| Library / Tipiṭaka / તિપિટક • Tipiṭaka / સારત્થદીપની-ટીકા • Sāratthadīpanī-ṭīkā |
ચતુમહાપદેસકથાવણ્ણના
Catumahāpadesakathāvaṇṇanā
૩૦૫. પરિમદ્દન્તાતિ ઉપપરિક્ખન્તા. પત્તુણ્ણદેસે સઞ્જાતવત્થં પત્તુણ્ણં. કોસેય્યવિસેસોતિ હિ અભિધાનકોસે વુત્તં. ચીનદેસે સોમારદેસે ચ સઞ્જાતવત્થાનિ ચીનસોમારપટાનિ. પત્તુણ્ણાદીનિ તીણિ કોસેય્યસ્સ અનુલોમાનિ પાણકેહિ કતસુત્તમયત્તા. ઇદ્ધિમયિકં એહિભિક્ખૂનં પુઞ્ઞિદ્ધિયા નિબ્બત્તચીવરં. તં ખોમાદીનં અઞ્ઞતરં હોતીતિ તેસંયેવ અનુલોમં. દેવતાહિ દિન્નચીવરં દેવદત્તિયં. તં કપ્પરુક્ખે નિબ્બત્તં જાલિનીદેવકઞ્ઞાય અનુરુદ્ધત્થેરસ્સ દિન્નવત્થસદિસં. તમ્પિ ખોમાદીનઞ્ઞેવ અનુલોમં હોતિ તેસુ અઞ્ઞતરભાવતો. દ્વે પટા દેસનામેનેવ વુત્તાતિ તેસં સરૂપદસ્સનપરમેતં, નાઞ્ઞં નિવત્તનપરં પત્તુણ્ણપટસ્સપિ દેસનામેનેવ વુત્તત્તા. તુમ્બાતિ ભાજનાનિ . ફલતુમ્બોતિ લાબુઆદિ. ઉદકતુમ્બોતિ ઉદકુક્ખિપનકકુટકો. કિલઞ્જચ્છત્તન્તિ વેળુવિલીવેહિ વાયિત્વા કતછત્તં. સમ્ભિન્નરસન્તિ સમ્મિસ્સિતરસં. પાનકં પટિગ્ગહિતં હોતીતિ અમ્બપાનાદિપાનકં પટિગ્ગહિતં હોતિ, તં વિકાલેપિ કપ્પતિ અસમ્ભિન્નરસત્તા. તેન તદહુપટિગ્ગહિતેન સદ્ધિન્તિ તેન સત્તાહકાલિકેન તદહુપટિગ્ગહિતેન સદ્ધિં. સેસમેત્થ સુવિઞ્ઞેય્યમેવ.
305.Parimaddantāti upaparikkhantā. Pattuṇṇadese sañjātavatthaṃ pattuṇṇaṃ. Koseyyavisesoti hi abhidhānakose vuttaṃ. Cīnadese somāradese ca sañjātavatthāni cīnasomārapaṭāni. Pattuṇṇādīni tīṇi koseyyassa anulomāni pāṇakehi katasuttamayattā. Iddhimayikaṃ ehibhikkhūnaṃ puññiddhiyā nibbattacīvaraṃ. Taṃ khomādīnaṃ aññataraṃ hotīti tesaṃyeva anulomaṃ. Devatāhi dinnacīvaraṃ devadattiyaṃ. Taṃ kapparukkhe nibbattaṃ jālinīdevakaññāya anuruddhattherassa dinnavatthasadisaṃ. Tampi khomādīnaññeva anulomaṃ hoti tesu aññatarabhāvato. Dve paṭā desanāmeneva vuttāti tesaṃ sarūpadassanaparametaṃ, nāññaṃ nivattanaparaṃ pattuṇṇapaṭassapi desanāmeneva vuttattā. Tumbāti bhājanāni . Phalatumboti lābuādi. Udakatumboti udakukkhipanakakuṭako. Kilañjacchattanti veḷuvilīvehi vāyitvā katachattaṃ. Sambhinnarasanti sammissitarasaṃ. Pānakaṃ paṭiggahitaṃ hotīti ambapānādipānakaṃ paṭiggahitaṃ hoti, taṃ vikālepi kappati asambhinnarasattā. Tena tadahupaṭiggahitena saddhinti tena sattāhakālikena tadahupaṭiggahitena saddhiṃ. Sesamettha suviññeyyameva.
ચતુમહાપદેસકથાવણ્ણના નિટ્ઠિતા.
Catumahāpadesakathāvaṇṇanā niṭṭhitā.
ભેસજ્જક્ખન્ધકવણ્ણના નિટ્ઠિતા.
Bhesajjakkhandhakavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવગ્ગપાળિ • Mahāvaggapāḷi / ૧૮૫. ચતુમહાપદેસકથા • 185. Catumahāpadesakathā
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવગ્ગ-અટ્ઠકથા • Mahāvagga-aṭṭhakathā / ચતુમહાપદેસકથા • Catumahāpadesakathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / કેણિયજટિલવત્થુકથાવણ્ણના • Keṇiyajaṭilavatthukathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ચતુમહાપદેસકથાવણ્ણના • Catumahāpadesakathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૧૮૫. ચતુમહાપદેસકથા • 185. Catumahāpadesakathā
