| Library / Tipiṭaka / તિપિટક • Tipiṭaka / મહાવિભઙ્ગ-અટ્ઠકથા • Mahāvibhaṅga-aṭṭhakathā |
૪. છબ્બસ્સસિક્ખાપદવણ્ણના
4. Chabbassasikkhāpadavaṇṇanā
૫૫૭. તેન સમયેનાતિ છબ્બસ્સસિક્ખાપદં. તત્થ ઊહદન્તિપિ ઉમ્મિહન્તિપીતિ સન્થતાનં ઉપરિ વચ્ચમ્પિ પસ્સાવમ્પિ કરોન્તીતિ વુત્તં હોતિ.
557.Tenasamayenāti chabbassasikkhāpadaṃ. Tattha ūhadantipi ummihantipīti santhatānaṃ upari vaccampi passāvampi karontīti vuttaṃ hoti.
દિન્ના સઙ્ઘેન ઇત્થન્નામસ્સ ભિક્ખુનો સન્થતસમ્મુતીતિ એવં લદ્ધસમ્મુતિકો ભિક્ખુ યાવ રોગો ન વૂપસમ્મતિ, તાવ યં યં ઠાનં ગચ્છતિ, તત્થ તત્થ સન્થતં કાતું લભતિ. સચે અરોગો હુત્વા પુન મૂલબ્યાધિનાવ ગિલાનો હોતિ, સોયેવ પરિહારો, નત્થઞ્ઞં સમ્મુતિકિચ્ચન્તિ ફુસ્સદેવત્થેરો આહ. ઉપતિસ્સત્થેરો પન ‘‘સો વા બ્યાધિ પટિકુપ્પતુ, અઞ્ઞો વા, ‘સકિં ગિલાનો’તિ નામં લદ્ધં લદ્ધમેવ, પુન સમ્મુતિકિચ્ચં નત્થી’’તિ આહ.
Dinnā saṅghena itthannāmassa bhikkhuno santhatasammutīti evaṃ laddhasammutiko bhikkhu yāva rogo na vūpasammati, tāva yaṃ yaṃ ṭhānaṃ gacchati, tattha tattha santhataṃ kātuṃ labhati. Sace arogo hutvā puna mūlabyādhināva gilāno hoti, soyeva parihāro, natthaññaṃ sammutikiccanti phussadevatthero āha. Upatissatthero pana ‘‘so vā byādhi paṭikuppatu, añño vā, ‘sakiṃ gilāno’ti nāmaṃ laddhaṃ laddhameva, puna sammutikiccaṃ natthī’’ti āha.
ઓરેન ચે છન્નં વસ્સાનન્તિ છન્નં વસ્સાનં ઓરિમભાગે, અન્તોતિ અત્થો. પદભાજને પન સઙ્ખ્યામત્તદસ્સનત્થં ‘‘ઊનકછબ્બસ્સાની’’તિ વુત્તં.
Orenace channaṃ vassānanti channaṃ vassānaṃ orimabhāge, antoti attho. Padabhājane pana saṅkhyāmattadassanatthaṃ ‘‘ūnakachabbassānī’’ti vuttaṃ.
અનાપત્તિ છબ્બસ્સાનિ કરોતીતિ યદા છબ્બસ્સાનિ પરિપુણ્ણાનિ હોન્તિ, તદા સન્થતં કરોતિ. દુતિયપદેપિ ‘‘યદા અતિરેકછબ્બસ્સાનિ હોન્તિ, તદા કરોતી’’તિ એવમત્થો દટ્ઠબ્બો. ન હિ સો છબ્બસ્સાનિ કરોતીતિ. સેસં ઉત્તાનત્થમેવ.
Anāpatti chabbassāni karotīti yadā chabbassāni paripuṇṇāni honti, tadā santhataṃ karoti. Dutiyapadepi ‘‘yadā atirekachabbassāni honti, tadā karotī’’ti evamattho daṭṭhabbo. Na hi so chabbassāni karotīti. Sesaṃ uttānatthameva.
સમુટ્ઠાનાદીનિ કોસિયસિક્ખાપદસદિસાનેવાતિ.
Samuṭṭhānādīni kosiyasikkhāpadasadisānevāti.
છબ્બસ્સસિક્ખાપદવણ્ણના નિટ્ઠિતા.
Chabbassasikkhāpadavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૪. છબ્બસ્સસિક્ખાપદં • 4. Chabbassasikkhāpadaṃ
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૪. છબ્બસ્સસિક્ખાપદવણ્ણના • 4. Chabbassasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૪. છબ્બસ્સસિક્ખાપદવણ્ણના • 4. Chabbassasikkhāpadavaṇṇanā
