| Library / Tipiṭaka / ತಿಪಿಟಕ • Tipiṭaka / ಪರಿವಾರ-ಅಟ್ಠಕಥಾ • Parivāra-aṭṭhakathā |
ಚೋದಕಪುಚ್ಛಾವಿಸ್ಸಜ್ಜನಾವಣ್ಣನಾ
Codakapucchāvissajjanāvaṇṇanā
೩೬೨-೩೬೩. ಚೋದನಾಯ ಕೋ ಆದೀತಿಆದಿಪುಚ್ಛಾನಂ ವಿಸ್ಸಜ್ಜನೇ ಸಚ್ಚೇ ಚ ಅಕುಪ್ಪೇ ಚಾತಿ ಸಚ್ಚೇ ಪತಿಟ್ಠಾತಬ್ಬಂ ಅಕುಪ್ಪೇ ಚ। ಯಂ ಕತಂ ವಾ ನ ಕತಂ ವಾ, ತದೇವ ವತ್ತಬ್ಬಂ, ನ ಚ ಚೋದಕೇ ವಾ ಅನುವಿಜ್ಜಕೇ ವಾ ಸಙ್ಘೇ ವಾ ಕೋಪೋ ಉಪ್ಪಾದೇತಬ್ಬೋ। ಓತಿಣ್ಣಾನೋತಿಣ್ಣಂ ಜಾನಿತಬ್ಬನ್ತಿ ಓತಿಣ್ಣಞ್ಚ ಅನೋತಿಣ್ಣಞ್ಚ ವಚನಂ ಜಾನಿತಬ್ಬಂ। ತತ್ರಾಯಂ ಜಾನನವಿಧಿ – ಏತ್ತಕಾ ಚೋದಕಸ್ಸ ಪುಬ್ಬಕಥಾ, ಏತ್ತಕಾ ಪಚ್ಛಿಮಕಥಾ, ಏತ್ತಕಾ ಚುದಿತಕಸ್ಸ ಪುಬ್ಬಕಥಾ, ಏತ್ತಕಾ ಪಚ್ಛಿಮಕಥಾತಿ ಜಾನಿತಬ್ಬಾ । ಚೋದಕಸ್ಸ ಪಮಾಣಂ ಗಣ್ಹಿತಬ್ಬಂ, ಚುದಿತಕಸ್ಸ ಪಮಾಣಂ ಗಣ್ಹಿತಬ್ಬಂ, ಅನುವಿಜ್ಜಕಸ್ಸ ಪಮಾಣಂ ಗಣ್ಹಿತಬ್ಬಂ, ಅನುವಿಜ್ಜಕೋ ಅಪ್ಪಮತ್ತಕಮ್ಪಿ ಅಹಾಪೇನ್ತೋ ‘‘ಆವುಸೋ ಸಮನ್ನಾಹರಿತ್ವಾ ಉಜುಂ ಕತ್ವಾ ಆಹರಾ’’ತಿ ವತ್ತಬ್ಬೋ, ಸಙ್ಘೇನ ಏವಂ ಪಟಿಪಜ್ಜಿತಬ್ಬಂ। ಯೇನ ಧಮ್ಮೇನ ಯೇನ ವಿನಯೇನ ಯೇನ ಸತ್ಥುಸಾಸನೇನ ತಂ ಅಧಿಕರಣಂ ವೂಪಸಮ್ಮತೀತಿ ಏತ್ಥ ಧಮ್ಮೋತಿ ಭೂತಂ ವತ್ಥು। ವಿನಯೋತಿ ಚೋದನಾ ಚೇವ ಸಾರಣಾ ಚ। ಸತ್ಥುಸಾಸನನ್ತಿ ಞತ್ತಿಸಮ್ಪದಾ ಚೇವ ಅನುಸ್ಸಾವನಸಮ್ಪದಾ ಚ। ಏತೇನ ಹಿ ಧಮ್ಮೇನ ಚ ವಿನಯೇನ ಚ ಸತ್ಥುಸಾಸನೇನ ಚ ಅಧಿಕರಣಂ ವೂಪಸಮತಿ, ತಸ್ಮಾ ಅನುವಿಜ್ಜಕೇನ ಭೂತೇನ ವತ್ಥುನಾ ಚೋದೇತ್ವಾ ಆಪತ್ತಿಂ ಸಾರೇತ್ವಾ ಞತ್ತಿಸಮ್ಪದಾಯ ಚೇವ ಅನುಸ್ಸಾವನಸಮ್ಪದಾಯ ಚ ತಂ ಅಧಿಕರಣಂ ವೂಪಸಮೇತಬ್ಬಂ, ಅನುವಿಜ್ಜಕೇನ ಏವಂ ಪಟಿಪಜ್ಜಿತಬ್ಬಂ। ಸೇಸಮೇತ್ಥ ಉತ್ತಾನಮೇವ।
362-363.Codanāyako ādītiādipucchānaṃ vissajjane sacce ca akuppe cāti sacce patiṭṭhātabbaṃ akuppe ca. Yaṃ kataṃ vā na kataṃ vā, tadeva vattabbaṃ, na ca codake vā anuvijjake vā saṅghe vā kopo uppādetabbo. Otiṇṇānotiṇṇaṃ jānitabbanti otiṇṇañca anotiṇṇañca vacanaṃ jānitabbaṃ. Tatrāyaṃ jānanavidhi – ettakā codakassa pubbakathā, ettakā pacchimakathā, ettakā cuditakassa pubbakathā, ettakā pacchimakathāti jānitabbā . Codakassa pamāṇaṃ gaṇhitabbaṃ, cuditakassa pamāṇaṃ gaṇhitabbaṃ, anuvijjakassa pamāṇaṃ gaṇhitabbaṃ, anuvijjako appamattakampi ahāpento ‘‘āvuso samannāharitvā ujuṃ katvā āharā’’ti vattabbo, saṅghena evaṃ paṭipajjitabbaṃ. Yena dhammena yena vinayena yena satthusāsanena taṃ adhikaraṇaṃ vūpasammatīti ettha dhammoti bhūtaṃ vatthu. Vinayoti codanā ceva sāraṇā ca. Satthusāsananti ñattisampadā ceva anussāvanasampadā ca. Etena hi dhammena ca vinayena ca satthusāsanena ca adhikaraṇaṃ vūpasamati, tasmā anuvijjakena bhūtena vatthunā codetvā āpattiṃ sāretvā ñattisampadāya ceva anussāvanasampadāya ca taṃ adhikaraṇaṃ vūpasametabbaṃ, anuvijjakena evaṃ paṭipajjitabbaṃ. Sesamettha uttānameva.
೩೬೪. ಉಪೋಸಥೋ ಕಿಮತ್ಥಾಯಾತಿಆದಿಪುಚ್ಛಾವಿಸ್ಸಜ್ಜನಮ್ಪಿ ಉತ್ತಾನಮೇವ। ಅವಸಾನಗಾಥಾಸು ಥೇರೇ ಚ ಪರಿಭಾಸತೀತಿ ಅವಮಞ್ಞಂ ಕರೋನ್ತೋ ‘‘ಕಿಂ ಇಮೇ ಜಾನನ್ತೀ’’ತಿ ಪರಿಭಾಸತಿ। ಖತೋ ಉಪಹತಿನ್ದ್ರಿಯೋತಿ ತಾಯ ಛನ್ದಾದಿಗಾಮಿತಾಯ ತೇನ ಚ ಪರಿಭಾಸನೇನ ಅತ್ತನಾ ಅತ್ತನೋ ಖತತ್ತಾ ಖತೋ। ಸದ್ಧಾದೀನಞ್ಚ ಇನ್ದ್ರಿಯಾನಂ ಉಪಹತತ್ತಾ ಉಪಹತಿನ್ದ್ರಿಯೋ। ನಿರಯಂ ಗಚ್ಛತಿ ದುಮ್ಮೇಧೋ, ನ ಚ ಸಿಕ್ಖಾಯ ಗಾರವೋತಿ ಸೋ ಖತೋ ಉಪಹತಿನ್ದ್ರಿಯೋ ಪಞ್ಞಾಯ ಅಭಾವತೋ ದುಮ್ಮೇಧೋ ತೀಸು ಸಿಕ್ಖಾಸು ಅಸಿಕ್ಖನತೋ ನ ಚ ಸಿಕ್ಖಾಯ ಗಾರವೋ ಕಾಯಸ್ಸ ಭೇದಾ ನಿರಯಮೇವ ಉಪಗಚ್ಛತಿ, ತಸ್ಮಾ ನ ಚ ಆಮಿಸಂ ನಿಸ್ಸಾಯ…ಪೇ॰… ಯಥಾ ಧಮ್ಮೋ ತಥಾ ಕರೇತಿ। ತಸ್ಸತ್ಥೋ ನ ಚ ಆಮಿಸಂ ನಿಸ್ಸಾಯ ಕರೇ, ಚುದಿತಕಚೋದಕೇಸು ಹಿ ಅಞ್ಞತರೇನ ದಿನ್ನಂ ಚೀವರಾದಿಆಮಿಸಂ ಗಣ್ಹನ್ತೋ ಆಮಿಸಂ ನಿಸ್ಸಾಯ ಕರೋತಿ, ಏವಂ ನ ಕರೇಯ್ಯ। ನ ಚ ನಿಸ್ಸಾಯ ಪುಗ್ಗಲನ್ತಿ ‘‘ಅಯಂ ಮೇ ಉಪಜ್ಝಾಯೋ ವಾ ಆಚರಿಯೋ ವಾ’’ತಿಆದಿನಾ ನಯೇನ ಛನ್ದಾದೀಹಿ ಗಚ್ಛನ್ತೋ ಪುಗ್ಗಲಂ ನಿಸ್ಸಾಯ ಕರೋತಿ, ಏವಂ ನ ಕರೇಯ್ಯ। ಅಥ ಖೋ ಉಭೋಪೇತೇ ವಿವಜ್ಜೇತ್ವಾ ಯಥಾ ಧಮ್ಮೋ ಠಿತೋ, ತಥೇವ ಕರೇಯ್ಯಾತಿ।
364.Uposatho kimatthāyātiādipucchāvissajjanampi uttānameva. Avasānagāthāsu there ca paribhāsatīti avamaññaṃ karonto ‘‘kiṃ ime jānantī’’ti paribhāsati. Khato upahatindriyoti tāya chandādigāmitāya tena ca paribhāsanena attanā attano khatattā khato. Saddhādīnañca indriyānaṃ upahatattā upahatindriyo. Nirayaṃ gacchati dummedho, na ca sikkhāya gāravoti so khato upahatindriyo paññāya abhāvato dummedho tīsu sikkhāsu asikkhanato na ca sikkhāya gāravo kāyassa bhedā nirayameva upagacchati, tasmā na ca āmisaṃ nissāya…pe… yathā dhammo tathā kareti. Tassattho na ca āmisaṃ nissāya kare, cuditakacodakesu hi aññatarena dinnaṃ cīvarādiāmisaṃ gaṇhanto āmisaṃ nissāya karoti, evaṃ na kareyya. Na ca nissāya puggalanti ‘‘ayaṃ me upajjhāyo vā ācariyo vā’’tiādinā nayena chandādīhi gacchanto puggalaṃ nissāya karoti, evaṃ na kareyya. Atha kho ubhopete vivajjetvā yathā dhammo ṭhito, tatheva kareyyāti.
ಉಪಕಣ್ಣಕಂ ಜಪ್ಪತೀತಿ ‘‘ಏವಂ ಕಥೇಹಿ, ಮಾ ಏವಂ ಕಥಯಿತ್ಥಾ’’ತಿ ಕಣ್ಣಮೂಲೇ ಮನ್ತೇತಿ। ಜಿಮ್ಹಂ ಪೇಕ್ಖತೀತಿ ದೋಸಮೇವ ಗವೇಸತಿ। ವೀತಿಹರತೀತಿ ವಿನಿಚ್ಛಯಂ ಹಾಪೇತಿ। ಕುಮ್ಮಗ್ಗಂ ಪಟಿಸೇವತೀತಿ ಆಪತ್ತಿಂ ದೀಪೇತಿ।
Upakaṇṇakaṃ jappatīti ‘‘evaṃ kathehi, mā evaṃ kathayitthā’’ti kaṇṇamūle manteti. Jimhaṃ pekkhatīti dosameva gavesati. Vītiharatīti vinicchayaṃ hāpeti. Kummaggaṃ paṭisevatīti āpattiṃ dīpeti.
ಅಕಾಲೇನ ಚ ಚೋದೇತೀತಿ ಅನೋಕಾಸೇ ಅನಜ್ಝಿಟ್ಠೋವ ಚೋದೇತಿ। ಪುಬ್ಬಾಪರಂ ನ ಜಾನಾತೀತಿ ಪುರಿಮಕಥಞ್ಚ ಪಚ್ಛಿಮಕಥಞ್ಚ ನ ಜಾನಾತಿ।
Akālena ca codetīti anokāse anajjhiṭṭhova codeti. Pubbāparaṃ na jānātīti purimakathañca pacchimakathañca na jānāti.
ಅನುಸನ್ಧಿವಚನಪಥಂ ನ ಜಾನಾತೀತಿ ಕಥಾನುಸನ್ಧಿವಿನಿಚ್ಛಯಾನುಸನ್ಧಿವಸೇನ ವಚನಂ ನ ಜಾನಾತಿ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
Anusandhivacanapathaṃna jānātīti kathānusandhivinicchayānusandhivasena vacanaṃ na jānāti. Sesaṃ sabbattha uttānamevāti.
ಚೋದನಾಕಣ್ಡವಣ್ಣನಾ ನಿಟ್ಠಿತಾ।
Codanākaṇḍavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi
೧. ಅನುವಿಜ್ಜಕಅನುಯೋಗೋ • 1. Anuvijjakaanuyogo
೨. ಚೋದಕಾದಿಪಟಿಪತ್ತಿ • 2. Codakādipaṭipatti
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅನುವಿಜ್ಜಕಕಿಚ್ಚವಣ್ಣನಾ • Anuvijjakakiccavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅನುವಿಜ್ಜಕಕಿಚ್ಚವಣ್ಣನಾ • Anuvijjakakiccavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಚೋದಕಪುಚ್ಛಾವಿಸ್ಸಜ್ಜನಾ • Codakapucchāvissajjanā
