| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౩. ఛత్తఙ్గపఞ్హో
3. Chattaṅgapañho
౩. ‘‘భన్తే నాగసేన, ‘ఛత్తస్స తీణి అఙ్గాని గహేతబ్బానీ’తి యం వదేసి, కతమాని తాని తీణి అఙ్గాని గహేతబ్బానీ’’తి? ‘‘యథా, మహారాజ, ఛత్తం ఉపరి ముద్ధని చరతి, ఏవమేవ ఖో, మహారాజ, యోగినా యోగావచరేన కిలేసానం ఉపరి ముద్ధని చరేన భవితబ్బం. ఇదం, మహారాజ, ఛత్తస్స పఠమం అఙ్గం గహేతబ్బం.
3. ‘‘Bhante nāgasena, ‘chattassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, chattaṃ upari muddhani carati, evameva kho, mahārāja, yoginā yogāvacarena kilesānaṃ upari muddhani carena bhavitabbaṃ. Idaṃ, mahārāja, chattassa paṭhamaṃ aṅgaṃ gahetabbaṃ.
‘‘పున చపరం, మహారాజ, ఛత్తం ముద్ధనుపత్థమ్భం హోతి, ఏవమేవ ఖో, మహారాజ, యోగినా యోగావచరేన యోనిసో మనసికారుపత్థమ్భేన భవితబ్బం. ఇదం, మహారాజ, ఛత్తస్స దుతియం అఙ్గం గహేతబ్బం.
‘‘Puna caparaṃ, mahārāja, chattaṃ muddhanupatthambhaṃ hoti, evameva kho, mahārāja, yoginā yogāvacarena yoniso manasikārupatthambhena bhavitabbaṃ. Idaṃ, mahārāja, chattassa dutiyaṃ aṅgaṃ gahetabbaṃ.
‘‘పున చపరం, మహారాజ, ఛత్తం వాతాతపమేఘవుట్ఠియో పటిహనతి, ఏవమేవ ఖో, మహారాజ, యోగినా యోగావచరేన నానావిధదిట్ఠిపుథుసమణబ్రాహ్మణానం 1 మతవాతతివిధగ్గిసన్తాపకిలేసవుట్ఠియో పటిహన్తబ్బా . ఇదం, మహారాజ, ఛత్తస్స తతియం అఙ్గం గహేతబ్బం. భాసితమ్పేతం, మహారాజ, థేరేన సారిపుత్తేన ధమ్మసేనాపతినా –
‘‘Puna caparaṃ, mahārāja, chattaṃ vātātapameghavuṭṭhiyo paṭihanati, evameva kho, mahārāja, yoginā yogāvacarena nānāvidhadiṭṭhiputhusamaṇabrāhmaṇānaṃ 2 matavātatividhaggisantāpakilesavuṭṭhiyo paṭihantabbā . Idaṃ, mahārāja, chattassa tatiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘యథాపి ఛత్తం విపులం, అచ్ఛిద్దం థిరసంహితం;
‘‘‘Yathāpi chattaṃ vipulaṃ, acchiddaṃ thirasaṃhitaṃ;
వాతాతపం నివారేతి, మహతీ మేఘవుట్ఠియో.
Vātātapaṃ nivāreti, mahatī meghavuṭṭhiyo.
‘‘‘తథేవ బుద్ధపుత్తోపి, సీలఛత్తధరో సుచి;
‘‘‘Tatheva buddhaputtopi, sīlachattadharo suci;
కిలేసవుట్ఠిం వారేతి, సన్తాపతివిధగ్గయో’’’తి.
Kilesavuṭṭhiṃ vāreti, santāpatividhaggayo’’’ti.
ఛత్తఙ్గపఞ్హో తతియో.
Chattaṅgapañho tatiyo.
Footnotes:
