| Library / Tipiṭaka / д̇ибидага • Tipiṭaka / махаавибхан̇г̇а • Mahāvibhaṅga |
5. жийварабадиг̇г̇ахан̣асигкаабад̣̇ам̣
5. Cīvarapaṭiggahaṇasikkhāpadaṃ
508. д̇зна самаязна б̣уд̣̇д̇хо бхаг̇аваа рааж̇аг̇ахз вихарад̇и взл̣уванз галанд̣̇аганиваабз. д̇зна ко бана самаязна уббалаван̣н̣аа бхигкуний саавад̇т̇ияам̣ вихарад̇и. ат̇а ко уббалаван̣н̣аа бхигкуний буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа саавад̇т̇им̣ бин̣д̣ааяа баависи. саавад̇т̇ияам̣ бин̣д̣ааяа жарид̇ваа бажчаабхад̇д̇ам̣ бин̣д̣абаад̇аббадигганд̇аа язна анд̇хаванам̣ д̇знубасан̇гами д̣̇иваавихаарааяа. анд̇хаванам̣ аж̇жхог̇аахзд̇ваа ан̃н̃ад̇арасмим̣ ругкамуулз д̣̇иваавихаарам̣ нисийд̣̇и. д̇зна ко бана самаязна жораа гад̇агаммаа г̇аавим̣ вад̇хид̇ваа мам̣сам̣ г̇ахзд̇ваа анд̇хаванам̣ бависим̣су. ад̣̇д̣̇асаа ко жораг̇ааман̣иго уббалаван̣н̣ам̣ бхигкуним̣ ан̃н̃ад̇арасмим̣ ругкамуулз д̣̇иваавихаарам̣ нисиннам̣. д̣̇исваанасса зд̇ад̣̇ахоси – ‘‘сажз мз буд̇д̇абхаад̇угаа бассиссанд̇и вихзтиссанд̇и имам̣ бхигкуни’’нд̇и ан̃н̃зна маг̇г̇зна аг̇амааси. ат̇а ко со жораг̇ааман̣иго мам̣сз баггз варамам̣саани г̇ахзд̇ваа бан̣н̣абудам̣ 1 б̣анд̇хид̇ваа уббалаван̣н̣ааяа бхигкунияаа авид̣̇уурз ругкз аалаг̇г̇зд̇ваа – ‘‘яо бассад̇и саман̣о ваа б̣раахман̣о ваа д̣̇иннам̣язва харад̇уу’’д̇и, вад̇ваа баггаами. ассоси ко уббалаван̣н̣аа бхигкуний самаад̇химхаа вудтахид̇ваа д̇асса жораг̇ааман̣игасса имам̣ ваажам̣ бхаасамаанасса. ат̇а ко уббалаван̣н̣аа бхигкуний д̇ам̣ мам̣сам̣ г̇ахзд̇ваа убассаяам̣ аг̇амааси. ат̇а ко уббалаван̣н̣аа бхигкуний д̇ассаа рад̇д̇ияаа ажжаязна д̇ам̣ мам̣сам̣ самбаад̣̇зд̇ваа уд̇д̇араасан̇г̇зна бхан̣д̣игам̣ б̣анд̇хид̇ваа взхаасам̣ аб̣бхуг̇г̇анд̇ваа взл̣уванз бажжудтааси 2.
508. Tena samayena buddho bhagavā rājagahe viharati veḷuvane kalandakanivāpe. Tena kho pana samayena uppalavaṇṇā bhikkhunī sāvatthiyaṃ viharati. Atha kho uppalavaṇṇā bhikkhunī pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātappaṭikkantā yena andhavanaṃ tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi. Tena kho pana samayena corā katakammā gāviṃ vadhitvā maṃsaṃ gahetvā andhavanaṃ pavisiṃsu. Addasā kho coragāmaṇiko uppalavaṇṇaṃ bhikkhuniṃ aññatarasmiṃ rukkhamūle divāvihāraṃ nisinnaṃ. Disvānassa etadahosi – ‘‘sace me puttabhātukā passissanti viheṭhissanti imaṃ bhikkhuni’’nti aññena maggena agamāsi. Atha kho so coragāmaṇiko maṃse pakke varamaṃsāni gahetvā paṇṇapuṭaṃ 3 bandhitvā uppalavaṇṇāya bhikkhuniyā avidūre rukkhe ālaggetvā – ‘‘yo passati samaṇo vā brāhmaṇo vā dinnaṃyeva haratū’’ti, vatvā pakkāmi. Assosi kho uppalavaṇṇā bhikkhunī samādhimhā vuṭṭhahitvā tassa coragāmaṇikassa imaṃ vācaṃ bhāsamānassa. Atha kho uppalavaṇṇā bhikkhunī taṃ maṃsaṃ gahetvā upassayaṃ agamāsi. Atha kho uppalavaṇṇā bhikkhunī tassā rattiyā accayena taṃ maṃsaṃ sampādetvā uttarāsaṅgena bhaṇḍikaṃ bandhitvā vehāsaṃ abbhuggantvā veḷuvane paccuṭṭhāsi 4.
д̇зна ко бана самаязна бхаг̇аваа г̇аамам̣ бин̣д̣ааяа бавидто ход̇и. ааяасмаа уд̣̇ааяий охияяаго ход̇и вихаарабаало. ат̇а ко уббалаван̣н̣аа бхигкуний язнааяасмаа уд̣̇ааяий д̇знубасан̇гами; убасан̇гамид̇ваа ааяасманд̇ам̣ уд̣̇ааяим̣ зд̇ад̣̇авожа – ‘‘гахам̣, бханд̇з, бхаг̇аваа’’д̇и? ‘‘бавидто, бхаг̇ини, бхаг̇аваа г̇аамам̣ бин̣д̣ааяаа’’д̇и. ‘‘имам̣, бханд̇з, мам̣сам̣ бхаг̇авад̇о д̣̇зхий’’д̇и. ‘‘санд̇аббид̇о д̇аяаа, бхаг̇ини, бхаг̇аваа мам̣сзна. сажз мз д̇вам̣ анд̇араваасагам̣ д̣̇ад̣̇зяяааси, звам̣ ахамби санд̇аббид̇о бхавзяяам̣ анд̇араваасагзнаа’’д̇и. ‘‘маяам̣ ко, бханд̇з, маад̇уг̇аамаа наама гижчалаабхаа. ид̣̇ан̃жа мз анд̇имам̣ бан̃жамам̣ жийварам̣. наахам̣ д̣̇ассаамий’’д̇и. ‘‘сзяяат̇ааби, бхаг̇ини, бурисо хад̇т̇им̣ д̣̇ад̇ваа гажчз саж̇ж̇зяяа 5 звамзва ко д̇вам̣ бхаг̇ини бхаг̇авад̇о мам̣сам̣ д̣̇ад̇ваа маяи анд̇араваасагз саж̇ж̇асий’’д̇и 6. ат̇а ко уббалаван̣н̣аа бхигкуний ааяасмад̇аа уд̣̇ааяинаа ниббийл̣ияамаанаа анд̇араваасагам̣ д̣̇ад̇ваа убассаяам̣ аг̇амааси. бхигкунияо уббалаван̣н̣ааяа бхигкунияаа бад̇д̇ажийварам̣ бадиг̇г̇ан̣ханд̇ияо уббалаван̣н̣ам̣ бхигкуним̣ зд̇ад̣̇авожум̣ – ‘‘гахам̣ д̇з, аяяз, анд̇араваасаго’’д̇и? уббалаван̣н̣аа бхигкуний бхигкунийнам̣ зд̇амад̇т̇ам̣ аарожзси. бхигкунияо уж̇жхааяанд̇и кияяанд̇и вибаажзнд̇и – ‘‘гат̇ан̃хи наама аяяо уд̣̇ааяий бхигкунияаа жийварам̣ бадиг̇г̇ахзссад̇и гижчалаабхо маад̇уг̇аамо’’д̇и. ат̇а ко д̇аа бхигкунияо бхигкуунам̣ зд̇амад̇т̇ам̣ аарожзсум̣. яз д̇з бхигкуу аббижчаа…бз… д̇з уж̇жхааяанд̇и кияяанд̇и вибаажзнд̇и – ‘‘гат̇ан̃хи наама ааяасмаа уд̣̇ааяий бхигкунияаа жийварам̣ бадиг̇г̇ахзссад̇ий’’д̇и! ат̇а ко д̇з бхигкуу ааяасманд̇ам̣ уд̣̇ааяим̣ анзгабарияааязна виг̇арахид̇ваа бхаг̇авад̇о зд̇амад̇т̇ам̣ аарожзсум̣…бз… ‘‘сажжам̣ гира д̇вам̣, уд̣̇ааяи, бхигкунияаа жийварам̣ бадиг̇г̇ахзсий’’д̇и? ‘‘сажжам̣ , бхаг̇аваа’’д̇и. ‘‘н̃аад̇игаа д̇з, уд̣̇ааяи, ан̃н̃аад̇игаа’’д̇и? ‘‘ан̃н̃аад̇игаа, бхаг̇аваа’’д̇и. ‘‘ан̃н̃аад̇аго, могхабуриса, ан̃н̃аад̇игааяа на ж̇аанаад̇и бад̇ируубам̣ ваа аббад̇ируубам̣ ваа санд̇ам̣ ваа асанд̇ам̣ ваа. д̇ад̇т̇а наама д̇вам̣, могхабуриса, ан̃н̃аад̇игааяа бхигкунияаа хад̇т̇ад̇о жийварам̣ бадиг̇г̇ахзссаси! нзд̇ам̣ могхабуриса, аббасаннаанам̣ ваа басаад̣̇ааяа…бз… зван̃жа бана, бхигкавз, имам̣ сигкаабад̣̇ам̣ уд̣̇д̣̇исзяяаат̇а –
Tena kho pana samayena bhagavā gāmaṃ piṇḍāya paviṭṭho hoti. Āyasmā udāyī ohiyyako hoti vihārapālo. Atha kho uppalavaṇṇā bhikkhunī yenāyasmā udāyī tenupasaṅkami; upasaṅkamitvā āyasmantaṃ udāyiṃ etadavoca – ‘‘kahaṃ, bhante, bhagavā’’ti? ‘‘Paviṭṭho, bhagini, bhagavā gāmaṃ piṇḍāyā’’ti. ‘‘Imaṃ, bhante, maṃsaṃ bhagavato dehī’’ti. ‘‘Santappito tayā, bhagini, bhagavā maṃsena. Sace me tvaṃ antaravāsakaṃ dadeyyāsi, evaṃ ahampi santappito bhaveyyaṃ antaravāsakenā’’ti. ‘‘Mayaṃ kho, bhante, mātugāmā nāma kicchalābhā. Idañca me antimaṃ pañcamaṃ cīvaraṃ. Nāhaṃ dassāmī’’ti. ‘‘Seyyathāpi, bhagini, puriso hatthiṃ datvā kacche sajjeyya 7 evameva kho tvaṃ bhagini bhagavato maṃsaṃ datvā mayi antaravāsake sajjasī’’ti 8. Atha kho uppalavaṇṇā bhikkhunī āyasmatā udāyinā nippīḷiyamānā antaravāsakaṃ datvā upassayaṃ agamāsi. Bhikkhuniyo uppalavaṇṇāya bhikkhuniyā pattacīvaraṃ paṭiggaṇhantiyo uppalavaṇṇaṃ bhikkhuniṃ etadavocuṃ – ‘‘kahaṃ te, ayye, antaravāsako’’ti? Uppalavaṇṇā bhikkhunī bhikkhunīnaṃ etamatthaṃ ārocesi. Bhikkhuniyo ujjhāyanti khiyyanti vipācenti – ‘‘kathañhi nāma ayyo udāyī bhikkhuniyā cīvaraṃ paṭiggahessati kicchalābho mātugāmo’’ti. Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī bhikkhuniyā cīvaraṃ paṭiggahessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, udāyi, bhikkhuniyā cīvaraṃ paṭiggahesī’’ti? ‘‘Saccaṃ , bhagavā’’ti. ‘‘Ñātikā te, udāyi, aññātikā’’ti? ‘‘Aññātikā, bhagavā’’ti. ‘‘Aññātako, moghapurisa, aññātikāya na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, aññātikāya bhikkhuniyā hatthato cīvaraṃ paṭiggahessasi! Netaṃ moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
509. ‘‘яо бана бхигку ан̃н̃аад̇игааяа бхигкунияаа хад̇т̇ад̇о жийварам̣ бадиг̇г̇ан̣хзяяа, ниссаг̇г̇ияам̣ баажид̇д̇ияа’’нд̇и.
509.‘‘Yo pana bhikkhu aññātikāya bhikkhuniyā hatthato cīvaraṃ paṭiggaṇheyya, nissaggiyaṃ pācittiya’’nti.
зван̃жид̣̇ам̣ бхаг̇авад̇аа бхигкуунам̣ сигкаабад̣̇ам̣ бан̃н̃ад̇д̇ам̣ ход̇и.
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
510. д̇зна ко бана самаязна бхигкуу гуггужжааяанд̇аа бхигкунийнам̣ бааривад̇д̇агажийварам̣ на бадиг̇г̇ан̣ханд̇и. бхигкунияо уж̇жхааяанд̇и кияяанд̇и вибаажзнд̇и – ‘‘гат̇ан̃хи наама аяяаа амхаагам̣ бааривад̇д̇агажийварам̣ на бадиг̇г̇ахзссанд̇ий’’д̇и! ассосум̣ ко бхигкуу д̇аасам̣ бхигкунийнам̣ уж̇жхааяанд̇ийнам̣ кияяанд̇ийнам̣ вибаажзнд̇ийнам̣. ат̇а ко д̇з бхигкуу бхаг̇авад̇о зд̇амад̇т̇ам̣ аарожзсу. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ануж̇аанаами, бхигкавз, бан̃жаннам̣ бааривад̇д̇агам̣ бадиг̇г̇ахзд̇ум̣ – бхигкусса, бхигкунияаа, сигкамаанааяа, сааман̣зрасса, сааман̣зрияаа. ануж̇аанаами, бхигкавз, имзсам̣ бан̃жаннам̣ бааривад̇д̇агам̣ бадиг̇г̇ахзд̇ум̣. зван̃жа бана, бхигкавз, имам̣ сигкаабад̣̇ам̣ уд̣̇д̣̇исзяяаат̇а.
510. Tena kho pana samayena bhikkhū kukkuccāyantā bhikkhunīnaṃ pārivattakacīvaraṃ na paṭiggaṇhanti. Bhikkhuniyo ujjhāyanti khiyyanti vipācenti – ‘‘kathañhi nāma ayyā amhākaṃ pārivattakacīvaraṃ na paṭiggahessantī’’ti! Assosuṃ kho bhikkhū tāsaṃ bhikkhunīnaṃ ujjhāyantīnaṃ khiyyantīnaṃ vipācentīnaṃ. Atha kho te bhikkhū bhagavato etamatthaṃ ārocesu. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, pañcannaṃ pārivattakaṃ paṭiggahetuṃ – bhikkhussa, bhikkhuniyā, sikkhamānāya, sāmaṇerassa, sāmaṇeriyā. Anujānāmi, bhikkhave, imesaṃ pañcannaṃ pārivattakaṃ paṭiggahetuṃ. Evañca pana, bhikkhave, imaṃ sikkhāpadaṃ uddiseyyātha.
511. ‘‘яо бана бхигку ан̃н̃аад̇игааяа бхигкунияаа хад̇т̇ад̇о жийварам̣ бадиг̇г̇ан̣хзяяа, ан̃н̃ад̇ра бааривад̇д̇агаа, ниссаг̇г̇ияам̣ баажид̇д̇ияа’’нд̇и.
511.‘‘Yo pana bhikkhu aññātikāya bhikkhuniyā hatthato cīvaraṃ paṭiggaṇheyya, aññatra pārivattakā, nissaggiyaṃ pācittiya’’nti.
512. яо банаад̇и яо яаад̣̇исо…бз… бхигкууд̇и…бз… аяам̣ имасмим̣ ад̇т̇з ад̇хиббзд̇о бхигкууд̇и.
512.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ан̃н̃аад̇игаа наама маад̇ид̇о ваа бид̇ид̇о ваа яаава сад̇д̇амаа бид̇аамахаяуг̇аа асамб̣ад̣̇д̇хаа.
Aññātikā nāma mātito vā pitito vā yāva sattamā pitāmahayugā asambaddhā.
бхигкуний наама убхад̇осан̇гхз убасамбаннаа.
Bhikkhunī nāma ubhatosaṅghe upasampannā.
жийварам̣ наама чаннам̣ жийвараанам̣ ан̃н̃ад̇арам̣ жийварам̣ вигаббанубаг̇ам̣ бажчимам̣.
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
ан̃н̃ад̇ра бааривад̇д̇агаад̇и табзд̇ваа бааривад̇д̇агам̣.
Aññatra pārivattakāti ṭhapetvā pārivattakaṃ.
бадиг̇г̇ан̣хаад̇и, баяог̇з д̣̇уггадам̣. бадилаабхзна ниссаг̇г̇ияам̣ ход̇и. ниссаж̇ж̇ид̇аб̣б̣ам̣ сан̇гхасса ваа г̇ан̣асса ваа буг̇г̇аласса ваа. зван̃жа бана, бхигкавз, ниссаж̇ж̇ид̇аб̣б̣ам̣…бз… ид̣̇ам̣ мз, бханд̇з, жийварам̣ ан̃н̃аад̇игааяа бхигкунияаа хад̇т̇ад̇о бадиг̇г̇ахид̇ам̣, ан̃н̃ад̇ра бааривад̇д̇агаа, ниссаг̇г̇ияам̣. имаахам̣ сан̇гхасса ниссаж̇ж̇аамийд̇и…бз… д̣̇ад̣̇зяяаад̇и…бз… д̣̇ад̣̇зяяунд̇и…бз… ааяасмад̇о д̣̇аммийд̇и.
Paṭiggaṇhāti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ aññātikāya bhikkhuniyā hatthato paṭiggahitaṃ, aññatra pārivattakā, nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
513. ан̃н̃аад̇игааяа ан̃н̃аад̇игасан̃н̃ий жийварам̣ бадиг̇г̇ан̣хаад̇и, ан̃н̃ад̇ра бааривад̇д̇агаа, ниссаг̇г̇ияам̣ баажид̇д̇ияам̣. ан̃н̃аад̇игааяа взмад̇иго жийварам̣ бадиг̇г̇ан̣хаад̇и, ан̃н̃ад̇ра бааривад̇д̇агаа, ниссаг̇г̇ияам̣ баажид̇д̇ияам̣. ан̃н̃аад̇игааяа н̃аад̇игасан̃н̃ий жийварам̣ бадиг̇г̇ан̣хаад̇и, ан̃н̃ад̇ра бааривад̇д̇агаа, ниссаг̇г̇ияам̣ баажид̇д̇ияам̣.
513. Aññātikāya aññātikasaññī cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ. Aññātikāya vematiko cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ. Aññātikāya ñātikasaññī cīvaraṃ paṭiggaṇhāti, aññatra pārivattakā, nissaggiyaṃ pācittiyaṃ.
згад̇оубасамбаннааяа хад̇т̇ад̇о жийварам̣ бадиг̇г̇ан̣хаад̇и, ан̃н̃ад̇ра бааривад̇д̇агаа, аабад̇д̇и д̣̇уггадасса. н̃аад̇игааяа ан̃н̃аад̇игасан̃н̃ий, аабад̇д̇и д̣̇уггадасса. н̃аад̇игааяа взмад̇иго, аабад̇д̇и д̣̇уггадасса. н̃аад̇игааяа н̃аад̇игасан̃н̃ий, анаабад̇д̇и.
Ekatoupasampannāya hatthato cīvaraṃ paṭiggaṇhāti, aññatra pārivattakā, āpatti dukkaṭassa. Ñātikāya aññātikasaññī, āpatti dukkaṭassa. Ñātikāya vematiko, āpatti dukkaṭassa. Ñātikāya ñātikasaññī, anāpatti.
514. анаабад̇д̇и н̃аад̇игааяа, бааривад̇д̇агам̣ барид̇д̇зна ваа вибулам̣, вибулзна ваа барид̇д̇ам̣, бхигку виссаасам̣ г̇ан̣хаад̇и, д̇аавагаалигам̣ г̇ан̣хаад̇и , жийварам̣ табзд̇ваа ан̃н̃ам̣ баригкаарам̣ г̇ан̣хаад̇и, сигкамаанааяа, сааман̣зрияаа, уммад̇д̇агасса, аад̣̇игаммигассаад̇и.
514. Anāpatti ñātikāya, pārivattakaṃ parittena vā vipulaṃ, vipulena vā parittaṃ, bhikkhu vissāsaṃ gaṇhāti, tāvakālikaṃ gaṇhāti , cīvaraṃ ṭhapetvā aññaṃ parikkhāraṃ gaṇhāti, sikkhamānāya, sāmaṇeriyā, ummattakassa, ādikammikassāti.
жийварабадиг̇г̇ахан̣асигкаабад̣̇ам̣ нидтид̇ам̣ бан̃жамам̣.
Cīvarapaṭiggahaṇasikkhāpadaṃ niṭṭhitaṃ pañcamaṃ.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 5. жийварабадиг̇г̇ахан̣асигкаабад̣̇аван̣н̣анаа • 5. Cīvarapaṭiggahaṇasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 5. жийварабадиг̇г̇ахан̣асигкаабад̣̇аван̣н̣анаа • 5. Cīvarapaṭiggahaṇasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 5. жийварабадиг̇г̇ахан̣асигкаабад̣̇аван̣н̣анаа • 5. Cīvarapaṭiggahaṇasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 5. жийварабадиг̇г̇ахан̣асигкаабад̣̇аван̣н̣анаа • 5. Cīvarapaṭiggahaṇasikkhāpadavaṇṇanā
