| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૭. ચોદનાસુત્તવણ્ણના
7. Codanāsuttavaṇṇanā
૧૬૭. સત્તમે ચોદકેનાતિ વત્થુસન્દસ્સના આપત્તિસન્દસ્સના સંવાસપ્પટિક્ખેપો સામીચિપ્પટિક્ખેપોતિ ચતૂહિ ચોદનાવત્થૂહિ ચોદયમાનેન. કાલેન વક્ખામિ નો અકાલેનાતિ એત્થ ચુદિતકસ્સ કાલો કથિતો, ન ચોદકસ્સ. પરં ચોદેન્તેન હિ પરિસમજ્ઝે વા ઉપોસથપવારણગ્ગે વા આસનસાલાભોજનસાલાદીસુ વા ન ચોદેતબ્બો, દિવાટ્ઠાને નિસિન્નકાલે ‘‘કરોતાયસ્મા ઓકાસં, અહં આયસ્મન્તં વત્તુકામો’’તિ એવં ઓકાસં કારેત્વા ચોદેતબ્બો. પુગ્ગલં પન ઉપપરિક્ખિત્વા યો લોલપુગ્ગલો અભૂતં વત્વા ભિક્ખૂનં અયસં આરોપેતિ, સો ઓકાસકમ્મં વિનાપિ ચોદેતબ્બો. ભૂતેનાતિ તચ્છેન સભાવેન. સણ્હેનાતિ મટ્ઠેન મુદુકેન. અત્થસંહિતેનાતિ અત્થકામતાય હિતકામતાય ઉપેતેન. અવિપ્પટિસારો ઉપદહાતબ્બોતિ અમઙ્કુભાવો ઉપનેતબ્બો. અલં તે અવિપ્પટિસારાયાતિ યુત્તં તે અમઙ્કુભાવાય. સેસમેત્થ ઉત્તાનમેવાતિ. અટ્ઠમં હેટ્ઠા વુત્તનયત્તા પાકટમેવ.
167. Sattame codakenāti vatthusandassanā āpattisandassanā saṃvāsappaṭikkhepo sāmīcippaṭikkhepoti catūhi codanāvatthūhi codayamānena. Kālena vakkhāmi no akālenāti ettha cuditakassa kālo kathito, na codakassa. Paraṃ codentena hi parisamajjhe vā uposathapavāraṇagge vā āsanasālābhojanasālādīsu vā na codetabbo, divāṭṭhāne nisinnakāle ‘‘karotāyasmā okāsaṃ, ahaṃ āyasmantaṃ vattukāmo’’ti evaṃ okāsaṃ kāretvā codetabbo. Puggalaṃ pana upaparikkhitvā yo lolapuggalo abhūtaṃ vatvā bhikkhūnaṃ ayasaṃ āropeti, so okāsakammaṃ vināpi codetabbo. Bhūtenāti tacchena sabhāvena. Saṇhenāti maṭṭhena mudukena. Atthasaṃhitenāti atthakāmatāya hitakāmatāya upetena. Avippaṭisāro upadahātabboti amaṅkubhāvo upanetabbo. Alaṃte avippaṭisārāyāti yuttaṃ te amaṅkubhāvāya. Sesamettha uttānamevāti. Aṭṭhamaṃ heṭṭhā vuttanayattā pākaṭameva.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૭. ચોદનાસુત્તં • 7. Codanāsuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૭-૯. ચોદનાસુત્તાદિવણ્ણના • 7-9. Codanāsuttādivaṇṇanā
