾ པུཊྛོ སམཱནོ སཱིགྷཾ ཝདཏི ནོ ཡུཏྟཾ – ཨཡཾ ཝུཙྩཏི པུགྒལོ ‘‘མུཏྟཔྤཊིབྷཱནོ ནོ ཡུཏྟཔྤཊིབྷཱནོ’’།

153. Katamo ca puggalo muttappaṭibhāno no yuttappaṭibhāno? Idhekacco puggalo pañhaṃ puṭṭho samāno sīghaṃ vadati no yuttaṃ – ayaṃ vuccati puggalo ‘‘muttappaṭibhāno no yuttappaṭibhāno’’.

༡༥༤. ཀཏམོ ཙ པུགྒལོ ཡུཏྟཔྤཊིབྷཱནོ ཙ མུཏྟཔྤཊིབྷཱནོ ཙ? ཨིདྷེཀཙྩོ པུགྒལོ པཉྷཾ པུཊྛོ སམཱནོ ཡུཏྟཉྩ ཝདཏི སཱིགྷཉྩ – ཨཡཾ ཝུཙྩཏི པུགྒལོ ‘‘ཡུཏྟཔྤཊིབྷཱནོ ཙ མུཏྟཔྤཊིབྷཱནོ ཙ’’།

154. Katamo ca puggalo yuttappaṭibhāno ca muttappaṭibhāno ca? Idhekacco puggalo pañhaṃ puṭṭho samāno yuttañca vadati sīghañca – ayaṃ vuccati puggalo ‘‘yuttappaṭibhāno ca muttappaṭibhāno ca’’.

༡༥༥. ཀཏམོ ཙ པུགྒལོ ནེཝ ཡུཏྟཔྤཊིབྷཱནོ ནོ མུཏྟཔྤཊིབྷཱནོ? ཨིདྷེཀཙྩོ པུགྒལོ པཉྷཾ པུཊྛོ སམཱནོ ནེཝ ཡུཏྟཾ ཝདཏི ནོ སཱིགྷཾ – ཨཡཾ ཝུཙྩཏི, པུགྒལོ ‘‘ནེཝ ཡུཏྟཔྤཊིབྷཱནོ ནོ མུཏྟཔྤཊིབྷཱནོ’’།

155. Katamo ca puggalo neva yuttappaṭibhāno no muttappaṭibhāno? Idhekacco puggalo pañhaṃ puṭṭho samāno neva yuttaṃ vadati no sīghaṃ – ayaṃ vuccati, puggalo ‘‘neva yuttappaṭibhāno no muttappaṭibhāno’’.

༡༥༦. ཏཏྠ ཀཏམེ ཙཏྟཱརོ དྷམྨཀཐིཀཱ པུགྒལཱ? ཨིདྷེཀཙྩོ དྷམྨཀཐིཀོ ཨཔྤཉྩ བྷཱསཏི ཨསཧིཏཉྩ, པརིསཱ ཙསྶ ན ཀུསལཱ ཧོཏི སཧིཏཱསཧིཏསྶ། ཨེཝརཱུཔོ དྷམྨཀཐིཀོ ཨེཝརཱུཔཱཡ པརིསཱཡ དྷམྨཀཐིཀོཏྭེཝ སངྑཾ གཙྪཏི།

156. Tattha katame cattāro dhammakathikā puggalā? Idhekacco dhammakathiko appañca bhāsati asahitañca, parisā cassa na kusalā hoti sahitāsahitassa. Evarūpo dhammakathiko evarūpāya parisāya dhammakathikotveva saṅkhaṃ gacchati.

ཨིདྷ པནེཀཙྩོ དྷམྨཀཐིཀོ ཨཔྤཉྩ བྷཱསཏི སཧིཏཉྩ, པརིསཱ ཙསྶ ཀུསལཱ ཧོཏི སཧིཏཱསཧིཏསྶ། ཨེཝརཱུཔོ དྷམྨཀཐིཀོ ཨེཝརཱུཔཱཡ པརིསཱཡ དྷམྨཀཐིཀོཏྭེཝ སངྑཾ གཙྪཏི།

Idha panekacco dhammakathiko appañca bhāsati sahitañca, parisā cassa kusalā hoti sahitāsahitassa. Evarūpo dhammakathiko evarūpāya parisāya dhammakathikotveva saṅkhaṃ gacchati.

ཨིདྷ པནེཀཙྩོ དྷམྨཀཐིཀོ བཧུཉྩ བྷཱསཏི ཨསཧིཏཉྩ, པརིསཱ ཙསྶ ན ཀུསལཱ ཧོཏི སཧིཏཱསཧིཏསྶ། ཨེཝརཱུཔོ དྷམྨཀཐིཀོ ཨེཝརཱུཔཱཡ པརིསཱཡ དྷམྨཀཐིཀོཏྭེཝ སངྑཾ གཙྪཏི།

Idha panekacco dhammakathiko bahuñca bhāsati asahitañca, parisā cassa na kusalā hoti sahitāsahitassa. Evarūpo dhammakathiko evarūpāya parisāya dhammakathikotveva saṅkhaṃ gacchati.

ཨིདྷ པནེཀཙྩོ དྷམྨཀཐིཀོ བཧུཉྩ བྷཱསཏི སཧིཏཉྩ, པརིསཱ ཙསྶ ཀུསལཱ ཧོཏི སཧིཏཱསཧིཏསྶ། ཨེཝརཱུཔོ དྷམྨཀཐིཀོ ཨེཝརཱུཔཱཡ པརིསཱཡ དྷམྨཀཐིཀོཏྭེཝ སངྑཾ གཙྪཏི། ཨིམེ ཙཏྟཱརོ ‘‘དྷམྨཀཐིཀཱ པུགྒལཱ’’།

Idha panekacco dhammakathiko bahuñca bhāsati sahitañca, parisā cassa kusalā hoti sahitāsahitassa. Evarūpo dhammakathiko evarūpāya parisāya dhammakathikotveva saṅkhaṃ gacchati. Ime cattāro ‘‘dhammakathikā puggalā’’.

༡༥༧. ཏཏྠ ཀཏམེ ཙཏྟཱརོ ཝལཱཧཀཱུཔམཱ པུགྒལཱ? ཙཏྟཱརོ ཝལཱཧཀཱ – གཛྫིཏཱ ནོ ཝསྶིཏཱ, ཝསྶིཏཱ ནོ གཛྫིཏཱ, གཛྫིཏཱ ཙ ཝསྶིཏཱ ཙ, ནེཝ གཛྫིཏཱ ནོ ཝསྶིཏཱ། ཨེཝམེཝཾ ཙཏྟཱརོམེ ཝལཱཧཀཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ ? གཛྫིཏཱ ནོ ཝསྶིཏཱ, ཝསྶིཏཱ ནོ གཛྫིཏཱ, གཛྫིཏཱ ཙ ཝསྶིཏཱ ཙ, ནེཝ གཛྫིཏཱ ནོ ཝསྶིཏཱ།

157. Tattha katame cattāro valāhakūpamā puggalā? Cattāro valāhakā – gajjitā no vassitā, vassitā no gajjitā, gajjitā ca vassitā ca, neva gajjitā no vassitā. Evamevaṃ cattārome valāhakūpamā puggalā santo saṃvijjamānā lokasmiṃ. Katame cattāro ? Gajjitā no vassitā, vassitā no gajjitā, gajjitā ca vassitā ca, neva gajjitā no vassitā.

ཀཐཉྩ པུགྒལོ གཛྫིཏཱ ཧོཏི ནོ ཝསྶིཏཱ? ཨིདྷེཀཙྩོ པུགྒལོ བྷཱསིཏཱ ཧོཏི, ནོ ཀཏྟཱ། ཨེཝཾ པུགྒལོ གཛྫིཏཱ ཧོཏི, ནོ ཝསྶིཏཱ། སེཡྻཐཱཔི སོ ཝལཱཧཀོ གཛྫིཏཱ ནོ ཝསྶིཏཱ, ཏཐཱུཔམོ ཨཡཾ པུགྒལོ།

Kathañca puggalo gajjitā hoti no vassitā? Idhekacco puggalo bhāsitā hoti, no kattā. Evaṃ puggalo gajjitā hoti, no vassitā. Seyyathāpi so valāhako gajjitā no vassitā, tathūpamo ayaṃ puggalo.

ཀཐཉྩ པུགྒལོ ཝསྶིཏཱ ཧོཏི ནོ གཛྫིཏཱ? ཨིདྷེཀཙྩོ པུགྒལོ ཀཏྟཱ ཧོཏི, ནོ བྷཱསིཏཱ། ཨེཝཾ པུགྒལོ ཝསྶིཏཱ ཧོཏི ནོ གཛྫིཏཱ། སེཡྻཐཱཔི སོ ཝལཱཧཀོ ཝསྶིཏཱ ནོ གཛྫིཏཱ, ཏཐཱུཔམོ ཨཡཾ པུགྒལོ།

Kathañca puggalo vassitā hoti no gajjitā? Idhekacco puggalo kattā hoti, no bhāsitā. Evaṃ puggalo vassitā hoti no gajjitā. Seyyathāpi so valāhako vassitā no gajjitā, tathūpamo ayaṃ puggalo.

ཀཐཉྩ པུགྒལོ གཛྫིཏཱ ཙ ཧོཏི ཝསྶིཏཱ ཙ? ཨིདྷེཀཙྩོ པུགྒལོ བྷཱསིཏཱ ཙ ཧོཏི, ཀཏྟཱ ཙ། ཨེཝཾ པུགྒལོ གཛྫིཏཱ ཙ ཧོཏི ཝསྶིཏཱ ཙ། སེཡྻཐཱཔི སོ ཝལཱཧཀོ གཛྫིཏཱ ཙ ཝསྶིཏཱ ཙ, ཏཐཱུཔམོ ཨཡཾ པུགྒལོ།

Kathañca puggalo gajjitā ca hoti vassitā ca? Idhekacco puggalo bhāsitā ca hoti, kattā ca. Evaṃ puggalo gajjitā ca hoti vassitā ca. Seyyathāpi so valāhako gajjitā ca vassitā ca, tathūpamo ayaṃ puggalo.

ཀཐཉྩ པུགྒལོ ནེཝ གཛྫིཏཱ ཧོཏི ནོ ཝསྶིཏཱ? ཨིདྷེཀཙྩོ པུགྒལོ ནེཝ བྷཱསིཏཱ ཧོཏི ནོ ཀཏྟཱ། ཨེཝཾ པུགྒལོ ནེཝ གཛྫིཏཱ ཧོཏི ནོ ཝསྶིཏཱ། སེཡྻཐཱཔི སོ ཝལཱཧཀོ ནེཝ གཛྫིཏཱ ནོ ཝསྶིཏཱ, ཏཐཱུཔམོ ཨཡཾ པུགྒལོ།

Kathañca puggalo neva gajjitā hoti no vassitā? Idhekacco puggalo neva bhāsitā hoti no kattā. Evaṃ puggalo neva gajjitā hoti no vassitā. Seyyathāpi so valāhako neva gajjitā no vassitā, tathūpamo ayaṃ puggalo.

ཨིམེ ཙཏྟཱརོ ཝལཱཧཀཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ།

Ime cattāro valāhakūpamā puggalā santo saṃvijjamānā lokasmiṃ.

༡༥༨. ཏཏྠ ཀཏམེ ཙཏྟཱརོ མཱུསིཀཱུཔམཱ པུགྒལཱ? ཙཏསྶོ མཱུསིཀཱ – གཱདྷཾ ཀཏྟཱ ནོ ཝསིཏཱ, ཝསིཏཱ ནོ གཱདྷཾ ཀཏྟཱ, གཱདྷཾ ཀཏྟཱ ཙ ཝསིཏཱ ཙ, ནེཝ གཱདྷཾ ཀཏྟཱ ནོ ཝསིཏཱ། ཨེཝམེཝཾ ཙཏྟཱརོམེ མཱུསིཀཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? གཱདྷཾ ཀཏྟཱ ནོ ཝསིཏཱ, ཝསིཏཱ ནོ གཱདྷཾ ཀཏྟཱ, གཱདྷཾ ཀཏྟཱ ཙ ཝསིཏཱ ཙ, ནེཝ གཱདྷཾ ཀཏྟཱ ནོ ཝསིཏཱ།

158. Tattha katame cattāro mūsikūpamā puggalā? Catasso mūsikā – gādhaṃ kattā no vasitā, vasitā no gādhaṃ kattā, gādhaṃ kattā ca vasitā ca, neva gādhaṃ kattā no vasitā. Evamevaṃ cattārome mūsikūpamā puggalā santo saṃvijjamānā lokasmiṃ. Katame cattāro? Gādhaṃ kattā no vasitā, vasitā no gādhaṃ kattā, gādhaṃ kattā ca vasitā ca, neva gādhaṃ kattā no vasitā.

ཀཐཉྩ པུགྒལོ གཱདྷཾ ཀཏྟཱ ཧོཏི ནོ ཝསིཏཱ? ཨིདྷེཀཙྩོ པུགྒལོ དྷམྨཾ པརིཡཱཔུཎཱཏི – སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ ནཔྤཛཱནཱཏི། ཨེཝཾ པུགྒལོ གཱདྷཾ ཀཏྟཱ ཧོཏི ནོ ཝསིཏཱ། སེཡྻཐཱཔི སཱ མཱུསིཀཱ གཱདྷཾ ཀཏྟཱ ནོ ཝསིཏཱ, ཏཐཱུཔམོ ཨཡཾ པུགྒལོ།

Kathañca puggalo gādhaṃ kattā hoti no vasitā? Idhekacco puggalo dhammaṃ pariyāpuṇāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So ‘‘idaṃ dukkha’’nti yathābhūtaṃ nappajānāti, ‘‘ayaṃ dukkhasamudayo’’ti yathābhūtaṃ nappajānāti, ‘‘ayaṃ dukkhanirodho’’ti yathābhūtaṃ nappajānāti, ‘‘ayaṃ dukkhanirodhagāminī paṭipadā’’ti yathābhūtaṃ nappajānāti. Evaṃ puggalo gādhaṃ kattā hoti no vasitā. Seyyathāpi sā mūsikā gādhaṃ kattā no vasitā, tathūpamo ayaṃ puggalo.

ཀཐཉྩ པུགྒལོ ཝསིཏཱ ཧོཏི ནོ གཱདྷཾ ཀཏྟཱ? ཨིདྷེཀཙྩོ པུགྒལོ དྷམྨཾ ན པརིཡཱཔུཎཱཏི – སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཨེཝཾ པུགྒལོ ཝསིཏཱ ཧོཏི ནོ གཱདྷཾ ཀཏྟཱ། སེཡྻཐཱཔི སཱ མཱུསིཀཱ ཝསིཏཱ ནོ གཱདྷཾ ཀཏྟཱ, ཏཐཱུཔམོ ཨཡཾ པུགྒལོ།

Kathañca puggalo vasitā hoti no gādhaṃ kattā? Idhekacco puggalo dhammaṃ na pariyāpuṇāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Evaṃ puggalo vasitā hoti no gādhaṃ kattā. Seyyathāpi sā mūsikā vasitā no gādhaṃ kattā, tathūpamo ayaṃ puggalo.

ཀཐཉྩ པུགྒལོ གཱདྷཾ ཀཏྟཱ ཙ ཧོཏི ཝསིཏཱ ཙ? ཨིདྷེཀཙྩོ པུགྒལོ དྷམྨཾ པརིཡཱཔུཎཱཏི – སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཨེཝཾ པུགྒལོ གཱདྷཾ ཀཏྟཱ ཙ ཧོཏི ཝསིཏཱ ཙ། སེཡྻཐཱཔི སཱ མཱུསིཀཱ གཱདྷཾ ཀཏྟཱ ཙ ཝསིཏཱ ཙ, ཏཐཱུཔམོ ཨཡཾ པུགྒལོ།

Kathañca puggalo gādhaṃ kattā ca hoti vasitā ca? Idhekacco puggalo dhammaṃ pariyāpuṇāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Evaṃ puggalo gādhaṃ kattā ca hoti vasitā ca. Seyyathāpi sā mūsikā gādhaṃ kattā ca vasitā ca, tathūpamo ayaṃ puggalo.

ཀཐཉྩ པུགྒལོ ནེཝ གཱདྷཾ ཀཏྟཱ ཧོཏི ནོ ཝསིཏཱ? ཨིདྷེཀཙྩོ པུགྒལོ དྷམྨཾ ན པརིཡཱཔུཎཱཏི – སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ ནཔྤཛཱནཱཏི། ཨེཝཾ པུགྒལོ ནེཝ གཱདྷཾ ཀཏྟཱ ཧོཏི ནོ ཝསིཏཱ། སེཡྻཐཱཔི སཱ མཱུསིཀཱ ནེཝ གཱདྷཾ ཀཏྟཱ ནོ ཝསིཏཱ, ཏཐཱུཔམོ ཨཡཾ པུགྒལོ།

Kathañca puggalo neva gādhaṃ kattā hoti no vasitā? Idhekacco puggalo dhammaṃ na pariyāpuṇāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So ‘‘idaṃ dukkha’’nti yathābhūtaṃ nappajānāti, ‘‘ayaṃ dukkhasamudayo’’ti yathābhūtaṃ nappajānāti, ‘‘ayaṃ dukkhanirodho’’ti yathābhūtaṃ nappajānāti, ‘‘ayaṃ dukkhanirodhagāminī paṭipadā’’ti yathābhūtaṃ nappajānāti. Evaṃ puggalo neva gādhaṃ kattā hoti no vasitā. Seyyathāpi sā mūsikā neva gādhaṃ kattā no vasitā, tathūpamo ayaṃ puggalo.

ཨིམེ ཙཏྟཱརོ མཱུསིཀཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ།

Ime cattāro mūsikūpamā puggalā santo saṃvijjamānā lokasmiṃ.

༡༥༩. ཏཏྠ ཀཏམེ ཙཏྟཱརོ ཨམྦཱུཔམཱ པུགྒལཱ? ཙཏྟཱརི ཨམྦཱནི – ཨཱམཾ པཀྐཝཎྞི ¹¹, པཀྐཾ ཨཱམཝཎྞི ¹², ཨཱམཾ ཨཱམཝཎྞི, པཀྐཾ པཀྐཝཎྞི། ཨེཝམེཝཾ ཙཏྟཱརོམེ ཨམྦཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? ཨཱམོ པཀྐཝཎྞཱི, པཀྐོ ཨཱམཝཎྞཱི, ཨཱམོ ཨཱམཝཎྞཱི, པཀྐོ པཀྐཝཎྞཱི།

159. Tattha katame cattāro ambūpamā puggalā? Cattāri ambāni – āmaṃ pakkavaṇṇi ¹³, pakkaṃ āmavaṇṇi ¹⁴, āmaṃ āmavaṇṇi, pakkaṃ pakkavaṇṇi. Evamevaṃ cattārome ambūpamā puggalā santo saṃvijjamānā lokasmiṃ. Katame cattāro? Āmo pakkavaṇṇī, pakko āmavaṇṇī, āmo āmavaṇṇī, pakko pakkavaṇṇī.

ཀཐཉྩ པུགྒལོ ཨཱམོ ཧོཏི པཀྐཝཎྞཱི? ཨིདྷེཀཙྩསྶ པུགྒལསྶ པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ ¹⁵ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ ནཔྤཛཱནཱཏི, ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ ནཔྤཛཱནཱཏི། ཨེཝཾ པུགྒལོ ཨཱམོ ཧོཏི པཀྐཝཎྞཱི། སེཡྻཐཱཔི ཏཾ ཨམྦཾ ཨཱམཾ པཀྐཝཎྞི, ཏཐཱུཔམོ ཨཡཾ པུགྒལོ།

Kathañca puggalo āmo hoti pakkavaṇṇī? Idhekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ ¹⁶ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ nappajānāti, ‘‘ayaṃ dukkhasamudayo’’ti yathābhūtaṃ nappajānāti, ‘‘ayaṃ dukkhanirodho’’ti yathābhūtaṃ nappajānāti, ‘‘ayaṃ dukkhanirodhagāminī paṭipadā’’ti yathābhūtaṃ nappajānāti. Evaṃ puggalo āmo hoti pakkavaṇṇī. Seyyathāpi taṃ ambaṃ āmaṃ pakkavaṇṇi, tathūpamo ayaṃ puggalo.

ཀཐཉྩ པུགྒལོ པཀྐོ ཧོཏི ཨཱམཝཎྞཱི? ཨིདྷེཀཙྩསྶ པུགྒལསྶ ན པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཨེཝཾ པུགྒལོ པཀྐོ ཧོཏི ཨཱམཝཎྞཱི། སེཡྻཐཱཔི ཏཾ ཨམྦཾ པཀྐཾ ཨཱམཝཎྞི, ཏཐཱུཔམོ ཨཡཾ པུགྒལོ།

Kathañca puggalo pakko hoti āmavaṇṇī? Idhekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Evaṃ puggalo pakko hoti āmavaṇṇī. Seyyathāpi taṃ ambaṃ pakkaṃ āmavaṇṇi, tathūpamo ayaṃ puggalo.

ཀཐཉྩ པུགྒལོ ཨཱམོ ཧོཏི ཨཱམཝཎྞཱི? ཨིདྷེཀཙྩསྶ པུགྒལསྶ ན པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ ནཔྤཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ ནཔྤཛཱནཱཏི། ཨེཝཾ པུགྒལོ ཨཱམོ ཧོཏི ཨཱམཝཎྞཱི། སེཡྻཐཱཔི ཏཾ ཨམྦཾ ཨཱམཾ ཨཱམཝཎྞི, ཏཐཱུཔམོ ཨཡཾ པུགྒལོ།

Kathañca puggalo āmo hoti āmavaṇṇī? Idhekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ nappajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ nappajānāti. Evaṃ puggalo āmo hoti āmavaṇṇī. Seyyathāpi taṃ ambaṃ āmaṃ āmavaṇṇi, tathūpamo ayaṃ puggalo.

ཀཐཉྩ པུགྒལོ པཀྐོ ཧོཏི པཀྐཝཎྞཱི? ཨིདྷེཀཙྩསྶ པུགྒལསྶ པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི …པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཨེཝཾ པུགྒལོ པཀྐོ ཧོཏི པཀྐཝཎྞཱི། སེཡྻཐཱཔི ཏཾ ཨམྦཾ པཀྐཾ པཀྐཝཎྞི, ཏཐཱུཔམོ ཨཡཾ པུགྒལོ།

Kathañca puggalo pakko hoti pakkavaṇṇī? Idhekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ . So ‘‘idaṃ dukkha’’nti yathābhūtaṃ pajānāti …pe… ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Evaṃ puggalo pakko hoti pakkavaṇṇī. Seyyathāpi taṃ ambaṃ pakkaṃ pakkavaṇṇi, tathūpamo ayaṃ puggalo.

ཨིམེ ཙཏྟཱརོ ཨམྦཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ།

Ime cattāro ambūpamā puggalā santo saṃvijjamānā lokasmiṃ.

༡༦༠. ཏཏྠ ཀཏམེ ཙཏྟཱརོ ཀུམྦྷཱུཔམཱ པུགྒལཱ? ཙཏྟཱརོ ཀུམྦྷཱ – ཏུཙྪོ པིཧིཏོ, པཱུརོ ཝིཝཊོ, ཏུཙྪོ ཝིཝཊོ, པཱུརོ པིཧིཏོ། ཨེཝམེཝཾ ཙཏྟཱརོམེ ཀུམྦྷཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? ཏུཙྪོ པིཧིཏོ, པཱུརོ ཝིཝཊོ, ཏུཙྪོ ཝིཝཊོ, པཱུརོ པིཧིཏོ།

160. Tattha katame cattāro kumbhūpamā puggalā? Cattāro kumbhā – tuccho pihito, pūro vivaṭo, tuccho vivaṭo, pūro pihito. Evamevaṃ cattārome kumbhūpamā puggalā santo saṃvijjamānā lokasmiṃ. Katame cattāro? Tuccho pihito, pūro vivaṭo, tuccho vivaṭo, pūro pihito.

ཀཐཉྩ པུགྒལོ ཏུཙྪོ ཧོཏི པིཧིཏོ? ཨིདྷེཀཙྩསྶ པུགྒལསྶ པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ ནཔྤཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ ནཔྤཛཱནཱཏི། ཨེཝཾ པུགྒལོ ཏུཙྪོ ཧོཏི པིཧིཏོ། སེཡྻཐཱཔི སོ ཀུམྦྷོ ཏུཙྪོ པིཧིཏོ, ཏཐཱུཔམོ ཨཡཾ པུགྒལོ།

Kathañca puggalo tuccho hoti pihito? Idhekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ nappajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ nappajānāti. Evaṃ puggalo tuccho hoti pihito. Seyyathāpi so kumbho tuccho pihito, tathūpamo ayaṃ puggalo.

ཀཐཉྩ པུགྒལོ པཱུརོ ཧོཏི ཝིཝཊོ? ཨིདྷེཀཙྩསྶ པུགྒལསྶ ན པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཨེཝཾ པུགྒལོ པཱུརོ ཧོཏི ཝིཝཊོ། སེཡྻཐཱཔི སོ ཀུམྦྷོ པཱུརོ ཝིཝཊོ, ཏཐཱུཔམོ ཨཡཾ པུགྒལོ།

Kathañca puggalo pūro hoti vivaṭo? Idhekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ pajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Evaṃ puggalo pūro hoti vivaṭo. Seyyathāpi so kumbho pūro vivaṭo, tathūpamo ayaṃ puggalo.

ཀཐཉྩ པུགྒལོ ཏུཙྪོ ཧོཏི ཝིཝཊོ? ཨིདྷེཀཙྩསྶ པུགྒལསྶ ན པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ ནཔྤཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ ནཔྤཛཱནཱཏི། ཨེཝཾ པུགྒལོ ཏུཙྪོ ཧོཏི ཝིཝཊོ། སེཡྻཐཱཔི སོ ཀུམྦྷོ ཏུཙྪོ ཝིཝཊོ, ཏཐཱུཔམོ ཨཡཾ པུགྒལོ།

Kathañca puggalo tuccho hoti vivaṭo? Idhekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ nappajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ nappajānāti. Evaṃ puggalo tuccho hoti vivaṭo. Seyyathāpi so kumbho tuccho vivaṭo, tathūpamo ayaṃ puggalo.

ཀཐཉྩ པུགྒལོ པཱུརོ ཧོཏི པིཧིཏོ? ཨིདྷེཀཙྩསྶ པུགྒལསྶ པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཨེཝཾ པུགྒལོ པཱུརོ ཧོཏི པིཧིཏོ། སེཡྻཐཱཔི སོ ཀུམྦྷོ པཱུརོ པིཧིཏོ, ཏཐཱུཔམོ ཨཡཾ པུགྒལོ། ཨིམེ ཙཏྟཱརོ ཀུམྦྷཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ།

Kathañca puggalo pūro hoti pihito? Idhekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ pajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Evaṃ puggalo pūro hoti pihito. Seyyathāpi so kumbho pūro pihito, tathūpamo ayaṃ puggalo. Ime cattāro kumbhūpamā puggalā santo saṃvijjamānā lokasmiṃ.

༡༦༡. ཏཏྠ ཀཏམེ ཙཏྟཱརོ ཨུདཀརཧདཱུཔམཱ པུགྒལཱ? ཙཏྟཱརོ ཨུདཀརཧདཱ – ཨུཏྟཱནོ གམྦྷཱིརོབྷཱསོ, གམྦྷཱིརོ ཨུཏྟཱནོབྷཱསོ, ཨུཏྟཱནོ ཨུཏྟཱནོབྷཱསོ, གམྦྷཱིརོ གམྦྷཱིརོབྷཱསོ། ཨེཝམེཝཾ ཙཏྟཱརོམེ ཨུདཀརཧདཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? ཨུཏྟཱནོ གམྦྷཱིརོབྷཱསོ, གམྦྷཱིརོ ཨུཏྟཱནོབྷཱསོ, ཨུཏྟཱནོ ཨུཏྟཱནོབྷཱསོ, གམྦྷཱིརོ གམྦྷཱིརོབྷཱསོ།

161. Tattha katame cattāro udakarahadūpamā puggalā? Cattāro udakarahadā – uttāno gambhīrobhāso, gambhīro uttānobhāso, uttāno uttānobhāso, gambhīro gambhīrobhāso. Evamevaṃ cattārome udakarahadūpamā puggalā santo saṃvijjamānā lokasmiṃ. Katame cattāro? Uttāno gambhīrobhāso, gambhīro uttānobhāso, uttāno uttānobhāso, gambhīro gambhīrobhāso.

ཀཐཉྩ པུགྒལོ ཨུཏྟཱནོ ཧོཏི གམྦྷཱིརོབྷཱསོ? ཨིདྷེཀཙྩསྶ པུགྒལསྶ པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ ནཔྤཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ ནཔྤཛཱནཱཏི། ཨེཝཾ པུགྒལོ ཨུཏྟཱནོ ཧོཏི གམྦྷཱིརོབྷཱསོ། སེཡྻཐཱཔི སོ ཨུདཀརཧདོ ཨུཏྟཱནོ གམྦྷཱིརོབྷཱསོ, ཏཐཱུཔམོ ཨཡཾ པུགྒལོ།

Kathañca puggalo uttāno hoti gambhīrobhāso? Idhekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ nappajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ nappajānāti. Evaṃ puggalo uttāno hoti gambhīrobhāso. Seyyathāpi so udakarahado uttāno gambhīrobhāso, tathūpamo ayaṃ puggalo.

ཀཐཉྩ པུགྒལོ གམྦྷཱིརོ ཧོཏི ཨུཏྟཱནོབྷཱསོ? ཨིདྷེཀཙྩསྶ པུགྒལསྶ ན པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཨེཝཾ པུགྒལོ གམྦྷཱིརོ ཧོཏི ཨུཏྟཱནོབྷཱསོ། སེཡྻཐཱཔི སོ ཨུདཀརཧདོ གམྦྷཱིརོ ཨུཏྟཱནོབྷཱསོ, ཏཐཱུཔམོ ཨཡཾ པུགྒལོ།

Kathañca puggalo gambhīro hoti uttānobhāso? Idhekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ pajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Evaṃ puggalo gambhīro hoti uttānobhāso. Seyyathāpi so udakarahado gambhīro uttānobhāso, tathūpamo ayaṃ puggalo.

ཀཐཉྩ པུགྒལོ ཨུཏྟཱནོ ཧོཏི ཨུཏྟཱནོབྷཱསོ? ཨིདྷེཀཙྩསྶ པུགྒལསྶ ན པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ ནཔྤཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ ནཔྤཛཱནཱཏི། ཨེཝཾ པུགྒལོ ཨུཏྟཱནོ ཧོཏི ཨུཏྟཱནོབྷཱསོ། སེཡྻཐཱཔི སོ ཨུདཀརཧདོ ཨུཏྟཱནོ ཨུཏྟཱནོབྷཱསོ, ཏཐཱུཔམོ ཨཡཾ པུགྒལོ།

Kathañca puggalo uttāno hoti uttānobhāso? Idhekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ nappajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ nappajānāti. Evaṃ puggalo uttāno hoti uttānobhāso. Seyyathāpi so udakarahado uttāno uttānobhāso, tathūpamo ayaṃ puggalo.

ཀཐཉྩ པུགྒལོ གམྦྷཱིརོ ཧོཏི གམྦྷཱིརོབྷཱསོ? ཨིདྷེཀཙྩསྶ པུགྒལསྶ པཱསཱདིཀཾ ཧོཏི ཨབྷིཀྐནྟཾ པཊིཀྐནྟཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཾ སངྒྷཱཊིཔཏྟཙཱིཝརདྷཱརཎཾ། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི…པེ॰… ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཨེཝཾ པུགྒལོ གམྦྷཱིརོ ཧོཏི གམྦྷཱིརོབྷཱསོ། སེཡྻཐཱཔི སོ ཨུདཀརཧདོ གམྦྷཱིརོ གམྦྷཱིརོབྷཱསོ, ཏཐཱུཔམོ ཨཡཾ པུགྒལོ། ཨིམེ ཙཏྟཱརོ ཨུདཀརཧདཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ།

Kathañca puggalo gambhīro hoti gambhīrobhāso? Idhekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ. So ‘‘idaṃ dukkha’’nti yathābhūtaṃ pajānāti…pe… ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Evaṃ puggalo gambhīro hoti gambhīrobhāso. Seyyathāpi so udakarahado gambhīro gambhīrobhāso, tathūpamo ayaṃ puggalo. Ime cattāro udakarahadūpamā puggalā santo saṃvijjamānā lokasmiṃ.

༡༦༢. ཏཏྠ ཀཏམེ ཙཏྟཱརོ བལཱིབདྡཱུཔམཱ པུགྒལཱ? ཙཏྟཱརོ བལཱིབདྡཱ ¹⁷ – སཀགཝཙཎྜོ ¹⁸ ནོ པརགཝཙཎྜོ, པརགཝཙཎྜོ ནོ སཀགཝཙཎྜོ, སཀགཝཙཎྜོ ཙ པརགཝཙཎྜོ ཙ, ནེཝ སཀགཝཙཎྜོ ནོ པརགཝཙཎྜོ། ཨེཝམེཝཾ ཙཏྟཱརོམེ བལཱིབདྡཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? སཀགཝཙཎྜོ ནོ པརགཝཙཎྜོ, པརགཝཙཎྜོ ནོ སཀགཝཙཎྜོ, སཀགཝཙཎྜོ ཙ པརགཝཙཎྜོ ཙ, ནེཝ སཀགཝཙཎྜོ ནོ པརགཝཙཎྜོ།

162. Tattha katame cattāro balībaddūpamā puggalā? Cattāro balībaddā ¹⁹ – sakagavacaṇḍo ²⁰ no paragavacaṇḍo, paragavacaṇḍo no sakagavacaṇḍo, sakagavacaṇḍo ca paragavacaṇḍo ca, neva sakagavacaṇḍo no paragavacaṇḍo. Evamevaṃ cattārome balībaddūpamā puggalā santo saṃvijjamānā lokasmiṃ. Katame cattāro? Sakagavacaṇḍo no paragavacaṇḍo, paragavacaṇḍo no sakagavacaṇḍo, sakagavacaṇḍo ca paragavacaṇḍo ca, neva sakagavacaṇḍo no paragavacaṇḍo.

ཀཐཉྩ པུགྒལོ སཀགཝཙཎྜོ ཧོཏི ནོ པརགཝཙཎྜོ? ཨིདྷེཀཙྩོ པུགྒལོ སཀཔརིསཾ ཨུབྦེཛིཏཱ ཧོཏི, ནོ པརཔརིསཾ། ཨེཝཾ པུགྒལོ སཀགཝཙཎྜོ ཧོཏི ནོ པརགཝཙཎྜོ། སེཡྻཐཱཔི སོ བལཱིབདྡོ སཀགཝཙཎྜོ ནོ པརགཝཙཎྜོ, ཏཐཱུཔམོ ཨཡཾ པུགྒལོ།

Kathañca puggalo sakagavacaṇḍo hoti no paragavacaṇḍo? Idhekacco puggalo sakaparisaṃ ubbejitā hoti, no paraparisaṃ. Evaṃ puggalo sakagavacaṇḍo hoti no paragavacaṇḍo. Seyyathāpi so balībaddo sakagavacaṇḍo no paragavacaṇḍo, tathūpamo ayaṃ puggalo.

ཀཐཉྩ པུགྒལོ པརགཝཙཎྜོ ཧོཏི ནོ སཀགཝཙཎྜོ? ཨིདྷེཀཙྩོ པུགྒལོ པརཔརིསཾ ཨུབྦེཛིཏཱ ཧོཏི, ནོ སཀཔརིསཾ། ཨེཝཾ པུགྒལོ པརགཝཙཎྜོ ཧོཏི ནོ སཀགཝཙཎྜོ། སེཡྻཐཱཔི སོ བལཱིབདྡོ པརགཝཙཎྜོ ནོ སཀགཝཙཎྜོ, ཏཐཱུཔམོ ཨཡཾ པུགྒལོ།

Kathañca puggalo paragavacaṇḍo hoti no sakagavacaṇḍo? Idhekacco puggalo paraparisaṃ ubbejitā hoti, no sakaparisaṃ. Evaṃ puggalo paragavacaṇḍo hoti no sakagavacaṇḍo. Seyyathāpi so balībaddo paragavacaṇḍo no sakagavacaṇḍo, tathūpamo ayaṃ puggalo.

ཀཐཉྩ པུགྒལོ སཀགཝཙཎྜོ ཙ ཧོཏི པརགཝཙཎྜོ ཙ? ཨིདྷེཀཙྩོ པུགྒལོ སཀཔརིསཉྩ ཨུབྦེཛིཏཱ ཧོཏི, པརཔརིསཉྩ། ཨེཝཾ པུགྒལོ སཀགཝཙཎྜོ ཙ ཧོཏི པརགཝཙཎྜོ ཙ། སེཡྻཐཱཔི སོ བལཱིབདྡོ སཀགཝཙཎྜོ ཙ པརགཝཙཎྜོ ཙ, ཏཐཱུཔམོ ཨཡཾ པུགྒལོ།

Kathañca puggalo sakagavacaṇḍo ca hoti paragavacaṇḍo ca? Idhekacco puggalo sakaparisañca ubbejitā hoti, paraparisañca. Evaṃ puggalo sakagavacaṇḍo ca hoti paragavacaṇḍo ca. Seyyathāpi so balībaddo sakagavacaṇḍo ca paragavacaṇḍo ca, tathūpamo ayaṃ puggalo.

ཀཐཉྩ པུགྒལོ ནེཝ སཀགཝཙཎྜོ ཧོཏི ནོ པརགཝཙཎྜོ? ཨིདྷེཀཙྩོ པུགྒལོ ནེཝ སཀཔརིསཾ ཨུབྦེཛིཏཱ ཧོཏི ནོ པརཔརིསཾ། ཨེཝཾ པུགྒལོ ནེཝ སཀགཝཙཎྜོ ཧོཏི ནོ པརགཝཙཎྜོ། སེཡྻཐཱཔི སོ བལཱིབདྡོ ནེཝ སཀགཝཙཎྜོ ནོ པརགཝཙཎྜོ, ཏཐཱུཔམོ ཨཡཾ པུགྒལོ། ཨིམེ ཙཏྟཱརོ བལཱིབདྡཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ།

Kathañca puggalo neva sakagavacaṇḍo hoti no paragavacaṇḍo? Idhekacco puggalo neva sakaparisaṃ ubbejitā hoti no paraparisaṃ. Evaṃ puggalo neva sakagavacaṇḍo hoti no paragavacaṇḍo. Seyyathāpi so balībaddo neva sakagavacaṇḍo no paragavacaṇḍo, tathūpamo ayaṃ puggalo. Ime cattāro balībaddūpamā puggalā santo saṃvijjamānā lokasmiṃ.

༡༦༣. ཏཏྠ ཀཏམེ ཙཏྟཱརོ ཨཱསཱིཝིསཱུཔམཱ པུགྒལཱ? ཙཏྟཱརོ ཨཱསཱིཝིསཱ ²¹ – ཨཱགཏཝིསོ ནོ གྷོརཝིསོ, གྷོརཝིསོ ནོ ཨཱགཏཝིསོ, ཨཱགཏཝིསོ ཙ གྷོརཝིསོ ཙ, ནེཝ ཨཱགཏཝིསོ ནོ གྷོརཝིསོ། ཨེཝམེཝཾ ཙཏྟཱརོམེ ཨཱསཱིཝིསཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? ཨཱགཏཝིསོ ནོ གྷོརཝིསོ, གྷོརཝིསོ ནོ ཨཱགཏཝིསོ, ཨཱགཏཝིསོ ཙ གྷོརཝིསོ ཙ, ནེཝ ཨཱགཏཝིསོ ནོ གྷོརཝིསོ།

163. Tattha katame cattāro āsīvisūpamā puggalā? Cattāro āsīvisā ²² – āgataviso no ghoraviso, ghoraviso no āgataviso, āgataviso ca ghoraviso ca, neva āgataviso no ghoraviso. Evamevaṃ cattārome āsīvisūpamā puggalā santo saṃvijjamānā lokasmiṃ. Katame cattāro? Āgataviso no ghoraviso, ghoraviso no āgataviso, āgataviso ca ghoraviso ca, neva āgataviso no ghoraviso.

ཀཐཉྩ པུགྒལོ ཨཱགཏཝིསོ ཧོཏི ནོ གྷོརཝིསོ? ཨིདྷེཀཙྩོ པུགྒལོ ཨབྷིཎྷཾ ཀུཛ྄ཛྷཏི། སོ ཙ ཁྭསྶ ཀོདྷོ ན ཙིརཾ དཱིགྷརཏྟཾ ཨནུསེཏི། ཨེཝཾ པུགྒལོ ཨཱགཏཝིསོ ཧོཏི, ནོ གྷོརཝིསོ། སེཡྻཐཱཔི སོ ཨཱསཱིཝིསོ ཨཱགཏཝིསོ ནོ གྷོརཝིསོ, ཏཐཱུཔམོ ཨཡཾ པུགྒལོ།

Kathañca puggalo āgataviso hoti no ghoraviso? Idhekacco puggalo abhiṇhaṃ kujjhati. So ca khvassa kodho na ciraṃ dīgharattaṃ anuseti. Evaṃ puggalo āgataviso hoti, no ghoraviso. Seyyathāpi so āsīviso āgataviso no ghoraviso, tathūpamo ayaṃ puggalo.

ཀཐཉྩ པུགྒལོ གྷོརཝིསོ ཧོཏི ནོ ཨཱགཏཝིསོ? ཨིདྷེཀཙྩོ པུགྒལོ ནཧེཝ ཁོ ²³ ཨབྷིཎྷཾ ཀུཛ྄ཛྷཏི། སོ ཙ ཁྭསྶ ཀོདྷོ ཙིརཾ དཱིགྷརཏྟཾ ཨནུསེཏི། ཨེཝཾ པུགྒལོ གྷོརཝིསོ ཧོཏི, ནོ ཨཱགཏཝིསོ། སེཡྻཐཱཔི སོ ཨཱསཱིཝིསོ གྷོརཝིསོ ནོ ཨཱགཏཝིསོ, ཏཐཱུཔམོ ཨཡཾ པུགྒལོ།

Kathañca puggalo ghoraviso hoti no āgataviso? Idhekacco puggalo naheva kho ²⁴ abhiṇhaṃ kujjhati. So ca khvassa kodho ciraṃ dīgharattaṃ anuseti. Evaṃ puggalo ghoraviso hoti, no āgataviso. Seyyathāpi so āsīviso ghoraviso no āgataviso, tathūpamo ayaṃ puggalo.

ཀཐཉྩ པུགྒལོ ཨཱགཏཝིསོ ཙ ཧོཏི གྷོརཝིསོ ཙ? ཨིདྷེཀཙྩོ པུགྒལོ ཨབྷིཎྷཾ ཀུཛ྄ཛྷཏི། སོ ཙ ཁྭསྶ ཀོདྷོ ཙིརཾ དཱིགྷརཏྟཾ ཨནུསེཏི། ཨེཝཾ པུགྒལོ ཨཱགཏཝིསོ ཙ ཧོཏི གྷོརཝིསོ ཙ། སེཡྻཐཱཔི སོ ཨཱསཱིཝིསོ ཨཱགཏཝིསོ ཙ གྷོརཝིསོ ཙ, ཏཐཱུཔམོ ཨཡཾ པུགྒལོ།

Kathañca puggalo āgataviso ca hoti ghoraviso ca? Idhekacco puggalo abhiṇhaṃ kujjhati. So ca khvassa kodho ciraṃ dīgharattaṃ anuseti. Evaṃ puggalo āgataviso ca hoti ghoraviso ca. Seyyathāpi so āsīviso āgataviso ca ghoraviso ca, tathūpamo ayaṃ puggalo.

ཀཐཉྩ པུགྒལོ ནེཝ ཨཱགཏཝིསོ ཧོཏི ནོ གྷོརཝིསོ? ཨིདྷེཀཙྩོ པུགྒལོ ནཧེཝ ཁོ ཨབྷིཎྷཾ ཀུཛ྄ཛྷཏི། སོ ཙ ཁྭསྶ ཀོདྷོ ན ཙིརཾ དཱིགྷརཏྟཾ ཨནུསེཏི། ཨེཝཾ པུགྒལོ ནེཝ ཨཱགཏཝིསོ ཧོཏི ནོ གྷོརཝིསོ། སེཡྻཐཱཔི སོ ཨཱསཱིཝིསོ ནེཝ ཨཱགཏཝིསོ ནོ གྷོརཝིསོ, ཏཐཱུཔམོ ཨཡཾ པུགྒལོ། ཨིམེ ཙཏྟཱརོ ཨཱསཱིཝིསཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ།

Kathañca puggalo neva āgataviso hoti no ghoraviso? Idhekacco puggalo naheva kho abhiṇhaṃ kujjhati. So ca khvassa kodho na ciraṃ dīgharattaṃ anuseti. Evaṃ puggalo neva āgataviso hoti no ghoraviso. Seyyathāpi so āsīviso neva āgataviso no ghoraviso, tathūpamo ayaṃ puggalo. Ime cattāro āsīvisūpamā puggalā santo saṃvijjamānā lokasmiṃ.

༡༦༤. ཀཐཉྩ པུགྒལོ ཨནནུཝིཙྩ ཨཔརིཡོགཱཧེཏྭཱ ཨཝཎྞཱརཧསྶ ཝཎྞཾ བྷཱསིཏཱ ཧོཏི? ཨིདྷེཀཙྩོ པུགྒལོ དུཔྤཊིཔནྣཱནཾ མིཙྪཱཔཊིཔནྣཱནཾ ཏིཏྠིཡཱནཾ ཏིཏྠིཡསཱཝཀཱནཾ ཝཎྞཾ བྷཱསཏི – ‘‘སུཔྤཊིཔནྣཱ’’ ཨིཏིཔི, ‘‘སམྨཱཔཊིཔནྣཱ’’ ཨིཏིཔཱིཏི། ཨེཝཾ པུགྒལོ ཨནནུཝིཙྩ ཨཔརིཡོགཱཧེཏྭཱ ཨཝཎྞཱརཧསྶ ཝཎྞཾ བྷཱསིཏཱ ཧོཏི།

164. Kathañca puggalo ananuvicca apariyogāhetvā avaṇṇārahassa vaṇṇaṃ bhāsitā hoti? Idhekacco puggalo duppaṭipannānaṃ micchāpaṭipannānaṃ titthiyānaṃ titthiyasāvakānaṃ vaṇṇaṃ bhāsati – ‘‘suppaṭipannā’’ itipi, ‘‘sammāpaṭipannā’’ itipīti. Evaṃ puggalo ananuvicca apariyogāhetvā avaṇṇārahassa vaṇṇaṃ bhāsitā hoti.

ཀཐཉྩ པུགྒལོ ཨནནུཝིཙྩ ཨཔརིཡོགཱཧེཏྭཱ ཝཎྞཱརཧསྶ ཨཝཎྞཾ བྷཱསིཏཱ ཧོཏི? ཨིདྷེཀཙྩོ པུགྒལོ སུཔྤཊིཔནྣཱནཾ སམྨཱཔཊིཔནྣཱནཾ བུདྡྷཱནཾ བུདྡྷསཱཝཀཱནཾ ཨཝཎྞཾ བྷཱསཏི – ‘‘དུཔྤཊིཔནྣཱ’’ ཨིཏིཔི, ‘‘མིཙྪཱཔཊིཔནྣཱ’’ ཨིཏིཔཱིཏི། ཨེཝཾ པུགྒལོ ཨནནུཝིཙྩ ཨཔརིཡོགཱཧེཏྭཱ ཝཎྞཱརཧསྶ ཨཝཎྞཾ བྷཱསིཏཱ ཧོཏི།

Kathañca puggalo ananuvicca apariyogāhetvā vaṇṇārahassa avaṇṇaṃ bhāsitā hoti? Idhekacco puggalo suppaṭipannānaṃ sammāpaṭipannānaṃ buddhānaṃ buddhasāvakānaṃ avaṇṇaṃ bhāsati – ‘‘duppaṭipannā’’ itipi, ‘‘micchāpaṭipannā’’ itipīti. Evaṃ puggalo ananuvicca apariyogāhetvā vaṇṇārahassa avaṇṇaṃ bhāsitā hoti.

ཀཐཉྩ པུགྒལོ ཨནནུཝིཙྩ ཨཔརིཡོགཱཧེཏྭཱ ཨཔྤསཱདནཱིཡེ ཋཱནེ པསཱདཾ ཨུཔདཾསིཏཱ ཧོཏི? ཨིདྷེཀཙྩོ པུགྒལོ དུཔྤཊིཔདཱཡ མིཙྪཱཔཊིཔདཱཡ པསཱདཾ ཛནེཏི – ‘‘སུཔྤཊིཔདཱ’’ ཨིཏིཔི , ‘‘སམྨཱཔཊིཔདཱ’’ ཨིཏིཔཱིཏི། ཨེཝཾ པུགྒལོ ཨནནུཝིཙྩ ཨཔརིཡོགཱཧེཏྭཱ ཨཔྤསཱདནཱིཡེ ཋཱནེ པསཱདཾ ཨུཔདཾསིཏཱ ཧོཏི།

Kathañca puggalo ananuvicca apariyogāhetvā appasādanīye ṭhāne pasādaṃ upadaṃsitā hoti? Idhekacco puggalo duppaṭipadāya micchāpaṭipadāya pasādaṃ janeti – ‘‘suppaṭipadā’’ itipi , ‘‘sammāpaṭipadā’’ itipīti. Evaṃ puggalo ananuvicca apariyogāhetvā appasādanīye ṭhāne pasādaṃ upadaṃsitā hoti.

ཀཐཉྩ པུགྒལོ ཨནནུཝིཙྩ ཨཔརིཡོགཱཧེཏྭཱ པསཱདནཱིཡེ ཋཱནེ ཨཔྤསཱདཾ ཨུཔདཾསིཏཱ ཧོཏི? ཨིདྷེཀཙྩོ པུགྒལོ སུཔྤཊིཔདཱཡ སམྨཱཔཊིཔདཱཡ ཨཔྤསཱདཾ ཛནེཏི – ‘‘དུཔྤཊིཔདཱ’’ ཨིཏིཔི, ‘‘མིཙྪཱཔཊིཔདཱ’’ ཨིཏིཔཱིཏི། ཨེཝཾ པུགྒལོ ཨནནུཝིཙྩ ཨཔརིཡོགཱཧེཏྭཱ པསཱདནཱིཡེ ཋཱནེ ཨཔྤསཱདཾ ཨུཔདཾསིཏཱ ཧོཏི།

Kathañca puggalo ananuvicca apariyogāhetvā pasādanīye ṭhāne appasādaṃ upadaṃsitā hoti? Idhekacco puggalo suppaṭipadāya sammāpaṭipadāya appasādaṃ janeti – ‘‘duppaṭipadā’’ itipi, ‘‘micchāpaṭipadā’’ itipīti. Evaṃ puggalo ananuvicca apariyogāhetvā pasādanīye ṭhāne appasādaṃ upadaṃsitā hoti.

༡༦༥. ཀཐཉྩ པུགྒལོ ཨནུཝིཙྩ པརིཡོགཱཧེཏྭཱ ཨཝཎྞཱརཧསྶ ཨཝཎྞཾ བྷཱསིཏཱ ཧོཏི? ཨིདྷེཀཙྩོ པུགྒལོ དུཔྤཊིཔནྣཱནཾ མིཙྪཱཔཊིཔནྣཱནཾ ཏིཏྠིཡཱནཾ ཏིཏྠིཡསཱཝཀཱནཾ ཨཝཎྞཾ བྷཱསཏི – ‘‘དུཔྤཊིཔནྣཱ’’ ཨིཏིཔི, ‘‘མིཙྪཱཔཊིཔནྣཱ’’ ཨིཏིཔཱིཏི། ཨེཝཾ པུགྒལོ ཨནུཝིཙྩ པརིཡོགཱཧེཏྭཱ ཨཝཎྞཱརཧསྶ ཨཝཎྞཾ བྷཱསིཏཱ ཧོཏི།

165. Kathañca puggalo anuvicca pariyogāhetvā avaṇṇārahassa avaṇṇaṃ bhāsitā hoti? Idhekacco puggalo duppaṭipannānaṃ micchāpaṭipannānaṃ titthiyānaṃ titthiyasāvakānaṃ avaṇṇaṃ bhāsati – ‘‘duppaṭipannā’’ itipi, ‘‘micchāpaṭipannā’’ itipīti. Evaṃ puggalo anuvicca pariyogāhetvā avaṇṇārahassa avaṇṇaṃ bhāsitā hoti.

ཀཐཉྩ པུགྒལོ ཨནུཝིཙྩ པརིཡོགཱཧེཏྭཱ ཝཎྞཱརཧསྶ ཝཎྞཾ བྷཱསིཏཱ ཧོཏི? ཨིདྷེཀཙྩོ པུགྒལོ སུཔྤཊིཔནྣཱནཾ སམྨཱཔཊིཔནྣཱནཾ བུདྡྷཱནཾ བུདྡྷསཱཝཀཱནཾ ཝཎྞཾ བྷཱསཏི – ‘‘སུཔྤཊིཔནྣཱ’’ ཨིཏིཔི, ‘‘སམྨཱཔཊིཔནྣཱ’’ ཨིཏིཔཱིཏི། ཨེཝཾ པུགྒལོ ཨནུཝིཙྩ པརིཡོགཱཧེཏྭཱ ཝཎྞཱརཧསྶ ཝཎྞཾ བྷཱསིཏཱ ཧོཏི།

Kathañca puggalo anuvicca pariyogāhetvā vaṇṇārahassa vaṇṇaṃ bhāsitā hoti? Idhekacco puggalo suppaṭipannānaṃ sammāpaṭipannānaṃ buddhānaṃ buddhasāvakānaṃ vaṇṇaṃ bhāsati – ‘‘suppaṭipannā’’ itipi, ‘‘sammāpaṭipannā’’ itipīti. Evaṃ puggalo anuvicca pariyogāhetvā vaṇṇārahassa vaṇṇaṃ bhāsitā hoti.

ཀཐཉྩ པུགྒལོ ཨནུཝིཙྩ པརིཡོགཱཧེཏྭཱ ཨཔྤསཱདནཱིཡེ ཋཱནེ ཨཔྤསཱདཾ ཨུཔདཾསིཏཱ ཧོཏི? ཨིདྷེཀཙྩོ པུགྒལོ དུཔྤཊིཔདཱཡ མིཙྪཱཔཊིཔདཱཡ ཨཔྤསཱདཾ ཛནེཏི – ‘‘དུཔྤཊིཔདཱ’’ ཨིཏིཔི, ‘‘མིཙྪཱཔཊིཔདཱ’’ ཨིཏིཔཱིཏི། ཨེཝཾ པུགྒལོ ཨནུཝིཙྩ པརིཡོགཱཧེཏྭཱ ཨཔྤསཱདནཱིཡེ ཋཱནེ ཨཔྤསཱདཾ ཨུཔདཾསིཏཱ ཧོཏི།

Kathañca puggalo anuvicca pariyogāhetvā appasādanīye ṭhāne appasādaṃ upadaṃsitā hoti? Idhekacco puggalo duppaṭipadāya micchāpaṭipadāya appasādaṃ janeti – ‘‘duppaṭipadā’’ itipi, ‘‘micchāpaṭipadā’’ itipīti. Evaṃ puggalo anuvicca pariyogāhetvā appasādanīye ṭhāne appasādaṃ upadaṃsitā hoti.

ཀཐཉྩ པུགྒལོ ཨནུཝིཙྩ པརིཡོགཱཧེཏྭཱ པསཱདནཱིཡེ ཋཱནེ པསཱདཾ ཨུཔདཾསིཏཱ ཧོཏི? ཨིདྷེཀཙྩོ པུགྒལོ སུཔྤཊིཔདཱཡ སམྨཱཔཊིཔདཱཡ པསཱདཾ ཛནེཏི – ‘‘སུཔྤཊིཔདཱ’’ ཨིཏིཔི, ‘‘སམྨཱཔཊིཔདཱ’’ ཨིཏིཔཱིཏི། ཨེཝཾ པུགྒལོ ཨནུཝིཙྩ པརིཡོགཱཧེཏྭཱ པསཱདནཱིཡེ ཋཱནེ པསཱདཾ ཨུཔདཾསིཏཱ ཧོཏི།

Kathañca puggalo anuvicca pariyogāhetvā pasādanīye ṭhāne pasādaṃ upadaṃsitā hoti? Idhekacco puggalo suppaṭipadāya sammāpaṭipadāya pasādaṃ janeti – ‘‘suppaṭipadā’’ itipi, ‘‘sammāpaṭipadā’’ itipīti. Evaṃ puggalo anuvicca pariyogāhetvā pasādanīye ṭhāne pasādaṃ upadaṃsitā hoti.

༡༦༦. ཀཐཉྩ པུགྒལོ ཨཝཎྞཱརཧསྶ ཨཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན, ནོ ཙ ཁོ ཝཎྞཱརཧསྶ ཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན? ཨིདྷེཀཙྩོ པུགྒལོ ཝཎྞོཔི སཾཝིཛྫཏི ཨཝཎྞོཔི སཾཝིཛྫཏི ། ཡོ ཏཏྠ ཨཝཎྞོ ཏཾ བྷཎཏི བྷཱུཏཾ ཏཙྪཾ ཀཱལེན, ཡོ ཏཏྠ ཝཎྞོ ཏཾ ན བྷཎཏི བྷཱུཏཾ ཏཙྪཾ ཀཱལེན། ཨེཝཾ པུགྒལོ ཨཝཎྞཱརཧསྶ ཨཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན, ནོ ཙ ཁོ ཝཎྞཱརཧསྶ ཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན།

166. Kathañca puggalo avaṇṇārahassa avaṇṇaṃ bhāsitā hoti bhūtaṃ tacchaṃ kālena, no ca kho vaṇṇārahassa vaṇṇaṃ bhāsitā hoti bhūtaṃ tacchaṃ kālena? Idhekacco puggalo vaṇṇopi saṃvijjati avaṇṇopi saṃvijjati . Yo tattha avaṇṇo taṃ bhaṇati bhūtaṃ tacchaṃ kālena, yo tattha vaṇṇo taṃ na bhaṇati bhūtaṃ tacchaṃ kālena. Evaṃ puggalo avaṇṇārahassa avaṇṇaṃ bhāsitā hoti bhūtaṃ tacchaṃ kālena, no ca kho vaṇṇārahassa vaṇṇaṃ bhāsitā hoti bhūtaṃ tacchaṃ kālena.

ཀཐཉྩ པུགྒལོ ཝཎྞཱརཧསྶ ཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན, ནོ ཙ ཁོ ཨཝཎྞཱརཧསྶ ཨཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན? ཨིདྷེཀཙྩོ པུགྒལོ ཝཎྞོཔི སཾཝིཛྫཏི ཨཝཎྞོཔི སཾཝིཛྫཏི ། ཡོ ཏཏྠ ཝཎྞོ ཏཾ བྷཎཏི བྷཱུཏཾ ཏཙྪཾ ཀཱལེན, ཡོ ཏཏྠ ཨཝཎྞོ ཏཾ ན བྷཎཏི བྷཱུཏཾ ཏཙྪཾ ཀཱལེན། ཨེཝཾ པུགྒལོ ཝཎྞཱརཧསྶ ཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན, ནོ ཙ ཁོ ཨཝཎྞཱརཧསྶ ཨཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན།

Kathañca puggalo vaṇṇārahassa vaṇṇaṃ bhāsitā hoti bhūtaṃ tacchaṃ kālena, no ca kho avaṇṇārahassa avaṇṇaṃ bhāsitā hoti bhūtaṃ tacchaṃ kālena? Idhekacco puggalo vaṇṇopi saṃvijjati avaṇṇopi saṃvijjati . Yo tattha vaṇṇo taṃ bhaṇati bhūtaṃ tacchaṃ kālena, yo tattha avaṇṇo taṃ na bhaṇati bhūtaṃ tacchaṃ kālena. Evaṃ puggalo vaṇṇārahassa vaṇṇaṃ bhāsitā hoti bhūtaṃ tacchaṃ kālena, no ca kho avaṇṇārahassa avaṇṇaṃ bhāsitā hoti bhūtaṃ tacchaṃ kālena.

ཀཐཉྩ པུགྒལོ ཨཝཎྞཱརཧསྶ ཙ ཨཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན, ཝཎྞཱརཧསྶ ཙ ཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན? ཨིདྷེཀཙྩོ པུགྒལོ ཝཎྞོཔི སཾཝིཛྫཏི ཨཝཎྞོཔི སཾཝིཛྫཏི། ཡོ ཏཏྠ ཨཝཎྞོ ཏཾ བྷཎཏི བྷཱུཏཾ ཏཙྪཾ ཀཱལེན, ཡོཔི ཏཏྠ ཝཎྞོ ཏམྤི བྷཎཏི བྷཱུཏཾ ཏཙྪཾ ཀཱལེན། ཏཏྲ ཀཱལཉྙཱུ ཧོཏི ཏསྶ པཉྷསྶ ཝེཡྻཱཀརཎཱཡ། ཨེཝཾ པུགྒལོ ཨཝཎྞཱརཧསྶ ཙ ཨཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན, ཝཎྞཱརཧསྶ ཙ ཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན།

Kathañca puggalo avaṇṇārahassa ca avaṇṇaṃ bhāsitā hoti bhūtaṃ tacchaṃ kālena, vaṇṇārahassa ca vaṇṇaṃ bhāsitā hoti bhūtaṃ tacchaṃ kālena? Idhekacco puggalo vaṇṇopi saṃvijjati avaṇṇopi saṃvijjati. Yo tattha avaṇṇo taṃ bhaṇati bhūtaṃ tacchaṃ kālena, yopi tattha vaṇṇo tampi bhaṇati bhūtaṃ tacchaṃ kālena. Tatra kālaññū hoti tassa pañhassa veyyākaraṇāya. Evaṃ puggalo avaṇṇārahassa ca avaṇṇaṃ bhāsitā hoti bhūtaṃ tacchaṃ kālena, vaṇṇārahassa ca vaṇṇaṃ bhāsitā hoti bhūtaṃ tacchaṃ kālena.

ཀཐཉྩ པུགྒལོ ནེཝ ཨཝཎྞཱརཧསྶ ཨཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན, ནོཔི ཝཎྞཱརཧསྶ ཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན? ཨིདྷེཀཙྩོ པུགྒལོ ཝཎྞོཔི སཾཝིཛྫཏི ཨཝཎྞོཔི སཾཝིཛྫཏི། ཡོ ཏཏྠ ཨཝཎྞོ ཏཾ ན བྷཎཏི བྷཱུཏཾ ཏཙྪཾ ཀཱལེན, ཡོཔི ཏཏྠ ཝཎྞོ ཏམྤི ན བྷཎཏི བྷཱུཏཾ ཏཙྪཾ ཀཱལེན། ཨུཔེཀྑཀོ ཝིཧརཏི སཏོ སམྤཛཱནོ། ཨེཝཾ པུགྒལོ ནེཝ ཨཝཎྞཱརཧསྶ ཨཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན, ནོཔི ཝཎྞཱརཧསྶ ཝཎྞཾ བྷཱསིཏཱ ཧོཏི བྷཱུཏཾ ཏཙྪཾ ཀཱལེན།

Kathañca puggalo neva avaṇṇārahassa avaṇṇaṃ bhāsitā hoti bhūtaṃ tacchaṃ kālena, nopi vaṇṇārahassa vaṇṇaṃ bhāsitā hoti bhūtaṃ tacchaṃ kālena? Idhekacco puggalo vaṇṇopi saṃvijjati avaṇṇopi saṃvijjati. Yo tattha avaṇṇo taṃ na bhaṇati bhūtaṃ tacchaṃ kālena, yopi tattha vaṇṇo tampi na bhaṇati bhūtaṃ tacchaṃ kālena. Upekkhako viharati sato sampajāno. Evaṃ puggalo neva avaṇṇārahassa avaṇṇaṃ bhāsitā hoti bhūtaṃ tacchaṃ kālena, nopi vaṇṇārahassa vaṇṇaṃ bhāsitā hoti bhūtaṃ tacchaṃ kālena.

༡༦༧. ཀཏམོ ཙ པུགྒལོ ཨུཊྛཱནཕལཱུཔཛཱིཝཱི ནོ པུཉྙཕལཱུཔཛཱིཝཱི? ཡསྶ པུགྒལསྶ ཨུཊྛཧཏོ གྷཊཏོ ཝཱཡམཏོ ཨཱཛཱིཝོ ཨབྷིནིབྦཏྟཏི, ནོ པུཉྙཏོ – ཨཡཾ ཝུཙྩཏི པུགྒལོ ‘‘ཨུཊྛཱནཕལཱུཔཛཱིཝཱི, ནོ པུཉྙཕལཱུཔཛཱིཝཱི’’།

167. Katamo ca puggalo uṭṭhānaphalūpajīvī no puññaphalūpajīvī? Yassa puggalassa uṭṭhahato ghaṭato vāyamato ājīvo abhinibbattati, no puññato – ayaṃ vuccati puggalo ‘‘uṭṭhānaphalūpajīvī, no puññaphalūpajīvī’’.

ཀཏམོ ཙ པུགྒལོ པུཉྙཕལཱུཔཛཱིཝཱི ནོ ཨུཊྛཱནཕལཱུཔཛཱིཝཱི? པརནིམྨིཏཝསཝཏྟཱི དེཝེ ²⁵ ཨུཔཱདཱཡ ཏཏཱུཔརི དེཝཱ པུཉྙཕལཱུཔཛཱིཝིནོ ན ཨུཊྛཱནཕལཱུཔཛཱིཝིནོ།

Katamo ca puggalo puññaphalūpajīvī no uṭṭhānaphalūpajīvī? Paranimmitavasavattī deve ²⁶ upādāya tatūpari devā puññaphalūpajīvino na uṭṭhānaphalūpajīvino.

ཀཏམོ ཙ པུགྒལོ ཨུཊྛཱནཕལཱུཔཛཱིཝཱི ཙ པུཉྙཕལཱུཔཛཱིཝཱི ཙ? ཡསྶ པུགྒལསྶ ཨུཊྛཧཏོ གྷཊཏོ ཝཱཡམཏོ ཨཱཛཱིཝོ ཨབྷིནིབྦཏྟཏི པུཉྙཏོ ཙ – ཨཡཾ ཝུཙྩཏི པུགྒལོ ‘‘ཨུཊྛཱནཕལཱུཔཛཱིཝཱི ཙ པུཉྙཕལཱུཔཛཱིཝཱི ཙ’’།

Katamo ca puggalo uṭṭhānaphalūpajīvī ca puññaphalūpajīvī ca? Yassa puggalassa uṭṭhahato ghaṭato vāyamato ājīvo abhinibbattati puññato ca – ayaṃ vuccati puggalo ‘‘uṭṭhānaphalūpajīvī ca puññaphalūpajīvī ca’’.

ཀཏམོ ཙ པུགྒལོ ནེཝ ཨུཊྛཱནཕལཱུཔཛཱིཝཱི ནོ པུཉྙཕལཱུཔཛཱིཝཱི? ནེརཡིཀཱ ནེཝ ཨུཊྛཱནཕལཱུཔཛཱིཝིནོ ནོ པུཉྙཕལཱུཔཛཱིཝིནོ།

Katamo ca puggalo neva uṭṭhānaphalūpajīvī no puññaphalūpajīvī? Nerayikā neva uṭṭhānaphalūpajīvino no puññaphalūpajīvino.

༡༦༨. ཀཐཉྩ པུགྒལོ ཏམོ ཧོཏི ཏམཔརཱཡནོ? ཨིདྷེཀཙྩོ པུགྒལོ ནཱིཙེ ཀུལེ པཙྩཱཛཱཏོ ཧོཏི – ཙཎྜཱལཀུལེ ཝཱ ནེསཱདཀུལེ ཝཱ ཝེནཀུལེ ²⁷ ཝཱ རཐཀཱརཀུལེ ཝཱ པུཀྐུསཀུལེ ཝཱ དལིདྡེ ²⁸ ཨཔྤནྣཔཱནབྷོཛནེ ཀསིརཝུཏྟིཀེ, ཡཏྠ ཀསིརེན གྷཱསཙྪཱདོ ལབྦྷཏི། སོ ཙ ཧོཏི དུབྦཎྞོ དུདྡསིཀོ ཨོཀོཊིམཀོ བཧྭཱབཱདྷོ ཀཱཎོ ཝཱ ཀུཎཱི ཝཱ ཁཉྫོ ཝཱ པཀྑཧཏོ ཝཱ, ན ལཱབྷཱི ཨནྣསྶ པཱནསྶ ཝཏྠསྶ ཡཱནསྶ མཱལཱགནྡྷཝིལེཔནསྶ སེཡྻཱཝསཐཔདཱིཔེཡྻསྶ། སོ ཀཱཡེན དུཙྩརིཏཾ ཙརཏི, ཝཱཙཱཡ དུཙྩརིཏཾ ཙརཏི, མནསཱ དུཙྩརིཏཾ ཙརཏི། སོ ཀཱཡེན དུཙྩརིཏཾ ཙརིཏྭཱ ཝཱཙཱཡ དུཙྩརིཏཾ ཙརིཏྭཱ མནསཱ དུཙྩརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏི། ཨེཝཾ པུགྒལོ ཏམོ ཧོཏི ཏམཔརཱཡནོ།

168. Kathañca puggalo tamo hoti tamaparāyano? Idhekacco puggalo nīce kule paccājāto hoti – caṇḍālakule vā nesādakule vā venakule ²⁹ vā rathakārakule vā pukkusakule vā dalidde ³⁰ appannapānabhojane kasiravuttike, yattha kasirena ghāsacchādo labbhati. So ca hoti dubbaṇṇo duddasiko okoṭimako bahvābādho kāṇo vā kuṇī vā khañjo vā pakkhahato vā, na lābhī annassa pānassa vatthassa yānassa mālāgandhavilepanassa seyyāvasathapadīpeyyassa. So kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Evaṃ puggalo tamo hoti tamaparāyano.

ཀཐཉྩ པུགྒལོ ཏམོ ཧོཏི ཛོཏིཔརཱཡནོ? ཨིདྷེཀཙྩོ པུགྒལོ ནཱིཙེ ཀུལེ པཙྩཱཛཱཏོ ཧོཏི – ཙཎྜཱལཀུལེ ཝཱ ནེསཱདཀུལེ ཝཱ ཝེནཀུལེ ཝཱ རཐཀཱརཀུལེ ཝཱ པུཀྐུསཀུལེ ཝཱ དལིདྡེ ཨཔྤནྣཔཱནབྷོཛནེ ཀསིརཝུཏྟིཀེ, ཡཏྠ ཀསིརེན གྷཱསཙྪཱདོ ལབྦྷཏི། སོ ཙ ཧོཏི དུབྦཎྞོ དུདྡསིཀོ ཨོཀོཊིམཀོ བཧྭཱབཱདྷོ ཀཱཎོ ཝཱ ཀུཎཱི ཝཱ ཁཉྫོ ཝཱ པཀྑཧཏོ ཝཱ, ན ལཱབྷཱི ཨནྣསྶ པཱནསྶ ཝཏྠསྶ ཡཱནསྶ མཱལཱགནྡྷཝིལེཔནསྶ སེཡྻཱཝསཐཔདཱིཔེཡྻསྶ། སོ ཀཱཡེན སུཙརིཏཾ ཙརཏི, ཝཱཙཱཡ སུཙརིཏཾ ཙརཏི , མནསཱ སུཙརིཏཾ ཙརཏི། སོ ཀཱཡེན སུཙརིཏཾ ཙརིཏྭཱ ཝཱཙཱཡ སུཙརིཏཾ ཙརིཏྭཱ མནསཱ སུཙརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི། ཨེཝཾ པུགྒལོ ཏམོ ཧོཏི ཛོཏིཔརཱཡནོ།

Kathañca puggalo tamo hoti jotiparāyano? Idhekacco puggalo nīce kule paccājāto hoti – caṇḍālakule vā nesādakule vā venakule vā rathakārakule vā pukkusakule vā dalidde appannapānabhojane kasiravuttike, yattha kasirena ghāsacchādo labbhati. So ca hoti dubbaṇṇo duddasiko okoṭimako bahvābādho kāṇo vā kuṇī vā khañjo vā pakkhahato vā, na lābhī annassa pānassa vatthassa yānassa mālāgandhavilepanassa seyyāvasathapadīpeyyassa. So kāyena sucaritaṃ carati, vācāya sucaritaṃ carati , manasā sucaritaṃ carati. So kāyena sucaritaṃ caritvā vācāya sucaritaṃ caritvā manasā sucaritaṃ caritvā kāyassa bhedā paraṃ maraṇā sugatiṃ saggaṃ lokaṃ upapajjati. Evaṃ puggalo tamo hoti jotiparāyano.

ཀཐཉྩ པུགྒལོ ཛོཏི ཧོཏི ཏམཔརཱཡནོ? ཨིདྷེཀཙྩོ པུགྒལོ ཨུཙྩེ ཀུལེ པཙྩཱཛཱཏོ ཧོཏི – ཁཏྟིཡམཧཱསཱལཀུལེ ཝཱ བྲཱཧྨཎམཧཱསཱལཀུལེ ཝཱ གཧཔཏིམཧཱསཱལཀུལེ ཝཱ ཨཌྜྷེ མཧདྡྷནེ མཧཱབྷོགེ པཧཱུཏཛཱཏརཱུཔརཛཏེ པཧཱུཏཝིཏྟཱུཔཀརཎེ པཧཱུཏདྷནདྷཉྙེ། སོ ཙ ཧོཏི ཨབྷིརཱུཔོ དསྶནཱིཡོ པཱསཱདིཀོ པརམཱཡ ཝཎྞཔོཀྑརཏཱཡ སམནྣཱགཏོ, ལཱབྷཱི ཨནྣསྶ པཱནསྶ ཝཏྠསྶ ཡཱནསྶ མཱལཱགནྡྷཝིལེཔནསྶ སེཡྻཱཝསཐཔདཱིཔེཡྻསྶ། སོ ཀཱཡེན དུཙྩརིཏཾ ཙརཏི, ཝཱཙཱཡ དུཙྩརིཏཾ ཙརཏི, མནསཱ དུཙྩརིཏཾ ཙརཏི། སོ ཀཱཡེན དུཙྩརིཏཾ ཙརིཏྭཱ ཝཱཙཱཡ དུཙྩརིཏཾ ཙརིཏྭཱ མནསཱ དུཙྩརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏི། ཨེཝཾ པུགྒལོ ཛོཏི ཧོཏི ཏམཔརཱཡནོ།

Kathañca puggalo joti hoti tamaparāyano? Idhekacco puggalo ucce kule paccājāto hoti – khattiyamahāsālakule vā brāhmaṇamahāsālakule vā gahapatimahāsālakule vā aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe. So ca hoti abhirūpo dassanīyo pāsādiko paramāya vaṇṇapokkharatāya samannāgato, lābhī annassa pānassa vatthassa yānassa mālāgandhavilepanassa seyyāvasathapadīpeyyassa. So kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Evaṃ puggalo joti hoti tamaparāyano.

ཀཐཉྩ པུགྒལོ ཛོཏི ཧོཏི ཛོཏིཔརཱཡནོ? ཨིདྷེཀཙྩོ པུགྒལོ ཨུཙྩེ ཀུལེ པཙྩཱཛཱཏོ ཧོཏི – ཁཏྟིཡམཧཱསཱལཀུལེ ཝཱ བྲཱཧྨཎམཧཱསཱལཀུལེ ཝཱ གཧཔཏིམཧཱསཱལཀུལེ ཝཱ ཨཌྜྷེ མཧདྡྷནེ མཧཱབྷོགེ པཧཱུཏཛཱཏརཱུཔརཛཏེ པཧཱུཏཝིཏྟཱུཔཀརཎེ པཧཱུཏདྷནདྷཉྙེ། སོ ཙ ཧོཏི ཨབྷིརཱུཔོ དསྶནཱིཡོ པཱསཱདིཀོ པརམཱཡ ཝཎྞཔོཀྑརཏཱཡ སམནྣཱགཏོ, ལཱབྷཱི ཨནྣསྶ པཱནསྶ ཝཏྠསྶ ཡཱནསྶ མཱལཱགནྡྷཝིལེཔནསྶ སེཡྻཱཝསཐཔདཱིཔེཡྻསྶ། སོ ཀཱཡེན སུཙརིཏཾ ཙརཏི, ཝཱཙཱཡ སུཙརིཏཾ ཙརཏི, མནསཱ སུཙརིཏཾ ཙརཏི། སོ ཀཱཡེན སུཙརིཏཾ ཙརིཏྭཱ ཝཱཙཱཡ སུཙརིཏཾ ཙརིཏྭཱ མནསཱ སུཙརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི། ཨེཝཾ པུགྒལོ ཛོཏི ཧོཏི ཛོཏིཔརཱཡནོ།

Kathañca puggalo joti hoti jotiparāyano? Idhekacco puggalo ucce kule paccājāto hoti – khattiyamahāsālakule vā brāhmaṇamahāsālakule vā gahapatimahāsālakule vā aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe. So ca hoti abhirūpo dassanīyo pāsādiko paramāya vaṇṇapokkharatāya samannāgato, lābhī annassa pānassa vatthassa yānassa mālāgandhavilepanassa seyyāvasathapadīpeyyassa. So kāyena sucaritaṃ carati, vācāya sucaritaṃ carati, manasā sucaritaṃ carati. So kāyena sucaritaṃ caritvā vācāya sucaritaṃ caritvā manasā sucaritaṃ caritvā kāyassa bhedā paraṃ maraṇā sugatiṃ saggaṃ lokaṃ upapajjati. Evaṃ puggalo joti hoti jotiparāyano.

༡༦༩. ཀཐཉྩ པུགྒལོ ཨོཎཏོཎཏོ ཧོཏི…པེ॰… ཨེཝཾ པུགྒལོ ཨོཎཏོཎཏོ ཧོཏི།

169. Kathañca puggalo oṇatoṇato hoti…pe… evaṃ puggalo oṇatoṇato hoti.

ཀཐཉྩ པུགྒལོ ཨོཎཏུཎྞཏོ ཧོཏི…པེ॰… ཨེཝཾ པུགྒལོ ཨོཎཏུཎྞཏོ ཧོཏི།

Kathañca puggalo oṇatuṇṇato hoti…pe… evaṃ puggalo oṇatuṇṇato hoti.

ཀཐཉྩ པུགྒལོ ཨུཎྞཏོཎཏོ ཧོཏི…པེ॰… ཨེཝཾ པུགྒལོ ཨུཎྞཏོཎཏོ ཧོཏི།

Kathañca puggalo uṇṇatoṇato hoti…pe… evaṃ puggalo uṇṇatoṇato hoti.

ཀཐཉྩ པུགྒལོ ཨུཎྞཏུཎྞཏོ ཧོཏི…པེ॰… ཨེཝཾ པུགྒལོ ཨུཎྞཏུཎྞཏོ ཧོཏི།

Kathañca puggalo uṇṇatuṇṇato hoti…pe… evaṃ puggalo uṇṇatuṇṇato hoti.

༡༧༠. ཏཏྠ ཀཏམེ ཙཏྟཱརོ རུཀྑཱུཔམཱ པུགྒལཱ? ཙཏྟཱརོ རུཀྑཱ – ཕེགྒུ སཱརཔརིཝཱརོ, སཱརོ ཕེགྒུཔརིཝཱརོ, ཕེགྒུ ཕེགྒུཔརིཝཱརོ, སཱརོ སཱརཔརིཝཱརོ། ཨེཝམེཝཾ ཙཏྟཱརོམེ རུཀྑཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? ཕེགྒུ སཱརཔརིཝཱརོ, སཱརོ ཕེགྒུཔརིཝཱརོ, ཕེགྒུ ཕེགྒུཔརིཝཱརོ, སཱརོ སཱརཔརིཝཱརོ།

170. Tattha katame cattāro rukkhūpamā puggalā? Cattāro rukkhā – pheggu sāraparivāro, sāro phegguparivāro, pheggu phegguparivāro, sāro sāraparivāro. Evamevaṃ cattārome rukkhūpamā puggalā santo saṃvijjamānā lokasmiṃ. Katame cattāro? Pheggu sāraparivāro, sāro phegguparivāro, pheggu phegguparivāro, sāro sāraparivāro.

ཀཐཉྩ པུགྒལོ ཕེགྒུ ཧོཏི སཱརཔརིཝཱརོ? ཨིདྷེཀཙྩོ པུགྒལོ དུསྶཱིལོ ཧོཏི པཱཔདྷམྨོ, པརིསཱ ཙ ཁྭསྶ ཧོཏི སཱིལཝཏཱི ཀལྱཱཎདྷམྨཱ། ཨེཝཾ པུགྒལོ ཕེགྒུ ཧོཏི སཱརཔརིཝཱརོ། སེཡྻཐཱཔི སོ རུཀྑོ ཕེགྒུ སཱརཔརིཝཱརོ, ཏཐཱུཔམོ ཨཡཾ པུགྒལོ།

Kathañca puggalo pheggu hoti sāraparivāro? Idhekacco puggalo dussīlo hoti pāpadhammo, parisā ca khvassa hoti sīlavatī kalyāṇadhammā. Evaṃ puggalo pheggu hoti sāraparivāro. Seyyathāpi so rukkho pheggu sāraparivāro, tathūpamo ayaṃ puggalo.

ཀཐཉྩ པུགྒལོ སཱརོ ཧོཏི ཕེགྒུཔརིཝཱརོ? ཨིདྷེཀཙྩོ པུགྒལོ སཱིལཝཱ ཧོཏི ཀལྱཱཎདྷམྨོ, པརིསཱ ཙ ཁྭསྶ ཧོཏི དུསྶཱིལཱ པཱཔདྷམྨཱ། ཨེཝཾ པུགྒལོ སཱརོ ཧོཏི ཕེགྒུཔརིཝཱརོ། སེཡྻཐཱཔི སོ རུཀྑོ སཱརོ ཕེགྒུཔརིཝཱརོ, ཏཐཱུཔམོ ཨཡཾ པུགྒལོ།

Kathañca puggalo sāro hoti phegguparivāro? Idhekacco puggalo sīlavā hoti kalyāṇadhammo, parisā ca khvassa hoti dussīlā pāpadhammā. Evaṃ puggalo sāro hoti phegguparivāro. Seyyathāpi so rukkho sāro phegguparivāro, tathūpamo ayaṃ puggalo.

ཀཐཉྩ པུགྒལོ ཕེགྒུ ཧོཏི ཕེགྒུཔརིཝཱརོ? ཨིདྷེཀཙྩོ པུགྒལོ དུསྶཱིལོ ཧོཏི པཱཔདྷམྨོ, པརིསཱཔིསྶ ཧོཏི དུསྶཱིལཱ པཱཔདྷམྨཱ། ཨེཝཾ པུགྒལོ ཕེགྒུ ཧོཏི ཕེགྒུཔརིཝཱརོ། སེཡྻཐཱཔི སོ རུཀྑོ ཕེགྒུ ཕེགྒུཔརིཝཱརོ, ཏཐཱུཔམོ ཨཡཾ པུགྒལོ།

Kathañca puggalo pheggu hoti phegguparivāro? Idhekacco puggalo dussīlo hoti pāpadhammo, parisāpissa hoti dussīlā pāpadhammā. Evaṃ puggalo pheggu hoti phegguparivāro. Seyyathāpi so rukkho pheggu phegguparivāro, tathūpamo ayaṃ puggalo.

ཀཐཉྩ པུགྒལོ སཱརོ ཧོཏི སཱརཔརིཝཱརོ? ཨིདྷེཀཙྩོ པུགྒལོ སཱིལཝཱ ཧོཏི ཀལྱཱཎདྷམྨོ, པརིསཱཔིསྶ ཧོཏི སཱིལཝཏཱི ཀལྱཱཎདྷམྨཱ། ཨེཝཾ པུགྒལོ སཱརོ ཧོཏི སཱརཔརིཝཱརོ། སེཡྻཐཱཔི སོ རུཀྑོ སཱརོ སཱརཔརིཝཱརོ, ཏཐཱུཔམོ ཨཡཾ པུགྒལོ། ཨིམེ ཙཏྟཱརོ རུཀྑཱུཔམཱ པུགྒལཱ སནྟོ སཾཝིཛྫམཱནཱ ལོཀསྨིཾ།

Kathañca puggalo sāro hoti sāraparivāro? Idhekacco puggalo sīlavā hoti kalyāṇadhammo, parisāpissa hoti sīlavatī kalyāṇadhammā. Evaṃ puggalo sāro hoti sāraparivāro. Seyyathāpi so rukkho sāro sāraparivāro, tathūpamo ayaṃ puggalo. Ime cattāro rukkhūpamā puggalā santo saṃvijjamānā lokasmiṃ.

༡༧༡. ཀཏམོ ཙ པུགྒལོ རཱུཔཔྤམཱཎོ རཱུཔཔྤསནྣོ? ཨིདྷེཀཙྩོ པུགྒལོ ཨཱརོཧཾ ཝཱ པསྶིཏྭཱ པརིཎཱཧཾ ཝཱ པསྶིཏྭཱ སཎྛཱནཾ ཝཱ པསྶིཏྭཱ པཱརིཔཱུརིཾ ཝཱ པསྶིཏྭཱ ཏཏྠ པམཱཎཾ གཧེཏྭཱ པསཱདཾ ཛནེཏི། ཨཡཾ ཝུཙྩཏི པུགྒལོ རཱུཔཔྤམཱཎོ རཱུཔཔྤསནྣོ།

171. Katamo ca puggalo rūpappamāṇo rūpappasanno? Idhekacco puggalo ārohaṃ vā passitvā pariṇāhaṃ vā passitvā saṇṭhānaṃ vā passitvā pāripūriṃ vā passitvā tattha pamāṇaṃ gahetvā pasādaṃ janeti. Ayaṃ vuccati puggalo rūpappamāṇo rūpappasanno.

ཀཏམོ ཙ པུགྒལོ གྷོསཔྤམཱཎོ གྷོསཔྤསནྣོ? ཨིདྷེཀཙྩོ པུགྒལོ པརཝཎྞནཱཡ པརཐོམནཱཡ པརཔསཾསནཱཡ པརཝཎྞཧཱརིཀཱཡ ³¹ ཏཏྠ པམཱཎཾ གཧེཏྭཱ པསཱདཾ ཛནེཏི། ཨཡཾ ཝུཙྩཏི པུགྒལོ གྷོསཔྤམཱཎོ གྷོསཔྤསནྣོ།

Katamo ca puggalo ghosappamāṇo ghosappasanno? Idhekacco puggalo paravaṇṇanāya parathomanāya parapasaṃsanāya paravaṇṇahārikāya ³² tattha pamāṇaṃ gahetvā pasādaṃ janeti. Ayaṃ vuccati puggalo ghosappamāṇo ghosappasanno.

༡༧༢. ཀཏམོ ཙ པུགྒལོ ལཱུཁཔྤམཱཎོ ལཱུཁཔྤསནྣོ? ཨིདྷེཀཙྩོ པུགྒལོ ཙཱིཝརལཱུཁཾ ཝཱ པསྶིཏྭཱ པཏྟལཱུཁཾ ཝཱ པསྶིཏྭཱ སེནཱསནལཱུཁཾ ཝཱ པསྶིཏྭཱ ཝིཝིདྷཾ ཝཱ དུཀྐརཀཱརིཀཾ པསྶིཏྭཱ ཏཏྠ པམཱཎཾ གཧེཏྭཱ པསཱདཾ ཛནེཏི། ཨཡཾ ཝུཙྩཏི པུགྒལོ ལཱུཁཔྤམཱཎོ ལཱུཁཔྤསནྣོ།

172. Katamo ca puggalo lūkhappamāṇo lūkhappasanno? Idhekacco puggalo cīvaralūkhaṃ vā passitvā pattalūkhaṃ vā passitvā senāsanalūkhaṃ vā passitvā vividhaṃ vā dukkarakārikaṃ passitvā tattha pamāṇaṃ gahetvā pasādaṃ janeti. Ayaṃ vuccati puggalo lūkhappamāṇo lūkhappasanno.

ཀཏམོ ཙ པུགྒལོ དྷམྨཔྤམཱཎོ དྷམྨཔྤསནྣོ? ཨིདྷེཀཙྩོ པུགྒལོ སཱིལཾ ཝཱ པསྶིཏྭཱ སམཱདྷིཾ ཝཱ པསྶིཏྭཱ པཉྙཾ ཝཱ པསྶིཏྭཱ ཏཏྠ པམཱཎཾ གཧེཏྭཱ པསཱདཾ ཛནེཏི། ཨཡཾ ཝུཙྩཏི པུགྒལོ དྷམྨཔྤམཱཎོ དྷམྨཔྤསནྣོ།

Katamo ca puggalo dhammappamāṇo dhammappasanno? Idhekacco puggalo sīlaṃ vā passitvā samādhiṃ vā passitvā paññaṃ vā passitvā tattha pamāṇaṃ gahetvā pasādaṃ janeti. Ayaṃ vuccati puggalo dhammappamāṇo dhammappasanno.

༡༧༣. ཀཐཉྩ པུགྒལོ ཨཏྟཧིཏཱཡ པཊིཔནྣོ ཧོཏི ནོ པརཧིཏཱཡ? ཨིདྷེཀཙྩོ པུགྒལོ ཨཏྟནཱ སཱིལསམྤནྣོ ཧོཏི, ནོ པརཾ སཱིལསམྤདཱཡ སམཱདཔེཏི; ཨཏྟནཱ སམཱདྷིསམྤནྣོ ཧོཏི, ནོ པརཾ སམཱདྷིསམྤདཱཡ སམཱདཔེཏི; ཨཏྟནཱ པཉྙཱསམྤནྣོ ཧོཏི, ནོ པརཾ པཉྙཱསམྤདཱཡ སམཱདཔེཏི; ཨཏྟནཱ ཝིམུཏྟིསམྤནྣོ ཧོཏི, ནོ པརཾ ཝིམུཏྟིསམྤདཱཡ སམཱདཔེཏི; ཨཏྟནཱ ཝིམུཏྟིཉཱཎདསྶནསམྤནྣོ ཧོཏི, ནོ པརཾ ཝིམུཏྟིཉཱཎདསྶནསམྤདཱཡ སམཱདཔེཏི། ཨེཝཾ པུགྒལོ ཨཏྟཧིཏཱཡ པཊིཔནྣོ ཧོཏི ནོ པརཧིཏཱཡ།

173. Kathañca puggalo attahitāya paṭipanno hoti no parahitāya? Idhekacco puggalo attanā sīlasampanno hoti, no paraṃ sīlasampadāya samādapeti; attanā samādhisampanno hoti, no paraṃ samādhisampadāya samādapeti; attanā paññāsampanno hoti, no paraṃ paññāsampadāya samādapeti; attanā vimuttisampanno hoti, no paraṃ vimuttisampadāya samādapeti; attanā vimuttiñāṇadassanasampanno hoti, no paraṃ vimuttiñāṇadassanasampadāya samādapeti. Evaṃ puggalo attahitāya paṭipanno hoti no parahitāya.

ཀཐཉྩ པུགྒལོ པརཧིཏཱཡ པཊིཔནྣོ ཧོཏི ནོ ཨཏྟཧིཏཱཡ? ཨིདྷེཀཙྩོ པུགྒལོ ཨཏྟནཱ ན སཱིལསམྤནྣོ ཧོཏི, པརཾ སཱིལསམྤདཱཡ སམཱདཔེཏི; ཨཏྟནཱ ན སམཱདྷིསམྤནྣོ ཧོཏི, པརཾ སམཱདྷིསམྤདཱཡ སམཱདཔེཏི; ཨཏྟནཱ ན པཉྙཱསམྤནྣོ ཧོཏི, པརཾ པཉྙཱསམྤདཱཡ སམཱདཔེཏི; ཨཏྟནཱ ན ཝིམུཏྟིསམྤནྣོ ཧོཏི, པརཾ ཝིམུཏྟིསམྤདཱཡ སམཱདཔེཏི; ཨཏྟནཱ ན ཝིམུཏྟིཉཱཎདསྶནསམྤནྣོ ཧོཏི, པརཾ ཝིམུཏྟིཉཱཎདསྶནསམྤདཱཡ སམཱདཔེཏི། ཨེཝཾ པུགྒལོ པརཧིཏཱཡ པཊིཔནྣོ ཧོཏི ནོ ཨཏྟཧིཏཱཡ།

Kathañca puggalo parahitāya paṭipanno hoti no attahitāya? Idhekacco puggalo attanā na sīlasampanno hoti, paraṃ sīlasampadāya samādapeti; attanā na samādhisampanno hoti, paraṃ samādhisampadāya samādapeti; attanā na paññāsampanno hoti, paraṃ paññāsampadāya samādapeti; attanā na vimuttisampanno hoti, paraṃ vimuttisampadāya samādapeti; attanā na vimuttiñāṇadassanasampanno hoti, paraṃ vimuttiñāṇadassanasampadāya samādapeti. Evaṃ puggalo parahitāya paṭipanno hoti no attahitāya.

ཀཐཉྩ པུགྒལོ ཨཏྟཧིཏཱཡ ཙེཝ པཊིཔནྣོ ཧོཏི པརཧིཏཱཡ ཙ? ཨིདྷེཀཙྩོ པུགྒལོ ཨཏྟནཱ ཙ སཱིལསམྤནྣོ ཧོཏི, པརཉྩ སཱིལསམྤདཱཡ སམཱདཔེཏི; ཨཏྟནཱ ཙ སམཱདྷིསམྤནྣོ ཧོཏི, པརཉྩ སམཱདྷིསམྤདཱཡ སམཱདཔེཏི; ཨཏྟནཱ ཙ པཉྙཱསམྤནྣོ ཧོཏི, པརཉྩ པཉྙཱསམྤདཱཡ སམཱདཔེཏི; ཨཏྟནཱ ཙ ཝིམུཏྟིསམྤནྣོ ཧོཏི, པརཉྩ ཝིམུཏྟིསམྤདཱཡ སམཱདཔེཏི; ཨཏྟནཱ ཙ ཝིམུཏྟིཉཱཎདསྶནསམྤནྣོ ཧོཏི, པརཉྩ ཝིམུཏྟིཉཱཎདསྶནསམྤདཱཡ སམཱདཔེཏི། ཨེཝཾ པུགྒལོ ཨཏྟཧིཏཱཡ ཙེཝ པཊིཔནྣོ ཧོཏི པརཧིཏཱཡ ཙ།

Kathañca puggalo attahitāya ceva paṭipanno hoti parahitāya ca? Idhekacco puggalo attanā ca sīlasampanno hoti, parañca sīlasampadāya samādapeti; attanā ca samādhisampanno hoti, parañca samādhisampadāya samādapeti; attanā ca paññāsampanno hoti, parañca paññāsampadāya samādapeti; attanā ca vimuttisampanno hoti, parañca vimuttisampadāya samādapeti; attanā ca vimuttiñāṇadassanasampanno hoti, parañca vimuttiñāṇadassanasampadāya samādapeti. Evaṃ puggalo attahitāya ceva paṭipanno hoti parahitāya ca.

ཀཐཉྩ པུགྒལོ ནེཝ ཨཏྟཧིཏཱཡ པཊིཔནྣོ ཧོཏི ནོ པརཧིཏཱཡ? ཨིདྷེཀཙྩོ པུགྒལོ ཨཏྟནཱ ན སཱིལསམྤནྣོ ཧོཏི, ནོ པརཾ སཱིལསམྤདཱཡ སམཱདཔེཏི; ཨཏྟནཱ ན སམཱདྷིསམྤནྣོ ཧོཏི, ནོ པརཾ སམཱདྷིསམྤདཱཡ སམཱདཔེཏི; ཨཏྟནཱ ན པཉྙཱསམྤནྣོ ཧོཏི, ནོ པརཾ པཉྙཱསམྤདཱཡ སམཱདཔེཏི; ཨཏྟནཱ ན ཝིམུཏྟིསམྤནྣོ ཧོཏི, ནོ པརཾ ཝིམུཏྟིསམྤདཱཡ སམཱདཔེཏི; ཨཏྟནཱ ན ཝིམུཏྟིཉཱཎདསྶནསམྤནྣོ ཧོཏི, ནོ པརཾ ཝིམུཏྟིཉཱཎདསྶནསམྤདཱཡ སམཱདཔེཏི། ཨེཝཾ པུགྒལོ ནེཝ ཨཏྟཧིཏཱཡ པཊིཔནྣོ ཧོཏི ནོ པརཧིཏཱཡ།

Kathañca puggalo neva attahitāya paṭipanno hoti no parahitāya? Idhekacco puggalo attanā na sīlasampanno hoti, no paraṃ sīlasampadāya samādapeti; attanā na samādhisampanno hoti, no paraṃ samādhisampadāya samādapeti; attanā na paññāsampanno hoti, no paraṃ paññāsampadāya samādapeti; attanā na vimuttisampanno hoti, no paraṃ vimuttisampadāya samādapeti; attanā na vimuttiñāṇadassanasampanno hoti, no paraṃ vimuttiñāṇadassanasampadāya samādapeti. Evaṃ puggalo neva attahitāya paṭipanno hoti no parahitāya.

༡༧༤. ཀཐཉྩ པུགྒལོ ཨཏྟནྟཔོ ཧོཏི ཨཏྟཔརིཏཱཔནཱནུཡོགམནུཡུཏྟོ? ཨིདྷེཀཙྩོ པུགྒལོ ཨཙེལཀོ ཧོཏི མུཏྟཱཙཱརོ ཧཏྠཱཔལེཁནོ ³³, ནཨེཧིབྷདྡནྟིཀོ ནཏིཊྛབྷདྡནྟིཀོ ནཱབྷིཧཊཾ ན ཨུདྡིསྶཀཏཾ ན ནིམནྟནཾ སཱདིཡཏི, སོ ན ཀུམྦྷིམུཁཱ པཊིགྒཎྷཱཏི ན ཀལོ༹པིམུཁཱ ³⁴ པཊིགྒཎྷཱཏི, ན ཨེལ༹ཀམནྟརཾ ན དཎྜམནྟརཾ ན མུསལམནྟརཾ ན དྭིནྣཾ བྷུཉྫམཱནཱནཾ ན གབྦྷིནིཡཱ ན པཱཡམཱནཱཡ ན པུརིསནྟརགཏཱཡ, ན སངྐིཏྟཱིསུ ན ཡཏྠ སཱ ཨུཔཊྛིཏོ ཧོཏི ན ཡཏྠ མཀྑིཀཱ སཎྜསཎྜཙཱརིནཱི, ན མཙྪཾ ན མཾསཾ ན སུརཾ ན མེརཡཾ ན ཐུསོདཀཾ པིཝཏི། སོ ཨེཀཱགཱརིཀོ ཝཱ ཧོཏི ཨེཀཱལོཔིཀོ, དྭཱགཱརིཀོ ཝཱ ཧོཏི དྭཱལོཔིཀོ…པེ॰… སཏྟཱགཱརིཀོ ཝཱ ཧོཏི སཏྟཱལོཔིཀོ; ཨེཀིསྶཱཔི དཏྟིཡཱ ཡཱཔེཏི, དྭཱིཧིཔི དཏྟཱིཧི ཡཱཔེཏི…པེ॰… སཏྟཧིཔི དཏྟཱིཧི ཡཱཔེཏི; ཨེཀཱཧིཀམྤི ཨཱཧཱརཾ ཨཱཧཱརེཏི, དྭཱིཧིཀམྤི ³⁵ ཨཱཧཱརཾ ཨཱཧཱརེཏི…པེ॰… སཏྟཱཧིཀམྤི ཨཱཧཱརཾ ཨཱཧཱརེཏི། ཨིཏི ཨེཝརཱུཔཾ ཨཌྜྷམཱསིཀམྤི པརིཡཱཡབྷཏྟབྷོཛནཱནུཡོགམནུཡུཏྟོ ཝིཧརཏི། སོ སཱཀབྷཀྑོ ཝཱ ཧོཏི སཱམཱཀབྷཀྑོ ཝཱ ཧོཏི ནཱིཝཱརབྷཀྑོ ཝཱ ཧོཏི དདྡུལབྷཀྑོ ཝཱ ཧོཏི ཧཊབྷཀྑོ ཝཱ ཧོཏི ཀཎབྷཀྑོ ཝཱ ཧོཏི ཨཱཙཱམབྷཀྑོ ཝཱ ཧོཏི པིཉྙཱཀབྷཀྑོ ཝཱ ཧོཏི ཏིཎབྷཀྑོ ཝཱ ཧོཏི གོམཡབྷཀྑོ ཝཱ ཧོཏི, ཝནམཱུལཕལཱཧཱརོ ཡཱཔེཏི པཝཏྟཕལབྷོཛཱི། སོ སཱཎཱནིཔི དྷཱརེཏི མསཱཎཱནིཔི དྷཱརེཏི ཚཝདུསྶཱནིཔི དྷཱརེཏི པཾསུཀཱུལཱནིཔི དྷཱརེཏི ཏིརཱིཊཱནིཔི དྷཱརེཏི ཨཛིནམྤི དྷཱརེཏི ཨཛིནཀྑིཔམྤི དྷཱརེཏི ཀུསཙཱིརམྤི དྷཱརེཏི ཝཱཀཙཱིརམྤི དྷཱརེཏི ཕལཀཙཱིརམྤི དྷཱརེཏི ཀེསཀམྦལམྤི དྷཱརེཏི ཝཱལ༹ཀམྦལམྤི དྷཱརེཏི ཨུལཱུཀཔཀྑམྤི ³⁶ དྷཱརེཏི, ཀེསམསྶུལོཙཀོཔི ཧོཏི ཀེསམསྶུལོཙནཱནུཡོགམནུཡུཏྟོ, ཨུབྦྷཊྛཀོཔི ཧོཏི ཨཱསནཔཊིཀྑིཏྟོ, ཨུཀྐུཊིཀོཔི ཧོཏི ཨུཀྐུཊིཀཔྤདྷཱནམནུཡུཏྟོ, ཀཎྚཀཱཔསྶཡིཀོཔི ཧོཏི ཀཎྚཀཱཔསྶཡེ སེཡྻཾ ཀཔྤེཏི, སཱཡཏཏིཡཀམྤི ³⁷ ཨུདཀོརོཧནཱནུཡོགམནུཡུཏྟོ ཝིཧརཏི། ཨིཏི ཨེཝརཱུཔཾ ཨནེཀཝིཧིཏཾ ཀཱཡསྶ ཨཱཏཱཔནཔརིཏཱཔནཱནུཡོགམནུཡུཏྟོ ཝིཧརཏི ། ཨེཝཾ པུགྒལོ ཨཏྟནྟཔོ ཧོཏི ཨཏྟཔརིཏཱཔནཱནུཡོགམནུཡུཏྟོ།

174. Kathañca puggalo attantapo hoti attaparitāpanānuyogamanuyutto? Idhekacco puggalo acelako hoti muttācāro hatthāpalekhano ³⁸, naehibhaddantiko natiṭṭhabhaddantiko nābhihaṭaṃ na uddissakataṃ na nimantanaṃ sādiyati, so na kumbhimukhā paṭiggaṇhāti na kaḷopimukhā ³⁹ paṭiggaṇhāti, na eḷakamantaraṃ na daṇḍamantaraṃ na musalamantaraṃ na dvinnaṃ bhuñjamānānaṃ na gabbhiniyā na pāyamānāya na purisantaragatāya, na saṅkittīsu na yattha sā upaṭṭhito hoti na yattha makkhikā saṇḍasaṇḍacārinī, na macchaṃ na maṃsaṃ na suraṃ na merayaṃ na thusodakaṃ pivati. So ekāgāriko vā hoti ekālopiko, dvāgāriko vā hoti dvālopiko…pe… sattāgāriko vā hoti sattālopiko; ekissāpi dattiyā yāpeti, dvīhipi dattīhi yāpeti…pe… sattahipi dattīhi yāpeti; ekāhikampi āhāraṃ āhāreti, dvīhikampi ⁴⁰ āhāraṃ āhāreti…pe… sattāhikampi āhāraṃ āhāreti. Iti evarūpaṃ aḍḍhamāsikampi pariyāyabhattabhojanānuyogamanuyutto viharati. So sākabhakkho vā hoti sāmākabhakkho vā hoti nīvārabhakkho vā hoti daddulabhakkho vā hoti haṭabhakkho vā hoti kaṇabhakkho vā hoti ācāmabhakkho vā hoti piññākabhakkho vā hoti tiṇabhakkho vā hoti gomayabhakkho vā hoti, vanamūlaphalāhāro yāpeti pavattaphalabhojī. So sāṇānipi dhāreti masāṇānipi dhāreti chavadussānipi dhāreti paṃsukūlānipi dhāreti tirīṭānipi dhāreti ajinampi dhāreti ajinakkhipampi dhāreti kusacīrampi dhāreti vākacīrampi dhāreti phalakacīrampi dhāreti kesakambalampi dhāreti vāḷakambalampi dhāreti ulūkapakkhampi ⁴¹ dhāreti, kesamassulocakopi hoti kesamassulocanānuyogamanuyutto, ubbhaṭṭhakopi hoti āsanapaṭikkhitto, ukkuṭikopi hoti ukkuṭikappadhānamanuyutto, kaṇṭakāpassayikopi hoti kaṇṭakāpassaye seyyaṃ kappeti, sāyatatiyakampi ⁴² udakorohanānuyogamanuyutto viharati. Iti evarūpaṃ anekavihitaṃ kāyassa ātāpanaparitāpanānuyogamanuyutto viharati . Evaṃ puggalo attantapo hoti attaparitāpanānuyogamanuyutto.

༡༧༥. ཀཐཉྩ པུགྒལོ པརནྟཔོ ཧོཏི པརཔརིཏཱཔནཱནུཡོགམནུཡུཏྟོ? ཨིདྷེཀཙྩོ པུགྒལོ ཨོརབྦྷིཀོ ཧོཏི སཱུཀརིཀོ སཱཀུཎིཀོ མཱགཝིཀོ ལུདྡོ མཙྪགྷཱཏཀོ ཙོརོ ཙོརགྷཱཏཀོ གོགྷཱཏཀོ བནྡྷནཱགཱརིཀོ, ཡེ ཝཱ པནཉྙེཔི ཀེཙི ཀུརཱུརཀམྨནྟཱ། ཨེཝཾ པུགྒལོ པརནྟཔོ ཧོཏི པརཔརིཏཱཔནཱནུཡོགམནུཡུཏྟོ།

175. Kathañca puggalo parantapo hoti paraparitāpanānuyogamanuyutto? Idhekacco puggalo orabbhiko hoti sūkariko sākuṇiko māgaviko luddo macchaghātako coro coraghātako goghātako bandhanāgāriko, ye vā panaññepi keci kurūrakammantā. Evaṃ puggalo parantapo hoti paraparitāpanānuyogamanuyutto.

༡༧༦. ཀཐཉྩ པུགྒལོ ཨཏྟནྟཔོ ཙ ཧོཏི ཨཏྟཔརིཏཱཔནཱནུཡོགམནུཡུཏྟོ, པརནྟཔོ ཙ པརཔརིཏཱཔནཱནུཡོགམནུཡུཏྟོ? ཨིདྷེཀཙྩོ པུགྒལོ རཱཛཱ ཝཱ ཧོཏི ཁཏྟིཡོ མུདྡྷཱཝསིཏྟོ ⁴³ བྲཱཧྨཎོ ཝཱ མཧཱསཱལོ། སོ པུརཏྠིམེན ནརསྶ ནཝཾ སནྡྷཱགཱརཾ ⁴⁴ ཀཱརཱཔེཏྭཱ ཀེསམསྶུཾ ཨོཧཱརེཏྭཱ ཁརཱཛིནཾ ⁴⁵ ནིཝཱསེཏྭཱ སཔྤིཏེལེན ཀཱཡཾ ཨབྦྷཉྫིཏྭཱ མིགཝིསཱཎེན པིཊྛིཾ ཀཎྜུཝམཱནོ ⁴⁶ སནྡྷཱགཱརཾ པཝིསཏི སདྡྷིཾ མཧེསིཡཱ བྲཱཧྨཎེན ཙ པུརོཧིཏེན། སོ ཏཏྠ ཨནནྟརཧིཏཱཡ བྷཱུམིཡཱ ཧརིཏུཔལིཏྟཱཡ སེཡྻཾ ཀཔྤེཏི། ཨེཀིསྶཱ གཱཝིཡཱ སརཱུཔཝཙྪཱཡ ཡཾ ཨེཀསྨིཾ ཐནེ ཁཱིརཾ ཧོཏི ཏེན རཱཛཱ ཡཱཔེཏི, ཡཾ དུཏིཡསྨིཾ ཐནེ ཁཱིརཾ ཧོཏི ཏེན མཧེསཱི ཡཱཔེཏི, ཡཾ ཏཏིཡསྨིཾ ཐནེ ཁཱིརཾ ཧོཏི ཏེན བྲཱཧྨཎོ པུརོཧིཏོ ཡཱཔེཏི, ཡཾ ཙཏུཏྠསྨིཾ ཐནེ ཁཱིརཾ ཧོཏི ཏེན ཨགྒིཾ ཛུཧཏི, ཨཝསེསེན ཝཙྪཀོ ཡཱཔེཏི། སོ ཨེཝམཱཧ – ‘‘ཨེཏྟཀཱ ཨུསབྷཱ ཧཉྙནྟུ ཡཉྙཏྠཱཡ, ཨེཏྟཀཱ ཝཙྪཏརཱ ཧཉྙནྟུ ཡཉྙཏྠཱཡ, ཨེཏྟཀཱ ཝཙྪཏརིཡོ ཧཉྙནྟུ ཡཉྙཏྠཱཡ, ཨེཏྟཀཱ ཨཛཱ ཧཉྙནྟུ ཡཉྙཏྠཱཡ, ཨེཏྟཀཱ ཨུརབྦྷཱ ཧཉྙནྟུ ཡཉྙཏྠཱཡ, (ཨེཏྟཀཱ ཨསྶཱ ཧཉྙནྟུ ཡཉྙཏྠཱཡ) ⁴⁷ ཨེཏྟཀཱ རུཀྑཱ ཚིཛྫནྟུ ཡཱུཔཏྠཱཡ, ཨེཏྟཀཱ དབྦྷཱ ལཱུཡནྟུ བརིཧིསཏྠཱཡཱ’’ཏི ⁴⁸། ཡེཔིསྶ ཏེ ཧོནྟི དཱསཱཏི ཝཱ པེསྶཱཏི ཝཱ ཀམྨཀརཱཏི ཝཱ, ཏེཔི དཎྜཏཛྫིཏཱ བྷཡཏཛྫིཏཱ ཨསྶུམུཁཱ རུདམཱནཱ པརིཀམྨཱནི ཀརོནྟི། ཨེཝཾ པུགྒལོ ཨཏྟནྟཔོ ཙ ཧོཏི ཨཏྟཔརིཏཱཔནཱནུཡོགམནུཡུཏྟོ, པརནྟཔོ ཙ པརཔརིཏཱཔནཱནུཡོགམནུཡུཏྟོ།

176. Kathañca puggalo attantapo ca hoti attaparitāpanānuyogamanuyutto, parantapo ca paraparitāpanānuyogamanuyutto? Idhekacco puggalo rājā vā hoti khattiyo muddhāvasitto ⁴⁹ brāhmaṇo vā mahāsālo. So puratthimena narassa navaṃ sandhāgāraṃ ⁵⁰ kārāpetvā kesamassuṃ ohāretvā kharājinaṃ ⁵¹ nivāsetvā sappitelena kāyaṃ abbhañjitvā migavisāṇena piṭṭhiṃ kaṇḍuvamāno ⁵² sandhāgāraṃ pavisati saddhiṃ mahesiyā brāhmaṇena ca purohitena. So tattha anantarahitāya bhūmiyā haritupalittāya seyyaṃ kappeti. Ekissā gāviyā sarūpavacchāya yaṃ ekasmiṃ thane khīraṃ hoti tena rājā yāpeti, yaṃ dutiyasmiṃ thane khīraṃ hoti tena mahesī yāpeti, yaṃ tatiyasmiṃ thane khīraṃ hoti tena brāhmaṇo purohito yāpeti, yaṃ catutthasmiṃ thane khīraṃ hoti tena aggiṃ juhati, avasesena vacchako yāpeti. So evamāha – ‘‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāya, (ettakā assā haññantu yaññatthāya) ⁵³ ettakā rukkhā chijjantu yūpatthāya, ettakā dabbhā lūyantu barihisatthāyā’’ti ⁵⁴. Yepissa te honti dāsāti vā pessāti vā kammakarāti vā, tepi daṇḍatajjitā bhayatajjitā assumukhā rudamānā parikammāni karonti. Evaṃ puggalo attantapo ca hoti attaparitāpanānuyogamanuyutto, parantapo ca paraparitāpanānuyogamanuyutto.

༡༧༧. ཀཐཉྩ པུགྒལོ ནེཝ ཨཏྟནྟཔོ ཙ ཧོཏི ན ཨཏྟཔརིཏཱཔནཱནུཡོགམནུཡུཏྟོ, ན པརནྟཔོ ན པརཔརིཏཱཔནཱནུཡོགམནུཡུཏྟོ? སོ ཨནཏྟནྟཔོ ཨཔརནྟཔོ དིཊྛེཝ དྷམྨེ ནིཙྪཱཏོ ནིབྦུཏོ སཱིཏཱིབྷཱུཏོ སུཁཔྤཊིསཾཝེདཱི བྲཧྨབྷཱུཏེན ཨཏྟནཱ ཝིཧརཏི།

177. Kathañca puggalo neva attantapo ca hoti na attaparitāpanānuyogamanuyutto, na parantapo na paraparitāpanānuyogamanuyutto? So anattantapo aparantapo diṭṭheva dhamme nicchāto nibbuto sītībhūto sukhappaṭisaṃvedī brahmabhūtena attanā viharati.

ཨིདྷ ཏཐཱགཏོ ལོཀེ ཨུཔྤཛྫཏི ཨརཧཾ སམྨཱསམྦུདྡྷོ ཝིཛྫཱཙརཎསམྤནྣོ སུགཏོ ལོཀཝིདཱུ ཨནུཏྟརོ པུརིསདམྨསཱརཐི སཏྠཱ དེཝམནུསྶཱནཾ བུདྡྷོ བྷགཝཱ། སོ ཨིམཾ ལོཀཾ སདེཝཀཾ སམཱརཀཾ སབྲཧྨཀཾ སསྶམཎབྲཱཧྨཎིཾ པཛཾ སདེཝམནུསྶཾ སཡཾ ཨབྷིཉྙཱ སཙྪིཀཏྭཱ པཝེདེཏི། སོ དྷམྨཾ དེསེཏི ཨཱདིཀལྱཱཎཾ མཛ྄ཛྷེཀལྱཱཎཾ པརིཡོསཱནཀལྱཱཎཾ སཱཏྠཾ སབྱཉྫནཾ, ཀེཝལཔརིཔུཎྞཾ པརིསུདྡྷཾ བྲཧྨཙརིཡཾ པཀཱསེཏི། ཏཾ དྷམྨཾ སུཎཱཏི གཧཔཏི ཝཱ གཧཔཏིཔུཏྟོ ཝཱ ཨཉྙཏརསྨིཾ ཝཱ ཀུལེ པཙྩཱཛཱཏོ ། སོ ཏཾ དྷམྨཾ སུཏྭཱ ཏཐཱགཏེ སདྡྷཾ པཊིལབྷཏི། སོ ཏེན སདྡྷཱཔཊིལཱབྷེན སམནྣཱགཏོ ཨིཏི པཊིསཉྩིཀྑཏི – ‘‘སམྦཱདྷོ གྷརཱཝཱསོ རཛཱཔཐོ, ཨབྦྷོཀཱསོ པབྦཛྫཱ། ནཡིདཾ སུཀརཾ ཨགཱརཾ ཨཛ྄ཛྷཱཝསཏཱ ཨེཀནྟཔརིཔུཎྞཾ ཨེཀནྟཔརིསུདྡྷཾ སངྑལིཁིཏཾ བྲཧྨཙརིཡཾ ཙརིཏུཾ། ཡཾནཱུནཱཧཾ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛེཡྻ’’ནྟི! སོ ཨཔརེན སམཡེན ཨཔྤཾ ཝཱ བྷོགཀྑནྡྷཾ པཧཱཡ མཧནྟཾ ཝཱ བྷོགཀྑནྡྷཾ པཧཱཡ ཨཔྤཾ ཝཱ ཉཱཏིཔརིཝཊྚཾ པཧཱཡ མཧནྟཾ ཝཱ ཉཱཏིཔརིཝཊྚཾ པཧཱཡ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛཏི།

Idha tathāgato loke uppajjati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā. So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti. So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāseti. Taṃ dhammaṃ suṇāti gahapati vā gahapatiputto vā aññatarasmiṃ vā kule paccājāto . So taṃ dhammaṃ sutvā tathāgate saddhaṃ paṭilabhati. So tena saddhāpaṭilābhena samannāgato iti paṭisañcikkhati – ‘‘sambādho gharāvāso rajāpatho, abbhokāso pabbajjā. Nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ. Yaṃnūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya’’nti! So aparena samayena appaṃ vā bhogakkhandhaṃ pahāya mahantaṃ vā bhogakkhandhaṃ pahāya appaṃ vā ñātiparivaṭṭaṃ pahāya mahantaṃ vā ñātiparivaṭṭaṃ pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajati.

༡༧༨. སོ ཨེཝཾ པབྦཛིཏོ སམཱནོ བྷིཀྑཱུནཾ སིཀྑཱསཱཛཱིཝསམཱཔནྣོ པཱཎཱཏིཔཱཏཾ པཧཱཡ པཱཎཱཏིཔཱཏཱ པཊིཝིརཏོ ཧོཏི ནིཧིཏདཎྜོ ནིཧིཏསཏྠོ ལཛྫཱི དཡཱཔནྣོ སབྦཔཱཎབྷཱུཏཧིཏཱནུཀམྤཱི ཝིཧརཏི།

178. So evaṃ pabbajito samāno bhikkhūnaṃ sikkhāsājīvasamāpanno pāṇātipātaṃ pahāya pāṇātipātā paṭivirato hoti nihitadaṇḍo nihitasattho lajjī dayāpanno sabbapāṇabhūtahitānukampī viharati.

ཨདིནྣཱདཱནཾ པཧཱཡ ཨདིནྣཱདཱནཱ པཊིཝིརཏོ ཧོཏི དིནྣཱདཱཡཱི དིནྣཔཱཊིཀངྑཱི, ཨཐེནེན སུཙིབྷཱུཏེན ཨཏྟནཱ ཝིཧརཏི།

Adinnādānaṃ pahāya adinnādānā paṭivirato hoti dinnādāyī dinnapāṭikaṅkhī, athenena sucibhūtena attanā viharati.

ཨབྲཧྨཙརིཡཾ པཧཱཡ བྲཧྨཙཱརཱི ཧོཏི ཨཱརཱཙཱརཱི ⁵⁵ པཊིཝིརཏོ མེཐུནཱ གཱམདྷམྨཱ།

Abrahmacariyaṃ pahāya brahmacārī hoti ārācārī ⁵⁶ paṭivirato methunā gāmadhammā.

མུསཱཝཱདཾ པཧཱཡ མུསཱཝཱདཱ པཊིཝིརཏོ ཧོཏི སཙྩཝཱདཱི སཙྩསནྡྷོ ཐེཏོ པཙྩཡིཀོ ཨཝིསཾཝཱདཀོ ལོཀསྶ།

Musāvādaṃ pahāya musāvādā paṭivirato hoti saccavādī saccasandho theto paccayiko avisaṃvādako lokassa.

པིསུཎཾ ཝཱཙཾ པཧཱཡ པིསུཎཱཡ ཝཱཙཱཡ པཊིཝིརཏོ ཧོཏི, ཨིཏོ སུཏྭཱ ན ཨམུཏྲ ཨཀྑཱཏཱ ཨིམེསཾ བྷེདཱཡ, ཨམུཏྲ ཝཱ སུཏྭཱ ན ཨིམེསཾ ཨཀྑཱཏཱ ཨམཱུསཾ བྷེདཱཡ། ཨིཏི བྷིནྣཱནཾ ཝཱ སནྡྷཱཏཱ སཧིཏཱནཾ ཝཱ ཨནུཔྤདཱཏཱ སམགྒཱརཱམོ སམགྒརཏོ སམགྒནནྡཱི སམགྒཀརཎིཾ ཝཱཙཾ བྷཱསིཏཱ ཧོཏི།

Pisuṇaṃ vācaṃ pahāya pisuṇāya vācāya paṭivirato hoti, ito sutvā na amutra akkhātā imesaṃ bhedāya, amutra vā sutvā na imesaṃ akkhātā amūsaṃ bhedāya. Iti bhinnānaṃ vā sandhātā sahitānaṃ vā anuppadātā samaggārāmo samaggarato samagganandī samaggakaraṇiṃ vācaṃ bhāsitā hoti.

ཕརུསཾ ཝཱཙཾ པཧཱཡ ཕརུསཱཡ ཝཱཙཱཡ པཊིཝིརཏོ ཧོཏི། ཡཱ སཱ ཝཱཙཱ ནེལཱ ཀཎྞསུཁཱ པེམནཱིཡཱ ཧདཡངྒམཱ པོརཱི བཧུཛནཀནྟཱ བཧུཛནམནཱཔཱ ཏཐཱརཱུཔིཾ ཝཱཙཾ བྷཱསིཏཱ ཧོཏི།

Pharusaṃ vācaṃ pahāya pharusāya vācāya paṭivirato hoti. Yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṃ vācaṃ bhāsitā hoti.

སམྥཔྤལཱཔཾ པཧཱཡ སམྥཔྤལཱཔཱ པཊིཝིརཏོ ཧོཏི, ཀཱལཝཱདཱི བྷཱུཏཝཱདཱི ཨཏྠཝཱདཱི དྷམྨཝཱདཱི ཝིནཡཝཱདཱི ནིདྷཱནཝཏིཾ ཝཱཙཾ བྷཱསིཏཱ ཀཱལེན སཱཔདེསཾ པརིཡནྟཝཏིཾ ཨཏྠསཾཧིཏཾ།

Samphappalāpaṃ pahāya samphappalāpā paṭivirato hoti, kālavādī bhūtavādī atthavādī dhammavādī vinayavādī nidhānavatiṃ vācaṃ bhāsitā kālena sāpadesaṃ pariyantavatiṃ atthasaṃhitaṃ.

༡༧༩. སོ བཱིཛགཱམབྷཱུཏགཱམསམཱརམྦྷཱ པཊིཝིརཏོ ཧོཏི, ཨེཀབྷཏྟིཀོ ཧོཏི རཏྟཱུཔརཏོ ཝིརཏོ ཝིཀཱལབྷོཛནཱ, ནཙྩགཱིཏཝཱདིཏཝིསཱུཀདསྶནཱ པཊིཝིརཏོ ཧོཏི, མཱལཱགནྡྷཝིལེཔནདྷཱརཎམཎྜནཝིབྷཱུསནཊྛཱནཱ པཊིཝིརཏོ ཧོཏི, ཨུཙྩཱསཡནམཧཱསཡནཱ པཊིཝིརཏོ ཧོཏི, ཛཱཏརཱུཔརཛཏཔཊིགྒཧཎཱ པཊིཝིརཏོ ཧོཏི།

179. So bījagāmabhūtagāmasamārambhā paṭivirato hoti, ekabhattiko hoti rattūparato virato vikālabhojanā, naccagītavāditavisūkadassanā paṭivirato hoti, mālāgandhavilepanadhāraṇamaṇḍanavibhūsanaṭṭhānā paṭivirato hoti, uccāsayanamahāsayanā paṭivirato hoti, jātarūparajatapaṭiggahaṇā paṭivirato hoti.

ཨཱམཀདྷཉྙཔཊིགྒཧཎཱ པཊིཝིརཏོ ཧོཏི, ཨཱམཀམཾསཔཊིགྒཧཎཱ པཊིཝིརཏོ ཧོཏི, ཨིཏྠིཀུམཱརིཀཱཔཊིགྒཧཎཱ པཊིཝིརཏོ ཧོཏི, དཱསིདཱསཔཊིགྒཧཎཱ པཊིཝིརཏོ ཧོཏི, ཨཛེལ༹ཀཔཊིགྒཧཎཱ པཊིཝིརཏོ ཧོཏི, ཀུཀྐུཊསཱུཀརཔཊིགྒཧཎཱ པཊིཝིརཏོ ཧོཏི, ཧཏྠིགཝཱསྶཝལ༹ཝཔཊིགྒཧཎཱ པཊིཝིརཏོ ཧོཏི, ཁེཏྟཝཏྠུཔཊིགྒཧཎཱ པཊིཝིརཏོ ཧོཏི, དཱུཏེཡྻཔཧིཎགམནཱནུཡོགཱ པཊིཝིརཏོ ཧོཏི, ཀཡཝིཀྐཡཱ པཊིཝིརཏོ ཧོཏི, ཏུལཱཀཱུཊཀཾསཀཱུཊམཱནཀཱུཊཱ པཊིཝིརཏོ ཧོཏི, ཨུཀྐོཊནཝཉྩནནིཀཏིསཱཙིཡོགཱ ⁵⁷ པཊིཝིརཏོ ཧོཏི, ཚེདནཝདྷབནྡྷནཝིཔརཱམོསཨཱལོཔསཧསཱཀཱརཱ པཊིཝིརཏོ ཧོཏི།

Āmakadhaññapaṭiggahaṇā paṭivirato hoti, āmakamaṃsapaṭiggahaṇā paṭivirato hoti, itthikumārikāpaṭiggahaṇā paṭivirato hoti, dāsidāsapaṭiggahaṇā paṭivirato hoti, ajeḷakapaṭiggahaṇā paṭivirato hoti, kukkuṭasūkarapaṭiggahaṇā paṭivirato hoti, hatthigavāssavaḷavapaṭiggahaṇā paṭivirato hoti, khettavatthupaṭiggahaṇā paṭivirato hoti, dūteyyapahiṇagamanānuyogā paṭivirato hoti, kayavikkayā paṭivirato hoti, tulākūṭakaṃsakūṭamānakūṭā paṭivirato hoti, ukkoṭanavañcananikatisāciyogā ⁵⁸ paṭivirato hoti, chedanavadhabandhanaviparāmosaālopasahasākārā paṭivirato hoti.

༡༨༠. སོ སནྟུཊྛོ ཧོཏི ཀཱཡཔརིཧཱརིཀེན ཙཱིཝརེན ཀུཙྪིཔརིཧཱརིཀེན པིཎྜཔཱཏེན། སོ ཡེན ཡེནེཝ པཀྐམཏི སམཱདཱཡེཝ པཀྐམཏི, སེཡྻཐཱཔི ནཱམ པཀྑཱི སཀུཎོ ཡེན ཡེནེཝ ཌེཏི སཔཏྟབྷཱརོཝ ཌེཏི། ཨེཝམེཝཾ བྷིཀྑུ སནྟུཊྛོ ཧོཏི ཀཱཡཔརིཧཱརིཀེན ཙཱིཝརེན ཀུཙྪིཔརིཧཱརིཀེན པིཎྜཔཱཏེན། སོ ཡེན ཡེནེཝ པཀྐམཏི སམཱདཱཡེཝ པཀྐམཏི། སོ ཨིམིནཱ ཨརིཡེན སཱིལཀྑནྡྷེན སམནྣཱགཏོ ཨཛ྄ཛྷཏྟཾ ཨནཝཛྫསུཁཾ པཊིསཾཝེདེཏི།

180. So santuṭṭho hoti kāyaparihārikena cīvarena kucchiparihārikena piṇḍapātena. So yena yeneva pakkamati samādāyeva pakkamati, seyyathāpi nāma pakkhī sakuṇo yena yeneva ḍeti sapattabhārova ḍeti. Evamevaṃ bhikkhu santuṭṭho hoti kāyaparihārikena cīvarena kucchiparihārikena piṇḍapātena. So yena yeneva pakkamati samādāyeva pakkamati. So iminā ariyena sīlakkhandhena samannāgato ajjhattaṃ anavajjasukhaṃ paṭisaṃvedeti.

༡༨༡. སོ ཙཀྑུནཱ རཱུཔཾ དིསྭཱ ན ནིམིཏྟགྒཱཧཱི ཧོཏི ནཱནུབྱཉྫནགྒཱཧཱི། ཡཏྭཱདྷིཀརཎམེནཾ ཙཀྑུནྡྲིཡཾ ཨསཾཝུཏཾ ཝིཧརནྟཾ ཨབྷིཛ྄ཛྷཱདོམནསྶཱ པཱཔཀཱ ཨཀུསལཱ དྷམྨཱ ཨནྭཱསྶཝེཡྻུཾ, ཏསྶ སཾཝརཱཡ པཊིཔཛྫཏི, རཀྑཏི ཙཀྑུནྡྲིཡཾ, ཙཀྑུནྡྲིཡེ སཾཝརཾ ཨཱཔཛྫཏི; སོཏེན སདྡཾ སུཏྭཱ…པེ॰… གྷཱནེན གནྡྷཾ གྷཱཡིཏྭཱ…པེ॰… ཛིཝ྄ཧཱཡ རསཾ སཱཡིཏྭཱ…པེ॰… ཀཱཡེན ཕོཊྛབྦཾ ཕུསིཏྭཱ…པེ॰… མནསཱ དྷམྨཾ ཝིཉྙཱཡ ན ནིམིཏྟགྒཱཧཱི ཧོཏི ནཱནུབྱཉྫནགྒཱཧཱི། ཡཏྭཱདྷིཀརཎམེནཾ མནིནྡྲིཡཾ ཨསཾཝུཏཾ ཝིཧརནྟཾ ཨབྷིཛ྄ཛྷཱདོམནསྶཱ པཱཔཀཱ ཨཀུསལཱ དྷམྨཱ ཨནྭཱསྶཝེཡྻུཾ, ཏསྶ སཾཝརཱཡ པཊིཔཛྫཏི, རཀྑཏི མནིནྡྲིཡཾ, མནིནྡྲིཡེ སཾཝརཾ ཨཱཔཛྫཏི། སོ ཨིམིནཱ ཨརིཡེན ཨིནྡྲིཡསཾཝརེན སམནྣཱགཏོ ཨཛ྄ཛྷཏྟཾ ཨབྱཱསེཀསུཁཾ པཊིསཾཝེདེཏི།

181. So cakkhunā rūpaṃ disvā na nimittaggāhī hoti nānubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya paṭipajjati, rakkhati cakkhundriyaṃ, cakkhundriye saṃvaraṃ āpajjati; sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya na nimittaggāhī hoti nānubyañjanaggāhī. Yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya paṭipajjati, rakkhati manindriyaṃ, manindriye saṃvaraṃ āpajjati. So iminā ariyena indriyasaṃvarena samannāgato ajjhattaṃ abyāsekasukhaṃ paṭisaṃvedeti.

༡༨༢. སོ ཨབྷིཀྐནྟེ པཊིཀྐནྟེ སམྤཛཱནཀཱརཱི ཧོཏི, ཨཱལོཀིཏེ ཝིལོཀིཏེ སམྤཛཱནཀཱརཱི ཧོཏི, སམིཉྫིཏེ པསཱརིཏེ སམྤཛཱནཀཱརཱི ཧོཏི, སངྒྷཱཊིཔཏྟཙཱིཝརདྷཱརཎེ སམྤཛཱནཀཱརཱི ཧོཏི, ཨསིཏེ པཱིཏེ ཁཱཡིཏེ སཱཡིཏེ སམྤཛཱནཀཱརཱི ཧོཏི, ཨུཙྩཱརཔསྶཱཝཀམྨེ སམྤཛཱནཀཱརཱི ཧོཏི, གཏེ ཋིཏེ ནིསིནྣེ སུཏྟེ ཛཱགརིཏེ བྷཱསིཏེ ཏུཎྷཱིབྷཱཝེ སམྤཛཱནཀཱརཱི ཧོཏི།

182. So abhikkante paṭikkante sampajānakārī hoti, ālokite vilokite sampajānakārī hoti, samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhībhāve sampajānakārī hoti.

སོ ཨིམིནཱ ཙ ཨརིཡེན སཱིལཀྑནྡྷེན སམནྣཱགཏོ ཨིམིནཱ ཙ ཨརིཡེན ཨིནྡྲིཡསཾཝརེན སམནྣཱགཏོ ཨིམིནཱ ཙ ཨརིཡེན སཏིསམྤཛཉྙེན སམནྣཱགཏོ ཨིམཱཡ ཙ ཨརིཡཱཡ སནྟུཊྛིཡཱ སམནྣཱགཏོ ⁵⁹ ཝིཝིཏྟཾ སེནཱསནཾ བྷཛཏི ཨརཉྙཾ རུཀྑམཱུལཾ པབྦཏཾ ཀནྡརཾ གིརིགུཧཾ སུསཱནཾ ཝནཔཏྠཾ ཨབྦྷོཀཱསཾ པལཱལཔུཉྫཾ། སོ པཙྪཱབྷཏྟཾ པིཎྜཔཱཏཔཊིཀྐནྟོ ནིསཱིདཏི པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡ པརིམུཁཾ སཏིཾ ཨུཔཊྛཔེཏྭཱ། སོ ཨབྷིཛ྄ཛྷཾ ལོཀེ པཧཱཡ ཝིགཏཱབྷིཛ྄ཛྷེན ཙེཏསཱ ཝིཧརཏི, ཨབྷིཛ྄ཛྷཱཡ ཙིཏྟཾ པརིསོདྷེཏི; བྱཱཔཱདཔདོསཾ པཧཱཡ ཨབྱཱཔནྣཙིཏྟོ ཝིཧརཏི སབྦཔཱཎབྷཱུཏཧིཏཱནུཀམྤཱི, བྱཱཔཱདཔདོསཱ ཙིཏྟཾ པརིསོདྷེཏི; ཐིནམིདྡྷཾ ⁶⁰ པཧཱཡ ཝིགཏཐིནམིདྡྷོ ཝིཧརཏི ཨཱལོཀསཉྙཱི སཏོ སམྤཛཱནོ, ཐིནམིདྡྷཱ ཙིཏྟཾ པརིསོདྷེཏི; ཨུདྡྷཙྩཀུཀྐུཙྩཾ པཧཱཡ ཨནུདྡྷཏོ ཝིཧརཏི ཨཛ྄ཛྷཏྟཾ ཝཱུཔསནྟཙིཏྟོ, ཨུདྡྷཙྩཀུཀྐུཙྩཱ ཙིཏྟཾ པརིསོདྷེཏི; ཝིཙིཀིཙྪཾ པཧཱཡ ཏིཎྞཝིཙིཀིཙྪོ ཝིཧརཏི ཨཀཐཾཀཐཱི ཀུསལེསུ དྷམྨེསུ, ཝིཙིཀིཙྪཱཡ ཙིཏྟཾ པརིསོདྷེཏི།

So iminā ca ariyena sīlakkhandhena samannāgato iminā ca ariyena indriyasaṃvarena samannāgato iminā ca ariyena satisampajaññena samannāgato imāya ca ariyāya santuṭṭhiyā samannāgato ⁶¹ vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ. So pacchābhattaṃ piṇḍapātapaṭikkanto nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So abhijjhaṃ loke pahāya vigatābhijjhena cetasā viharati, abhijjhāya cittaṃ parisodheti; byāpādapadosaṃ pahāya abyāpannacitto viharati sabbapāṇabhūtahitānukampī, byāpādapadosā cittaṃ parisodheti; thinamiddhaṃ ⁶² pahāya vigatathinamiddho viharati ālokasaññī sato sampajāno, thinamiddhā cittaṃ parisodheti; uddhaccakukkuccaṃ pahāya anuddhato viharati ajjhattaṃ vūpasantacitto, uddhaccakukkuccā cittaṃ parisodheti; vicikicchaṃ pahāya tiṇṇavicikiccho viharati akathaṃkathī kusalesu dhammesu, vicikicchāya cittaṃ parisodheti.

༡༨༣. སོ ཨིམེ པཉྩ ནཱིཝརཎེ པཧཱཡ ཙེཏསོ ཨུཔཀྐིལེསེ པཉྙཱཡ དུབྦལཱིཀརཎེ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཏི; ཝིཏཀྐཝིཙཱརཱནཾ ཝཱུཔསམཱ ཨཛ྄ཛྷཏྟཾ སམྤསཱདནཾ ཙེཏསོ ཨེཀོདིབྷཱཝཾ ཨཝིཏཀྐཾ ཨཝིཙཱརཾ སམཱདྷིཛཾ པཱིཏིསུཁཾ དུཏིཡཾ ཛྷཱནཾ ཨུཔསམྤཛྫ ཝིཧརཏི; པཱིཏིཡཱ ཙ ཝིརཱགཱ ཨུཔེཀྑཀོ ཙ ཝིཧརཏི སཏོ ཙ སམྤཛཱནོ སུཁཉྩ ཀཱཡེན པཊིསཾཝེདེཏི, ཡཾ ཏཾ ཨརིཡཱ ཨཱཙིཀྑནྟི – ‘‘ཨུཔེཀྑཀོ སཏིམཱ སུཁཝིཧཱརཱི’’ཏི ཏཏིཡཾ ཛྷཱནཾ ཨུཔསམྤཛྫ ཝིཧརཏི; སུཁསྶ ཙ པཧཱནཱ དུཀྑསྶ ཙ པཧཱནཱ པུབྦེཝ སོམནསྶདོམནསྶཱནཾ ཨཏྠངྒམཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི།

183. So ime pañca nīvaraṇe pahāya cetaso upakkilese paññāya dubbalīkaraṇe vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati; vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati; pītiyā ca virāgā upekkhako ca viharati sato ca sampajāno sukhañca kāyena paṭisaṃvedeti, yaṃ taṃ ariyā ācikkhanti – ‘‘upekkhako satimā sukhavihārī’’ti tatiyaṃ jhānaṃ upasampajja viharati; sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharati.

སོ ཨེཝཾ སམཱཧིཏེ ཙིཏྟེ པརིསུདྡྷེ པརིཡོདཱཏེ ཨནངྒཎེ ཝིགཏཱུཔཀྐིལེསེ མུདུབྷཱུཏེ ཀམྨནིཡེ ཋིཏེ ཨཱནེཉྫཔྤཏྟེ པུབྦེནིཝཱསཱནུསྶཏིཉཱཎཱཡ ཙིཏྟཾ ཨབྷིནིནྣཱམེཏི། སོ ཨནེཀཝིཧིཏཾ པུབྦེནིཝཱསཾ ཨནུསྶརཏི, སེཡྻཐིདཾ – ཨེཀམྤི ཛཱཏིཾ དྭེཔི ཛཱཏིཡོ ཏིསྶོཔི ཛཱཏིཡོ ཙཏསྶོཔི ཛཱཏིཡོ པཉྩཔི ཛཱཏིཡོ དསཔི ཛཱཏིཡོ ཝཱིསམྤི ཛཱཏིཡོ ཏིཾསམྤི ཛཱཏིཡོ ཙཏྟཱལཱིསམྤི ཛཱཏིཡོ པཉྙཱསམྤི ཛཱཏིཡོ ཛཱཏིསཏམྤི ཛཱཏིསཧསྶམྤི ཛཱཏིསཏསཧསྶམྤི ཨནེཀེཔི སཾཝཊྚཀཔྤེ ཨནེཀེཔི ཝིཝཊྚཀཔྤེ ཨནེཀེཔི སཾཝཊྚཝིཝཊྚཀཔྤེ – ‘‘ཨམུཏྲཱསིཾ ཨེཝཾནཱམོ ཨེཝཾགོཏྟོ ཨེཝཾཝཎྞོ ཨེཝམཱཧཱརོ ཨེཝཾསུཁདུཀྑཔཊིསཾཝེདཱི ཨེཝམཱཡུཔརིཡནྟོ, སོ ཏཏོ ཙུཏོ ཨམུཏྲ ཨུདཔཱདིཾ; ཏཏྲཱཔཱསིཾ ཨེཝཾནཱམོ ཨེཝཾགོཏྟོ ཨེཝཾཝཎྞོ ཨེཝམཱཧཱརོ ཨེཝཾསུཁདུཀྑཔཊིསཾཝེདཱི ཨེཝམཱཡུཔརིཡནྟོ, སོ ཏཏོ ཙུཏོ ཨིདྷཱུཔཔནྣོ’’ཏི། ཨིཏི སཱཀཱརཾ སཨུདྡེསཾ ཨནེཀཝིཧིཏཾ པུབྦེནིཝཱསཾ ཨནུསྶརཏི།

So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṃ abhininnāmeti. So anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe – ‘‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhapaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhapaṭisaṃvedī evamāyupariyanto, so tato cuto idhūpapanno’’ti. Iti sākāraṃ sauddesaṃ anekavihitaṃ pubbenivāsaṃ anussarati.

༡༨༤. སོ ཨེཝཾ སམཱཧིཏེ ཙིཏྟེ པརིསུདྡྷེ པརིཡོདཱཏེ ཨནངྒཎེ ཝིགཏཱུཔཀྐིལེསེ མུདུབྷཱུཏེ ཀམྨནིཡེ ཋིཏེ ཨཱནེཉྫཔྤཏྟེ སཏྟཱནཾ ཙུཏཱུཔཔཱཏཉཱཎཱཡ ཙིཏྟཾ ཨབྷིནིནྣཱམེཏི། སོ དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན སཏྟེ པསྶཏི ཙཝམཱནེ ཨུཔཔཛྫམཱནེ ཧཱིནེ པཎཱིཏེ སུཝཎྞེ དུབྦཎྞེ, སུགཏེ དུགྒཏེ ཡཐཱཀམྨཱུཔགེ སཏྟེ པཛཱནཱཏི – ‘‘ཨིམེ ཝཏ བྷོནྟོ སཏྟཱ ཀཱཡདུཙྩརིཏེན སམནྣཱགཏཱ, ཝཙཱིདུཙྩརིཏེན སམནྣཱགཏཱ, མནོདུཙྩརིཏེན སམནྣཱགཏཱ, ཨརིཡཱནཾ ཨུཔཝཱདཀཱ, མིཙྪཱདིཊྛིཀཱ མིཙྪཱདིཊྛིཀམྨསམཱདཱནཱ། ཏེ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔནྣཱ། ཨིམེ ཝཱ པན བྷོནྟོ སཏྟཱ ཀཱཡསུཙརིཏེན སམནྣཱགཏཱ ཝཙཱིསུཙརིཏེན སམནྣཱགཏཱ མནོསུཙརིཏེན སམནྣཱགཏཱ ཨརིཡཱནཾ ཨནུཔཝཱདཀཱ སམྨཱདིཊྛིཀཱ སམྨཱདིཊྛིཀམྨསམཱདཱནཱ། ཏེ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔནྣཱ’’ཏི། སོ ཨིཏི དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན སཏྟེ པསྶཏི ཙཝམཱནེ ཨུཔཔཛྫམཱནེ ཧཱིནེ པཎཱིཏེ སུཝཎྞེ དུབྦཎྞེ, སུགཏེ དུགྒཏེ ཡཐཱཀམྨཱུཔགེ སཏྟེ པཛཱནཱཏི།

184. So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṃ cutūpapātañāṇāya cittaṃ abhininnāmeti. So dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti – ‘‘ime vata bhonto sattā kāyaduccaritena samannāgatā, vacīduccaritena samannāgatā, manoduccaritena samannāgatā, ariyānaṃ upavādakā, micchādiṭṭhikā micchādiṭṭhikammasamādānā. Te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā. Te kāyassa bhedā paraṃ maraṇā sugatiṃ saggaṃ lokaṃ upapannā’’ti. So iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti.

༡༨༥. སོ ཨེཝཾ སམཱཧིཏེ ཙིཏྟེ པརིསུདྡྷེ པརིཡོདཱཏེ ཨནངྒཎེ ཝིགཏཱུཔཀྐིལེསེ མུདུབྷཱུཏེ ཀམྨནིཡེ ཋིཏེ ཨཱནེཉྫཔྤཏྟེ ཨཱསཝཱནཾ ཁཡཉཱཎཱཡ ཙིཏྟཾ ཨབྷིནིནྣཱམེཏི། སོ ‘‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི, ‘‘ཨིམེ ཨཱསཝཱ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ ཨཱསཝསམུདཡོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ ཨཱསཝནིརོདྷོ’’ཏི ཡཐཱབྷཱུཏཾ པཛཱནཱཏི, ‘‘ཨཡཾ ཨཱསཝནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི། ཏསྶ ཨེཝཾ ཛཱནཏོ ཨེཝཾ པསྶཏོ ཀཱམཱསཝཱཔི ཙིཏྟཾ ཝིམུཙྩཏི, བྷཝཱསཝཱཔི ཙིཏྟཾ ཝིམུཙྩཏི, ཨཝིཛྫཱསཝཱཔི ཙིཏྟཾ ཝིམུཙྩཏི། ཝིམུཏྟསྨིཾ ཝིམུཏྟམིཏི ཉཱཎཾ ཧོཏི། ‘‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱ’’ཏི པཛཱནཱཏི། ཨེཝཾ པུགྒལོ ནེཝ ཨཏྟནྟཔོ ཙ ཧོཏི ན ཨཏྟཔརིཏཱཔནཱནུཡོགམནུཡུཏྟོ, ན པརནྟཔོ ན པརཔརིཏཱཔནཱནུཡོགམནུཡུཏྟོ། སོ ཨནཏྟནྟཔོ ཨཔརནྟཔོ དིཊྛེཝ དྷམྨེ ནིཙྪཱཏོ ནིབྦུཏོ སཱིཏཱིབྷཱུཏོ སུཁཔྤཊིསཾཝེདཱི བྲཧྨབྷཱུཏེན ཨཏྟནཱ ཝིཧརཏི།

185. So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmeti. So ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti, ‘‘ime āsavā’’ti yathābhūtaṃ pajānāti, ‘‘ayaṃ āsavasamudayo’’ti yathābhūtaṃ pajānāti, ‘‘ayaṃ āsavanirodho’’ti yathābhūtaṃ pajānāti, ‘‘ayaṃ āsavanirodhagāminī paṭipadā’’ti yathābhūtaṃ pajānāti. Tassa evaṃ jānato evaṃ passato kāmāsavāpi cittaṃ vimuccati, bhavāsavāpi cittaṃ vimuccati, avijjāsavāpi cittaṃ vimuccati. Vimuttasmiṃ vimuttamiti ñāṇaṃ hoti. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti pajānāti. Evaṃ puggalo neva attantapo ca hoti na attaparitāpanānuyogamanuyutto, na parantapo na paraparitāpanānuyogamanuyutto. So anattantapo aparantapo diṭṭheva dhamme nicchāto nibbuto sītībhūto sukhappaṭisaṃvedī brahmabhūtena attanā viharati.

༡༨༦. ཀཏམོ ཙ པུགྒལོ སརཱགོ? ཡསྶ པུགྒལསྶ རཱགོ ཨཔྤཧཱིནོ, ཨཡཾ ཝུཙྩཏི པུགྒལོ ‘‘སརཱགོ’’།

186. Katamo ca puggalo sarāgo? Yassa puggalassa rāgo appahīno, ayaṃ vuccati puggalo ‘‘sarāgo’’.

ཀཏམོ ཙ པུགྒལོ སདོསོ? ཡསྶ པུགྒལསྶ དོསོ ཨཔྤཧཱིནོ, ཨཡཾ ཝུཙྩཏི པུགྒལོ ‘‘སདོསོ’’།

Katamo ca puggalo sadoso? Yassa puggalassa doso appahīno, ayaṃ vuccati puggalo ‘‘sadoso’’.

ཀཏམོ ཙ པུགྒལོ སམོཧོ? ཡསྶ པུགྒལསྶ མོཧོ ཨཔྤཧཱིནོ, ཨཡཾ ཝུཙྩཏི པུགྒལོ ‘‘སམོཧོ’’།

Katamo ca puggalo samoho? Yassa puggalassa moho appahīno, ayaṃ vuccati puggalo ‘‘samoho’’.

ཀཏམོ ཙ པུགྒལོ སམཱནོ? ཡསྶ པུགྒལསྶ མཱནོ ཨཔྤཧཱིནོ, ཨཡཾ ཝུཙྩཏི པུགྒལོ ‘‘སམཱནོ’’།

Katamo ca puggalo samāno? Yassa puggalassa māno appahīno, ayaṃ vuccati puggalo ‘‘samāno’’.

༡༨༧. ཀཐཉྩ པུགྒལོ ལཱབྷཱི ཧོཏི ཨཛ྄ཛྷཏྟཾ ཙེཏོསམཐསྶ, ན ལཱབྷཱི ཨདྷིཔཉྙཱདྷམྨཝིཔསྶནཱཡ? ཨིདྷེཀཙྩོ པུགྒལོ ལཱབྷཱི ཧོཏི རཱུཔསཧགཏཱནཾ ཝཱ ཨརཱུཔསཧགཏཱནཾ ཝཱ སམཱཔཏྟཱིནཾ, ན ལཱབྷཱི ལོཀུཏྟརམགྒསྶ ཝཱ ཕལསྶ ཝཱ། ཨེཝཾ པུགྒལོ ལཱབྷཱི ཧོཏི ཨཛ྄ཛྷཏྟཾ ཙེཏོསམཐསྶ, ན ལཱབྷཱི ཨདྷིཔཉྙཱདྷམྨཝིཔསྶནཱཡ།

187. Kathañca puggalo lābhī hoti ajjhattaṃ cetosamathassa, na lābhī adhipaññādhammavipassanāya? Idhekacco puggalo lābhī hoti rūpasahagatānaṃ vā arūpasahagatānaṃ vā samāpattīnaṃ, na lābhī lokuttaramaggassa vā phalassa vā. Evaṃ puggalo lābhī hoti ajjhattaṃ cetosamathassa, na lābhī adhipaññādhammavipassanāya.

ཀཐཉྩ པུགྒལོ ལཱབྷཱི ཧོཏི ཨདྷིཔཉྙཱདྷམྨཝིཔསྶནཱཡ, ན ལཱབྷཱི ཨཛ྄ཛྷཏྟཾ ཙེཏོསམཐསྶ? ཨིདྷེཀཙྩོ པུགྒལོ ལཱབྷཱི ཧོཏི ལོཀུཏྟརམགྒསྶ ཝཱ ཕལསྶ ཝཱ, ན ལཱབྷཱི རཱུཔསཧགཏཱནཾ ཝཱ ཨརཱུཔསཧགཏཱནཾ ཝཱ སམཱཔཏྟཱིནཾ། ཨེཝཾ པུགྒལོ ལཱབྷཱི ཧོཏི ཨདྷིཔཉྙཱདྷམྨཝིཔསྶནཱཡ, ན ལཱབྷཱི ཨཛ྄ཛྷཏྟཾ ཙེཏོསམཐསྶ།

Kathañca puggalo lābhī hoti adhipaññādhammavipassanāya, na lābhī ajjhattaṃ cetosamathassa? Idhekacco puggalo lābhī hoti lokuttaramaggassa vā phalassa vā, na lābhī rūpasahagatānaṃ vā arūpasahagatānaṃ vā samāpattīnaṃ. Evaṃ puggalo lābhī hoti adhipaññādhammavipassanāya, na lābhī ajjhattaṃ cetosamathassa.

ཀཐཉྩ པུགྒལོ ལཱབྷཱི ཙེཝ ཧོཏི ཨཛ྄ཛྷཏྟཾ ཙེཏོསམཐསྶ, ལཱབྷཱི ཙ ཨདྷིཔཉྙཱདྷམྨཝིཔསྶནཱཡ? ཨིདྷེཀཙྩོ པུགྒལོ ལཱབྷཱི ཧོཏི རཱུཔསཧགཏཱནཾ ཝཱ ཨརཱུཔསཧགཏཱནཾ ཝཱ སམཱཔཏྟཱིནཾ, ལཱབྷཱི ལོཀུཏྟརམགྒསྶ ཝཱ ཕལསྶ ཝཱ། ཨེཝཾ པུགྒལོ ལཱབྷཱི ཙེཝ ཧོཏི ཨཛ྄ཛྷཏྟཾ ཙེཏོསམཐསྶ, ལཱབྷཱི ཙ ཨདྷིཔཉྙཱདྷམྨཝིཔསྶནཱཡ།

Kathañca puggalo lābhī ceva hoti ajjhattaṃ cetosamathassa, lābhī ca adhipaññādhammavipassanāya? Idhekacco puggalo lābhī hoti rūpasahagatānaṃ vā arūpasahagatānaṃ vā samāpattīnaṃ, lābhī lokuttaramaggassa vā phalassa vā. Evaṃ puggalo lābhī ceva hoti ajjhattaṃ cetosamathassa, lābhī ca adhipaññādhammavipassanāya.

ཀཐཉྩ པུགྒལོ ནེཝ ལཱབྷཱི ཧོཏི ཨཛ྄ཛྷཏྟཾ ཙེཏོསམཐསྶ, ན ལཱབྷཱི ཨདྷིཔཉྙཱདྷམྨཝིཔསྶནཱཡ? ཨིདྷེཀཙྩོ པུགྒལོ ནེཝ ལཱབྷཱི ཧོཏི རཱུཔསཧགཏཱནཾ ཝཱ ཨརཱུཔསཧགཏཱནཾ ཝཱ སམཱཔཏྟཱིནཾ, ན ལཱབྷཱི ལོཀུཏྟརམགྒསྶ ཝཱ ཕལསྶ ཝཱ། ཨེཝཾ པུགྒལོ ནེཝ ལཱབྷཱི ཧོཏི ཨཛ྄ཛྷཏྟཾ ཙེཏོསམཐསྶ, ན ལཱབྷཱི ཨདྷིཔཉྙཱདྷམྨཝིཔསྶནཱཡ།

Kathañca puggalo neva lābhī hoti ajjhattaṃ cetosamathassa, na lābhī adhipaññādhammavipassanāya? Idhekacco puggalo neva lābhī hoti rūpasahagatānaṃ vā arūpasahagatānaṃ vā samāpattīnaṃ, na lābhī lokuttaramaggassa vā phalassa vā. Evaṃ puggalo neva lābhī hoti ajjhattaṃ cetosamathassa, na lābhī adhipaññādhammavipassanāya.

༡༨༨. ཀཏམོ ཙ པུགྒལོ ཨནུསོཏགཱམཱི? ཨིདྷེཀཙྩོ པུགྒལོ ཀཱམེ ཙ པཊིསེཝཏི པཱཔཉྩ ཀམྨཾ ཀརོཏི། ཨཡཾ ཝུཙྩཏི པུགྒལོ ‘‘ཨནུསོཏགཱམཱི’’།

188. Katamo ca puggalo anusotagāmī? Idhekacco puggalo kāme ca paṭisevati pāpañca kammaṃ karoti. Ayaṃ vuccati puggalo ‘‘anusotagāmī’’.

ཀཏམོ ཙ པུགྒལོ པཊིསོཏགཱམཱི? ཨིདྷེཀཙྩོ པུགྒལོ ཀཱམེ ཙ ན པཊིསེཝཏི པཱཔཉྩ ཀམྨཾ ན ཀརོཏི། སོ སཧཱཔི དུཀྑེན སཧཱཔི དོམནསྶེན ཨསྶུམུཁེནཔི རུདམཱནོ པརིཔུཎྞཾ པརིསུདྡྷཾ བྲཧྨཙརིཡཾ ཙརཏི། ཨཡཾ ཝུཙྩཏི པུགྒལོ ‘‘པཊིསོཏགཱམཱི’’།

Katamo ca puggalo paṭisotagāmī? Idhekacco puggalo kāme ca na paṭisevati pāpañca kammaṃ na karoti. So sahāpi dukkhena sahāpi domanassena assumukhenapi rudamāno paripuṇṇaṃ parisuddhaṃ brahmacariyaṃ carati. Ayaṃ vuccati puggalo ‘‘paṭisotagāmī’’.

ཀཏམོ ཙ པུགྒལོ ཋིཏཏྟོ? ཨིདྷེཀཙྩོ པུགྒལོ པཉྩནྣཾ ཨོརམྦྷཱགིཡཱནཾ སཾཡོཛནཱནཾ པརིཀྑཡཱ ཨོཔཔཱཏིཀོ ཧོཏི ཏཏྠ པརིནིབྦཱཡཱི ཨནཱཝཏྟིདྷམྨོ ཏསྨཱ ལོཀཱ། ཨཡཾ ཝུཙྩཏི པུགྒལོ ‘‘ཋིཏཏྟོ’’།

Katamo ca puggalo ṭhitatto? Idhekacco puggalo pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā. Ayaṃ vuccati puggalo ‘‘ṭhitatto’’.

ཀཏམོ ཙ པུགྒལོ ཏིཎྞོ པཱརངྒཏོ ཐལེ ཏིཊྛཏི བྲཱཧྨཎོ? ཨིདྷེཀཙྩོ པུགྒལོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི། ཨཡཾ ཝུཙྩཏི པུགྒལོ ཏིཎྞོ པཱརངྒཏོ ཐལེ ཏིཊྛཏི བྲཱཧྨཎོ།

Katamo ca puggalo tiṇṇo pāraṅgato thale tiṭṭhati brāhmaṇo? Idhekacco puggalo āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Ayaṃ vuccati puggalo tiṇṇo pāraṅgato thale tiṭṭhati brāhmaṇo.

༡༨༩. ཀཐཉྩ པུགྒལོ ཨཔྤསྶུཏོ ཧོཏི སུཏེན ཨནུཔཔནྣོ? ཨིདྷེཀཙྩསྶ པུགྒལསྶ ཨཔྤཀཾ སུཏཾ ཧོཏི སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ། སོ ཏསྶ ཨཔྤཀསྶ སུཏསྶ ན ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཔྤཊིཔནྣོ ⁶³ ཧོཏི། ཨེཝཾ པུགྒལོ ཨཔྤསྶུཏོ ཧོཏི སུཏེན ཨནུཔཔནྣོ།

189. Kathañca puggalo appassuto hoti sutena anupapanno? Idhekaccassa puggalassa appakaṃ sutaṃ hoti suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So tassa appakassa sutassa na atthamaññāya dhammamaññāya dhammānudhammappaṭipanno ⁶⁴ hoti. Evaṃ puggalo appassuto hoti sutena anupapanno.

ཀཐཉྩ པུགྒལོ ཨཔྤསྶུཏོ ཧོཏི སུཏེན ཨུཔཔནྣོ? ཨིདྷེཀཙྩསྶ པུགྒལསྶ ཨཔྤཀཾ སུཏཾ ཧོཏི སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ། སོ ཏསྶ ཨཔྤཀསྶ སུཏསྶ ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཔྤཊིཔནྣོ ཧོཏི། ཨེཝཾ པུགྒལོ ཨཔྤསྶུཏོ ཧོཏི སུཏེན ཨུཔཔནྣོ།

Kathañca puggalo appassuto hoti sutena upapanno? Idhekaccassa puggalassa appakaṃ sutaṃ hoti suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So tassa appakassa sutassa atthamaññāya dhammamaññāya dhammānudhammappaṭipanno hoti. Evaṃ puggalo appassuto hoti sutena upapanno.

ཀཐཉྩ པུགྒལོ བཧུསྶུཏོ ཧོཏི སུཏེན ཨནུཔཔནྣོ? ཨིདྷེཀཙྩསྶ པུགྒལསྶ བཧུཀཾ སུཏཾ ཧོཏི སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ། སོ ཏསྶ བཧུཀསྶ སུཏསྶ ན ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཔྤཊིཔནྣོ ཧོཏི། ཨེཝཾ པུགྒལོ བཧུསྶུཏོ ཧོཏི སུཏེན ཨནུཔཔནྣོ།

Kathañca puggalo bahussuto hoti sutena anupapanno? Idhekaccassa puggalassa bahukaṃ sutaṃ hoti suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So tassa bahukassa sutassa na atthamaññāya dhammamaññāya dhammānudhammappaṭipanno hoti. Evaṃ puggalo bahussuto hoti sutena anupapanno.

ཀཐཉྩ པུགྒལོ བཧུསྶུཏོ ཧོཏི སུཏེན ཨུཔཔནྣོ? ཨིདྷེཀཙྩསྶ པུགྒལསྶ བཧུཀཾ སུཏཾ ཧོཏི སུཏྟཾ གེཡྻཾ ཝེཡྻཱཀརཎཾ གཱཐཾ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླཾ། སོ ཏསྶ བཧུཀསྶ སུཏསྶ ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཔྤཊིཔནྣོ ཧོཏི། ཨེཝཾ པུགྒལོ བཧུསྶུཏོ ཧོཏི སུཏེན ཨུཔཔནྣོ།

Kathañca puggalo bahussuto hoti sutena upapanno? Idhekaccassa puggalassa bahukaṃ sutaṃ hoti suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. So tassa bahukassa sutassa atthamaññāya dhammamaññāya dhammānudhammappaṭipanno hoti. Evaṃ puggalo bahussuto hoti sutena upapanno.

༡༩༠. ཀཏམོ ཙ པུགྒལོ སམཎམཙལོ? ཨིདྷེཀཙྩོ པུགྒལོ ཏིཎྞཾ སཾཡོཛནཱནཾ པརིཀྑཡཱ སོཏཱཔནྣོ ཧོཏི ཨཝིནིཔཱཏདྷམྨོ ནིཡཏོ སམྦོདྷིཔརཱཡནོ། ཨཡཾ ཝུཙྩཏི པུགྒལོ ‘‘སམཎམཙལོ’’།

190. Katamo ca puggalo samaṇamacalo? Idhekacco puggalo tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyano. Ayaṃ vuccati puggalo ‘‘samaṇamacalo’’.

ཀཏམོ ཙ པུགྒལོ སམཎཔདུམོ? ཨིདྷེཀཙྩོ པུགྒལོ ཏིཎྞཾ སཾཡོཛནཱནཾ པརིཀྑཡཱ རཱགདོསམོཧཱནཾ ཏནུཏྟཱ སཀདཱགཱམཱི ཧོཏི, སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརོཏི། ཨཡཾ ཝུཙྩཏི པུགྒལོ ‘‘སམཎཔདུམོ’’།

Katamo ca puggalo samaṇapadumo? Idhekacco puggalo tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmī hoti, sakideva imaṃ lokaṃ āgantvā dukkhassantaṃ karoti. Ayaṃ vuccati puggalo ‘‘samaṇapadumo’’.

ཀཏམོ ཙ པུགྒལོ སམཎཔུཎྜརཱིཀོ? ཨིདྷེཀཙྩོ པུགྒལོ པཉྩནྣཾ ཨོརམྦྷཱགིཡཱནཾ སཾཡོཛནཱནཾ པརིཀྑཡཱ ཨོཔཔཱཏིཀོ ཧོཏི ཏཏྠ པརིནིབྦཱཡཱི ཨནཱཝཏྟིདྷམྨོ ཏསྨཱ ལོཀཱ། ཨཡཾ ཝུཙྩཏི པུགྒལོ ‘‘སམཎཔུཎྜརཱིཀོ’’།

Katamo ca puggalo samaṇapuṇḍarīko? Idhekacco puggalo pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā. Ayaṃ vuccati puggalo ‘‘samaṇapuṇḍarīko’’.

ཀཏམོ ཙ པུགྒལོ སམཎེསུ སམཎསུཁུམཱལོ? ཨིདྷེཀཙྩོ པུགྒལོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི། ཨཡཾ ཝུཙྩཏི པུགྒལོ ‘‘སམཎེསུ སམཎསུཁུམཱལོ’’ཏི།

Katamo ca puggalo samaṇesu samaṇasukhumālo? Idhekacco puggalo āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Ayaṃ vuccati puggalo ‘‘samaṇesu samaṇasukhumālo’’ti.

ཙཏུཀྐནིདྡེསོ།

Catukkaniddeso.

Next: ༥. པཉྩཀཔུགྒལཔཉྙཏྟི • 5. Pañcakapuggalapaññatti

Footnotes:

1. པིསུཎཱཝཱཙོ

2. ཕརུསཱཝཱཙོ (སཱི॰) དཱི॰ ནི॰ ༣.༡༡༥

3. མིཙྪཱདིཊྛཱི (ཀ॰)

4. pisuṇāvāco

5. pharusāvāco (sī.) dī. ni. 3.115

6. micchādiṭṭhī (ka.)

7. སམྨཱདིཊྛཱི (ཀ॰)

8. sammādiṭṭhī (ka.)

9. ཡུཏྟཔཊིབྷཱཎོ (སྱཱ॰) ཨ॰ ནི॰ ༤.༡༣༢

10. yuttapaṭibhāṇo (syā.) a. ni. 4.132

11. པཀྐཝཎྞཱི

12. ཨཱམཝཎྞཱི (སྱཱ॰ ཀ॰) ཨ॰ ནི॰ ༤.༡༠༥

13. pakkavaṇṇī

14. āmavaṇṇī (syā. ka.) a. ni. 4.105

15. སམྨིཉྫིཏཾ (སཱི॰ སྱཱ॰)

16. sammiñjitaṃ (sī. syā.)

17. བལིབདྡྷཱ (སྱཱ॰)

18. སགཝཙཎྜོ (ཀ॰ སཱི॰) ཨ॰ ནི॰ ༤.༡༠༨

19. balibaddhā (syā.)

20. sagavacaṇḍo (ka. sī.) a. ni. 4.108

21. ཨཱསིཝིསཱ (སྱཱ॰)

22. āsivisā (syā.)

23. ནེཝ ཁོ (སཱི॰) ཨ॰ ནི॰ ༤.༡༡༠

24. neva kho (sī.) a. ni. 4.110

25. པརནིམྨིཏཝསཝཏྟིདེཝེ (སཱི॰ སྱཱ॰)

26. paranimmitavasavattideve (sī. syā.)

27. ཝེཎཀུལེ (སཱི॰ སྱཱ॰)

28. དལི༹དྡེ (སཱི॰) པསྶ ཨངྒུཏྟརནིཀཱཡེ

29. veṇakule (sī. syā.)

30. daḷidde (sī.) passa aṅguttaranikāye

31. པརཝཎྞཧཱརིཡཱ (སཱི॰)

32. paravaṇṇahāriyā (sī.)

33. ཧཏྠཱཝལེཁནོ (སྱཱ॰)

34. ཀལོཔིམུཁཱ (སཱི॰ སྱཱ॰) མ॰ ནི॰ ༢.༧

35. དྭཱཧིཀམྤི (སཱི॰)

36. ཨུལུཀཔཀྑམྤི (སཱི॰ སྱཱ॰)

37. སཱཡཾཏཏིཡཀམྤི (སྱཱ॰ ཀ॰) མ॰ ནི॰ ༢.༧

38. hatthāvalekhano (syā.)

39. kalopimukhā (sī. syā.) ma. ni. 2.7

40. dvāhikampi (sī.)

41. ulukapakkhampi (sī. syā.)

42. sāyaṃtatiyakampi (syā. ka.) ma. ni. 2.7

43. མུདྡྷཱབྷིསིཏྟོ (སྱཱ॰ ཀ॰)

44. སནྟཱགཱརཾ (སྱཱ॰), ཡཉྙཱགཱརཾ (སཱི॰)

45. ཁུརཱཛིནཾ (སྱཱ॰ ཀ॰)

46. ཀཎྜཱུཡམཱནོ (སཱི॰)

47. ( ) ནཏྠི སཱིཧལ༹པོཏྠཀེ། མཛ྄ཛྷིམནིཀཱཡེ ཀནྡརཀསུཏྟེཔི ཨེཝམེཝ

48. པརིཧིཾསཏྠཱཡཱཏི (སཱི॰ སྱཱ॰ ཀ॰) མ॰ ནི॰ ༢.༩

49. muddhābhisitto (syā. ka.)

50. santāgāraṃ (syā.), yaññāgāraṃ (sī.)

51. khurājinaṃ (syā. ka.)

52. kaṇḍūyamāno (sī.)

53. ( ) natthi sīhaḷapotthake. majjhimanikāye kandarakasuttepi evameva

54. parihiṃsatthāyāti (sī. syā. ka.) ma. ni. 2.9

55. ཨནཱཙཱརཱི (ཀ॰)

56. anācārī (ka.)

57. … སཱཝིཡོགཱ (སྱཱ॰ ཀ॰)

58. … sāviyogā (syā. ka.)

59. པསྶ མ॰ ནི॰ ༢ ཀནྡརཀསུཏྟེ; ཨ॰ ནི॰ ༡ ཨཏྟནྟཔསུཏྟེ ཙ

60. ཐཱིནམིདྡྷཾ (སཱི॰ སྱཱ॰)

61. passa ma. ni. 2 kandarakasutte; a. ni. 1 attantapasutte ca

62. thīnamiddhaṃ (sī. syā.)

63. ན དྷམྨམཉྙཱཡ ན དྷམྨཱནུདྷམྨཔཊིཔནྣོ (སྱཱ॰), ན དྷམྨམཉྙཱཡ དྷམྨཱནུདྷམྨཔྤཊིཔནྣོ (ཀ॰)

64. na dhammamaññāya na dhammānudhammapaṭipanno (syā.), na dhammamaññāya dhammānudhammappaṭipanno (ka.)

Related texts:

ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༤. ཙཏུཀྐནིདྡེསཝཎྞནཱ • 4. Catukkaniddesavaṇṇanā

ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༤. ཙཏུཀྐནིདྡེསཝཎྞནཱ • 4. Catukkaniddesavaṇṇanā

ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༤. ཙཏུཀྐནིདྡེསཝཎྞནཱ • 4. Catukkaniddesavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact