| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३. चितकपूजकत्थेरअपदानं
3. Citakapūjakattheraapadānaṃ
९.
9.
‘‘आनन्दो नाम सम्बुद्धो, सयम्भू अपराजितो।
‘‘Ānando nāma sambuddho, sayambhū aparājito;
अरञ्ञे परिनिब्बायि, अमनुस्सम्हि कानने॥
Araññe parinibbāyi, amanussamhi kānane.
१०.
10.
‘‘देवलोका इधागन्त्वा, चितं कत्वानहं तदा।
‘‘Devalokā idhāgantvā, citaṃ katvānahaṃ tadā;
सरीरं तत्थ झापेसिं, सक्कारञ्च अकासहं॥
Sarīraṃ tattha jhāpesiṃ, sakkārañca akāsahaṃ.
११.
11.
‘‘एकनवुतितो कप्पे, यं कम्ममकरिं तदा।
‘‘Ekanavutito kappe, yaṃ kammamakariṃ tadā;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
१२.
12.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा चितकपूजको थेरो इमा गाथायो अभासित्थाति।
Itthaṃ sudaṃ āyasmā citakapūjako thero imā gāthāyo abhāsitthāti.
चितकपूजकत्थेरस्सापदानं ततियं।
Citakapūjakattherassāpadānaṃ tatiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-१०. थोमकत्थेरअपदानादिवण्णना • 1-10. Thomakattheraapadānādivaṇṇanā
