| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
8. жид̇д̇аяамагам̣
8. Cittayamakaṃ
уд̣̇д̣̇зсаваараван̣н̣анаа
Uddesavāravaṇṇanā
1-62. сарааг̇аад̣̇ийд̇и зд̇т̇а аад̣̇и-сад̣̇д̣̇зна ‘‘яасса сарааг̇ам̣ жид̇д̇ам̣ уббаж̇ж̇ад̇и, на нируж̇жхад̇ий’’д̇и аарабхид̇ваа яаава ‘‘яасса авимуд̇д̇ам̣ жид̇д̇а’’нд̇и вааро, д̇аава сан̇г̇ан̣хаад̇и. гусалаад̣̇ийд̇и бана аад̣̇и-сад̣̇д̣̇зна ‘‘яасса гусалам̣ жид̇д̇ам̣ уббаж̇ж̇ад̇и, на нируж̇жхад̇ий’’д̇и аарабхид̇ваа яаава ‘‘яасса саран̣ам̣ жид̇д̇ам̣ уббаж̇ж̇ад̇и, на нируж̇жхад̇ий’’д̇и вааро, д̇аава сан̇г̇ан̣хаад̇и, д̇асмаа сарааг̇аад̣̇игусалаад̣̇ийхийд̇и сарааг̇аад̣̇ийхи авимуд̇д̇анд̇зхи, гусалаад̣̇ийхи аран̣анд̇зхи бад̣̇зхи миссагаа ваараа. суд̣̇д̇хигаад̇и гзвалаа яат̇аавуд̇д̇асарааг̇аад̣̇ийхи гусалаад̣̇ийхи жа амиссагаа. д̇аяо д̇аяод̇и буг̇г̇алад̇хаммавасзна д̇аяо д̇аяо махааваараа. яад̣̇и звам̣ гат̇ам̣ сол̣аса буг̇г̇алаваараад̇и ааха ‘‘д̇ад̇т̇а д̇ад̇т̇а бана вуд̇д̇з самбин̣д̣зд̇ваа’’д̇и. д̇ад̇т̇а д̇ад̇т̇а сол̣асавид̇хз сарааг̇аад̣̇имиссагажид̇д̇з вуд̇д̇з буг̇г̇алз зва згаж̇жхам̣ самбин̣д̣зд̇ваа сан̇г̇ахзд̇ваа ‘‘сол̣аса буг̇г̇алаваараа’’д̇и вуд̇д̇ам̣. ‘‘д̇хаммабуг̇г̇алад̇хаммаваараа’’д̇и зд̇т̇ааби зсзва наяо. на ниранд̇арам̣ вуд̇д̇зд̇и д̇хаммз буг̇г̇алад̇хаммз жа анаамасид̇ваа сол̣асасуби таанзсу ниранд̇арам̣ буг̇г̇алз зва вуд̇д̇з самбин̣д̣зд̇ваа сол̣аса буг̇г̇алаваараа на вуд̇д̇аад̇и ад̇т̇о.
1-62. Sarāgādīti ettha ādi-saddena ‘‘yassa sarāgaṃ cittaṃ uppajjati, na nirujjhatī’’ti ārabhitvā yāva ‘‘yassa avimuttaṃ citta’’nti vāro, tāva saṅgaṇhāti. Kusalādīti pana ādi-saddena ‘‘yassa kusalaṃ cittaṃ uppajjati, na nirujjhatī’’ti ārabhitvā yāva ‘‘yassa saraṇaṃ cittaṃ uppajjati, na nirujjhatī’’ti vāro, tāva saṅgaṇhāti, tasmā sarāgādikusalādīhīti sarāgādīhi avimuttantehi, kusalādīhi araṇantehi padehi missakā vārā. Suddhikāti kevalā yathāvuttasarāgādīhi kusalādīhi ca amissakā. Tayo tayoti puggaladhammavasena tayo tayo mahāvārā. Yadi evaṃ kathaṃ soḷasa puggalavārāti āha ‘‘tattha tattha pana vutte sampiṇḍetvā’’ti. Tattha tattha soḷasavidhe sarāgādimissakacitte vutte puggale eva ekajjhaṃ sampiṇḍetvā saṅgahetvā ‘‘soḷasa puggalavārā’’ti vuttaṃ. ‘‘Dhammapuggaladhammavārā’’ti etthāpi eseva nayo. Na nirantaraṃ vutteti dhamme puggaladhamme ca anāmasitvā soḷasasupi ṭhānesu nirantaraṃ puggale eva vutte sampiṇḍetvā soḷasa puggalavārā na vuttāti attho.
сам̣саг̇г̇авасзнаад̇и сам̣саж̇ж̇анавасзна д̣̇зсанааяа вимиссанавасзна. ан̃н̃ат̇аа хи уббаад̣̇анирод̇хаа бажжуббаннаанааг̇ад̇агаалаа жа гат̇ам̣ сам̣саж̇ж̇ийяанд̇и. сзсаанамби ваараананд̇и уббаад̣̇уббаннаваараад̣̇ийнам̣. д̇ам̣д̇ам̣наамад̇аад̇и яат̇аа ‘‘яасса жид̇д̇ам̣ уббаж̇ж̇ад̇и, д̇асса жид̇д̇ам̣ уббанна’’нд̇иаад̣̇инаа уббаад̣̇ауббаннабхааваамасанад̇о уббаад̣̇ауббаннаваарод̇и наамам̣ баал̣ид̇о зва вин̃н̃ааяад̇и, звам̣ сзсаваараанамбийд̇и ааха ‘‘д̇ам̣д̇ам̣наамад̇аа баал̣ианусаарзна взд̣̇ид̇аб̣б̣аа’’д̇и.
Saṃsaggavasenāti saṃsajjanavasena desanāya vimissanavasena. Aññathā hi uppādanirodhā paccuppannānāgatakālā ca kathaṃ saṃsajjīyanti. Sesānampi vārānanti uppāduppannavārādīnaṃ. Taṃtaṃnāmatāti yathā ‘‘yassa cittaṃ uppajjati, tassa cittaṃ uppanna’’ntiādinā uppādauppannabhāvāmasanato uppādauppannavāroti nāmaṃ pāḷito eva viññāyati, evaṃ sesavārānampīti āha ‘‘taṃtaṃnāmatā pāḷianusārena veditabbā’’ti.
уд̣̇д̣̇зсаваараван̣н̣анаа нидтид̇аа.
Uddesavāravaṇṇanā niṭṭhitā.
нид̣̇д̣̇зсаваараван̣н̣анаа
Niddesavāravaṇṇanā
63. д̇ат̇ааруубассзваад̇и бажчимажид̇д̇асаман̇г̇ино зва. д̇ан̃жа жид̇д̇анд̇и д̇ан̃жа яат̇аавуд̇д̇агкан̣ам̣ бажчимажид̇д̇ам̣. ‘‘звам̣багаара’’нд̇и имасса ад̇т̇ам̣ д̣̇ассзд̇ум̣ ‘‘бхан̇г̇агкан̣асаман̇г̇имзваа’’д̇и вуд̇д̇ам̣ нируж̇жхамаанаагаарасса ‘‘звам̣багаара’’нд̇и вуд̇д̇ад̇д̇аа.
63. Tathārūpassevāti pacchimacittasamaṅgino eva. Tañca cittanti tañca yathāvuttakkhaṇaṃ pacchimacittaṃ. ‘‘Evaṃpakāra’’nti imassa atthaṃ dassetuṃ ‘‘bhaṅgakkhaṇasamaṅgimevā’’ti vuttaṃ nirujjhamānākārassa ‘‘evaṃpakāra’’nti vuttattā.
65-82. д̣̇ваяамзд̇анд̇и яам̣ ‘‘кан̣абажжуббаннамзва жид̇д̇ам̣ уббаад̣̇агкан̣аабаг̇амзна уббаж̇ж̇ид̇т̇а наама, д̇ад̣̇зва уббаад̣̇агкан̣з уббаад̣̇ам̣ бад̇д̇ад̇д̇аа уббаж̇ж̇ид̇т̇а, анад̇ийд̇ад̇д̇аа уббаж̇ж̇ад̇и наамаа’’д̇и вуд̇д̇ам̣, зд̇ам̣ убхаяамби. звам̣ на саггаа вад̇д̇унд̇и иминаа вуд̇д̇аббагаарзна на саггаа вад̇д̇ум̣, багааранд̇арзна бана саггаа вад̇д̇унд̇и ад̇хиббааяо. д̇ад̇т̇а ‘‘на хий’’д̇иаад̣̇инаа батамабагкам̣ вибхаавзд̇и. вибхаж̇ид̇аб̣б̣ам̣ сияаад̇и ‘‘бхан̇г̇агкан̣з д̇ам̣ жид̇д̇ам̣ уббаж̇ж̇ид̇т̇а, но жа уббаж̇ж̇ад̇и, уббаад̣̇агкан̣з д̇ам̣ жид̇д̇ам̣ уббаж̇ж̇ид̇т̇а жзва уббаж̇ж̇ад̇и жаа’’д̇и вибхаж̇ид̇аб̣б̣ам̣ сияаа, на жа вибхад̇д̇ам̣ . ‘‘ааманд̇аа’’д̇и вад̇д̇аб̣б̣ам̣ сияаа кан̣абажжуббаннз жид̇д̇з вуд̇д̇анаязна убхаяассаби лаб̣бхамаанад̇д̇аа, на жа вуд̇д̇ам̣. ид̣̇аани язна багаарзна саггаа вад̇д̇ум̣, д̇ам̣ д̣̇ассзд̇ум̣ ‘‘жид̇д̇асса бхан̇г̇агкан̣з’’д̇иаад̣̇имааха. буг̇г̇ало вуд̇д̇о, буг̇г̇алавааро хзсод̇и ад̇хиббааяо. д̇ассаад̇и буг̇г̇аласса. на жа гин̃жи жид̇д̇ам̣ уббаж̇ж̇ад̇и жид̇д̇асса бхан̇г̇агкан̣асаман̇г̇ибхаавад̇о. д̇ам̣ бана жид̇д̇ам̣ уббаж̇ж̇ад̇и, яам̣ жид̇д̇асаман̇г̇ий со буг̇г̇алод̇и звамзд̇т̇а ад̇т̇о д̣̇адтаб̣б̣о. яад̣̇и анзгажид̇д̇авасзнааяам̣ яамагад̣̇зсанаа бавад̇д̇аад̇и жод̣̇анам̣ санд̇хааяааха ‘‘жид̇д̇анд̇и хи…бз… д̇идтад̇ий’’д̇и. саннидтаанавасзна нияамо взд̣̇ид̇аб̣б̣о, ан̃н̃ат̇аа ‘‘но жа д̇зсам̣ жид̇д̇ам̣ уббаж̇ж̇ад̇ий’’д̇иаад̣̇инаа бадисзд̇хо на яуж̇ж̇зяяаад̇и ад̇хиббааяо. д̇аад̣̇исанд̇и д̇ат̇ааруубам̣, яад̣̇авад̇т̇о уббаннауббаж̇ж̇амаанад̇аад̣̇ибарияааязхи вад̇д̇аб̣б̣о ход̇и, д̇ад̣̇авад̇т̇анд̇и ад̇т̇о.
65-82. Dvayametanti yaṃ ‘‘khaṇapaccuppannameva cittaṃ uppādakkhaṇāpagamena uppajjittha nāma, tadeva uppādakkhaṇe uppādaṃ pattattā uppajjittha, anatītattā uppajjati nāmā’’ti vuttaṃ, etaṃ ubhayampi. Evaṃ na sakkā vattunti iminā vuttappakārena na sakkā vattuṃ, pakārantarena pana sakkā vattunti adhippāyo. Tattha ‘‘na hī’’tiādinā paṭhamapakkhaṃ vibhāveti. Vibhajitabbaṃ siyāti ‘‘bhaṅgakkhaṇe taṃ cittaṃ uppajjittha, no ca uppajjati, uppādakkhaṇe taṃ cittaṃ uppajjittha ceva uppajjati cā’’ti vibhajitabbaṃ siyā, na ca vibhattaṃ . ‘‘Āmantā’’ti vattabbaṃ siyā khaṇapaccuppanne citte vuttanayena ubhayassapi labbhamānattā, na ca vuttaṃ. Idāni yena pakārena sakkā vattuṃ, taṃ dassetuṃ ‘‘cittassa bhaṅgakkhaṇe’’tiādimāha. Puggalo vutto, puggalavāro hesoti adhippāyo. Tassāti puggalassa. Na ca kiñci cittaṃ uppajjati cittassa bhaṅgakkhaṇasamaṅgibhāvato. Taṃ pana cittaṃ uppajjati, yaṃ cittasamaṅgī so puggaloti evamettha attho daṭṭhabbo. Yadi anekacittavasenāyaṃ yamakadesanā pavattāti codanaṃ sandhāyāha ‘‘cittanti hi…pe… tiṭṭhatī’’ti. Sanniṭṭhānavasena niyamo veditabbo, aññathā ‘‘no ca tesaṃ cittaṃ uppajjatī’’tiādinā paṭisedho na yujjeyyāti adhippāyo. Tādisanti tathārūpaṃ, yadavattho uppannauppajjamānatādipariyāyehi vattabbo hoti, tadavatthanti attho.
83-113. имасса буг̇г̇алаваарад̇д̇аад̇и ‘‘яасса жид̇д̇ам̣ уббаж̇ж̇амаана’’нд̇иаад̣̇инаяаббавад̇д̇асса имасса ад̇игганд̇агаалаваарасса буг̇г̇алаваарад̇д̇аа. буг̇г̇ало бужчид̇од̇и ‘‘яасса жид̇д̇ам̣ уббаж̇ж̇амаанам̣…бз… д̇асса жид̇д̇а’’нд̇и жид̇д̇асаман̇г̇ибуг̇г̇ало бужчид̇од̇и буг̇г̇алассзва виссаж̇ж̇анзна бхавид̇аб̣б̣ам̣, ид̇арат̇аа ан̃н̃ам̣ бужчид̇ам̣ ан̃н̃ам̣ виссаж̇ж̇ид̇ам̣ сияаа. на гожи буг̇г̇ало на г̇ахид̇о саб̣б̣асад̇д̇аанам̣ аниб̣б̣ад̇д̇ажид̇д̇ад̇аабхаавад̇о. д̇з жа бана саб̣б̣з буг̇г̇алаа. нируж̇жхамаанагкан̣аад̇ийд̇ажид̇д̇аад̇и нируж̇жхамаанагкан̣аа худ̇ваа ад̇ийд̇ажид̇д̇аа. д̇ат̇аа д̣̇уд̇ияад̇ад̇ияаад̇и яат̇аа батамабан̃хо анавасзсабуг̇г̇алависаяад̇д̇аа бадиважанзна виссаж̇ж̇зд̇аб̣б̣о сияаа, д̇ат̇аа д̇ад̇о зва д̣̇уд̇ияад̇ад̇ияабан̃хаа ‘‘ааманд̇аа’’ижжзва виссаж̇ж̇зд̇аб̣б̣аа сияунд̇и ад̇т̇о. жад̇уд̇т̇о бана бан̃хо звам̣ вибхаж̇ид̇ваа буг̇г̇алавасзнзва виссаж̇ж̇зд̇аб̣б̣од̇и д̣̇ассзнд̇о ‘‘бажчимажид̇д̇ассаа’’д̇иаад̣̇им̣ вад̇ваа д̇ат̇аа аважанз гааран̣ам̣ д̣̇ассзнд̇о ‘‘жид̇д̇авасзна буг̇г̇алававад̇т̇аанад̇о’’д̇иаад̣̇имааха. ‘‘бхан̇г̇агкан̣з жид̇д̇ам̣ уббаад̣̇агкан̣ам̣ вийд̇игганд̇а’’нд̇и иминаа вад̇д̇амаанасса жид̇д̇асса васзна буг̇г̇ало уббаад̣̇агкан̣аад̇ийд̇ажид̇д̇о, ‘‘ад̇ийд̇ам̣ жид̇д̇ам̣ уббаад̣̇агкан̣ан̃жа вийд̇игганд̇анд̇и бхан̇г̇агкан̣ан̃жа вийд̇игганд̇а’’нд̇и иминаа бана ад̇ийд̇асса жид̇д̇асса васзна буг̇г̇ало уббаад̣̇агкан̣аад̇ийд̇ажид̇д̇о вуд̇д̇о.
83-113. Imassa puggalavārattāti ‘‘yassa cittaṃ uppajjamāna’’ntiādinayappavattassa imassa atikkantakālavārassa puggalavārattā. Puggalo pucchitoti ‘‘yassa cittaṃ uppajjamānaṃ…pe… tassa citta’’nti cittasamaṅgipuggalo pucchitoti puggalasseva vissajjanena bhavitabbaṃ, itarathā aññaṃ pucchitaṃ aññaṃ vissajjitaṃ siyā. Na koci puggalo na gahito sabbasattānaṃ anibbattacittatābhāvato. Te ca pana sabbe puggalā. Nirujjhamānakkhaṇātītacittāti nirujjhamānakkhaṇā hutvā atītacittā. Tathā dutiyatatiyāti yathā paṭhamapañho anavasesapuggalavisayattā paṭivacanena vissajjetabbo siyā, tathā tato eva dutiyatatiyapañhā ‘‘āmantā’’icceva vissajjetabbā siyunti attho. Catuttho pana pañho evaṃ vibhajitvā puggalavaseneva vissajjetabboti dassento ‘‘pacchimacittassā’’tiādiṃ vatvā tathā avacane kāraṇaṃ dassento ‘‘cittavasena puggalavavatthānato’’tiādimāha. ‘‘Bhaṅgakkhaṇe cittaṃ uppādakkhaṇaṃ vītikkanta’’nti iminā vattamānassa cittassa vasena puggalo uppādakkhaṇātītacitto, ‘‘atītaṃ cittaṃ uppādakkhaṇañca vītikkantanti bhaṅgakkhaṇañca vītikkanta’’nti iminā pana atītassa cittassa vasena puggalo uppādakkhaṇātītacitto vutto.
д̇ад̇т̇аад̇и д̇зсу д̣̇вийсу буг̇г̇алзсу. буримассаад̇и батамам̣ вуд̇д̇асса саннидтаанабад̣̇асан̇г̇ахид̇асса жид̇д̇ам̣ на бхан̇г̇агкан̣ам̣ вийд̇игганд̇ам̣. ‘‘но жа бхан̇г̇агкан̣ам̣ вийд̇игганд̇а’’нд̇и хи вуд̇д̇ам̣. бажчимасса вийд̇игганд̇ам̣ жид̇д̇ам̣ бхан̇г̇агкан̣анд̇и самб̣анд̇хо. ‘‘бхан̇г̇агкан̣ан̃жа вийд̇игганд̇а’’нд̇и хи вуд̇д̇ам̣. звамаад̣̇иго буг̇г̇алавибхааг̇од̇и д̣̇уд̇ияабан̃хаад̣̇ийсу вуд̇д̇ам̣ санд̇хааяааха. д̇асса жид̇д̇асса д̇ам̣д̇ам̣кан̣авийд̇иггамаавийд̇иггамад̣̇ассанавасзнаад̇и д̇асса д̇асса уббаад̣̇агкан̣асса бхан̇г̇агкан̣асса жа яат̇аарахам̣ вийд̇иггамасса авийд̇иггамасса жа д̣̇ассанавасзна д̣̇ассид̇о ход̇и буг̇г̇алавибхааг̇од̇и яож̇анаа. ид̇хаад̇и имасмим̣ ад̇игганд̇агаалаваарз. буг̇г̇алависидтам̣ жид̇д̇ам̣ бужчид̇ам̣ ‘‘яасса жид̇д̇ам̣ д̇асса жид̇д̇а’’нд̇и вуд̇д̇ад̇д̇аа. яад̣̇иби буг̇г̇алаббад̇хаанаа бужчаа буг̇г̇алаваарад̇д̇аа. ат̇ааби жид̇д̇аббад̇хаанаа буг̇г̇алам̣ висзсанабхаавзна г̇ахзд̇ваа жид̇д̇асса висзсид̇ад̇д̇аа. убхаяат̇ааби д̣̇уд̇ияабужчааяа ‘‘ааманд̇аа’’д̇и вад̇д̇аб̣б̣ам̣ сияаа анавасзсабуг̇г̇алависаяад̇д̇аа. д̇ат̇аа бана авад̇ваа ‘‘ад̇ийд̇ам̣ жид̇д̇а’’нд̇и вуд̇д̇ам̣, гасмаа нирод̇хагкан̣а…бз… д̣̇ассанад̇т̇анд̇и д̣̇адтаб̣б̣анд̇и яож̇анаа. зса наяо ‘‘на нируж̇жхамаана’’нд̇и зд̇т̇аабийд̇и нируж̇жхамаанам̣ кан̣ам̣ нирод̇хагкан̣ам̣ кан̣ам̣ вийд̇игганд̇агаалам̣ гим̣ д̇асса жид̇д̇ам̣ на ход̇ийд̇и ад̇т̇о.
Tatthāti tesu dvīsu puggalesu. Purimassāti paṭhamaṃ vuttassa sanniṭṭhānapadasaṅgahitassa cittaṃ na bhaṅgakkhaṇaṃ vītikkantaṃ. ‘‘No ca bhaṅgakkhaṇaṃ vītikkanta’’nti hi vuttaṃ. Pacchimassa vītikkantaṃ cittaṃ bhaṅgakkhaṇanti sambandho. ‘‘Bhaṅgakkhaṇañca vītikkanta’’nti hi vuttaṃ. Evamādiko puggalavibhāgoti dutiyapañhādīsu vuttaṃ sandhāyāha. Tassa cittassa taṃtaṃkhaṇavītikkamāvītikkamadassanavasenāti tassa tassa uppādakkhaṇassa bhaṅgakkhaṇassa ca yathārahaṃ vītikkamassa avītikkamassa ca dassanavasena dassito hoti puggalavibhāgoti yojanā. Idhāti imasmiṃ atikkantakālavāre. Puggalavisiṭṭhaṃ cittaṃ pucchitaṃ ‘‘yassa cittaṃ tassa citta’’nti vuttattā. Yadipi puggalappadhānā pucchā puggalavārattā. Athāpi cittappadhānā puggalaṃ visesanabhāvena gahetvā cittassa visesitattā. Ubhayathāpi dutiyapucchāya ‘‘āmantā’’ti vattabbaṃ siyā anavasesapuggalavisayattā. Tathā pana avatvā ‘‘atītaṃ citta’’nti vuttaṃ, kasmā nirodhakkhaṇa…pe… dassanatthanti daṭṭhabbanti yojanā. Esa nayo ‘‘na nirujjhamāna’’nti etthāpīti nirujjhamānaṃ khaṇaṃ nirodhakkhaṇaṃ khaṇaṃ vītikkantakālaṃ kiṃ tassa cittaṃ na hotīti attho.
114-116. сарааг̇абажчимажид̇д̇ассаад̇и сарааг̇ажид̇д̇зсу бажчимасса жид̇д̇асса, згасса буг̇г̇аласса рааг̇асамбаяуд̇д̇ажид̇д̇зсу яам̣ саб̣б̣абажчимам̣ жид̇д̇ам̣, д̇асса. со бана буг̇г̇ало анааг̇аамий взд̣̇ид̇аб̣б̣о. на нируж̇жхад̇и нирод̇хаасаман̇г̇ид̇ааяа. нируж̇жхиссад̇и ид̣̇аани нирод̇хам̣ баабун̣иссад̇и. аббадисанд̇хигад̇д̇аа бана д̇ад̇о ан̃н̃ам̣ нуббаж̇ж̇иссад̇и. ид̇арзсанд̇и яат̇аавуд̇д̇асарааг̇абажчимажид̇д̇асаман̇г̇им̣ вийд̇арааг̇ажид̇д̇асаман̇г̇ин̃жа табзд̇ваа авасзсаанам̣ ид̇арасзгкаанан̃жзва бут̇уж̇ж̇анаанан̃жа.
114-116. Sarāgapacchimacittassāti sarāgacittesu pacchimassa cittassa, ekassa puggalassa rāgasampayuttacittesu yaṃ sabbapacchimaṃ cittaṃ, tassa. So pana puggalo anāgāmī veditabbo. Na nirujjhati nirodhāsamaṅgitāya. Nirujjhissati idāni nirodhaṃ pāpuṇissati. Appaṭisandhikattā pana tato aññaṃ nuppajjissati. Itaresanti yathāvuttasarāgapacchimacittasamaṅgiṃ vītarāgacittasamaṅgiñca ṭhapetvā avasesānaṃ itarasekkhānañceva puthujjanānañca.
нид̣̇д̣̇зсаваараван̣н̣анаа нидтид̇аа.
Niddesavāravaṇṇanā niṭṭhitā.
жид̇д̇аяамагаван̣н̣анаа нидтид̇аа.
Cittayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 7. анусаяаяамагам̣ • 7. Anusayayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 8. жид̇д̇аяамагам̣ • 8. Cittayamakaṃ
