| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༦. ཙེཏོཁིལསུཏྟཝཎྞནཱ
6. Cetokhilasuttavaṇṇanā
༡༨༥. ཙེཏོ ཏེཧི ཁིལཡཏི ཐདྡྷབྷཱཝཾ ཨཱཔཛྫཏཱིཏི ཙེཏོཁིལཱ། ཏེནཱཧ ‘‘ཙིཏྟསྶ ཐདྡྷབྷཱཝཱ’’ཏི། ཡསྨཱ ཏེཧི ཨུཔྤནྣེཧི ཙིཏྟཾ ཨུཀླཱཔཱིཛཱཏཾ ཋཱནཾ ཝིཡ ཨམནུཉྙཾ ཁེཏྟཾ ཝིཡ ཙ ཁཱཎུཀནིཙིཏཾ ཨམཧཔྥལཾ ཧོཏི། ཏེན ཝུཏྟཾ ‘‘ཀཙཝརབྷཱཝཱ ཁཱཎུཀབྷཱཝཱ’’ཏི། ‘‘ཙིཏྟསྶཱ’’ཏི ཨཱནེཏྭཱ སམྦནྡྷིཏབྦཾ། ཙིཏྟཾ བནྡྷིཏྭཱཏི ཏཎྷཱཔཝཏྟིབྷཱཝཏོ ཀུསལཙཱརསྶ ཨཝསརཙཛནཝསེན ཙིཏྟཾ བདྡྷཾ ཝིཡ སམོརོདྷེཏྭཱ། ཏེནཱཧ ‘‘མུཊྛིཡཾ ཀཏྭཱ ཝིཡ གཎྷནྟཱི’’ཏི། སདྡཏྠཏོ པན ཙེཏོ ཝིརཱུཔཾ ནིབནྡྷཱིཡཏི སཾཡམཱིཡཏི ཨེཏེཧཱིཏི ཙེཏསོ ཝིནིབནྡྷཱ ཡསྶ ཙཏུབྦིདྷཾ སཱིལཾ ཨཁཎྜཱདིབྷཱཝཔྤཏྟིཡཱ སུཔརིསུདྡྷཾ ཝིསེསབྷཱགིཡཏྟཱ ཨཔྤཀསིརེནེཝ མགྒཕལཱཝཧཾ མཧཱསངྒྷརཀྑིཏཏྠེརསྶ ཝིཡ, སོ ཏཱདིསེན སཱིལེན ཨིམསྨིཾ དྷམྨཝིནཡེ ཝུདྡྷིཾ ཨཱཔཛྫིསྶཏཱིཏི ཨཱཧ ‘‘སཱིལེན ཝུདྡྷི’’ནྟི། ཡསྶ པན ཨརིཡམགྒོ ཨུཔྤཛྫནྟོ ཝིརཱུལ༹ྷམཱུལོ ཝིཡ པཱདཔོ སུཔྤཏིཊྛིཏོ, སོ སཱསནེ ཝིརཱུལ༹ྷིཾ ཨཱཔནྣོཏི ཨཱཧ ‘‘མགྒེན ཝིརཱུལ༹ྷི’’ནྟི། ཡོ སབྦསོ ཀིལེསནིབྦཱནཔྤཏྟོ, སོ ཨརཧཱ སཱིལཱདིདྷམྨཀྑནྡྷཔཱརིཔཱུརིཡཱ སཏིཝེཔུལླཔྤཏྟོ ཧོཏཱིཏི ཨཱཧ ‘‘ནིབྦཱནེན ཝེཔུལླ’’ནྟི། དུཏིཡཝིཀཔྤེ ཨཏྠོ ཝུཏྟནཡཱནུསཱརེན ཝེདིཏབྦོ།
185. Ceto tehi khilayati thaddhabhāvaṃ āpajjatīti cetokhilā. Tenāha ‘‘cittassa thaddhabhāvā’’ti. Yasmā tehi uppannehi cittaṃ uklāpījātaṃ ṭhānaṃ viya amanuññaṃ khettaṃ viya ca khāṇukanicitaṃ amahapphalaṃ hoti. Tena vuttaṃ ‘‘kacavarabhāvā khāṇukabhāvā’’ti. ‘‘Cittassā’’ti ānetvā sambandhitabbaṃ. Cittaṃ bandhitvāti taṇhāpavattibhāvato kusalacārassa avasaracajanavasena cittaṃ baddhaṃ viya samorodhetvā. Tenāha ‘‘muṭṭhiyaṃ katvā viya gaṇhantī’’ti. Saddatthato pana ceto virūpaṃ nibandhīyati saṃyamīyati etehīti cetaso vinibandhā yassa catubbidhaṃ sīlaṃ akhaṇḍādibhāvappattiyā suparisuddhaṃ visesabhāgiyattā appakasireneva maggaphalāvahaṃ mahāsaṅgharakkhitattherassa viya, so tādisena sīlena imasmiṃ dhammavinaye vuddhiṃ āpajjissatīti āha ‘‘sīlena vuddhi’’nti. Yassa pana ariyamaggo uppajjanto virūḷhamūlo viya pādapo suppatiṭṭhito, so sāsane virūḷhiṃ āpannoti āha ‘‘maggena virūḷhi’’nti. Yo sabbaso kilesanibbānappatto, so arahā sīlādidhammakkhandhapāripūriyā sativepullappatto hotīti āha ‘‘nibbānena vepulla’’nti. Dutiyavikappe attho vuttanayānusārena veditabbo.
བུདྡྷཱནཾ དྷམྨཀཱཡོ ཝིཡ རཱུཔཀཱཡོཔི ཨནཉྙསཱདྷཱརཎཏཱཡ ཨནུཏྟརགུཎཱདྷིཊྛཱནཏཱཡ ཙ ཨཔཙྩཀྑཀཱརཱིནཾ སཾསཡཝཏྠུ ཧོཏིཡེཝཱཏི ‘‘སརཱིརེ ཝཱ གུཎེ ཝཱ ཀངྑཏཱི’’ཏི ཝུཏྟཾ། ཏཏྠ ཡཐཱ མཧཱཔུརིསལཀྑཎེན ཨནུབྱཉྫནཱདཡོ རཱུཔཀཱཡགུཎཱ གཧིཏཱ ཨེཝ ཧོནྟི ཨཝིནཱབྷཱཝཏོཏི ‘‘དྭཏྟིཾསཝརལཀྑཎཔྤཊིམཎྜིཏ’’མིཙྩེཝ ཝུཏྟཾ, ཨེཝཾ ཨནཱཝརཎཉཱཎེན སབྦེཔི ཨནནྟཱཔརིམེཡྻབྷེདཱ དྷམྨཀཱཡགུཎཱ གཧིཏཱ ཨེཝ ཧོནྟཱིཏི སབྦཉྙུཏཉྙཱཎགྒཧཎམེཝ ཀཏཾ ནཱནནྟརིཡབྷཱཝཏོཏི དཊྛབྦཾ། ཀངྑཧཱིཏི ‘‘ཨཧོ ཝཏ ཏེ གུཎཱ ན བྷཝེཡྻུཾ, བྷཝེཡྻུཾ ཝཱ’’ཏི པཏྠནུཔྤཱདནཝསེན ཀངྑཏི། པུརིམོ ཧི ཝིཔརཱིཏཛ྄ཛྷཱསཡོ, ཨིཏརོ ཡཐཱབྷཱུཏཉཱཎཛ྄ཛྷཱསཡོ། ཝིཙིནནྟོཏི ཝིཙཡབྷཱུཏཱཡ པཉྙཱཡ ཏེ ཝིཝེཙེཏུཀཱམོ ཏདབྷཱཝཏོ ཀིཙྪཾ དུཀྑཾ ཨཱཔཛྫཏི, ཀིཙྪཔྤཏྟི ཙ ཏཏྠ ནིཙྪེཏུཾ ཨསམཏྠཏཱཡེཝཱཏི ཨཱཧ ‘‘ཝིནིཙྪེཏུཾ ན སཀྐོཏཱི’’ཏི། ཝིགཏཱ ཙིཀིཙྪཱཏི ཝིཙིཀིཙྪཱ། ཨདྷིམོཀྑཾ ན པཊིལབྷཏཱིཏི ‘‘ཨེཝམེཏ’’ནྟི ཨོཀཔྤནཝསེན གུཎེསུ ཝིནིཙྪཡཾ ནཱདྷིགཙྪཏི། ཨོཏརིཏྭཱཏི ཉཱཎེན ཨནུཔཝིསིཏྭཱ། པསཱིདིཏུནྟི ‘‘པསནྣརཱུཔདྷམྨཀཱཡགུཎེཧི བྷགཝཱ’’ཏི པསཱིདིཏུཾ། ཨནཱཝིལོ ཨཀཱལུསྶོ ཧོཏུཾ ན སཀྐོཏི། ‘‘ཀངྑཏཱི’’ཏི ཨིམིནཱ དུབྦལཱ ཝིམཏི ཝུཏྟཱ, ‘‘ཝིཙིཀིཙྪཏཱི’’ཏི ཨིམིནཱ མཛ྄ཛྷིམཱ, ‘‘ནཱདྷིམུཙྩཏཱི’’ཏི ཨིམིནཱ བལཝཏཱི, ‘‘ན སམྤསཱིདཏཱི’’ཏི ཨིམིནཱ ཏིཝིདྷཱཡཔི ཝིམཏིཡཱ ཝསེན ཨུཔྤནྣཙིཏྟཀཱལུསྶིཡཾ ཝུཏྟནྟི དཊྛབྦཾ།
Buddhānaṃ dhammakāyo viya rūpakāyopi anaññasādhāraṇatāya anuttaraguṇādhiṭṭhānatāya ca apaccakkhakārīnaṃ saṃsayavatthu hotiyevāti ‘‘sarīre vā guṇe vā kaṅkhatī’’ti vuttaṃ. Tattha yathā mahāpurisalakkhaṇena anubyañjanādayo rūpakāyaguṇā gahitā eva honti avinābhāvatoti ‘‘dvattiṃsavaralakkhaṇappaṭimaṇḍita’’micceva vuttaṃ, evaṃ anāvaraṇañāṇena sabbepi anantāparimeyyabhedā dhammakāyaguṇā gahitā eva hontīti sabbaññutaññāṇaggahaṇameva kataṃ nānantariyabhāvatoti daṭṭhabbaṃ. Kaṅkhahīti ‘‘aho vata te guṇā na bhaveyyuṃ, bhaveyyuṃ vā’’ti patthanuppādanavasena kaṅkhati. Purimo hi viparītajjhāsayo, itaro yathābhūtañāṇajjhāsayo. Vicinantoti vicayabhūtāya paññāya te vivecetukāmo tadabhāvato kicchaṃ dukkhaṃ āpajjati, kicchappatti ca tattha nicchetuṃ asamatthatāyevāti āha ‘‘vinicchetuṃ na sakkotī’’ti. Vigatā cikicchāti vicikicchā. Adhimokkhaṃ na paṭilabhatīti ‘‘evameta’’nti okappanavasena guṇesu vinicchayaṃ nādhigacchati. Otaritvāti ñāṇena anupavisitvā. Pasīditunti ‘‘pasannarūpadhammakāyaguṇehi bhagavā’’ti pasīdituṃ. Anāvilo akālusso hotuṃ na sakkoti. ‘‘Kaṅkhatī’’ti iminā dubbalā vimati vuttā, ‘‘vicikicchatī’’ti iminā majjhimā, ‘‘nādhimuccatī’’ti iminā balavatī, ‘‘na sampasīdatī’’ti iminā tividhāyapi vimatiyā vasena uppannacittakālussiyaṃ vuttanti daṭṭhabbaṃ.
ཨཱཏཔྤཱཡཱཏིཨཱདིཏོ ཏཔཏི སནྟཔཏི ཀིལེསེཏི ཨཱཏཔྤཾ, ཨཱརམྦྷདྷཱཏུ, ཏདཏྠཱཡ། ཨནུཡོགཱཡཱཏི ཡཐཱ སཾཀིལེསདྷམྨཱནཾ ཨཝསརོ ན ཧོཏི, ཨེཝཾ ཨནུ ཨནུ ཡུཉྫནཾ ཨནུཡོགོ, ནིཀྐམདྷཱཏུ, ཏདཏྠཱཡ། ཏེནཱཧ ‘‘པུནཔྤུནཾ ཡོགཱཡཱ’’ཏི། སཱཏཙྩཱཡཱཏི ཡཐཱ ཨུཔརཱུཔརི ཝིསེསཱདྷིགམོ ཧོཏི, ཏཐཱ སཏཏསྶ ནིརནྟརཔཝཏྟསྶ ཨནུཡོགསྶ བྷཱཝོ སཱཏཙྩཾ, པརཀྐམདྷཱཏུ, ཏདཏྠཱཡ། པདྷཱནཱཡཱཏི སནྟམེཝཾ ཏིཝིདྷདྷཱཏུསཾཝཌྜྷིཏཱནུབྷཱཝཾ སབྦཀིལེསཝིདྡྷཾསནསམཏྠཾ པདྷཱནསངྑཱཏཾ ཝཱིརིཡཾ, ཏདཏྠཱཡ། ཨེཏྠ ཙ ཨཱཏཔྤཱཡ ཙིཏྟཾ ན ནམཏི ཡཐཱཝུཏྟཀངྑཱཝསེན, པགེཝ ཨནུཡོགཱདིཨཏྠནྟི དསྶེཏུཾ ཙཏྟཱརིཔི པདཱནི གཧིཏཱནི, ཨནཝསེསཝིསེསདསྶནཏྠཾ ཝཱ། ཀེཙི པན ‘‘ཨཱཏཔྤཝེཝཙནཱནེཝ ཨནུཡོགཱདིཔདཱནཱི’’ཏི ཝདནྟི། ཨེཏྟཱཝཏཱ བྷགཝཱ སཏྠརི ཀངྑཱཡ ཙིཏྟསྶ ཐདྡྷཀཙཝརཁཱཎུཀབྷཱཝེན ཨཀུསལབྷཱཝཱདིཨཱཔཱདནཏོ ཙེཏོཁིལབྷཱཝཾ དསྶེཏི། སེསེསུཔི ཨེསེཝ ནཡོ།
Ātappāyātiādito tapati santapati kileseti ātappaṃ, ārambhadhātu, tadatthāya. Anuyogāyāti yathā saṃkilesadhammānaṃ avasaro na hoti, evaṃ anu anu yuñjanaṃ anuyogo, nikkamadhātu, tadatthāya. Tenāha ‘‘punappunaṃ yogāyā’’ti. Sātaccāyāti yathā uparūpari visesādhigamo hoti, tathā satatassa nirantarapavattassa anuyogassa bhāvo sātaccaṃ, parakkamadhātu, tadatthāya. Padhānāyāti santamevaṃ tividhadhātusaṃvaḍḍhitānubhāvaṃ sabbakilesaviddhaṃsanasamatthaṃ padhānasaṅkhātaṃ vīriyaṃ, tadatthāya. Ettha ca ātappāya cittaṃ na namati yathāvuttakaṅkhāvasena, pageva anuyogādiatthanti dassetuṃ cattāripi padāni gahitāni, anavasesavisesadassanatthaṃ vā. Keci pana ‘‘ātappavevacanāneva anuyogādipadānī’’ti vadanti. Ettāvatā bhagavā satthari kaṅkhāya cittassa thaddhakacavarakhāṇukabhāvena akusalabhāvādiāpādanato cetokhilabhāvaṃ dasseti. Sesesupi eseva nayo.
སིཀྑཱགྒཧཎེན པཊིཔཏྟིསདྡྷམྨསྶ གཧིཏཏྟཱ ཝུཏྟཾ ‘‘པརིཡཏྟིདྷམྨེ ཙ པཊིཝེདྷདྷམྨེ ཙཱ’’ཏི། པརིཡཏྟིདྷམྨེ ཡཏྠ ཀངྑཱཡ སམྦྷཝོ, ཏཾ དསྶེཏུཾ ‘‘ཙཏུརཱསཱིཏི དྷམྨཀྑནྡྷསཧསྶཱནཱི’’ཏིཨཱདི ཝུཏྟཾ། ཏཡིདཾ ནིདསྶནམཏྟཾ དཊྛབྦཾ པརམྤརཱཡ པཊིཝེདྷཱཝཧབྷཱཝཱདིཝསེནཔི ཨེཀཙྩཱནཾ ཏཏྠ སཾསཡུཔྤཏྟིཏོ། ཡཐཱ ཙ པཊིཝེདྷེ ཀངྑཱ ཝུཏྟཱ, ཨེཝཾ ཨདྷིགམདྷམྨེཔི པཝཏྟཏཱིཏི ཝེདིཏབྦཱ། ཏཐཱ ཧི ཨེཀཙྩེ ‘‘ཀསིཎཱདིབྷཱཝནཱཡ ཛྷཱནཱནི ཨིཛ྄ཛྷནྟཱི’’ཏི ཝདནྟི། ‘‘ཀསིཎནིསྶནྡོ ཨཱརུཔྤཱཏི, མེཏྟཱདིནིསྶནྡོ ཙཏུཏྠབྲཧྨཝིཧཱརོ’’ཏི ཨེཝམཱདིནཱ ཀངྑཏིཡེཝཱཏི། ཨེཏྠ ཙ ནཝལོཀུཏྟརེསུ པཉྙཏྟིཡཾཡེཝ ཀངྑཱཔཝཏྟི ཝེདིཏབྦཱ ཨསཾཀིལེསིཀཏྟཱ ལོཀུཏྟརདྷམྨཱནཾ།
Sikkhāggahaṇena paṭipattisaddhammassa gahitattā vuttaṃ ‘‘pariyattidhamme ca paṭivedhadhamme cā’’ti. Pariyattidhamme yattha kaṅkhāya sambhavo, taṃ dassetuṃ ‘‘caturāsīti dhammakkhandhasahassānī’’tiādi vuttaṃ. Tayidaṃ nidassanamattaṃ daṭṭhabbaṃ paramparāya paṭivedhāvahabhāvādivasenapi ekaccānaṃ tattha saṃsayuppattito. Yathā ca paṭivedhe kaṅkhā vuttā, evaṃ adhigamadhammepi pavattatīti veditabbā. Tathā hi ekacce ‘‘kasiṇādibhāvanāya jhānāni ijjhantī’’ti vadanti. ‘‘Kasiṇanissando āruppāti, mettādinissando catutthabrahmavihāro’’ti evamādinā kaṅkhatiyevāti. Ettha ca navalokuttaresu paññattiyaṃyeva kaṅkhāpavatti veditabbā asaṃkilesikattā lokuttaradhammānaṃ.
ཨེཝརཱུཔནྟི ཨེདིསཾ སུཔྤཊིཔཏྟི-ཨུཛུཔྤཊིཔཏྟི-ཉཱཡཔྤཊིཔཏྟི-སཱམཱིཙིཔྤཊིཔཏྟི-སངྑཱཏཾ སམྨཱཔཊིཔདཾ། ཨདྷིསཱིལསིཀྑཱདཡོ ལོཀུཏྟརདྷམྨསྶ ཨནུདྷམྨབྷཱུཏཱ ཝེདིཏབྦཱ། ཨེཝཉྷི མགྒཕལསིཀྑཱཧི ཨིམཱསཾ ཝིསེསོ སིདྡྷོ ཧོཏི། ཏཐཱ ཧི ཝུཏྟཾ ‘‘སིཀྑཱགྒཧཎེན པཊིཔཏྟིསདྡྷམྨསྶ གཧིཏཏྟཱ’’ཏི། ཨེཏྠ ཙ ཡཐཱ ཝིཙིཀིཙྪཱ ཝཏྠུཏྟཡསྶ སིཀྑཱཡ ཙ གུཎེསུ ཨནདྷིམུཙྩནཨསམྤསཱིདནཝསེན ཨཔྤཊིཔཏྟིབྷཱཝཏོ ཙིཏྟསྶ ཐདྡྷབྷཱཝོ ཨཱསཔྤནཔརིསཔྤནཝསེན པཝཏྟིཡཱ ཀཙཝརཁཱཎུཀབྷཱཝོ ཙ, ཨེཝཾ སབྲཧྨཙཱརཱིསུ ཨཱགྷཱཏཙཎྜིཀྐཱདིཝསེན ཙིཏྟསྶ ཐདྡྷབྷཱཝོ ཙ ཨུཔཧནནཝིརུཛ྄ཛྷནཱདིཝསེན ཀཙཝརཁཱཎུཀབྷཱཝོ ཙ ཝེདིཏབྦོ། ཨརིཡསངྒྷཝིསཡཱ ཝིཙིཀིཙྪཱ, པུགྒལཝིསཡཱ ཀཱཙི ནཏྠཱིཏི སངྒྷཝིསཡཱཝ གཧིཏཱ, སཱསནིཀཝསེན ཙཱཡཾ ཙེཏོཁིལདེསནཱཏི སབྲཧྨཙཱརཱིཝིསཡོཝ ཀོཔོ གཧིཏོ།
Evarūpanti edisaṃ suppaṭipatti-ujuppaṭipatti-ñāyappaṭipatti-sāmīcippaṭipatti-saṅkhātaṃ sammāpaṭipadaṃ. Adhisīlasikkhādayo lokuttaradhammassa anudhammabhūtā veditabbā. Evañhi maggaphalasikkhāhi imāsaṃ viseso siddho hoti. Tathā hi vuttaṃ ‘‘sikkhāggahaṇena paṭipattisaddhammassa gahitattā’’ti. Ettha ca yathā vicikicchā vatthuttayassa sikkhāya ca guṇesu anadhimuccanaasampasīdanavasena appaṭipattibhāvato cittassa thaddhabhāvo āsappanaparisappanavasena pavattiyā kacavarakhāṇukabhāvo ca, evaṃ sabrahmacārīsu āghātacaṇḍikkādivasena cittassa thaddhabhāvo ca upahananavirujjhanādivasena kacavarakhāṇukabhāvo ca veditabbo. Ariyasaṅghavisayā vicikicchā, puggalavisayā kāci natthīti saṅghavisayāva gahitā, sāsanikavasena cāyaṃ cetokhiladesanāti sabrahmacārīvisayova kopo gahito.
༡༨༦. ཡཐཱ ཝཏྠུཀཱམོ, ཨེཝཾ ཀིལེསཀཱམོཔི ཨསྶཱདནཱིཡོ ཨེཝཱཏི ‘‘ཀིལེསཀཱམེཔཱི’’ཏི ཝུཏྟཾ། ཏེནཱཧ བྷགཝཱ ‘‘རཱུཔཏཎྷཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏཱི’’ཏིཨཱདི (དཱི॰ ནི॰ ༢.༤༠༠; མ॰ ནི॰ ༡.༡༣༣; ཝིབྷ॰ ༢༠༣)། ཀཱམནིདྡེསེ (མཧཱནི॰ ༡) སབྦེཔི ཏེབྷཱུམཀཱ དྷམྨཱ ཀཱམནཱིཡཊྛེན ‘‘ཀཱམཱ’’ཏི ཝུཏྟཱ, བལཝཀཱམརཱགཝཏྠུབྷཱུཏཱཡེཝེཏྠ ཀཱམགྒཧཎེན གཧིཏཱཏི། ཝིནིབདྡྷཝཏྠུབྷཱཝེན ཡཐཱ ཝིསུཾ ཨཏྟནོ ཀཱཡོ གཧིཏོ, ཏཐཱ པརེསཾ ཏཐཱརཱུཔཱ རཱུཔདྷམྨཱ སམཱུཧཊྛེནཱཏི ཨཱཧ ‘‘རཱུཔེཏི བཧིདྡྷཱརཱུཔེ’’ཏི། ཡཐཱ ཧི པཉྩཀཱམགུཎིཀོ རཱགོ ཛྷཱནཱདིཝིསེསཱདྷིགམསྶ ཝིནིབདྡྷཱཡ སཾཝཏྟཏི, ཨེཝཾ ཨཏྟནོ ཀཱཡེ ཨཔེཀྑཱ བཧིདྡྷཱ ཙ སཀཔརིཀྑཱརཉཱཏིམིཏྟཱདཱིསུ ཨཔེཀྑཱཏི། ཀེཙི པནེཏྠ ‘‘རཱུཔེཏི རཱུཔཛ྄ཛྷཱནེ’’ཏིཨཱདིནཱ པཔཉྩེནྟི། ཏདཡུཏྟཾ ཛྷཱནཱདྷིགམཝིནིབདྡྷཱནཾ སཱིལསྶ ཙ སཾཀིལེསབྷཱུཏཱནཾ ཙེཏོཝིནིབདྡྷབྷཱཝེན གཧིཏཏྟཱ།
186. Yathā vatthukāmo, evaṃ kilesakāmopi assādanīyo evāti ‘‘kilesakāmepī’’ti vuttaṃ. Tenāha bhagavā ‘‘rūpataṇhā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisatī’’tiādi (dī. ni. 2.400; ma. ni. 1.133; vibha. 203). Kāmaniddese (mahāni. 1) sabbepi tebhūmakā dhammā kāmanīyaṭṭhena ‘‘kāmā’’ti vuttā, balavakāmarāgavatthubhūtāyevettha kāmaggahaṇena gahitāti. Vinibaddhavatthubhāvena yathā visuṃ attano kāyo gahito, tathā paresaṃ tathārūpā rūpadhammā samūhaṭṭhenāti āha ‘‘rūpeti bahiddhārūpe’’ti. Yathā hi pañcakāmaguṇiko rāgo jhānādivisesādhigamassa vinibaddhāya saṃvattati, evaṃ attano kāye apekkhā bahiddhā ca sakaparikkhārañātimittādīsu apekkhāti. Keci panettha ‘‘rūpeti rūpajjhāne’’tiādinā papañcenti. Tadayuttaṃ jhānādhigamavinibaddhānaṃ sīlassa ca saṃkilesabhūtānaṃ cetovinibaddhabhāvena gahitattā.
ཡཱཝདཏྠནྟི ཡཱཝ ཨཏྠེཏི ཨབྷིཀངྑཏི, ཏཱཝ། ཏེནཱཧ ‘‘ཡཏྟཀཾ ཨིཙྪཏི, ཏཏྟཀ’’ནྟི། ནྟི ཡཱཝདཏྠཾ ཨུདརཔཱུརཾ བྷུཏྟཾ། ཨཝདེཧནཏོ པཱུརཎཏོ། སེཡྻསུཁནྟི སེཡྻཾ པཊིཙྩ ཨུཔྤཛྫནཀསུཁཾ། པསྶསུཁནྟི པསྶཱནཾ སམྤརིཝཏྟནེན ཨུཔྤཛྫནཀསུཁཾ། ནིདྡཱསུཁནྟི ནིདྡཱཡནེན ཨུཔྤཛྫནཀསུཁཾ།
Yāvadatthanti yāva attheti abhikaṅkhati, tāva. Tenāha ‘‘yattakaṃ icchati, tattaka’’nti. Nti yāvadatthaṃ udarapūraṃ bhuttaṃ. Avadehanato pūraṇato. Seyyasukhanti seyyaṃ paṭicca uppajjanakasukhaṃ. Passasukhanti passānaṃ samparivattanena uppajjanakasukhaṃ. Niddāsukhanti niddāyanena uppajjanakasukhaṃ.
སཱིལེནཱཏིཨཱདི པཏྠནཱཀཱརདསྶནཾ། ཝཏསམཱདཱནནྟི དྷུཏངྒཱདིཝཏཱནུཊྛཱནཾ། ཏཔོཏི ཝཱིརིཡཱརམྦྷོ། སོ ཧི ཀིལེསཱནཾ ཏཔནཊྛེན ནིགྒཎྷནཊྛེན ཏཔཙརཎནྟི ཝུཏྟཾ།
Sīlenātiādi patthanākāradassanaṃ. Vatasamādānanti dhutaṅgādivatānuṭṭhānaṃ. Tapoti vīriyārambho. So hi kilesānaṃ tapanaṭṭhena niggaṇhanaṭṭhena tapacaraṇanti vuttaṃ.
༡༨༩. ཚནྡཾ ནིསྶཱཡཱཏི ཚནྡཾ དྷུརཾ, ཚནྡཾ ཛེཊྛཀཾ, ཚནྡཾ པུབྦངྒམཾ ཀཏྭཱ པཝཏྟིཝསེན ཚནྡཾ ནིསྶཱཡ། ཛེཊྛཀཊྛེན པདྷཱནབྷཱུཏཱ, པདྷཱནབྷཱཝཾ ཝཱ པཏྟཱཏི པདྷཱནབྷཱུཏཱ། ཏེཧི དྷམྨེཧཱིཏི ཚནྡནིསྶཡེན པཝཏྟསམཱདྷིནཱ ཙེཝ ‘‘པདྷཱནསངྑཱརོ’’ཏི ཝུཏྟཝཱིརིཡེན ཙ། ཨུཔེཏནྟི སམྤཡུཏྟཾ། ཨིཛ྄ཛྷནཊྛེན ཨིདྡྷི, ནིཔྥཏྟིཨཏྠེན པཊིལཱབྷཊྛེན ཙཱཏི ཨཏྠོ, ཏསྶཱ ཨིདྡྷིཡཱ པཱདཾ པཱདཀཾ པདཊྛཱནབྷཱུཏཾ། ཨཐ ཝཱ ཨིཛ྄ཛྷནྟི ཏཱཡ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིདྡྷི, སཱཝ ཨུཔརིཝིསེསཱནཾ ཨདྷིཊྛཱནབྷཱཝཏོ པཱདོ། ཏེནཱཧ ‘‘ཨིདྡྷིབྷཱུཏཾ ཝཱ པཱདནྟི ཨིདྡྷིཔཱད’’ནྟི། སེསེསུཔཱིཏི ཝཱིརིཡིདྡྷིཔཱདཱདཱིསུཔི། ཨསྶཱཏི ཨིདྡྷིཔཱདསྶ། ཨཏྠོ དཱིཔིཏོཏི དཱིཔནཏྠཾ ཀཏཾ, ཏསྨཱ ཝིསུདྡྷིམགྒསཾཝཎྞནཱཡཾ (ཝིསུདྡྷི॰ མཧཱཊཱི॰ ༢.༣༦༩) ཏསྶ ཨཏྠཝིཙཱརོ གཧེཏབྦོ། ཨིདྡྷིཔཱདཱནཾ སམཱདྷིཔདྷཱནཏྟཱ ཝུཏྟཾ ‘‘ཝིཀྑམྦྷནཔྤཧཱནཾ ཀཐིཏ’’ནྟི། ཏེསཾ ཏེསཾ ཀུསལདྷམྨཱནཾ ཨནུཔྤནྣཱནཾ ཨུཔྤཱདནཀིརིཡཱཡ ཨུཔྤནྣཱནཾ པརིབྲཱུཧནཀིརིཡཱཡ ཨུསྶཧནཏོ ཨུསྶོལ༹ྷཱི, ཐཱམཔྤཏྟཱ པརཀྐམདྷཱཏུ། སཱ པན ཙཏུནྣཾ ཨིདྡྷིཔཱདཱནཾ ཝིསེསཔཙྩཡབྷཱུཏཱ ཏེ ཨུཔཱདཱཡ ‘‘པཉྩམཱི’’ཏི ཝུཏྟཱ, སཱ ཙ ཡསྨཱ སམཐཝིཔསྶནཱབྷཱཝནཱསུ ཏཏྠ ཙཨཱདིམཛ྄ཛྷཔརིཡོསཱནེསུ སཱདྷེཏབྦཾ ཝཱིརིཡཾ, ཏསྨཱ ཨཱཧ ‘‘ཨུསྶོལ༹ྷཱིཏི སབྦཏྠ ཀཏྟབྦཝཱིརིཡཾ དསྶེཏཱི’’ཏི། པུབྦབྷཱགིཡསམཐཝིཔསྶནཱསཱདྷནཾ པཧཱཏབྦདྷམྨཝིབྷཱགེན བྷིནྡིཏྭཱ ཨཱཧ ‘‘པཉྩ ཙེཏོཁིལཔྤཧཱནཱནི པཉྩ ཝིནིབནྡྷཔྤཧཱནཱནཱི’’ཏི། བྷབྦོཏི ཡུཏྟོ ཨརཧཏི ནིཔྥཏྟིཡཱ། ཉཱཎེནཱཏི མགྒཉཱཎེན། ཀིལེསབྷེདཱཡཱཏི ཀིལེསཱནཾ སམུཙྪིནྡནཱཡ། ཁེམསྶཱཏི ཨནུཔདྡཝསྶ།
189.Chandaṃ nissāyāti chandaṃ dhuraṃ, chandaṃ jeṭṭhakaṃ, chandaṃ pubbaṅgamaṃ katvā pavattivasena chandaṃ nissāya. Jeṭṭhakaṭṭhena padhānabhūtā, padhānabhāvaṃ vā pattāti padhānabhūtā. Tehi dhammehīti chandanissayena pavattasamādhinā ceva ‘‘padhānasaṅkhāro’’ti vuttavīriyena ca. Upetanti sampayuttaṃ. Ijjhanaṭṭhena iddhi, nipphattiatthena paṭilābhaṭṭhena cāti attho, tassā iddhiyā pādaṃ pādakaṃ padaṭṭhānabhūtaṃ. Atha vā ijjhanti tāya iddhā vuddhā ukkaṃsagatā hontīti iddhi, sāva uparivisesānaṃ adhiṭṭhānabhāvato pādo. Tenāha ‘‘iddhibhūtaṃ vā pādanti iddhipāda’’nti. Sesesupīti vīriyiddhipādādīsupi. Assāti iddhipādassa. Attho dīpitoti dīpanatthaṃ kataṃ, tasmā visuddhimaggasaṃvaṇṇanāyaṃ (visuddhi. mahāṭī. 2.369) tassa atthavicāro gahetabbo. Iddhipādānaṃ samādhipadhānattā vuttaṃ ‘‘vikkhambhanappahānaṃ kathita’’nti. Tesaṃ tesaṃ kusaladhammānaṃ anuppannānaṃ uppādanakiriyāya uppannānaṃ paribrūhanakiriyāya ussahanato ussoḷhī, thāmappattā parakkamadhātu. Sā pana catunnaṃ iddhipādānaṃ visesapaccayabhūtā te upādāya ‘‘pañcamī’’ti vuttā, sā ca yasmā samathavipassanābhāvanāsu tattha caādimajjhapariyosānesu sādhetabbaṃ vīriyaṃ, tasmā āha ‘‘ussoḷhīti sabbattha kattabbavīriyaṃ dassetī’’ti. Pubbabhāgiyasamathavipassanāsādhanaṃ pahātabbadhammavibhāgena bhinditvā āha ‘‘pañca cetokhilappahānāni pañca vinibandhappahānānī’’ti. Bhabboti yutto arahati nipphattiyā. Ñāṇenāti maggañāṇena. Kilesabhedāyāti kilesānaṃ samucchindanāya. Khemassāti anupaddavassa.
སམྦྷཱཝནཏྠེཏི (སཱརཏྠ॰ ཊཱི॰ ༡.༡༡; ཨ॰ ནི॰ ཊཱི॰ ༣.༧.༧༡) ‘‘ཨཔི ནཱམེཝཾ སིཡཱ’’ཏི ཝིཀཔྤནཏྠོ སམྦྷཱཝནཏྠོ། ཨེཝཾ ཧཱིཏི ཨེཝཾ ཨེཀམེཝ སངྑྱཾ ཨཝཏྭཱ ཨཔརཱཡ སངྑྱཱཡ སདྡྷིཾ ཝཙནཾ ལོཀེ སིལིཊྛཝཙནཾ ཧོཏི ཡཐཱ ‘‘དྭེ ཝཱ ཏཱིཎི ཝཱ ཨུདཀཕུསིཏཱནཱི’’ཏི། སམྨཱ ཨདྷིསཡིཏཱནཱིཏི པཱདཱདཱིཧི ཨཏྟནཱ ནེསཾ ཀིཉྩི ཨུཔགྷཱཏཾ ཨཀརོནྟིཡཱ བཧིཝཱཏཱདིཔརིསྶཡཔརིཧརཎཏྠཾ སམྨདེཝ ཨུཔརི སཡིཏཱནི། ཨུཏུཾ གཱཧཱཔེནྟིཡཱཏི ཏེསཾ ཨལླསིནེཧཔརིཡཱདཱནཏྠཾ ཨཏྟནོ ཀཱཡུསྨཱཝསེན ཨུཏུཾ གཎྷཱཔེནྟིཡཱ། ཏེནཱཧ ‘‘ཨུསྨཱིཀཏཱནཱི’’ཏི། སམྨཱ པརིབྷཱཝིཏཱནཱིཏི སམྨདེཝ སབྦསོ ཀུཀྐུཊཝཱསནཱཡ ཝཱསིཏཱནི། ཏེནཱཧ ‘‘ཀུཀྐུཊགནྡྷཾ གཱཧཱཔིཏཱནཱི’’ཏི། ཨཡཉྩ ཀུཀྐུཊགནྡྷཔརིབྷཱཝནཱ སམྨཱཨདྷིསཡནསམྨཱཔརིསེདནནིཔྥཏྟིཡཱ ‘‘ཨནུནིཔྥཱདཱི’’ཏི (སཱརཏྠ॰ ཊཱི॰ ༡.༡༡) དཊྛབྦཱ། ཏེཧི པན སདྡྷིཾཡེཝ ཨིཛ྄ཛྷནཏོ ཝུཏྟཾ ‘‘ཏིཝིདྷཀིརིཡཱཀརཎེནཱ’’ཏི། ཀིཉྩཱཔི ན ཨེཝཾ ‘‘ཨཧོ ཝཏིམེ’’ཏིཨཱདིནཱ ཨིཙྪཱ ཨུཔྤཛྫེཡྻ, ཀཱརཎསྶ པན སམྤཱདིཏཏྟཱ ཨཐ ཁོ བྷབྦཱཝ ཨབྷིནིབྦྷིཛྫིཏུནྟི ཡོཛནཱ ། ཀསྨཱ བྷབྦཱཏི ཨཱཧ ‘‘ཏེ ཧི ཡསྨཱ ཏཱཡཱ’’ཏིཨཱདི། ཨེཏྠ ཡཐཱ ཀཔཱལསྶ ཏནུཏཱ ཨཱལོཀསྶ ཨནྟོ པཉྙཱཡམཱནསྶ ཀཱརཎཾ, ཏཐཱ ཀཔཱལསྶ ཏནུཏཱཡ ནཁསིཁཱམུཁཏུཎྜཀཱནཾ ཁརཏཱཡ ཙ ཨལླསིནེཧསྶ པརིཡཱདཱནཾ ཀཱརཎཝཙནནྟི དཊྛབྦཾ, ཏསྨཱཏི ཨཱལོཀསྶ ཨནྟོ པཉྙཱཡམཱནཏོ, སཡཉྩ པརིཔཱཀགཏཏྟཱ།
Sambhāvanattheti (sārattha. ṭī. 1.11; a. ni. ṭī. 3.7.71) ‘‘api nāmevaṃ siyā’’ti vikappanattho sambhāvanattho. Evaṃ hīti evaṃ ekameva saṅkhyaṃ avatvā aparāya saṅkhyāya saddhiṃ vacanaṃ loke siliṭṭhavacanaṃ hoti yathā ‘‘dve vā tīṇi vā udakaphusitānī’’ti. Sammā adhisayitānīti pādādīhi attanā nesaṃ kiñci upaghātaṃ akarontiyā bahivātādiparissayapariharaṇatthaṃ sammadeva upari sayitāni. Utuṃ gāhāpentiyāti tesaṃ allasinehapariyādānatthaṃ attano kāyusmāvasena utuṃ gaṇhāpentiyā. Tenāha ‘‘usmīkatānī’’ti. Sammā paribhāvitānīti sammadeva sabbaso kukkuṭavāsanāya vāsitāni. Tenāha ‘‘kukkuṭagandhaṃ gāhāpitānī’’ti. Ayañca kukkuṭagandhaparibhāvanā sammāadhisayanasammāparisedananipphattiyā ‘‘anunipphādī’’ti (sārattha. ṭī. 1.11) daṭṭhabbā. Tehi pana saddhiṃyeva ijjhanato vuttaṃ ‘‘tividhakiriyākaraṇenā’’ti. Kiñcāpi na evaṃ ‘‘aho vatime’’tiādinā icchā uppajjeyya, kāraṇassa pana sampāditattā atha kho bhabbāva abhinibbhijjitunti yojanā . Kasmā bhabbāti āha ‘‘te hi yasmā tāyā’’tiādi. Ettha yathā kapālassa tanutā ālokassa anto paññāyamānassa kāraṇaṃ, tathā kapālassa tanutāya nakhasikhāmukhatuṇḍakānaṃ kharatāya ca allasinehassa pariyādānaṃ kāraṇavacananti daṭṭhabbaṃ, tasmāti ālokassa anto paññāyamānato, sayañca paripākagatattā.
ཨོཔམྨསམྤཊིཔཱདནནྟི ཨོཔམྨཏྠསྶ ཨུཔམེཡྻེན སམྨདེཝ པཊིཔཱདནཾ། ཨཏྠེནཱཏི ཨུཔམེཡྻཏྠེན། ཡཐཱ ཀུཀྐུཊིཡཱ ཨཎྜེསུ ཏིཝིདྷཀིརིཡཱཡ ཀརཎཾ ཀུཀྐུཊཙྪཱཔཀཱནཾ ཨཎྜཀོསཏོ ནིཀྑམནསྶ མཱུལཀཱརཎཾ, ཨེཝཾ བྷིཀྑུནོ ཨུསྶོལ༹ྷཱིཔནྣརསཱནི ཨངྒཱནི ཨཝིཛྫཎྜཀོསཏོ ནིཀྑམནསྶ མཱུལཀཱརཎནྟི ཨཱཧ ‘‘ཏསྶཱ ཀུཀྐུཊིཡཱ…པེ॰… སམནྣཱགཏབྷཱཝོ’’ཏི། པཊིཙྪཱདནསཱམཉྙེན ཨཝིཛྫཱཡ ཨཎྜཀོསསདིསཏཱཡ བལཝཝིཔསྶནཱཝསེན ཨཝིཛྫཎྜཀོསསྶ ཏནུབྷཱཝོ, ཝིཔསྶནཱཉཱཎསྶ པརིཎཱམཀཱལོ ཝུཊྛཱནགཱམིནིབྷཱཝཱཔཏྟི, ཏདཱ ཙ སཱ མགྒཉཱཎགབྦྷཾ དྷཱརེནྟཱི ཝིཡ ཧོཏཱིཏི ཨཱཧ ‘‘གབྦྷགྒཧཎཀཱལོ’’ཏི། ཨབྷིཉྙཱཔཀྑེཏི ལོཀིཡཱབྷིཉྙཱཔཀྑེ། ལོཀུཏྟརཱབྷིཉྙཱ ཧི ཨཝིཛྫཎྜཀོསཾ པདཱལིཀཱཏི། གཱཐཱཡ ཨཝིཛྫཎྜཀོསཾ པཧརཏཱིཏི དེསནཱཝིལཱསེན ཝིནེཡྻསནྟཱནགཏཾ ཨཝིཛྫཎྜཀོསཾ གྷཊྚེཏི, ཡཐཱཋཱནེ ཋཱཏུཾ ན དེཏི།
Opammasampaṭipādananti opammatthassa upameyyena sammadeva paṭipādanaṃ. Atthenāti upameyyatthena. Yathā kukkuṭiyā aṇḍesu tividhakiriyāya karaṇaṃ kukkuṭacchāpakānaṃ aṇḍakosato nikkhamanassa mūlakāraṇaṃ, evaṃ bhikkhuno ussoḷhīpannarasāni aṅgāni avijjaṇḍakosato nikkhamanassa mūlakāraṇanti āha ‘‘tassā kukkuṭiyā…pe… samannāgatabhāvo’’ti. Paṭicchādanasāmaññena avijjāya aṇḍakosasadisatāya balavavipassanāvasena avijjaṇḍakosassa tanubhāvo, vipassanāñāṇassa pariṇāmakālo vuṭṭhānagāminibhāvāpatti, tadā ca sā maggañāṇagabbhaṃ dhārentī viya hotīti āha ‘‘gabbhaggahaṇakālo’’ti. Abhiññāpakkheti lokiyābhiññāpakkhe. Lokuttarābhiññā hi avijjaṇḍakosaṃ padālikāti. Gāthāya avijjaṇḍakosaṃ paharatīti desanāvilāsena vineyyasantānagataṃ avijjaṇḍakosaṃ ghaṭṭeti, yathāṭhāne ṭhātuṃ na deti.
པཊིསངྑཱནཔྤཧཱནནྟི ཏདངྒཔྤཧཱནཔུབྦཀཾ ཝིཀྑམྦྷནཔྤཧཱནཾ། པུབྦབྷཱགིཡཱ ཨིདྡྷིཔཱདཱ པཱལི༹ཡཾ གཧིཏཱཏི ‘‘ཨིདྡྷིཔཱདེཧི ཝིཀྑམྦྷནཔྤཧཱན’’ནྟི ཝུཏྟཾ། ‘‘ཨུསྶོལ༹ྷིཔནྣརསངྒསམནྣཱགཏོ བྷིཀྑུ བྷབྦོ ཨབྷིནིབྦིདཱཡཱ’’ཏིཨཱདིཝཙནཏོ (མ॰ ནི॰ ༡.༡༨༩) ལོཀུཏྟརིདྡྷིཔཱདཱ པན སམྦོདྷགྒཧཎེནེཝ གཧིཏཱ། མགྒེ ཨཱགཏེཏི ཨུསྶོལ༹ྷཱིཔནྣརསངྒསམནྣཱགཏསྶ བྷིཀྑུནོ ཝིཔསྶནཾ ཨུསྶུཀྐཱཔཡཏོ མགྒེ ཨཱགཏེ ཨུཔྤནྣེ, པཱལི༹ཡཾ ཝཱ ཨབྷིནིབྦྷིདཱསམྦོདྷགྒཧཎེཧི མགྒེ ཨཱགཏེ། ཕལེ ཨཱགཏེཏི ཨེཏྠཱཔི ཝུཏྟནཡེན ཨཏྠོ ཝེདིཏབྦོ། ནིབྦཱནསྶ པན པཱལི༹ཡཾ ཨནཱགཏཏྟཱ ནིསྶརཎཔྤཧཱནཾ ན གཧིཏཾ། སེསཾ སུཝིཉྙེཡྻམེཝ།
Paṭisaṅkhānappahānanti tadaṅgappahānapubbakaṃ vikkhambhanappahānaṃ. Pubbabhāgiyā iddhipādā pāḷiyaṃ gahitāti ‘‘iddhipādehi vikkhambhanappahāna’’nti vuttaṃ. ‘‘Ussoḷhipannarasaṅgasamannāgato bhikkhu bhabbo abhinibbidāyā’’tiādivacanato (ma. ni. 1.189) lokuttariddhipādā pana sambodhaggahaṇeneva gahitā. Magge āgateti ussoḷhīpannarasaṅgasamannāgatassa bhikkhuno vipassanaṃ ussukkāpayato magge āgate uppanne, pāḷiyaṃ vā abhinibbhidāsambodhaggahaṇehi magge āgate. Phale āgateti etthāpi vuttanayena attho veditabbo. Nibbānassa pana pāḷiyaṃ anāgatattā nissaraṇappahānaṃ na gahitaṃ. Sesaṃ suviññeyyameva.
ཙེཏོཁིལསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Cetokhilasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༦. ཙེཏོཁིལསུཏྟཾ • 6. Cetokhilasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༦. ཙེཏོཁིལསུཏྟཝཎྞནཱ • 6. Cetokhilasuttavaṇṇanā
