| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
8. அட்ட²மவக்³கோ³
8. Aṭṭhamavaggo
1. ச²க³திகதா²வண்ணனா
1. Chagatikathāvaṇṇanā
503-504. இதா³னி ச²க³திகதா² நாம ஹோதி. தத்த² அஸுரகாயேன ஸத்³தி⁴ங் ச²க³தியோதி யேஸங் லத்³தி⁴, ஸெய்யதா²பி அந்த⁴கானஞ்சேவ உத்தராபத²கானஞ்ச; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ஸகவாதீ³ ‘‘பஞ்ச கோ² பனிமா, ஸாரிபுத்த, க³தியோ’’தி (ம॰ நி॰ 1.153) லோமஹங்ஸனபரியாயே பரிச்சி²ன்னானங் க³தீனங் வஸேன சோதே³துங் நனு பஞ்ச க³தியோதிஆதி³மாஹ. இதரோ ஸுத்தவிரோத⁴ப⁴யேன படிஜானாதி. கஸ்மா பன ஸகவாதீ³ ச² க³தியோ ந ஸம்படிச்ச²தி, நனு ‘‘சதூஹாபாயேஹி ச விப்பமுத்தோ’’தி எத்த² அஸுரகாயோபி க³ஹிதோதி. ஸச்சங் க³ஹிதோ, ந பனேஸா க³தி. கஸ்மா? விஸுங் அபா⁴வதோ. அஸுரகாயஸ்மிஞ்ஹி காலகஞ்சிகா அஸுரா பேதக³தியா ஸங்க³ஹிதா , வேபசித்திபரிஸா தே³வக³தியா, அஸுரகாயோதி விஸுங் ஏகா க³தி நாம நத்தி².
503-504. Idāni chagatikathā nāma hoti. Tattha asurakāyena saddhiṃ chagatiyoti yesaṃ laddhi, seyyathāpi andhakānañceva uttarāpathakānañca; te sandhāya pucchā sakavādissa, paṭiññā itarassa. Atha naṃ sakavādī ‘‘pañca kho panimā, sāriputta, gatiyo’’ti (ma. ni. 1.153) lomahaṃsanapariyāye paricchinnānaṃ gatīnaṃ vasena codetuṃ nanu pañca gatiyotiādimāha. Itaro suttavirodhabhayena paṭijānāti. Kasmā pana sakavādī cha gatiyo na sampaṭicchati, nanu ‘‘catūhāpāyehi ca vippamutto’’ti ettha asurakāyopi gahitoti. Saccaṃ gahito, na panesā gati. Kasmā? Visuṃ abhāvato. Asurakāyasmiñhi kālakañcikā asurā petagatiyā saṅgahitā , vepacittiparisā devagatiyā, asurakāyoti visuṃ ekā gati nāma natthi.
இதா³னி ஏதமேவ அத்த²ங் த³ஸ்ஸேதுங் நனு காலகஞ்சிகாதிஆதி³ ஆரத்³த⁴ங். தத்த² ஸமானவண்ணாதி ஸதி³ஸரூபஸண்டா²னா பீ³ப⁴ச்சா² விரூபா து³த்³த³ஸ்ஸிகா. ஸமானபோ⁴கா³தி ஸதி³ஸமேது²னஸமாசாரா. ஸமானாஹாராதி ஸதி³ஸகே²ளஸிங்கா⁴ணிகபுப்³ப³லோஹிதாதி³ஆஹாரா. ஸமானாயுகாதி ஸதி³ஸஆயுபரிச்சே²தா³. ஆவாஹவிவாஹந்தி கஞ்ஞாக³ஹணஞ்சேவ கஞ்ஞாதா³னஞ்ச. ஸுக்கபக்கே² ஸமானவண்ணாதி ஸதி³ஸரூபஸண்டா²னா அபி⁴ரூபா பாஸாதி³கா த³ஸ்ஸனீயா பபா⁴ஸம்பன்னா. ஸமானபோ⁴கா³தி ஸதி³ஸபஞ்சகஆமகு³ணபோ⁴கா³. ஸமானாஹாராதி ஸதி³ஸஸுதா⁴போ⁴ஜனாதி³ஆஹாரா. ஸேஸங் வுத்தனயமேவ. நனு அத்தி² அஸுரகாயோதி இத³ங் அஸுரகாயஸ்ஸேவ ஸாத⁴கங். தஸ்ஸ பன விஸுங் க³திபரிச்சே²தா³பா⁴வேன ந க³திஸாத⁴கந்தி.
Idāni etameva atthaṃ dassetuṃ nanu kālakañcikātiādi āraddhaṃ. Tattha samānavaṇṇāti sadisarūpasaṇṭhānā bībhacchā virūpā duddassikā. Samānabhogāti sadisamethunasamācārā. Samānāhārāti sadisakheḷasiṅghāṇikapubbalohitādiāhārā. Samānāyukāti sadisaāyuparicchedā. Āvāhavivāhanti kaññāgahaṇañceva kaññādānañca. Sukkapakkhe samānavaṇṇāti sadisarūpasaṇṭhānā abhirūpā pāsādikā dassanīyā pabhāsampannā. Samānabhogāti sadisapañcakaāmaguṇabhogā. Samānāhārāti sadisasudhābhojanādiāhārā. Sesaṃ vuttanayameva. Nanu atthi asurakāyoti idaṃ asurakāyasseva sādhakaṃ. Tassa pana visuṃ gatiparicchedābhāvena na gatisādhakanti.
ச²க³திகதா²வண்ணனா.
Chagatikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (73) 1. ச²க³திகதா² • (73) 1. Chagatikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. ச²க³திகதா²வண்ணனா • 1. Chagatikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. ச²க³திகதா²வண்ணனா • 1. Chagatikathāvaṇṇanā
