| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૭. છળઙ્ગદાનસુત્તવણ્ણના
7. Chaḷaṅgadānasuttavaṇṇanā
૩૭. સત્તમે દક્ખન્તિ વડ્ઢન્તિ એતાયાતિ દક્ખિણા, પરિચ્ચાગમયં પુઞ્ઞં, તસ્સૂપકરણભૂતો દેય્યધમ્મો ચ. ઇધ પન દેય્યધમ્મો અધિપ્પેતો. તેનેવાહ ‘‘દક્ખિણં પતિટ્ઠાપેતી’’તિ. ઇતો ઉટ્ઠિતેનાતિ ઇતો ખેત્તતો ઉપ્પન્નેન. રાગો વિનયતિ એતેનાતિ રાગવિનયો, રાગસ્સ સમુચ્છેદિકા પટિપદા. તેનાહ ‘‘રાગવિનયપટિપદં પટિપન્ના’’તિ.
37. Sattame dakkhanti vaḍḍhanti etāyāti dakkhiṇā, pariccāgamayaṃ puññaṃ, tassūpakaraṇabhūto deyyadhammo ca. Idha pana deyyadhammo adhippeto. Tenevāha ‘‘dakkhiṇaṃ patiṭṭhāpetī’’ti. Ito uṭṭhitenāti ito khettato uppannena. Rāgo vinayati etenāti rāgavinayo, rāgassa samucchedikā paṭipadā. Tenāha ‘‘rāgavinayapaṭipadaṃ paṭipannā’’ti.
‘‘પુબ્બેવ દાના સુમનો’’તિઆદિગાથાય પુબ્બેવ દાના મુઞ્ચચેતનાય પુબ્બે દાનૂપકરણસમ્ભરણતો પટ્ઠાય સુમનો ‘‘સમ્પત્તીનં નિદાનં અનુગામિકદાનં દસ્સામી’’તિ સોમનસ્સિતો ભવેય્ય. દદં ચિત્તં પસાદયેતિ દદન્તો દેય્યધમ્મં દક્ખિણેય્યહત્થે પતિટ્ઠાપેન્તો ‘‘અસારતો ધનતો સારાદાનં કરોમી’’તિ અત્તનો ચિત્તં પસાદેય્ય. દત્વા અત્તમનો હોતીતિ દક્ખિણેય્યાનં દેય્યધમ્મં પરિચ્ચજિત્વા ‘‘પણ્ડિતપઞ્ઞત્તં નામ મયા અનુટ્ઠિતં, અહો સાધુ સુટ્ઠૂ’’તિ અત્તમનો પમુદિતો પીતિસોમનસ્સજાતો હોતિ. એસાતિ યા અયં પુબ્બચેતના મુઞ્ચચેતના અપરચેતનાતિ ઇમાસં કમ્મફલાનં સદ્ધાનુગતાનં સોમનસ્સપરિગ્ગહિતાનં તિવિધાનં ચેતનાનં પારિપૂરી, એસા.
‘‘Pubbeva dānā sumano’’tiādigāthāya pubbeva dānā muñcacetanāya pubbe dānūpakaraṇasambharaṇato paṭṭhāya sumano ‘‘sampattīnaṃ nidānaṃ anugāmikadānaṃ dassāmī’’ti somanassito bhaveyya. Dadaṃ cittaṃ pasādayeti dadanto deyyadhammaṃ dakkhiṇeyyahatthe patiṭṭhāpento ‘‘asārato dhanato sārādānaṃ karomī’’ti attano cittaṃ pasādeyya. Datvā attamano hotīti dakkhiṇeyyānaṃ deyyadhammaṃ pariccajitvā ‘‘paṇḍitapaññattaṃ nāma mayā anuṭṭhitaṃ, aho sādhu suṭṭhū’’ti attamano pamudito pītisomanassajāto hoti. Esāti yā ayaṃ pubbacetanā muñcacetanā aparacetanāti imāsaṃ kammaphalānaṃ saddhānugatānaṃ somanassapariggahitānaṃ tividhānaṃ cetanānaṃ pāripūrī, esā.
સીલસઞ્ઞમેનાતિ કાયિકવાચસિકસંવરેન. હત્થપાદેતિ દક્ખિણેય્યાનં હત્થપાદે. મુખં વિક્ખાલેત્વાતિ તેસંયેવ મુખં વિક્ખાલેત્વા, અત્તનાવ મુખોદકં દત્વાતિ અધિપ્પાયો.
Sīlasaññamenāti kāyikavācasikasaṃvarena. Hatthapādeti dakkhiṇeyyānaṃ hatthapāde. Mukhaṃ vikkhāletvāti tesaṃyeva mukhaṃ vikkhāletvā, attanāva mukhodakaṃ datvāti adhippāyo.
છળઙ્ગદાનસુત્તવણ્ણના નિટ્ઠિતા.
Chaḷaṅgadānasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૭. છળઙ્ગદાનસુત્તં • 7. Chaḷaṅgadānasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૭. દાનસુત્તવણ્ણના • 7. Dānasuttavaṇṇanā
