| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೦. ಚತುತ್ಥಅನಾಗತಭಯಸುತ್ತಂ
10. Catutthaanāgatabhayasuttaṃ
೮೦. ‘‘ಪಞ್ಚಿಮಾನಿ, ಭಿಕ್ಖವೇ, ಅನಾಗತಭಯಾನಿ ಏತರಹಿ ಅಸಮುಪ್ಪನ್ನಾನಿ ಆಯತಿಂ ಸಮುಪ್ಪಜ್ಜಿಸ್ಸನ್ತಿ। ತಾನಿ ವೋ ಪಟಿಬುಜ್ಝಿತಬ್ಬಾನಿ; ಪಟಿಬುಜ್ಝಿತ್ವಾ ಚ ತೇಸಂ ಪಹಾನಾಯ ವಾಯಮಿತಬ್ಬಂ।
80. ‘‘Pañcimāni, bhikkhave, anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabbaṃ.
‘‘ಕತಮಾನಿ ಪಞ್ಚ? ಭವಿಸ್ಸನ್ತಿ, ಭಿಕ್ಖವೇ, ಭಿಕ್ಖೂ ಅನಾಗತಮದ್ಧಾನಂ ಚೀವರೇ ಕಲ್ಯಾಣಕಾಮಾ। ತೇ ಚೀವರೇ ಕಲ್ಯಾಣಕಾಮಾ ಸಮಾನಾ ರಿಞ್ಚಿಸ್ಸನ್ತಿ ಪಂಸುಕೂಲಿಕತ್ತಂ, ರಿಞ್ಚಿಸ್ಸನ್ತಿ ಅರಞ್ಞವನಪತ್ಥಾನಿ ಪನ್ತಾನಿ ಸೇನಾಸನಾನಿ; ಗಾಮನಿಗಮರಾಜಧಾನೀಸು ಓಸರಿತ್ವಾ ವಾಸಂ ಕಪ್ಪೇಸ್ಸನ್ತಿ, ಚೀವರಹೇತು ಚ ಅನೇಕವಿಹಿತಂ ಅನೇಸನಂ ಅಪ್ಪತಿರೂಪಂ ಆಪಜ್ಜಿಸ್ಸನ್ತಿ। ಇದಂ, ಭಿಕ್ಖವೇ, ಪಠಮಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ। ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ।
‘‘Katamāni pañca? Bhavissanti, bhikkhave, bhikkhū anāgatamaddhānaṃ cīvare kalyāṇakāmā. Te cīvare kalyāṇakāmā samānā riñcissanti paṃsukūlikattaṃ, riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti, cīvarahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, paṭhamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ಪುನ ಚಪರಂ, ಭಿಕ್ಖವೇ, ಭವಿಸ್ಸನ್ತಿ ಭಿಕ್ಖೂ ಅನಾಗತಮದ್ಧಾನಂ ಪಿಣ್ಡಪಾತೇ ಕಲ್ಯಾಣಕಾಮಾ। ತೇ ಪಿಣ್ಡಪಾತೇ ಕಲ್ಯಾಣಕಾಮಾ ಸಮಾನಾ ರಿಞ್ಚಿಸ್ಸನ್ತಿ ಪಿಣ್ಡಪಾತಿಕತ್ತಂ , ರಿಞ್ಚಿಸ್ಸನ್ತಿ ಅರಞ್ಞವನಪತ್ಥಾನಿ ಪನ್ತಾನಿ ಸೇನಾಸನಾನಿ; ಗಾಮನಿಗಮರಾಜಧಾನೀಸು ಓಸರಿತ್ವಾ ವಾಸಂ ಕಪ್ಪೇಸ್ಸನ್ತಿ ಜಿವ್ಹಗ್ಗೇನ ರಸಗ್ಗಾನಿ ಪರಿಯೇಸಮಾನಾ, ಪಿಣ್ಡಪಾತಹೇತು ಚ ಅನೇಕವಿಹಿತಂ ಅನೇಸನಂ ಅಪ್ಪತಿರೂಪಂ ಆಪಜ್ಜಿಸ್ಸನ್ತಿ। ಇದಂ, ಭಿಕ್ಖವೇ, ದುತಿಯಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ। ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ।
‘‘Puna caparaṃ, bhikkhave, bhavissanti bhikkhū anāgatamaddhānaṃ piṇḍapāte kalyāṇakāmā. Te piṇḍapāte kalyāṇakāmā samānā riñcissanti piṇḍapātikattaṃ , riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti jivhaggena rasaggāni pariyesamānā, piṇḍapātahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, dutiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ಪುನ ಚಪರಂ, ಭಿಕ್ಖವೇ, ಭವಿಸ್ಸನ್ತಿ ಭಿಕ್ಖೂ ಅನಾಗತಮದ್ಧಾನಂ ಸೇನಾಸನೇ ಕಲ್ಯಾಣಕಾಮಾ। ತೇ ಸೇನಾಸನೇ ಕಲ್ಯಾಣಕಾಮಾ ಸಮಾನಾ ರಿಞ್ಚಿಸ್ಸನ್ತಿ ರುಕ್ಖಮೂಲಿಕತ್ತಂ 1, ರಿಞ್ಚಿಸ್ಸನ್ತಿ ಅರಞ್ಞವನಪತ್ಥಾನಿ ಪನ್ತಾನಿ ಸೇನಾಸನಾನಿ; ಗಾಮನಿಗಮರಾಜಧಾನೀಸು ಓಸರಿತ್ವಾ ವಾಸಂ ಕಪ್ಪೇಸ್ಸನ್ತಿ, ಸೇನಾಸನಹೇತು ಚ ಅನೇಕವಿಹಿತಂ ಅನೇಸನಂ ಅಪ್ಪತಿರೂಪಂ ಆಪಜ್ಜಿಸ್ಸನ್ತಿ। ಇದಂ, ಭಿಕ್ಖವೇ, ತತಿಯಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ। ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ।
‘‘Puna caparaṃ, bhikkhave, bhavissanti bhikkhū anāgatamaddhānaṃ senāsane kalyāṇakāmā. Te senāsane kalyāṇakāmā samānā riñcissanti rukkhamūlikattaṃ 2, riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti, senāsanahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, tatiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ಪುನ ಚಪರಂ, ಭಿಕ್ಖವೇ, ಭವಿಸ್ಸನ್ತಿ ಭಿಕ್ಖೂ ಅನಾಗತಮದ್ಧಾನಂ ಭಿಕ್ಖುನೀಸಿಕ್ಖಮಾನಾಸಮಣುದ್ದೇಸೇಹಿ ಸಂಸಟ್ಠಾ ವಿಹರಿಸ್ಸನ್ತಿ। ಭಿಕ್ಖುನೀಸಿಕ್ಖಮಾನಾಸಮಣುದ್ದೇಸೇಹಿ ಸಂಸಗ್ಗೇ ಖೋ ಪನ, ಭಿಕ್ಖವೇ, ಸತಿ ಏತಂ ಪಾಟಿಕಙ್ಖಂ – ‘ಅನಭಿರತಾ ವಾ ಬ್ರಹ್ಮಚರಿಯಂ ಚರಿಸ್ಸನ್ತಿ, ಅಞ್ಞತರಂ ವಾ ಸಂಕಿಲಿಟ್ಠಂ ಆಪತ್ತಿಂ ಆಪಜ್ಜಿಸ್ಸನ್ತಿ, ಸಿಕ್ಖಂ ವಾ ಪಚ್ಚಕ್ಖಾಯ ಹೀನಾಯಾವತ್ತಿಸ್ಸನ್ತಿ’। ಇದಂ, ಭಿಕ್ಖವೇ, ಚತುತ್ಥಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ। ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ।
‘‘Puna caparaṃ, bhikkhave, bhavissanti bhikkhū anāgatamaddhānaṃ bhikkhunīsikkhamānāsamaṇuddesehi saṃsaṭṭhā viharissanti. Bhikkhunīsikkhamānāsamaṇuddesehi saṃsagge kho pana, bhikkhave, sati etaṃ pāṭikaṅkhaṃ – ‘anabhiratā vā brahmacariyaṃ carissanti, aññataraṃ vā saṃkiliṭṭhaṃ āpattiṃ āpajjissanti, sikkhaṃ vā paccakkhāya hīnāyāvattissanti’. Idaṃ, bhikkhave, catutthaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ಪುನ ಚಪರಂ, ಭಿಕ್ಖವೇ, ಭವಿಸ್ಸನ್ತಿ ಭಿಕ್ಖೂ ಅನಾಗತಮದ್ಧಾನಂ ಆರಾಮಿಕಸಮಣುದ್ದೇಸೇಹಿ ಸಂಸಟ್ಠಾ ವಿಹರಿಸ್ಸನ್ತಿ। ಆರಾಮಿಕಸಮಣುದ್ದೇಸೇಹಿ ಸಂಸಗ್ಗೇ ಖೋ ಪನ, ಭಿಕ್ಖವೇ, ಸತಿ ಏತಂ ಪಾಟಿಕಙ್ಖಂ – ‘ಅನೇಕವಿಹಿತಂ ಸನ್ನಿಧಿಕಾರಪರಿಭೋಗಂ ಅನುಯುತ್ತಾ ವಿಹರಿಸ್ಸನ್ತಿ, ಓಳಾರಿಕಮ್ಪಿ ನಿಮಿತ್ತಂ ಕರಿಸ್ಸನ್ತಿ, ಪಥವಿಯಾಪಿ ಹರಿತಗ್ಗೇಪಿ’। ಇದಂ, ಭಿಕ್ಖವೇ, ಪಞ್ಚಮಂ ಅನಾಗತಭಯಂ ಏತರಹಿ ಅಸಮುಪ್ಪನ್ನಂ ಆಯತಿಂ ಸಮುಪ್ಪಜ್ಜಿಸ್ಸತಿ। ತಂ ವೋ ಪಟಿಬುಜ್ಝಿತಬ್ಬಂ; ಪಟಿಬುಜ್ಝಿತ್ವಾ ಚ ತಸ್ಸ ಪಹಾನಾಯ ವಾಯಮಿತಬ್ಬಂ।
‘‘Puna caparaṃ, bhikkhave, bhavissanti bhikkhū anāgatamaddhānaṃ ārāmikasamaṇuddesehi saṃsaṭṭhā viharissanti. Ārāmikasamaṇuddesehi saṃsagge kho pana, bhikkhave, sati etaṃ pāṭikaṅkhaṃ – ‘anekavihitaṃ sannidhikāraparibhogaṃ anuyuttā viharissanti, oḷārikampi nimittaṃ karissanti, pathaviyāpi haritaggepi’. Idaṃ, bhikkhave, pañcamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ಇಮಾನಿ ಖೋ, ಭಿಕ್ಖವೇ, ಪಞ್ಚ ಅನಾಗತಭಯಾನಿ ಏತರಹಿ ಅಸಮುಪ್ಪನ್ನಾನಿ ಆಯತಿಂ ಸಮುಪ್ಪಜ್ಜಿಸ್ಸನ್ತಿ। ತಾನಿ ವೋ ಪಟಿಬುಜ್ಝಿತಬ್ಬಾನಿ; ಪಟಿಬುಜ್ಝಿತ್ವಾ ಚ ತೇಸಂ ಪಹಾನಾಯ ವಾಯಮಿತಬ್ಬ’’ನ್ತಿ। ದಸಮಂ।
‘‘Imāni kho, bhikkhave, pañca anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabba’’nti. Dasamaṃ.
ಯೋಧಾಜೀವವಗ್ಗೋ ತತಿಯೋ।
Yodhājīvavaggo tatiyo.
ತಸ್ಸುದ್ದಾನಂ –
Tassuddānaṃ –
ದ್ವೇ ಚೇತೋವಿಮುತ್ತಿಫಲಾ, ದ್ವೇ ಚ ಧಮ್ಮವಿಹಾರಿನೋ।
Dve cetovimuttiphalā, dve ca dhammavihārino;
ಯೋಧಾಜೀವಾ ಚ ದ್ವೇ ವುತ್ತಾ, ಚತ್ತಾರೋ ಚ ಅನಾಗತಾತಿ॥
Yodhājīvā ca dve vuttā, cattāro ca anāgatāti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೦. ಚತುತ್ಥಅನಾಗತಭಯಸುತ್ತವಣ್ಣನಾ • 10. Catutthaanāgatabhayasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೦. ಚತುತ್ಥಅನಾಗತಭಯಸುತ್ತವಣ್ಣನಾ • 10. Catutthaanāgatabhayasuttavaṇṇanā
