| Library / Tipiṭaka / તિપિટક • Tipiṭaka / ભિક્ખુનીવિભઙ્ગ-અટ્ઠકથા • Bhikkhunīvibhaṅga-aṭṭhakathā |
૬. છટ્ઠસિક્ખાપદવણ્ણના
6. Chaṭṭhasikkhāpadavaṇṇanā
૮૧૫. છટ્ઠે – ભત્તવિસ્સગ્ગન્તિ ભત્તકિચ્ચં. પાનીયેન ચ વિધૂપનેન ચ ઉપતિટ્ઠિત્વાતિ એકેન હત્થેન પાનીયથાલકં એકેન બીજનિં ગહેત્વા બીજમાના સમીપે ઠત્વાતિ અત્થો. અચ્ચાવદતીતિ પુબ્બેપિ તુમ્હે એવં ભુઞ્જથ, અહં એવં ઉપટ્ઠાનં કરોમી’’તિ પબ્બજિતચારિત્તં અતિક્કમિત્વા ગેહસ્સિતકથં કથેતીતિ અત્થો.
815. Chaṭṭhe – bhattavissagganti bhattakiccaṃ. Pānīyena ca vidhūpanena ca upatiṭṭhitvāti ekena hatthena pānīyathālakaṃ ekena bījaniṃ gahetvā bījamānā samīpe ṭhatvāti attho. Accāvadatīti pubbepi tumhe evaṃ bhuñjatha, ahaṃ evaṃ upaṭṭhānaṃ karomī’’ti pabbajitacārittaṃ atikkamitvā gehassitakathaṃ kathetīti attho.
૮૧૭. યંકિઞ્ચિ પાનીયન્તિ સુદ્ધઉદકં વા હોતુ, તક્કદધિમત્થુરસખીરાદીનં વા અઞ્ઞતરં. યા કાચિ બીજનીતિ અન્તમસો ચીવરકણ્ણોપિ. હત્થપાસે તિટ્ઠતિ આપત્તિ પાચિત્તિયસ્સાતિ ઇધ ઠાનપચ્ચયાવ પાચિત્તિયં વુત્તં. પહારપચ્ચયા પન ખન્ધકે દુક્કટં પઞ્ઞત્તં.
817.Yaṃkiñci pānīyanti suddhaudakaṃ vā hotu, takkadadhimatthurasakhīrādīnaṃ vā aññataraṃ. Yā kāci bījanīti antamaso cīvarakaṇṇopi. Hatthapāse tiṭṭhati āpatti pācittiyassāti idha ṭhānapaccayāva pācittiyaṃ vuttaṃ. Pahārapaccayā pana khandhake dukkaṭaṃ paññattaṃ.
૮૧૯. દેતિ દાપેતીતિ પાનીયં વા સૂપાદિં વા ઇમં પિવથ, ઇમિના ભુઞ્જથાતિ દેતિ; તાલવણ્ટં ઇમિના બીજન્તા ભુઞ્જથાતિ દેતિ; અઞ્ઞેન વા ઉભયમ્પિ દાપેતિ, અનાપત્તિ. અનુપસમ્પન્નં આણાપેતીતિ ઉપતિટ્ઠનત્થં સામણેરિં આણાપેતિ, અનાપત્તિ. સેસં ઉત્તાનમેવ.
819.Deti dāpetīti pānīyaṃ vā sūpādiṃ vā imaṃ pivatha, iminā bhuñjathāti deti; tālavaṇṭaṃ iminā bījantā bhuñjathāti deti; aññena vā ubhayampi dāpeti, anāpatti. Anupasampannaṃ āṇāpetīti upatiṭṭhanatthaṃ sāmaṇeriṃ āṇāpeti, anāpatti. Sesaṃ uttānameva.
એળકલોમસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, તિચિત્તં, તિવેદનન્તિ.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
છટ્ઠસિક્ખાપદં.
Chaṭṭhasikkhāpadaṃ.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / ભિક્ખુનીવિભઙ્ગ • Bhikkhunīvibhaṅga / ૬. છટ્ઠસિક્ખાપદં • 6. Chaṭṭhasikkhāpadaṃ
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૧. લસુણવગ્ગવણ્ણના • 1. Lasuṇavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૫. પઞ્ચમસિક્ખાપદવણ્ણના • 5. Pañcamasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૧. પઠમલસુણાદિસિક્ખાપદવણ્ણના • 1. Paṭhamalasuṇādisikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૬. છટ્ઠસિક્ખાપદં • 6. Chaṭṭhasikkhāpadaṃ
