| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३. छत्तदायकत्थेरअपदानं
3. Chattadāyakattheraapadānaṃ
११.
11.
‘‘पुत्तो मम पब्बजितो, कासायवसनो तदा।
‘‘Putto mama pabbajito, kāsāyavasano tadā;
सो च बुद्धत्तं सम्पत्तो, निब्बुतो लोकपूजितो॥
So ca buddhattaṃ sampatto, nibbuto lokapūjito.
१२.
12.
‘‘विचिनन्तो सकं पुत्तं, अगमं पच्छतो अहं।
‘‘Vicinanto sakaṃ puttaṃ, agamaṃ pacchato ahaṃ;
निब्बुतस्स महन्तस्स, चितकं अगमासहं॥
Nibbutassa mahantassa, citakaṃ agamāsahaṃ.
१३.
13.
‘‘पग्गय्ह अञ्जलिं तत्थ, वन्दित्वा चितकं अहं।
‘‘Paggayha añjaliṃ tattha, vanditvā citakaṃ ahaṃ;
सेतच्छत्तञ्च पग्गय्ह, आरोपेसिं अहं तदा॥
Setacchattañca paggayha, āropesiṃ ahaṃ tadā.
१४.
14.
‘‘चतुन्नवुतितो कप्पे, यं छत्तमभिरोपयिं।
‘‘Catunnavutito kappe, yaṃ chattamabhiropayiṃ;
दुग्गतिं नाभिजानामि, छत्तदानस्सिदं फलं॥
Duggatiṃ nābhijānāmi, chattadānassidaṃ phalaṃ.
१५.
15.
‘‘पञ्चवीसे इतो कप्पे, सत्त आसुं जनाधिपा।
‘‘Pañcavīse ito kappe, satta āsuṃ janādhipā;
महारहसनामा ते, चक्कवत्ती महब्बला॥
Mahārahasanāmā te, cakkavattī mahabbalā.
१६.
16.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा छत्तदायको थेरो इमा गाथायो अभासित्थाति।
Itthaṃ sudaṃ āyasmā chattadāyako thero imā gāthāyo abhāsitthāti.
छत्तदायकत्थेरस्सापदानं ततियं।
Chattadāyakattherassāpadānaṃ tatiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-१०. चितकपूजकत्थेरअपदानादिवण्णना • 1-10. Citakapūjakattheraapadānādivaṇṇanā
