| Library / Tipiṭaka / तिपिटक • Tipiṭaka / अपदानपाळि • Apadānapāḷi |
६. चितकपूजकत्थेरअपदानं
6. Citakapūjakattheraapadānaṃ
४९.
49.
‘‘वसामि राजायतने, सामच्चो सपरिज्जनो।
‘‘Vasāmi rājāyatane, sāmacco saparijjano;
परिनिब्बुते भगवति, सिखिनो लोकबन्धुनो॥
Parinibbute bhagavati, sikhino lokabandhuno.
५०.
50.
‘‘पसन्नचित्तो सुमनो, चितकं अगमासहं।
‘‘Pasannacitto sumano, citakaṃ agamāsahaṃ;
तूरियं तत्थ वादेत्वा, गन्धमालं समोकिरिं॥
Tūriyaṃ tattha vādetvā, gandhamālaṃ samokiriṃ.
५१.
51.
‘‘चितम्हि पूजं कत्वान, वन्दित्वा चितकं अहं।
‘‘Citamhi pūjaṃ katvāna, vanditvā citakaṃ ahaṃ;
पसन्नचित्तो सुमनो, सकं भवनुपागमिं॥
Pasannacitto sumano, sakaṃ bhavanupāgamiṃ.
५२.
52.
‘‘भवने उपविट्ठोहं, चितपूजं अनुस्सरिं।
‘‘Bhavane upaviṭṭhohaṃ, citapūjaṃ anussariṃ;
तेन कम्मेन द्विपदिन्द, लोकजेट्ठ नरासभ॥
Tena kammena dvipadinda, lokajeṭṭha narāsabha.
५३.
53.
‘‘अनुभोत्वान सम्पत्तिं, देवेसु मानुसेसु च।
‘‘Anubhotvāna sampattiṃ, devesu mānusesu ca;
पत्तोम्हि अचलं ठानं, हित्वा जयपराजयं॥
Pattomhi acalaṃ ṭhānaṃ, hitvā jayaparājayaṃ.
५४.
54.
‘‘एकत्तिंसे इतो कप्पे, यं पुप्फमभिरोपयिं।
‘‘Ekattiṃse ito kappe, yaṃ pupphamabhiropayiṃ;
दुग्गतिं नाभिजानामि, चितपूजायिदं फलं॥
Duggatiṃ nābhijānāmi, citapūjāyidaṃ phalaṃ.
५५.
55.
‘‘एकूनतिंसकप्पम्हि, इतो सोळस राजानो।
‘‘Ekūnatiṃsakappamhi, ito soḷasa rājāno;
उग्गता नाम नामेन, चक्कवत्ती महब्बला॥
Uggatā nāma nāmena, cakkavattī mahabbalā.
५६.
56.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा चितकपूजको थेरो इमा गाथायो अभासित्थाति।
Itthaṃ sudaṃ āyasmā citakapūjako thero imā gāthāyo abhāsitthāti.
चितकपूजकत्थेरस्सापदानं छट्ठं।
Citakapūjakattherassāpadānaṃ chaṭṭhaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ६. चितकपूजकत्थेरअपदानवण्णना • 6. Citakapūjakattheraapadānavaṇṇanā
