| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૭. ચતુમહારાજસુત્તવણ્ણના
7. Catumahārājasuttavaṇṇanā
૩૭. સત્તમે અમા સહ વત્તન્તિ તસ્મિં તસ્મિં કિચ્ચેતિ અમચ્ચા, સહિતા. પરિસતિ ભવાતિ પારિસજ્જા, પરિવારટ્ઠાનિયા પરિસાપરિયાપન્ના. તેનાહ ‘‘પરિચારિકદેવતા’’તિ. તાતાતિ આલપનં. એવન્તિ ‘‘કચ્ચિ બહૂ મનુસ્સા’’તિઆદિના વુત્તાકારેન. અટ્ઠ વારેતિ એકસ્મિં અડ્ઢમાસે ચતુક્ખત્તું તથા ઇતરસ્મિન્તિ એવં અટ્ઠ વારે. અધિટ્ઠહન્તીતિ અધિતિટ્ઠન્તિ. પટિજાગરોન્તીતિ પટિ પટિ જાગરોન્તિ. પુઞ્ઞં કરોન્તા હિ સત્તા જાગરોન્તિ નામ કાતબ્બકિચ્ચપ્પસુતત્તા, ઇતરે પન સુપન્તિ નામ સહિતપરહિતવિમુત્તત્તા. ચાતુદ્દસિઉપોસથસ્સ અનુગમનં વિય પન્નરસિઉપોસથસ્સ પચ્ચુગ્ગમનં ન લબ્ભતિ દિવસાભાવતો.
37. Sattame amā saha vattanti tasmiṃ tasmiṃ kicceti amaccā, sahitā. Parisati bhavāti pārisajjā, parivāraṭṭhāniyā parisāpariyāpannā. Tenāha ‘‘paricārikadevatā’’ti. Tātāti ālapanaṃ. Evanti ‘‘kacci bahū manussā’’tiādinā vuttākārena. Aṭṭha vāreti ekasmiṃ aḍḍhamāse catukkhattuṃ tathā itarasminti evaṃ aṭṭha vāre. Adhiṭṭhahantīti adhitiṭṭhanti. Paṭijāgarontīti paṭi paṭi jāgaronti. Puññaṃ karontā hi sattā jāgaronti nāma kātabbakiccappasutattā, itare pana supanti nāma sahitaparahitavimuttattā. Cātuddasiuposathassa anugamanaṃ viya pannarasiuposathassa paccuggamanaṃ na labbhati divasābhāvato.
તતોતિ તતો તતો. તં ઉપનિસ્સાયાતિ તા તા ગામનિગમરાજધાનિયો ઉપનિસ્સાય. અધિવત્થાતિ આરામવનરુક્ખાદીસુ અધિવત્થા દેવતા. તેતિ તે દેવા. સન્ધાય કથેતીતિ ભગવા કથેતિ. વુત્તન્તિ અટ્ઠકથાયં વુત્તં.
Tatoti tato tato. Taṃ upanissāyāti tā tā gāmanigamarājadhāniyo upanissāya. Adhivatthāti ārāmavanarukkhādīsu adhivatthā devatā. Teti te devā. Sandhāya kathetīti bhagavā katheti. Vuttanti aṭṭhakathāyaṃ vuttaṃ.
નિચ્ચં નિબદ્ધં ઉપોસથો સંવચ્છરે સંવચ્છરે પટિ પટિ હરિતબ્બતો પવત્તેતબ્બતો પાટિહારિયપક્ખો નામ. ગુણઙ્ગેહીતિ ઉપોસથઙ્ગેહિ.
Niccaṃ nibaddhaṃ uposatho saṃvacchare saṃvacchare paṭi paṭi haritabbato pavattetabbato pāṭihāriyapakkho nāma. Guṇaṅgehīti uposathaṅgehi.
વુત્થવાસોતિ વુસિતબ્રહ્મચરિયવાસો. કત્તબ્બકિચ્ચન્તિ દુક્ખાદીસુ પરિઞ્ઞાતાદિકિચ્ચં. ઓતારેત્વાતિ છડ્ડેત્વા. પરિક્ખીણભવસંયોજનોતિ સબ્બસો ખીણભવબન્ધનો. કારણેન જાનિત્વાતિ વિપસ્સનાપઞ્ઞાસહિતાય મગ્ગપઞ્ઞાય ચત્તારિ અરિયસચ્ચાનિ જાનિત્વા.
Vutthavāsoti vusitabrahmacariyavāso. Kattabbakiccanti dukkhādīsu pariññātādikiccaṃ. Otāretvāti chaḍḍetvā. Parikkhīṇabhavasaṃyojanoti sabbaso khīṇabhavabandhano. Kāraṇena jānitvāti vipassanāpaññāsahitāya maggapaññāya cattāri ariyasaccāni jānitvā.
જાનન્તોતિ ‘‘અરહન્તાનં અનુકરણપ્પટિપત્તિ એસા, યદિદં સમ્મદેવ ઉપોસથાનુટ્ઠાન’’ન્તિ એવં ઉપોસથકમ્મસ્સ ગુણં જાનન્તો. એવરૂપેનાતિ યાદિસો ભગવતો ઉપોસથભાવો વિહિતો, એવરૂપેન અરહન્તાનુકરણેન ઉપોસથકમ્મેન. સક્કા પહિતત્તો વિપસ્સનં ઉસ્સુક્કાપેત્વા ખીણાસવસમ્પત્તિં પાપુણિતું. અટ્ઠમં ઉત્તાનત્થમેવ સત્તમે વુત્તનયત્તા.
Jānantoti ‘‘arahantānaṃ anukaraṇappaṭipatti esā, yadidaṃ sammadeva uposathānuṭṭhāna’’nti evaṃ uposathakammassa guṇaṃ jānanto. Evarūpenāti yādiso bhagavato uposathabhāvo vihito, evarūpena arahantānukaraṇena uposathakammena. Sakkā pahitatto vipassanaṃ ussukkāpetvā khīṇāsavasampattiṃ pāpuṇituṃ. Aṭṭhamaṃ uttānatthameva sattame vuttanayattā.
ચતુમહારાજસુત્તવણ્ણના નિટ્ઠિતા.
Catumahārājasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૭. ચતુમહારાજસુત્તં • 7. Catumahārājasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૭. ચતુમહારાજસુત્તવણ્ણના • 7. Catumahārājasuttavaṇṇanā
