| Library / Tipiṭaka / તિપિટક • Tipiṭaka / ખુદ્દસિક્ખા-મૂલસિક્ખા • Khuddasikkhā-mūlasikkhā |
૪૩. છન્દદાનનિદ્દેસવણ્ણના
43. Chandadānaniddesavaṇṇanā
૩૯૯. કમ્મપ્પત્તેતિ ઉપોસથાદિનો કમ્મસ્સ પત્તે યુત્તે અનુરૂપે. સઙ્ઘે સમાગતેતિ ચતુવગ્ગાદિકે સઙ્ઘે એકત્થ સન્નિપતિતે. એત્થ ચ છન્દહારકેનાપિ સદ્ધિં ચતુવગ્ગાદિકો વેદિતબ્બો.
399.Kammappatteti uposathādino kammassa patte yutte anurūpe. Saṅghe samāgateti catuvaggādike saṅghe ekattha sannipatite. Ettha ca chandahārakenāpi saddhiṃ catuvaggādiko veditabbo.
૪૦૦. છન્દદાનાદિવિધિં દસ્સેતું ‘‘એક’’ન્તિઆદિમાહ. ઉપાગમ્માતિ સન્તિં આપત્તિં પકાસેત્વા તતો પચ્છા ઉપગન્ત્વા. છન્દં દદેતિ વક્ખમાનેસુ તીસુ એકેનપિ બહિ ઉપોસથં કત્વા આગતો છન્દં દદેય્ય, કેનચિ કરણીયેન સન્નિપાતટ્ઠાનં ગન્ત્વા કાયસામગ્ગિં અદેન્તો પન પારિસુદ્ધિં દેન્તો છન્દં દદેય્ય.
400. Chandadānādividhiṃ dassetuṃ ‘‘eka’’ntiādimāha. Upāgammāti santiṃ āpattiṃ pakāsetvā tato pacchā upagantvā. Chandaṃ dadeti vakkhamānesu tīsu ekenapi bahi uposathaṃ katvā āgato chandaṃ dadeyya, kenaci karaṇīyena sannipātaṭṭhānaṃ gantvā kāyasāmaggiṃ adento pana pārisuddhiṃ dento chandaṃ dadeyya.
૪૦૨. ઉભિન્નં દાને કિંપયોજનન્તિ આહ ‘‘પારિસુદ્ધી’’તિઆદિ. પારિસુદ્ધિપ્પદાનેન સઙ્ઘસ્સ અત્તનો ચાપિ ઉપોસથં સમ્પાદેતીતિ સમ્બન્ધો. પરિસુદ્ધિ એવ પારિસુદ્ધિ, તસ્સ પદાનં, તેન. નનુ ચ પારિસુદ્ધિતાપદાનમત્તમેવ ઉપોસથકમ્મં નામાતિ પારિસુદ્ધિપ્પદાનં અત્તનો ઉપોસથં સમ્પાદેતુ, કથં સઙ્ઘસ્સાતિ? વુચ્ચતે – પારિસુદ્ધિદાનસ્સ ધમ્મકમ્મતાસમ્પાદનેન સઙ્ઘસ્સાપિ ઉપોસથં સમ્પાદેતીતિ.
402. Ubhinnaṃ dāne kiṃpayojananti āha ‘‘pārisuddhī’’tiādi. Pārisuddhippadānena saṅghassa attano cāpi uposathaṃ sampādetīti sambandho. Parisuddhi eva pārisuddhi, tassa padānaṃ, tena. Nanu ca pārisuddhitāpadānamattameva uposathakammaṃ nāmāti pārisuddhippadānaṃ attano uposathaṃ sampādetu, kathaṃ saṅghassāti? Vuccate – pārisuddhidānassa dhammakammatāsampādanena saṅghassāpi uposathaṃ sampādetīti.
એત્થ પન ચતૂસુ એકસ્સ છન્દપારિસુદ્ધિં આહરિત્વા તયો પારિસુદ્ધિઉપોસથં કરોન્તિ, તીસુ વા એકસ્સ છન્દપારિસુદ્ધિં આહરિત્વા દ્વે પાતિમોક્ખં ઉદ્દિસન્તિ, અધમ્મેન વગ્ગં ઉપોસથકમ્મં. ચત્તારો પારિસુદ્ધિઉપોસથં કરોન્તિ, તયો વા દ્વે વા પાતિમોક્ખં ઉદ્દિસન્તિ, અધમ્મેન સમગ્ગં. ચતૂસુ એકસ્સ આહરિત્વા તયો પાતિમોક્ખં ઉદ્દિસન્તિ, તીસુ વા એકસ્સ આહરિત્વા દ્વે પારિસુદ્ધિઉપોસથં કરોન્તિ, ધમ્મેન વગ્ગં. સચે પન ચત્તારો સન્નિપતિત્વા પાતિમોક્ખં ઉદ્દિસન્તિ, તયો પારિસુદ્ધિઉપોસથં, દ્વે અઞ્ઞમઞ્ઞં પારિસુદ્ધિઉપોસથં કરોન્તિ, ધમ્મેન સમગ્ગં. પવારણકમ્મેસુપિ પઞ્ચસુ એકસ્સ પવારણં આહરિત્વા ચત્તારો ગણઞત્તિં ઠપેત્વા પવારેન્તિ, ચતૂસુ તીસુ વા એકસ્સ આહરિત્વા તયો દ્વે વા સઙ્ઘઞત્તિં ઠપેત્વા પવારેન્તિ, અધમ્મેન વગ્ગં પવારણકમ્મન્તિઆદિ વુત્તનયમેવ. સેસકમ્મં વિબાધતીતિ અવસેસસઙ્ઘકિચ્ચં વિબાધેતિ અલદ્ધાધિપ્પાયત્તાતિ અધિપ્પાયો.
Ettha pana catūsu ekassa chandapārisuddhiṃ āharitvā tayo pārisuddhiuposathaṃ karonti, tīsu vā ekassa chandapārisuddhiṃ āharitvā dve pātimokkhaṃ uddisanti, adhammena vaggaṃ uposathakammaṃ. Cattāro pārisuddhiuposathaṃ karonti, tayo vā dve vā pātimokkhaṃ uddisanti, adhammena samaggaṃ. Catūsu ekassa āharitvā tayo pātimokkhaṃ uddisanti, tīsu vā ekassa āharitvā dve pārisuddhiuposathaṃ karonti, dhammena vaggaṃ. Sace pana cattāro sannipatitvā pātimokkhaṃ uddisanti, tayo pārisuddhiuposathaṃ, dve aññamaññaṃ pārisuddhiuposathaṃ karonti, dhammena samaggaṃ. Pavāraṇakammesupi pañcasu ekassa pavāraṇaṃ āharitvā cattāro gaṇañattiṃ ṭhapetvā pavārenti, catūsu tīsu vā ekassa āharitvā tayo dve vā saṅghañattiṃ ṭhapetvā pavārenti, adhammena vaggaṃ pavāraṇakammantiādi vuttanayameva. Sesakammaṃ vibādhatīti avasesasaṅghakiccaṃ vibādheti aladdhādhippāyattāti adhippāyo.
૪૦૩. દ્વયન્તિ ઉપોસથકરણઞ્ચેવ અવસેસકિચ્ચઞ્ચ. અત્તનો ન સાધેતીતિ સમ્બન્ધનીયં.
403.Dvayanti uposathakaraṇañceva avasesakiccañca. Attano na sādhetīti sambandhanīyaṃ.
૪૦૪. હરેય્યાતિ પુબ્બે વુત્તં સુદ્ધિકછન્દં વા ઇમં વા છન્દપારિસુદ્ધિં હરેય્ય. પરમ્પરા ન હારયેતિ પરમ્પરા ન આહરેય્ય. કસ્માતિ આહ ‘‘પરમ્પરાહટા’’તિઆદિ. તેનાતિ પઠમતો ગહિતછન્દપારિસુદ્ધિકેન. પરમ્પરાહટાતિ યથા બિળાલસઙ્ખલિકાય પઠમં વલયં દુતિયં પાપુણાતિ, તતિયં ન પાપુણાતિ, એવં દુતિયસ્સ આગચ્છતિ, તતિયસ્સ ન આગચ્છતિ. ‘‘પરિમ્પરાહટા છન્દ-પારિસુદ્ધિ ન ગચ્છતી’’તિ વા પાઠો.
404.Hareyyāti pubbe vuttaṃ suddhikachandaṃ vā imaṃ vā chandapārisuddhiṃ hareyya. Paramparā na hārayeti paramparā na āhareyya. Kasmāti āha ‘‘paramparāhaṭā’’tiādi. Tenāti paṭhamato gahitachandapārisuddhikena. Paramparāhaṭāti yathā biḷālasaṅkhalikāya paṭhamaṃ valayaṃ dutiyaṃ pāpuṇāti, tatiyaṃ na pāpuṇāti, evaṃ dutiyassa āgacchati, tatiyassa na āgacchati. ‘‘Parimparāhaṭā chanda-pārisuddhi na gacchatī’’ti vā pāṭho.
૪૦૫. સબ્બૂપચારન્તિ ‘‘એકંસં ચીવરં કત્વા’’ તિઆદિ સબ્બં ઉપચારં.
405.Sabbūpacāranti ‘‘ekaṃsaṃ cīvaraṃ katvā’’ tiādi sabbaṃ upacāraṃ.
૪૦૬. સો આગતો આરોચેત્વા સઙ્ઘં પવારેય્યાતિ યોજના. અથાતિ અનન્તરત્થે. આગતોતિ પવારણં ગહેત્વા આગતો ભિક્ખુ. આરોચેત્વાતિ ભિક્ખુસઙ્ઘસ્સ આરોચેત્વા. એવન્તિ વક્ખમાનક્કમેન.
406. So āgato ārocetvā saṅghaṃ pavāreyyāti yojanā. Athāti anantaratthe. Āgatoti pavāraṇaṃ gahetvā āgato bhikkhu. Ārocetvāti bhikkhusaṅghassa ārocetvā. Evanti vakkhamānakkamena.
૪૦૭-૮. ગહેત્વા હારકોતિ સમ્બન્ધો. નાહટાતિ આહટાવ ન હોતીતિ અત્થો. હારકો સઙ્ઘં પત્વા તથા હેય્ય, આહટા હોતીતિ યોજના. તથા હેય્યાતિ વિબ્ભન્તાદિકો ભવેય્ય.
407-8. Gahetvā hārakoti sambandho. Nāhaṭāti āhaṭāva na hotīti attho. Hārako saṅghaṃ patvā tathā heyya, āhaṭā hotīti yojanā. Tathā heyyāti vibbhantādiko bhaveyya.
૪૦૯. સઙ્ઘં પત્તો પમત્તો વા સુત્તો વા નારોચયેય્ય અનાપત્તિ ચાતિ સમ્બન્ધો. ચ-સદ્દો છન્દપારિસુદ્ધિહરણં સમ્પિણ્ડેતીતિ.
409. Saṅghaṃ patto pamatto vā sutto vā nārocayeyya anāpatti cāti sambandho. Ca-saddo chandapārisuddhiharaṇaṃ sampiṇḍetīti.
છન્દદાનનિદ્દેસવણ્ણના નિટ્ઠિતા.
Chandadānaniddesavaṇṇanā niṭṭhitā.
