| Library / Tipiṭaka / ཏིཔིཊཀ • Tipiṭaka / ཝིམཱནཝཏྠུ-ཨཊྛཀཐཱ • Vimānavatthu-aṭṭhakathā |
༣. ཚཏྟམཱཎཝཀཝིམཱནཝཎྞནཱ
3. Chattamāṇavakavimānavaṇṇanā
ཡོ ཝདཏཾ པཝརོ མནུཛེསཱུཏི ཚཏྟམཱཎཝཀཝིམཱནཾ། ཏསྶ ཀཱ ཨུཔྤཏྟི? བྷགཝཱ སཱཝཏྠིཡཾ ཝིཧརཏི ཛེཏཝནེ། ཏེན སམཡེན སེཏབྱཱཡཾ ཨཉྙཏརསྶ བྲཱཧྨཎསྶ ཀིཙྪཱལདྡྷོ པུཏྟོ ཚཏྟོ ནཱམ བྲཱཧྨཎམཱཎཝོ ཨཧོསི། སོ ཝཡཔྤཏྟོ པིཏརཱ པེསིཏོ ཨུཀྐཊྛཾ གནྟྭཱ བྲཱཧྨཎསྶ པོཀྑརསཱཏིསྶ སནྟིཀེ མེདྷཱཝིཏཱཡ ཨནལསཏཱཡ ཙ ན ཙིརེནེཝ མནྟེ ཝིཛྫཱཊྛཱནཱནི ཙ ཨུགྒཧེཏྭཱ བྲཱཧྨཎསིཔྤེ ནིཔྥཏྟིཾ པཏྟོ། སོ ཨཱཙརིཡཾ ཨབྷིཝཱདེཏྭཱ ‘‘མཡཱ ཏུམྷཱཀཾ སནྟིཀེ སིཔྤཾ སིཀྑིཏཾ, ཀིཾ ཝོ གརུདཀྑིཎཾ དེམཱི’’ཏི ཨཱཧ། ཨཱཙརིཡོ ‘‘གརུདཀྑིཎཱ ནཱམ ཨནྟེཝཱསིཀསྶ ཝིབྷཝཱནུརཱུཔཱ, ཀཧཱཔཎསཧསྶམཱནེཧཱི’’ཏི ཨཱཧ། ཚཏྟམཱཎཝོ ཨཱཙརིཡཾ ཨབྷིཝཱདེཏྭཱ སེཏབྱཾ གནྟྭཱ མཱཏཱཔིཏརོ ཝནྡིཏྭཱ ཏེཧི ཨབྷིནནྡིཡམཱནོ ཀཏཔཊིསནྠཱརོ ཏམཏྠཾ པིཏུ ཨཱརོཙེཏྭཱ ‘‘དེཐ མེ དཱཏབྦཡུཏྟཀཾ, ཨཛྫེཝ དཏྭཱ ཨཱགམིསྶཱམཱི’’ཏི ཨཱཧ། ཏཾ མཱཏཱཔིཏརོ ‘‘ཏཱཏ, ཨཛྫ ཝིཀཱལོ, སྭེ གམིསྶསཱི’’ཏི ཝཏྭཱ ཀཧཱཔཎེ ནཱིཧརིཏྭཱ བྷཎྜིཀཾ བནྡྷཱཔེཏྭཱ ཋཔེསུཾ། ཙོརཱ ཏཾ པཝཏྟིཾ ཉཏྭཱ ཚཏྟམཱཎཝཀསྶ གམནམགྒེ ཨཉྙཏརསྨིཾ ཝནགཧནེ ནིལཱིནཱ ཨཙྪིཾསུ ‘‘མཱཎཝཾ མཱརེཏྭཱ ཀཧཱཔཎེ གཎྷིསྶཱམཱ’’ཏི།
Yo vadataṃ pavaro manujesūti chattamāṇavakavimānaṃ. Tassa kā uppatti? Bhagavā sāvatthiyaṃ viharati jetavane. Tena samayena setabyāyaṃ aññatarassa brāhmaṇassa kicchāladdho putto chatto nāma brāhmaṇamāṇavo ahosi. So vayappatto pitarā pesito ukkaṭṭhaṃ gantvā brāhmaṇassa pokkharasātissa santike medhāvitāya analasatāya ca na cireneva mante vijjāṭṭhānāni ca uggahetvā brāhmaṇasippe nipphattiṃ patto. So ācariyaṃ abhivādetvā ‘‘mayā tumhākaṃ santike sippaṃ sikkhitaṃ, kiṃ vo garudakkhiṇaṃ demī’’ti āha. Ācariyo ‘‘garudakkhiṇā nāma antevāsikassa vibhavānurūpā, kahāpaṇasahassamānehī’’ti āha. Chattamāṇavo ācariyaṃ abhivādetvā setabyaṃ gantvā mātāpitaro vanditvā tehi abhinandiyamāno katapaṭisanthāro tamatthaṃ pitu ārocetvā ‘‘detha me dātabbayuttakaṃ, ajjeva datvā āgamissāmī’’ti āha. Taṃ mātāpitaro ‘‘tāta, ajja vikālo, sve gamissasī’’ti vatvā kahāpaṇe nīharitvā bhaṇḍikaṃ bandhāpetvā ṭhapesuṃ. Corā taṃ pavattiṃ ñatvā chattamāṇavakassa gamanamagge aññatarasmiṃ vanagahane nilīnā acchiṃsu ‘‘māṇavaṃ māretvā kahāpaṇe gaṇhissāmā’’ti.
བྷགཝཱ པཙྩཱུསསམཡེ མཧཱཀརུཎཱསམཱཔཏྟིཏོ ཝུཊྛཱཡ ལོཀཾ ཝོལོཀེནྟོ ཚཏྟམཱཎཝཀསྶ སརཎེསུ ཙ སཱིལེསུ ཙ པཏིཊྛཱནཾ, ཙོརེཧི མཱརིཏསྶ དེཝལོཀེ ནིབྦཏྟིཾ, ཏཏོ སཧ ཝིམཱནེན ཨཱགཏསྶ ཏཏྠ སནྣིཔཏིཏཔརིསཱཡ ཙ དྷམྨཱབྷིསམཡཾ དིསྭཱ པཋམཏརམེཝ གནྟྭཱ མཱཎཝཀསྶ གམནམགྒེ ཨཉྙཏརསྨིཾ རུཀྑམཱུལེ ནིསཱིདི། མཱཎཝོ ཨཱཙརིཡདྷནཾ གཧེཏྭཱ སེཏབྱཏོ ཨུཀྐཊྛཱབྷིམུཁོ གཙྪནྟོ ཨནྟརཱམགྒེ བྷགཝནྟཾ ནིསིནྣཾ དིསྭཱ ཨུཔསངྐམིཏྭཱ ཨཊྛཱསི། ‘‘ཀུཧིཾ གམིསྶསཱི’’ཏི བྷགཝཏཱ ཝུཏྟོ ‘‘ཨུཀྐཊྛཾ, བྷོ གོཏམ, གམིསྶཱམི མཡ྄ཧཾ ཨཱཙརིཡསྶ པོཀྑརསཱཏིསྶ གརུདཀྑིཎཾ དཱཏུ’’ནྟི ཨཱཧ། ཨཐ བྷགཝཱ ‘‘ཛཱནཱསི པན ཏྭཾ, མཱཎཝ, ཏཱིཎི སརཎཱནི, པཉྩ སཱིལཱནཱི’’ཏི ཝཏྭཱ ཏེན ‘‘ནཱཧཾ ཛཱནཱམི, ཀིམཏྠིཡཱནི པནེཏཱནི ཀཱིདིསཱནི ཙཱ’’ཏི ཝུཏྟེ ‘‘ཨིདམཱིདིས’’ནྟི སརཎགམནསྶ སཱིལསམཱདཱནསྶ ཙ ཕལཱནིསཾསཾ ཝིབྷཱཝེཏྭཱ ‘‘ཨུགྒཎྷཱཧི ཏཱཝ, མཱཎཝཀ, སརཎགམནཝིདྷི’’ནྟི ཝཏྭཱ ‘‘སཱདྷུ ཨུགྒཎྷིསྶཱམི, ཀཐེཐ བྷནྟེ བྷགཝཱ’’ཏི ཏེན ཡཱཙིཏོ ཏསྶ རུཙིཡཱ ཨནུརཱུཔཾ གཱཐཱབནྡྷཝསེན སརཎགམནཝིདྷིཾ དསྶེནྟོ –
Bhagavā paccūsasamaye mahākaruṇāsamāpattito vuṭṭhāya lokaṃ volokento chattamāṇavakassa saraṇesu ca sīlesu ca patiṭṭhānaṃ, corehi māritassa devaloke nibbattiṃ, tato saha vimānena āgatassa tattha sannipatitaparisāya ca dhammābhisamayaṃ disvā paṭhamatarameva gantvā māṇavakassa gamanamagge aññatarasmiṃ rukkhamūle nisīdi. Māṇavo ācariyadhanaṃ gahetvā setabyato ukkaṭṭhābhimukho gacchanto antarāmagge bhagavantaṃ nisinnaṃ disvā upasaṅkamitvā aṭṭhāsi. ‘‘Kuhiṃ gamissasī’’ti bhagavatā vutto ‘‘ukkaṭṭhaṃ, bho gotama, gamissāmi mayhaṃ ācariyassa pokkharasātissa garudakkhiṇaṃ dātu’’nti āha. Atha bhagavā ‘‘jānāsi pana tvaṃ, māṇava, tīṇi saraṇāni, pañca sīlānī’’ti vatvā tena ‘‘nāhaṃ jānāmi, kimatthiyāni panetāni kīdisāni cā’’ti vutte ‘‘idamīdisa’’nti saraṇagamanassa sīlasamādānassa ca phalānisaṃsaṃ vibhāvetvā ‘‘uggaṇhāhi tāva, māṇavaka, saraṇagamanavidhi’’nti vatvā ‘‘sādhu uggaṇhissāmi, kathetha bhante bhagavā’’ti tena yācito tassa ruciyā anurūpaṃ gāthābandhavasena saraṇagamanavidhiṃ dassento –
༨༨༦.
886.
‘‘ཡོ ཝདཏཾ པཝརོ མནུཛེསུ, སཀྱམུནཱི བྷགཝཱ ཀཏཀིཙྩོ།
‘‘Yo vadataṃ pavaro manujesu, sakyamunī bhagavā katakicco;
པཱརགཏོ བལཝཱིརིཡསམངྒཱི, ཏཾ སུགཏཾ སརཎཏྠམུཔེཧི༎
Pāragato balavīriyasamaṅgī, taṃ sugataṃ saraṇatthamupehi.
༨༨༧.
887.
‘‘རཱགཝིརཱགམནེཛམསོཀཾ , དྷམྨམསངྑཏམཔྤཊིཀཱུལཾ།
‘‘Rāgavirāgamanejamasokaṃ , dhammamasaṅkhatamappaṭikūlaṃ;
མདྷུརམིམཾ པགུཎཾ སུཝིབྷཏྟཾ, དྷམྨམིམཾ སརཎཏྠམུཔེཧི༎
Madhuramimaṃ paguṇaṃ suvibhattaṃ, dhammamimaṃ saraṇatthamupehi.
༨༨༨.
888.
‘‘ཡཏྠ ཙ དིནྣ མཧཔྥལམཱཧུ, ཙཏཱུསུ སུཙཱིསུ པུརིསཡུགེསུ།
‘‘Yattha ca dinna mahapphalamāhu, catūsu sucīsu purisayugesu;
ཨཊྛ ཙ པུགྒལ དྷམྨདསཱ ཏེ, སངྒྷམིམཾ སརཎཏྠམུཔེཧཱི’’ཏི༎ –
Aṭṭha ca puggala dhammadasā te, saṅghamimaṃ saraṇatthamupehī’’ti. –
ཏིསྶོ གཱཐཱཡོ ཨབྷཱསི།
Tisso gāthāyo abhāsi.
༨༨༦. ཏཏྠ ཡོཏི ཨནིཡམིཏཝཙནཾ, ཏསྶ ‘‘ཏ’’ནྟི ཨིམིནཱ ནིཡམནཾ ཝེདིཏབྦཾ། ཝདཏནྟི ཝདནྟཱནཾ། པཝརོཏི སེཊྛོ, ཀཐིཀཱནཾ ཨུཏྟམོ ཝཱདཱིཝརོཏི ཨཏྠོ། མནུཛེསཱུཏི ཨུཀྐཊྛནིདྡེསོ ཡཐཱ ‘‘སཏྠཱ དེཝམནུསྶཱན’’ནྟི། བྷགཝཱ པན དེཝམནུསྶཱནམྤི བྲཧྨཱནམྤི སབྦེསམྤི སཏྟཱནཾ པཝརོཡེཝ, བྷགཝཏོ ཙ ཙརིམབྷཝེ མནུསྶེསུ ཨུཔྤནྣཏཱཡ ཝུཏྟཾ ‘‘མནུཛེསཱུ’’ཏི། ཏེནེཝཱཧ ‘‘སཀྱམུནཱི’’ཏི། སཀྱཀུལཔྤསུཏཏཱཡ སཀྱོ, ཀཱཡམོནེཡྻཱདཱིཧི སམནྣཱགཏཏོ ཨནཝསེསསྶ ཙ ཉེཡྻསྶ མུནནཏོ མུནི ཙཱཏི སཀྱམུནི། བྷཱགྱཝནྟཏཱདཱིཧི ཙཏཱུཧི ཀཱརཎེཧི བྷགཝཱ། ཙཏཱུཧི མགྒེཧི ཀཱཏབྦསྶ པརིཉྙཱདིཔབྷེདསྶ སོལ༹སཝིདྷསྶ ཀིཙྩསྶ ཀཏཏྟཱ ནིཔྥཱདིཏཏྟཱ ཀཏཀིཙྩོ། པཱརཾ སཀྐཱཡསྶ པརཏཱིརཾ ནིབྦཱནཾ གཏོ སཡམྦྷུཉཱཎེན ཨདྷིགཏོཏི པཱརགཏོ། ཨསདིསེན ཀཱཡབལེན, ཨནཉྙསཱདྷཱརཎེན ཉཱཎབལེན, ཙཏུབྦིདྷསམྨཔྤདྷཱནཝཱིརིཡེན ཙ སམནྣཱགཏཏྟཱ བལཝཱིརིཡསམངྒཱི། སོབྷནགམནཏྟཱ, སུནྡརཾ ཋཱནཾ གཏཏྟཱ, སམྨཱ གཏཏྟཱ, སམྨཱ ཙ གདིཏཏྟཱ སུགཏོ། ཏཾ སུགཏཾ སམྨཱསམྦུདྡྷཾ སརཎཏྠཾ སརཎཱཡ པརཱཡཎཱཡ ཨཔཱཡདུཀྑཝཊྚདུཀྑཔརིཏྟཱཎཱཡ ཨུཔེཧི ཨུཔགཙྪ, ཨཛྫ པཊྛཱཡ ཨཧིཏནིཝཏྟནེན ཧིཏསཾཝཌྜྷནེན ‘‘ཨཡཾ མེ བྷགཝཱ སརཎཾ ཏཱཎཾ ལེཎཾ པརཱཡཎཾ གཏི པཊིསརཎ’’ནྟི བྷཛ སེཝ, ཨེཝཾ ཛཱནཱཧི ཝཱ བུཛ྄ཛྷསྶཱུཏི ཨཏྠོ།
886. Tattha yoti aniyamitavacanaṃ, tassa ‘‘ta’’nti iminā niyamanaṃ veditabbaṃ. Vadatanti vadantānaṃ. Pavaroti seṭṭho, kathikānaṃ uttamo vādīvaroti attho. Manujesūti ukkaṭṭhaniddeso yathā ‘‘satthā devamanussāna’’nti. Bhagavā pana devamanussānampi brahmānampi sabbesampi sattānaṃ pavaroyeva, bhagavato ca carimabhave manussesu uppannatāya vuttaṃ ‘‘manujesū’’ti. Tenevāha ‘‘sakyamunī’’ti. Sakyakulappasutatāya sakyo, kāyamoneyyādīhi samannāgatato anavasesassa ca ñeyyassa munanato muni cāti sakyamuni. Bhāgyavantatādīhi catūhi kāraṇehi bhagavā. Catūhi maggehi kātabbassa pariññādipabhedassa soḷasavidhassa kiccassa katattā nipphāditattā katakicco. Pāraṃ sakkāyassa paratīraṃ nibbānaṃ gato sayambhuñāṇena adhigatoti pāragato. Asadisena kāyabalena, anaññasādhāraṇena ñāṇabalena, catubbidhasammappadhānavīriyena ca samannāgatattā balavīriyasamaṅgī. Sobhanagamanattā, sundaraṃ ṭhānaṃ gatattā, sammā gatattā, sammā ca gaditattā sugato. Taṃ sugataṃ sammāsambuddhaṃ saraṇatthaṃ saraṇāya parāyaṇāya apāyadukkhavaṭṭadukkhaparittāṇāya upehi upagaccha, ajja paṭṭhāya ahitanivattanena hitasaṃvaḍḍhanena ‘‘ayaṃ me bhagavā saraṇaṃ tāṇaṃ leṇaṃ parāyaṇaṃ gati paṭisaraṇa’’nti bhaja seva, evaṃ jānāhi vā bujjhassūti attho.
༨༨༧. རཱགཝིརཱགནྟི ཨརིཡམགྒམཱཧ། ཏེན ཧི ཨརིཡཱ ཨནཱདིཀཱལབྷཱཝིཏམྤི རཱགཾ ཝིརཛྫེནྟི། ཨནེཛམསོཀནྟི ཨརིཡཕལཾ། ཏཉྷི ཨེཛཱསངྑཱཏཱཡ ཏཎྷཱཡ ཨཝསིཊྛཱནཉྩ སོཀནིམིཏྟཱནཾ ཀིལེསཱནཾ སབྦསོ པཊིཔྤསྶམྦྷནཏོ ‘‘ཨནེཛཾ ཨསོཀ’’ནྟི ཙ ཝུཙྩཏི། དྷམྨནྟི སབྷཱཝདྷམྨཾ། སབྷཱཝཏོ གཧེཏབྦདྷམྨོ ཧེས ཡདིདཾ མགྒཕལནིབྦཱནཱནི, ན པརིཡཏྟིདྷམྨོ ཝིཡ པཉྙཏྟིདྷམྨཝསེན། དྷམྨནྟི ཝཱ པརམཏྠདྷམྨཾ, ནིབྦཱནནྟི ཨཏྠོ། སམེཙྩ སམྦྷུཡྻ པཙྩཡེཧི ཀཏཾ སངྑཏཾ, ན སངྑཏནྟི ཨསངྑཏཾ། ཏདེཝ ནིབྦཱནཾ། ནཏྠི ཨེཏྠ ཀིཉྩིཔི པཊིཀཱུལནྟི ཨཔྤཊིཀཱུལཾ། སཝནཝེལཱཡཾ ཨུཔཔརིཀྑཎཝེལཱཡཾ པཊིཔཛྫནཝེལཱཡནྟི སབྦདཱཔི ཨིཊྛམེཝཱཏི མདྷུརཾ། སབྦཉྙུཏཉྙཱཎསནྣིསྶཡཱཡ པཊིབྷཱནསམྤདཱཡ པཝཏྟིཏཏྟཱ སུཔྤཝཏྟིབྷཱཝཏོ ནིཔུཎབྷཱཝཏོ ཙ པགུཎཾ། ཝིབྷཛིཏབྦསྶ ཨཏྠསྶ ཁནྡྷཱདིཝསེན ཀུསལཱདིཝསེན ཨུདྡེསཱདིཝསེན ཙ སུཊྛུ ཝིབྷཛནཏོ སུཝིབྷཏྟཾ། ཏཱིཧིཔི པདེཧི པརིཡཏྟིདྷམྨམེཝ ཝདཏི། ཏེནེཝ ཧིསྶ ཨཱཔཱཐཀཱལེ ཝིཡ ཝིམདྡནཀཱལེཔི ཀཐེནྟསྶ ཝིཡ སུཎནྟསྶཱཔི སམྨུཁཱིབྷཱཝཏོ ཨུབྷཏོཔཙྩཀྑཏཱཡ དསྶནཏྠཾ ‘‘ཨིམ’’ནྟི ཝུཏྟཾ། དྷམྨནྟི ཡཐཱཝཔཊིཔཛྫནྟེ ཨཔཱཡདུཀྑཔཱཏཏོ དྷཱརཎཏྠེན དྷམྨཾ, ཨིདཾ ཙཏུབྦིདྷསྶཱཔི དྷམྨསྶ སཱདྷཱརཎཝཙནཾ། པརིཡཏྟིདྷམྨོཔི ཧི སརཎེསུ ཙ སཱིལེསུ ཙ པཏིཊྛཱནམཏྟཱཡཔི ཡཐཱཝཔཊིཔཏྟིཡཱ ཨཔཱཡདུཀྑཔཱཏཏོ དྷཱརེཏི ཨེཝ། ཨིམསྶ ཙ ཨཏྠསྶ ཨིདམེཝ ཝིམཱནཾ སཱདྷཀནྟི དཊྛབྦཾ། སཱདྷཱརཎབྷཱཝེན ཡཐཱཝུཏྟདྷམྨསྶ པཙྩཀྑཾ ཀཏྭཱ དསྶེནྟོ པུན ‘‘ཨིམ’’ནྟི ཨཱཧ།
887.Rāgavirāganti ariyamaggamāha. Tena hi ariyā anādikālabhāvitampi rāgaṃ virajjenti. Anejamasokanti ariyaphalaṃ. Tañhi ejāsaṅkhātāya taṇhāya avasiṭṭhānañca sokanimittānaṃ kilesānaṃ sabbaso paṭippassambhanato ‘‘anejaṃ asoka’’nti ca vuccati. Dhammanti sabhāvadhammaṃ. Sabhāvato gahetabbadhammo hesa yadidaṃ maggaphalanibbānāni, na pariyattidhammo viya paññattidhammavasena. Dhammanti vā paramatthadhammaṃ, nibbānanti attho. Samecca sambhuyya paccayehi kataṃ saṅkhataṃ, na saṅkhatanti asaṅkhataṃ. Tadeva nibbānaṃ. Natthi ettha kiñcipi paṭikūlanti appaṭikūlaṃ. Savanavelāyaṃ upaparikkhaṇavelāyaṃ paṭipajjanavelāyanti sabbadāpi iṭṭhamevāti madhuraṃ. Sabbaññutaññāṇasannissayāya paṭibhānasampadāya pavattitattā suppavattibhāvato nipuṇabhāvato ca paguṇaṃ. Vibhajitabbassa atthassa khandhādivasena kusalādivasena uddesādivasena ca suṭṭhu vibhajanato suvibhattaṃ. Tīhipi padehi pariyattidhammameva vadati. Teneva hissa āpāthakāle viya vimaddanakālepi kathentassa viya suṇantassāpi sammukhībhāvato ubhatopaccakkhatāya dassanatthaṃ ‘‘ima’’nti vuttaṃ. Dhammanti yathāvapaṭipajjante apāyadukkhapātato dhāraṇatthena dhammaṃ, idaṃ catubbidhassāpi dhammassa sādhāraṇavacanaṃ. Pariyattidhammopi hi saraṇesu ca sīlesu ca patiṭṭhānamattāyapi yathāvapaṭipattiyā apāyadukkhapātato dhāreti eva. Imassa ca atthassa idameva vimānaṃ sādhakanti daṭṭhabbaṃ. Sādhāraṇabhāvena yathāvuttadhammassa paccakkhaṃ katvā dassento puna ‘‘ima’’nti āha.
༨༨༨. ཡཏྠཱཏི ཡསྨིཾ ཨརིཡསངྒྷེ། དིནྣནྟི པརིཙྩཏྟཾ ཨནྣཱདིདེཡྻདྷམྨཾ། དིནྣ མཧཔྥལནྟི གཱཐཱསུཁཏྠཾ ཨནུནཱསིཀལོཔོ ཀཏོ། ཨཙྩནྟམེཝ ཀིལེསཱསུཙིཏོ ཝིསུཛ྄ཛྷནེན སུཙཱིསུ ‘‘སོཏཱཔནྣོ སོཏཱཔཏྟིཕལསཙྪིཀིརིཡཱཡ པཊིཔནྣོ’’ཏིཨཱདིནཱ (ཨ॰ ནི॰ ༨.༦༠) ཝུཏྟེསུ ཙཏཱུསུ པུརིསཡུགེསུ། ཨཊྛཱཏི མགྒཊྛཕལཊྛེསུ ཡུགལེ༹ ཨཀཏྭཱ ཝིསུཾ ཝིསུཾ གཧཎེན ཨཊྛ པུགྒལཱ། གཱཐཱསུཁཏྠམེཝ ཙེཏྠ ‘‘པུགྒལ དྷམྨདསཱ’’ཏི རསྶཾ ཀཏྭཱ ནིདྡེསོ། དྷམྨདསཱཏི ཙཏུསཙྩདྷམྨསྶ ནིབྦཱནདྷམྨསྶ ཙ པཙྩཀྑཏོ དསྶནཀཱ། དིཊྛིསཱིལསཱམཉྙེན སཾཧཏབྷཱཝེན སངྒྷཾ།
888.Yatthāti yasmiṃ ariyasaṅghe. Dinnanti pariccattaṃ annādideyyadhammaṃ. Dinna mahapphalanti gāthāsukhatthaṃ anunāsikalopo kato. Accantameva kilesāsucito visujjhanena sucīsu ‘‘sotāpanno sotāpattiphalasacchikiriyāya paṭipanno’’tiādinā (a. ni. 8.60) vuttesu catūsu purisayugesu. Aṭṭhāti maggaṭṭhaphalaṭṭhesu yugaḷe akatvā visuṃ visuṃ gahaṇena aṭṭha puggalā. Gāthāsukhatthameva cettha ‘‘puggala dhammadasā’’ti rassaṃ katvā niddeso. Dhammadasāti catusaccadhammassa nibbānadhammassa ca paccakkhato dassanakā. Diṭṭhisīlasāmaññena saṃhatabhāvena saṅghaṃ.
ཨེཝཾ བྷགཝཏཱ ཏཱིཧི གཱཐཱཧི སརཎགུཎསནྡསྶནེན སདྡྷིཾ སརཎགམནཝིདྷིམྷི ཝུཏྟེ མཱཎཝོ ཏཾཏཾསརཎགུཎཱནུསྶརཎམུཁེན སརཎགམནཝིདྷིནོ ཨཏྟནོ ཧདཡེ ཋཔིཏབྷཱཝཾ ཝིབྷཱཝེནྟོ ཏསྶཱ ཏསྶཱ གཱཐཱཡ ཨནནྟརཾ ‘‘ཡོ ཝདཏཾ པཝརོ’’ཏིཨཱདིནཱ ཏཾ ཏཾ གཱཐཾ པཙྩནུབྷཱསི། ཨེཝཾ པཙྩནུབྷཱསིཏྭཱ ཋིཏསྶ པཉྩ སིཀྑཱཔདཱནི སརཱུཔཏོ ཕལཱནིསཾསཏོ ཙ ཝིབྷཱཝེཏྭཱ ཏེསཾ སམཱདཱནཝིདྷིཾ ཀཐེསི། སོ ཏམྤི སུཊྛུ ཨུཔདྷཱརེཏྭཱ པསནྣམཱནསོ ‘‘ཧནྡཱཧཾ བྷགཝཱ གམིསྶཱམཱི’’ཏི ཝཏྭཱ རཏནཏྟཡགུཎཾ ཨནུསྶརནྟོ ཏཾཡེཝ མགྒཾ པཊིཔཛྫི། བྷགཝཱཔི ‘‘ཨལཾ ཨིམསྶ ཨེཏྟཀཾ ཀུསལཾ དེཝལོཀཱུཔཔཏྟིཡཱ’’ཏི ཛེཏཝནམེཝ ཨགམཱསི།
Evaṃ bhagavatā tīhi gāthāhi saraṇaguṇasandassanena saddhiṃ saraṇagamanavidhimhi vutte māṇavo taṃtaṃsaraṇaguṇānussaraṇamukhena saraṇagamanavidhino attano hadaye ṭhapitabhāvaṃ vibhāvento tassā tassā gāthāya anantaraṃ ‘‘yo vadataṃ pavaro’’tiādinā taṃ taṃ gāthaṃ paccanubhāsi. Evaṃ paccanubhāsitvā ṭhitassa pañca sikkhāpadāni sarūpato phalānisaṃsato ca vibhāvetvā tesaṃ samādānavidhiṃ kathesi. So tampi suṭṭhu upadhāretvā pasannamānaso ‘‘handāhaṃ bhagavā gamissāmī’’ti vatvā ratanattayaguṇaṃ anussaranto taṃyeva maggaṃ paṭipajji. Bhagavāpi ‘‘alaṃ imassa ettakaṃ kusalaṃ devalokūpapattiyā’’ti jetavanameva agamāsi.
མཱཎཝསྶ པན པསནྣཙིཏྟསྶ རཏནཏྟཡགུཎཾ སལླཀྑཎཝསེན ‘‘སརཎཾ ཨུཔེམཱི’’ཏི པཝཏྟཙིཏྟུཔྤཱདཏཱཡ སརཎེསུ ཙ, བྷགཝཏཱ ཝུཏྟནཡེན པཉྩནྣཾ སཱིལཱནཾ ཨདྷིཊྛཱནེན སཱིལེསུ ཙ པཏིཊྛིཏསྶ ཏེནེཝ ནཡེན རཏནཏྟཡགུཎེ ཨནུསྶརནྟསྶེཝ གཙྪནྟསྶ ཙོརཱ མགྒེ པརིཡུཊྛིཾསུ། སོ ཏེ ཨགཎེཏྭཱ རཏནཏྟཡགུཎེ ཨནུསྶརནྟོཡེཝ གཙྪཏི། ཏཉྩེཀོ ཙོརོ གུམྦནྟརཾ ཨུཔནིསྶཱཡ ཋིཏོ ཝིསཔཱིཏེན སརེན སཧསཱཝ ཝིཛ྄ཛྷིཏྭཱ ཛཱིཝིཏཀྑཡཾ པཱཔེཏྭཱ ཀཧཱཔཎབྷཎྜིཀཾ གཧེཏྭཱ ཨཏྟནོ སཧཱཡེཧི སདྡྷིཾ པཀྐཱམི། མཱཎཝོ པན ཀཱལཾ ཀཏྭཱ ཏཱཝཏིཾསབྷཝནེ ཏིཾསཡོཛནིཀེ ཀནཀཝིམཱནེ སུཏྟཔྤབུདྡྷོ ཝིཡ ཨཙྪརཱསཧསྶཔརིཝུཏོ སཊྛིསཀཊབྷཱརཱལངྐཱརཔཊིམཎྜིཏཏྟབྷཱཝོ ནིབྦཏྟི, ཏསྶ ཝིམཱནསྶ ཨཱབྷཱ སཱཏིརེཀཱནི ཝཱིསཏིཡོཛནཱནི ཕརིཏྭཱ ཏིཊྛཏི།
Māṇavassa pana pasannacittassa ratanattayaguṇaṃ sallakkhaṇavasena ‘‘saraṇaṃ upemī’’ti pavattacittuppādatāya saraṇesu ca, bhagavatā vuttanayena pañcannaṃ sīlānaṃ adhiṭṭhānena sīlesu ca patiṭṭhitassa teneva nayena ratanattayaguṇe anussarantasseva gacchantassa corā magge pariyuṭṭhiṃsu. So te agaṇetvā ratanattayaguṇe anussarantoyeva gacchati. Tañceko coro gumbantaraṃ upanissāya ṭhito visapītena sarena sahasāva vijjhitvā jīvitakkhayaṃ pāpetvā kahāpaṇabhaṇḍikaṃ gahetvā attano sahāyehi saddhiṃ pakkāmi. Māṇavo pana kālaṃ katvā tāvatiṃsabhavane tiṃsayojanike kanakavimāne suttappabuddho viya accharāsahassaparivuto saṭṭhisakaṭabhārālaṅkārapaṭimaṇḍitattabhāvo nibbatti, tassa vimānassa ābhā sātirekāni vīsatiyojanāni pharitvā tiṭṭhati.
ཨཐ མཱཎཝཾ ཀཱལཀཏཾ དིསྭཱ སེཏབྱགཱམཝཱསིནོ མནུསྶཱ སེཏབྱཾ གནྟྭཱ ཏསྶ མཱཏཱཔིཏཱུནཾ ཨུཀྐཊྛགཱམཝཱསིནོ ཙ ཨུཀྐཊྛཾ གནྟྭཱ བྲཱཧྨཎསྶ པོཀྑརསཱཏིསྶ ཀཐེསུཾ། ཏཾ སུཏྭཱ ཏསྶ མཱཏཱཔིཏརོ ཉཱཏིམིཏྟཱ བྲཱཧྨཎོ ཙ པོཀྑརསཱཏི སཔརིཝཱརཱ ཨསྶུམུཁཱ རོདམཱནཱ ཏཾ པདེསཾ ཨགམཾསུ, ཡེབྷུཡྻེན སེཏབྱཝཱསིནོ ཙ ཨུཀྐཊྛཝཱསིནོ ཙ ཨིཙྪཱནངྒལཝཱསིནོ ཙ སནྣིཔཏིཾསུ, མཧཱསམཱགམོ ཨཧོསི། ཨཐ མཱཎཝསྶ མཱཏཱཔིཏརོ མགྒསྶ ཨཝིདཱུརེ ཙིཏཀཾ སཛྫེཏྭཱ སརཱིརཀིཙྩཾ ཀཱཏུཾ ཨཱརབྷིཾསུ།
Atha māṇavaṃ kālakataṃ disvā setabyagāmavāsino manussā setabyaṃ gantvā tassa mātāpitūnaṃ ukkaṭṭhagāmavāsino ca ukkaṭṭhaṃ gantvā brāhmaṇassa pokkharasātissa kathesuṃ. Taṃ sutvā tassa mātāpitaro ñātimittā brāhmaṇo ca pokkharasāti saparivārā assumukhā rodamānā taṃ padesaṃ agamaṃsu, yebhuyyena setabyavāsino ca ukkaṭṭhavāsino ca icchānaṅgalavāsino ca sannipatiṃsu, mahāsamāgamo ahosi. Atha māṇavassa mātāpitaro maggassa avidūre citakaṃ sajjetvā sarīrakiccaṃ kātuṃ ārabhiṃsu.
ཨཐ བྷགཝཱ ཙིནྟེསི ‘‘མཡི གཏེ ཚཏྟམཱཎཝོ མཾ ཝནྡིཏུཾ ཨཱགམིསྶཏི, ཨཱགཏཉྩ ཏཾ ཀཏཀམྨཾ ཀཐཱཔེནྟོ ཀམྨཕལཾ པཙྩཀྑཾ ཀཱརེཏྭཱ དྷམྨཾ དེསེསྶཱམི, ཨེཝཾ མཧཱཛནསྶ དྷམྨཱབྷིསམཡོ བྷཝིསྶཏཱི’’ཏི ཙིནྟེཏྭཱ མཧཏཱ བྷིཀྑུསངྒྷེན སདྡྷིཾ ཏཾ པདེསཾ ཨུཔགནྟྭཱ ཨཉྙཏརསྨིཾ རུཀྑམཱུལེ ནིསཱིདི ཚབྦཎྞབུདྡྷརཾསིཡོ ཝིསྶཛྫེནྟོ། ཨཐ ཚཏྟམཱཎཝདེཝཔུཏྟོཔི ཨཏྟནོ སམྤཏྟིཾ པཙྩཝེཀྑིཏྭཱ, ཏསྶཱ ཀཱརཎཾ ཨུཔདྷཱརེནྟོ སརཎགམནཉྩ སཱིལསམཱདཱནཉྩ དིསྭཱ, ཝིམྷཡཛཱཏོ བྷགཝཏི སཉྫཱཏཔསཱདབཧུམཱནོ ‘‘ཨིདཱནེཝཱཧཾ གནྟྭཱ བྷགཝནྟཉྩ བྷིཀྑུསངྒྷཉྩ ཝནྡིསྶཱམི, རཏནཏྟཡགུཎེ ཙ མཧཱཛནསྶ པཱཀཊེ ཀརིསྶཱམཱི’’ཏི ཀཏཉྙུཏཾ ནིསྶཱཡ སཀལཾ ཏཾ ཨརཉྙཔདེསཾ ཨེཀཱལོཀཾ ཀརོནྟོ, སཧ ཝིམཱནེན ཨཱགནྟྭཱ ཝིམཱནཏོ ཨོརུཡ྄ཧ མཧཏཱ པརིཝཱརེན སདྡྷིཾ དིསྶམཱནརཱུཔོ ཨུཔསངྐམིཏྭཱ བྷགཝཏོ པཱདེསུ སིརསཱ ནིཔཏནྟོ ཨབྷིཝཱདེཏྭཱ ཨཉྫལིཾ པགྒཡ྄ཧ ཨེཀམནྟཾ ཨཊྛཱསི། ཏཾ དིསྭཱ མཧཱཛནོ ‘‘ཀོ ནུ ཁོ ཨཡཾ དེཝོ ཝཱ བྲཧྨཱ ཝཱ’’ཏི ཨཙྪརིཡབྦྷུཏཛཱཏོ ཨུཔསངྐམིཏྭཱ བྷགཝནྟཾ པརིཝཱརེསི། བྷགཝཱ ཏེན ཀཏཔུཉྙཀམྨཾ པཱཀཊཾ ཀཱཏུཾ –
Atha bhagavā cintesi ‘‘mayi gate chattamāṇavo maṃ vandituṃ āgamissati, āgatañca taṃ katakammaṃ kathāpento kammaphalaṃ paccakkhaṃ kāretvā dhammaṃ desessāmi, evaṃ mahājanassa dhammābhisamayo bhavissatī’’ti cintetvā mahatā bhikkhusaṅghena saddhiṃ taṃ padesaṃ upagantvā aññatarasmiṃ rukkhamūle nisīdi chabbaṇṇabuddharaṃsiyo vissajjento. Atha chattamāṇavadevaputtopi attano sampattiṃ paccavekkhitvā, tassā kāraṇaṃ upadhārento saraṇagamanañca sīlasamādānañca disvā, vimhayajāto bhagavati sañjātapasādabahumāno ‘‘idānevāhaṃ gantvā bhagavantañca bhikkhusaṅghañca vandissāmi, ratanattayaguṇe ca mahājanassa pākaṭe karissāmī’’ti kataññutaṃ nissāya sakalaṃ taṃ araññapadesaṃ ekālokaṃ karonto, saha vimānena āgantvā vimānato oruyha mahatā parivārena saddhiṃ dissamānarūpo upasaṅkamitvā bhagavato pādesu sirasā nipatanto abhivādetvā añjaliṃ paggayha ekamantaṃ aṭṭhāsi. Taṃ disvā mahājano ‘‘ko nu kho ayaṃ devo vā brahmā vā’’ti acchariyabbhutajāto upasaṅkamitvā bhagavantaṃ parivāresi. Bhagavā tena katapuññakammaṃ pākaṭaṃ kātuṃ –
༨༨༩.
889.
‘‘ན ཏཐཱ ཏཔཏི ནབྷེ སཱུརིཡོ, ཙནྡོ ཙ ན བྷཱསཏི ན ཕུསྶོ།
‘‘Na tathā tapati nabhe sūriyo, cando ca na bhāsati na phusso;
ཡཐཱ ཨཏུལམིདཾ མཧཔྤབྷཱསཾ, ཀོ ནུ ཏྭཾ ཏིདིཝཱ མཧིཾ ཨུཔཱགཱ༎
Yathā atulamidaṃ mahappabhāsaṃ, ko nu tvaṃ tidivā mahiṃ upāgā.
༨༩༠.
890.
‘‘ཚིནྡཏི རཾསཱི པབྷངྐརསྶ, སཱདྷིཀཝཱིསཏིཡོཛནཱནི ཨཱབྷཱ།
‘‘Chindati raṃsī pabhaṅkarassa, sādhikavīsatiyojanāni ābhā;
རཏྟིམཔི ཡཐཱ དིཝཾ ཀརོཏི, པརིསུདྡྷཾ ཝིམལཾ སུབྷཾ ཝིམཱནཾ༎
Rattimapi yathā divaṃ karoti, parisuddhaṃ vimalaṃ subhaṃ vimānaṃ.
༨༩༡.
891.
‘‘བཧུཔདུམཝིཙིཏྲཔུཎྜརཱིཀཾ, ཝོཀིཎྞཾ ཀུསུམེཧི ནེཀཙིཏྟཾ།
‘‘Bahupadumavicitrapuṇḍarīkaṃ, vokiṇṇaṃ kusumehi nekacittaṃ;
ཨརཛཝིརཛཧེམཛཱལཚནྣཾ, ཨཱཀཱསེ ཏཔཏི ཡཐཱཔི སཱུརིཡོ༎
Arajavirajahemajālachannaṃ, ākāse tapati yathāpi sūriyo.
༨༩༢.
892.
‘‘རཏྟམྦརཔཱིཏཝཱསསཱཧི, ཨགརུཔིཡངྒུཙནྡནུསྶདཱཧི།
‘‘Rattambarapītavāsasāhi, agarupiyaṅgucandanussadāhi;
ཀཉྩནཏནུསནྣིབྷཏྟཙཱཧི, པརིཔཱུརཾ གགནཾཝ ཏཱརཀཱཧི༎
Kañcanatanusannibhattacāhi, paripūraṃ gaganaṃva tārakāhi.
༨༩༣.
893.
‘‘ནརནཱརིཡོ བཧུཀེཏྠནེཀཝཎྞཱ, ཀུསུམཝིབྷཱུསིཏཱབྷརཎེཏྠ སུམནཱ།
‘‘Naranāriyo bahuketthanekavaṇṇā, kusumavibhūsitābharaṇettha sumanā;
ཨནིལཔམུཉྩིཏཱ པཝནྟི སུརབྷིཾ, ཏཔནིཡཝིཏཏཱ སུཝཎྞཚནྣཱ༎
Anilapamuñcitā pavanti surabhiṃ, tapaniyavitatā suvaṇṇachannā.
༨༩༤.
894.
‘‘ཀིསྶ སཾཡམསྶ ཨཡཾ ཝིཔཱཀོ, ཀེནཱསི ཀམྨཕལེནིདྷཱུཔཔནྣོ།
‘‘Kissa saṃyamassa ayaṃ vipāko, kenāsi kammaphalenidhūpapanno;
ཡཐཱ ཙ ཏེ ཨདྷིགཏམིདཾ ཝིམཱནཾ, ཏདནུཔདཾ ཨཝཙཱསི ཨིགྒྷ པུཊྛོ’’ཏི༎ –
Yathā ca te adhigatamidaṃ vimānaṃ, tadanupadaṃ avacāsi iggha puṭṭho’’ti. –
ཏཾ དེཝཔུཏྟཾ པཊིཔུཙྪི།
Taṃ devaputtaṃ paṭipucchi.
༨༨༦. ཏཏྠ ཏཔཏཱིཏི དིཔྤཏི། ནབྷེཏི ཨཱཀཱསེ། ཕུསྶོཏི ཕུསྶཏཱརཀཱ། ཨཏུལནྟི ཨནུཔམཾ, ཨཔྤམཱཎཾ ཝཱ། ཨིདཾ ཝུཏྟཾ ཧོཏི – ཡཐཱ ཨིདཾ ཏཝ ཝིམཱནཾ ཨནུཔམཾ ཨཔྤམཱཎཾ པབྷསྶརབྷཱཝེན ཏཏོ ཨེཝ མཧཔྤབྷཱསཾ ཨཱཀཱསེ དིཔྤཏི, ན ཏཐཱ ཏཱརཀརཱུཔཱནི དིཔྤནྟི, ན ཙནྡོ, ཏཱནི ཏཱཝ ཏིཊྛནྟུ, ནཱཔི སཱུརིཡོ དིཔྤཏི, ཨེཝཾབྷཱུཏོ ཀོ ནུ ཏྭཾ དེཝལོཀཏོ ཨིམཾ བྷཱུམིཔདེསཾ ཨུཔགཏོ, ཏཾ པཱཀཊཾ ཀཏྭཱ ཨིམསྶ མཧཱཛནསྶ ཀཐེཧཱིཏི།
886. Tattha tapatīti dippati. Nabheti ākāse. Phussoti phussatārakā. Atulanti anupamaṃ, appamāṇaṃ vā. Idaṃ vuttaṃ hoti – yathā idaṃ tava vimānaṃ anupamaṃ appamāṇaṃ pabhassarabhāvena tato eva mahappabhāsaṃ ākāse dippati, na tathā tārakarūpāni dippanti, na cando, tāni tāva tiṭṭhantu, nāpi sūriyo dippati, evaṃbhūto ko nu tvaṃ devalokato imaṃ bhūmipadesaṃ upagato, taṃ pākaṭaṃ katvā imassa mahājanassa kathehīti.
༨༩༠. ཚིནྡཏཱིཏི ཝིཙྪིནྡཏི, པཝཏྟིཏུཾ ཨདེནྟོ པཊིཧནཏཱིཏི ཨཏྠོ། རཾསཱིཏི རསྨིཡོ། པབྷངྐརསྶཱཏི སཱུརིཡསྶ། ཏསྶ ཙ ཝིམཱནསྶ པབྷཱ སམནྟཏོ པཉྩཝཱིསཏི ཡོཛནཱནི ཕརིཏྭཱ ཏིཊྛཏི། ཏེནཱཧ ‘‘སཱདྷིཀཝཱིསཏིཡོཛནཱནི ཨཱབྷཱ’’ཏི། རཏྟིམཔི ཡཐཱ དིཝཾ ཀརོཏཱིཏི ཨཏྟནོ པབྷཱཡ ཨནྡྷཀཱརཾ ཝིདྷམནྟཾ རཏྟིབྷཱགམྤི དིཝསབྷཱགཾ ཝིཡ ཀརོཏི། པརིསམནྟཏོ ཨནྟོ ཙེཝ བཧི ཙ སུདྡྷཏཱཡ པརིསུདྡྷཾ། སབྦསོ མལཱབྷཱཝེན ཝིམལཾ། སུནྡརཏཱཡ སུབྷཾ།
890.Chindatīti vicchindati, pavattituṃ adento paṭihanatīti attho. Raṃsīti rasmiyo. Pabhaṅkarassāti sūriyassa. Tassa ca vimānassa pabhā samantato pañcavīsati yojanāni pharitvā tiṭṭhati. Tenāha ‘‘sādhikavīsatiyojanāni ābhā’’ti. Rattimapi yathā divaṃ karotīti attano pabhāya andhakāraṃ vidhamantaṃ rattibhāgampi divasabhāgaṃ viya karoti. Parisamantato anto ceva bahi ca suddhatāya parisuddhaṃ. Sabbaso malābhāvena vimalaṃ. Sundaratāya subhaṃ.
༨༩༡. བཧུཔདུམཝིཙིཏྲཔུཎྜརཱིཀནྟི བཧུཝིདྷརཏྟཀམལཉྩེཝ ཝིཙིཏྟཝཎྞསེཏཀམལཉྩ། སེཏཀམལཾ པདུམཾ, རཏྟཀམལཾ པུཎྜརཱིཀནྟི ཝདནྟི། ཝོཀིཎྞཾ ཀུསུམེཧཱིཏི ཨཉྙེཧི ཙ ནཱནཱཝིདྷེཧི པུཔྥེཧི སམོཀིཎྞཾ། ནེཀཙིཏྟནྟི མཱལཱཀམྨལཏཱཀམྨཱདིནཱནཱཝིདྷཝིཙིཏྟཾ། ཨརཛཝིརཛཧེམཛཱལཚནྣནྟི སཡཾ ཨཔགཏརཛཾ ཝིརཛེན ནིདྡོསེན ཀཉྩནཛཱལེན ཚཱདིཏཾ།
891.Bahupadumavicitrapuṇḍarīkanti bahuvidharattakamalañceva vicittavaṇṇasetakamalañca. Setakamalaṃ padumaṃ, rattakamalaṃ puṇḍarīkanti vadanti. Vokiṇṇaṃ kusumehīti aññehi ca nānāvidhehi pupphehi samokiṇṇaṃ. Nekacittanti mālākammalatākammādinānāvidhavicittaṃ. Arajavirajahemajālachannanti sayaṃ apagatarajaṃ virajena niddosena kañcanajālena chāditaṃ.
༨༩༢. རཏྟམྦརཔཱིཏཝཱསསཱཧཱིཏི རཏྟཝཏྠཱཧི ཙེཝ པཱིཏཝཏྠཱཧི ཙ། ཨེཀཱ ཧི རཏྟཾ དིབྦཝཏྠཾ ནིཝཱསེཏྭཱ པཱིཏཾ ཨུཏྟརིཡཾ ཀརོཏི, ཨཔརཱ པཱིཏཾ ནིཝཱསེཏྭཱ རཏྟཾ ཨུཏྟརིཡཾ ཀརོཏི། ཏཾ སནྡྷཱཡ ཝུཏྟཾ ‘‘རཏྟམྦརཔཱིཏཝཱསསཱཧཱི’’ཏི ། ཨགརུཔིཡངྒུཙནྡནུསྶདཱཧཱིཏི ཨགརུགནྡྷེན པིཡངྒུམཱལཱཧི ཙནྡནགནྡྷེཧི ཙ ཨུསྶདཱཧི, ཨུསྶནྣདིབྦཱགརུགནྡྷཱདིཀཱཧཱིཏི ཨཏྠོ། ཀཉྩནཏནུསནྣིབྷཏྟཙཱཧཱིཏི ཀནཀསདིསསུཁུམཙྪཝཱིཧི། པརིཔཱུརནྟི ཏཧཾ ཏཧཾ ཝིཙརནྟཱིཧི སངྒཱིཏིཔསུཏཱཧི ཙ པརིཔུཎྞཾ།
892.Rattambarapītavāsasāhīti rattavatthāhi ceva pītavatthāhi ca. Ekā hi rattaṃ dibbavatthaṃ nivāsetvā pītaṃ uttariyaṃ karoti, aparā pītaṃ nivāsetvā rattaṃ uttariyaṃ karoti. Taṃ sandhāya vuttaṃ ‘‘rattambarapītavāsasāhī’’ti . Agarupiyaṅgucandanussadāhīti agarugandhena piyaṅgumālāhi candanagandhehi ca ussadāhi, ussannadibbāgarugandhādikāhīti attho. Kañcanatanusannibhattacāhīti kanakasadisasukhumacchavīhi. Paripūranti tahaṃ tahaṃ vicarantīhi saṅgītipasutāhi ca paripuṇṇaṃ.
༨༩༣. བཧུཀེཏྠཱཏི བཧུཀཱ ཨེཏྠ། ཨནེཀཝཎྞཱཏི ནཱནཱརཱུཔཱ། ཀུསམཝིབྷཱུསིཏཱབྷརཎཱཏི ཝིསེསཏོ སུརབྷིཝཱཡནཏྠཾ དིབྦཀུསུམེཧི ཨལངྐཏདིབྦཱབྷརཎཱ། ཨེཏྠཱཏི ཨེཏསྨིཾ ཝིམཱནེ། སུམནཱཏི སུནྡརམནཱ པམུདིཏཙིཏྟཱ། ཨནིལཔམུཉྩིཏཱ པཝནྟི སུརབྷིནྟི ཨནིལེན པམུཉྩིཏགནྡྷཱནཾ པུཔྥཱནཾ ཝཱཡུནཱ ཝིམུཏྟཔཏྟཔུཊཾ ཝིཡ ཝིབནྡྷཏཱཡ ཝིཀསིཏཏཱཡ ཙ སུགནྡྷཾ པཝཱཡནྟི། ‘‘ཨནིལཔདྷཱུཔིཏཱ’’ཏིཔི པཋནྟི, ཝཱཏེན མནྡཾ ཨཱཝུཡ྄ཧམཱནཱ ཧེམམཡཔུཔྥཱཏི ཨཏྠོ། ཀནཀཙཱིརཀཱདཱིཧི ཝེཎིཨཱདཱིསུ ཨོཏཏཏཱཡ ཏཔནིཡཝིཏཏཱ། ཡེབྷུཡྻེན ཀཉྩནཱབྷརཎེཧི ཨཙྪཱདིཏསརཱིརཏཱཡ སུཝཎྞཚནྣཱ། ནརནཱརིཡོཏི དེཝཔུཏྟཱ དེཝདྷཱིཏརོ ཙ བཧུཀཱ ཨེཏྠ ཏཝ ཝིམཱནེཏི དསྶེཏི།
893.Bahuketthāti bahukā ettha. Anekavaṇṇāti nānārūpā. Kusamavibhūsitābharaṇāti visesato surabhivāyanatthaṃ dibbakusumehi alaṅkatadibbābharaṇā. Etthāti etasmiṃ vimāne. Sumanāti sundaramanā pamuditacittā. Anilapamuñcitā pavanti surabhinti anilena pamuñcitagandhānaṃ pupphānaṃ vāyunā vimuttapattapuṭaṃ viya vibandhatāya vikasitatāya ca sugandhaṃ pavāyanti. ‘‘Anilapadhūpitā’’tipi paṭhanti, vātena mandaṃ āvuyhamānā hemamayapupphāti attho. Kanakacīrakādīhi veṇiādīsu otatatāya tapaniyavitatā. Yebhuyyena kañcanābharaṇehi acchāditasarīratāya suvaṇṇachannā. Naranāriyoti devaputtā devadhītaro ca bahukā ettha tava vimāneti dasseti.
༨༩༤. ཨིངྒྷཱཏི ཙོདནཏྠེ ནིཔཱཏོ པུཊྛོཏི པུཙྪིཏོ ཨིམསྶ མཧཱཛནསྶ ཀམྨཕལཔཙྩཀྑབྷཱཝཱཡཱཏི ཨདྷིཔྤཱཡོ།
894.Iṅghāti codanatthe nipāto puṭṭhoti pucchito imassa mahājanassa kammaphalapaccakkhabhāvāyāti adhippāyo.
ཏཏོ དེཝཔུཏྟོ ཨིམཱཧི གཱཐཱཧི བྱཱཀཱསི –
Tato devaputto imāhi gāthāhi byākāsi –
༨༩༥.
895.
‘‘སཡམིདྷ པཐེ སམེཙྩ མཱཎཝེན, སཏྠཱནུསཱསི ཨནུཀམྤམཱནོ།
‘‘Sayamidha pathe samecca māṇavena, satthānusāsi anukampamāno;
ཏཝ རཏནཝརསྶ དྷམྨཾ སུཏྭཱ, ཀརིསྶཱམཱིཏི ཙ བྲཝིཏྠ ཚཏྟོ༎
Tava ratanavarassa dhammaṃ sutvā, karissāmīti ca bravittha chatto.
༨༩༦.
896.
‘‘ཛིནཝརཔཝརཾ ཨུཔེཧི སརཎཾ, དྷམྨཉྩཱཔི ཏཐེཝ བྷིཀྑུསངྒྷཾ།
‘‘Jinavarapavaraṃ upehi saraṇaṃ, dhammañcāpi tatheva bhikkhusaṅghaṃ;
ནོཏི པཋམཾ ཨཝོཙཧཾ བྷནྟེ, པཙྪཱ ཏེ ཝཙནཾ ཏཐེཝཀཱསིཾ༎
Noti paṭhamaṃ avocahaṃ bhante, pacchā te vacanaṃ tathevakāsiṃ.
༨༩༧.
897.
‘‘མཱ ཙ པཱཎཝདྷཾ ཝིཝིདྷཾ ཙརསྶུ ཨསུཙིཾ,
‘‘Mā ca pāṇavadhaṃ vividhaṃ carassu asuciṃ,
ན ཧི པཱཎེསུ ཨསཉྙཏཾ ཨཝཎྞཡིཾསུ སཔྤཉྙཱ།
Na hi pāṇesu asaññataṃ avaṇṇayiṃsu sappaññā;
ནོཏི པཋམཾ ཨཝོཙཧཾ བྷནྟེ, པཙྪཱ ཏེ ཝཙནཾ ཏཐེཝཀཱསིཾ༎
Noti paṭhamaṃ avocahaṃ bhante, pacchā te vacanaṃ tathevakāsiṃ.
༨༩༨.
898.
‘‘མཱ ཙ པརཛནསྶ རཀྑིཏམྤི, ཨཱདཱཏབྦམམཉྙིཐོ ཨདིནྣཾ།
‘‘Mā ca parajanassa rakkhitampi, ādātabbamamaññitho adinnaṃ;
ནོཏི པཋམཾ ཨཝོཙཧཾ བྷནྟེ, པཙྪཱ ཏེ ཝཙནཾ ཏཐེཝཀཱསིཾ༎
Noti paṭhamaṃ avocahaṃ bhante, pacchā te vacanaṃ tathevakāsiṃ.
༨༩༩.
899.
‘‘མཱ ཙ པརཛནསྶ རཀྑིཏཱཡོ, པརབྷརིཡཱ ཨགམཱ ཨནརིཡམེཏཾ།
‘‘Mā ca parajanassa rakkhitāyo, parabhariyā agamā anariyametaṃ;
ནོཏི པཋམཾ ཨཝོཙཧཾ བྷནྟེ, པཙྪཱ ཏེ ཝཙནཾ ཏཐེཝཀཱསིཾ༎
Noti paṭhamaṃ avocahaṃ bhante, pacchā te vacanaṃ tathevakāsiṃ.
༩༠༠.
900.
‘‘མཱ ཙ ཝིཏཐཾ ཨཉྙཐཱ ཨབྷཱཎི, ན ཧི མུསཱཝཱདཾ ཨཝཎྞཡིཾསུ སཔྤཉྙཱ།
‘‘Mā ca vitathaṃ aññathā abhāṇi, na hi musāvādaṃ avaṇṇayiṃsu sappaññā;
ནོཏི པཋམཾ ཨཝོཙཧཾ བྷནྟེ, པཙྪཱ ཏེ ཝཙནཾ ཏཐེཝཀཱསིཾ༎
Noti paṭhamaṃ avocahaṃ bhante, pacchā te vacanaṃ tathevakāsiṃ.
༩༠༡.
901.
‘‘ཡེན ཙ པུརིསསྶ ཨཔེཏི སཉྙཱ, ཏཾ མཛྫཾ པརིཝཛྫཡསྶུ སབྦཾ།
‘‘Yena ca purisassa apeti saññā, taṃ majjaṃ parivajjayassu sabbaṃ;
ནོཏི པཋམཾ ཨཝོཙཧཾ བྷནྟེ, པཙྪཱ ཏེ ཝཙནཾ ཏཐེཝཀཱསིཾ༎
Noti paṭhamaṃ avocahaṃ bhante, pacchā te vacanaṃ tathevakāsiṃ.
༩༠༢.
902.
‘‘སྭཱཧཾ ཨིདྷ པཉྩ སིཀྑཱ ཀརིཏྭཱ, པཊིཔཛྫིཏྭཱ ཏཐཱགཏསྶ དྷམྨེ།
‘‘Svāhaṃ idha pañca sikkhā karitvā, paṭipajjitvā tathāgatassa dhamme;
དྭེཔཐམགམཱསིཾ ཙོརམཛ྄ཛྷེ, ཏེ མཾ ཏཏྠ ཝདྷིཾསུ བྷོགཧེཏུ༎
Dvepathamagamāsiṃ coramajjhe, te maṃ tattha vadhiṃsu bhogahetu.
༩༠༣.
903.
‘‘ཨེཏྟཀམིདཾ ཨནུསྶརཱམི ཀུསལཾ, ཏཏོ པརཾ ན མེ ཝིཛྫཏི ཨཉྙཾ།
‘‘Ettakamidaṃ anussarāmi kusalaṃ, tato paraṃ na me vijjati aññaṃ;
ཏེན སུཙརིཏེན ཀམྨུནཱཧཾ, ཨུཔྤནྣོ ཏིདིཝེསུ ཀཱམཀཱམཱི༎
Tena sucaritena kammunāhaṃ, uppanno tidivesu kāmakāmī.
༩༠༤.
904.
‘‘པསྶ ཁཎམུཧུཏྟསཉྙམསྶ, ཨནུདྷམྨཔྤཊིཔཏྟིཡཱ ཝིཔཱཀཾ།
‘‘Passa khaṇamuhuttasaññamassa, anudhammappaṭipattiyā vipākaṃ;
ཛལམིཝ ཡསསཱ སམེཀྑམཱནཱ, བཧུཀཱམཾ པིཧཡནྟི ཧཱིནཀམྨཱ༎
Jalamiva yasasā samekkhamānā, bahukāmaṃ pihayanti hīnakammā.
༩༠༥.
905.
‘‘པསྶ ཀཏིཔཡཱཡ དེསནཱཡ, སུགཏིཉྩམྷི གཏོ སུཁཉྩ པཏྟོ།
‘‘Passa katipayāya desanāya, sugatiñcamhi gato sukhañca patto;
ཡེ ཙ ཏེ སཏཏཾ སུཎནྟི དྷམྨཾ, མཉྙེ ཏེ ཨམཏཾ ཕུསནྟི ཁེམཾ༎
Ye ca te satataṃ suṇanti dhammaṃ, maññe te amataṃ phusanti khemaṃ.
༩༠༦.
906.
‘‘ཨཔྤམྤི ཀཏཾ མཧཱཝིཔཱཀཾ, ཝིཔུལཾ ཧོཏི ཏཐཱགཏསྶ དྷམྨེ།
‘‘Appampi kataṃ mahāvipākaṃ, vipulaṃ hoti tathāgatassa dhamme;
པསྶ ཀཏཔུཉྙཏཱཡ ཚཏྟོ, ཨོབྷཱསེཏི པཐཝིཾ ཡཐཱཔི སཱུརིཡོ༎
Passa katapuññatāya chatto, obhāseti pathaviṃ yathāpi sūriyo.
༩༠༧.
907.
‘‘ཀིམིདཾ ཀུསལཾ ཀིམཱཙརེམ, ཨིཙྩེཀེ ཧི སམེཙྩ མནྟཡནྟི།
‘‘Kimidaṃ kusalaṃ kimācarema, icceke hi samecca mantayanti;
ཏེ མཡཾ པུནརེཝ ལདྡྷ མཱནུསཏྟཾ, པཊིཔནྣཱ ཝིཧརེམུ སཱིལཝནྟོ༎
Te mayaṃ punareva laddha mānusattaṃ, paṭipannā viharemu sīlavanto.
༩༠༨.
908.
‘‘བཧུཀཱརོ ཨནུཀམྤཀོ ཙ སཏྠཱ, ཨིཏི མེ སཏི ཨགམཱ དིཝཱ དིཝསྶ།
‘‘Bahukāro anukampako ca satthā, iti me sati agamā divā divassa;
སྭཱཧཾ ཨུཔགཏོམྷི སཙྩནཱམཾ, ཨནུཀམྤསྶུ པུནཔི སུཎེམྷ དྷམྨཾ༎
Svāhaṃ upagatomhi saccanāmaṃ, anukampassu punapi suṇemha dhammaṃ.
༩༠༩.
909.
‘‘ཡེ ཙིདྷ པཛཧནྟི ཀཱམརཱགཾ, བྷཝརཱགཱནུསཡཉྩ པཧཱཡ མོཧཾ།
‘‘Ye cidha pajahanti kāmarāgaṃ, bhavarāgānusayañca pahāya mohaṃ;
ན ཙ ཏེ པུན མུཔེནྟི གབྦྷསེཡྻཾ, པརིནིབྦཱནགཏཱ ཧི སཱིཏིབྷཱུཏཱ’’ཏི༎
Na ca te puna mupenti gabbhaseyyaṃ, parinibbānagatā hi sītibhūtā’’ti.
༨༩༥. ཏཏྠ སཡམིདྷ པཐེ སམེཙྩ མཱཎཝེནཱཏི ཨིདྷ ཨིམསྨིཾ པཐེ མཧཱམགྒེ སཡམེཝ ཨུཔགཏེན མཱཎཝེན བྲཱཧྨཎཀུམཱརེན སམེཙྩ སམཱགནྟྭཱ། དིཊྛདྷམྨིཀསམྤརཱཡིཀཔརམཏྠེཧི སཏྟཱནཾ ཡཐཱརཧམནུསཱསནཏོ སཏྠཱ བྷགཝཱ, ཏྭཾ ཡཾ མཱཎཝཾ ཡཐཱདྷམྨཾ ཨནུསཱསི ཨནུཀམྤམཱནོ ཨནུགྒཎྷནྟོ, ཏཝ རཏནཝརསྶ ཨགྒརཏནསྶ སམྨཱསམྦུདྡྷསྶ, ཏཾ དྷམྨཾ སུཏྭཱ ཨིཏི ཨེཝཾ ཀརིསྶཱམི ཡཐཱནུསིཊྛཾ པཊིཔཛྫིསྶཱམཱིཏི, སོ ཚཏྟོ ཚཏྟནཱམཀོ མཱཎཝོ བྲཝིཏྠ ཀཐེསཱིཏི པདཡོཛནཱ།
895. Tattha sayamidha pathe samecca māṇavenāti idha imasmiṃ pathe mahāmagge sayameva upagatena māṇavena brāhmaṇakumārena samecca samāgantvā. Diṭṭhadhammikasamparāyikaparamatthehi sattānaṃ yathārahamanusāsanato satthā bhagavā, tvaṃ yaṃ māṇavaṃ yathādhammaṃ anusāsi anukampamāno anuggaṇhanto, tava ratanavarassa aggaratanassa sammāsambuddhassa, taṃ dhammaṃ sutvā iti evaṃ karissāmi yathānusiṭṭhaṃ paṭipajjissāmīti, so chatto chattanāmako māṇavo bravittha kathesīti padayojanā.
༨༩༦. ཨེཝཾ ཡཐཱཔུཙྪིཏཾ ཀམྨཾ ཀཱརཎཏོ དསྶེཏྭཱ ཨིདཱནི ཏཾ སརཱུཔཏོ ཝིབྷཱགཏོ ཙ དསྶེནྟོ སཏྠཱརཱ སམཱདཔིཏབྷཱཝཾ ཨཏྟནཱ ཙ ཏཏྠ པཙྪཱ པཏིཊྛིཏབྷཱཝཾ དསྶེཏུཾ ‘‘ཛིནཝརཔཝར’’ནྟིཨཱདིམཱཧ། ཏཏྠ ནོཏི པཋམཾ ཨཝོཙཧཾ བྷནྟེཏི བྷནྟེ བྷགཝཱ ‘‘སརཎགམནཾ ཛཱནཱསཱི’’ཏི ཏཡཱ ཝུཏྟོ ‘‘ནོ’’ཏི ན ‘‘ཛཱནཱམཱི’’ཏི པཋམཾ ཨཝོཙཾ ཨཧཾ། པཙྪཱ ཏེ ཝཙནཾ ཏཐེཝཀཱསིནྟི པཙྪཱ ཏཡཱ ཝུཏྟཾ ཀཐཾ པརིཝཏྟེནྟོ ཏཝ ཝཙནཾ ཏཐེཝ ཨཀཱསིཾ པཊིཔཛྫིཾ, ཏཱིཎིཔི སརཎཱནི ཨུཔགཙྪིནྟི ཨཏྠོ།
896. Evaṃ yathāpucchitaṃ kammaṃ kāraṇato dassetvā idāni taṃ sarūpato vibhāgato ca dassento satthārā samādapitabhāvaṃ attanā ca tattha pacchā patiṭṭhitabhāvaṃ dassetuṃ ‘‘jinavarapavara’’ntiādimāha. Tattha noti paṭhamaṃ avocahaṃ bhanteti bhante bhagavā ‘‘saraṇagamanaṃ jānāsī’’ti tayā vutto ‘‘no’’ti na ‘‘jānāmī’’ti paṭhamaṃ avocaṃ ahaṃ. Pacchā te vacanaṃ tathevakāsinti pacchā tayā vuttaṃ kathaṃ parivattento tava vacanaṃ tatheva akāsiṃ paṭipajjiṃ, tīṇipi saraṇāni upagacchinti attho.
༨༩༧. ཝིཝིདྷནྟི ཨུཙྩཱཝཙཾ, ཨཔྤསཱཝཛྫཾ མཧཱསཱཝཛྫཉྩཱཏི ཨཏྠོ། མཱ ཙརསྶཱུཏི མཱ ཨཀཱསི། ཨསུཙིནྟི ཀིལེསཱསུཙིམིསྶཏཱཡ ན སུཙིཾ། པཱཎེསུ ཨསཉྙཏནྟི པཱཎགྷཱཏཏོ ཨཝིརཏཾ། ན ཧི ཨཝཎྞཡིཾསཱུཏི ན ཧི ཝཎྞཡནྟི། པཙྩཱུཔྤནྣཀཱལཏྠེ ཧི ཨིདཾ ཨཏཱིཏཀཱལཝཙནཾ། ཨཐ ཝཱ ‘‘ཨཝཎྞཡིཾསཱུ’’ཏི ཨེཀདེསེན སཀལསྶ ཀཱལསྶ ཨུཔལཀྑཎཾ, ཏསྨཱ ཡཐཱ ན ཝཎྞཡིཾསུ ཨཏཱིཏམདྡྷཱནཾ, ཨེཝཾ ཨེཏརཧིཔི ན ཝཎྞཡནྟི, ཨནཱགཏེཔི ན ཝཎྞཡིསྶནྟཱིཏི ཝུཏྟཾ ཧོཏི།
897.Vividhanti uccāvacaṃ, appasāvajjaṃ mahāsāvajjañcāti attho. Mā carassūti mā akāsi. Asucinti kilesāsucimissatāya na suciṃ. Pāṇesu asaññatanti pāṇaghātato avirataṃ. Na hi avaṇṇayiṃsūti na hi vaṇṇayanti. Paccūppannakālatthe hi idaṃ atītakālavacanaṃ. Atha vā ‘‘avaṇṇayiṃsū’’ti ekadesena sakalassa kālassa upalakkhaṇaṃ, tasmā yathā na vaṇṇayiṃsu atītamaddhānaṃ, evaṃ etarahipi na vaṇṇayanti, anāgatepi na vaṇṇayissantīti vuttaṃ hoti.
༨༩༨-༩༠༠. པརཛནསྶ རཀྑིཏནྟི པརཔརིགྒཧིཏཝཏྠུ། ཏེནཱཧ ‘‘ཨདིནྣ’’ནྟི། མཱ ཨགམཱཏི མཱ ཨཛ྄ཛྷཱཙརི། ཝིཏཐནྟི ཨཏཐཾ, མུསཱཏི ཨཏྠོ། ཨཉྙཐཱཏི ཨཉྙཐཱཝ, ཝིཏཐསཉྙཱི ཨེཝཾ ཝིཏཐནྟི ཛཱནནྟོ ཨེཝཾ མཱ བྷཎཱིཏི ཨཏྠོ།
898-900.Parajanassa rakkhitanti parapariggahitavatthu. Tenāha ‘‘adinna’’nti. Mā agamāti mā ajjhācari. Vitathanti atathaṃ, musāti attho. Aññathāti aññathāva, vitathasaññī evaṃ vitathanti jānanto evaṃ mā bhaṇīti attho.
༩༠༡. ཡེནཱཏི ཡེན མཛྫེན, པཱིཏེནཱཏི ཨདྷིཔྤཱཡོ། ཨཔེཏཱིཏི ཝིགཙྪཏི། སཉྙཱཏི དྷམྨསཉྙཱ, ལོཀསཉྙཱ ཨེཝ ཝཱ། སབྦནྟི ཨནཝསེསཾ, བཱིཛཏོ པཊྛཱཡཱཏི ཨཏྠོ།
901.Yenāti yena majjena, pītenāti adhippāyo. Apetīti vigacchati. Saññāti dhammasaññā, lokasaññā eva vā. Sabbanti anavasesaṃ, bījato paṭṭhāyāti attho.
༩༠༢. སྭཱཧནྟི སོ ཏདཱ ཚཏྟམཱཎཝབྷཱུཏོ ཨཧཾ། ཨིདྷ ཨིམསྨིཾ མགྒཔདེསེ, ཨིམསྨིཾ ཝཱ ཏཝ སཱསནེ། ཏེནཱཧ ‘‘ཏཐཱགཏསྶ དྷམྨེ’’ཏི། པཉྩ སིཀྑཱཏི པཉྩ སཱིལཱནི། ཀརིཏྭཱཏི ཨཱདིཡིཏྭཱ, ཨདྷིཊྛཱཡཱཏི ཨཏྠོ། དྭེཔཐནྟི དྭིནྣཾ གཱམསཱིམཱནཾ ཝེམཛ྄ཛྷབྷཱུཏཾ པཐཾ, སཱིམནྟརིཀཔཐནྟི ཨཏྠོ། ཏེཏི ཏེ ཙོརཱ། ཏཏྠཱཏི སཱིམནྟརིཀམགྒེ། བྷོགཧེཏཱུཏི ཨཱམིསཀིཉྩིཀྑནིམིཏྟཾ།
902.Svāhanti so tadā chattamāṇavabhūto ahaṃ. Idha imasmiṃ maggapadese, imasmiṃ vā tava sāsane. Tenāha ‘‘tathāgatassa dhamme’’ti. Pañca sikkhāti pañca sīlāni. Karitvāti ādiyitvā, adhiṭṭhāyāti attho. Dvepathanti dvinnaṃ gāmasīmānaṃ vemajjhabhūtaṃ pathaṃ, sīmantarikapathanti attho. Teti te corā. Tatthāti sīmantarikamagge. Bhogahetūti āmisakiñcikkhanimittaṃ.
༩༠༣. ཏཏོཏི ཡཐཱཝུཏྟཀུསལཏོ པརཾ ཨུཔརི ཨཉྙཾ ཀུསལཾ ན ཝིཛྫཏི ན ཨུཔལབྦྷཏི, ཡམཧཾ ཨནུསྶརེཡྻནྟི ཨཏྠོ། ཀཱམཀཱམཱིཏི ཡཐིཙྪིཏཀཱམགུཎསམངྒཱི།
903.Tatoti yathāvuttakusalato paraṃ upari aññaṃ kusalaṃ na vijjati na upalabbhati, yamahaṃ anussareyyanti attho. Kāmakāmīti yathicchitakāmaguṇasamaṅgī.
༩༠༤. ཁཎམུཧུཏྟསཉྙམསྶཱཏི ཁཎམུཧུཏྟམཏྟཾ པཝཏྟསཱིལསྶ། ཨནུདྷམྨཔྤཊིཔཏྟིཡཱཏི ཡཐཱདྷིགཏསྶ ཕལསྶ ཨནུརཱུཔདྷམྨཾ པཊིཔཛྫམཱནསྶ བྷགཝཱ པསྶ, ཏུཡ྄ཧཾ ཨོཝཱདདྷམྨསྶ ཝཱ ཨནུརཱུཔཱཡ དྷམྨཔཊིཔཏྟིཡཱ ཝུཏྟནིཡཱམེནེཝ སརཎགམནསྶ སཱིལསམཱདཱནསྶ ཙཱཏི ཨཏྠོ། ཛལམིཝ ཡསསཱཏི ཨིདྡྷིཡཱ པརིཝཱརསམྤཏྟིཡཱ ཙ ཛལནྟཾ ཝིཡ། སམེཀྑམཱནཱཏི པསྶནྟཱ། བཧུཀཱཏི བཧཝོ། པིཧཡནྟཱིཏི ‘‘ཀཐཾ ནུ ཁོ མཡཾ ཨེདིསཱ བྷཝེཡྻཱམཱ’’ཏི པཏྠེནྟི། ཧཱིནཀམྨཱཏི མམ སམྤཏྟིཏོ ནིཧཱིནབྷོགཱ།
904.Khaṇamuhuttasaññamassāti khaṇamuhuttamattaṃ pavattasīlassa. Anudhammappaṭipattiyāti yathādhigatassa phalassa anurūpadhammaṃ paṭipajjamānassa bhagavā passa, tuyhaṃ ovādadhammassa vā anurūpāya dhammapaṭipattiyā vuttaniyāmeneva saraṇagamanassa sīlasamādānassa cāti attho. Jalamiva yasasāti iddhiyā parivārasampattiyā ca jalantaṃ viya. Samekkhamānāti passantā. Bahukāti bahavo. Pihayantīti ‘‘kathaṃ nu kho mayaṃ edisā bhaveyyāmā’’ti patthenti. Hīnakammāti mama sampattito nihīnabhogā.
༩༠༥. ཀཏིཔཡཱཡཱཏི ཨཔྤིཀཱཡ། ཡེཏི ཡེ བྷིཀྑཱུ ཙེཝ ཨུཔཱསཀཱདཡོ ཙ། ཙ-སདྡོ བྱཏིརེཀེ། ཏེཏི ཏཝ། སཏཏནྟི དིཝསེ དིཝསེ།
905.Katipayāyāti appikāya. Yeti ye bhikkhū ceva upāsakādayo ca. Ca-saddo byatireke. Teti tava. Satatanti divase divase.
༩༠༦. ཝིཔུལནྟི ཨུལཱ༹རཕལཾ ཝིཔུལཱནུབྷཱཝཾ། ཏཐཱགཏསྶ དྷམྨེཏི ཏཐཱགཏསྶ སཱསནེ ཨོཝཱདེ ཋཏྭཱ ཀཏནྟི ཡོཛནཱ། ཨེཝཾ ཨནུདྡེསིཀཝསེན ཝུཏྟམེཝཏྠཾ ཨཏྟུདྡེསིཀཝསེན དསྶེནྟོ ‘‘པསྶཱ’’ཏིཨཱདིམཱཧ། ཏཏྠ པསྶཱཏི བྷགཝནྟཾ ཝདཏི, ཨཏྟཱནམེཝ ཝཱ ཨཉྙཾ ཝིཡ ཙ ཀཏྭཱ ཝདཏི།
906.Vipulanti uḷāraphalaṃ vipulānubhāvaṃ. Tathāgatassa dhammeti tathāgatassa sāsane ovāde ṭhatvā katanti yojanā. Evaṃ anuddesikavasena vuttamevatthaṃ attuddesikavasena dassento ‘‘passā’’tiādimāha. Tattha passāti bhagavantaṃ vadati, attānameva vā aññaṃ viya ca katvā vadati.
༩༠༧. ཀིམིདཾ ཀུསལཾ ཀིམཱཙརེམཱཏི ཀུསལཾ ནཱམེཏཾ ཀིཾསབྷཱཝཾ ཀཱིདིསཾ, ཀཐཾ ཝཱ ཏཾ ཨཱཙརེཡྻཱམ། ཨིཙྩེཀེ ཧི སམེཙྩ མནྟཡནྟཱིཏི ཨེཝམེཀེ སམེཙྩ སམཱགནྟྭཱ པཐཝིཾ པརིཝཏྟེནྟཱ ཝིཡ སིནེརུཾ ཨུཀྑིཔནྟཱ ཝིཡ ཙ སུདུཀྐརཾ ཀཏྭཱ མནྟཡནྟི ཝིཙཱརེནྟི, མཡཾ པན ཨཀིཙྪེནེཝ པུནཔི ཀུསལཾ ཨཱཙརེཡྻཱམཱཏི ཨདྷིཔྤཱཡོ། ཏེནེཝཱཧ ‘‘མཡ’’ནྟིཨཱདི།
907.Kimidaṃkusalaṃ kimācaremāti kusalaṃ nāmetaṃ kiṃsabhāvaṃ kīdisaṃ, kathaṃ vā taṃ ācareyyāma. Icceke hi samecca mantayantīti evameke samecca samāgantvā pathaviṃ parivattentā viya sineruṃ ukkhipantā viya ca sudukkaraṃ katvā mantayanti vicārenti, mayaṃ pana akiccheneva punapi kusalaṃ ācareyyāmāti adhippāyo. Tenevāha ‘‘maya’’ntiādi.
༩༠༨. བཧུཀཱརོཏི བཧཱུཔཀཱརོ, མཧཱཨུཔཀཱརོ ཝཱ། ཨནུཀམྤཀོཏི ཀཱརུཎིཀོ། མ-ཀཱརོ པདསནྡྷིཀརོ། ཨིཏཱིཏི ཨེཝཾ, བྷགཝཏོ ཨཏྟནི པཊིཔནྣཱཀཱརཾ སནྡྷཱཡ ཝདཏི། མེ སཏཱིཏི མཡི སཏི ཝིཛྫམཱནེ, ཙོརེཧི ཨཝདྷིཏེ ཨེཝཱཏི ཨཏྠོ། དིཝཱ དིཝསྶཱཏི དིཝསསྶཔི དིཝཱ, ཀཱལསྶེཝཱཏི ཨཏྠོ། སྭཱཧནྟི སོ ཚཏྟམཱཎཝབྷཱུཏོ ཨཧཾ། སཙྩནཱམནྟི ‘‘བྷགཝཱ ཨརཧཾ སམྨཱསམྦུདྡྷོ’’ཏིཨཱདིནཱམེཧི ཨཝིཏཐནཱམཾ བྷཱུཏཏྠནཱམཾ། ཨནུཀམྤསྶཱུཏི ཨནུགྒཎྷཱཧི། པུནཔཱིཏི བྷིཡྻོཔི སུཎེམུ, ཏཝ དྷམྨཾ སུཎེཡྻཱམཡེཝཱཏི ཨཏྠོ།
908.Bahukāroti bahūpakāro, mahāupakāro vā. Anukampakoti kāruṇiko. Ma-kāro padasandhikaro. Itīti evaṃ, bhagavato attani paṭipannākāraṃ sandhāya vadati. Me satīti mayi sati vijjamāne, corehi avadhite evāti attho. Divā divassāti divasassapi divā, kālassevāti attho. Svāhanti so chattamāṇavabhūto ahaṃ. Saccanāmanti ‘‘bhagavā arahaṃ sammāsambuddho’’tiādināmehi avitathanāmaṃ bhūtatthanāmaṃ. Anukampassūti anuggaṇhāhi. Punapīti bhiyyopi suṇemu, tava dhammaṃ suṇeyyāmayevāti attho.
ཨེཝཾ དེཝཔུཏྟོ སབྦམེཏཾ ཀཏཉྙུཏཱབྷཱཝེ ཋཏྭཱ སཏྠུ པཡིརུཔཱསནེ ཙ དྷམྨསྶཝནེ ཙ ཨཏིཏྟིམེཝ དཱིཔེནྟོ ཝདཏི། བྷགཝཱ དེཝཔུཏྟསྶ ཙ ཏཏྠ སནྣིཔཏིཏཔརིསཱཡ ཙ ཨཛ྄ཛྷཱསཡཾ ཨོལོཀེཏྭཱ ཨནུཔུབྦིཀཐཾ ཀཐེསི། ཨཐ ནེསཾ ཨལླཙིཏྟཏཾ ཉཏྭཱ སཱམུཀྐཾསིཀཾ དྷམྨདེསནཾ པཀཱསེསི། དེསནཱཔརིཡོསཱནེ དེཝཔུཏྟོ ཙེཝ མཱཏཱཔིཏརོ ཙསྶ སོཏཱཔཏྟིཕལེ པཏིཊྛཧིཾསུ, མཧཏོ ཙ ཛནཀཱཡསྶ དྷམྨཱབྷིསམཡོ ཨཧོསི།
Evaṃ devaputto sabbametaṃ kataññutābhāve ṭhatvā satthu payirupāsane ca dhammassavane ca atittimeva dīpento vadati. Bhagavā devaputtassa ca tattha sannipatitaparisāya ca ajjhāsayaṃ oloketvā anupubbikathaṃ kathesi. Atha nesaṃ allacittataṃ ñatvā sāmukkaṃsikaṃ dhammadesanaṃ pakāsesi. Desanāpariyosāne devaputto ceva mātāpitaro cassa sotāpattiphale patiṭṭhahiṃsu, mahato ca janakāyassa dhammābhisamayo ahosi.
༩༠༩. པཋམཕལེ པཏིཊྛིཏོ དེཝཔུཏྟོ ཨུཔརིམགྒེསུ ཨཏྟནོ གརུཙིཏྟཱིཀཱརཾ, ཏདདྷིགམསྶ ཙ མཧཱནིསཾསཏཾ ཝིབྷཱཝེནྟོ ‘‘ཡེ ཙིདྷ པཛཧནྟི ཀཱམརཱག’’ནྟི པརིཡོསཱནགཱཐམཱཧ། ཏསྶཏྠོ – ཡེ ཨིདྷ ཨིམསྨིཾ སཱསནེ ཋིཏཱ པཛཧནྟི ཨནཝསེསཏོ སམུཙྪིནྡནྟི ཀཱམརཱགཾ, ན ཙ ཏེ པུན ཨུཔེནྟི གབྦྷསེཡྻཾ ཨོརམྦྷཱགིཡཱནཾ སཾཡོཛནཱནཾ སམུཙྪིནྣཏྟཱ། ཡེ ཙ པན པཧཱཡ མོཧཾ སབྦསོ སམུགྒྷཱཏེཏྭཱ བྷཝརཱགཱནུསཡཉྩ པཛཧནྟི, ཏེ པུན ཨུཔེནྟི གབྦྷསེཡྻནྟི ཝཏྟབྦམེཝ ནཏྠི། ཀསྨཱ? པརིནིབྦཱནགཏཱ ཧི སཱིཏིབྷཱུཏཱ, ཏེ ཧི ཨུཏྟམཔུརིསཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱནཾ གཏཱ ཨེཝཾ ཨིདྷེཝ སབྦཝེདཡིཏཱནཾ སབྦཔརིལཱ༹ཧཱནཾ བྱནྟིབྷཱཝེན སཱིཏིབྷཱུཏཱ།
909. Paṭhamaphale patiṭṭhito devaputto uparimaggesu attano garucittīkāraṃ, tadadhigamassa ca mahānisaṃsataṃ vibhāvento ‘‘ye cidha pajahanti kāmarāga’’nti pariyosānagāthamāha. Tassattho – ye idha imasmiṃ sāsane ṭhitā pajahanti anavasesato samucchindanti kāmarāgaṃ, na ca te puna upentigabbhaseyyaṃ orambhāgiyānaṃ saṃyojanānaṃ samucchinnattā. Ye ca pana pahāya mohaṃ sabbaso samugghātetvā bhavarāgānusayañca pajahanti, te puna upenti gabbhaseyyanti vattabbameva natthi. Kasmā? Parinibbānagatā hi sītibhūtā, te hi uttamapurisā anupādisesāya nibbānadhātuyā parinibbānaṃ gatā evaṃ idheva sabbavedayitānaṃ sabbapariḷāhānaṃ byantibhāvena sītibhūtā.
ཨིཏི དེཝཔུཏྟོ ཨཏྟནོ ཨརིཡསོཏསམཱཔནྣབྷཱཝཾ པཝེདེནྟོ ཨནུཔཱདིསེསཱཡ ནིབྦཱནདྷཱཏུཡཱ དེསནཱཡ ཀཱུཊཾ གཧེཏྭཱ བྷགཝནྟཾ ཝནྡིཏྭཱ པདཀྑིཎཾ ཀཏྭཱ བྷིཀྑུསངྒྷསྶ ཨཔཙིཏིཾ དསྶེཏྭཱ མཱཏཱཔིཏརོ ཨཱཔུཙྪིཏྭཱ དེཝལོཀམེཝ གཏོ, སཏྠཱཔི ཨུཊྛཱཡཱསནཱ གཏོ སདྡྷིཾ བྷིཀྑུསངྒྷེན། མཱཎཝསྶ པན མཱཏཱཔིཏརོ བྲཱཧྨཎོ པོཀྑརསཱཏི སབྦོ ཙ མཧཱཛནོ བྷགཝནྟཾ ཨནུགནྟྭཱ ནིཝཏྟི། བྷགཝཱ ཛེཏཝནཾ གནྟྭཱ སནྣིཔཏིཏཱཡ པརིསཱཡ ཨིམཾ ཝིམཱནཾ ཝིཏྠཱརཏོ ཀཐེསི། སཱ དེསནཱ མཧཱཛནསྶ སཱཏྠིཀཱ ཨཧོསཱིཏི།
Iti devaputto attano ariyasotasamāpannabhāvaṃ pavedento anupādisesāya nibbānadhātuyā desanāya kūṭaṃ gahetvā bhagavantaṃ vanditvā padakkhiṇaṃ katvā bhikkhusaṅghassa apacitiṃ dassetvā mātāpitaro āpucchitvā devalokameva gato, satthāpi uṭṭhāyāsanā gato saddhiṃ bhikkhusaṅghena. Māṇavassa pana mātāpitaro brāhmaṇo pokkharasāti sabbo ca mahājano bhagavantaṃ anugantvā nivatti. Bhagavā jetavanaṃ gantvā sannipatitāya parisāya imaṃ vimānaṃ vitthārato kathesi. Sā desanā mahājanassa sātthikā ahosīti.
ཚཏྟམཱཎཝཀཝིམཱནཝཎྞནཱ ནིཊྛིཏཱ།
Chattamāṇavakavimānavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཝིམཱནཝཏྠུཔཱལི༹ • Vimānavatthupāḷi / ༣. ཚཏྟམཱཎཝཀཝིམཱནཝཏྠུ • 3. Chattamāṇavakavimānavatthu
