| Library / Tipiṭaka / તિપિટક • Tipiṭaka / વિનયવિનિચ્છય-ટીકા • Vinayavinicchaya-ṭīkā |
ચતુત્થપારાજિકકથાવણ્ણના
Catutthapārājikakathāvaṇṇanā
૩૦૬-૭. એવં નાતિસઙ્ખેપવિત્થારનયેન તતિયપારાજિકવિનિચ્છયં દસ્સેત્વા ઇદાનિ ચતુત્થપારાજિકવિનિચ્છયં દસ્સેતુમાહ ‘‘અસન્ત’’ન્તિઆદિ. તત્થ ‘‘અસન્ત’’ન્તિ અપેક્ખિત્વા ‘‘અત્તની’’તિ ચ ‘‘ઝાનાદિભેદ’’ન્તિ અપેક્ખિત્વા ‘‘ઉત્તરિમનુસ્સધમ્મ’’ન્તિ ચ ‘‘સમુદાચરેય્યા’’તિ અપેક્ખિત્વા ‘‘યો ભિક્ખૂ’’તિ ચ સામત્થિયા લબ્ભતીતિ અજ્ઝાહરિત્વા ‘‘અત્તનિ અસન્ત’’ન્તિઆદિના નયેન યોજેતબ્બં.
306-7. Evaṃ nātisaṅkhepavitthāranayena tatiyapārājikavinicchayaṃ dassetvā idāni catutthapārājikavinicchayaṃ dassetumāha ‘‘asanta’’ntiādi. Tattha ‘‘asanta’’nti apekkhitvā ‘‘attanī’’ti ca ‘‘jhānādibheda’’nti apekkhitvā ‘‘uttarimanussadhamma’’nti ca ‘‘samudācareyyā’’ti apekkhitvā ‘‘yo bhikkhū’’ti ca sāmatthiyā labbhatīti ajjhāharitvā ‘‘attani asanta’’ntiādinā nayena yojetabbaṃ.
અત્તનિ અસન્તન્તિ તસ્મિં અત્તભાવે અત્તનો સન્તાને અનુપ્પાદિતતાય અવિજ્જમાનં. અત્તસ્સિતમેવ કત્વાતિ અત્તુપનાયિકં કત્વા અત્તનિ વિજ્જમાનં વિય કત્વા તં ઉપનેત્વા . ભવં અધિટ્ઠાય ચ વત્તમાનન્તિ પટિસન્ધિતો પટ્ઠાય ચ વત્તન્તં ભવં ચિત્તેન અધિટ્ઠહિત્વા તક્કેત્વા, ચિત્તે ઠપેત્વાતિ વુત્તં હોતિ. અઞ્ઞાપદેસઞ્ચ વિનાતિ ‘‘યો તે વિહારે વસતીધ ભિક્ખૂ’’તિઆદિના નયેન વક્ખમાનં પરિયાયકથં ઠપેત્વા. અધિમાનઞ્ચ વિનાતિ અદિટ્ઠે દિટ્ઠસઞ્ઞિતાદિસભાવં અધિગતમાનસઙ્ખાતં ‘‘અધિગતઉત્તરિમનુસ્સધમ્મો અહમ્હી’’તિ અધિમાનઞ્ચ ઠપેત્વા. ઝાનાદિભેદન્તિ ઝાનાદયો ભેદા વિસેસા યસ્સ તં ઝાનાદિભેદં, ‘‘ઉત્તરિમનુસ્સધમ્મો નામ ઝાનં વિમોક્ખો સમાધિ સમાપત્તિ ઞાણદસ્સનં મગ્ગભાવના ફલસચ્છિ કિરિયા કિલેસપ્પહાનં વિનીવરણતા ચિત્તસ્સ સુઞ્ઞાગારે અભિરતી’’તિ (પારા॰ ૧૯૮, ૧૯૯) પદભાજને વુત્તં ઝાનાદિધમ્મવિસેસન્તિ અત્થો. ‘‘ઉત્તરિમનુસ્સધમ્મન્તિ ઉત્તરિમનુસ્સાનં ઝાયીનઞ્ચેવ અરિયાનઞ્ચ ધમ્મ’’ન્તિ (પારા॰ અટ્ઠ॰ ૨.૧૯૭) અટ્ઠકથાય વુત્તં ઝાનલાભીહિ ચેવ અટ્ઠહિ અરિયપુગ્ગલેહિ ચ અધિગતત્તા તેસં સન્તકન્તિ સઙ્ખ્યં ગતં ઉત્તરિમનુસ્સધમ્મં.
Attaniasantanti tasmiṃ attabhāve attano santāne anuppāditatāya avijjamānaṃ. Attassitameva katvāti attupanāyikaṃ katvā attani vijjamānaṃ viya katvā taṃ upanetvā . Bhavaṃ adhiṭṭhāya ca vattamānanti paṭisandhito paṭṭhāya ca vattantaṃ bhavaṃ cittena adhiṭṭhahitvā takketvā, citte ṭhapetvāti vuttaṃ hoti. Aññāpadesañca vināti ‘‘yo te vihāre vasatīdha bhikkhū’’tiādinā nayena vakkhamānaṃ pariyāyakathaṃ ṭhapetvā. Adhimānañca vināti adiṭṭhe diṭṭhasaññitādisabhāvaṃ adhigatamānasaṅkhātaṃ ‘‘adhigatauttarimanussadhammo ahamhī’’ti adhimānañca ṭhapetvā. Jhānādibhedanti jhānādayo bhedā visesā yassa taṃ jhānādibhedaṃ, ‘‘uttarimanussadhammo nāma jhānaṃ vimokkho samādhi samāpatti ñāṇadassanaṃ maggabhāvanā phalasacchi kiriyā kilesappahānaṃ vinīvaraṇatā cittassa suññāgāre abhiratī’’ti (pārā. 198, 199) padabhājane vuttaṃ jhānādidhammavisesanti attho. ‘‘Uttarimanussadhammanti uttarimanussānaṃ jhāyīnañceva ariyānañca dhamma’’nti (pārā. aṭṭha. 2.197) aṭṭhakathāya vuttaṃ jhānalābhīhi ceva aṭṭhahi ariyapuggalehi ca adhigatattā tesaṃ santakanti saṅkhyaṃ gataṃ uttarimanussadhammaṃ.
વિઞ્ઞત્તિપથે ઠિતસ્સ કાયેન વા વાચાય વા યો ભિક્ખુ સમુદાચરેય્યાતિ અજ્ઝાહરિત્વા યોજેતબ્બં. વિઞ્ઞત્તિપથે ઠિતસ્સાતિ દ્વાદસહત્થબ્ભન્તરે પદેસે ઠિતસ્સ ‘‘ઇત્થિયા વા પુરિસસ્સ વા ગહટ્ઠસ્સ વા પબ્બજિતસ્સ વા’’તિ (પારા॰ ૧૯૮) પદભાજને વુત્તસ્સ યસ્સ કસ્સચિ. કાયેન વાતિ હત્થમુદ્દાદિવસેન કાયેન વા. ‘‘સિક્ખાપચ્ચક્ખાનં હત્થમુદ્દાય સીસં ન ઓતરતિ, ઇદં અભૂતારોચનં હત્થમુદ્દાયપિ ઓતરતી’’તિ (પારા॰ અટ્ઠ॰ ૨.૨૧૫) અટ્ઠકથાયં વુત્તત્તા ઇધ હત્થમુદ્દાદિહત્થવિકારો ચ અઙ્ગપચ્ચઙ્ગચોપનઞ્ચ ‘‘કાયેના’’તિ ઇમિના ગહેતબ્બં. વાચાય વાતિ યો સવનૂપચારે ઠિતો તેન વિઞ્ઞાતું સક્કુણેય્યેન યેન કેનચિ વોહારેન વા. યો ભિક્ખૂતિ યો ઉપસમ્પન્નો થેરો વા નવો વા મજ્ઝિમો વા. સમુદાચરેય્યાતિ ‘‘પઠમં ઝાનં સમાપજ્જામી’’તિઆદિવચનપ્પકારેસુ યં કઞ્ચિ પકારં વદેય્ય. તદત્થેતિ તેન વુત્તવાક્યસ્સ અત્થે. ઞાતેવાતિ ઞાતે એવ. માતુગામં વા પુરિસં વા યં કિઞ્ચિ ઉદ્દિસ્સ વુત્તે, તેનેવ વા અનુદ્દિસ્સ વુત્તે સવનૂપચારે ઠિતેન યેન કેનચિ મનુસ્સભૂતેન વચનસમનન્તરમેવ ‘‘અયં પઠમજ્ઝાનલાભી’’તિઆદિકે યથાવુત્તે અત્થપ્પકારે ઞાતેયેવ. ‘‘સો’’તિ અજ્ઝાહરિત્વા ‘‘સો પુન રુળ્હિભાવે અભબ્બો’’તિ યોજેતબ્બં, અત્તનિ અવિજ્જમાનગુણં સન્તં વિય કત્વા ઇચ્છાચારે ઠત્વા એવં કથિતપુગ્ગલો સીલે પતિટ્ઠાય ઉપરૂપરિ લબ્ભમાનલોકિયલોકુત્તરગુણેહિ બુદ્ધિસઙ્ખાતં સાસને બુદ્ધિમધિગન્તું અનરહોતિ અત્થો . કિં વિયાતિ આહ ‘‘યથેવ…પે॰… રુળિભાવે’’તિ. ‘‘યથા’’તિ એતેન સમ્બન્ધો ‘‘તથા’’તિ, યથા તાલો મત્થકચ્છિન્નો અભબ્બો પુન વિરુળ્હિયા, સોપિ પારાજિકં આપન્નો તથેવ દટ્ઠબ્બોતિ અત્થો.
Viññattipathe ṭhitassa kāyena vā vācāya vā yo bhikkhu samudācareyyāti ajjhāharitvā yojetabbaṃ. Viññattipathe ṭhitassāti dvādasahatthabbhantare padese ṭhitassa ‘‘itthiyā vā purisassa vā gahaṭṭhassa vā pabbajitassa vā’’ti (pārā. 198) padabhājane vuttassa yassa kassaci. Kāyena vāti hatthamuddādivasena kāyena vā. ‘‘Sikkhāpaccakkhānaṃ hatthamuddāya sīsaṃ na otarati, idaṃ abhūtārocanaṃ hatthamuddāyapi otaratī’’ti (pārā. aṭṭha. 2.215) aṭṭhakathāyaṃ vuttattā idha hatthamuddādihatthavikāro ca aṅgapaccaṅgacopanañca ‘‘kāyenā’’ti iminā gahetabbaṃ. Vācāya vāti yo savanūpacāre ṭhito tena viññātuṃ sakkuṇeyyena yena kenaci vohārena vā. Yo bhikkhūti yo upasampanno thero vā navo vā majjhimo vā. Samudācareyyāti ‘‘paṭhamaṃ jhānaṃ samāpajjāmī’’tiādivacanappakāresu yaṃ kañci pakāraṃ vadeyya. Tadattheti tena vuttavākyassa atthe. Ñātevāti ñāte eva. Mātugāmaṃ vā purisaṃ vā yaṃ kiñci uddissa vutte, teneva vā anuddissa vutte savanūpacāre ṭhitena yena kenaci manussabhūtena vacanasamanantarameva ‘‘ayaṃ paṭhamajjhānalābhī’’tiādike yathāvutte atthappakāre ñāteyeva. ‘‘So’’ti ajjhāharitvā ‘‘so puna ruḷhibhāve abhabbo’’ti yojetabbaṃ, attani avijjamānaguṇaṃ santaṃ viya katvā icchācāre ṭhatvā evaṃ kathitapuggalo sīle patiṭṭhāya uparūpari labbhamānalokiyalokuttaraguṇehi buddhisaṅkhātaṃ sāsane buddhimadhigantuṃ anarahoti attho . Kiṃ viyāti āha ‘‘yatheva…pe… ruḷibhāve’’ti. ‘‘Yathā’’ti etena sambandho ‘‘tathā’’ti, yathā tālo matthakacchinno abhabbo puna viruḷhiyā, sopi pārājikaṃ āpanno tatheva daṭṭhabboti attho.
૩૦૮-૯. ઇદાનિ ‘‘ઞાતેવ અભબ્બો’’તિ ચ ‘‘અઞ્ઞાપદેસઞ્ચ વિના’’તિ ચ એતસ્મિં વાક્યદ્વયે બ્યતિરેકત્થવસેન સમ્ભવન્તં આપત્તિભેદં દસ્સેતુમાહ ‘‘અસન્તમેવા’’તિઆદિ.
308-9. Idāni ‘‘ñāteva abhabbo’’ti ca ‘‘aññāpadesañca vinā’’ti ca etasmiṃ vākyadvaye byatirekatthavasena sambhavantaṃ āpattibhedaṃ dassetumāha ‘‘asantamevā’’tiādi.
અનન્તરન્તિ ‘‘પઠમં ઝાનં સમાપજ્જામી’’તિઆદિવચનસમનન્તરમેવ. સોતિ દ્વાદસહત્થબ્ભન્તરે ઠત્વા યેન તં વચનં સુતં, સો પરો પુગ્ગલો. જાનાતિ ચેતિ ‘‘અયં પઠમજ્ઝાનલાભી’’તિઆદિવસેન તેન વુત્તવચનપ્પકારેન અત્થં અવિરાધેત્વા અચિરેનેવ સચે જાનાતીતિ અત્થો. યો પન ઝાનાદીનં અત્તના અલદ્ધભાવેન વા આગમે ઉગ્ગહપરિપુચ્છાદિવસેન અપરિચિતત્તા વા ઝાનાદિસરૂપં અજાનન્તોપિ કેવલં ‘‘ઝાનં વિમોક્ખો સમાધિ સમાપત્તી’’તિઆદિવચનાનં સુતપુબ્બત્તા તેન ‘‘પઠમં ઝાનં સમાપજ્જામી’’તિઆદિવચને વુત્તે ‘‘ઝાનં કિર એસ સમાપજ્જતી’’તિ યદિ એત્તકમત્થમ્પિ જાનાતિ, સોપિ ‘‘જાનાતિ’’ચ્ચેવ અટ્ઠકથાયં (પારા॰ અટ્ઠ॰ ૨.૨૧૫) વુત્તોતિ ગહેતબ્બો. ચુતો હીતિ હિ-સદ્દો અવધારણે, અત્તના વુત્તે તેન તત્તકેયેવ ઞાતે સો અસન્તગુણદીપકો પાપપુગ્ગલો ફલસમ્પત્તિસમ્પન્નં ઇમં સાસનામતમહાપાદપં આરુય્હાપિ ફલં અપરિભુઞ્જિત્વા વિરાધેત્વા પતિત્વા મતો નામ હોતીતિ વુત્તં હોતિ. ઇમસ્સેવત્થસ્સ ‘‘અસન્ત’’મિચ્ચાદિના પઠમં વુત્તસ્સપિ બ્યતિરેકત્થં દસ્સેતું અનુવાદવસેન વુત્તત્તા પુનરુત્તિદોસો ન હોતીતિ દટ્ઠબ્બં.
Anantaranti ‘‘paṭhamaṃ jhānaṃ samāpajjāmī’’tiādivacanasamanantarameva. Soti dvādasahatthabbhantare ṭhatvā yena taṃ vacanaṃ sutaṃ, so paro puggalo. Jānāti ceti ‘‘ayaṃ paṭhamajjhānalābhī’’tiādivasena tena vuttavacanappakārena atthaṃ avirādhetvā acireneva sace jānātīti attho. Yo pana jhānādīnaṃ attanā aladdhabhāvena vā āgame uggahaparipucchādivasena aparicitattā vā jhānādisarūpaṃ ajānantopi kevalaṃ ‘‘jhānaṃ vimokkho samādhi samāpattī’’tiādivacanānaṃ sutapubbattā tena ‘‘paṭhamaṃ jhānaṃ samāpajjāmī’’tiādivacane vutte ‘‘jhānaṃ kira esa samāpajjatī’’ti yadi ettakamatthampi jānāti, sopi ‘‘jānāti’’cceva aṭṭhakathāyaṃ (pārā. aṭṭha. 2.215) vuttoti gahetabbo. Cuto hīti hi-saddo avadhāraṇe, attanā vutte tena tattakeyeva ñāte so asantaguṇadīpako pāpapuggalo phalasampattisampannaṃ imaṃ sāsanāmatamahāpādapaṃ āruyhāpi phalaṃ aparibhuñjitvā virādhetvā patitvā mato nāma hotīti vuttaṃ hoti. Imassevatthassa ‘‘asanta’’miccādinā paṭhamaṃ vuttassapi byatirekatthaṃ dassetuṃ anuvādavasena vuttattā punaruttidoso na hotīti daṭṭhabbaṃ.
ઇદાનિ તં બ્યતિરેકત્થં દસ્સેતુમાહ ‘‘નો ચે…પે॰… હોતી’’તિ. યસ્સ સો આરોચેતિ, સો ચે ન જાનાતિ, અસ્સ અસન્તગુણદીપકસ્સ મુસાવાદિનો.
Idāni taṃ byatirekatthaṃ dassetumāha ‘‘no ce…pe… hotī’’ti. Yassa so āroceti, so ce na jānāti, assa asantaguṇadīpakassa musāvādino.
‘‘અઞ્ઞાપદેસઞ્ચ વિના’’તિ ઇમિના દસ્સિતબ્યતિરેકત્થસ્સ ભાવાભાવે સમ્ભવન્તં આપત્તિભેદં દસ્સેતુમાહ ‘‘યો તે’’તિઆદિ. યો ભિક્ખુ તે તવ ઇધ ઇમસ્મિં વિહારે વસતીતિ યોજના. દીપિતેતિ અત્તનો અધિપ્પાયે પકાસિતે. જાનાતિ ચેતિ યો તથા વુત્તવચનં અસ્સોસિ, સો ‘‘એસ અઞ્ઞાપદેસેન અત્તનો ઝાનલાભિતં દીપેતી’’તિ વા ‘‘એસો ઝાનલાભી’’તિ વા વચનસમનન્તરમેવ સચે જાનાતિ. અસ્સાતિ એવં કથિતવચનવતો તસ્સ ભિક્ખુનો. તં તેન વુત્તવચનં. દુક્કટમેવ હોતિ, ન થુલ્લચ્ચયન્તિ અત્થો. અત્તનો આવાસકારાનં દાયકાનં અઞ્ઞસ્સ પવત્તિં કથેન્તસ્સ વિય અત્તનોયેવ અસન્તગુણં સન્તમિવ કત્વા કથનાકારો ઇમાય ગાથાય અત્થતો વુત્તોતિ દટ્ઠબ્બો.
‘‘Aññāpadesañca vinā’’ti iminā dassitabyatirekatthassa bhāvābhāve sambhavantaṃ āpattibhedaṃ dassetumāha ‘‘yo te’’tiādi. Yo bhikkhu te tava idha imasmiṃ vihāre vasatīti yojanā. Dīpiteti attano adhippāye pakāsite. Jānāti ceti yo tathā vuttavacanaṃ assosi, so ‘‘esa aññāpadesena attano jhānalābhitaṃ dīpetī’’ti vā ‘‘eso jhānalābhī’’ti vā vacanasamanantarameva sace jānāti. Assāti evaṃ kathitavacanavato tassa bhikkhuno. Taṃ tena vuttavacanaṃ. Dukkaṭameva hoti, na thullaccayanti attho. Attano āvāsakārānaṃ dāyakānaṃ aññassa pavattiṃ kathentassa viya attanoyeva asantaguṇaṃ santamiva katvā kathanākāro imāya gāthāya atthato vuttoti daṭṭhabbo.
એત્થ ચ ઝાનલાભીતિ ચાતિ અવુત્તસમુચ્ચયત્થેન ચ-સદ્દેન પાળિયં (પારા॰ ૨૨૦) આગતા અવસેસપરિયાયવારા ચ સઙ્ગહિતાતિ દટ્ઠબ્બં. તથા ઝાનલાભીતિ એત્થ ઝાનગ્ગહણેન વિમોક્ખાદીનઞ્ચ ઉપલક્ખિતત્તા ઝાનાદિદસવિધઉત્તરિમનુસ્સધમ્મવિસયપરિયાયકથં સુતવતા તઙ્ખણે તદત્થે ઞાતે પરિયાયસમુલ્લાપકેન આપજ્જિતબ્બં થુલ્લચ્ચયઞ્ચ અવિઞ્ઞાતે વા ચિરેન વિઞ્ઞાતે વા આપજ્જિતબ્બં દુક્કટઞ્ચ ઇમાય ગાથાય અત્થતો દસ્સિતમેવાતિ દટ્ઠબ્બં.
Ettha ca jhānalābhīti cāti avuttasamuccayatthena ca-saddena pāḷiyaṃ (pārā. 220) āgatā avasesapariyāyavārā ca saṅgahitāti daṭṭhabbaṃ. Tathā jhānalābhīti ettha jhānaggahaṇena vimokkhādīnañca upalakkhitattā jhānādidasavidhauttarimanussadhammavisayapariyāyakathaṃ sutavatā taṅkhaṇe tadatthe ñāte pariyāyasamullāpakena āpajjitabbaṃ thullaccayañca aviññāte vā cirena viññāte vā āpajjitabbaṃ dukkaṭañca imāya gāthāya atthato dassitamevāti daṭṭhabbaṃ.
૩૧૦. એતન્તિ યથાવુત્તપ્પકારં ઝાનાદિભેદં ઉત્તરિમનુસ્સધમ્મં. અધિમાનાતિ ‘‘અધિગતોહ’’ન્તિ એવં ઉપ્પન્નમાના, અધિકમાનાતિ અત્થો, ‘‘અયં ધમ્મો મયા અધિગતો’’તિ દળ્હમુપ્પન્નેન માનેન કથેન્તસ્સાતિ વુત્તં હોતિ. વુત્તો અનાપત્તિનયોતિ આપત્તિયા અભાવો અનાપત્તિ, સા એવ નયો નેતબ્બો બુજ્ઝિતબ્બોતિ કત્વા, અનાપત્તીતિ વુત્તં હોતિ. ‘‘અધિમાનેના’’તિ એવં વુત્તો ભગવતાતિ અત્થો, ‘‘અધિગતધમ્મોહ’’ન્તિ અધિમાનેન ‘‘અહં પઠમજ્ઝાનલાભી’’તિઆદીનિ વદન્તસ્સ અનાપત્તીતિ વુત્તં હોતિ.
310.Etanti yathāvuttappakāraṃ jhānādibhedaṃ uttarimanussadhammaṃ. Adhimānāti ‘‘adhigatoha’’nti evaṃ uppannamānā, adhikamānāti attho, ‘‘ayaṃ dhammo mayā adhigato’’ti daḷhamuppannena mānena kathentassāti vuttaṃ hoti. Vutto anāpattinayoti āpattiyā abhāvo anāpatti, sā eva nayo netabbo bujjhitabboti katvā, anāpattīti vuttaṃ hoti. ‘‘Adhimānenā’’ti evaṃ vutto bhagavatāti attho, ‘‘adhigatadhammoha’’nti adhimānena ‘‘ahaṃ paṭhamajjhānalābhī’’tiādīni vadantassa anāpattīti vuttaṃ hoti.
અયમધિમાનો કસ્સ હોતિ, કસ્સ ન હોતીતિ ચે? અરિયાનં ન હોતિ મગ્ગપચ્ચવેક્ખણાદીહિ પઞ્ચહિ પચ્ચવેક્ખણાહિ સઞ્જાતસોમનસ્સાનં વિતિણ્ણકઙ્ખત્તા. દુસ્સીલસ્સાપિ ન હોતિ તસ્સ અરિયગુણાધિગમે નિરુસ્સાહત્તા. સુસીલસ્સાપિ કમ્મટ્ઠાનાનુયોગરહિતસ્સ નિદ્દારામતાદિમનુયુત્તસ્સ ન હોતિ વિસ્સટ્ઠભાવનાભિયોગત્તા. સુપરિસુદ્ધાય સીલસમ્પત્તિયા પતિટ્ઠાય સમથભાવનામનુયુત્તસ્સ રૂપારૂપસમાપત્તિયં પત્તાસિનો વા વિપસ્સનાભિયુત્તસ્સ સોપક્કિલેસોદયબ્બયઞાણલાભિનો વા ઉપ્પજ્જતિ. સો સમથવિપસ્સનાભાવનાહિ કિલેસસમુદાચારસ્સ અભાવે ઉપ્પન્ને તે વિસેસભાગિનો ભવિતું અદત્વા ઠિતિભાગિનો કત્વા ઠપેતીતિ વેદિતબ્બો.
Ayamadhimāno kassa hoti, kassa na hotīti ce? Ariyānaṃ na hoti maggapaccavekkhaṇādīhi pañcahi paccavekkhaṇāhi sañjātasomanassānaṃ vitiṇṇakaṅkhattā. Dussīlassāpi na hoti tassa ariyaguṇādhigame nirussāhattā. Susīlassāpi kammaṭṭhānānuyogarahitassa niddārāmatādimanuyuttassa na hoti vissaṭṭhabhāvanābhiyogattā. Suparisuddhāya sīlasampattiyā patiṭṭhāya samathabhāvanāmanuyuttassa rūpārūpasamāpattiyaṃ pattāsino vā vipassanābhiyuttassa sopakkilesodayabbayañāṇalābhino vā uppajjati. So samathavipassanābhāvanāhi kilesasamudācārassa abhāve uppanne te visesabhāgino bhavituṃ adatvā ṭhitibhāgino katvā ṭhapetīti veditabbo.
પનાતિ અપિ-સદ્દત્થો. ‘‘એવ’’ન્તિ ઇમિના ‘‘અનાપત્તિનયો વુત્તો’’તિ પચ્ચામસતિ. ‘‘અવત્તુકામસ્સા’’તિ ઇદઞ્ચ પાળિયં આગતં ‘‘અનુલ્લપનાધિપ્પાયસ્સા’’તિ (પારા॰ ૨૨૨, ૨૨૫) ઇદઞ્ચ અનત્થન્તરં. અવત્તુકામસ્સાતિ એવં વુત્તોતિ યોજના. કોહઞ્ઞેન પાપિચ્છાપકતસ્સ ‘‘ઝાનાદીનં લાભિમ્હી’’તિ વદન્તસ્સ અજ્ઝાસયો ઉલ્લપનાધિપ્પાયો નામ, તથા અહુત્વા સબ્રહ્મચારીસુ અઞ્ઞં બ્યાકરોન્તસ્સ એવમેવ અનાપત્તિભાવો વુત્તો ભગવતાતિ અત્થો. આદિકસ્સાપિ એવં વુત્તોતિ યોજના. ‘‘અનાપત્તિ આદિકમ્મિકસ્સા’’તિ (પારા॰ ૨૨૨) આદિકમ્મિકસ્સાપિ અનાપત્તિભાવો વુત્તો ભગવતાતિ અત્થો. ઇમસ્મિં સિક્ખાપદે વગ્ગુમુદાતીરિયા ભિક્ખૂ આદિકમ્મિકા. અવુત્તસમુચ્ચયત્થેન તથા-સદ્દેન ઇધ અવુત્તઉમ્મત્તકખિત્તચિત્તવેદનટ્ટા ગહિતા.
Panāti api-saddattho. ‘‘Eva’’nti iminā ‘‘anāpattinayo vutto’’ti paccāmasati. ‘‘Avattukāmassā’’ti idañca pāḷiyaṃ āgataṃ ‘‘anullapanādhippāyassā’’ti (pārā. 222, 225) idañca anatthantaraṃ. Avattukāmassāti evaṃ vuttoti yojanā. Kohaññena pāpicchāpakatassa ‘‘jhānādīnaṃ lābhimhī’’ti vadantassa ajjhāsayo ullapanādhippāyo nāma, tathā ahutvā sabrahmacārīsu aññaṃ byākarontassa evameva anāpattibhāvo vutto bhagavatāti attho. Ādikassāpi evaṃ vuttoti yojanā. ‘‘Anāpatti ādikammikassā’’ti (pārā. 222) ādikammikassāpi anāpattibhāvo vutto bhagavatāti attho. Imasmiṃ sikkhāpade vaggumudātīriyā bhikkhū ādikammikā. Avuttasamuccayatthena tathā-saddena idha avuttaummattakakhittacittavedanaṭṭā gahitā.
૩૧૧. પાપિચ્છતાતિ ‘‘એવં મં જનો સમ્ભાવેસ્સતી’’તિ ઝાનલાભિતાદિહેતુકાય સમ્ભાવનાય સમ્ભાવનાનિમિત્તસ્સ પચ્ચયપટિલાભસ્સ પત્થનાસઙ્ખાતાય પાપિકાય લામિકાય ઇચ્છાય સમન્નાગતભાવો ચ. તસ્સાતિ યં ઝાનાદિભેદભિન્નં ઉત્તરિમનુસ્સધમ્મં સમુલ્લપિ, તસ્સ ધમ્મસ્સ. અસન્તભાવોતિ અત્તસન્તાને પચ્ચુપ્પન્નજાતિયં અનુપ્પાદિતભાવેન અવિજ્જમાનભાવો. મનુસ્સકસ્સ આરોચનઞ્ચેવાતિ વુત્તવચનસ્સ અત્થં તઙ્ખણે જાનનકસ્સ મનુસ્સજાતિકસ્સ ‘‘પઠમં ઝાનં સમાપજ્જિ’’ન્તિઆદિના નયેન સવનૂપચારે ઠત્વા આરોચનઞ્ચ. નઞ્ઞાપદેસેન આરોચનઞ્ચાતિ સમ્બન્ધો. ‘‘યો તે વિહારે વસતિ, સો ભિક્ખુ પઠમં ઝાનં સમાપજ્જી’’તિઆદિના (પારા॰ ૨૨૦) નયેન પવત્તઅઞ્ઞાપદેસં વિના ઉજુકમેવ આરોચનઞ્ચ. તદેવ ઞાણન્તિ તદા એવ ઞાણં, અચિરાયિત્વા વુત્તક્ખણેયેવ જાનનન્તિ અત્થો. એત્થાતિ ઇમસ્મિં ચતુત્થપારાજિકાપત્તિયં. ધીરા વિનયધરા.
311.Pāpicchatāti ‘‘evaṃ maṃ jano sambhāvessatī’’ti jhānalābhitādihetukāya sambhāvanāya sambhāvanānimittassa paccayapaṭilābhassa patthanāsaṅkhātāya pāpikāya lāmikāya icchāya samannāgatabhāvo ca. Tassāti yaṃ jhānādibhedabhinnaṃ uttarimanussadhammaṃ samullapi, tassa dhammassa. Asantabhāvoti attasantāne paccuppannajātiyaṃ anuppāditabhāvena avijjamānabhāvo. Manussakassa ārocanañcevāti vuttavacanassa atthaṃ taṅkhaṇe jānanakassa manussajātikassa ‘‘paṭhamaṃ jhānaṃ samāpajji’’ntiādinā nayena savanūpacāre ṭhatvā ārocanañca. Naññāpadesena ārocanañcāti sambandho. ‘‘Yo te vihāre vasati, so bhikkhu paṭhamaṃ jhānaṃ samāpajjī’’tiādinā (pārā. 220) nayena pavattaaññāpadesaṃ vinā ujukameva ārocanañca. Tadeva ñāṇanti tadā eva ñāṇaṃ, acirāyitvā vuttakkhaṇeyeva jānananti attho. Etthāti imasmiṃ catutthapārājikāpattiyaṃ. Dhīrā vinayadharā.
૩૧૨. પઠમે દુતિયે ચન્તેતિ મનુસ્સવિગ્ગહપારાજિકવજ્જિતે યથાવુત્તપારાજિકત્તયે. પરિયાયો ન વિજ્જતીતિ પારાજિકાપત્તિપથં પરિયાયવચનં ન લભતિ. ‘‘ન પનેતરે’’તિ ઇદં એત્થાપિ યોજેતબ્બં, ઇતરે પન તતિયપારાજિકે પરિયાયો ન વિજ્જતીતિ અત્થો. ‘‘મરણવણ્ણં વા સંવણ્ણેય્યા’’તિ (પારા॰ ૧૭૨) ચ ‘‘અમ્ભો પુરિસ કિં તુય્હિમિના’’તિઆદિના (પારા॰ ૧૭૧) ચ ‘‘યો એવં મરતિ, સો ધનં વા લભતી’’તિઆદિના (પારા॰ ૧૭૫) ચ પરિયાયેન વદન્તસ્સ પારાજિકમેવાતિ વુત્તં હોતિ. આણત્તિ પારાજિકહેતુઆણત્તિકપ્પયોગો. ન પનેતરેતિ પઠમચતુત્થપારાજિકદ્વયે પન પારાજિકહેતુભૂતા આણત્તિ ન લભતીતિ અત્થો.
312.Paṭhame dutiye canteti manussaviggahapārājikavajjite yathāvuttapārājikattaye. Pariyāyo na vijjatīti pārājikāpattipathaṃ pariyāyavacanaṃ na labhati. ‘‘Na panetare’’ti idaṃ etthāpi yojetabbaṃ, itare pana tatiyapārājike pariyāyo na vijjatīti attho. ‘‘Maraṇavaṇṇaṃ vā saṃvaṇṇeyyā’’ti (pārā. 172) ca ‘‘ambho purisa kiṃ tuyhiminā’’tiādinā (pārā. 171) ca ‘‘yo evaṃ marati, so dhanaṃ vā labhatī’’tiādinā (pārā. 175) ca pariyāyena vadantassa pārājikamevāti vuttaṃ hoti. Āṇatti pārājikahetuāṇattikappayogo. Na panetareti paṭhamacatutthapārājikadvaye pana pārājikahetubhūtā āṇatti na labhatīti attho.
૩૧૩. આદીતિ પઠમપારાજિકં. એકસમુટ્ઠાનન્તિ એકકારણં. સમુટ્ઠાતિ આપત્તિ એતસ્માતિ સમુટ્ઠાનં, કારણં કાયાદિ. તં પન છબ્બિધં કાયો, વાચા, કાયવાચા, કાયચિત્તં, વાચાચિત્તં, કાયવાચાચિત્તન્તિ. તેસં વિનિચ્છયં ઉત્તરે (ઉ॰ વિ॰ ૩૨૫ આદયો) યથાગતટ્ઠાનેયેવ ચ વણ્ણયિસ્સામ. તત્રિદં એકસમુટ્ઠાનં એકં કાયચિત્તં સમુટ્ઠાનં એતસ્સાતિ કત્વા. તેનાહ ‘‘દુવઙ્ગં કાયચિત્તતો’’તિ. ‘‘તં સમુટ્ઠાન’’ન્તિ અજ્ઝાહારો. યેન સમુટ્ઠાનેન પઠમપારાજિકાપત્તિ ઉપ્પજ્જતિ, તંસમુટ્ઠાનસઙ્ખાતં કારણં. અઙ્ગજાતસઙ્ખાતં કાયઞ્ચ સેવનચિત્તઞ્ચાતિ દ્વયં અઙ્ગં અવયવં એતસ્સાતિ દુવઙ્ગં, તદુભયસભાવન્તિ અત્થો યથા ‘‘દુવઙ્ગં ચતુત્થજ્ઝાન’’ન્તિ. સેસાતિ અવસિટ્ઠાનિ તીણિ પારાજિકાનિ. તિસમુટ્ઠાનાતિ કાયચિત્તં, વાચાચિત્તં, કાયવાચાચિત્તન્તિ તિસમુટ્ઠાના તીણિ સમુટ્ઠાનાનિ એતેસન્તિ કત્વા. તેસન્તિ તેસં તિણ્ણં સમુટ્ઠાનાનં. અઙ્ગાનીતિ અવયવાનિ. સત્ત કાયો, ચિત્તં, વાચા, ચિત્તં, કાયો, વાચા, ચિત્તન્તિ, તંસભાવાતિ વુત્તં હોતિ.
313.Ādīti paṭhamapārājikaṃ. Ekasamuṭṭhānanti ekakāraṇaṃ. Samuṭṭhāti āpatti etasmāti samuṭṭhānaṃ, kāraṇaṃ kāyādi. Taṃ pana chabbidhaṃ kāyo, vācā, kāyavācā, kāyacittaṃ, vācācittaṃ, kāyavācācittanti. Tesaṃ vinicchayaṃ uttare (u. vi. 325 ādayo) yathāgataṭṭhāneyeva ca vaṇṇayissāma. Tatridaṃ ekasamuṭṭhānaṃ ekaṃ kāyacittaṃ samuṭṭhānaṃ etassāti katvā. Tenāha ‘‘duvaṅgaṃ kāyacittato’’ti. ‘‘Taṃ samuṭṭhāna’’nti ajjhāhāro. Yena samuṭṭhānena paṭhamapārājikāpatti uppajjati, taṃsamuṭṭhānasaṅkhātaṃ kāraṇaṃ. Aṅgajātasaṅkhātaṃ kāyañca sevanacittañcāti dvayaṃ aṅgaṃ avayavaṃ etassāti duvaṅgaṃ, tadubhayasabhāvanti attho yathā ‘‘duvaṅgaṃ catutthajjhāna’’nti. Sesāti avasiṭṭhāni tīṇi pārājikāni. Tisamuṭṭhānāti kāyacittaṃ, vācācittaṃ, kāyavācācittanti tisamuṭṭhānā tīṇi samuṭṭhānāni etesanti katvā. Tesanti tesaṃ tiṇṇaṃ samuṭṭhānānaṃ. Aṅgānīti avayavāni. Satta kāyo, cittaṃ, vācā, cittaṃ, kāyo, vācā, cittanti, taṃsabhāvāti vuttaṃ hoti.
૩૧૪. આદીતિ મેથુનધમ્મપટિસેવનચિત્તસમ્પયુત્તચેતનાસભાવં પઠમપારાજિકં. સુખોપેક્ખાયુતં ઉદીરિતન્તિ યોજના. ઇટ્ઠાલમ્બણપટિલાભાદિસોમનસ્સહેતુમ્હિ સતિ સુખવેદનાસમ્પયુત્તં હોતિ, તસ્મિં અસતિ ઉપેક્ખાવેદનાય સમ્પયુત્તં હોતીતિ વુત્તન્તિ અત્થો.
314.Ādīti methunadhammapaṭisevanacittasampayuttacetanāsabhāvaṃ paṭhamapārājikaṃ. Sukhopekkhāyutaṃ udīritanti yojanā. Iṭṭhālambaṇapaṭilābhādisomanassahetumhi sati sukhavedanāsampayuttaṃ hoti, tasmiṃ asati upekkhāvedanāya sampayuttaṃ hotīti vuttanti attho.
તતિયં દુક્ખવેદનન્તિ તતિયં મનુસ્સવિગ્ગહપારાજિકં દોસચિત્તસમ્પયુત્તચેતનાસભાવત્તા દુક્ખવેદનાય સમ્પયુત્તન્તિ અત્થો.
Tatiyaṃ dukkhavedananti tatiyaṃ manussaviggahapārājikaṃ dosacittasampayuttacetanāsabhāvattā dukkhavedanāya sampayuttanti attho.
દુતિયન્તિ અદિન્નાદાનચેતનાલક્ખણં દુતિયપારાજિકં. લોભેન પરસન્તકં ચોરિકાય ગણ્હન્તસ્સ સોમનસ્સસમ્પયુત્તં હોતિ, કોધેન અભિભૂતસ્સ વિલુમ્પિત્વા વા વિલુમ્પાપેત્વા વા ગણ્હતો દોમનસ્સસમ્પયુત્તં હોતિ, સોમનસ્સં, દોમનસ્સઞ્ચ વિના અગ્ગહેતુકામો વિય હુત્વા ઉદાસીનસ્સ ગણ્હતો ઉપેક્ખાસમ્પયુત્તં હોતીતિ ‘‘તિવેદનમુદીરિત’’ન્તિ આહ.
Dutiyanti adinnādānacetanālakkhaṇaṃ dutiyapārājikaṃ. Lobhena parasantakaṃ corikāya gaṇhantassa somanassasampayuttaṃ hoti, kodhena abhibhūtassa vilumpitvā vā vilumpāpetvā vā gaṇhato domanassasampayuttaṃ hoti, somanassaṃ, domanassañca vinā aggahetukāmo viya hutvā udāsīnassa gaṇhato upekkhāsampayuttaṃ hotīti ‘‘tivedanamudīrita’’nti āha.
ચતુત્થઞ્ચાતિ ઉત્તરિમનુસ્સધમ્મસમુલ્લપનચેતનાલક્ખણં ચતુત્થપારાજિકઞ્ચ. સમ્ભાવનિચ્છાય પચ્ચયાસાય વા તુટ્ઠતુટ્ઠસ્સેવ ‘‘અહં પઠમં ઝાનં સમાપજ્જામી’’તિઆદિના નયેન અત્તનો ઉત્તરિમનુસ્સધમ્મલાભિતં વદન્તસ્સ સોમનસ્સસમ્પયુત્તં હોતિ, અઞ્ઞપુગ્ગલેસુ પટિહતચિત્તસ્સ કલહપુરેક્ખારતાય વદતો દોમનસ્સસમ્પયુત્તં હોતિ, પચ્ચયાલાભેન જિઘચ્છાદિદુક્ખં સહિતુમસક્કુણેય્યતાય ઉદાસીનસ્સ વદતો ઉપેક્ખાસમ્પયુત્તં હોતીતિ ‘‘તિવેદનમુદીરિત’’ન્તિ આહ.
Catutthañcāti uttarimanussadhammasamullapanacetanālakkhaṇaṃ catutthapārājikañca. Sambhāvanicchāya paccayāsāya vā tuṭṭhatuṭṭhasseva ‘‘ahaṃ paṭhamaṃ jhānaṃ samāpajjāmī’’tiādinā nayena attano uttarimanussadhammalābhitaṃ vadantassa somanassasampayuttaṃ hoti, aññapuggalesu paṭihatacittassa kalahapurekkhāratāya vadato domanassasampayuttaṃ hoti, paccayālābhena jighacchādidukkhaṃ sahitumasakkuṇeyyatāya udāsīnassa vadato upekkhāsampayuttaṃ hotīti ‘‘tivedanamudīrita’’nti āha.
૩૧૫. અટ્ઠ ચિત્તાનીતિ લોભસહગતાનિ અટ્ઠ ચિત્તાનિ લબ્ભરેતિ યોજના, લબ્ભન્તીતિ અત્થો, ચેતનાસભાવેન પઠમપારાજિકેન સમ્પયુત્તાનીતિ વુત્તં હોતિ. એવમુપરિપિ. દુવેતિ પટિઘસમ્પયુત્તાનિ દ્વે ચિત્તાનિ. દસ ચિત્તાનીતિ લોભસહગતાનિ અટ્ઠ, દ્વે પટિઘસમ્પયુત્તાનીતિ. લબ્ભરેતિ સમ્પયુત્તભાવેન લબ્ભન્તિ.
315.Aṭṭha cittānīti lobhasahagatāni aṭṭha cittāni labbhareti yojanā, labbhantīti attho, cetanāsabhāvena paṭhamapārājikena sampayuttānīti vuttaṃ hoti. Evamuparipi. Duveti paṭighasampayuttāni dve cittāni. Dasa cittānīti lobhasahagatāni aṭṭha, dve paṭighasampayuttānīti. Labbhareti sampayuttabhāvena labbhanti.
૩૧૬. તસ્માતિ યસ્મા યથાવુત્તચિત્તેહિ સમ્પયુત્તં, તેન હેતુના. ક્રિયાતિ કરણેન આપજ્જિતબ્બત્તા કિરિયા. વીતિક્કમસઞ્ઞાય અભાવેન મુચ્ચનતો સઞ્ઞાય વિમોક્ખો એતસ્સાતિ સઞ્ઞાવિમોક્ખં. લોકવજ્જન્તિ લોકેન અકુસલભાવતો વજ્જનીયન્તિ દીપિતં પકાસિતં.
316.Tasmāti yasmā yathāvuttacittehi sampayuttaṃ, tena hetunā. Kriyāti karaṇena āpajjitabbattā kiriyā. Vītikkamasaññāya abhāvena muccanato saññāya vimokkho etassāti saññāvimokkhaṃ. Lokavajjanti lokena akusalabhāvato vajjanīyanti dīpitaṃ pakāsitaṃ.
૩૧૭. આપત્તિયંયેવાતિ એવકારેન ન સિક્ખાપદેતિ દસ્સેતિ. ઇદં વિધાનન્તિ સમુટ્ઠાનાદિકં ઇદં યથાવુત્તં વિધાનં. વિભાવિનાતિ પઞ્ઞવતા વિનયધરેન.
317.Āpattiyaṃyevāti evakārena na sikkhāpadeti dasseti. Idaṃ vidhānanti samuṭṭhānādikaṃ idaṃ yathāvuttaṃ vidhānaṃ. Vibhāvināti paññavatā vinayadharena.
૩૧૮-૯. મુદુપિટ્ઠિ ચાતિ લતા વિય નમિત્વા કરણં દસ્સેત્વા નચ્ચિતું સમવાહિત્વા મુદુકતપિટ્ઠિકો ચ. લમ્બી ચાતિ પલમ્બમાનેન દીઘેન અઙ્ગજાતેન યુત્તો. લમ્બતીતિ લમ્બં, અઙ્ગજાતં, તં યસ્સ અત્થિ સો લમ્બી. ઇમે દ્વેપિ કામપરિળાહાતુરભાવે સતિ અત્તનો અઙ્ગજાતં અત્તનો મુખં, વચ્ચમગ્ગઞ્ચ પવેસેત્વા વીતિક્કમિતુમરહત્તા પારાજિકાપન્નસદિસત્તા પરિવજ્જિતા. મુખગ્ગાહીતિ મુખેન ગહણં મુખગ્ગાહો, સો એતસ્સ અત્થીતિ મુખગ્ગાહી, પરસ્સ અઙ્ગજાતં મુખેન ગણ્હન્તોતિ અત્થો. નિસીદકોતિ પરસ્સ અઙ્ગજાતે અત્તનો વચ્ચમગ્ગેન નિસીદન્તો. ઇમે દ્વે સહવાસિકાનં સીલવિનાસનતો અઞ્ઞેહિ સંવસિતું અનરહાતિ પારાજિકાપન્નસદિસત્તા વિવજ્જિતા. તેસન્તિ અસંવાસતાસામઞ્ઞેન ચત્તારો પારાજિકાપન્ને સઙ્ગણ્હાતિ. ‘‘તેસઞ્ચ મગ્ગેનમગ્ગપટિપત્તિસામઞ્ઞેન પઠમપારાજિકાપન્નસ્સેવ અનુલોમિકાતિ ગહેતબ્બા’’ ઇચ્ચેવં નિસ્સન્દેહે વુત્તં. ઇમિના ચ અકતવીતિક્કમાનમ્પિ મુદુપિટ્ઠિઆદીનં ચતુન્નં અનુલોમપારાજિકભાવો વુત્તોતિ વિઞ્ઞાયતિ.
318-9.Mudupiṭṭhi cāti latā viya namitvā karaṇaṃ dassetvā naccituṃ samavāhitvā mudukatapiṭṭhiko ca. Lambī cāti palambamānena dīghena aṅgajātena yutto. Lambatīti lambaṃ, aṅgajātaṃ, taṃ yassa atthi so lambī. Ime dvepi kāmapariḷāhāturabhāve sati attano aṅgajātaṃ attano mukhaṃ, vaccamaggañca pavesetvā vītikkamitumarahattā pārājikāpannasadisattā parivajjitā. Mukhaggāhīti mukhena gahaṇaṃ mukhaggāho, so etassa atthīti mukhaggāhī, parassa aṅgajātaṃ mukhena gaṇhantoti attho. Nisīdakoti parassa aṅgajāte attano vaccamaggena nisīdanto. Ime dve sahavāsikānaṃ sīlavināsanato aññehi saṃvasituṃ anarahāti pārājikāpannasadisattā vivajjitā. Tesanti asaṃvāsatāsāmaññena cattāro pārājikāpanne saṅgaṇhāti. ‘‘Tesañca maggenamaggapaṭipattisāmaññena paṭhamapārājikāpannasseva anulomikāti gahetabbā’’ iccevaṃ nissandehe vuttaṃ. Iminā ca akatavītikkamānampi mudupiṭṭhiādīnaṃ catunnaṃ anulomapārājikabhāvo vuttoti viññāyati.
સમન્તપાસાદિકાયં પન –
Samantapāsādikāyaṃ pana –
‘‘અપરાનિપિ લમ્બી, મુદુપિટ્ઠિકો, પરસ્સ અઙ્ગજાતં મુખેન ગણ્હાતિ, પરસ્સ અઙ્ગજાતે અભિનિસીદતીતિ ઇમેસં ચતુન્નં વસેન ચત્તારિ અનુલોમપારાજિકાનીતિ વદન્તિ. એતાનિ હિ યસ્મા ઉભિન્નં રાગવસેન સદિસભાવૂપગતાનં ધમ્મો ‘મેથુનધમ્મો’તિ વુચ્ચતિ, તસ્મા એતેન પરિયાયેન મેથુનં ધમ્મં અપ્પટિસેવિત્વાયેવ કેવલં મગ્ગેન મગ્ગપ્પવેસનવસેન આપજ્જિતબ્બત્તા મેથુનધમ્મપારાજિકસ્સ અનુલોમેન્તીતિ ‘અનુલોમપારાજિકાની’તિ વુચ્ચન્તી’’તિ (પારા॰ અટ્ઠ॰ ૨.૨૩૩) –
‘‘Aparānipi lambī, mudupiṭṭhiko, parassa aṅgajātaṃ mukhena gaṇhāti, parassa aṅgajāte abhinisīdatīti imesaṃ catunnaṃ vasena cattāri anulomapārājikānīti vadanti. Etāni hi yasmā ubhinnaṃ rāgavasena sadisabhāvūpagatānaṃ dhammo ‘methunadhammo’ti vuccati, tasmā etena pariyāyena methunaṃ dhammaṃ appaṭisevitvāyeva kevalaṃ maggena maggappavesanavasena āpajjitabbattā methunadhammapārājikassa anulomentīti ‘anulomapārājikānī’ti vuccantī’’ti (pārā. aṭṭha. 2.233) –
વુત્તત્તા ચ તબ્બણ્ણનાય ચ સારત્થદીપનિયં –
Vuttattā ca tabbaṇṇanāya ca sāratthadīpaniyaṃ –
‘‘લમ્બંદીઘતાય પલમ્બમાનં અઙ્ગજાતમેતસ્સાતિ લમ્બી. સો એત્તાવતા ન પારાજિકો, અથ ખો યદા અનભિરતિયા પીળિતો અત્તનો અઙ્ગજાતં મુખે વા વચ્ચમગ્ગે વા પવેસેતિ, તદા પારાજિકો હોતિ. મુદુકા પિટ્ઠિ એતસ્સાતિ મુદુપિટ્ઠિકો, કતપરિકમ્માય મુદુકાય પિટ્ઠિયા સમન્નાગતો. સોપિ યદા અનભિરતિયા પીળિતો અત્તનો અઙ્ગજાતં અત્તનો મુખે પવેસેતિ તદા પારાજિકો હોતિ. પરસ્સ અઙ્ગજાતં મુખેન ગણ્હાતીતિ યો અનભિરતિયા પીળિતો પરસ્સ સુત્તસ્સ વા પમત્તસ્સ વા અઙ્ગજાતં અત્તનો મુખેન ગણ્હાતિ. પરસ્સ અઙ્ગજાતે અભિનિસીદતીતિ યો અનભિરતિયા પીળિતો પરસ્સ અઙ્ગજાતં કમ્મનિયં દિસ્વા અત્તનો વચ્ચમગ્ગેન તસ્સૂપરિ અભિનિસીદતિ, તં અત્તનો વચ્ચમગ્ગં પવેસેતીતિ અત્થો. લમ્બીઆદયો ચત્તારો કિઞ્ચાપિ પઠમપારાજિકેન સઙ્ગહિતા, યસ્મા પન ઉભિન્નં રાગપરિયુટ્ઠાનસઙ્ખાતેન પરિયાયેન મેથુનં ધમ્મં અપ્પટિસેવિનો હોન્તિ, તસ્મા વિસું વુત્તા’’તિ (સારત્થ॰ ટી॰ ૨.૨૩૩) –
‘‘Lambaṃdīghatāya palambamānaṃ aṅgajātametassāti lambī. So ettāvatā na pārājiko, atha kho yadā anabhiratiyā pīḷito attano aṅgajātaṃ mukhe vā vaccamagge vā paveseti, tadā pārājiko hoti. Mudukā piṭṭhi etassāti mudupiṭṭhiko, kataparikammāya mudukāya piṭṭhiyā samannāgato. Sopi yadā anabhiratiyā pīḷito attano aṅgajātaṃ attano mukhe paveseti tadā pārājiko hoti. Parassa aṅgajātaṃ mukhena gaṇhātīti yo anabhiratiyā pīḷito parassa suttassa vā pamattassa vā aṅgajātaṃ attano mukhena gaṇhāti. Parassa aṅgajāte abhinisīdatīti yo anabhiratiyā pīḷito parassa aṅgajātaṃ kammaniyaṃ disvā attano vaccamaggena tassūpari abhinisīdati, taṃ attano vaccamaggaṃ pavesetīti attho. Lambīādayo cattāro kiñcāpi paṭhamapārājikena saṅgahitā, yasmā pana ubhinnaṃ rāgapariyuṭṭhānasaṅkhātena pariyāyena methunaṃ dhammaṃ appaṭisevino honti, tasmā visuṃ vuttā’’ti (sārattha. ṭī. 2.233) –
વુત્તત્તા ચ કતવીતિક્કમાયેવેતે ‘‘પારાજિકા’’તિ ગહેતબ્બા.
Vuttattā ca katavītikkamāyevete ‘‘pārājikā’’ti gahetabbā.
ભિક્ખુનીનઞ્ચ ચત્તારીતિ એત્થ ‘‘અસાધારણાની’’તિ પાઠસેસો, ભિક્ખૂહિ અસાધારણાનિ ભિક્ખુનીનમેવ નિયતાનિ ઉબ્ભજાણુમણ્ડલિકા, વજ્જપટિચ્છાદિકા, ઉક્ખિત્તાનુવત્તિકા, અટ્ઠવત્થુકાતિ ચત્તારિ પારાજિકાનિ ચ. વિબ્ભન્તા ભિક્ખુની સયન્તિ એત્થ ‘‘તેસં અનુલોમિકા’’તિ આનેત્વા સમ્બન્ધિતબ્બં. તેસં ચતુન્નં પારાજિકાનં અનુલોમિકા સયં વિબ્ભન્તા ભિક્ખુની ચાતિ યોજના. ચિત્તવસિકા હુત્વા અત્તના નિવત્થચીવરમ્પિ હિ માતુગામાનં નિવાસનનીહારેન સયમેવ નિવાસેત્વા ગિહિવેસં રોચેત્વા ગહિતમત્તે સાસનતો ચુતા ભિક્ખુની ચાતિ વુત્તં હોતિ. એવંકરણેન ગિહિભાવાપન્નતાસામઞ્ઞેન સંવાસારહા ન હોન્તીતિ ઇમેસં ચતુન્નં પારાજિકાનં અનુલોમિકા જાતા.
Bhikkhunīnañca cattārīti ettha ‘‘asādhāraṇānī’’ti pāṭhaseso, bhikkhūhi asādhāraṇāni bhikkhunīnameva niyatāni ubbhajāṇumaṇḍalikā, vajjapaṭicchādikā, ukkhittānuvattikā, aṭṭhavatthukāti cattāri pārājikāni ca. Vibbhantā bhikkhunī sayanti ettha ‘‘tesaṃ anulomikā’’ti ānetvā sambandhitabbaṃ. Tesaṃ catunnaṃ pārājikānaṃ anulomikā sayaṃ vibbhantā bhikkhunī cāti yojanā. Cittavasikā hutvā attanā nivatthacīvarampi hi mātugāmānaṃ nivāsananīhārena sayameva nivāsetvā gihivesaṃ rocetvā gahitamatte sāsanato cutā bhikkhunī cāti vuttaṃ hoti. Evaṃkaraṇena gihibhāvāpannatāsāmaññena saṃvāsārahā na hontīti imesaṃ catunnaṃ pārājikānaṃ anulomikā jātā.
તથાતિ યથા ઇમે દસ્સિતા તેન અસંવાસારહતાય, ભિક્ખુભાવાય અભબ્બતાય ચ પારાજિકાવ, તથા એકાદસ અભબ્બપુગ્ગલાપિ હોન્તીતિ અત્થો. એકાદસાભબ્બાતિ માતુઘાતકો, પિતુઘાતકો, અરહન્તઘાતકો, સઙ્ઘભેદકો, લોહિતુપ્પાદકો, પણ્ડકો, તિરચ્છાનગતો, ઉભતોબ્યઞ્જનકો, થેય્યસંવાસકો, ભિક્ખુનિદૂસકો, તિત્થિયપક્કન્તકોતિ એકાદસ. સબ્બેતે ચતુવીસતિ એતે સબ્બે ચતુવીસતિ પુગ્ગલા સમોધાનતો વેદિતબ્બાતિ અધિપ્પાયો.
Tathāti yathā ime dassitā tena asaṃvāsārahatāya, bhikkhubhāvāya abhabbatāya ca pārājikāva, tathā ekādasa abhabbapuggalāpi hontīti attho. Ekādasābhabbāti mātughātako, pitughātako, arahantaghātako, saṅghabhedako, lohituppādako, paṇḍako, tiracchānagato, ubhatobyañjanako, theyyasaṃvāsako, bhikkhunidūsako, titthiyapakkantakoti ekādasa. Sabbete catuvīsati ete sabbe catuvīsati puggalā samodhānato veditabbāti adhippāyo.
૩૨૦. ઇમે ચતુવીસતિ પારાજિકા પુગ્ગલા સીસચ્છિન્નોવ જીવિતું ઇધ ભિક્ખુભાવાય અભબ્બાતિ વુત્તાતિ યોજના.
320. Ime catuvīsati pārājikā puggalā sīsacchinnova jīvituṃ idha bhikkhubhāvāya abhabbāti vuttāti yojanā.
૩૨૧. ઇમેસં એકાદસન્નં અભબ્બતાય હેતુદસ્સનત્થમાહ ‘‘પણ્ડકો ચા’’તિઆદિ. પણ્ડકો ચાતિ આસિત્તપણ્ડકો, ઉસૂયપણ્ડકો, પક્ખપણ્ડકો, ઓપક્કમિકપણ્ડકો, નપુંસકપણ્ડકોતિ વુત્તો પઞ્ચવિધો પણ્ડકો ચ. તિરચ્છાનોતિ તિરિયં અઞ્છતિ ગચ્છતીતિ ‘‘તિરચ્છાનો’’તિ ગહિતો નાગસુપણ્ણાદિકો સબ્બતિરચ્છાનયોનિકો ચ. યક્ખાદયો સબ્બે અમનુસ્સાપિ ઇધ તિરચ્છાનેયેવ સઙ્ગહિતાતિ વેદિતબ્બા. ઉભતોબ્યઞ્જનોપિ ચાતિ ઇત્થિપુરિસબ્યઞ્જનસાધકેહિ ઉભતો કમ્મતો જાતાનિ થનાદિકાનિ બ્યઞ્જનાનિ યસ્સાતિ નિરુત્તો ઇત્થિઉભતોબ્યઞ્જનો , પુરિસઉભતોબ્યઞ્જનોતિ દુવિધો ઉભતોબ્યઞ્જનો ચ. વત્થુવિપન્નાતિ તબ્ભાવભાવિતાય ભિક્ખુભાવો વસતિ એત્થાતિ વત્થુ, પુગ્ગલાનં ભિક્ખુભાવારહતા, સા પન પબ્બજ્જાક્ખન્ધકાગતસબ્બદોસવિરહિતગુણસમ્પયુત્તતા, તં વિપન્નં પણ્ડકભાવાદિયોગેન યેસં તે ‘‘વત્થુવિપન્ના’’તિ ગહેતબ્બા. હિ-સદ્દો હેતુમ્હિ. યસ્મા વત્થુવિપન્ના, તસ્મા ઇધ અત્તભાવે પબ્બજ્જાય અભબ્બાતિ વુત્તં હોતિ. ‘‘અહેતુપટિસન્ધિકા’’તિ વચનેન ઇમેસં વિપાકાવરણયુત્તભાવમાહ, ઇમિના એતેસં મગ્ગાધિગમસ્સ વારિતભાવો દસ્સિતોતિ વેદિતબ્બં.
321. Imesaṃ ekādasannaṃ abhabbatāya hetudassanatthamāha ‘‘paṇḍako cā’’tiādi. Paṇḍako cāti āsittapaṇḍako, usūyapaṇḍako, pakkhapaṇḍako, opakkamikapaṇḍako, napuṃsakapaṇḍakoti vutto pañcavidho paṇḍako ca. Tiracchānoti tiriyaṃ añchati gacchatīti ‘‘tiracchāno’’ti gahito nāgasupaṇṇādiko sabbatiracchānayoniko ca. Yakkhādayo sabbe amanussāpi idha tiracchāneyeva saṅgahitāti veditabbā. Ubhatobyañjanopi cāti itthipurisabyañjanasādhakehi ubhato kammato jātāni thanādikāni byañjanāni yassāti nirutto itthiubhatobyañjano , purisaubhatobyañjanoti duvidho ubhatobyañjano ca. Vatthuvipannāti tabbhāvabhāvitāya bhikkhubhāvo vasati etthāti vatthu, puggalānaṃ bhikkhubhāvārahatā, sā pana pabbajjākkhandhakāgatasabbadosavirahitaguṇasampayuttatā, taṃ vipannaṃ paṇḍakabhāvādiyogena yesaṃ te ‘‘vatthuvipannā’’ti gahetabbā. Hi-saddo hetumhi. Yasmā vatthuvipannā, tasmā idha attabhāve pabbajjāya abhabbāti vuttaṃ hoti. ‘‘Ahetupaṭisandhikā’’ti vacanena imesaṃ vipākāvaraṇayuttabhāvamāha, iminā etesaṃ maggādhigamassa vāritabhāvo dassitoti veditabbaṃ.
૩૨૨. પઞ્ચાનન્તરિકાતિ કમ્માવરણેન યુત્તતાય સગ્ગમોક્ખસમ્પત્તિતો પરિહાયિત્વા મરણાનન્તરં અપાયપટિસન્ધિયં નિયતા માતુઘાતકાદયો પઞ્ચાનન્તરિકા ચ. થેય્યસંવાસોપિ ચાતિ લિઙ્ગત્થેનકો, સંવાસત્થેનકો, ઉભયત્થેનકોતિ તિવિધો થેય્યસંવાસકો ચ. દૂસકોતિ પકતત્તાય ભિક્ખુનિયા મેથુનં પટિસેવિત્વા તસ્સા દૂસિતત્તા ભિક્ખુનિં દૂસેતીતિ ‘‘ભિક્ખુનિદૂસકો’’તિ વુત્તો ચ. તિત્થિપક્કન્તકો ચાતિ તિત્થિયાનં લદ્ધિં, વેસઞ્ચ રોચેત્વા તં ગહેત્વા તેસમન્તરં પવિટ્ઠો ચ. ઇતિ અટ્ઠ પન કિરિયાનટ્ઠાતિ યોજના. ઇતીતિ ઇદમત્થત્તા ઇમેતિ વુત્તં હોતિ. તે ઇમેતિ સમ્બન્ધો. તે ઇમે અટ્ઠ પન માતુવધાદિકિરિયાય ઇહત્તભાવે ભિક્ખુભાવાય અનરહા હુત્વા નટ્ઠાતિ અત્થો. એત્તાવતા એકાદસઅભબ્બાનં અભબ્બતાય કારણં દસ્સિતં હોતિ.
322.Pañcānantarikāti kammāvaraṇena yuttatāya saggamokkhasampattito parihāyitvā maraṇānantaraṃ apāyapaṭisandhiyaṃ niyatā mātughātakādayo pañcānantarikā ca. Theyyasaṃvāsopi cāti liṅgatthenako, saṃvāsatthenako, ubhayatthenakoti tividho theyyasaṃvāsako ca. Dūsakoti pakatattāya bhikkhuniyā methunaṃ paṭisevitvā tassā dūsitattā bhikkhuniṃ dūsetīti ‘‘bhikkhunidūsako’’ti vutto ca. Titthipakkantako cāti titthiyānaṃ laddhiṃ, vesañca rocetvā taṃ gahetvā tesamantaraṃ paviṭṭho ca. Iti aṭṭha pana kiriyānaṭṭhāti yojanā. Itīti idamatthattā imeti vuttaṃ hoti. Te imeti sambandho. Te ime aṭṭha pana mātuvadhādikiriyāya ihattabhāve bhikkhubhāvāya anarahā hutvā naṭṭhāti attho. Ettāvatā ekādasaabhabbānaṃ abhabbatāya kāraṇaṃ dassitaṃ hoti.
૩૨૩. મયા પારાજિકાનં સારભૂતો યો અયં વિનિચ્છયો વુત્તો, તસ્સ વિનિચ્છયસ્સ અનુસારેન અનુગમનેન સેસોપિ વિનિચ્છયો બુધેન પણ્ડિતેન અસેસતોવ વિઞ્ઞાતું સક્કાતિ યોજના.
323. Mayā pārājikānaṃ sārabhūto yo ayaṃ vinicchayo vutto, tassa vinicchayassa anusārena anugamanena sesopi vinicchayo budhena paṇḍitena asesatova viññātuṃ sakkāti yojanā.
૩૨૪. પટુભાવકરે પરમે વિવિધેહિ નયેહિ યુત્તે વિનયપિટકે પરમત્થનયં અભિપત્થયતા અયં સતતં પરિયાપુણિતબ્બોતિ યોજના. તત્થ વિવિધેહિ નાનપ્પકારેહિ. નયેહીતિ નીયન્તિ વુત્તાનુસારેન ઉદીરિયન્તીતિ ‘‘નયા’’તિ વુત્તેહિ ચક્કપેય્યાલાદીહિ નયેહિ. પરમત્થનયન્તિ પરમો ચ સો અત્થો ચાતિ પરમત્થો, પરમો વા વિસેસેન નિચ્છિતબ્બો અત્થો પરમત્થો, સોયેવ વિનિચ્છયત્થિકાનં બુદ્ધિયા નેતબ્બોતિ પરમત્થનયો, વિનિચ્છયૂપાયો નીયતિ એતેનાતિ કત્વા ‘‘પરમત્થનયો’’તિ વુચ્ચતિ, તં પરમત્થનયં. અભિપત્થયતાતિ વિનયપિટકે વિનિચ્છયં વા તદુપાયં વા પત્થયતા, ઇચ્છન્તેનાતિ અત્થો. ‘‘પરિયાપુણિતબ્બો અય’’ન્તિ પદચ્છેદો. મ-કારો આગમસન્ધિજો, ઓ-કારસ્સ અ-કારાદેસો. પરિયાપુણિતબ્બોતિ પઠિતબ્બો, સોતબ્બો ચિન્તેતબ્બો ધારેતબ્બોતિ વુત્તં હોતિ. અયન્તિ વિનયવિનિચ્છયો.
324. Paṭubhāvakare parame vividhehi nayehi yutte vinayapiṭake paramatthanayaṃ abhipatthayatā ayaṃ satataṃ pariyāpuṇitabboti yojanā. Tattha vividhehi nānappakārehi. Nayehīti nīyanti vuttānusārena udīriyantīti ‘‘nayā’’ti vuttehi cakkapeyyālādīhi nayehi. Paramatthanayanti paramo ca so attho cāti paramattho, paramo vā visesena nicchitabbo attho paramattho, soyeva vinicchayatthikānaṃ buddhiyā netabboti paramatthanayo, vinicchayūpāyo nīyati etenāti katvā ‘‘paramatthanayo’’ti vuccati, taṃ paramatthanayaṃ. Abhipatthayatāti vinayapiṭake vinicchayaṃ vā tadupāyaṃ vā patthayatā, icchantenāti attho. ‘‘Pariyāpuṇitabbo aya’’nti padacchedo. Ma-kāro āgamasandhijo, o-kārassa a-kārādeso. Pariyāpuṇitabboti paṭhitabbo, sotabbo cintetabbo dhāretabboti vuttaṃ hoti. Ayanti vinayavinicchayo.
ઇતિ વિનયત્થસારસન્દીપનિયા
Iti vinayatthasārasandīpaniyā
વિનયવિનિચ્છયવણ્ણનાય
Vinayavinicchayavaṇṇanāya
ચતુત્થપારાજિકકથાવણ્ણના નિટ્ઠિતા.
Catutthapārājikakathāvaṇṇanā niṭṭhitā.
