Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi

    ၂၁၅. စီဝရရဇနကထာ

    215. Cīvararajanakathā

    ၃၄၄. တေန ခော ပန သမယေန ဘိက္ခူ ဆကဏေနပိ ပဏ္ဍုမတ္တိကာယပိ စီဝရံ ရဇန္တိ။ စီဝရံ ဒုဗ္ဗဏ္ဏံ ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ , ဘိက္ခဝေ, ဆ ရဇနာနိ – မူလရဇနံ, ခန္ဓရဇနံ, တစရဇနံ, ပတ္တရဇနံ, ပုပ္ဖရဇနံ, ဖလရဇနန္တိ။

    344. Tena kho pana samayena bhikkhū chakaṇenapi paṇḍumattikāyapi cīvaraṃ rajanti. Cīvaraṃ dubbaṇṇaṃ hoti. Bhagavato etamatthaṃ ārocesuṃ. Anujānāmi , bhikkhave, cha rajanāni – mūlarajanaṃ, khandharajanaṃ, tacarajanaṃ, pattarajanaṃ, puppharajanaṃ, phalarajananti.

    တေန ခော ပန သမယေန ဘိက္ခူ သီတုဒကာယ 1 စီဝရံ ရဇန္တိ။ စီဝရံ ဒုဂ္ဂန္ဓံ ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ရဇနံ ပစိတုံ စုလ္လံ ရဇနကုမ္ဘိန္တိ။ ရဇနံ ဥတ္တရိယတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဥတ္တရာဠုမ္ပံ 2 ဗန္ဓိတုန္တိ။

    Tena kho pana samayena bhikkhū sītudakāya 3 cīvaraṃ rajanti. Cīvaraṃ duggandhaṃ hoti. Bhagavato etamatthaṃ ārocesuṃ. Anujānāmi, bhikkhave, rajanaṃ pacituṃ cullaṃ rajanakumbhinti. Rajanaṃ uttariyati. Bhagavato etamatthaṃ ārocesuṃ. Anujānāmi, bhikkhave, uttarāḷumpaṃ 4 bandhitunti.

    တေန ခော ပန သမယေန ဘိက္ခူ န ဇာနန္တိ ရဇနံ ပက္ကံ ဝာ အပက္ကံ ဝာ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဥဒကေ ဝာ နခပိဋ္ဌိကာယ ဝာ ထေဝကံ ဒာတုန္တိ။

    Tena kho pana samayena bhikkhū na jānanti rajanaṃ pakkaṃ vā apakkaṃ vā. Bhagavato etamatthaṃ ārocesuṃ. Anujānāmi, bhikkhave, udake vā nakhapiṭṭhikāya vā thevakaṃ dātunti.

    တေန ခော ပန သမယေန ဘိက္ခူ ရဇနံ ဩရောပေန္တာ ကုမ္ဘိံ အာဝိဉ္ဆန္တိ 5။ ကုမ္ဘီ ဘိဇ္ဇတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ရဇနုဠုင္ကံ 6 ဒဏ္ဍကထာလကန္တိ။

    Tena kho pana samayena bhikkhū rajanaṃ oropentā kumbhiṃ āviñchanti 7. Kumbhī bhijjati. Bhagavato etamatthaṃ ārocesuṃ. Anujānāmi, bhikkhave, rajanuḷuṅkaṃ 8 daṇḍakathālakanti.

    တေန ခော ပန သမယေန ဘိက္ခူနံ ရဇနဘာဇနံ န သံဝိဇ္ဇတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ရဇနကောလမ္ဗံ ရဇနဃဋန္တိ။

    Tena kho pana samayena bhikkhūnaṃ rajanabhājanaṃ na saṃvijjati. Bhagavato etamatthaṃ ārocesuṃ. Anujānāmi, bhikkhave, rajanakolambaṃ rajanaghaṭanti.

    တေန ခော ပန သမယေန ဘိက္ခူ ပာတိယာပိ ပတ္တေပိ စီဝရံ ဩမဒ္ဒန္တိ။ စီဝရံ ပရိဘိဇ္ဇတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ရဇနဒောဏိကန္တိ။

    Tena kho pana samayena bhikkhū pātiyāpi pattepi cīvaraṃ omaddanti. Cīvaraṃ paribhijjati. Bhagavato etamatthaṃ ārocesuṃ. Anujānāmi, bhikkhave, rajanadoṇikanti.

    တေန ခော ပန သမယေန ဘိက္ခူ ဆမာယ စီဝရံ ပတ္ထရန္တိ။ စီဝရံ ပံသုကိတံ ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, တိဏသန္ထာရကန္တိ။

    Tena kho pana samayena bhikkhū chamāya cīvaraṃ pattharanti. Cīvaraṃ paṃsukitaṃ hoti. Bhagavato etamatthaṃ ārocesuṃ. Anujānāmi, bhikkhave, tiṇasanthārakanti.

    တိဏသန္ထာရကော ဥပစိကာဟိ ခဇ္ဇတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, စီဝရဝံသံ စီဝရရဇ္ဇုန္တိ။

    Tiṇasanthārako upacikāhi khajjati. Bhagavato etamatthaṃ ārocesuṃ. Anujānāmi, bhikkhave, cīvaravaṃsaṃ cīvararajjunti.

    မဇ္ဈေန လဂ္ဂေန္တိ။ ရဇနံ ဥဘတော ဂလတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ကဏ္ဏေ ဗန္ဓိတုန္တိ။

    Majjhena laggenti. Rajanaṃ ubhato galati. Bhagavato etamatthaṃ ārocesuṃ. Anujānāmi, bhikkhave, kaṇṇe bandhitunti.

    ကဏ္ဏော ဇီရတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ကဏ္ဏသုတ္တကန္တိ။

    Kaṇṇo jīrati. Bhagavato etamatthaṃ ārocesuṃ. Anujānāmi, bhikkhave, kaṇṇasuttakanti.

    ရဇနံ ဧကတော ဂလတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, သမ္ပရိဝတ္တကံ သမ္ပရိဝတ္တကံ ရဇေတုံ, န စ အစ္ဆိန္နေ ထေဝေ ပက္ကမိတုန္တိ။

    Rajanaṃ ekato galati. Bhagavato etamatthaṃ ārocesuṃ. Anujānāmi, bhikkhave, samparivattakaṃ samparivattakaṃ rajetuṃ, na ca acchinne theve pakkamitunti.

    တေန ခော ပန သမယေန စီဝရံ ပတ္ထိန္နံ ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဥဒကေ ဩသာရေတုန္တိ။

    Tena kho pana samayena cīvaraṃ patthinnaṃ hoti. Bhagavato etamatthaṃ ārocesuṃ. Anujānāmi, bhikkhave, udake osāretunti.

    တေန ခော ပန သမယေန စီဝရံ ဖရုသံ ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ , ဘိက္ခဝေ, ပာဏိနာ အာကောဋေတုန္တိ ။

    Tena kho pana samayena cīvaraṃ pharusaṃ hoti. Bhagavato etamatthaṃ ārocesuṃ. Anujānāmi , bhikkhave, pāṇinā ākoṭetunti .

    တေန ခော ပန သမယေန ဘိက္ခူ အစ္ဆိန္နကာနိ စီဝရာနိ ဓာရေန္တိ ဒန္တကာသာဝာနိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – သေယ္ယထာပိ နာမ 9 ဂိဟီ ကာမဘောဂိနောတိ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, အစ္ဆိန္နကာနိ စီဝရာနိ ဓာရေတဗ္ဗာနိ။ ယော ဓာရေယ္ယ, အာပတ္တိ ဒုက္ကဋသ္သာတိ။

    Tena kho pana samayena bhikkhū acchinnakāni cīvarāni dhārenti dantakāsāvāni. Manussā ujjhāyanti khiyyanti vipācenti – seyyathāpi nāma 10 gihī kāmabhoginoti. Bhagavato etamatthaṃ ārocesuṃ. Na, bhikkhave, acchinnakāni cīvarāni dhāretabbāni. Yo dhāreyya, āpatti dukkaṭassāti.

    စီဝရရဇနကထာ နိဋ္ဌိတာ။

    Cīvararajanakathā niṭṭhitā.




    Next: ၂၁၆. ဆိန္နကစီဝရာနုဇာနနာ • 216. Chinnakacīvarānujānanā




    Footnotes:
    1. သီတုန္ဒိကာယ (သီ.), သီတူဒကာယ (သ္ယာ.)
    2. ဥတ္တရာဠုပံ (ယောဇနာ), ဥတ္တရာဠုပံ (သ္ယာ.)
    3. sītundikāya (sī.), sītūdakāya (syā.)
    4. uttarāḷupaṃ (yojanā), uttarāḷupaṃ (syā.)
    5. အာဝိဉ္ဇန္တိ (သီ.), အာဝဋ္ဋန္တိ (သ္ယာ.)
    6. ရဇနာဠုင္ကံ (ယောဇနာ)
    7. āviñjanti (sī.), āvaṭṭanti (syā.)
    8. rajanāḷuṅkaṃ (yojanā)
    9. သေယ္ယထာပိ (?)
    10. seyyathāpi (?)



    Related texts:



    အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / စီဝရရဇနကထာ • Cīvararajanakathā

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / စီဝရရဇနကထာဝဏ္ဏနာ • Cīvararajanakathāvaṇṇanā

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / စီဝရရဇနကထာဝဏ္ဏနာ • Cīvararajanakathāvaṇṇanā

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / စီဝရရဇနကထာဒိဝဏ္ဏနာ • Cīvararajanakathādivaṇṇanā

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၁၅. စီဝရရဇနကထာ • 215. Cīvararajanakathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact